كااااااااك شديد ياخي وبوست يعلم الله ورغم ما شابه من كركب وليس كركبة الا ان ابو صلاح اراه يقود سفينة ببراعة فائقة وسط محيط هادر والتنهدات والكركبة والعلكتة الاسفرو مصطفي سيد احمدية...
تمام ابو صلاح وارمي لقدم في سبيل استخلاص بوستك الذي يزور غنمة زهرة ثم يهرب من غنم زهرة ثم يزور غنم زهرة ثم يهرب من غنم زهرة ...وهكذا دعاليك
يا محمد عبدالرحمن (غنم زهرة دي) حقتي انا ياخي وهي في بوتقة المصطلحات الاسفيرية المشتركة مع ابو خليل في اطار عملنا الاسفيري المشترك فعشان كده يجوز ان تقولو انها لخليل لاغبار في ذلك...
وبوستك ابو صلاح تتحرفن وتقعلو وبما فيه ونسة فانه لن ينحي لرياح الكركبكس
09-17-2010, 03:21 PM
معتز القريش
معتز القريش
تاريخ التسجيل: 07-07-2006
مجموع المشاركات: 11343
Quote: معتز اخوه بقي وزير الثقافة يكتر بكلمو ليهو يجرو من اضانو (مش نحن مثقفين؟) قال كومبيوتر قال كمنجات زي السم نظيفه زي البلور وهسع عشان ما يغالط خلي يجي يشوف بي نفسو نهاية اكتوبر في القاهره الموصلي وعافيه حسن ويشوف نفس الكمنجات مع زيادة العدد بقيادة بروفيسور صولست حسن شراره واجرو من اضانو دي اوديهو ليهم (مش صاحبي) علي كيفي
استاذي الموصلي كل عام وانت ومن تحب بألف خير
كتبت ليك رد طويل طار وين ما عارفو
غايتو كان اتذكرتو بعدين بكتبو تاني
09-17-2010, 04:09 PM
Elmosley
Elmosley
تاريخ التسجيل: 03-14-2002
مجموع المشاركات: 34683
Quote: الموصلى ياصديقى كيف انك وهناك ماهو بخط يد الموصلى ورايه في نقد شريط البت الحديقة .... وهناك الندوة المطولة الكانت معك ومصطفى حول نقد تجر التوزيع الموسيقى للموصلى شارك فيها العديد من النقاد والعازفين والمهتمين وهم الكاتب القاص د. محمد المهدى بشرى والروائى الحسن البكرى والمخرج السنمائى عبدالرحمن نجدى ودكتور اسماعيل الفحيل واسماعيل درس مصطفى بمعهد الموسيقى المسرح (فلكلور) ودكتور عمرو احمد عباس والقانونى الراحل جعفر حسن عباس وعصام على واسماعيل شمو وحسن مسعود وعثمان الجندى ومن العازفين عازف الايقاع عبدالمنعم الفكى وعازف الاورغ ياسر القصاص وعازف الاكورديون معتز القريش عقدت تلك الندوة بمنزل صديق عبدالرحمن نجدى بتاريخ 2/7/1994م وقد كان لى شرف ادارتها ورغم اعترافك بالزرزة وقتال مصطفي بجانبك كلاكما كان سعيد بذلك وفي ناهية الندوة قلت انت ياليت في كل مكان تذهب اليه تجد من يززرك بهذا العمق والصراحة لكن بينى وبينك ياموصلى رغم فصاحتك انت ومصطفي الجماعة قدرو عليكم بل كان هناك اعتراف من قبلكم ان هناك هنات واخطاء صاحبت الترجبة وتعهدت انت بتصويبها في الاعمل القادمة لكن ياموصلى في تلك الندوة لم تستجيب لاي استفزاز مثلا حين اتهمك معتز القريش بالتزوير وان شريط الحزن النبيل لم تكن به كمنجات بدليل ان اسماء عازفين الكمنجات غير مذكورين في غلاف الشريط وان كل الامر هناك اورغ بقوم محل الكمنجات وتمت معالجة بالكمبيوتر تبدوا وكانها كمنجات او حين اتهمك اخر بانك سارق لتجربة الرحبانية وكنت بترد بموضوعية وتفنيد وادلة لكن لقيتك هنا في الفترة الاخيرة بقيت شاكال اتقول هادى فيك صاحبى بشاشة ياربى دا من ملاسى ام من الكُبر ههههههههههههه
أطول مداخلة في التاريخ كتبها أخوكم بدرالدين.. والله بقيت تخوّف يا البدر ، بي طريقتك دي بتطفّش ليك ناس..
09-17-2010, 05:10 PM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
Quote: تمام ابو صلاح وارمي لقدم في سبيل استخلاص بوستك الذي يزور غنمة زهرة ثم يهرب من غنم زهرة ثم يزور غنم زهرة ثم يهرب من غنم زهرة ...وهكذا دعاليك
كيكي ، ياخي كل سنة وإنت طيب .. والله ياهو زاتو كر، ثُم فر ، ثم كر ، ثم فر ، لغاية ما نحن زاتنا ( إتكـرفسـنا).. وأنا يعلم الله فترت من السواقة ،، كلما نقول القصة هدأت شوية يجي صاحبي ( ضفاري ) ، يقوم الأنصاري ودخالتو يذكرنا بغنم زهرة..
