|
|
 Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 78
منير
يا أمير قناوي ياخي أخبار عصام شنو؟؟ .. الراجل ده يمكن آخر مرة قابلته فيها ـ وما متأكد بالضبط إن كان هو ذاك اليوم ـ كان زواج سيداحمد ودعمنا محمدصبير ، تعرفه طبعآ.. بيتهم فاتح في شارع المدارس بضهر شارعكم .. وعصام كان مع ناس عزالدين الفحل في فصل ب لكنه كان معانا في الاميرية2 في فصل جنوب وهو من أنصع الفترات الدراسية التي مررت بها .. حيث كان أكثر فصل مشاغب كما كنا أكثر فصل فخور بأساتذته وخاصة اللغة الانجليزية التي درسنا لها استاذنا الفاضل ابراهيم علي الذي علمنا متعة تعلم الانجليزية .. وقد لا أبالغ إن قلت لكم أن 80 في المية من الانجليزية البتكلمها الآن هي من مخلفات الانقليزي الدرسنا ليهو استاذ ابراهيم في سنة تالتة عام ..
وبمناسبة اللغة الانقليزية ياجماعة فأكثر طالب قالوا نبغ في اللغة الانجليزية في الثانوي العام كان في الدفعة القدامنا وهو كمال خضر ـ أخو عصام وأخوانه ـ وبيتهم فاتح علي شارع الشعبية قصاد ميدان الصداقة .. وكمال ده منذ امتحان الشهادة مرق للدراسة في اوروبا الشرقية تاني مارجع .. يمكن عادل عثمان يكون عارف اخباره ..
| |
 
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
البصفحه 78
عز الدين الفحل
ذكرتم اسم الاخ ( كمال خضر ) انه كان نابغة في اللغة الانجليزية ، بس عايز اعرف من هو كمال خضر ، هل هو ذلك الراجل الخطيب البارع
الذي كان يخطب في طابور مدرسة الاميرية 2 ودائما يبدا الخطبة بعبارة ( فيـــــكم الطيبــة ) هل هو ذلك الرجل .
اذا كان هو اظن الراجل ده كان معي في ابوظبي وكانت تربطني به علاقة ود متينة في ابوظبي . وهو علي درجة عالية من الثقافة والوعي والخلق
ارجو الافادة .
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
اصفحه 79 و 80 لا توجد بهما اي اشارة للمدارس او ايام الدارسه
الصفحه 81
عز الدين الفحل
مدرسة الاميرية ( 2 )
تمرت الايام ثقيلة كالسحلفاة ونحن نودع مدرسة المساكن الشعبية الابتدائية جنوب والحب الدفين لاولي سنوات النجاح الباهر الذي حققناه
وكانت المنافسة قوية مسعصية امام فحول وجهابزة من العقول المتفتحة في مدرسة الاميرية ( 2 ) ، واذكر منهم المهندس خالد حسن ابراهيم
( جردل )، الدكتور احمد علي خالد ، الدكتور محمد علي محمود ، الدكتور عثمان قرور ( من ابناء الدناقلة شمال ) ،المهندس بشري فضل
الاستاذ حسين عبدالحليم ، عادل عبدالفتاح ( من ابناء المزاد ) ، يوسف عبد التام ( من ابناء المزاد ) ، كل هؤلاء كانوا في فصل اولي
شمال في مدرسة الاميرية ( 2 ) ، اخذتني الحيرة في بادي الامر من هو الذي يتربع في راس الحربة وكلهم عقول نيرة ، سالت صديقي الاخ
خالد حسن ابراهيم ونحن في اول يوم بالمدرسة الجديدة ، من هو الاول يا خالد ؟ اجاب يا صاحبي المنافسة ح تكون وطيســة و ح تكون
حرب ضـــــــروس ...
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 81
عز الدين الفحل
مـدرســـة الاميـــريـــة ( 2 )
اول يوم في مـدرســـة الامـــيريـــة ( 2 ) تم توزيعي مع فطاحلة العقول في فصل اولي شمال ، وجدنا الاسماء علي ابواب الفصول دخلت
الفصل وحالي يقول ( بسم الله مجراها ومرساها ) خائفا وجلا كلت امري الي الله جلست في ثاني صف وجوار الدكتور محمد علي محمود والاخ عادل عبدالفتاح والطرف الاخر المهندس خالد حسن ابراهيم وامامي الاستاذ النابغة حسين عبدالحليم ، وعند بداية الحصة الاولي طلبت من الاخ
حسين عبدالحليم ان يتقدم الي الامام فما كان منه الا ان صرخ في وجهي قائلا باللغة الانجليزية :-
[GO AWAY FROM MY FACE
فما كانت الا ولحظات دقيقة ونشبت بيننامشادة كلامية حامية كادت ان تصل الي مرحلة الضرب ، فجاء الاخ خالد حسن ابراهيم وهدا الامروكنا وقتئذ لا نعرف اللغة الانجليزية ، سالتت صديقي خالد ماذا يعني بهذا الكلام المبهم( GO AWAY FROM MY FACE ) قال الاخ خالد
( قايتو اخوي حمتو كان بيقول فيس معناها وجه ، اما باقي الكلام لا اعرفه ) ، ضحك الاخ عادل عبدالفتاح كثــيرا باعلي صوته الجهور
، وبعد نهاية الحصة الاولي سال الاخ عادل عبدالفتاح الاخ حسين عبدالحليم عن المعني فوضحه له ، فما كان من الاخ عادل عبد الفتاح الا ان
صاح باعلي صوته ( يعني قال ليك غـــــور مــن وشـــــي ) ، ومن تلك اللحظة عقدت العزم ان ادخل هذه الحرب الضروس وان
اشد ساعدي خاصة في اللغة الانجليزية وقد كان ذلك بمساعدت اختي ( سمية ) وهي نابغة من مدرسة عشمانة الابتدائية ، وظهرت النتيجة
نهاية العام الاول مشترك المهندس خالد حسن ابراهيم مع الاخ حسين عبدالحليم ، والثاني شخصي الضعيف ، وكان مدرس اللغة الانجليزية الاستاذ
في السنة الاولي الاستاذ ايــــــوب وهدات مراتب التفوق وظهر ربان السفيــنة يركدون الي الافق الفسيــح والي الــعلا ..
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 82
صلاح عباس فقير
أستاذ الفاتح!
هأنذا أستجيش ذكرى أيامٍ خوالٍ، تقودني أصداؤها إلى مدرسة الصبابي المتوسطة،
إحدى الأوعية المهمة التي جمعت شباب الشعبية جنوبها وشمالها.
أما محور هذه الذكرى، فهو أستاذ الفاتح وكيل المدرسة في تلك الأيام، وأستاذ اللغة الإنجليزية!
