|
Re: مدرســـــة المســاكن الشعبيــة الابتدائيــة جنــوب (Re: Emad Ahmed)
|
أرحب بالأخ خالد عثمان أحمد (كراكة). وللأسف لم تبقى في الذاكرة إلا صورة قديمة لصلاح كراكة في الشعبية بملابس الكورة وأخرى حديثة من البورد ، أظنها كان بمناسبة زيارة وفد كروي لأحدي الدول العربية. سأنقل سلامك لأخي محمد ، وأرجو أن تبلغ سلامي للأخ صلاح ولبقية الأسرة. ذكرتني صورة الأستاذ مصطفي "لياقة" مسرحية قدمت في إحتفال مدرسي بمدرسة البنات (مدرسة عشمانة) وكانت بعنوان الحاج منزو. وقد قام أستاذ مصطفي بدورالحاج منزو الرجل الدجال . ورغم صغر سني في ذلك الزمان إلا أن المسرحية ظلت عالقة بذهني حتى الأن. من يذكر تلك المسرحية ؟. وهبه أكرر معك : معا من أجل صفحة خالية من الفتل والانبعاج . وتعليقك على إسم الدكتور الهندي أضحكني وتخيلت الدكتور واقف محتار وماعارف الجماعة بيضحكوا في شنو. أخوكم أمير قناوي.
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: أمير قناوي)
|
Quote: وهبه أكرر معك : معا من أجل صفحة خالية من الفتل والانبعاج . وتعليقك على إسم الدكتور الهندي أضحكني وتخيلت الدكتور واقف محتار وماعارف الجماعة بيضحكوا في شنو. |
هلا بامير قناوي فعلا طلة خالد كراكة اسعدتني جدا اما بخصوص ما جاء به خالد باجادتي لرطانة المحس دي عندها قصة لازم احكيها مادام المناسبة جات .. معروف عننا بشرى فضل وصلاح عباس وانا من تبينا اصحاب واصدقاء ودفعة وبيناتنا كل خير ومحبة .. المعروف انو صلاح وبشرى من ابناء المحس وانا الوحيد بيناتم الما محسي .. وبيوتنا في مربع 8/9 بالشعبية جنوب كلها مفتوحة في بعض يعني مرات يصادف تلاتة يوم ما تكون اكلت حاجة في بيتكم .... اهااااا انا بحكم صداقتي للجماعة ديل بكون متواجد معاهم في بيوتهم واهاليهم الكبار مرتبطين بالرطانة .. يمكن ناس بشرى اشد ارتباطا بالرطانة من ناس فقيري ... والدة بشرى فضل الحاجة شهاوة فضل - اطال الله عمرها - تكاد لا تتحدث العربية .. ومن هنا اتعصرت لمن اتعلمت الرطانة وصرت اتحدث بها كأهلها او اقترب وزاد على كدا اشتغالي لفترة 13 سنة بتجارة الاسبيرات واهلنا المحس هم المسيطرين على الشغلة دي والمنطقة الصناعية كلها ودي ادتني دفعة تانية . على العموم المحس ديل ناس طيبين وكان ما جاك منهم خير ما بجيك منهم شر ابدا .. ودام الود
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
Quote: الاخ / عابدون تحية عطره
اهل الشعبية الف مليون سلام
التعازى الحاره الاسرة خميس جابر وسعد اسماعيل فى وفاة زوجة سعد اسماعيل وانا لله وانا ليه راجعوان
الاخ / وليد عبداللطيف مشكور على الاتصال وربنا يحفظ ليك الحلوين بناتك يارب
وبمناسبة الخروف ياوليد والله فيها لحمه تاكل الخروف كل وماتشبع
الاخ / شمس الدين ساتى لك الاحترام وكمان يحفظ ليك اولادك ويطول فى عمرك وتفرح بنجحهم يارب
الاخ / عادل عثمان مشكور ولك الود كل
الاخت / الكتورة روما الله يديك العافية والصحة ونسمع عنك كل خير يارب وتقبلى سلام اسرتى
الاخت / الدكتورة ستنا خضر الله يسلمك من كل شر ولكى الاحترام وانشاءالله الصور سوف تنزل تباعاً
ولكم جميعاً الود
اخوكم خالد درق
|
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عابدون محمد عابدون)
|
أها نواصل حديث الذكريات مع خالد درق عشان ياباشمهندس مجدى نقرض الصفحة دى وننط مع الجماعة ديك فى السرج بتاعهم ..
Quote: الاخ / عابون تحياتى
الاخوان بالبوست سلام
اليوم الثالث فى اسطنبول
اخوتى اليوم الثالث فى اسطنبول كانت رحلة بحرية جولة فى مضيق البسفور الذى يربط قارتى اسيا واوربا ومشاهدة اهم معالم اسطنبول
فتحركنا من الفندق الساعه 10 صباحاً واخذنا المترو الى ميناء امينونو واتفقنا مع احدهم للقيام بجوله مخصصة لتقوم بزيارة مضيق البسفور ومعالم اسطنبول من على البسفور ومنطقة القرن الذهبى وطلب 40 ليره لفردين
وتحركت العبارة من امينونو وكانت مدت الرحلة ساعتين لتقف بعد ذلك فى منطقة اناضوليا ممايتيح لكم الغداء فى احد المطاعم هناك ثم تبحر العبارة عائده الى امينونو اترككم مع الصور الى ان اعود لكم فى اليوم الرابع فى اسطنبول
ولكم الود
اخوكم خالد درق ... دبى
|
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
الاخوة عبدالوهاب علي الحاج وليد عبداللطيف
حياكم الله
ياسلام يا عبد الوهاب ذكرتنا بالوالدة شهاوة والدة المهندس / بشـــري فضـــل ، ذلك الرجل الطيــــب المبتــسم دائما يقابلك بكل ترحاب وبشـــر ( راجل بشوش ) ترتاح له من اول وهلة والحديث معه ممتع للغاية و رجل موســوعة من العلــم و وذو اخـــــلاق عالية جدا، والحاجة شهاوة ( اطال الله عمرها ) امراة ذات شخـــصيــة فذة وقـــوية ممزوجــة بالطيبة والورع والحاجة شهاوة من الشخصيات المميزة في مربع 9 /8 وهـــي تحـــب ابنها المهندس / بشـــري فضــــل حــــب الجنون . تحياتـــي للحاجـــة شهاوة وقول ليها / عزالين عباس الفحل ، بيسلم عليك شديد ، وكذلك الاخ / بشـــري فضـــل . *** والملاحظ انو الاخ عبدالوهاب والاخ بشــــري ، من زمان بيشكلو ثنائي جميل من الطفولة وهم اصدقاء يكاد لا يفترقوا ابدا وادام الله المحبــــة والود . *** الاخ عبدالوهاب ، بالله اشرح لينا كيفية تكبير الخط وزيادة السماكة ، وكيفة ادخال الصور في البوست في محاضرة واسعة الزمن .