غايتو سنظل نكابس الى أن نشوف آخرتا شنو!!
تم تثبيت حقوق طبع ونشر وبث وإنتاج (غنم زهرة ، عوضها الله) وتمت نسبتها الى سعادتكم..
09-18-2010, 07:42 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: بجي راجع لقصة تحايل الكبار على غناهم القديم ..
عُدتُ .. واحدة من مظاهر التحايل الكثيرة التي يتبعها كبارنا لتبيان أن أصواتهم ما زالت ندية ورويانة وتنضح شباباً وحيوية وأن بإمكانهم ترديد أغنياتهم بنفس حالتها قبل نصف قرن - يقل أو يزيد قليلاً - يلجأ كبارنا الى تغيير الإيقاع ، وتحويله الى إيقاع بطئ يتناسب وسنهم ، حيث أن اللياقة الصوتية قد قلت كثيراً عما كانت عليه قبلاً ولم يعد بالإمكان ( سك ) الغنا القديم الخفيف الظريف ، بسبب السن وضعف اللياقة الصوتية .. ولن أورد أمثلة هنا ، بس ارجوكم ، أرجعوا وأسمعوا التسجيلات القديمة للإغنيات وأسمعوها بصورتها الحالية ، ثم أحكموا ، لتعرفوا أنه آن الأوان لكبارنا أن يتوقفوا ، رحمة بهم وبنا..
برجع..
09-18-2010, 12:43 PM
ASHRAF TAHA
ASHRAF TAHA
تاريخ التسجيل: 08-04-2007
مجموع المشاركات: 1017
أشرف طه علي .. كل سنة وإنت والمدام طيبين يا أصلي ..
القصة غنا كبار ، ما عايزين يقيفوا براهم.. والله يا أخو ، أنا ما عندي أي شئ مع أساتذتنا الكبار ديل موضوعي كلو عايزين نحافظ على غناهم السمح القديم من البشتنة!!
وبعدين عماد عبدالله ده أساسي جداً في الشغل الزي ده..
صلاح عبدالله لك تحياتي واشواقي وملذاتي تجدني من اكثر المستمتعين بي ونستكم الحالية دي وخاصة تعليقات اخوك عمدة . الموضوع هام والحل بسيط جدا هنالك لجنة اجازة اصوات الفنانين والتي تعطيك جواز المرور للمستمعين ووسائل الاعلام نفس هذه اللجنة يكون لها الحق في الطلب من الفنان الصوتو مجاز واصبح نشاز التوقف حفاظا علي تاريخه واغانيه ومكانته في قلوب المستمعين. بس في نقطة مهمة جدا لماذا يستمر الفنان في الغناء الي اخر يوم في حياته هل الموضوع المادة ام حب الغناء ام ماذا.
Quote: والحل بسيط جدا هنالك لجنة اجازة اصوات الفنانين والتي تعطيك جواز المرور للمستمعين ووسائل الاعلام نفس هذه اللجنة يكون لها الحق في الطلب من الفنان الصوتو مجاز واصبح نشاز التوقف حفاظا علي تاريخه واغانيه ومكانته في قلوب المستمعين.
ولدنا متولي ، كل سنة وإنت طيب..
ما فهمت ، هل اللجنة دي فعلاً عندها الحق في توقيف الفنان ، واللا ده مقترح منك؟ هي اللجنة دي زاااتها أعضائها منو؟؟
أما قصة استمرار الفنان في الغناء حتى آخر يوم في حياتو ، فدي أسبابها كتيرة ذكرنا عدد منها هنا.. على العموم صعب جداً توقيف الفنان ، إذا هو من نفسو ما حس إنو مفروض يقيف ، ما في زول بيقدر يوقفو.
أها ، جايينا ميتن؟؟
09-18-2010, 01:35 PM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
طيب ياخ ما نعمل مقترح للجنة إجازة الأصوات دي .....
أكيد اللجنة بأعضائها ناس مؤهّلين وما فيهم كلام ....
ليه ما يكون في مقترح لإعادة الإجازة، يعني حاجة كدة زي تجديد رخصة السواقة. يجي الفنان بعد خمسة سنوات مثلاً من إجازة صوتو ويقدّم صوتو الحالي، تقوم اللجنة تقرر تجديد الإجازة القديمة والاّ تقول ليهو إتطلّب الله وتتم أرشفة أغنياتو المسجّلة حتى لا يتم العبث بها.
_______ غايتو بالمقترح ده، إلاّ الواحد ياخد ساتر من الموصلي.
09-18-2010, 02:12 PM
Mutwali Malik
Mutwali Malik
تاريخ التسجيل: 12-08-2005
مجموع المشاركات: 2720
طيب ياخ ما نعمل مقترح للجنة إجازة الأصوات دي .....
