الشعبية نجمة تزين سماء مدينة الخرطوم بحري

Quote: انا عايزة اوثق لي ناس شارعنا نحنا بنسكن في الشارع البعد شارع النيم ولو مسكنا الشارع من مربوعنا في ناس خالتي الساتر وديل من السوكي وهي زوجه المرحوم عمكم عمر محمد نور ووالدة امنه وصفيه وزبيدة وكلنا بنتذكر افضال زبيدة وجمايلها لانها كانت ممرضه في مستشفى بحري وكانت بتساعد كل ناس الحي وكمان في نورة. خالتي الساتر ما عندها اولاد لكن كل اولاد الجيران اولادها وكان بيجيهم عمي مرحوم اخو خالتي الساتر وعندو حمارة وكان لما بيرد السلام بيقول ليك اهلا يا بت المك تربطهم صله مصاهرة مع ناس زينب عطا في حله الطابونة المرحوم حيدر كان متزوجا من امنه بت خالتي الساتر البيت البعدهم في البدايه يعني قبل سنه 89 كانوا ساكين فيه ناس عم حسين النوباوي وكان يعرف بي بيت ناس النوبه واولاده عاطف وعادل وعماد وبناتهم عايدة وعواطف وود اهلهم داوود وبعد ما رحلوا جوا ناس عمي ابراهيم وهم من ناس شمبات واهلهم في الصبابي واشتروا البيت و زوجته خالتي اسماء واولاده ابراهيم وطه وبناتهم منى واحلام والمرحومة ايمان وسلوى بعدين في بيتنا نحنا مريوماب من حله حمد وخوجلي اهل ابوي وامي مصرية اكبرنا المحامية امال وبعدين منال اختي زوجه العميد بشير الطاهر وبعدين انتصار والمحاميه هويدا والمحاميه حنان وبعدين منى وبعدين انا وبعدين محمود الجن وبي مناسبه محمود كان حارس مرمي في فريق الشعبيه وطلعت عليه نكته لانو اشترا ليه حافله وقالوا محمود بقا ما شاطر في حراست المرمى لانو بيعد عدد الفردات البتعملها حافلتو اثناء المبارة ما بتكون شغاله لغايت سنه 79 كانوا ساكينين معانا في نص البيت ناس عمك شفيق والادهم ناس مجدي وبعديهم سكنوا معانا ناس عمك عبد الحليم النجار وديل شوليقه جزازير من تنقسا ولدهم جارنا وهو عبده الو معلم بزة البيت البعدنا ناس عمكم ساتي عبد الحفيظ مؤذن الحلة وهم محس ووالدتهم خالتي نبويه الله يرحمها وهم الرشيد ودا خريج الخرطوم وتاج الدين والاخ شمس الدين واخواتهم الاستاذة ليلى ودي من بنات الحله الشطارات وخريجه الخرطوم انقليزي واختها اعتماد زوجه الاعلامي المعروف حسن في قناه الجزيرة وفي ماجدة ساتي موظفة كانت في شركة شيكان البيت البعدهم ناس عمي المرحوم ابراهيم مالك والمرحومة خالتكم اسماء بت حلت خوجلي وديل زينا مريوماب او لادهم المرحوم اسماعيم واسامه واسحق ويعقوب وبناتهم اكرام والاستاذة اشراقة مديرة مدرسة الشعبيه 3 متزوجه من الاخ ود الشعبيه عثمان على المدير وفي اسلام ورحاب وهاله وزينب البيت البعدهم لغايت بدايه التسعبينات كانو بيسكونو الاسرتين ناس عمك شريف وزجته ست حواء واولادهم حمادة وشهاب وبتهم بلقيس وفي الجزء التاني ناس عمي عبد الكريم الدنقلاوي وزوجته خالتي شريفة واولادهم محمد وعمر وهيثم وهشام وبناتهم نوال ودي كانت زميلة لي في المدرسة ومنال اختها والمرحومة هنو بعد داك اشترى البيت دا الاخ كمال اخو ناس عصام الفونس وسكن فيه هو وزجته واولاده البيت البعده ناس عمي ابو جبل بعد ما اتوفي اجروه وسكن فيه الاستاذ حسين جعفر وزوجته الدكتورة سلوى وكانت من ناس المزاد وبناته وكان نعم الجار وبيساعد في دروس محو الاميه وبيساعد اهل الحي البيت البعدهم ناس عمكم الظريف حسن درار وزوجته الحجة بت المنه واولاده ناس حمزة والعباس وبناته ناس كوثر والمرحومه واخلاص و بتو المخرجه في التلفزون السوداني مشاعرحسن درار واختها