مع أستاذ الفاتح يتوهّم كلُّ طالبٍ من طلاب الفصل بأنّه في مركز دائرة الاهتمام،
ولذلك تعدّدت في فصلنا الدوائر والمحاور، ففي المحور الأكاديمي تجد هشام يوسف عثمان هو الأول، وبعده مرتضى تبيدي، ثم تتّسع هذه الدائرة لتمرّ بضياء الدين عبد المجيد "من الصبابي"، ...
ثمّ تنداح حتى تشمل كلّ الفصل، فمع أستاذ الفاتح ليس هناك طالب بليد.
وكان هناك محور آخر تمثله مجموعة من الطّلاب المرحين، الّذين أُتيح لهم أن يُعبروا عن أنفسهم،
ويلقوا بطرائفهم بين الحين والآخر، كلّما دبّ في نفوس الطلاب الملل، وكان معظمهم من كبار السن
القابعين في الصف الأخير من الفصل: هاشم السراج، علي فتحي علي سعيد، وغيرهم، يجدون كلّ التقدير
من لدُن أستاذ الفاتح، والتجاوب مع مشاركاتهم،
ثم كانت هناك مجموعة "ناس الكورة"، حيث كان في السنتر طارق أحمد إسماعيل "جون"، ثم نبيل فتح الله، ا
لّذي كان يشكل مع "جون" ثنائياً لا يفترق داخل الملعب أو خارجه، وكانا يلعبان في الرابطة في فريق الهدف،
وكان معنا كذلك من اللّعّابين الأخ عبد المنعم -رحمه الله- من أبناء الشعبية شمال، تُوفِّي في ليبيا، والمرحوم عادل محمود -نسأل الله أن يغفر لهما ويرحمهما، ويسكب على قبريهما شآبيب الرحمة والرّضوان- والأخ حامد دفع الله،
ولا أنسى الأخ أحمد اليماني، والأخ الفاتح محمد صالح "كان في الدفعة الورانا"، وعذراً لمن فاتني ذكرهم.
كانت مجموعة الكورة تبدأ يومها بالكرة، قبل الطابور على نظام "قيم واحد" في الملعب خارج المدرسة، ...
ثم على نظام لعبة "مدرسة" في ساعة الفطور، وكانت المنافسة حامية بين جون ونبيل من ناحية، وكلّ ثنائي آخر من المجموعة، وأحياناً كنا نجد الكرة داخل المكتب والمكتب بابه مغلق، وشباكه مفتوح لكن مُشبّك، فكان الأخ عادل محمود رحمه الله، بجسمه النحيف يتسلّل لإحضار الكرة، ويقوم الأستاذ الفاتح بإجراء تحقيق، يمزج بين الجدّ والحزم والسماحة والأُبوّة، ويُنهي التحقيق بأن يتعجّب من قدرة عادل على التسلل عبر منافذ الشباك، ويُنبّهنا إلى عدم التّأخر عن الطابور الصباحي، كان يجتهد في إخفاء الكرة، لكن إن وجدناها ولعبنا، كان يكتفي بالصَّمت البليغ.
لأستاذ الفاتح كلّ التحية والتقدير على هذا الروح الإنساني النبيل، والمعاملة الراقية التي كان يُعامل بها طلابه!
معتذراً عن قصور كلماتي عن الوفاء بحقّه، ومتأسّفاً لذلك أعمق الأسف،
وما دمنا قد بلغنا محيط مدرسة الصّبابي، فلنذكر واحداً من أبناء الشعبية الأفاضل، عمل في هذه المدرسة وفتح وعيه وقلبه لكلّ الطلاب، وطرح نفسه لهم باعتباره أخاً أكبر، ...، ذلكم هو الأستاذ يس التيجاني، أنتهز هذه السانحة لأغريه أزكى التّحايا والأمنيات، عسى أن تصله مباشرةً، إن كان من المتابعين لهذا البوست، أو يُبلّغه إيّاها من يعرفه!
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 82
شمس الدين ساتي
أسماء فى حياتنا...
خالد حسن إبراهيم (جردل) وشقيقه الطيار حمدتو والأكبر دكتور عطا المنان
حسين عبد الحليم
أستاذنا العزيز أيوب ود الحلفايا
شكرا لك ود الفحل ذكرتنا شخصيات عزيزة علينا
والأميرية 2 وفصول شمال والسحار / يوسف محمد خير/ حسن إبراهيم
بالمناسبة ...خالد حسن إبراهيم وهو شايقى متزوج من إبنة خالى
وكانت زميلته بجامعة الخرطوم..
حمدتو كان قد شارك فى أحد الإنقلابات ضد الإنقاذ لذا سرح من الخدمة
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 82
عز الدين الفحل
نعم يا شمس الدين الاخ حمتو كان طيار واظهر براعة فائقة وكذلك الدكتـور عطا المنان ، طبعا هم اخوة المهندس خالد حسن ابراهيم
وهم خيرة الناس علي درجة عالية من التواضع والطيبة ، واخونا الاستاذ حسيــن عبدالحليــم كان نابغة ورجل شاذ وشاطــر جدا ولبيس
وانيق يعني كان نوارة الفصل ، والحمد لله كان التنافس قوي وشريف وصراع وراء القمم العالية ، وانا افتكر لولا وجود الاخوة الاشاوس
الفطاحلةالمبدعين ، لما اندفعت عجلة التفوق كالبرق الخاطف ، وفي فصل جنوب الاميرية ( 2 ) كان خيرة الطلبة امثال الاخ منير عبدالرحيم
والدكتـور عماد عبدالله ، وفي فصل غرب كان راس الحربة المهندس ماهر الفاضل والاستاذ عبدالاله ( خريج كلية القانون جامعة الخرطوم )
وهو موجود معي في ابــــــــوظبـــي ،، وربما تكون الطفولة البائسة الفقيرة التي عشناها كانت سببا اساسيا لنتعلق باهداب الثريــا ..
