الشعبية نجمة تزين سماء مدينة الخرطوم بحري

Quote: عزيزي البشير يا ود دفع الله كتب (كل التحايا .وكثير امتنان وتقدير لناس الشعبية. ما منكم .لكن جيتكم نسيب . بتقبلوني ولا أشتت ؟) وانا بقول تشتت وين ياحبيبي كده تعال بي هنا من غير ما واحد يسمع ولا يشوف واديك سر ناس الشعبية وطرق اضنيك كويس شفت ناس الشعبية الضيوف القبلك اعتبروهم اسياد بيت وازيدك كمان من الشعر بيت سبق وقلت القلب الواحد في الشعبية بينبض لنفرين وكمان حتى حرف الحاء بحبهم . حنان .حفاوه. حبوبين.حالمين.حلوين وبدليل انك ناسبتهم وازيدك من الحاء حتشوف كمان اكثر من كده في الشعبية . وبعدين انت ماسألت عثمان على ماأظن واداك الوصية هو كمان في يوم من الايام كان في منزل الزعيم ابوطربوش ضيف الى ان اصبح رئيس لجان حي الشعبية شمال وكان له مكتب بنادي الشعبية وكان ايضا يعمل ببنك الخرطوم وهنا وقف. وتعال احكي ليك من طرائف الشعبية مع استاذ عثمان . في يوم من الايام وفي جلسه عصرية اجتمع شباب حلة المثقفين ( حلة فريق الهدف ) وكما كان يحلوا هذا اللقب لبعض الشباب. فقرروا ان يحولوا الكوشة الى حديقة وفعلا نجح مشروعهم واخضرت الحديقة بزعامة عمنا المرحوم الزبير التوم وعم موسى محمد نور وبعد ان اكتمل المشروع الشباب قالوا نعمل اسبوع ثقافي ومعرض المهم اجتمعوا الشباب والشابات وجابوا اشياء من مكافحة المخدرات لتكون من ضمن المعرض وهنا احتاروا . قالوا لازم نخطر ناس اللجان الشعبية والمشكله هؤلا الشباب بالذات كانوا مصنفين يعني مره يقولوا شيوعية مره يقولوا بعثية وخافوا مشروعم يفشل وهنا اخوك العبد لله شخصي الضعيف يجي دوره وانا صديق كل الاطياف والالوان السياسية لو في الجامعة او الحي ، اقوم امشي واجتمع مع عثمان رئيس اللجان الشعبية فيقول لي شنو ياوليد عندك شنو انت عايز تنظيم دوره ولاشنو .فقلت له لا شهادة سكن وضحكنا مع بعض . فقلت له باختصار شوف يا شيخ عثمان في العمل الخيري في الشعبية ما عندنا حاجه اسمها ده شيوعي ولا بعثي ولا جبهجي ولا مسيحي .فقال لي ابشر ياوليد عندك شنو وقبل الفكره و شرحت له الموضوع ودعوته لكي يلقي كلمة الافتتاح في ذلك الوقت وفعلا حضر وشرفنا والكلمه التي بعده كانت من عمنا المرحوم الزبير التوم وبعدها لعمنا موسى محمد نور وجبت ليهم صديقي فرفور وخالد ومحمد الجكن ومدحوا مصر المؤمنه . وعندما يذكر اسم المرحوم ابوطربوش يفترض كان نقوم ونديهو التحية ونترحم عليه وكان الناس تحكي عنه روايات وقصص .ومنها رواية اخونا عزام فرح معليش ياود دفع الله ما اكون مليتك فقر واعتبر نفسك سيد بيت . ياجماعة دعواتكم للمرحوم ابوطربوش والمرحوم العم الزبير التوم وكل من فقدهم الحي . ودمتم ...... وليد عبد اللطيف