اميمه وبقيه اخواتهم الكبار بعدهم بيت ناس عمك المرحوم خليل شورة ناس توفيق وكريمة وهم رطانه ومن اطيب الناس الفي الشارع وبعدهم عمك حسين وناس خالتي المرحومة محاسن عباس اولادهم الصادق واحمد واخوانهم واخواتهم عوضيه شغاله في جامعه الخرطوم ومنى والصغيرونه هنو وحبوبتهم الحجة ام بليل البيت البعدهم ناس عمك عتمان وخالتكم رابعة واولادهم وبتهم فاطمه وزمان كان معاهم ناس خالدوة وسكينه ودي في عرسها جالبو عثمان الشفيع وكان حدث بعديهم الاستاذ هاشم الزبير لما نجب في البيوت المقابله ليهم في ناس زينه خالتكم ناس وكيل النيابة الاستاذة نبويه مفخرة الشعبيه واخواتها واخوانها واخوهم عبدون الله يرحمه بعدييهم في ناس عمي فارس ناس خالتكم زينب فارس اولادهم ناس امير واخوانه وبنتها منى بعديهم ناس عمك كافي وخالتك عشه وكانوا بيقولا ليها عشه النوبه وولادها المهذب ماجد واخواته ناس ساميه واخواتها بعديهم الحديقة وبعديهم مقابلين لينا عمكم الرائع على عبد الله الشايقي وزوجته خالتي نوره وديل ناسبو ناس الخليفة ومن اولادهم احمد ويسن وبناتهم عرفة وحنان وسميه وساميه ونجاة وبالمناسبة مناسبيتن ناس الحوري البيت البعدهم ناس عمك المرحوم سليمان الحوري وزجته خالتنا فاطمه بت الباوقه وهم مناصير من الباوقه واولادها جنابو على الحوري وهو نسيب ناس عمك على المدير وناسب ناس عمك على عبدالله ومتزوج من نجوى بت على المدير وهناك التاج وفيصل الحوري واسامه ووليد وزاهر واختهم الاخت اميرة ودي اتخرجت من الاحفاد البيت البعدهم ناس عمي الياس وخالتي الشول الله يرحممهم اولادهم احمد وكمال ومحمد وبناتها المرحومات فتحية واخلاص وفي الاخت مني ودي متزوجه من ناس حسن سرور وفي الاخت احلام خريجه الفرع الشارع انتهي ونبدا في نفس الشارع لقدام في ناس شوقي وشاذلي واختهم شرين وديل دناقله وبعدهم كان زمان بيت العميد عبد الرحيم الحوري شقيق العم سليمان الحوري وزوجته حيبوبه واولاده احمد ومحمد وعبد الله ودا سموهو على ابوي المرحوم عبد الله وكانت عندهم المرحومه نهله واتوفت وهي في سنه تانيه عام بعديها سكنت فيه واحدة من بنات ناس ليلى مراد البيت البعيدهو ناس عبد العزيز معليش الذاكرة خانتي في ان اتذكر اسمائهم لكن بتهم واحدة اسمها هويده بعدهم ناس خالتك ست النساء الله يرحمها واولادها ناس بري ومحمد وبناتها ناس ماجدة بطه وسارة وغادة ودي قرت معاي في المدرسة نعم الاهل والجيران لم نرجع لي باديت الشارع بنلقا ناس الرحمة خالتكم الرحمة واولادها جلال وعلى وبناتها ليلى وسلوى وبنات بتها ناس هويده وسعاد ونص البيت ساكنين فيهم ناس عبده الجزار وزوجته نفسيه اخت ناس طلب وعبد العظيم وبناتهماها لبني وبطه وايناس وولدها معلم بزة محمد البيت البعدهم اولادهم ناس مرتضى وتاني الذاكرة بتخوني البعدهم ناس عمي المرحوم عبد اللطيف سعيد وخالتي عشة وديل ناس الزين وعز الدين وعيسي وسيف ووليد واخواتهم ناس اخلاص والمحاميه عواطف عبد اللطيف وصديقه عمري مشاعر والمرحومة دكتورة رحاب وبرضو الزين مناسب ناس الشعبية واتذكر ناس ود الحسين ناس مريم وميرم وناس نهله عوض واخوها خالد وناس خالتي حرة وناس رحال المرة الجايه ح اتلكم عن الثنائيات الاتكونت بالصداقه بين ناس حينا معليش عن الاطاله لكن انا اكتب تحت شعار كان في جرة وطلع لبرة واني ما مصدقة اني باحكي عن احلا ناس واحلا اهل