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 83 و 84 لاتوجد بهما اشارة للمدارس او ايام الدارسه
الصفحه 85
منير
يا وليد وعبدون وبمناسبة حلة الدناقلة .. كان عندي صاحبي وصديق عزيز في الجامعة دنقلاوي من القولد إسمه سيف .. - إنتو سيف ده محتكرينه الدناقلة واللا شنو؟ - سيف ده رجل ذو نكتة حاضرة وفكاهة سواءآ كان مبسوط أو زعلان .. فكان بيضحكني بإنو يمثل ليك حوار بين عدة شخصيات في فلم هندي بلغة دنقلاوية يطلعها ليك بنهراتها وخشونة الأصوات كأنها هندية وكأنه كومار شخصيآ .. وفي الآخر يختمها بأغنية هندية تركيب كلمات رطانة دنقلاوية تطلع غاية في الروعة .. سيف غايتو ألذ زول ..وبعد التخرج اغترب في السعودية كمهندس كمبيوتر ومرة جاء إجازة يحكي لي، قال لي والله ما تسمع كلام الناس البقولوا ليك العرب ديل طرش وبهايم ساي مافاهمين حاجة - قال لي والله أبات عقالات ديل ساعة الواحد يخت ليك يدينه في الكيبورد ده والله يطقطق ليك الكمبيوتر ده جنس طقطقة .. لمن تتحير زاتو..
ومن طرائفه برضو مرات بيحاكي لي اللهجة الدنقلاوية .. قال لي ساعة يرجع في إجازة الجامعة للبلد ، ويجي نازل من اللوري شايل شنطته بيكون في شلة من عجائز الحلة قاعدين فوق الحفير - ويعاينو ليهو كده وهو جاي من بعيد .. فواحد يقوم يقول للجماعة : إنتو الجايي ده مش جني مهمد سئيد؟؟ .. فيرد الآخر ياهو زاتو الولد البيقرا في الجامعة ..
فيرد .. تيب ده ياخي ما بيكون بقي مهندس كبيييير ياخ ..
مرة في الجامعة كنا طالعين من محاضرة مسائية ومن القاعة طوالي ماشين علي السفرة للعشاء .. الكلام ده كان في النشيشيبة معقل ابحاث جامعةالجزيرة الكبري - إحم إحم - والدنيا كانت خريف والبلد ممطرة ، ويا سلام علي الخريف في مدني - الخريف في مدني زي الشعبية زمان خضرة ونضرة في الميادين وحول المجاري والخيران..زحمة ألوان وريشة فنان ..
..وفي المسافة بين القاعات والسفرة الدنيا كانت مضلمة وكانت هناك بركة موية مطرة في السكة ما كنا شايفنها .. وكان سيف متقدمنا وماشي أول واحد علي السفرة والجماعة كلهم طبعآ قاشرين ومتهندمين - زمان سفرة جامعة الجزيرة كانت مختلطة ، فكان الجمهور بيجي للوجبات - المجانية - في أبهي صورة .. أسألوا اسامة سعد وعادل علي صالح الكان رئيس الاتحاد .. أها قبل ما أنسي وأخش في موضوع تاني .. سيف الدين جاء ماشي ماشايف حاجة غير السفرة هنااااك .. وتوووش خش في الموية والطين !!!! .. فعزيزنا بدل ينبه الناس عمل فيها رايح و مشي عادي كأنه ما حصلت ليهو حاجة .. فجينا نحن وراهو زي القطيع داخلين في الموية طش طش طش .. هههه .. جنس محن ..
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 86
شمس الدين ساتي
إنتا نسيت النيم الكان بيقطعو عم حميدة للسحار زمان
عشان يجلدنا بيهو..ولا نسيت اللبع الكان بيلبعنا السحار..
تعرف كان عندنا إستاذ بابكر جعلى مشلخ تى كان يدرسنا الأنجليزى
وفى أول الصف كان جالس منير الحلفاوى ..وكان بليد جدا ومصيبته
كان بابكر بيقعد جمبه وأول زول بيسأله وفى يوم وجه سؤال لمنير
فأجاب إجابة خطأ .تعرف أستاذ بابكر كان سافى تمباك طوالى تفا السفة
فى وجه منير(تفو عليك) ومعاه السفة طارت فى وجه منير الفصل كلو قعد يضحك
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 86
شمس الدين ساتي
يوم صاحبى المتصبين دا كان مربى شعره وطبعا عبدون شعره
سبيبى والناظر السحار قال ليهو بكرة تجى حالق عبدون قال كويس
اليوم التانى عبدون جاء ممسح شعرو بالفازلين ومكرفسو عشان مايظهر
كثير ..عمك السحار كشف لعبتو وطوالى نادى عمك حميدة يا عم حميدة
جيب مقص الشجر ..عمك ما كضب أداهو المقص ..السحار مسك المقص وطوالى
مشى لعبدون وكان داير يحلق ليهو جوة الفصل .والفصل يضحك
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 87 لايوجد بها اي مشاركات عن المدارس او ايام الدراسه
الصفحه 88
عماد الدين عبد الله
والله يا عبدون السحار دا كان ارهابي عديل
اكان طلع في البرندة الجنب مكنبه ما بتلقى
في زول في الحوش ونحنا كنا في جنوب يعني
اقرب الفصول ليهو ونتوقعوا في اي لحظة يجي
ماري بجنب الشباك ولحدي هسع اكان جابوا سيرتوا
قلبنا بيدق
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 88
عبدون محمد عبدون
ياعمدة السحار زمنا داك كان تلقاهو قاعد طول اليوم بيملأ فى تذاكر توتو كورة انا كنت قايله وكيل بتاع توتو كورة ولا حاجة لأنو كان بيجى شايل تذاكر بى كمية رهيبة والحاجة اللذيذة ياعمدة لما خلاص ماشين من الاميرية وفى حفل التخريج جا عمك السحار وقال لينا ياكلاب انا عارفكم قاعدين تقولوا لى السحار ..
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 88
عز الدين الفحل
مدرسة الاميرية ( 2 )
من طرائف المواقف في مدرسة الاميرية ( 2 )
عقدت العزم من اول يوم في المدرسة وبعد المشاداة مع الاخ ( حسين عبد الحليم ) الرجل النابغة الفذ حين قال لي اول يوم بالمدرسة
GO AWAY FROM MY FACE
وكنت وقتها لا اعرف اي شئ عن لغة الخواجات ، حتي صديقي المهندس ( خالد حسن ابراهميم ) عجز عن ترجمة تلك العبارة الساحرة ، قلت
لاخي ( خالد حسن ابراهميم ) ، بعد ده لازم نبرز في اللغة الانجليزية ، وبمساعدة اختي ( سمية ) ( وهي تقيم معنا في ابوظبي مع ابناءها )
كنت اقرا الدرس قبل يوم وادخل الفصل في غاية الاطمئنان الشديد، كاني ( بروفيسير في الانجليزي ) ، وكانت الحصة تمر باخر روعة مما جعل
الاستاذ ( سيداحمد ) يحترمني لاني نابغة ، واذكر مرت علينا كلمة ( TALK ) ، ومن سوء الحظ انيي استهونت ان اسال اختي مسبقا عن هذه الكلمة ، وفي الحصة طلب الاستاذ ( سيد احمد) ادخال الكلمة في جملة ، فرفعت يدي بالاجابة وقلت :-
I TALKS TO YOU ،
وطلب استاذ سيداحمد ان اكرر الاجابة وقلت موجها الاجابة له :-
I TALKS TO YOU ،
وفجاءة صاح الاخ ( عادل عبد الفتاح ) ( من ابناء المزاد ، ومقيم في جدة الان ).
