الشعبية نجمة تزين سماء مدينة الخرطوم بحري

Quote: سعادة المستشار عبد الكريم (الكريم ) ) تشكر في مداخلة عبد الرحيم الضب كما اشكر اخواني (عبدون )و(منير) على الاضافة ( ومنعول ابو الدنيا ام بناياً قش ) قبل كل شي الرحمة والمغفره الى الاخ العجب وتخيل ياعبدون كنت عايز ارد الى الاخ ابومحمد فؤاد واقول له منتصر عبدالله (هو منتصر بيجن او منتصر كارلوس ) وكثرة القابه اما صلاح الضب الكبير في الشعبية هو لاعب حلة الصديق والغريبة الصغير والكبير كلاهما نفس الاستايل في اللعب .ونسيت العجب وكنت عايز اقول العجب واحد وهو موسى عجب (كوبر ) في تلك الايام متناسيا اخونا المرحوم سيد الاسم( العجب) وتخيل دربنا في فترة من الفترات في فريق الهدف وكان رجل خلوق وفكره واسع في التدريب وعند هزيمتنا كان الناس تكايده بالمزاح وتقول له( العجب حبيبي ) زمن والله زمن .والله يرحمك ويغفر لك ياعجب وفعلا كنت عجب.وشكرا اخي عبدون . بصراحة اشكركم على الاضافة وهذا ما تسمو اليه البوستات عند كتابة شخص موضوع .ومن له اضافة فيتطرق اليها حتى الناس تستطيع تغطية الموضوع بكامل تفاصيله كما كنا نعمل انا ووزير التوثيق صديقي وحبيبي عماد عثمان .(خد وهات )وباصات بينيه في بوست بحري طراوه. وياعبدون انت ونديمك شمس الدين ساتي والله زي رونالدينو وكاكا . ومتعونا بالمواصله اسامه سليمان . الشاب الظريف الوريف .ياخي اخير ظهرت حمد الله على السلامة انا جاي السودان قريبا اجازة قصيرة يعني عشره يوم واهم شي تكون عملت بوصيتي في مشروع الرجيم المكثف ولنا لقاء وجلسات مطوله بس قول لي حسن نور الدائم جهّز الشاي . صلاح شكوكو. تشكر على معلومات تسمية ميدان عقرب ياخي والله كنا نجري زي البهائم وما عارفين جارين في شنو وفوق شنو .واخيرا تم اصدار الحكم على اخوك شهاب بالبراءه وما تنسي تحياتي الى صديقي النحيف الحريف محمد عبد الصادق (خليفة شيخ ادريس في الملاعب ) وسجل لي ارقام تلفوناتهم .ومن هنا تقبل تحيات اخواننا (اسعد وصلاح بوارث )ودار الحديث في شخصك وعن موني . وتخيل عرفت ان موني مسيحي واحيانا كنت اشاهده في الوفيات بيشيل الفاتحة وبالله حدثنا عن اللاعب المرحوم ( الشهيد ) الواثق صباح الخير ولو بأختصار . عادل درق كابتن فريق الشعله . كيف اخبارك واحوالك صراحة انشغلت بمواضيع السفر واجراءاته ولم استطع مهاتفتك المهم ياريت لو تكتب لنا اسماء اللاعبين الذين لعبوا بعدكم في فريق الشعله وكان يقال لهم فرقة ( عقد الجلاد ) وهذا للاداء المميز لهم واذكر منهم عبد اللطيف والريح وولد عبد السلام ( بقالة القرين كونر ) . وهؤلاء الصغار تفردوا في ممارسة لعب الكرة بطريقة غريبة واحرزوا الكاس وعملوا لهم عشاء في مطعم (امواج ) كحافز لهم . وحواء ولود في الشعبية من المفك وانت ماشي . دكتورة رحاب خليفة . ليه شلتِي صورة البنت الجميله من البروفايل ده حقد منك ولا شنو. وكما قال الفنان العطبراوي (نحن عشاق الجمال اين ما كان الجمال ) وقبلي علينا شويه والبوست بتاعك رائع ونحن متابعين من بعيد لي بعيد . دكتورة ستنا . تشكري وبالله الناس الضروسهم (قُلاد ) ديل انسينا منهم وعطّري لينا حوش ود حمد ده بالفل والياسمين ودمتم .......... وليد عبد اللطيف