الشعبية نجمة تزين سماء مدينة الخرطوم بحري

Quote: أخي عزام لك التحية وأنت زول ما بنقدر علي زعلو وماعايز أنزل كلامك الواطة , لكن الصورة بصراحة ما حديثة , وأنا لما شفت أخوي حجوج ألح في موضوع الصورة قلت أرسل ليهو أول صورة في متناول اليد . وشايف إنها عجبتك لدرجة إتهامك لي بأني أدخلت عليها (أو علي الأصل) بعض التحسينات. وباين أنو صورتي الموجودة في ذاكرتك محتاجة لبعض الترميمات . أنتبه للنقطة دي : مابقول ذاكرتك محتاجة لبعض الترميمات ! ... تقوم تزعل وتختني في القائمة مع ناس بدرالدين ووهبة (الله يديهم العافية) ... وعلى كل حال إذا ربنا سهل حأرسل ليك صورة حديثة وإن شاء الله أقدر أظهر ليك فيها الشيب الذي بدأ قبل عدة سنين حملة إستيطانية في الدقن والعارضين, وما أظن أنو سيمضي زمن طويل (لو ربنا مد في الأجل) إلا وهو قد أعلن المناطق المذكورة أعلاه مناطق محررة من الشعر الأسود. أما عن طلبك بخصوص بدرالدين فأظن أنو دا خطأ تكتيكي فادح منك. فأنا هنا في مأمن من أنتقامه لو زعلته , وأنت الزول دا زي مابتقول ماسكك من إيدك البتوجعك , فأنا شايف تخلوني محايد أحسن والواحد ماعارف الظروف ...؟؟؟ ويا عزام إنتقام لأشياء مضت عليها قرابة الأربعة عقود ؟ دا الواحد بيشوف صورتك وبيحس بالطيبة والوداعة التي عرفناها فيك في أيام الطفولة. أخوي بدرالدين إن شاء الله تكون الذكريات دي تعريف لمن لم يعرفك أيام الشعبية جنوب الإبتدئية ويعمل حسابو من زعلك حتي لا يخرج مارد من قمقم ... وبمناسبة من ذكرتهم تحت عنوان (سواقط الذاكرة الأميرية) فالأخوة عباس عبدالرسول (رحمه الله) , محمود أحمد أصوصا وعادل الليري وراشد محي الدين كانت أسماؤهم فعلا" قد غابت عني . أما التيجاني عبدالصادق (قريبنا) , بدرالدين عمر وأنورعبدالمطلب (أخو أستاذ ضرار) فهؤلاء وردت أسماؤهم في القائمة (سلامة النظر!). لم أتذكر علاء الدين محمد نور وعادل محمد عبدالمجيد (هل تقصد خالد محمد نور ؟ وعاطف عبدالمجيد محمد قناوي ؟ كوية ؟ ود عمتي ؟....قول بسم الله وراجع القائمة مرة أخرى) .وأخونا فريني ما حبيت أنازع فيهو ناس دفعتو. أرجو يابدرالدين أن تصحح أسم أخونا خالد عبدالسلام الحسن الذي أخطأته في كلامي عن أوائل سنة أولي. العزيز صلاح أبودية عايزين صورة نشوفك فيها بدل صورة (رقم صفر, رئيس الشياطين الـ 13) دي. الواحد بيحس بإحساس غريب (غموض , سرية , ألغاز....) لما بيشوف الصورة. وأظن عزام كان قدم رجاء في نفس النقطة دي. أها بقينا أتنين..فهل من مستجيب؟ . في إنتظارك. العزيز صلاح شكوكو ماتشوف لينا أخونا عماد دا...والله مشتاقين ليهو بشدة , ومشتاقين نعرف أخباره. وما بيصح نتكلم عن الشعبية جنوب الإبتدائية ودفعتنا والزول دا مطنش. ما عرفنا نشاط أدبي ولا رياضي وإلا كان هذا الشكوكو الصغير ركيزة من ركائزها... أرجو ألا تكون الغربة قد غيرت في شخصه الحبوب ما يحول بينه وبين مواصلة أخوانه الذين أحبوه ويحبوه. كلمو وقول ليهو: كلمني ..عاتبي ولومني..يمكن تسامح تعفيني . سلامي له وسلام لك من أخي عبدالمطلب. ورمضان كريم. أخوكم أمير قناوي 03.09.2008.