- يا استــاذ قال ليك اتيــس تـو يــو .
- يا استاذ قال ليك تيـــس ، تيــس شنــو يا الصبــــرة.
وانفجر كل الفصل بالضحك ،
حتي ان الاستاذ ( سيد احمد ) انفجــر ضاحكا حتي كاد ان يبتلع قطعة الطبشيــر الموضوعة علي فمــه.
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 89 و 90 لاتوجد بهما اشارات عن ايام الدارسه
الصفحه 91 ؟؟؟؟؟؟؟؟؟
مريم عبد الله ويسالوني اقول مريومابيه يقنبوا يتحيروا ومرات كتيرة بيضحكوا انا كنتا بازعل في يوم سالتا ابوي قلتا ليهو نحنا ليه ما عندنا قبيله
قعد يعاين وقال لي نحنا محس فرحتا ومشيت تاني يوم المدرسه قلتا للبنات نحنا محس بقوا يقولوا لي رطانه وانا ما فاهمة الا بعض الكلمات الباسمعها
في بيت ناس عمنا ساتي عبد الحفيظ ولكن لما بقوا يرطنوا البنات ويقولوا كلام كتير بيقت ما عارفه ارد فعملوا لي زفه محترمه
( والزفه عبارة عن جيش عرمرم من الصغار بيرددوا التجريسه الاتيه الكذب حرام بيقطع اللسان من وراء وقدام والسرير حديد والكفن جديد )
دقيقه عارفين شنو علاقه السرير الحديد بالكفن نحنا عارفين انو الجثمان بيحمل على عنقريب وبيدفن وبيرجعوا بالعنقريب البيت معاكم كويس
لكن اتهيا لي والله اعلم انو الكذاب زي البيكون من تحته سرير من الحديد عشن لما النار تبدا تحرقه الحديد يسخن ودي من الاشايء الممكن نقيس بيها مدى تاصل
الثقافه الاسلاميه لدينا في كلامنا رايك شنو يا بروف
نرجع لي موضوعنا اها مشيت مدرسه البنات 4 كانت هناك عمتي عيدله محمد السيد بتدرس في الشعبيه 4 بعد ما نقلوها من الشعبيه 3
مشيت وانا بابكي وقلتا ليها ابوي قال لي انحنا محس والبنات بيرطنوا وانا ما فاهماهم بقت تضحك قالت لي قولي ليهو نحنا مريوماب محس لكن ما بنرطن
وقالت لي قولي ليهم نحنا جدنا الشيخ حمد والشيخ خوجلي وعندنا حلتين بي اسمنا طبعا فرحتا فرح السنين وجري صوف على البنات وقلتا ليهم فيهم الاقتنع وفيهم
الما عجبوا الكلام بس اتحليت من التجرس يومها
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 92
البروفسير عبد الرحمن ابراهيم
عبدالله حامد ماعرفته لأنه أنا فى بوسطن وهى تبعد حوالى عشرة ساعات بالسيارة عن واشنطن.
لكن خالك شريف طاهر كان سيد الجامعة الحقيقى. وكان رجل عظيم وإدارى فريـد. وبرضه كان صاحب الوالد عليهم رحمة الله.
بالله عم سـاتى أبوك؟ والله زمن ياشمس.
أنا بخلاف الروابط الإثنية كانت عندى علاقة خاصة بى الفراشين وناس السفرة والسواقين. وكنت محبوب جدا لديهم منذ أيام الدراسة. لأنى كنت أكمل ليهم إجراءآت بدل السفرية أو الأوفر تايم للإتحاد أو الجمعيات والمنظمات الطلابية تانى يوم طوالى بعد المهمة، وأشرف ليهم على صرف إستحقاقاتهم كامـلة.
وأيضا لمن توليت مهام سكرتير الشئون الإجتماعية بإتحاد طلاب جامعة الخرطوم لم أعمل كما عمل من سبقنى فى المنصب. فكل من سبقنى لأنهم كانوا يطوفون بالداخليات فى البركس وخارجه فيتأخرون عن مواعيد الأكل فى السفرة، كانوا يطلبون أن تعد لهم صوانى خاصة مما طاب من الإطعمة الخاصة والتحليات.
أما أنا فكنت أدخل المطابـخ وأقعـد معاهم ناكل بواقى الحلل ونتونس. فنشأت بيننا علاقات صـداقة إنسانية جميلة.
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 93
الحاج حمد
اذا كنت تقصد العقيد مهندس حسن الريح شقيق علي الريح فهو دفعة شقيقي الأكبر كمال حمد و الرشيد ساتي و علي الخليفة شقيق عبد الواحد تورو بمدرسة بحري الحكومية و بعد المعاش من الجيش( تقاعد برتبة عقيد) عمل مدير لأحد مصانع باحدى شركات القطاع الخاص حيث كنت وقتها رئيس حسابات بتلك الشركة و حسن الريح شخص على خلق عالي و نهذب جدا و كانت تجمعه علاقات طيبة مع زملائه في العمل.
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 93
عادل عثمان
هو حسن الريح شقيق على الريح والمرحوم هاشم الريح. كانت القوات المسلحة بعثتهم الى الاتحاد السوفييتى لتعلم قيادة الطائرات الحربية ولكن قطعت العلاقات بعد حركة 19 يوليو 1971 (انقلاب هاشم العطا) وعاد الطلبة الحربيون المبعوثون الى الاتحاد السوفييتى وتم استيعابهم فى افرع القوات المسلحة . واظنه اشتغل فى سلاح الاشارة. ثم احيل الى المعاش بعد انقلاب عمر البشير فى 1989.
بالمناسبة نما الى علمى ان الرئيس عمر البشير كان يزور خالى فى حلة حمد عندما كان البشير طالبآ فى الخرطوم الثانوية. خالى من قدامى الاخوان المسلمين فى مصر والسودان. ويبدو ان عمر البشير انخرط فى جماعة الاخوان من زمن بعيد.
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 94
عادل عثمان
كتبت روما
Quote: عمتنا محاسن الجيلاني زوجها من ناس الجزيرة حلاوين من ابو فروع
والدة الفاتح وامين كامل محمد سعيد؟
كانوا زملاءنا فى بحرى الثانوية وامين زميلنا كان فى جامعة الخرطوم.