مع فائق الاحترام والتقدير
عزالدين عباس الفحل ابوظبي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
مدرســةالمســاكن الشعبيــة الابتدائية جنــوب
في مداخلة من المانيا من الدكتــور اميـر قناوي ذكـر ضمن الاساتذة الاجلاء استـاذ / خــالـد ، وهـو من ابناء الكدرو وكانت له بصــمات واضحة في مدرسـة المسـاكن الشعبية الابتدائية جنوب ، وهــو درس اخــوي الدكتـور / الزين عباس الفحل والجميع يعرف الاستاذ خالد انه كان يسجل زيارات الي اسر الطلبة في منازلهم في مستوي تربوي رفيع وينشئ علاقات طيبة بين المعلم والاسرة، وهو متزوج من ابنة عمنا ( عليه رحمة الله ) الحاج عقــيد في مربع 9 / 8 وبصراحة الاستاذ خالد كان يتمتع ولايزال بشعبية كثيرة وذو حضور متواصل مع اسرة الشعبية جنوب، وخرج اجيال كثيرة يشار اليهم الان بالبنان، اغتــرب باليمن فترة من الزمن ثم عاد الي السودان، شخصية طيبة جدا وهادي الطبع، اخر مرة قابلته ان زارنا في مناسبة زواج اخي الدكتـور / علــي عباس الفحل وجلسـت معه اتجازب الحديث الهامس عن الغربة والبعد عن الاوطان ، وفجاءة ظهر الفنان العظيم جمال فرفور وسلم علينا وعرفت من حديث الاستاذ خالد انو الفنان جمال فرفور من ابنائه الذين درسهم في مدرســة الشعبية الابتدائية جنوب دفعة اخوي الزين والمهندس / نادر الزين الفحل، والاستــاذ / خــالــد تــاج مرصــع بالجواهــر علــي جبيــن مدرستــــة المســاكن الشعبيــة الابتدائيـــة جنـــوب ..
عزالدين عباس الفحل ابوظبي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
مدرســة المســاكن الشعبيــة الابتدائيــة جنــوب
من الذكريات المضحكة التي لا تنسي ان طابور المدرسة يبدا في الصباح الباكر بالتسخين ( صفة وانتباه ) لفتــرة من الزمن ثم محاضــرة قصيــيرة عــن الاخلاق والنظافة والتعليمات العسكرية( انو ما عايزين زول يمر في الممر بين مكتب المدير ومكتب الاساتذة ) وتعليمات اخري تختلف حسب المناسبة، ثم التفتيش علي الاظافر الممتدة كاسنان المشط وحلق االرؤوس الكثيفة كربطة البرسيم، ثم العــقاب الشديد لذوي العاهات الذين تمردوا علي لوائح وقوانين المدرسة ، اذكر مــرة طلب احــد الاساتذة الاجلاء اربعة عتاولة لشد احد الطلبة المتمردين وضربه بالخرطوش السميــك، وجــئ بالعتاولة ذمرا ورفعوا الطالب المسكين الضعيــف لياخذ جزاؤه ، واذا بصــوت عــال يصــيح ( يا استاذ حــرام عليــك الود مسكـــين وضعيــف ) كان الصوت عاليا ومسمــوع للجميـــع ، وتلفتنا يمنة ويســرة لنعرف ان الصوت اتئ من احد الركاب علي سقف اللواري العابــرة بشارع المعاعونة المطل علي سور المدرسة، وانفجــر الجميـــع ضاحكا وما كان من المعلم الا ان ترك الطالب وشانه ولم يعاقبـــــــه ..
عزالدين عباس الفحل ابوظبي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
كتب الاستاذ عزالدين الفحل ------------------------- الابتدائية جنوب دفعة اخوي الزين والمهندس / نادر الزين الفحل، والاستــاذ / خــالــد تــاج مرصــع بالجواهــر علــي جبيــن مدرستــــة المســاكن الشعبيــة الابتدائيـــة جنـــوب .. ------------------------ هل تقصد الزين الشاب الحريف الوجيه المؤدب الذي لعب لفريق الجهاد وتقريبا درس الصيدله في باكستان وله صديق اسمو محمد عوض الشايقي من اولاد حلتنا
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
ياجماعة برضو فاقدين الدكتور محمد بابكر وكتاباته الرشيقة ..
وكمال الزبير وصلاح الزبير ..
وفاقدين فاكهة هذا البوست وهو الوجيه عزام وبالمناسبة عزام ماشايفه حايم لا هنا ولابرا فى الشارع ..
انشاء الله يكون مشغول بس .. انا غايتو متوقع انو بت ابراهيم تكون قعدت فى الواطة وتابعت المنبر ولما شافت كتاباته وكبكبته الكتيرة قامت لبدت ليهو بالمقشاشة واظنه يكون راقد متأثرا بضربة مقشاشة او " فلقة " بى مفراكة فلا نامت أعين المشلهتين..
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عابدون محمد عابدون)
|
كتب اخي عابدون --------------------- وفاقدين فاكهة هذا البوست وهو الوجيه عزام وبالمناسبة عزام ماشايفه حايم لا هنا ولابرا فى الشارع ..
انشاء الله يكون مشغول بس .. انا غايتو متوقع انو بت ابراهيم تكون قعدت فى الواطة وتابعت المنبر ولما شافت كتاباته وكبكبته الكتيرة قامت لبدت ليهو بالمقشاشة واظنه يكون راقد متأثرا بضربة مقشاشة او " فلقة " بى مفراكة فلا نامت أعين المشلهتين.. --------------------- والله عليك حكم ياعبدون ياربي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
مدرســة المســاكن الشعبيــة الابتدائيــة جنــوب
الاستـــاذ الفضـــل ( عليه رحمة الله ) كان مخلصا في عمله ويتقنه اشد اتقان شكل والاستاذ حســن محمد عثمان ، ثنائي جمــيل وكانا اصدقاء سكنوا في اخر غرفــة الملاصقــة لمدرســة البنات وكانت الامتحانات والاختبارات تنهال علينا يوميا حســب مزاج المعلم، كثيرا ما يقال ( طلع ورقة وقلم واكتب اسمك واضح ) ، ثــم تملا السبـــورة ما يعجــز علــي اجهزة الحاسوب علي فــك طلاســيمه بذلك صنـــعوا منا رجال نقدل بين امواج الخليج العــربي ، وكثــيرا ما كان الاستاذ حســـن ( وكان يحبني شديد ويسمينــي عزالدين الصبــرة ) يا عزالدين امبــارح تغديت بشنـــو ؟ ارد علــي ( كالعــادة تغديت بمـــلاح قــــــرع ) ويسالنـــي مــــرة اخري وارد علـــيه ( تغديـــنا بســـخـــينة مرشوشة بالكسري ) ويضحك الاستاذ علي صـــدق قولي وانني لا اكذب ، ويرد علــي ( يا عزالدين انتو ما عنـــــدكــم غيــــر مـــلاح القــــرع والسخــــينة ؟ ما قـــاعدين تاكـــلوا كبـــدة او كـــلاوي او ســــمك ؟ ارد عليه بكل براءة الاطفــال ( لا والله يااستـــاذ )، وبين تقلبات الزمن وترهلات القدر الحلو المذاق بيـــن افاق الثريا والهمـة العاليــة المصبـــوغــة بمـــلاح القـــرع التقــي ذات مـــرة وانا فــي اجــازة بالسودان العظيــم بالاستــاذ الفضل بموقف الباصات جوار سوق المرغنيــة بالشعبيــة جنــوب وكان ضابــطا اداريا تحــدث معــي والدمــع علي عينيه ولا انسي ذلك الموقف قائلا ( انا فخــــور بــك يا عزالدين ، الحمــدلله انا خرجـــت للمجتمــــع صفـــوة الرجــــال ) ، الا رحـــم الله ذلك الجبــل الشامخ بالعـــز والنبـــوغ وانزل علـــي قبـــره الرحمة والمغفـــرة وجعـــل قبــــره روضــــة مــــن ريــــاض الجنـــــــة ..
عزالدين عباس الفحل ابـــوظبـــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
سعادة المستشار الاخ خالد " كراكة "
ربما لم تسعفنا الظروف كثيرا فى الالتقاء او التعارف لأسباب قد تتعدد ولكن اسمح لى أن ارحب بك هنا فى هذه المساحة الرحبة التى انت لست بغريب فيها بحكم انتماءك الاصيل - جنسية بالميلاد يعنى - وقد تكرر اسمك كثيرا هنا من اصدقاءك ودفعاتك فى مختلف المراحل فكان ظنى شبه الأكيد بأنك ممن نستحق أن نقرأ لهم أو عنهم فى هذه المساحة أو نتشرف بمشاركتهم لنا هذا الإسفير ..