Quote: البيت الجديد يا اهلنا عمدانه حديد البيت اتبنى يا اهلنا بالحب والمنى و يا عديلة يا بيضاء ويا ملايكه سيري معاه الليله شوين بي قودرت الله اغاني الفرح ترددت كثيرا في الشعبيه لكنها كان لها طعم اخر لما يكون العرسان الاتنين من الحله وبحكم التداخل بين اهل الشعبيه تمت بحمد الله الكثير من الزيجات الناجحة والمستمرة باذن الله واذكر منها على سبيل المثال زواج عادل زين العابدين من الاستاذة المحاميه حنان طه اخت الاستاذة السرة زواج العقيد معاش على سليمان الحوري من نجوى على المدير زواج ماهر اخو ناس عز الدين وخال عبد الحليم ومحمد وخالد بيتهم ملاصق ناس فيصل الدفشقو تزوج من المرحومة فاتن بت ابو الوفا زواج عبد الاله الديبروبي من حنان عثمان الشيخ زواج ماجد عبدالله من المرحومة حواء معطيب الملقبه بي حبوب زواج يسن على عبد الله من صفيه الخليفة زواج الفنان محمد محذوب من هاجر معيطيب زواج الزين عبد اللطيف من اخت ناس حسن طه في شارع السوق زواج اسامه سليمان الحوري من ابنه خاله فاطمه زواج حفيد عمكم على عبد الله من فاطمة على سليمان الحوري زواج ولد ناس حسن سرور من مني الياس زواج المرحوم حيدر ود ناس زينب عطا من امنه عمر بت خالتنا الساتر عقد قران الخير حيدر على بت خالته ام عشي دي الزواجات الانا باعرفها المرجو ان يواصل الاخوة لو في حالات تانيه من الزواج والمصاهرة بين سكان الشعبيه اختكم روما

Quote: الشخصيات كتيرة ح نبدا بي خالتي حكمو الله يرحمها الخاله حكمو هي من الشلاليه وكانت حلوة المعشر مشهورة بخفة الظل اولادها اسيا وعندها ولد اسمه طارق اخر عهدنا به انه كان في ليبيا كانت تسكن الخاله حكمو في شارع المقابر بجوار منزل ناس الواثق وعاكف الخاله حكمو كانت تسكن معاها اختها المرحومة نادية وبنتها رشا ولها اختها الخاله نصرة من سكان الدناقلة وييحكى عن الحاجه نصرة انها كانت تحب افتعال المشاكل وعندما لا تجد سببا للتعارك كانت تكحل احد حاجبيها وتترك التاني ولما يسالها احد لماذا هذا الحاجب غير مكحل تبدا في العراك معه وكانت الخاله حكمو من شيخات الزار وفي كثير من الاحيان كانت تدق الزار في بيتها وكنا نذهب الى هناك للفرجه وعندما كانت تمر في الطريق كنا نحيها وفي قلوبنا شي من الخوف الخوف من ان تسلط علينا احد الارياح وكانت تعرف ذلك وتضحك من سذاجتنا كانت طيبة القلب وكريمه واتذكر انها كانت توزع علينا بعد ان ينتهي الزار كل ما تبقا من حلويات او طعام وكنا ننتظر موعد الرجيبيه على احر من الجمر او يوم اللاربعاء والاحد من كل اسبوع لانهم مواعيد فتح العلبه وكنا لانعرف ماهي العلبه ولا يهمنا لماذا تفتح او من الذي اغلقها كل ما يهمنا انه في اليوم التالي سوف تجود علينا بالحلويات وبالفشار والتمر في احدى المرات واثناء دقت الزار حضر رجل وبدا في الرقص ولما وقع جائته الخاله حكمو تساله عن مطالبه ويرد عليها انه يريد فرسه جديدة اي زوجه جديدة وللمفارقه ان زوجته هي كانت صاحبت الزار وانها اثقلت عليه بالطلبات فلجا لتلك الحيلة رحم الله خالتنا حكمو الشلاليه

Quote: ـ ح. م: ممكن أكلم الدكتور منير الطنطاوي؟ ـ د. أمير قناوي: نعم معك الدكتور أمير قناوي . ـ ح. م: ياخي إناوي .. طنطاوي .. هي فارئة ؟ , هو أنا عايز أطلعلك باسبور؟ ـ د. أمير قناوي: عفواً .. تفضل بطرح السؤال. ورجاءأ أن تخفض صوت التلفزيون قليلاً , حتى نسمع السؤال. ـ ح. م: وكيف حاسمعك ياخي لما أوطي التلفزيون ؟ ـ د. أمير قناوي: سوف تسمعني عبر التلفون.