أكيد اللجنة بأعضائها ناس مؤهّلين وما فيهم كلام ....
ليه ما يكون في مقترح لإعادة الإجازة، يعني حاجة كدة زي تجديد رخصة السواقة. يجي الفنان بعد خمسة سنوات مثلاً من إجازة صوتو ويقدّم صوتو الحالي، تقوم اللجنة تقرر تجديد الإجازة القديمة والاّ تقول ليهو إتطلّب الله وتتم أرشفة أغنياتو المسجّلة حتى لا يتم العبث بها.
_______ غايتو بالمقترح ده، إلاّ الواحد ياخد ساتر من الموصلي.
محمد كيفنك يارجل ياخوي لجان شنو عمرها اللجان ما بتقدم ولا بتآخر فنان زمان اختاروا فنانين في مهرجانات باعتبارهم الاوائل وبمرور الزمن بقوا في نهاية الطابور واحتاروا فنانين ليكونوا في اخر الصف واثبت الزمن انهم في المقدمه ================ مقولة صلاح بتبطئة الفنانين للايقاع لتسهيل الغنا لا اتفق فيها معه يفترض ان التبطئة تصعب الاداء ولا تسهله فالصوت الذي يمكن آن يؤديه الفنان بسرعه ويتخارج عندما يكون الايقاع سريعا سيصبح اطول وتصبح المخارجة اصعب عندما يتغير الى ابطآ يخيل لي صلاح كان داير يتكلم عن تغير السلم الخاص بالاغنيه لتتناسب وقدرات الصوت وتمدده اها نعل الساتر نفعكم هههههه كل الود
Quote: يخيل لي صلاح كان داير يتكلم عن تغير السلم الخاص بالاغنيه لتتناسب وقدرات الصوت وتمدده
فتح الله عليك أستاذ يوسف , ودي واحدة من ( المرّاقات ).. فالفنان يلجأ الى تغيير السلم درجة مثلاً ، حتى يتلائم مع هرم الصوت الى جانب أنه ( ودي أنا مُصِر عليها ) إنو بيبطئ الايقاع ، ويريّح نفسو بصوت أقل ما يقال عنه أنه ( عاااااادي ) .. عشان أكون دقيق أكتر ، أخد ليك مثال من أستاذنا زيدان ( داوي ناري ) أو وردي ( أمير الحسن ) أو صلاح بن البادية ( أيامك ) .. الأغنيات دي بتتغني ( حالياً ) بدون أي حليات ، أو ذبذبات مستحبة أو سمها ما شئت المهم في الآخر المساحة الكان بيرتاح فيها الفنان زمان وبيموّج فيها صوتو كما يريد هسي مافي ، إستعاض عنها ( وبحكم الزمن ) بصوت One way لا يمين لا شمال ، وقدر التطريب الفي يادوب يذكرك بصوتو القديم ..
09-18-2010, 06:42 PM
Elmosley
Elmosley
تاريخ التسجيل: 03-14-2002
مجموع المشاركات: 34683
Quote: فتح الله عليك أستاذ يوسف , ودي واحدة من ( المرّاقات ).. فالفنان يلجأ الى تغيير السلم درجة مثلاً ، حتى يتلائم مع هرم الصوت الى جانب أنه ( ودي أنا مُصِر عليها ) إنو بيبطئ الايقاع ، ويريّح نفسو بصوت أقل ما يقال عنه أنه ( عاااااادي ) .. عشان أكون دقيق أكتر ، أخد ليك مثال من أستاذنا زيدان ( داوي ناري ) أو وردي ( أمير الحسن ) أو صلاح بن البادية ( أيامك ) .. الأغنيات دي بتتغني ( حالياً ) بدون أي حليات ، أو ذبذبات مستحبة أو سمها ما شئت المهم في الآخر المساحة الكان بيرتاح فيها الفنان زمان وبيموّج فيها صوتو كما يريد هسي مافي ، إستعاض عنها ( وبحكم الزمن ) بصوت One way لا يمين لا شمال ، وقدر التطريب الفي يادوب يذكرك بصوتو القديم ..
معظم المغنيين يا صديقي عندما يكبرون فان صوتهم يتجه الى الغلظة لاحظ نمو الصوت عند الطفل مع تقدم العمر وبرغم ذلك الا عند الكبار فانه ياخذ هذا الاتجاه ببطء وده شيئ طبيعي ويتطلب تغيير مقام الاغنيات بعدين ياخي ماتصر علي كلامك بعكلت معاك فيهو ابدا بسؤال ليك كمغني ماهو اخر صوت عال من حيث المدي تستطيع تآديته وهل تؤديه ممدودا بشكل ملحوظ آم قصيرا؟ هل تستطيع ان تضع يدك في النار لمدة اطول؟؟؟ وان كنت تستطيع آن تؤديه ممدودا فهل تستطيع آن تؤدي الصوت الذي يليه في العلو ممدودا؟ انظر الى الامر وقل لي ايهما يساعد في تآدية هـذه الاصوات البطء ام السرعة؟؟؟ كل الود
كنت متأكد إنو مع فنّان الواحد ما حيحتاج لساتر ولا شئ.