ذكرتى ابوالمعالى الصديق. والد د. عادل ابوالمعالى؟
كان قدامنا فى بحرى الثانوية وجامعة الخرطوم. وقريب زميلنا فى الاميرية 2 وبحرى الثانوية وجامعة الخرطوم د. شرف على ابراهيم.
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
اصفحه 91
دكتورة ستنا خدر
: كتب اخونا عزالدين
(عند مكتبة المرحوم ايوب )
الله يرحمه تفاجأت بسماع وفاته ،كنت في مرحلتي الابتدائية من المداومين علي شراء مجلة ماجد كل اربعاء وكنا ننتظرها بفارغ الصبر وبالرغم من زحامنا وشغبنا كان يلاقينا ببشاشة وكان ذلك يلطف علينا شعورنا بالسخانة فقد كنا ننتظر المجلة من العاشرة صباحا خاصة ايام الاجازات والمجلة بتجي ا(الساعة 1ظ وعندما نراه قادما ممتطيا عجلته ويحمل معه المجلة نتأهب للشراء كانت ايام جميلة،رحمه الله رحمة واسعة (إنا لله وإنا اليه راجعون
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 94
مريم عبد الله
مرة انا كنتا في الاحفاد وفي سنه تالته بيطلعونا الفيلد ترب لي مكان نحنا ودونا الغرب جبال النوبه قريه اسمها لقاوة
نزلونا في مدرسه ابتدائيه وقعدنا اها بنكون من الكليه قروب يعني من كل كليه بيكون في كم طالبه المهم نكون في تالته
يلا معانا ولاء احمد قاسم البيتهم فاتح في كايتر الهندسيه ولاء حكنوشه جايبه لينا معاها نسكافه وطول الطريق في القطر
ترش في الريحه وما طايقه اي شي هي وطالبه اسمها ندي من الطب ومها الزين من كليتنا لما بشوفونا بناكل فته او بوش
كميه من الاستنكار وجابين معاهم اكلهم وما بياكلوا مع القروب ومناديل ورق والريحه بيرشوها في يديهم ويشموها وقصه كبيرة
ومعانا برضو بنات من كليه الطب والعلوم الاسريه وادراة الاعمال والتطوير الريفي ونحنا من علم النفس
كويس معاك اها كان لازم نمشي في استبيانات نملاهوم بي اراء ناس الحله
جينا مارقين من المدرسه القعدونا فيها وولاء احمد قاسم تاكل ليها في لبانه وطول الطريق هي وناس ريم وندى
يقولوا لي بعضهم الساونه كيف والكريم الفلاني والعلاني وماشين معاهم انا وبت تانيه من بنات القضراف اسمها عشه
اها لقنا ليك شيخ الحله وسالمنا هم عارفين بي جيتنا وقلنا ليهو في معلومات عايزين ناخدها من ناس الحله
الراجل مشكور حلف الا اول بيت ندخله يكون بيت زوجته الكبيرة ودا طبعا قمه في الاحترام العملوا معانا لانو ودانا بيت المرة الكبيرة
اها صحباتك ديلاك لسه في اللبان وياي وياي ورطانه وتعليق بي الانقليزي وحاله
نجيك داخلين وكان شتاء نهايه شهر 12 شتاء تمام يلا لقينا زوجة الشيخ قاعدة بتمشط لي بيتها في شعرها
وكميه من الكركار والودك ريحته تضرب تقلب يا عبدون والدنيا برد اها سالمنها وقلنا لينا الشيخ رسلنا وعايزنها تساعدنا
قامت حلفت الا نشرب شي وكان يوم خميس
طبعا كل ناس وثقافتهم تقوم مطلعه من تحت العنقريب طشت العدة وممرقا منو الكبابي عشه بت القضارف
حلفت الا هي تغسل الكبابي لمرت الشيخ اها تقوم مرت الشيخ تجيب ليك ديك يا القربي فروتا وتقطعها
وما غسلت يديها من كركارها داك وتعصر في جك بلاستيك والكبابي بلاستيك
انا طوالى قلتا صايمه وعشه كمان هاا امات لبان ديلاك وين يمشوا
لو ما شربوا دي اهانه للشيخ لانو دا بيت مرتو الكبيرة
وهم ناس طيبين وناس كريمين جدا وقبل ما تكب الشربات داك في الكبابي الما خمج
تقوم بتها الكانوا بيمشطوا فيها ديك تجيب ليها قطعه وتتمر الكبابي والقطعه لونها ما باين
من العليها
اها لازم اشربن طبعا برقوا عيونوم ومافي اي حل يا تشربوا ولا ح يزعلوا وح ترجع كل القافله
اها بي هنا بي هنا الكبابي البلاستيك مع الدهن والدينا باردة بقا الدهن باين في وش العصير والريجه ضاربه الليله جاك الموت يا تارك الصلاة
قفلوا مناخيرهم وعلى شفطه واحدة وقاموا مشوا انا وعشه بت القضارف ما قادرين نستوعب من كلام مرت الشيخ اي شي وهي تربك معانا
لانو زميلاتنا ما قادرات ياخدوا نفسهم وحسينا بيهو خلاص ح يستفرقوا في وشنا
استاذنا مرت الشيخ وقلنا بنجيها في وقت تاني اول ما مرقنا من بيت الشيخ التلاته بنات
كميه من الاستفراغ لدرجه ما تموا معانا بقيه الرحله
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 94
مريم عبد الله
مرة برضو مشينا تبع جامعه الخرطوم ايام التحضير كنتا باعمل في دبلوم محو الاميه وتعليم الكبار قاموا ودونا لي الرحل
نشوف كيف ا ن الترحال بياثر على مستوي التحصيل عند اولادهم وايه ما بيصروا على تعليم عيالهوم
اها معانا بدر الدين كمال دا من الدفعه جاب معاهو اخته الا تمشي معاه الرحله اها تنقش تنقش جات معانا بنوته حليوة ماشاء الله عليها
وقتها غنت لينا في البص اغنيه عبد المجيد عبدالله بتاعت رهيب والله رهيب وما خلت لينا باكو بسكويت ما ادتنا منو
وزعت لينا شوكلاته وبسكويت محشي ونحنا نكوضم
وصلنا لي مكان الرحل هم رعاة ماشاء الله عليهم ناس كرم جوا اخدونا بالبكاسي الكاشفه واكرمونا ضبحوا لينا طوالى
وشوا بي سرعه البرق وعندهم شطه ما خلوا لينا اتي ما ختوه لينا فيها واكرمونا اسرع سفرة تتعمل ويحلفوا فينا اها البت
ابت ما تمد يدها على اللحمة ولا على الويكه ولا السلطه حرام مافي زاذ جرح حلقها زي ما بيقولوا في كسرة برضو ابتها
نحنا ضربنا الشيه معاهم ومعانا دكتور صغيرون من الكليه واخدنا كلامنا وهي يحنسوا فيها اهديك ارضيك لا
ما بتاكل مويتهم ما عايزاها وتعاين ليهم ونحنا متفنين معاهم في الارض وهي تقول ليهم انا مصدعه ما قادرة اكل
قاموا عملوا ليها شاي بي لبن حلبوهو طازه وغلوه وكبو تفل الشاي فوق ليهو وجابوهو ليها ولينا هي اخدت الكبايه
كيف كيف وقامت براحه كشحتها وعملت روحها بترسم في التراب وغتت الشاي
هم اتكيفوا انها كملت شايها بسرعه ما يقوموا مدينها الكفتريه كلها ويحلفوا طلاق وحرام الا تشرب لما جينا راجعين تبكيوتقول لقيت لي شعريتن في الشاي