شكرا وأهلا بك عزيزا بين اخوانك واخواتك وننتظر كتاباتك ومساهماتك ..
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
مدرســة المســـاكن الشعبيـــة الابتدائيــة جنــوب
مــازلــت اذكـــر اخــر يوم بالمدرســة بعــد اعــلان نتيـــجة الشهـــادة ونحــن ننـتــــقل الـــي مدرســـة الاميــرية ( 2 ) وكــان اول الســـودان المهندس خالد حســـن ابراهيـــم ( جردل ) بعــده بمراحـــل الدكتــــور احمـــد علـــي خــــالد ثم شخــــصي الضعـــيف ، واخـــذت انا ابـــكي بمــــرارة شديــــدة لان منـــافســي خـــالد حســـن تقلــب علــي ، فجــــاء الاستـــاذ حســــن و مســــك بكتفـــي قائلا ( يا عزالدين يا صبــرة مالك بتبكـــي ؟ ) وقـــد عـــرف الســبب فنــــادي بالاستـــاذ الفضـــل قائلا ( الصبـــرة ده قلبـــو حار )، اذكـــر لاول مــرة ننجلــس فــي العنقريــب مع الاستاذ حســن والاستاذ الفضل والاخ خالد حســن والاخ احمد علي خالد والاخ حاتم عباس حسن التوم كانت جلســت الوداع الاخيــرة ، والله ما كنــت اتمنــي ان افارق مدســة المساكن الشعبيةالابتدائيــة ابدا من شدة حبــي لها، قالوا لنا في مدرسة الاميرية ( 2 ) ح تتعلموا اللغة الانجليزية ويزيد الافق، والعنقريب الممتد علي ممر الفصــول بين الفصل الاول والثاني كان الحديث العذب الاخيــر الممزوج بالحب الابوي لاساتذة اجلاء طعنــــوا بحرابهــم الافــق الواســع لنتعلـــق نحــــن بالمجــــــــد ...
عزالدين عباس الفحل ابـــــوظبــــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
مدرســة المســـاكن الشعبيــة الابتدائية جنــوب
الف استاذنا الفضـــل عليــه رحمة الله ، منلــوج جميــل في اخــر السنة في حفلة الوداع الاخيــر :-
المنلوج طويــل جدا اذكـــر منـــه الاتـــي :-
استــــاذ الفضـــل جــــــوه الفصــــل دي الواحــــــة داخــــــله وخـــــارجــــة وخـــــــرط كمــــــان والبتــــــــرول ســـــؤال مضــــمــون ركـــــــــزوا كمــــــــان يا اولاد .
*** شـــوفـــوا كــــيف نبــــــؤة هـــذا الاستـــاذ الرائــــع .
عزالدين عباس الفحل ابــــوظــــبي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
مدرســة المســـاكن الشعبيـــة الابتدائيــة جنـــوب
كـــانت ملابســـنا الرثــة والاظــــافر الطـــويل كمـــخالب القـــط الشـــرس والشعـــر الاســــود بســــواد الليل وعلـــي الرقاب خــــرائط مــن الاوســــاخ المتـــراكمـــة مـــن خصـــــام الاستحمــــام الذي كـــنا نكـــرهه ونمقــته حتــــــي تـــزيد منــــاعـــة اجســــامناالضعـــيفة مــــن عدوي انفـــلونـــزا الخنازيــــر ومــــرض جنــــون البقـــر، وعـــلـــي اكتــــاف الجمــــيع خـــاتم مـــن الفــقـــر المدقع مكتـــوب علـــيه ( فقـــير بن فقـــير ) كنــا نفتـــرش اوراق الجــرائد لنقطع السندوتشات قطعا صغــيرة وناكل جماعة في جماعة لنتعلم حـــب الايــثار والاخـــوة الصادقــــة كمقـــولة ( الخلفا انقسموا النبقــة )، واذكـــر مرة ان احــد الطلبـــة ويدعي ( مجدي ) مــن ابنــاء المــزاد ، اتــي بخــمس فئران صغيــرة فـي علبــة في الفصل والجميــع مندهــش مــن الفئران ، وقال لي متحديا ( يا صبــرة امــسك الفار ده بيدك لو راجل ) وبين الخوف والوجل مسكــت الفار الناعم كالحريــر( فار صغيـــر جدا ) وفجاءة ظهــر الاستاذ حســن ووجدني اعبث بالفار ، فجـــاء ضاحــكا قائلا ( يا صبــره ده شنــو ، ده بيعمل امراض )، ثــم اردف قائلا ( انــتو عاملــين مزرعــة فيران فـــي بيـــتكم ) ، ببراءة اطفـــال فلسطيــن اعطيت زميلي الفار ، وما كنـــت اعلم الغيــب ان امســـــك يوما بفار اللابتــــوب علـــي شواطــــئ الخليــــج العــــربــــــي الميمـــــون ..
عزالدين عباس الفحل ابــــوظبــــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
أخي عزالدين
أبكاني حديثك عن أستاذنا فضل ، رحمه الله رحمة واسعة وجعل جنات الخلد منزله ومستقره وأنار قبره وجعله روضة من رياض الجنة .. آمين. ونرضى بقضاء الله وبأن كل نفس ذائقة الموت. ويزيد حزني أنني لم أقابل أستاذنا فضل رحمه الله قبل وفاته لأعلمه بمكانته في قلبي وأعترافي له بدين يطوق عنقي ، ولا أملك إلا الدعاء بظهر الغيب.
أخوك أمير قناوي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: أمير قناوي)
|
استاذ عز الدين الفحل قبل كم مداخلة سألتك عندما تكرر اسم الزين اكثر من مره هل هوشقيك ولم ترد ولكن فضولي تركني اتصل على صديقة المقرب فأجاب بنعم هو شقيقك فتى فريق الجهاد الحريف وعلمت انه اصبح دكتور صيدلاني ودرس الصيدله بالفلبين ويا لها من ايام وبالزات ثنائيته بفريق الجهاد مع عادل قدوم وعزفوا اجمل الحان المستديرة . الف تحية له من عبرك (ياخي الدنيا دي ضيقة خلاص )
-------------------------------------------- رخم الله الاستاذ فضل يادكتور قناوي ومن حكاويكم عنه والله احبابنا هذا الرجل العالم
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: أمير قناوي)
|
الأخوة والأخوات هذه القصيدة وهذه القصة (قصة نوره) جديرة بالتمعن. فلا تمروا بها عرضاً ، فبها من المعاني الكثير والكثير. سمعتها لأول مرة قبل سنين عديدة عند أخ عزيز من أبناء الشايقية في ألمانيا فأثرت في نفسي تأثيراً عميقاً . وأنا من عشاق الأدب الشايقي لما فيه أصالة وتمكن قل أن تجدهما في غيره. وإليكم نص القصيدة:
نـــــــــــــــــــــــــــــــــــــــــــــــــــوره (محمد الحسن سالم حميد)
هى أقيفن .. نوره فيكن..نوره نقاحة الجروف نوره حلابة اللبيني للصغيرين والضيوف نوره ساعة الحر يولع تنقلب نسمة وتطوف تدي للجيعان لقيمة .. تدي للعطشان جغيمة تكسي للماشين .. فوقها يتقطع هديما
ما عرفتن نوره إنتن ؟ .. قولن إنتن شن عرفتن؟ نوره بت الواطة أختي .. نوره أخت كل الغلابة نوره حاحية الشقاوة .. نوره هداية الضهابة
نوره عايز تقرا قالت .. فوقها حيطة الدنيا مالت ختت الكراس وشالت .. منجلاً صالتبو جالت ساعة إنجرحتبو شالت .. للتراب فوق إيدا كالت نوره يوم في الدونكا لدغت .. جا الفقير بالليل حواها يوم ملاها الهم قطايع ..جا البصير بالنار كواها نوره ما قدرت تمانع ..تقنع الناس المعاها
مرة شافت في رؤاها .. طيرة تاكل في جناها حيطة تتمطى وتفلع .. في قفا الزول البناها والخليقة بقت إلاها .. والشمس بلعت ضحاها فسرت للناس رؤاها .. قالوا جنت , ما براها نوره زادت فوق شقاها ..