كلامك عن صعوبة الأداء في الإيقاع البطئ مقارنة مع الإيقاع الأسرع مقنع. بس إعادة تسجيل الأغاني فيهو مشكلة تانية، شخصياً، وبالنسبة لكتير من الفنانين، ما قدرت أستسيغ التسجيلات الجديدة، رغم إنو المفروض يكون التجويد والتكنيك أفضل. عشان أوضّح قصدي، شوف المثال الذكرتو فوق في أغاني وردي (خاف من الله) و(بعد أيه)، ما عارف هل لأنو الواحد رسخت في ذهنو التسجيلات القديمة بأداءها المحفوظ بكل آهة وشيلة نفس، والا في شئ تاني، عموماً التسجيلات دي الواحد بيحس إنو الأداء فيها (معسّم)، غير التوظيف المبسّط والصولات الواضحة، يعني صولو (الكلارنيت) في خاف من الله، ما قدرت أستوعبها في التسجيل الجديد. غير كدة في حكاية الآلات الحية إن صحّ التعبير مقارنةً بالبدائل الإلكترونية، الإلكترونية دي صراحةً ما بتدي نفس إحساس الآلة الحية. في مرة كنت بتكلم مع حبيبنا (عركي)، وكان جاي من القاهرة بعد تسجيل ألبوم، قلت ليهو ما معناتو إنو شتّان بين الإيقاع لما إيد بني آدم تدُق الجلد، والإيقاع الإلكتروني، هو ما وافقني وأنا إحتفظت برأيي ولسة مصر عليهو.
أعلاه كلام مستمع ... ومستمع لقى ليهو متخصص بالو طويل ...... قام سرح.
Quote: معظم المغنيين يا صديقي عندما يكبرون فان صوتهم يتجه الى الغلظة لاحظ نمو الصوت عند الطفل مع تقدم العمر وبرغم ذلك الا عند الكبار فانه ياخذ هذا الاتجاه ببطء وده شيئ طبيعي ويتطلب تغيير مقام الاغنيات بعدين ياخي ماتصر علي كلامك بعكلت معاك فيهو ابدا بسؤال ليك كمغني ماهو اخر صوت عال من حيث المدي تستطيع تآديته وهل تؤديه ممدودا بشكل ملحوظ آم قصيرا؟ هل تستطيع ان تضع يدك في النار لمدة اطول؟؟؟ وان كنت تستطيع آن تؤديه ممدودا فهل تستطيع آن تؤدي الصوت الذي يليه في العلو ممدودا؟ انظر الى الامر وقل لي ايهما يساعد في تآدية هـذه الاصوات البطء ام السرعة؟؟؟ كل الود
أستاذنا يوسف .. سلام
أولاً دعني أثبّت حقيقة هامة جداً ، وهي أنني ما مغني ، وزي ما قلت إنو عشان تكون فنان لابد من توفر شروط كتييييييرة ، وليس الصوت وحده يخلق فنان .. تمام البني آدم لما يكبر وبحكم التغيرات التي تحدث فإن صوته يتجه الى الغلظة ، ويظهر أثر ذلك على الفنان أكثر من غيره ، باعتبار صوته جميل ، ومعروف ومحفوظ عند الناس كلها وأي تغيير يطرأ عليه بيكون ملحوظ وظاهر .. ثم ماذا يلي مرحلة غلظة الصوت بالنسبة للفنان ؟؟؟ ياها دي زاااااتها البنتكلم عنها إنو صوتو بيبقى ( غير صالح للأداء ) .. طيب ليه ما يدي غيرو غنا ؟؟ ليه ما يلحن ليهم ويكتفي بذلك؟؟ ليه مصرّين يبشتنو غناهم، ويأذونا نحن معجبيهم ومحبيهم؟؟ أماقصة مدى الصوت العالي دي ، فياريت كنت دارس موسيقى عشان أعرف أرد ، لكن كلام عنقالي كده بقول ليك إنو المسألة هنا بتعمد على خامة صوت المؤدي ومداه صعوداً وهبوطاً ، قراراً وجواباً..
عموماً ، البطء مطلوب في حالات ، وحسب الأغنية ، أنا هنا بتكلم عن الغنا الخفيف حق قدامى الفنانين ، الرّكبوه أبوالقدح ده .. شخصياً ما سمعت فنان شاب غّير إيقاع أو سلم أغنيه ، بيغنوها بنفس الزمن ، ونفس السلم ، وده لأنو قادرين على تأديتها بحالتها دي ، حيث أن عوامل التعرية لم تلحقهم بعد ، فما زالوا شباباً يُفعاً..
والله أنا ما قصدي أتحامل على كبار الفنانين ، ولا أنتقص من شأنهم ( حاشا لله ) كل القصة إنو نحن بنتمنى إنهم يعرفوا متين يقيفوا .. السن عندها أحكامها يا بن خالتي ، ومهما حاولنا ما حنقدر نوقف الزمن ، لذا فالأفضل أن نتعامل معه كحقيقة وواقع لا مفر منه ، بحكمة وشجاعة ، وقوة ..