Quote: وجيت الشعبيه: اول شي عملتو مشيت لي ناس خالتي عشة اعزي في رحاب، ....... ================================================================================================== وبعدها جيت بيتنا وكانت الضربه التانيه/ وين امي/ وين ابوي وكلمتو: انتو جيتو/ وين عمي سليمان الحوري وهو جاي من السكه حديد وشايل معاه كيس بديناالفيه قبل ما يصل بيته/ وين ايمان بت ناس خالتي اسماء/ وين صلاتها الكنا بنسمعها وصوت بكاها لما كانت بتقرا القران/ وين .../ وين ... / ... / ... / ... ================================================================================================== جريت طلعتا من البيت بسرعة دخلتا بيت ناس عمي ساتي عبد الحفيظ كاني باستجير بيهم وبرضو وجدتا انو الدنيا بتخزلني مرة تانيه/ ومافي اي زول/ وين صوت عمي ساتي ولهجتو المحسيه المحببه؟ وين صوت الباب لما بيفنحوا..../ ================================================================================================== قعدتا تحت الشجرة وبكيت بكيت بكا اكتر من البكيتو ايام مرضي/ اكتر من البكيتو لما جاء اول عيد لي في الغربه/ اكتر من لما حصلتا على شهادتي وما كان في زول بيزغرت لي..... ================================================================================================== واتلمو الشفع انا ما باعرفهم هم اولاد منو/ وبقوا يسالوني مالك بتبكي؟ انتي من وين؟ وليه بتبكي؟ وانا ابكي لاني ما عارفاهم هم اولاد منو في الجيران/ ...... وهم كلما يسالوني انا ابكي زيادة من الغربه ومن الحله الاتغيرت ومن البيوت الفضت ومن اني ما عارفه هم اولاد منو/ خجلتا من نفسي معقول انا وصلتا درجة ما اعرف اولاد اخواتي واخواني من ناس الحله ================================================================================================== وجروا كلموا اهلهم انو في بت متفنه تحت الشجرة وبتبكي/ ومرقو الجيران على صوت بكاي تحت الشجرة/ وبقينا نبكي مع بعض/ ما عارفه كان بيعزوا فيني ولا باعزيهم/ ....... ================================================================================================== في اجازتي قعدتا تقريبا 19 يوم كانوا كافيات انهم يمدوا لي لسانهم: انو الاحباب رحلوا/ إنو البيوت فضت/ لكن انا اتحاميت في الشعبيه ومديت لساني وقلتا ليهم: انو الاحباب سكنوا في قلوبنا وما بيطلعوا منها / وانو البيوت الفضت اشترت جوه نفوسنا تمليك وما بتطلع منها/ وانو في ختم في قلب كل زول في الشعبيه مكتوب عليه: انا من الشعبيه .......