صدت الأيام تحش .. نوره للأمال ترش عرفت الشقا والشقاوة .. نوره ما عرفت تغش نوره تحلم ببيوت .. بنور ودش بمحبة تشق دروبا ..لى قلوب الكل تخش
نوره تحلم بى وجود .. ما مشت بينو القيود أفضل أفضل بكتير .. بوطن من غير حدود نوره تحلم بعوالم .. زي رؤا الأطفال حوالم لا محاكم , لا جرايم .. لا مظاليم , لا مظالم
لما تحلم نوره ترجف .. لما ريح الواقع المر لعشيش أحلاما تنسف .. نوره تنزف نوره تحلم ..صاحي تحلم .. لما تحلم نوره ترجف .. لما ريح الواقع المر لعشيش أحلاما تنسف .. نوره تنزف
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
مدرســة المســاكن الشعبيــة الابتدائيـــة جنـــوب
كان التنـــافس شديــد بيــن فصلــي ( ا ) بقيــاد رؤوس الحــراب الاخـــوة منيـــر عبدالرحيــم والاخ ماهـــر الفاضــل وهـــو معــي فــي الامارات ، وفصــل ( ب ) بقيـــادة راس الحربـــة المهنــدس خــالد حســن ابراهــيم ( جردل ) ، ووالد الاخ خــالد ( حســن ابراهيــم ) عليه رحمة الله كان يناديني بـ ( البعــرة ) ويسالني دائما ( يا البعرة طلعت الكم ؟ ) ارد علـــيه طلعــت الثاني، وكان الاول في الفصل حتي تخرجنا من المدرســة ومرورا بمدرســة الاميــرية ( 2 ) ثم مدرســة بحـــري الثانـــوية هـــو المهنــدس خــالد حســن ابراهيــم، والاخ منيــر كان شاطــر جدا وكذلك الاخ خــالد ، ومـــرة عمل الاساتذة الاجلاء منــــافســة بيــن مدرســة الاولاد و مدرســة البنات ( مدرســة عشمــانة ) وكانت راس الحــربة فــي مدرســة البنات انذاك بنــت الدكتــور محــي الديــن صـــابر ( نسيت اسمها ) فكانت مضــرب المثــل في الشـــذوذ والنبــــوغ الفــريد، ولان النافــسة كانــت فجاءة وارتجـــالية من غيــر ميعـــاد مسبـــق تمــــت هزيمـــة فريـــق الاولاد .
عزالدين عباس الفحل ابــــوظبـــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
الا خ وليـــد عبداللطيــف
صبــاح الخيـــر
نعـــم يا وليـــد الزيــــن اخـــوي ، بــس انا كنـــت مندمـــج شديد مــع ذكريات مدرســة الشعبيــة الابتدائيــة ذلك المحـــراب الطهــــور باساتذة جاد بهـــم الزمـــن مــــــــرة واحــــدة ، كنــــت ابــــكي فـــي حـــرقة والغًًًًصـــة تطعـــن فـــي الحلــــق علـــي فقــيد المدرســة الاستاذ الفضــل عليــه رحمــة الله .
عزالدين عباس الفحل ابـــوظبـــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
عز الدين عباس حياك الله والله زرعت في نفوسنابهجة بذكرياتك الرائعة، وسردك الجميل، والحس الفكاهي البريء! لكن أصحح ليك معلومة ذكرتها: أولاً: اختبارات الشهادة الابتدائية كانت على مستوى (مديرية الخرطوم)، لا على مستوى السودان! ثانياً: الأول كان (أحمد علي خالد) وليس (خالد حسن)! وطبعاً، كانت النتيجة منشورة في جريدة الصحافة على ما أذكر!
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: صلاح عباس فقير)
|
يادكتور قناوي طبعا الشاعر حميد تعرفت علية عن طريق صديقي عماد عثمان وله صلة قرابه بهم وسكن في الشعبية فتره ولكن هذا الانسان غريب جدا وهو يتاحدث معك وتقول كأنه يقرأ لك قصيده وبنفس لكنة الشوايقة الحنينه المعروفه واذكر سبق سمعت قصيده نوره الجميله عن طريق حنان النيل
وكمان دي واحدة جميله من روائعة
سوقني معاك يالحمام ... ... سوقني محل ما الحبيبة قريبة تراعي الغرام غريبة الأشواق حبيبة يجيبا منام في منام ... ... سوقني محل ما المحنة أيادي تقطر سلام سماحة الحياة فوق أهلنا وبلادي تقرقر وئام ... ... غلابه وأمان مو الطيابة ضكارى بصارى وكرام حبابه الحبان في بابه وتدخلوا عليّ الحرام
فقارى ولكن غنايا غنايا بهذا الغمام بهذا النيل كم تغايا وتيرابا النرميهو قام ... ... إرادة القمره البتقدر براها تضوي الضلام شعاع شمشاً ياما خدّر وإذا يبَّس لا يُلام ... ... فيابا خرابا الحرابة وخرابة فكر سوسي سام خرابة الكل نفسو تأبى عقابه .. تلِم عم سام ... ... ولِيد مخلوق للقرايي خزين مدخور للجِسام تتمر نيتو التخايي إلاما مذهلل إلام
درب من دم ماب يودي حرِب سُبّه .. حرب حرام تشيل وتشيل مابِ تدِّي عُقب آخرتا إنهزام ... ... بطانة الشيطان قديمِة وبعد دا منو العرشو دام
إذا الإنسان ما لو قيمِة علي إيش خلَّفُو سام وحام ... ... تعالوا الدم ما هو مويةِ ولا ها ترايي المسام أخويا وطراوة الخوة إبتسام ... ... تعالوا نحانن بعضنا تعالوا نحانن بعضنا نخل قلبو على التُمام نبضنا يشهل أرضنا وأرضنا تجِم العضام ... ... تعالوا بدل نبني ساتر نخيب ظن الصدام نطَّيب للعازه خاطر نقوم لأطفاله سام ... ... أخير كرّاكةً بتفتح حفير وتراقد الركام أم الدبابة البتكشح شخير الموت الزؤام ... ... تعال لي غابتك يا خيرا تعال لها يا أسده الهمام بدل دوشكة يغني طيره محل قنبلة عش نعام ... ... بلد صمَّي وشعب واحد عصية على الإنقسام أبيه وبكراها واعد صبية ومشهاده تام ... ... بساطه أحمدي كم يشيلنا وتشهِّلنا على الدوام نَقِل ليلنا تقوِّي حيلنا ودليلنا تمام التمام ... ... نلقّم سقف المتاهة نجم هدّاي في الضلام ونطعِّم حرف النزاهة لإيئلافك يا حمام
ديموقراطية وأمان سوا .. سوا عالين مقام مواريثنا المن زمان محصَّنة في أروع نظام ... ... بريدك يا زول بريدك بعشقك حتّى الهيام أريحيتك عد تزيدك مهابة وليك القيام ... ... عهدي معاك يا حمام حبِيْب الرُسل الكرام رسول الأمراء العظام عصامي على ما يرام ... ... ماب تهدِل في خنادق ولا ب تقدِل فوق حطام ولا ب تنزل في فنادق وسطنا مراعيك قُدام ... ... فيا ملدوغ من أديس معوَّق في كوكدام تعال عمِّر فينا ميس كفانا طشيش الكلام جناحيك جنوب شمال وأمش طوِّف يا حمام محِل غصن العزّة مال عليك وعليهُو السلام