09-18-2010, 11:58 PM
Elmosley
Elmosley
تاريخ التسجيل: 03-14-2002
مجموع المشاركات: 34683
Quote: أولاً دعني أثبّت حقيقة هامة جداً ، وهي أنني ما مغني ، وزي ما قلت إنو عشان تكون فنان لابد من توفر شروط كتييييييرة ، وليس الصوت وحده يخلق فنان .. تمام البني آدم لما يكبر وبحكم التغيرات التي تحدث فإن صوته يتجه الى الغلظة ، ويظهر أثر ذلك على الفنان أكثر من غيره ، باعتبار صوته جميل ، ومعروف ومحفوظ عند الناس كلها وأي تغيير يطرأ عليه بيكون ملحوظ وظاهر .. ثم ماذا يلي مرحلة غلظة الصوت بالنسبة للفنان ؟؟؟ ياها دي زاااااتها البنتكلم عنها إنو صوتو بيبقى ( غير صالح للأداء ) .. طيب ليه ما يدي غيرو غنا ؟؟ ليه ما يلحن ليهم ويكتفي بذلك؟؟ ليه مصرّين يبشتنو غناهم، ويأذونا نحن معجبيهم ومحبيهم؟؟ أماقصة مدى الصوت العالي دي ، فياريت كنت دارس موسيقى عشان أعرف أرد ، لكن كلام عنقالي كده بقول ليك إنو المسألة هنا بتعمد على خامة صوت المؤدي ومداه صعوداً وهبوطاً ، قراراً وجواباً..
عموماً ، البطء مطلوب في حالات ، وحسب الأغنية ، أنا هنا بتكلم عن الغنا الخفيف حق قدامى الفنانين ، الرّكبوه أبوالقدح ده .. شخصياً ما سمعت فنان شاب غّير إيقاع أو سلم أغنيه ، بيغنوها بنفس الزمن ، ونفس السلم ، وده لأنو قادرين على تأديتها بحالتها دي ، حيث أن عوامل التعرية لم تلحقهم بعد ، فما زالوا شباباً يُفعاً..
والله أنا ما قصدي أتحامل على كبار الفنانين ، ولا أنتقص من شأنهم ( حاشا لله ) كل القصة إنو نحن بنتمنى إنهم يعرفوا متين يقيفوا .. السن عندها أحكامها يا بن خالتي ، ومهما حاولنا ما حنقدر نوقف الزمن ، لذا فالأفضل أن نتعامل معه كحقيقة وواقع لا مفر منه ، بحكمة وشجاعة ، وقوة ...
يا ابوصلاح انا ماسمعتك لكن جات شهاده من تلاته اتنين منهم مشوطنين ذواقين وما بعجبهم العجب اخوك عماد وبدر الدين والتالت مبدع ذو قامه شاهقة الا وهو الراحل مصطفي الذي قيل انه اهداك اغنيات هذه واحده فما تاكلنا حنك ساكت آظنني سالتك السؤال ده ، اذا غنيت في منطقة اصبحت آعلي من مدي صوتك وقلت لك هل تستطيع ان تضع يدك في النار لمدة اطول؟؟؟ لاثبت لك بان الايقاع ان تضاعف بطئا فانه يزيد من طول الصوت وهذا يجعل الفنان يضع يده في النار آكثر فلماذا يبطئ الاغنية اذا؟؟ مودتي يا بلدينا وانا واثق من ذائقتك الموسيقية العالية تخريمة ما اظنك سمعت اللنكات الختيتها ليك وما رديت علي خيطي ذاك
(عدل بواسطة Elmosley on 09-19-2010, 00:01 AM) (عدل بواسطة Elmosley on 09-19-2010, 00:02 AM)
09-19-2010, 02:01 AM
Emad Abdulla
Emad Abdulla
تاريخ التسجيل: 09-18-2005
مجموع المشاركات: 6751
الموصلي و صلاح .. كلامكم سمح .. واصلو فيهو . ( ود البشرى و أشرف و ريهان و إنعام و الأنصاري و بقية الرهط .. هووووي يا هووي إنتو . البوست بوستين أخوي السغير .. يعني حقي رسمي يا فارات , و قاعد ليكم أنا ) .
صلاح عبدالله ياخي أسألك بالله تسمع ( نابك إيه في هواه ) دي خاشعاً متبتلاً مهوّداً مطروحةً فيك بركات هذا الليل ده .. و تدعي لأخوك - ده لو لو دعوتك بتحوق و إنت مباري لي اب سفروق ده - !! و كمان النبي فيك إن ما ختيت بالك و شعرات جلدك و قيامتك الرابطة في الكمنجات و القانون في دخلة المقطع بتاع : - الحنين و النوح زادو بلواهو - و القفلة بتاعتها في آخر الغنوة .. ياخواننا غنا شنو البعد ده يغنوهو الخلايق ؟؟
الله البلا اليخوزقو بيهو بدر الدين ده .. بركة رجال القبب .