دكتور صغيرون قال ليها بركه الما لقيتي ليك بعرة في الشاي
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 97
مريم عبد الله
مرة كنتا ايم الماستر هنا ودوني مدينه اسمها باترا فيها مستشفى في القسم النفسي
يلا بقيت ساكنه في السكن بتاع جامعه باترا في الداخليه لانو كان شهر التديب
هناك الاكل بيكون في سفرة الجامعه مرة اتعرفتا على بت مسلمه من موروشوس
بقينا نتكلم هي طالبه طب وعرفتني على بت من مالى وبتدرس في الجامعه
اها الماليه دي برضو مسلمه وفي بتين من موروتانيا كمان في الجامعه برضو مسلمات
وفجاة البت الماليه دي قالت تاني ما ناكل من اكل السفرة لانو في لحم خنزير نحنا الضمنا
شنو قامت قالت لينا الفطور والعشا مافيهم مشكله لانهم خفايف بيض وجبنه بيكونوا مضمومين
المشكله في الغداء انا الكلام ما وقع لي لانو لما بنسجل للسفرة بيسالوك عن الديانه وعن اي شي
بيعمل ليك حساسيه وكدا كدا بيكون في اكتر من صنف قامت كلمت ليها كمان بت من الاردن
ودي جابت لينا 3 بت وولد من سوريا وواحد فلسطيني واتفقوا بعملوا شيرنق واحد منهم يجيب الغداء الاسلامي
يلا مرة يجيبوا ليهم جداد مشوي ومره بيرقر وكدا قام الفليسطيني قال ليهم ليه ما نطبخ وشركوا واحد تاني لانو
ساكن مع ناس عندهم شقه يلا بقوا يديهو الشيرنق بتاع الاسبوع وهو قال بيجيب ليهم الاكل لغايت السفرة بتاعت الكليه
يوم جاب ليهم محشي اللحمه الفيه كتيرة حله كبيرة وجابيها ليهوم في سفرة الجامعه جوا وقعدوا ويعاينو لي نظام انتي ما ناصرتي
الاسلام هيا جماعه الاكل في السفرة فيهو الخضار وفي الجداد وفي معجنات يعني في مليون خيار لو ساكت شالوا بس كستر وفواكه بيشبعوا
اها يوم المحشي داك البنات الموروتانيات ديل هن الكانن موجودات والبت الموروشوسيه دي بس لانو
الباقيات عندهن لابات ديل ضربوا ليك حله المحشي زي الماحاصل شي وهو قاعد جنبهوم ويقول ليهم صحه وهناءعلى اللبكم
وما عزموا على ولا بي لقمه واحدة نظام مقاطاعتني وكدا ةالموورشوسيه تسال عن اسم الاكله وهم يقولوا ليها محشي وهي تنطق مهشي
اها في المساء رجعتا الداخليه الا اشوف ليك الاسعافات تتطاقش في الداخليه البنات التلاته الا المستشفى
عارفين اللحمة الكان بياكلها ليهم طلعت شنو اتاريهو بيمشي السوبر ماركت وين اكل الكلاب
والكدايس الله يكرم النعمه يجيبها ويعملها ليهم في المحشي
الكويس انو البنات بقوا كويسات الحمد لله وهو عملوا ليهو بلاغ بس ما طردوهو من الجامعه ربنا سترها معاهو
بعد ما بقن كويسات بقيت اشوفون ليكم اول الناس في السفرة شايلات الصحانى وبياكلوا من اكل السفرة
اول مرة ما ادقس تقول قلبي كان حاسي ( الشيخة روما شيخة اتينا )
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 97
مريم عبد الله
وين نصر الكان مع ناس الله يرحمه الشيخ زين العابدين في شمبات
بتتزكروهو نصر دا دايما كان بيكون حفيان ولابس ليهو جلالبيه
طيب شديد والله لو ادعا لي زول يا بختو ويا هناهو
يوم لقانا ماشين على معهد شمبات الزراعي نقرا في المكتبه ايامها كنا في سنه تانيه في الاحفاد ماشه معاي
ناديه حلاتو ربنا يطراها بالخير بت اخت ناس ابراهيم وصلاح بت سلوى بت زينب الحمراء
في شارع الخور قريب من بيت ناس عمكم عبد الله العندهم مدرسه السواقه ومعانا عزة حمتو من بنات الشعبيه في شارع ناس
عباس ركس كانوا ساكنين ومنى اختي اها تنقش تنقش ماشات ليك في الشارع وبناكل في نبق
فجاة جاء نصر من وين ما بعرف فجاة لقيناهو قدامنا وما اتلكم مع اي واحدة بس ماشي ورانا ويقول الفاتحه
نحنا لاوزنا قلنا الليله منو الح يموت ونتعوذ ونحنا ماشات قام جاء قدامنا ورفع يدنو وقال الفاتحه يا عروس
وفتح ايدو اول واحده ادتو النبق كانت ناديه حلاتو وبقا يدعا ليها قال ليها عروس انتي عروس
يلا نحنا نضحك ومشينا ونكاوي في ناديه اها من وين تلقي ليك الليله عريس يا عروس
ووصلنا المكتبه يا جماعه ما يشوفوها في المكتبه زوجها عصام
كان ايامها مغترب وجايب وصايه لي ناس في المعهد من قرابيهم في السعوديه وقد كان
وفي اقل من شهر كانت ناديه حلاتو عروس واحلا عروس الله يطراها بالخير وين ما تكون
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 98
عماد الدين عبد الله
يا روما طبعا عماد فانتوم دي غريبة عليك تقولي الزول دا غير اسمه
ولا شنو دي القاب المدرسة كنت بحل الرياضيات بسرعة مبالغ فيها وبدون
اخطاء المدرس سماني الفانتوم الايام ديك طيارة الفانتوم كانت طالعة
جديدة ومن ديك وعيك اولاد دفعتنا لسع ماسكنها اي واحد من الدفعة يلاقيك
يقول ليك وين يا الفانتوم
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 98
عماد الدين عبد الله
بمناسبة بتاع الترمس عندي صاحبي
من اولاد الصافية كان بيدرس معانا اسمه ياسر عبدالحليم شنان
كنا ساكنين مع بعض يقول لي انت شكلك دا شكل هندسة انت مفروض
تكون لابس ليك عراقي وطاقية حمراء وشايل ليك جردلين وبتكورك في
شوارع الشعبية كبكب تورمووووس كبكييب يااااا والله الواحد اتذكروا الآن
واتذكر هذا الموقف طبعا نحنا كنا بنشتغلوا انو اولاد الصافية مايعين
واولاد الشعبية كل يوم ساكنهم وداقنهم وشايلين قروشهم
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
من الصفحه 99---108 لاتوجد بهم اي اشارة للمدارس او ايام الدارسه
الصفحه 109
عز الدين الفحل
ومن خلال الونسة الممتعة عرفت ان الاستاذ الفضل
الذي درسنا في مدرسة المساكن الشعبية الابتدائية جنوب حي يرزق
وما زال علي قيد الحياة
الصفحه 109
اسامه سعد يرد على عباس الفحل
لاحول ولا قوة الا بالله
اطال الله عمر استاذنا الجليل فضل صاحب الفضل
آخر مرة قابلته على ما اعتقد قبل حضورى لأمريكا وكان فى مجلس شرق النيل - حلة كوكو او الجريف.
