الشعبية نجمة تزين سماء مدينة الخرطوم بحري

Quote: اخى صلاح .. اعلم جيدا زهدك فى المدح ولكنى لم افعل غير ان سميت الامور بمسمياتها ولم لا فلنمدح من يستحق المدح وننتقد نقدا اخويا لطيفا من نرى فيه مايستوجب ذلك ونحن فى الشعبية نفتخر بما لدينا خصوصا وهذا البوست اصبح من المراجع المهمة فى بورد بكرى ولابد ان يكون فيه مانفتخر بأن نقدمه للناس فى واحتنا هذه وللحق اولاد الشعبية منتشرين فى اركان الدنيا وحق لنا ان نفاخر بهم ... طيب عندى هنا بعض الاسماء على بال مانجهز الدفعة التانية طيب اول من ابتدى به هو الاخ على سيودة - مدفعجى فريق الصداقة والاخ الخلوق ابن الشعبية والذى هرب من فريق الحلة الصديق والتحق بفريق الصداقة وعلى ما اذكر كان موجودا فى الشعبية لغاية سبعينيات القرن الماضى وبعدها هاجر الى مدينته حلفا واستقر به المقام هناك وتابعنا اخبار تسجيله فى فريق فى حلفا والى اليوم واظنه يأتى الى الشعبية كلما وجد الى ذلك سبيلا ثانيا وهو الاخ عبد الرحمن سيودة وهو الشقيق الاكبر لعلى سيودة وقد لعب لفريق الصديق لفترة ثم اصبح من الاداريين المهمومين بالصديق واحواله وقد هاجر ايضا الى دولة قطر فى بداية السبعينات واستقر به المقام هناك واعتقد انه لازال هناك ولا شنو ياناس قطر الاخ حسن وشمس الدين وعزام ( البكاى ) بكون عندكم الخبر الاكيد رغم انو لا اتوقع عزام يكون بيعرفه واتمنى من هنا ان يكون بموفور الصحة والعافية واتوقع لغاية الان عبد الرحمن يكون بقى جد ولاحاجة كبيرة كدة غايتو يعنى من جد ولى فوق الاخ العزيز صلاح عثمان - الضب- عادل شراد بيذكره كويس ياناس جنوب لأنو كسر ليهو سنه وهو صخرة دفاع فريق الصديق فى السبعينات وكان قد هاجر الى ليبيا ثم استقر فى السودان لفترة وحاليا فى السعودية طيب نخرج شوية من دائرة الصديق عشان يكون عندنا تنوع عوض مجذوب ( قربو ) وطبعا اخونا عوض كان بيلعب مع فريق الشعلة قبل ان يهاجر الى دولة قطر ... برضو ياناس قطر الزول دا عندكم الاخ صلاح حبشى من اوائل اولاد الشعبية الذين اغتربوا بدولة الامارات فى ابوظبى وعمل فيها لاكثر من عشرون عاما ثم رجع السودان واستقر به الحال وعلى ما اعتقد فى شركة النيل الكبرى او شركة بترودار ويعمل حاليا فى منطقة عداريل ويعمل بنفس نظام الشفت يعنى شهر فى الموقع وشهر فى اجازة وطبعا صلاح كان من اعمدة فريق الشعلة لمن يذكر ولقب بصلاح حبشى لأنو كان شعره وقتها ماشاء الله بنفس شعر الدحيش فى ذلك الوقت والغريب فى الامر انو الحبش ماعندهم شعر زى دا لكن الناس كانت مصرة على كدة .. نقول شنو .. الحبش حبايب ناس كتار.....ولا ماكدة ياجماعة .. المهم انو صلاح حبشى هسة بيشترى العمة قبل اى حاجة لأنو خلاص الشعر داك راح وبقى زى عمك تنقو طيب لغاية هنا نقيف شوية