اخي الفنان صلاح كل عام وانت واسرتك الكريمة بالف خير 1- اؤيد وبشدة حديثك عن توقف الفنانين الرواد عند عمر معين عن الغناء اسوة بفناني العالم الاخر. 2- وهذه لا تتاتي الا بقناعة الفنان بانه شاخ وصوته اتحشرج وسيكون اي غناء جديد خصما علي رصيده الفني. 3- الاصوات الجديدة والجميلة موجوده وكما ذكر اخي موصلي مثال عافيه حسن ولكن هنالك عدة عقبات تقف امامهم لتقديم الجديد ومنها علي سبيل المثال الظرف الاقتصادي الراهن الذي يتطلب دقه سريعه... شنو بروفات ولمن يقدم الجديد ويثبت رجلينو والناس تسمعو وووووو تجتر ليك اغنيتين تلاته قدام تعيشك ملك خاصة وان العازفين صاروا اكثر مهارة من ذي قبل 4- بالفعل الصوت الجميل وحده لا يصنع فنان رغم ان في تاريخنا الصوت القبيح وفي ظروف معينه صنع عدة فنانين ما عايز اضرب امثله لكنهم كثر. 5- الموضوع اخي صلاح كبير وشائك وكما اقترح اخي موصلي عقد مؤتمر جامع ربنا يوفقه في مسعاه 6- فتكم بعافيه وقول لي عماد ينزل لينا عمل من اعمال لؤي فسايه بالله
سؤال يا شباب: تسجيلات الراحل عثمان حسين التلفزيونية من سنة الفين أو قبلها حتى رحيله.. له الرحمة..كانت lip synching مش? لأنه باقي لي الصوت غض و التسجيل باين عليه قديم لو صح ذلك فإني أحسبه أسلم و أجمل
09-19-2010, 11:53 AM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
Quote: سؤال يا شباب: تسجيلات الراحل عثمان حسين التلفزيونية من سنة الفين أو قبلها حتى رحيله.. له الرحمة..كانت lip synching مش? لأنه باقي لي الصوت غض و التسجيل باين عليه قديم لو صح ذلك فإني أحسبه أسلم و أجمل
هو ما قلت أخي سعد. لكن حتى هذه الطريقة تحتاج مهارة معينة في المتابعة، وحفظ سليم للتسجيل الصوتي.
Quote: هو ما قلت أخي سعد. لكن حتى هذه الطريقة تحتاج مهارة معينة في المتابعة، وحفظ سليم للتسجيل الصوتي.
الأخ سعد الدين ،،، سلام
الى جانب ما ذكره أخي محمد ، أعتقد والله اعلم أن المقصود من هذه التسجيلات توثيق الأغنيات القديمة ، لكبار الفنانين (تسجيل الإذاعة القديم) التي تم تسجيلها إذاعياً ولم يكن متاحاً تسجيلها تلفزيونياً ، عشان الناس تشوف وتسمع وهو توثيق تاريخي هام جداً.
أنا في الشغل ، نرجع البيت ونرد على باقي الشباب الحلوين..
نقاطك الستة ( في التنك ) خاصة قصة الصوت القبيح الخلق فنانين في ظروف معينة !! تصدق يا طارق واحد ممن يسمون كبار فنانين ، سّكيت قصة دخوله عالم الغنا لقيت الموضوع ( صدفة محضة ) ، معقول ياخ زول يأذينا من سنة دو ، وداخل القصة صدفة؟؟ نفس حالة شكرالله مين ده ، وقالها ( سمع أضاني ) إنو دخل صدفة !!! صدفة ؟؟؟ الصدفة بتخلق فنان ؟؟؟ المشكلة في السمع يا قريبي ، والكواريك عاك عاك عاك عاك..
تعال بالله يا طارق خلينا نفرتق الحاجات المدسدسة ليه مية سنة دي..
أقسم بالله العظيم ، كلما أسمع هذه الأغنية تغلبني دموعي .. ده جن ده ، واللا ده بلاء ، واللا عبقرية ، واللا أذية مقصودة ، واللا القصة شنو؟؟ رحم الله ( الحكيم ) عثمان حسين وأبناء جيله ، فقد علمونا ، وهذبونا ، وأدبونا أدب المدايح .. أنا غايتو ( المقاس ) بتاعي في الغناء ، يا هو جنس الغناء ده ، شاء من شاء وأبى من أبى..
نابك أيه في هواه ، هذه الأغنية ( الدواء ) كانت النعي الذي أنزلته في بوست وفاة ( الحكيم ) عثمان حسين طيّب الله ثراه ، حتى يعلم الناس حجم الفقد والخسارة .. وزي ما بيقول أخونا حيدر جني ، ده جيل ما عندو إسبيرات.. هذا ( الحكيم ) ترك لنا أدوية ، لو عرفنا كيف نتناولها ونتذوقها لشفتنا من كثير من الأمراض الشايلينها وحايمين بيها.. بالله دي أغنية ليها أكتر من أربعين سنة؟؟ أسمعوا كان تلقوا ليكم آلة ناقصة!! آلات الزمن داك كلها مشاركة ، بي قانونها، وأجمل ما فيها إنو ما في آلات كهربائية ، كلو حق الله .. لحن ممكن عادي يمسكوه يشّرحوه ، ويدرسوه ، هو لكن يدرّسوه لمنو زاااتو؟؟؟ والله مصيبتنا كبيرة ، في مغنواتية اليوم ، الناس ديل ما سمعوا الغنا ده واللا شنو؟؟ يمين لو بيحسوا ، وسمعوا غنا زي دي ، واحد فيهم ( يدقها ) تاني ما في ...