حكيم الطير يا مهبِّر شُراكة القَتَلة اللئام متين بإسم الحق تكبِّر وبالرحمة تصلِّي إمام ... ... فلاحة العالم تعمر محبّة مودة ووئام يقص الايد التدمر تشمِّر ساعد السلام ... ... سوقني زمن كُلُّو عافي نتاجو عِلم خيرو عام بري آيمة من المنافي وطن وافي على الدوام قِبلة غناي
------------------------------ من زمان والشوايقة ديل عندي معاهم قصص وحكاوي وما اكثرهم في الشعبية ويعجبني فيهم في كل مناسبة لازم تسمع حاجه حلوه من حاجاتهم ومتمسكين باصلهم
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
دكتور قناوي في مره حبت حنان النيل تعمل شريط كل الاغاني شايقيه ففتشت على عازف طمبور يكون اصلي وفي النهايه جمعت في واحد وصاحبنا لهجة كل البيت شايقية صر فأتصلت ووجدت صغيره في البيت حنان : يابت اديني ابوك الصغيرة : اقولو منو امي حنان : حنان النيل الصغيرة : انتي حنان الفناني حنان : نعم انا الصغيرة : انت ماكياها حنان : اها كيف تصديقيني الصغيرة : كدى غنيلي النشوفك ياها حنان : غنت الصغيرة : نعم ياكي والله ياكي زاتها الصغيره : ابوي مافي لكن اليجي ونقولو حنان الفناني اتصلت
______________________ احضرت من السودان شريط الطمبور بتاع حنان النيل وجميل جدا (ولكن غنا الشايقية لازم يكون من خشمهم والله تتخجى من المتعه واحيانا تنخج من البكاء )
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: Adil Osman)
|
اخي عادل عثمان تسلم الايادي ياطيب
بالله يامرسال شيل السلام ليهو سافر مع الانسام ارجوك قول ليهو بالله يارمرسال قولو العشوق طاريك شوقك مبكيهو يهديك الف سلام
وليك مني الف سلام ياعادل والله دميعاتي جرن وياخي البنية حنان النيل اصلا غناها صعب وحنين فمابالك لما تغني شايقي وتتمعن وتسرح في كلماتها مع رنة الطمبور ياخي يامنير ماتحلقنا وياشمس الدين ماتحضرنا الليله عادل اخوي ذكرنا اليالي في بيت ناس عبد الواحد ود الخليفه ( تورو صاحبك) وناس جل وود الخليفة الشوايقة الطيبين جيرانك
---------------------- الله يخضر دراعك يا عادل ياقول حبوبتي نور الشام رحمة الله عليها
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
نرحب بقائد عموم البطيخاب اخونا هارون دياب والله ليك وحشة ومشتاقين ياخ الخمسة دي خلت راماتنا ضربت الله يجازي الكانوا السبب
مرحب بالصفيراب
نيابة عن الزعيم هارون المحسى الأصيل
عادل عثمان ليك وحشة.. صاحبنا وهبة هرب من الفيس
بوك جا يتفسح هنا فى بوست الشعبية لكن برضو هارون
دياب لحقو هنا..
د. مريم (روما) كما نناديها ..
وين كتاباتك الرائعة..منتظرين
صديقى عبد الكريم أحمد الأمين
ياخ الهلالاب كلهم أكلوها فى حنانم وأهو شغالين كتابة
إنتا مالك؟
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: شمس الدين ساتى)
|
شكرآ ليك يا وليد على موضوعاتك المتنوعة ومتابعاتك الجيدة. لا علم لى بالتنسيق بين عازف الطنبور سيد احمد عبد الحميد وحنان النيل. ولكنها الصدفة المحضة والتكنلوجيا اليوتوبية العظيمة.
مشتاقين يا شمس الدين. كيف احوالك؟ د. روما جات واشعلت فينا الحنين الى تلك البقعة المباركة واختفت. فعلآ الشعبية طحنية. أى سطر كتبته د. روما يشجع على التعليق عليه والكتابة ولكن هيهات ان نكتب كما تكتب روما بهذه التلقائية والتدفق والذاكرة السنينة. يكون الدكتورة بت صغيرة لم تصل بعد الى العشرين من عمرها؟
كمان عزالدين عباس الفحل يكتب بطريقة جميلة جدآ تمزج بين الماضى والحاضر كأنه لم يفارق ذلك الزمن البهيج ولا لحظة. كلنا نتذكر تلك الفترة ونحن اليها. هل نهرب من حاضر بائس ، أم نرغب فى التحرر من المسئوليات الجسام التى نحملها على اكتافنا؟ دنيا لا يملكها من يملكها .. اغنى اهليها سادتها الفقراء
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: شمس الدين ساتى)
|
عز الدين عباس ما شاء الله ! لا زالت ذاكرتك حيّة! والاخطر من ذلك أنها لا زالت محتفظة بالبراءة! وكتابتك أحياناً تستثير الدموع، وكثيراً ما تُثير الضحك، لما فيها من فكاهة ومرح! ودائماً تثير الشجون! لكن برضو حسب ما أتذكر المنلوج الذي ذكرته هو من تأليف أستاذ سمير! وليس من تأليف أستاذ فضل! رحمة الله على أستاذنا الفاضل الفضل!
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: صلاح عباس فقير)
|
عزيـــزي / ورفيـــــق الدرب صـــــلاح عبـــاس
حيــــــاك الله
* ربــــما اكـــون اخطات وذلك مــــن الشيـــطان اللعيــــن . * اما مـــن هـــو اول الشهادة فاجــــزم انــــه خــــالد حســـن وســــوف اتاكد مــن ذلك باتصـــال هاتفي مع الاخ خـــلالد حـــسن . * والمنلوج ربما تكون انت صــــاح انـــو مؤلفه الاستاذ سمـــير ، فوضعتني علي مراتب الشك واليقين . * والدكتـــور احمد علي خالد ليس بالشخص الهين فالراجل كان ذو ذكاء خارق وحاد .
مــــــــع خالص الاحترام والتقدير
عزالدين عباس الفحل ابـــوظبــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: صلاح عباس فقير)
|
الاخ العبقـــري عادل عثمـــــان
حيــــاك الله
اشـــكرك جزيل الشكر علي المداخلة الحلوة ، والفقــــر ليــــس بالعيب وان تعوز منه الرسول صلي الله عليه وسلم وقال علي ابن ابــي طالب لو كان الفقر رجلا لقتلته . لكــن شاءت ارادة المولي العلي القدير ان نولد وليس في فمنا معالق من ذخب وان نبني عشنا قشة قشـــة زي القماري وهذه روعـــة الحيـــــاة ان نتلذذ بالكلاوي والكبد والسمك في الخليج العـــربي وان كانت البطــــــون وقد اصتبغـــت بالقـــرع ..
