الشعبية نجمة تزين سماء مدينة الخرطوم بحري

Quote: كتب نزار حسين (غايتو حا اتوكل واصلحها بالسمع ساكت يا ناس بحري وكان قبلتوها فبها وكان ما قبلتو تعديلي اعتبروني من ناس يمتنعون بتاعة دينا خالد (عسف نيدن خفا جلادن....وضيبن هدهد اللادن (بريدن) ولعل هدهد ابلغ من هدد لشاعرية الاولي وجرسها الموسيقي كدي اتخيلوا الهدهدة في الوضيب ... (الكلام دا كلو سمع واجتهاد) بمشي بحصحصوا واجيكم صاد) انتظرنا اخونا نزار المحصحص يعطيه العافيه يجينا صاد بس يظهر نسانا وانا ما بقول هو لا يعرف يسمع لان الخطاء ليس منه . الخطأ من الاعلام واجهزة الاعلام في السودان وهو يظهر سمع الفنان حمد الريح ولكن للشاعر ود الرضي مرجعه الفنان مبارك حسن بركات وجمال النحاس وياريت حاج حمد تسمعها للاخوان من مكتبة الاغاني السودانية للفنان مبارك حسن بركات اغنية ( ينوحن لي حماماتن ) وانا لاافتش للخطأ لاثبت شي في نفسي ولكن للتصحيح واصلا يانزار الشاعر لايقصد شكل الهدده في الوضيب ولكن يقصد اثر الوضيب على الخصر (اللادن) وممكن بحركة الفتاه يتحرك الوضيب ضاربا او ملامس للخصرمشكلا نوع من الهدهده عليه وبرضو تشبيه جميل حسب فكرتي عشان كده الناس لم تقف بها (وهدد هي الكلمه الصاح ) والله يسامح الفنان حمد الريح وتعتبراغنية (ينوحن لي حماماتن )مجاراه لاغنية اولاد المورده (حليلن )وهي ايضا بها كلمات جميله سوف اقوم بعرضها مره اخرى . الاخطاء ياود حمد كثيرة في غنانا وفي يوم من الايام صديقي جمال فرفور ينزل شريط يكسر الدنيا والناس تسمعوا ولا واحد يعلق والله ياحاج مراقبتك احسن من بتاعت لجنة النصوص وكده احكي ليك . في اغنية للكحلاوي بتقول (احذر سيف لحظو وقنابل النهدي ) يقوم يغنيها جمال (احذر سيف لحظو وقنابل الهندي )تخيل هنا انعدمت حلاوة البيت لذلك زعلت من جمال واتصلت عليه بحكم الصداقة ياجمال ماذا فعلت بالاغنية لماذا هذا الخطأ الفادح وشوهت اللاغنية وللاسف رد وقال لجنة النصوص عايزة القصيده بهذا الشكل قال شنو حفاظا على مشاعر الناس .فهذا زمانك يا مهازل فاشهدى وفي اغنية اخرى وانا بعتبر هذا خطأ من جمال برضو في اغنية للكحلاوي يقول فيها (يازهرة تتحدى النجوم .... ياقمره فاجه وسط غيوم ) بس تأملوا هذا البيت معي والبعد الجمالي الذي فيه وجمال يغنيها برضو في شريط يكسر الدنيا ويقومها ويقعدها ويغنيها (يازهرة تتحدى النجوم ..... ياغيمة فاجه وسط غيوم ) وهنا ما فيها اي نوع من الجمال برضو زعلت من جمال وقلت له قبل ما تنزل الشريط ما عندك ناس زي حاج حمد يصححوا ليك الكلمات بصراحه مهزله وانا بعتبر الفنان جمال فرفور من الاصوات النادر تكرارها في السودان وبس لازم يعمل حسابه لمثل هذه الهنات في الرنات لذلك عند حضوره السعودية عملت له لقاء صحفي بجريدة عكاظ مع الاستاذ على فقندش الملقب ( بمصور الملوك في المملكه ) ومن الطرائف في ونسه جمعتني انا واستاذنا علي فقندش والفنان الاستاذ عبد المجيد عبد الله وبنتكلم عن الغناء في السودان يقوم الاستاذ عبد المجيد عبد الله يتريق علينا فرديت عليه والله يا عبد المجيد غناك ده بغنوهو عندنا الاطفال واغنيته(رهيب والله رهيب فيك الجمال العجيب ) وانا اقصد المكاجره لكي يزعل .صاحبنا ينبسط جدا ويقول اذا برددوها الاطفال عندكم فهذه شهادة لي فسمعتهم كم اغنية سودانية وانواع الغناء القديم والحديث وهو اول من اشاد بالفنان جمال فرفور قبل ظهوره واعجبه صوت عبد العظيم حركة .والشريط كان جلسه جميله ونادره لعبد العظيم حركه وفيه اغنية خفيفة وجميله وهذه الاغنية بتقول. يا ملاية التخريم مفروشة تحت النيم انا ما بسيبو حنين لو عبو لي مكسيم وهذه الاغنيه غناها ايضا الفنان سيد خليفة وبعد كده تم تحريفها واصبحت اغنية مجدده بشكل اخر وشرحت لهم بعض الكلمات الدارجيه بتاعتنا وياريت ياشعباوية لو تعرفوا كلمة (مكسيم )واذا لم تعرفوها أسألوا مولانا حسن طه . بكده ياشباب نكون انتهينا من موضوع نزار حسين ومرحب به في شعبيتنا في اي وقت وبس عايز اعرف وين طيّر حاج حمد الحمام . مرفق صوره ( من اليمين الاستاذ الصحفي علي فقندش + الفنان السعودي عبد المجيد عبد الله + وليد عبد اللطيف ) ودمتم .............. وليد عبد اللطيف