الشعبية نجمة تزين سماء مدينة الخرطوم بحري

Quote: صباحيات الشعبية البهية :- ياعزام يخسي عليك احرجتني مع صحباتي مع الحشمه يعني الناس كلهم شافو النتيجه وسكتوا الا انت يافضيحه لكن انا بقول الحمد لله بس كمان ما تنسى في حاجه اسمها ذكاء متأخر .ها . ها . ها. تعرف ياعزام الاول بتاعنا عايش وما عايش تخيل الوضع بس نقول ربنا يرد غربته ومع الملاحظه نحن في العالم الوحيدين بنشتغل بقصة الترتيب وهي من ناحية علمية مؤثره جدا في نفسيات الطالب وممكن تدمر حياته والطيش في بلد اخر ممكن يحكم دوله وممكن يبقى طبيب جراح والان كمان في ظاهره في السودان اخطر شي انا بشوفها استخدام الجانب الايمن من الدماغ في الانسان دي اخترعوها اليابانيين وبرعوا فيها اطفال السودانيين وفازوا بالمرتبه الاولى في ماليزيا وطبعا النوع هذا من الدراسه عملوا لها مدارس خاصة يعني تخلي عقل الطفل زي الكمبيوتر ويحل اي معادله حسابية سبحان الله موش زي صاحبك وليد ( كعكه في الرياضيات ) والحمد لله انا الان مستعد اعمل ميزانية دوله يعني وباختصارا ياعزام انا بشوف لازم الاطفال يكون عندهم توازن في مسيرة حياتهم ومراحلهم التعليمية . نقوم ياعزام ياخوي نرجع للموضوع الاساسي وهو الشعبية وايقاعاتها المؤثره في حياة الناس المتواجدين فيها .اول شي قبل ماتقوم من النوم طبعا بتكون بالليل لعبت شليل وينو اكلو اب دودو وشليل وين راح بلعوا التمساح يعني نايم سلطه تقوم من بواكرالصباح ( الدقش ) تلاقي الناس جارية وتركض خلف لقمة العيش وناس شايلين الحلل عشان يجيبوا اللبن ومنهم من طلع للعمل لكي يحصل يشرب الشاي هناك والطلبه لابسين الازرق والفتيات الاخضر يعني زمن الجلاليب ده اسأل منو ناس حاج حمد نحن نبره ونستبره منو .وتشوف اماتنا الحنان ماشين السوق وسلامات طيبه لبعضهم في الصباح والزيك يافلانه والنبي فوقك كان تجي تشربي معاي فنجان قهوه خصمتك بالنبي وكانهم ما قبالوا بعض قبل يوم وهاك الدافوري للاطفال من الساعة عشره ويشكو لامهاتم يايمه وليد عشه ضربني ياولد عشه العبوا ساكت وانتوا اخوان بعد داك يجيك ابو عادل نوبه التعلمجي في سلاح المظلات بالله زكرنا اسمو ياحاج حمد اظن اسمو حسين المهم وهم جاكين يرددوا جكه لي سوبا ياحلات سوبا .الله فوق زوزو ياحلات زوزو وعلمو الزوزو علمو . وزينداويه نهيده طبنجه . ويكونوا شباب قاعدين هناك تحت النيمه بعد ما كملوا الجرايد والكلام في الكوره منتظرين الطالبات لكي يملوا انظارهم بالحسان من كتب قصيده انت حلوه بالذات لم تكشحي المويه وفي واحدات قبل ما شايغلوهم يسلموا على المجموعة يعني رساله واضحه اذا غلطوا انا بكلم ليكم اهلكم بعد داك يجي وقت الغداء وهذا ما يميزنا في الشعبية خاصة صينية الغداء هي اجتماع الاسره ومناقشة كل التفاصيل اليومية اذا مشيت البحر يمنعوك اذا في مرض سحائي يمنعوك اللعب في الشمس وبعد اذان العصر مباشره تجد الناس تهرول للميادين وصخب شديد وتجد ميدان الرابطه بالذات مكتظ بالجمهور لم يكون في مباراة وتعال شوف تعليق العجائز ومنهم عمك موسى .مره فتحي موسى منفرد بالمرمى وهو يقوم من الكرسي ويصيح ابوك ماتدي وفعلا فتحي اردليس الشعبية يعانق بها الشباك وهو فرح بهدف ابنه وعمك داوود بجهه اخرى يقول للاعب اعكسها موزية والمرحوم على الله والمرحوم سليمان وجابر ابو ناس مجزوب والمرحوم فائز محمد صبر. في مره حارس قبض الريح والكوره دخلت المرمى واذا فائز يقول ليهو قوم واقع زي ميزانية الدوله يعني تعاليق جميله وبكل عفوية. واذان المغرب يؤذن وتشرع الناس الى الصلاه وبكده يكون اليوم انتهى بكل حب وبهجه وسرور .ونفس البرنامج يكرر اليوم الثاني . هذه الشعبية البهيه عشان كده ياعزام جينا على نفسنا وفضحناها عشان نبعث الفرح في قلوب لاخرين وارسلت النيجه ليس فرح بالمستوى بس عشان نذكر الناس ايام الشعبية الجميله ومدرسة الخشب وكانت مجرد تذكرة لاخونا ابراهيم حطابي للايام الجميله وتحايا مره اخرى والشكر كل الشكر لاخوك صديق حطابي وهو كان السبب بعد الله ان نجد مكانه مرموقه في مجتمع العمل .وفي الاخر ياشباب في اخر كل كتابه لايفوتنا ان نترحم على فرد من الحي ومنهم فائز محمد صبر وكان رجل بمعنى الكلمه وياما قدم للشعبية الكثير لذلك عند زيارتي اجلت سفري مخصوص لافتتاح دورة احياء الذكرى له ودعوت النجوم الدوليين للمشاركه في افتتاح الدورة لهذا الحدث .ودعواتكم له بالمغفره والرحمه