*** اذكر ان قابلت اخــوك يا عادل فـــي ابــــوظبـــي . هــل هذا صحيـــح ..
مـــــع خالص الود
عزالدين عباس الفحل ابـــــوظبــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
مدرســة المســــاكن الشعبية الابتدائية جنـــوب
كنا نشــــرب المـــياه الباردة مــــن الزيـــر وعليــــه طبــــقات مـــن الطحــالب الخضــــراء تعطــــي طعما حلوا للمياه حســب ظنا انذاك وكانت الضفادع اليانــــعة تقــز فرحــة علــي كصطبــة الزير ، ونــحن نفرح بذلك واسراب الجراد وقت الخريف تشدو معنا اعذب الالحان بين شقاوة الطفولة والقمصان الممزقة برائحتها النتنة، وسندوتشات جبن اللافاشكري الممزوجة بالعسل والقشدة وقطع الزيتون الشامي كنا نراها علي اسطح المجلات وســط الخيــال الفســــــيح بطعم الايس كريم بحبات العنب والكمثري المثلجة علي ترهل الزمن العجيب بالحاسوب والايميلات الحــرة تفرح وسط نقبق الضفادع والصراصيــــر والبراغيـــث علي جدران الفصـــول كانها شعار خلو الجيــــــوب الا مـــن ورع القلـــــوب وابتهالات حناجــر الشيــوخ ...
عزالدين عباس الفحل ابــــوظبــــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
اخواني ناس احلا حله في الدنيا
Quote: اخواني ناس الشعبيه وين ما تكونوا باسلم عليكم
اختنا الرافعه راسنا دكتورة ستنا خدر اهلا وسهلا وما بتتصوري انا لما شفتا مشاراكتك في البوست ايام تنقيبي عن الدرر في المنبر دا ولقيت بوست الشعبيه ولقيتك مزيناهو
ما تشوفي شر ان شاالله وانتي من بنات الحله الجد بنعتزا بيهم وكل ما نجي نتفخر بالحله لازم نذكرك وفعلا كل الاسماء الذكرييهم من اختنا اميرة سليمان الحوري ومنال
عبد الكريم وثريه فضل هم فعلا منات الشعبيه البارات تحياتي ليك ولاسرتك وعليك الله اخبار ناس اختنا هانم حشسن ابراهيم شنو اخت التيمان وبت جيران ناس دكتورة امل على عبد النعيم واخبار الدكتورة تمال شنو لو عندك اخبارهم
اخوي خالد عثمان احمد اهلا وسهلا بيك وسقى الله تلك الايام وين الحي بيك وعاش من شاف حروف كي بوردك باتصل على حنان اختي وباذن الله باقول ليها انك بتدخل البوست سلام لكل الناس المعاك ومشكور على توجيه التحيه لي حيا الله اصلك الكريم اخوي
خالد درق ماشا الله بسفرتو الليلة في البسفور صور جميلة وربنا يخلي ليك اسرتك وزيس ما قلتاليك السنه الجايه تعالوا عندنا اليونان جميلة
دكتورنا قناوي تحيه ليك ولكل ما تخطه يدكم الكريمه تحياتي لاسرتك وربنا يغتي عليكم وسلامات من النزله
اخوي فقير ما قطعتا منكم بس الايام دي نبطشيه في المستشفى كانت ليومين وراء بعض بس كنتا باخطف لي طله على البوست وباذن الله النبطشيه الجايه اخر الاسبوع يعني الواحد بقدر اتواصل باذن الله وسالت عنك العافيه والهناء ما قصرتا سلم لي على اسرتك
شمشي كيفك يا زول وين مالك مختفي الله لا اسكت ليك حس كيف اولادك البت سجلت ولا لسه وكيف المعاك سلم علي عيهم كلهم اسكت اختك مزنوقه في النبطشيه
لكن اوعدك ح اعمل وجود مكثف لغايت ما تزهجوا مني تسلم يا شمشي وما فقدناك يا اخوي
وليد عبد اللطيف سعيد ماشا الله على الصورة الوجيهه ماشا الله ما اتغيرتا ويا ناس اخوي وليد ماشا الله عليه قيافه من يومه ووجيه وجنتل عندك كميه من السلام من حنان اختي وقالت لي اصلو وليد راقي من يومو نظام بتفتح ليها معاك سكه عشان انتا ابو البنات
|
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
Quote: يوم دراسي في الابتدائي
اهلي في الشعبيه وين ما تكونوا ازيكم
اخوي الفحل روعة كتباتك عن المدرسه وعن الشعبيه بتنقلنا معاكم كاننا قاعدين في نفس الوقت معاكم واصل اخوي من فضلك
حابه نسترجع ذكريات في الابتدائي بتتذكروا الشرطه المدرسيه وديل بيكونا طالبات بتختارهم كل ام فصل عشان يراقبوا البنات في الفسحه ويشوفوا منو ىالبترمي ورقه في الارض او منو البيمشوا في الزراعه البتكون في ركن المدرسه او منو البيكوركوا او منو الما بيكونا قشوا الفصل او منو البرجعوا بقيت المويه في الزير - الفضله - او منو البيخلوا بقايا الفطور وغالبا ما بتكون ورق الفته بعد ما الناس بتكون اكلت فطروها وفتت سندوتشاتها مع بعض او منو البتبرا قلم الرصاص بره صفيحة الزباله الله يكرمكم
وكمان في نهايه اليوم الدراسي منو البيكونا ما بيمشوا سريع لبيوتهم وكانو بيلبسوا زي شريط احمر في يدهم في اعلى اليد وطبعا لازم تتصاحب عليهم لانو ممكن تروح في طوكر لو مشوا وكتبوا اسمك وبتاخد تاني يوم قدام الاشهاد في الطابور زفة محترمه وقد يصل الامر الى علقه معتبرة
برضو بتتذكروا الالفه ودي بتكون بت بتختارها ام الفصل بيتقيف تحرس البنات في الحصص الفاضيه وياويل البيتكلم بتكتب اسمه والغريب كان في عبارة كل الفه بتكتبها فوق في الورقة التي كانت تقسمها الى قسمين القسم الاول الناس المهرجلين وتقوم كاتبه اسم البت واسم ابوها والقسم التاني بيكون للناس البيضحكوا والجميل انو الالفه دايما بتكتب بي قلم الرصاص لانها بتدي الناس فرصه يتراجعوا عن الهرجله وغالبا ما تتسبب مهام الالفه في ان تبتعد صحباتها عنها وكانت من مهام الالفه مسح السبورة عشان كدا الالفه دايما بتكون اطول بت في الفصل وبتجيب الطبشير من المكتب وبتجمع الكراسات بتسلمهم لكل معلمه وغالبا ما بتكون من المرضي عليهم من قبل المعلمات
بتتذكروا ياجماعه الدرادمه الكانت بتتباع في خشم باب المدرسه طبعا كانت خشم بيوت فداردمة الكركدي والعرديب ما زي دردمة الكستر او الفروله بي روح الموز وبتتزكوا الفراوله كانت بتكون على شكل سائل في قزازة تخنها رهيف وكانت من امتع اللحظات لما تمرق في الفسحة او في اخر اليوم او ما كنا بنقول ليه البيوت وتشتري ليك درادمه وكانت في برضو حلويات منها حلاوه قصب وحلاوة شعريه وحلاوه لبن وحلاوه بالسكر المحروق والفول السوداني وبالتاكيد ما بننسى حلاوه سمسميه وفي الاول كانت على شكل كرة تاني بقوا بيعملوها في شكل مربع وبرضو قراصه النبق
وكان في القنقليس بالشطه او الدقه بالسكر ونكب عليها مويه والغريبه يا جماعة انا كنتا شليقه وكل مرة عارفه ان الدقه بتشرقني وباشتريها افضل اكح لغايت ما اضاني تحمر ولكن ما باتوب منها وبرضو في التبش بالشطه واللالوب والدوم وكنا مرات بعد ما ناكل القنقليس نحك البزرة فبتسخن وتجي تتش بيها اقرب زول قاعد جنبك