(عدل بواسطة صلاح عباس فقير on 10-04-2009, 04:12 PM)
(عدل بواسطة صلاح عباس فقير on 10-05-2009, 03:57 PM)
(عدل بواسطة صلاح عباس فقير on 10-06-2009, 01:08 PM)

(عدل بواسطة وليد عبد اللطيف on 10-04-2009, 10:01 PM)

Quote: وليد اخوي قلتا لي كبو الزوغه الناس ديل وين يرحوا مني انا قاعدة لابدة جنب باب المتصفح في المنبر الاخ منير فعلا الدكتور على ابراهيم من اعلام كريت ودي اول مرة في تاريخ اليونان ان يتم ترشيح اجنبي ومن الجيل الاول ومسلم كمان للبرلمان الدكتور على هو نشيط جدا وكان متسجل مع حزب الباسوك من اكتر من 25 سنه وحزب الباسوك هو الحزب الذي انشائه الزعيم يورغوس بابا اندييريووو وهو حزب يساري وباذن الله انا متابعة النتائج ح اخبرك عن النتيجه بالذات بالنسبه للدكتور وهو مشهور في جزيرة كريت ومن الدكاترة الشاطرين في مجال القلب انا باكتب وفاتحة التلفزيون باشوف النتائج البدت تظهر لان المراكز الانتخابيه فتحت من الساعة 7 الصباح لغايت الساعة 7 مساء وبدت النتائج في بعض الدوائر في الظهور السنه دي اتغير القانون لاننا الحصلنا على الجنسيه في شهر مايو دا سمحوا لينا بالانتخاب بالرغم انو ما مرت 6 شهور على التجنس بتاعنا وشكلو حزب الباسوك مكتسح لانو الحزب الحاكم كان حزب النيااا ذيموقراتييااا وترجمتها الدمقراطيه الجديدة ديل عبوا الناس ودي تاني انخابات تاتي قبل وقتها الانتخابات هنا كل 4 سنواتوعملواه بدري عن موعدها نسبه للحرائق الكانت في اليونان وان كان في فضيحه ىرسوة اخدوها ناس شكره سيمينس وكانوا داخلين فيها وزراء لدرجه ان في وزير حالو الانتحار بعد ما كان بعض الاعلامين بيهددوه وعملوا الانتخابات في 2007 في سبتمبر كانت اخر الانتخابات والان بعد سنتين فقط تاني جات الانتخابات وفي الحزب الشيوعي وديل ما بيجيبوا في كل مرة اكتر من 4 او 5 نواب على اكبر الفروض ورئيسة الحزب سيدة اسمها اليكا بابا ريقااا وفي سودانين كتار شغالين في مطبعة الحزب الشيوعي لكن بعد ما جوا السودانين من سوريا ولبنان ودا فليم تاني كبير عريض ومعاهم الاثيوبيات طردوا كل السودانين وشغلوا الحبش ما علينا وفي حزب اللاااوووص وبيعني حزب الشعب وديل عنصرين بيطالبوا بطرد الاجانب وهم حذب ديني متعصب وبيفتكروا اي بني ادم لا يدين بالديانه المسيحيه الاورسوذوكسيه هو لا يستحق ان يكون انسان وديل عندهم جناح عسكري اسمه مجموعه الخريسي افقي وبيحيوا زي ناس النازيين ومرات لو لقوا الاجانب بيضربوهم بس الكويس ان الشرطه والقانون صعب معاهم وديل بتدعمهم الكنيسه الاخ صلاح عباس فقير شكرا ليك كدا بتديني اكتر من ما استحق زالله انا لما كتبتا الكلام دا لو قلتا ليك كميه البكا وانا باكتب والحمد لله الربنا منا علي بالشفاء وربنا يشفي كل مريض بالمناسبه باقوم بكتابه كتاب عن المرحلة دي ومشيت فيه كتير والحمد لله بالرغم من الالم والضغط النفسي والبدني الا ان ربنا قواني وصبرني الحمد لله واهو جينا تاني ولقيناكم بالجد لما شفتا المنبر بالصدفه وبقيت اتصفح ولقيت البوست بقيت زي المهوسه ما قادرة اصدق وكل ما اقرا ان الارشفه جايه اخاف كنتا في سباق اني اقرا كل المشاركات لان كل مشاركه هي اشخاص وناس مننا وفينا ومن لحمنا الحي واماكن عزيزة علينا احب اشكر اخونا الحاج حمد مهندس البوست والاب الروحي للفكرة بتاعت التوثيق وفي ميزان حسناتك انك جمعتنا على الخير واتلمينا تاني في الشعبيه الاسفيريه القدرتو انتو بمجهودكم ان تحولوها لينا الى احداث لما نقرا اي مشاركه نحس انها زي الشريط امام عيونا ربنا يعلي من قدرك يا حاج حمد الى الجميع شكرا ليكم و امسيه سعيدة عليكم وين ما تكونوا اختكم روما