ده أسعد خبر
التحية ليك يا عزالدين والشكر ليك و لاخونا خالد حسن
(((((( المداخله دي مهمه جدا لان الاخوان في صفحات سابقه كانو قد اعلنوا وفاة الاستاذ الفضل وسياتي لاحقا زيارة الاخ عز الدين للاستاذ الفضل ))))
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 109
منير
أخوي العزيز عزالدين الفحل .. كتر ألف خيرك علي هذا الخبر المفرح عن استاذي الجليل فضل الذي رد إلينا أرواحنا .. والواحد حقيقة يعجب من أين تنبع تلك الشائعات الغريبة؟.. ياخي قبل أكثر من ١٥ سنة أيضاً سمعنا كذبة أخري مشابهة عن وفاة أستاذنا الفاضل أستاذ حسن صديق استاذ فضل .. حاجة مزعجة جداً.. ربنا يمتع اساتذتنا الأجلاء بالصحة والعافية ويطول عمرهم بالصحة والسلامة والعمل الصالح .. وبالله إذا زرتم أستاذنا فضل بلغه سلامنا الغزير وأشواقنا وكما قال لك عماد ماتنسي الصور ورقم التلفون .. بالله قول ليهو عماد الفانتوم ومنير الاسكاي هواك (كما كان يدعونا) يقرئوك كثير السلام ..
وبالله عليك بلغ تحياتنا للصديق الزميل خالد حسن ابراهيم .. وكذا سلامنا لكل شباب الشعبية جنوب .. ناس الفحل وميسرة وعصام علي محمد الحسن وأخوته .. وبلغ تهانئنا للعريس أخوك وإن شاء الله بيت مال وعيال ..
ما تنسي دائماً تعكس لنا مشاهداتك الرائعة من شوارع الشعبية وأنحائها ..
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه 109
ستنا خدر
اذكر مرة ونحن في مدرستنا الثانوية بحري الجديدة
وفي قمة الاندماج مع شرح المعلمة واذا بنا نسمع صوت حجارة بالسقف
وسمعنا الصياح من خارج الفصل وتعالت الصيحات وطلعونا خارج المدرسة
وفي طريقنا وجدنا بعض الطالبات والطلبة وكانت مظاهرة قوية بادئة من
شارع المدارس وانضممنا لهم واتي البوليس وهاك ياجري وتتعالي اصواتنا يا بوليس
مهميتك كم رطل السكر بقي بيكم وجاريين اليوم داك لو دخلونا سباق كنا حانفوز
وفجأة الدنيا صنت واتلفتنا ليك لقينا الاولاد كلهم جلوس في نص الشارع وطبعا نحن
تابعين وحاكيناهم وقعدنا نظام تضامن وكده،بعد شوية البمبان انطلق وبقينا ما عارفين نسوي
شنو غايتو كل مجموعة علي جهة والكانو قريبين من البوليس اتقبضو
ونحن مجموعة كده لزينا باب ودخلنا ولقينا البيت فاضي مافيه اي زول موية
عشان نشربها مافي وكمية من الحاجات القديمة مجدعة بطريق عشوائية
وساكتين ساي وكل واحد يعاين للتاني وسامعين جري البوليس
بعد شوية جا داخل عمك كبير انت منو وعايزين شنو وشرح ليهو واحد معانا
الحاصل وعرفنا انو دي ورشته لتصليح الاشياء القديمة وما قصر خلانا شوية وراقب لينا الشارع
وبعدها لم نعد للمظاهرات ومن تكون في مظاهرة جري علي البيت لان كل ما اتزكر منظر غياب الوعي
لبعض اخواتنا نتيجة للبمان اقول ابعد عن الشر وغنيلو ...خوف شديد
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: أمير قناوي)
|
الصفحه الاولى
على محمد على بشير
طبعا اخوك خريج عتيد لمدرسة الخشب
وانتقلت منها للصبابى
بالله عليك هل مدرسة الخشب على حالها الزمان داك ام تم تغييرها
يالها من ايام
الصفحه الاولى
الحاج حمد يرد على كلام الاخ على اعلاه
مدرسة الخشب ليست على حالها الزمان فقد تم تشييد فصول جديدة و تم تحويلها لمدرسة بنات بعد تشييد مدرسة للآولاد شمال ميدان الصداقة و ذلك تم منذ فترة طويلة.
الأخ عادل علي صالح مقيم بأمريكا و هو فعلا شقيق الأخ العقيد صديق علي صالح مدير الكرة بنادي المريخ و شقيق ظريف الشعبية و بحري الأخ حيدر (الجقدلي)
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: أمير قناوي)
|
الصفحه الاولى
عز الدين محمد عثمان
. وساتكلم اليوم عن حدثين
او شكلين من الصوره .. اولهما انا لم ادرس بمدرسة الخشب
لاني كنت في ثالثه ابتدائي عندما رحلنا من ديوم بحري ولكني
شاركت في بناء فصول وصيانة المدرسه الأخرى الورى وقد كان المعسكر
بقيادة ابن الشعبيه البار بدرالدين ديكا وكانت طيبة الذكر
ملكه محمد نور تأتينا بوجبة الفطور وصدقوني كان ومايزال اطعم
واحلى فول اكلته في حياتي وذلك الى ان اتممنا الصيانه والبناء..