وكان في معجنات اسمها الضفيرة لو بتتزكروها على شكل ضفيرة والتسالي والنبق وفي موسم القصب كنا بنمشي سوق الشعبيه وكان بيكون في موسم البرد وبنشتري القصب وبرضو في الشتاء كان في الفول السوداني البيكون بي قشرتو والبامبي المسلوق ونادرا ما يتباع جنب المدرسه عيش الريف لانو كنا بنلقاه في البيت مسلوق اقول ليكم شي فصل الشتاء مرتبط عندي بالقصب والبرتكان والبامبي والفول السوداني المسلوق والبليله بتاعت القمح
وفي نهايه اليوم الدراسي كان في تقليد ضربة الوداع يعني تخبط زميله ليك باي شي وغالبا ما بتكون بالشنطه وتقوم جاري وطبعا تاني يوم اول شي بتجوا تتصالحوا واللذيذ في المدرسه كنا بنتصالح ونتحارب عشات المرات في اليوم
وكنا لما نجي نقول لي واحد سر نحلفها بالزمه التقطع رقبتها شي غريب يا جماعه موش كدا لانو الزمه شي داخلي ايه علاقتو بي الرقبه الله يعلم وكان لما واحدة تكضب بيعملوا ليها زفه وجريسه الله لا وراكم ويكوركوا الكذاب ما بريدو السكينه تقطع ايدو ولما نتحارب يعني نزعل من بعض نرسم في جبهتنا علامه كروس ولما نتصالح نشبك اصبعنا الصغير من بعض
بتتذكروا يا جماعة حصة الاناشيد طبعا كان ضروري اكون في ملحنه في الفصل ولما الاستاذة تقرا لينا القصيدة كان لازم يكون في ملحنه والغريبه كل الالحان بتتشابه واتذكر اكتر واحدة كانت بتحب التلحين شاهندة مبارك واميمه بابكر ماشا الله ما كانت في قصيدة ما بيقدروا يلحونها وبعد ما يتم اللحن كلنا الفصل كلو يبدا ينشد فيها وكان ممنوع الضرب على الكنبه ولكن كثيرا ما كان ياخذنا الحماس ونخبط على الدرج فنتسبب في العقاب بالحرمان من الفسحة او من ان نكتب عبارات معينه الف مرة
اتذكر مرة ست اسيا الوكيله جات لقتنا بي الفتنا المفروض تكون حارسانا مهرجلين الفصل وهاك يا صريخ ولعب فعاقبتنا بعبارة وعلموا النشئ علما ...... وقبل العلم اخلاقا معليش ما متذكرة العبارة المرجو النتذكرها يكتبها لي يا جماعة المهم كتباناها الف مرة طبعا قعدنا من العصر لغايت العشاء نكتب وكنا خايفين لانها ممكن تعدهم بالواحدة وجات طالبه بفكرة وكانت بدويه عثمان اشيخ قالت لينا تعالوا نكتبها بي ورق الكربون وفعلا كتبناها فجات ست اسيا عودتنا الكتباه الفين مرة لانو كان واضح النسخ
ومشيت المستشفى بي كراس العيادة نجي من الصباح وقبل الطابور بتسجل في دفتر العيادة وتحضر الطابور ويتجمعوا البنات ويمشوا المركز الصحي وكان لازم ترجعوا المدرسه يعني مافي طريقه مشيه البيت لانو لازم يجوا يرجعوا دفتر العيادة
اخواني في كل مكان الشعبيااب اخليكم في امان الله انتم ومن يعز عليكم روما
|
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
السلام عليكم! وجمعة مباركة!
بدر الدين إسحق، حمد الله على سلامة الأوبة! وفي انتظار "المفروغ والمستأنف"!
الدكتورة روما، شكراً لك، إذ لا زالت سحائبك تهمي بالذكريات وأصدائها الجميلة!
وأين العمدتان، مسجلين غياب! وكذلك أبو (محمد فؤاد)! وطبعاً أخونا أسامة سعد وآخرون عوّدونا الغياب!
وليد ما شاء الله! ما هذه التقنيات الخطيرة؟! من أين لك هذا؟
مجدي نقد في انتظار إجاباتك على أسئلة أمير!
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: صلاح عباس فقير)
|
حمدا بالعود
حمدا بسلامةالعودة للاخ: بدرالدين اسحق،من زيارة النمسا،وكنا نتعشم بالعروج لنا في المملكه المتحدة،او هكذا ظننا. تسلم بدرالدين،ولاسرتك الكبيره معزتي وتحياتي.
خالد درق بلاشك ايام خالدات في تركيا اردت اليكم والاسرة،الروح،ودفعت المعنويات اختياركم لتركيا ،ينم علي حدس سياحي عالي فيكم. حقيقة بعد انزالك للصور،تزكرتك،رغم طول السنيين. تسلم يا خالد ولاسرتك تحياتي.
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
Quote: جمعه مباركه عليكم يا شعبيااب
اخواني في البوست جمعة مباركه وتقبل الله الطاعات
بمناسبه يوم الجمعه في الشعبيه كنا بنكون مساهرين في التلفزيون لانو سهرة الخميس بتكون كاربه او كتير ما بيكون في مناسبه زواج في الحله ويوم الجمعه الناس بتصحي ويبدا اليوم بالشاي وغالبا ما بيكون معاه شي يا ليقيمات او فطير او باقي قراصه بتكون من العشا فضلت ونخت عليها سكر او بيدونا كل زول فينا رغيفه وفي ايام بتكون الحاله الاقتصاديه كويسه فبيكون في باكو بسكويت بسكويت كرم لو بتتذكروه
بعد الشاي بيبدوا الناس ادخلوا السراير جوة البرندات والاوض او المراتب لو كان الناس عندهم سراير حديد في الحوش ويبدوا البنات ينضفواالبيت والامهات مارقات وداخلات في المطبخ وغسيل العدة بيكون على البنات الصغار نجيب الطشت والجردل لانو ما كان في معظم البيوت ما كان في احواض في المطبخ يا هو الطشت وليفت العدة البتكون مقطوعه من احد شوالات السكر وبتكون بيضاء والصابونه اللوح يا بتكون لونها وردي او ابيض ونبدا في غسل العدة وبيكون في عنقريب العدة وبنختها في صينيه المهم تبدا طقوس الفطور وغالبا ما بيكون يا قراصه بي دمعه وا قراصه بي تركين او فسيخ او ملاح نعيميه ولقمة او بي كسرة ومن فتح الله عليه بيكون في صحن جنا جداد يعني البيض وبيكون مفقوع او بيكون في صحن فول وبي زيت سمسم او زيت فول وصحن شطه بي دكوة والشطه الخضراء بتكون موجودة او بالعدم ملاحه وبتكون من جزئين جزء للملح وجزء للشطه وطوالى الملاحه في حالة انها فاضيه
في الفطور ممكن جارتكم تجيب ليكم صحن طلس فيه شي بتكون عملته وبتضوقكم منه بعد الفطور تعمل شاي الفطور وتتغسل العدة العدة ما زي الايام التانيه لانو الابهات موجودين ودايما بيكون في غسيل يعني البنات قاعدات في الطشاطه وبيغسلوا في الهدوم وهاك يا دفيق مويه في الشارع وشر الهدوم