عماد ، ياخي شكراً على ( الدوا ) وعلى ( الحكيم ) أبوعفان ..
Quote: انا ماسمعتك لكن جات شهاده من تلاته اتنين منهم مشوطنين ذواقين وما بعجبهم العجب اخوك عماد وبدر الدين والتالت مبدع ذو قامه شاهقة الا وهو الراحل مصطفي الذي قيل انه اهداك اغنيات هذه واحده فما تاكلنا حنك ساكت آظنني سالتك السؤال ده ، اذا غنيت في منطقة اصبحت آعلي من مدي صوتك وقلت لك هل تستطيع ان تضع يدك في النار لمدة اطول؟؟؟ لاثبت لك بان الايقاع ان تضاعف بطئا فانه يزيد من طول الصوت وهذا يجعل الفنان يضع يده في النار آكثر فلماذا يبطئ الاغنية اذا؟؟ مودتي يا بلدينا وانا واثق من ذائقتك الموسيقية العالية تخريمة ما اظنك سمعت اللنكات الختيتها ليك وما رديت علي خيطي ذاك
الزعيم الموصلي ،،، سلام
عماد وبدرالدين ومصطفى سيدأحمد ، يمكن عجبهم صوتي ، ولكن ليس بالصوت وحده نوجد فنان يمكن فهمي ( المشاتر ) في القصة دي ما عاجب كتير من الناس ، لكنني أعرف أهمية الفن (الغناء تحديداً) وأدرك حجم مسؤولية أن تطرح نفسك فنان ، وانها مسؤولية ( لو يعلمون ) كبيرة جداً.. ياخي أنا متمنى واحد من المغنواتية ديل يتكلم وأقتنع إنه بيعرف يتكلم ، قاعدين في الطراوة!! تعرف يا ابن خالتي أنا أسلحتى في الدنيا دي شنو؟؟ أضاني وليس غيرها.. وأنا بأخذ قصة السمع دي بجدية متناهية ، يعني البيصيب بنشكرو ، والبيخطئ بنصوبو، ولا نستحي من ذلك.. رداً على سؤالك ، طبعاً ما ممكن كمغني أوّرط نفسي في منطقة عالية ( تشنقني ) وإن فعلت فمؤكد لن أستطيع أن أصمد لمدة طويلة ، يعني ما بقدر أخت يدي في النار.. أما قصة بطء الإيقاع ، فمقبول بالنسبة لي إذا كان هذا هو زمن الأغنية وإيقاعها من البداية أما أن تكون خفيفة ، ويجي الفنان ( بعد أربعين سنة ) يبطئ الإيقاع فهذا غير مقبول إطلاقاً ( بالنسبة لي على الأقل ) .. الملاحظ أن إتجاه كبار الفنانين هو تخفيض السلم درجة درجتين، وتغيير الزمن أو الإيقاع ، وفي هذا تحايل واضح وما مقبول ..
وبعدين ياخي معقولة ما أسمع اللنكات ، أمشي شوف Salah Abdulla مسجل عندك ( عضو ) من تاريخ متين؟؟ نفس تاريخ وضع اللينكات..
كنت متأكد إنو مع فنّان الواحد ما حيحتاج لساتر ولا شئ.
كلامك عن صعوبة الأداء في الإيقاع البطئ مقارنة مع الإيقاع الأسرع مقنع. بس إعادة تسجيل الأغاني فيهو مشكلة تانية، شخصياً، وبالنسبة لكتير من الفنانين، ما قدرت أستسيغ التسجيلات الجديدة، رغم إنو المفروض يكون التجويد والتكنيك أفضل. عشان أوضّح قصدي، شوف المثال الذكرتو فوق في أغاني وردي (خاف من الله) و(بعد أيه)، ما عارف هل لأنو الواحد رسخت في ذهنو التسجيلات القديمة بأداءها المحفوظ بكل آهة وشيلة نفس، والا في شئ تاني، عموماً التسجيلات دي الواحد بيحس إنو الأداء فيها (معسّم)، غير التوظيف المبسّط والصولات الواضحة، يعني صولو (الكلارنيت) في خاف من الله، ما قدرت أستوعبها في التسجيل الجديد. غير كدة في حكاية الآلات الحية إن صحّ التعبير مقارنةً بالبدائل الإلكترونية، الإلكترونية دي صراحةً ما بتدي نفس إحساس الآلة الحية. في مرة كنت بتكلم مع حبيبنا (عركي)، وكان جاي من القاهرة بعد تسجيل ألبوم، قلت ليهو ما معناتو إنو شتّان بين الإيقاع لما إيد بني آدم تدُق الجلد، والإيقاع الإلكتروني، هو ما وافقني وأنا إحتفظت برأيي ولسة مصر عليهو.
