الشعبية نجمة تزين سماء مدينة الخرطوم بحري

Quote: في الشاطي طاب لينا السمر وحبيبنا خاف من ضو القمر ضو القمر يكشفنا اه ضو القمر بالله يالباسم البديغ غنينا لي وكت السحر انا و انت اه انا وانت والنيل والقمر انت السعاده باكمله يا ارقى انواع البشر كدا كدا وكدا كدا يا حبيبي مالي ومال كدا . ____________ في ضفاف النيل كانت الحفله الورود زاهيه بناتنا محتفله جن بنات الحور لينا بغفله ومافي زول يوم داك قلبو ما حبّه . وقال شمس الدين الشعبية التي لاتغيب في بداية صفحة رقم 50:- (وقطع البحر الي أمدرمان سباحة والشباب من الشعبية والمزاد الذين استشهدوا غرقا .. ومعكم لإشراك الصديق وليد عبد اللطيف ) والله ياشمس الدين ما تقول اهملنا كلامك بس احيانا في اشياء نتركها للقاص الاول حاج حمد لكي يسرد فيها لانه سبق وقال مثلها بطريقة جميله وله الافضلية لكي يدلي بدلوه وغيره كثر في البوست وما تنسى في ناس اكبر مننا عشان كدا بنترك لهم ضربت البدايه وياريت لو يسمحوا لي :- طبعا ياشمس البحر كان له برنامج ممتع لكل شباب الشعبية والله انا واحد من الناس قطعوا نفسي كل يوم في الاجازه ماشي البحر مع امي يديها العافية والله طريق بعيد بشكل عشان نفتش الشباب في حال تأخيرهم واحيانا بكون عارف انهم مشوا البحر ولم اخبر احد لان زي ما عارف اولاد الحله اكبر مننا وممكن يعملوا لي مجلس تحقيق ويوصفوني وينعتوني بالمشاطة واخوك طبعا كان عارف حركاتهم لم يكونوا داخلين الحله يغسلوا ارجلهم ولكن رغم ذلك كان تفتيشهم عسير من عجائز الحي الى تفتيش اللباسات التي تعلق بها رمال البحر وعندما ذكر دكتور قناوي( التبربونه )على طول سرحت في ايام البحر والتبربونه والنبق والرحلات الجميله بالزات تحت كبري شمبات وطبعا اخوكم مهارته ضعيفة في السباحة وممكن يغرق في طشت وتخيل كثيرا ما كنت اذهب معهم البحر وبرضو الى يومنا هذا لم اتعلم السباحة ولهذا السبب اخاف منه للان . في يوم من الايام وكل العاده في اجازة من الاجازات ذهبنا نحن وشباب الحي للبحر بعد معاناه شديده في الهروب من الحي ياخي هربنا زي الفلاشا وواحد واحد وكان لنا نقطة تلاقي متفقين عليها وما احلى تلاقينا لان به تحققت المهمه بكل سلام طبعا ياشمس الدين تعرف في ناس من الحلة يجيدون السباحة وتعرف كمان احيانا تتكون جزر في البحر وتجتمع في الجزيرة جميع حلال الشعبية يقوموا اولاد حلتنا يتفاصحوا ويعملوا تحدي كرة قدم في الجزيرة وكمان يعلموا طال ما انا معهم النصر حليفهم (شفت الثقة ) والخصم قبل التحدي وكانهم يعلموا باني لم استطيع السباحة للذهاب الى الجزيرة .فتتحرك المسيرة الى الجزيرة طبعا قمت اخدت جماعتي على جنب فقلت لهم انسحبوا من التحدي انتوا ناسين انا ما بعرف اعوم ولو جبتو لي رفاس ما بمشي معاكم . فقاموا اقنعوني وقالو لي سوف نعمل احتياطي ناس تمشي قدامك وناس تمشي خلفك المهم نجت العملية ولعبنا وانتصرنا على الخصم وتجينا المهمه الصعبة وهي مهمة العوده وعملوا نفس الخطه ولكن قربت تفشل واخوك الحمد لله قرب يحصل خيرة شباب الحي من ضحايا البحر في الاجازة . وهؤلا افضل من يسبح في النيل تحت اي ظروف وحتى المحيطات قطع البحر الى امدرمان عندهم زي الخروج من غرفة نومهم وقولوا ماشاء الله . 1- فريد ود عمك سلمان 2- عمر ود عمك عز الدين الترزي 3- طه ود عمك عباس ( وهو فشل في تدربي لكي اجيد السباحه .ومن يخاف لم يتعلم ) 4- حيدر قريب ناس اولاد ابو كرّوق (راشد وعادل وعامر محمد الحسن ) والله يرحم من فقدناهم من الحي وعندما نتذكرهم ندعوا لهم بالمغفره والرحمه وبالله من يقرأ هذا الكلام فيدعوا لهم بالرحمة والمغفرة وهم 1- ود الرضي 2- ناصر اليماني 3- خلف الله ابراهيم حلة السماكية 1- ولد سيف الدين منور وتوفي قبل 4 شهور تقريبا وهو البيت الفاتح في بيت ناس عزام فرح سابقا والله يرحمهم ويسكنهم فسيح جناته مع الصديقين والشهداء . (ياشمس ما عقبت على كلام المريخاب والارهاب ولا شنو ياعبدون واعمل حسابك من عكازه) ودمتم ......... وليد عبد اللطيف