الشعبية نجمة تزين سماء مدينة الخرطوم بحري

Quote: احبائي الغاليييييييييين جدا طبعا ياود حمد لما طلبت من الناس صورهم مافي واحد اشتغل بي عدا عمر ود الدكتور ومشكور جدا لكلامه الراقي وطبعا في ناس قالوا ياخي ده ما عندو موضوع ساكت . اما في صباح اليوم حنيت علينا وتكرمت انت واتحفتنا بلوحه جميله ومعبره تحرك الحجر وضعت الحمام مع الحمام وذكرتنا كلام جميل قاله شاعر بحري ود الرضي لما قال :- ينوحن لي حماماتن ..... همن عيني غماماتن بريدن شوقي للماتن هياب رعاب جمال فـاتن ... ولا شئي في الأدب فاتن تتوق الروح لشوفــاتن ... وارجف حين موافــاتن سكينـة تجلـى فصــادن ... قلوب الأدبا مرصــادن قنـابل ترمي قصـــادن ... فهن صادنه ماصـــادن وجن توب الحيا لباسـن... نزل نور القمر باسـن اهين وارضى حباســــن.... يفر قلبي ويخاف باسن عسف نيدن خفـــا جلادن... وضيبـا هــدد اللادن عفافــن عـف تيـــلادن.... بسوق القوق على بلادن مابين الشادي والشادن.... تحير فكـره نشــــادن خــدودن جــــل ورادن ....جميع الشـــاهدن رادن نديم قول لي هـن ياتن.... مهـــاة رامـه وظباتن نسيم شيـل لي تحيـاتن..... وخصص بيهــــا نباتن ــــــــــــــــــــــــــــــــــ ياجماعة ما تشوفو الوصف ده كلام يقطع المصارين (عسف نيدن خفا جلادن .......وضيبا هدد اللادن ) يعني بقول هبت الروائح الجميله وكأنها تخفي رائحة الجلاد وذلك الشعر الغجري ومن شدة ما هو غزير اصبح يشكل تهديد للخصر ( وجع ) بالله ود الرضي شاف جنس ده وكان عاقل . بصراحه ياود حمد لوحه جميله ومعبره وفيها نوع من الرومانسية المتدفقه لتغذية النفوس ولما تسمعوها عند اهلها والله تجيكم رجفه ما تعرفوها رجفت موت ولا طرب (هاكم الشمار ده ياولاد الشعبية ) زمان الشاعر اسماعيل حسن من شلاقته انتقد الحقيبه وقال ده كلام حسى ساكت ومبتذل قام الشاعر محمد ودالرضى رد ليه وقال ليه: شعرك يا اسماعين زى ماعون مغطى ويابس ودميم الخلقه ما بسترن معايبو ملابس ما تصل الحقيبة بجيك بوجهى العابس الحقيبه كالظل والظل ما بندفن ما تبقى مخك كابس والله ناس زمان ديل كانو خطرين خلاص وكل شي ولا تهبش حاجاتهم وتقلل منها وكده نمشي نشوف الكلام ده والله الليله حاج حمد خلاني ادستر . كده نشوف :- في يوم من الايام شاعرنا المساح يتحدي الشعراء وقال ليهم انا بقدر ادخل اسمى صريح واسم ملهمتى فى قصيده واحده قام كتب قصيدة نغيم فاهك يا ام زين دواى..وهى كان اسمها ام زين وقام فى اخر القصيده كتب: انا الكاتم السر ما حكى انا الحاضن البلاء ما اشتكى انا الحجه بحل مشبكه انا المساح دمع البكاء يلا قال ليهم اتحداكم وواجعكم وين ..تصدقوا ياشباب ما قدر على كده الا ابو صلاح فى اغنية شىء عجيب فى غرامك يا فريع ياسمين طبعا ملهمته كان اسمها الفريع ...قام هو فى اخر القصيده بقول يالفريد فى ظرفك زى لطافتك وين زى دى لاكان لابدعت قبلى فى التكوين على صحيفة قلبى تدونت تدوين ولولاها مالى صالح فى الزلال والتين وطبعا هو اسمه صالح عبد السيد ابو صلاح يعطيك العافية يا ود حمد وما عايز اقول اللوحه اجمل من صورتك بس فيها كلام والكلام قالوا بجيب الكلام. ودمتم يا اغلي ناس ..... وليد عبد اللطيف