أعلاه كلام مستمع ... ومستمع لقى ليهو متخصص بالو طويل ...... قام سرح.
[Email]
نعم ياعزيزي فالتسجيلات الجديدة قد لا تستساغ وذلك يعزى لفارق الزمن والنوعية بين التسجيلين (كوالتي) هذه واحدة وقطعا فان الالات الحية افضل من المبرمجة علما بان الايقاع المبرمج لم يعد ايقاعا رقميا فقط فقد اصبح (عينه/ سامبل) يقوم به الابرع من العازفين في العالم. ولكن الفرق هنا هو ان الايقاع الحي يربط العازف بروح العمل فسيكون افضل . كل الود اخي الحبيب محمد ابو العزائم فدوما مشاركاتك في الصميم وجوه القون
(عدل بواسطة Elmosley on 09-19-2010, 05:43 PM) (عدل بواسطة Elmosley on 09-19-2010, 07:45 PM)
09-19-2010, 08:00 PM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
شكرا لاتاحة الفرصه لعماد عبدالله ان يفرج عنا ما وسعت وضاءته وكلته .. * ولاخيه هارون رغم إزه الذى حتما هو معوج كما فهمت .. ارجو ان يكون المانع خيرا وللأمير بدرالدين والانصاري وأبوالريش أن جعلوا هذا الصباح ممكنا ..
.. * للضمان ساكت .. تكون وردت فى الحوار المتمدن ولا حاجه .. والكلت معروف ..
09-20-2010, 06:43 AM
Emad Abdulla
Emad Abdulla
تاريخ التسجيل: 09-18-2005
مجموع المشاركات: 6751
طارق ميرغني و اعتداءه المتصل ، و غير المسؤول ، و تغوله المشين بلا تبرير لحق أصيل من حقوق مبدعينا .. هذا السلوك ظل يترى في أناة و عن قصدٍ نحنا ناقشنو ، و من قبل صاحب التصريح أعلاه ، و يحتد عدوانه و غلوائه و الحسادة التولد البنات ما وجد المذكور سانحة لبث مثل هذه المقولات التي تمس المبدع فسايات في عصب حساس شديد . هذا ، و لن نألوا جهداً في مد مساحات الصبر - و في اتساق تام - مع منهجنا الداعي لعدم الإلتفات لسفاسف و صغائر الأمور التي ما ح نشتغل بيها الشغلة ، و التي دأبت علي وضع العقابيل أمام المسيرة القاصدة للفنان المرهف لؤي فسايات .. و الذي حول المذكور طارق ميرغني اسمه و حوره ايما تحوير مغرض ، فآل إلي فساية واحدة بس .. بدلاً عن جمع التكسير المبني علي الفتح للطيش : فسايات . فتأمل ..
......... يا زمن .. بالتسجيل الأولاني حقها . واحدة من الغنوات الكنا بنساهر بيها الليل في سطوح مطعم و بار مرحبا في شارع خمسطاشر العمارات .. و ناكل شية باردة ، مازين بجبنة مضفرة و زيتون اسود و فول حجات .. و كلما الليل تقل علينا ، و الغنا اتسق و صفع مشاعرنا الملهلبة الوكت داك ، يجيب لينا البار مان عمك عبدالرحيم المناديل المعطرة لزوم قش المخاخيت التي أهرقتها الحبيبات و الكمنجات النواحات و الغنا الذي يخت الرحمن في القلب .
تتذكر يا طارق شارع واحد و اربعين زمن الزمن داك ؟ .. يا سلام يا سلام .. تتذكر البار الجنباوي المكتوب في بابو ( البار مفتوح من الخلف ) ؟؟ الصعاليك قاموا سموه THE GAY BAR - ما بتتكتب بالعربي .. كلو كلو . و فندق أفريقيا .. و البت آلمو الأثيوبية الكانت شغالة ويتيرز ؟؟ عمك عثمان الشايقي بتاع التكسي البارلينا .. الكانت ملبك هناك ليل نهار داك .. متذكرو ؟ عمك عثمان عشان خاطرها مسك ليك بتاع السواري كسرو صاح .. و ربط الحصان في التصادم الخلفي و قال للبوليس المجدوع في الواطـه : تعال شارع المزيرة في لفة الشجرة .. تلقي حصانك مربوط هناك .. و لو راجل تاني ترازي البت دي .
بالله كنت بتجي عندنا تتبرك ؟ .. يا سلام ياخ .. زول بتعرف كويس وين الناس الكلاس و الجو الكلاس .. و المسائل الرايقة . أنا و الله في الاول قايلك زول من بحري ساي بس . أتاريك كنت كويس .. و ناقش .. طيب الكان مقعدك في الضهاري ديك شنو ؟؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة