الشعبية نجمة تزين سماء مدينة الخرطوم بحري

Quote: وليد انا متابعك ... الشغل البتعمل فيهو دا حاجة جميلة جدا وانا مع المشاغل والجرى بجى اطل طلات سريعة كدة لكن مهتم بكتاباتك بالذات .. شباب الشعبية زمان وينك ياعابدون طولت شديد على كل حال شكرا على المجماله وانا خايف بس اكون هبشت ليك من حاجات زمان ايام الشباب . شوف كنا صغار لكن كبار وانت كنت حريف كفر تغازل الكره فتمتعنا وتمتع النصف الاخر عندما تجي مبرم الشعر واليوم داك الشعبية تكون صانه ولابس بنطلون بكسر ومكفكف القميص وبه كسرتين من الخلف والحذاء ملمع وتجي ماري بشارع النيم وكانه في ذلك الوقت شارع النيل وصاحبك شمس الدين ساتي قاعد بهناك وكانه ما شايفك لان له برنامج اخر ومجال اخر يعني اختلاف الليل مع النهار ويقول لينا لما تجي ماشي والله ياجماعة الزول ده زمن الاميرية كان حريف بشكل .وطبعا صاحبك بكون زعلان منك لان مجالك ليس مجاله وفي نفس الوقت انا كنت بشوفو سعيد لان هذه الاشياء هو ماعندو بيها شغله وانت مكملها ليهو . والله زمن ياعابدون طبعا شمس الدين ساتي الايام دي معذب عزام عذاب الله اكبر وكل مايفتح بوست الا يلاقي شمس الدين يعني عزام حتى لو فتح حنفية يلاقي صاحبك شمس الدين ولم يسلم من لسانه يعني انت الايام دي مرتاح جدا . وبمناسبة شباب الشعبية زمان كده اجر الناس للوراء شوية واذكرهم فن الغناء الشعبي واذكرك جماعتك ناس ود الكردفاني وحلة الصديق ياعابدون لان كان في ملاحظة دائما ناس الشعبية فى كل الاركان وكل ( حله ) تجدهم بيرددوا في اغنية معينة ولو تذكر ياعابدون اغنية توبه يا احباب للفنان محمد احمد عوض وتعتبر هذه الاغنية اول اغنية في فن الغناء الشعبي وسجلها الفنان محمد احمد عوض للاذاعة و لما سألوه يا محمد عوض لونك ده نسميهو شنو نسميهو عود ولا حقيبه ولا شنو قال ليهم بأختصار سموهو غناء شعبي ومن ديك ظهر فن الغناء الشعبي للاذاعة وبما انه كان لون جديد من الوان الغناء وكان كثيرا ما يغنوه شباب الشعبية زمان في جالساتهم وفي رحلاتهم . وكده نكسر بالاغنية ونذكر الناس اللي كانو بحاكو ناس قيس وليلي والبدايه تكون بصوت الرق (تنكش . تنكش .كش كش كش ). توبه يا احباب انا لو قشيت داركم بس كفاية عذاب الضقتو من ناركم موش من الانصاف تظلموا احبابكم الواهبين الريح وضحو علشانكم كل يوم بسأل وانشد اخباركم النسيم عارف حالي واحوالكم بالله يا احباب بقلبي رحماكم قصدتونسيان وهو ما نساكم ما بحب في الدنيا الا ايامكم وريتو ايه الحب حب دنياكم ياريتنا يا احباب ما هويناكم ما عرفنا الحب ما رايناكم يا اطب الكون اشفو مرضاكم ديل احق الناس بسقياكم ـــــــــــــــــــــــــــــ وبعدها على طول الناس تغني :- حبيبي فاكرك معاي... تسعد بسعادتي وتشقى عشان شقاي حبيبي فاكرك معاي ...وانت مع المظاهر ما راعيت هواي وظلمك لي ظاهر ــــــــــــــــــــــــــــ وطبعا في ناس تتألم وناس تتوجع وناس ترقد سلطه وناس تضحك على حالهم . انتو معاي ياناس .شباب الشعبية زمان كانو حلوين وموهبين في اي شي لكن يا عبدون صاحبك شمس الدين ساتي بالله احكي لينا عنه وهل الكلام الفوق ده كان بعمل شنو معاه في تلك الايام . (معليش اخي شمس الدين اذا طولت ما اتصلت عليك وطال ما انت ساكي عزام معناها بخير والحمد لله .وما عايز اقول حاجة في فريقك المريخ كمان يقوموا فينا ناس الصحوه ). دمتم ........ وليد عبد اللطيف