الرجال بيلبسوا يتحضروا للصلاة والاولاد كمان وبيكون يوم يستحموا فيه ويمشوا المسجد لما يرجعوا الاولاد ما بيرجعوا البيت الا في مواعيد الغداء والغداء غالبا بيكون سمح لانو يوم الجمعه يعني ممكن يكون سليقة لحمه ورز او ملاح مفروك وبيكون يوم الجمعه في تحليه يعني ممكن يكون في موز او برتكان وشاي الغداء ضرروري في المساء نبدا نكوي هدوم المدرسه دا لو ما ختيتهم تحت المرتبه والمكاوي كانت بتاعت فحم وبندا نستعد ليوم السبت تشوف وين كراسك الكنتا بتقدرا فيه تحت ياتو مرتبه ولا كتابك مجدوع في راس ياتو دولاب ووين شدتك او الباتا لانك بتكون غسلتهم ووين شنطتك وتفتش على القلم البيكون صغيروني بتتذكروا عبارة قلم فلان دا بعرة والعجيبه القلم البيكون قصير ومن البري طلعت روحو كنا بنعتقد انك بتكون خطاط بيه وبتتذكروا عبارة القلم دا خشابي يعني بيتكسر في البرايه وبيكمل بسرعهتتذكروا يا جماعة اقلام الثري اتش
يا حليل الجمعه مشوار السوق الصباح عشان نجيب الفسيخ والدكوة ونقعد ندق الشطه الخضراء بالتوم في الفندق وبيكون مصنوع من الحديد او الخشب وتقريبا بتكون في كل البيوت مسيطرة الدقه دق دق دق دق وتلحب الليمون فوق الشطه وتديها دكوة و تلخلخ الشطة بي يدك وتلحس اصابعك وتكون الشطه حارة وتضطر تجري على الزير وتشرب مويه وتذداد الحرقه من الشطه وتجري تقطع ليك من طرف رغيفه من الكوع وتاخد ليك نهره لانو مفروض تنتظر التانين وما تقطوا الرغيف يا عيال زي ما كانوا بيقولوا لينا وبتتذكروا حله الفسيخ بتكون في اخرها حرقان او لاصق ومنظر المفرمه البيكون يديوه وبتكون واحدة في كل الشارع دا يستعيرها من التاني والحله يا جماعة احلا شي لما تجي بي حتت رغيفة وتعقد تاكل فيها وتحك القعر بي اصابعك وكان بيقولوا لينا البياكل في الحله يوم عرسو بيقوم التراب والعجاج والغريبه معظم الاعراس كان بيقوم فيها التراب او بتجي مطر فياربي شنو العلاقه بين الاكل في الحله وبين قومت العجاج ومساكين العرسان او العروسات الكنا بنتهامس عليهم انو فلان اكيد اكل في الحله واللذيذ العريس بيكونا شايلنو وبيبشر وكل العالم بيكونوا متيقنين انو ماكل في الحله
ويم الجمعه كان يوم عائلي لاننا بنشوف ابهاتنا في البيت بالرغم من عدم تواجدهم طول اليوم لكن شوفت ابوك في افطور او الساعة 11 الصباح في البيت كان شي غريب والفطور والغداء بيكون ف يالديوان او الصالون والرجال بياكلوا براهم والحريم والبنات براهم دا الكان في بيتنا ما باقدر اعممه على كل البيوت
التحيه لكل الشعبيه في كل ايام الاسبوع في كل شهور السنه وربنا ما قطع لينا عادة
اخواني الشعبيااب وين ما تكونوا جمعه مباركه عليكم وعلى كل من يعز عليكم
روما
|
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
Quote: يجماعة كدى النسألكم قصة دكتور عماد دي شغل ولا الجماعة شايلين العكاز |
الاخ وليد تحياتي وسلام تعظيم لكل الشعبياب والزوار الكرام نحنا مرحلة العكاز دي خلاص اتعديناها والله الايام دي عندي شغل مع ناس مصلحة الاحصاء ( تعداد للقوي العاملة في قطر بالعينة ) ولازم الشغل يخلص قبل يوم 22 اكتوبر 2009 عشان كدا مزنوقين مافي راحة لا جمعة لا سبت لا غيرو لكن بجي داخل طلات صغيرة نصبح ونمسي عليكم اعذرونا وتحياتي للجميع
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عماد الدين عبدالله)
|
Quote: الاخ / عابدون تحياتى
ناس الشعبية والاخوان بالبوست السلام وعليكم ورحمة الله وبركاتة
اليوم الرابع فى اسطنبول
فى هذا اليوم صحونا من الصباح وبعد وجبة الافطار فى الفندق توجهنا الى محطة المترو والذى كان هو الوسيله الوحيد فى اسطنبول لانها كان يربط جميع المناطق السياحية مع بعضها فى خط واحد
وكان مقصداً هو شارع الاستقلال وميدان تقسيم قلب اسطنبول النابض
ركبنا المترو وتوجها بنا الى ان وصل اخر محطه ، وبعده نزلنا تحت الارض
الى مترو اخر يوصلك مباشراً الى شارع الاستقلال وميدان تقسيم
يالها من رحلة فى المدينه الحالمه
وصلنا الى شارع الاستقلال وهو طبعاً مقياس المدينه ، مقياس حرارتها وأيقاعها ونبضها وهو المجر البشرى الدافق الذى يبلغ ميدان تقسيم
وشارع الاستقلال كى شارع فى اوربا مذدحم بلأجانب والسواح ، وتقع فى الشارع جميع المحلات ذات الماركات العالميه والمطاعم والمقهى ، وبمتددها توجد السفارات والقنصليات الاوربية التى منها بريطانيا وهولندا وفرنسا وبلجيكا واليونان ، وهو شارع هائل يفضى بالبشر فى كل وقت من اول النهار وطول الليل الى اول النهار التالى يعنى ما فى نوم فى هذا الشارع بشر من كل الانواع والاهواء والاجناس والالوان واللغات ، بمعنى لابد من الذهب الى ذلك الشارع لتتعرف على الثقافه العثمانية والتركيه والاوربيه والاسلاميه المسيحيه واليهوديه والعلمانيه والاقتصاديه
ثم الدخول الى ميدان تقسيم حيث تنصيب الجمهوريه الوسطى وبكمال اتاتورك يتقدم الامة فى مسير ، ثم وجود الحمام وسط الميدان فى منظر خلاب استمتع يوسف وشهد مع العب مع الحمام واعطها الحبوب والجرى وراها ثم تجد بيعات الورد والزهور على طرف الميدان يجلسنا فى خط مستقيم والورد يفوح عطراً فى منظر يسلب منك الوقت وانت لاتشعر بها ، جلسنا فى الميدان الى وقت متخر من الليل ثم بعد ذلك اخذنا اخر مترو بطلع من الميدان ورجعنا الى الفندق
اترككم مع الصور الى ان نتابع اليوم الخامس
ولكم الود اخوكم ... دبى
|
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عابدون محمد عابدون)
|
Quote: الاخ وليد تحياتي وسلام تعظيم لكل الشعبياب والزوار الكرام نحنا مرحلة العكاز دي خلاص اتعديناها والله الايام دي عندي شغل مع ناس مصلحة الاحصاء ( تعداد للقوي العاملة في قطر بالعينة ) ولازم الشغل يخلص قبل يوم 22 اكتوبر 2009 عشان كدا مزنوقين مافي راحة لا جمعة لا سبت لا غيرو لكن بجي داخل طلات صغيرة نصبح ونمسي عليكم اعذرونا وتحياتي للجميع |
ربنايعين يادكتور عماد بس حبينا نتطمن
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
ياعابدون وخالد درق والله بالخرفان البتتقلب دي ذكرتونا ربيد (حلة ) عم مصطفي حارس سوق الشعبية والله ياخالد درق انا خايف ناس الشعبية يشوفوك كده يفتحوا فيك بلاغ السراء الحرام يازول اللحمة دي في السودان الناس بتشوفها معلقة بس في الجزارات وبلدنا تُصدر المواشي واللحوم
----------- ياعبدون يمكنك تحميل الصور من شريط الوان الخطوط في النهاية يسار بعد اضف صوره (سنه ياوليد ) انت شايف ياوهبة صاحبك بقى استاذ كمان
| |
|
|
|
|
|
|
|