الصوره الثانيه لطيب الذكر..طيب الله ثراه استاذ عيسى هذا الأنسان
النبيل نبل الرساله التي كان يؤديها كاستاذ ومربي بمدرسة الخشب
فقد دخل قلوب كل الأمهات والأباء قبل ان يدخل بيوتهم مرحبين به
كاحد افراد الأسره فقد كان طيبا لابعد درجه وكان حنونا على الطلاب
حتي انهم كانوا يتمنون لقاءه حتى خارج المدرسه ولكن القدر لم يمهله
فقد فارق دنينا وهو في ريعان الشباب..فقد اصيب بسرطان الدماغ ..
وقد تأثر الجميع لذلك وكنا ننتظر معجزه من السماء ليشفى ..ولكن!
وقد تقبل الفقيد الأمر بإيمان وصبر يحسد عليهم وعاش بيننا عادي..
ويوم وفاته خرجت كل الشعبيه لتبكيه وتبكي شبابه وانسانيته وطيبته
ووفاءه لاهل الشعبيه الذين احبوه.. بكته الشعبيه
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه الاولى
محمد عبد المطلب حسن
: لمن كنت في مدرسة الخشب , في سنة تانية
الزمن داك كان الغفير بتاع المدرسة عم شريف الله يرحمه وكان بيعمل طعمية بالعصر , المهم , في
نهاية سنة تانية الاستاذ اسمو محمد الحسن علي ما أذكر , قال انو الفصل حيتصور , وكل واحد يجيب
ريال أو شلن ما عارف , المهم أبوي أداني القروش , وفي فسحة الفطور الشلن ولا الريال ده أختفي
والاستاذ أبي يديني صورة , ومن اليوم داك لحدي الليلة بفتش في الصورة , وطبعا في الزول الشال الريال
برضو , طبعا لو لقيتو حيدفع الأرباح معاه , المهم دفعتي في الفصل كانو : عبد القدوس محمد سعيد , عادل النقر,
وجمال محمد شاطر , وعارف , وعزالدين (أبوها) وحمدتو , ونهرو , عصام شفيق بيومي , صلاح محمد شريف, أقول ليكم حاجة انو معظم الأسماء دي ما قابلتها بعد خلصت المدرسة, طبعا نسيت أقول ليكم اني ذاكرتي رقمية , عشان كده موضوع الريال ده عامل لي نفسات لحدي هسة. يا أخوانا لحدي كده أقيف.
محمد عبد المطلب
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه الاولى
عادل عثمان
وكان بعض معلمى البعثة التعليمية المصرية يستأجرون بيوت فى الشعبية لموقعها الاستراتيجى وسهولة الحياة فيها وحداثتها، وفى نفس الوقت شعبيتها ومعقولية اسعار الايجار زمن نميرى. واذكر ان معلمين واسرهم سكنوا جيراننا وصاروا جزءآ من الحى. اولادهم يلعبون معنا الكورة. ونساؤهم يشاركن فى المناسبات، وبناتهم صادقوا بنات الحلة، وتبادلوا معهن الطبخات والهدايا. وكانت اول مرة اذوق طعم الكشرى عندما اهدتنا جارتنا المصرية طبق منه ردآ على هدية والدتى لها.
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه الاولى
كمال كرار
عم فتح الرحمن
والد الأخ/ مأمون فتح الرحمن... ومعتصم فتح الرحمن.. ومرتضى فتح الرحمن.. وآخرين كرماء...
هذا الرجل له معزة عندي وقد كان يعمل بوزارة المعارف.. وبالتحديد بمدرسة الأميرية ( 1 ) وهو
على رغم بساطته رجل مثقف.. عركته السنون وكشفت عن معدنه الأصيل.. من الأصلاء في الشعبية
له مني التحية والتجلة.. وأدعو له بالصحة والعافية
إبراهيم وعلى مصطفى أنسباء أبو آمنة زاملاني في مدرسة الدناقلة شمال الإبتدائية
لهما العزاء في فقدهما والتحية
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه الاولى
الحاج حمد
شخصيا جمعتني الدراسة و الرياضة بمجموعة طيبة من الشعبية جنوب ، فقد زاملني في الدراسة من الشعبية جنوب الأخوان : عصام قناوي و ياسر و طارق عبد الحميد و حسن طه و أحمد علي خالد و أسامة عبد الله و الفاتح الأمين و حيدر الشيخ و عز الدين (كمونية) و عماد صديق و بشرى فضل و عبد الوهاب و تطول القائمة...
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه الاولى
بكري اسماعيل
سكنت هناك من أوائل التسعينات حتى منتصفها ويظهر المنزل في صورة الأخ عادل عثمان خلف الزاوية والمدارس والميدان جوار منزل كابتن سيف الدين الفحل وناس وليد عبد الباسط ورضوان وسراج ولي علاقات طيبة مع بعض أهلها مثل أمجد عبدون كرار وعمّار وياسر عوض سليم خطّاب وهناك بعض زملاء الدراسة مثل الأخ عماد مصطفى ومنزلهم جوار خور شمبات وأذكر الأخ محمد حبيشي وهو الآن بالحلفايا..
| |
|
|
|
|
|
|
|
|
|
Re: مسودة كتاب الشعبية الباب الخامس: أيام الدراسة والمدارس (Re: مريم عبد الله)
|
الصفحه التانيه
على محمد على بشير
العم شريف خفير المدرسه الشعبيه هل هو نفسه عمنا الذى كان يبيع الفول
والطعميه امام طابونة الشعبيه تحت عمود الكهرباء
ذلك الرجل الذى كان لديه احلى طعميه واحلى فتة بوش على الاطلاق وكان يرش
على البوش من زيت الطعميه الحار فيجعل مزاق البوش اكثر من رائع خاصه وانو
عيش طابونة الشعبيه فى ذلك الزمان كان من افخر الخبز المنتج فى الخرطوم كلها
وبلا فخر .. وما ازكره عن عمنا هذا رغم انى نسيت اسمه وملامحه
الا انى ازكر انه لم يكن يفكر فى الفلوس كثيرا فكل من اتى الى عنده يتعشى حتى
ولو لم يكن يملك المال اللازم .. وبعد العشاء لو الحساب ناقص برضو ما مشكله
| |
|
|
|
|
|
|
| |
مريم عبد الله
فيس بوك
تويتر
انستقرام
يوتيوب
بنتيريست