سيد أحمد الحردلو قامه سودانيه تستحتق الاحتفاء وتواجه ظلم الدولة وانكار العطاء!

Quote: سيد أحمد الحردلو شامي (السودان). ولد عام 1940 في قرية ناوا بالولاية الشمالية- السودان. حاصل على بكالوريوس في اللغة الإنجليزية وآدابها 1965, ودبلوم اللغة الفرنسية 1975/ 74. عمل مدرساً, ثم انتقل إلى السلك الدبلوماسي فعمل مستشارًا بسفارة السودان في كنشاسا 1975, 1976 فوزيراً مفوضاً 1977- 1979, فسفيراً 1980, فسفيراً فوق العادة 1987- 1989 وتقاعد عام 1989. عمل محرراً ومراسلاً لبعض الصحف السودانية والعربية. شارك في العديد من المؤتمرات الرسمية, واللقاءات والمهرجانات الثقافية. دواوينه الشعرية: غدا نلتقي 1960- مقدمات 1970- كتاب مفتوح إلى حضرة الإمام 1985- بكائية على بحر القلزم 1985- خربشات على دفتر الوطن 1997- الخرطوم... ياحبيبتي 1999- أنتم الناس أيها اليمانون 1999, إلى جانب الكثير من الأشعار بالعامية السودانية. أعماله الإبداعية الأخرى: ملعون أبوكي بلد (مجموعة قصصية)- مسرحية شعرية بالعامية السودانية. ممن درسوا شعره أو كتبوا عنه: مصطفى السحرتي- تاج السرالحسن- عزالدين إسماعيل- محمود أمين العالم أحمد رشدي صالح- جيلي عبدالرحمن- غادة السمان. عنوانه: منزل رقم 396- مربع 61- أركويت- الخرطوم- السودان.

Quote: 1- كنتَ قايلِك لىْ ضَهَرْ أركزْ عليهُ وكنتَ قايلك لىْ صَدُر أهجعْ اليهُ وكنتَ قايلكِ حُبْ كبيرْ .. دقيتَ صدرى أباهى بيهُ ورُحتَ أقدل فى البلدْ وأدوبى ليكى .. أنِمّ ليهُ وكنتَ قايلك لى زمنْ لِسَعْ… وقايلِك جايه بيه وفيه أطفالْ .. فيه أشعارْ فيه خيرْ وسلامْ .. وفيه وفيه سُودانا البنحلم بيه والدايماً نكاتل نِحن ليه -2- كنتَ قايلْ ما فى بعدكِ تانى زولاً أشتهيهُ ولا جمالاً غير جمالِك فى بلدنا نفيستى فيه ولا وطنْ غيرك سَكَنْ يدينى .. ما تدينى ليه وجيتْ برايا إلى ضَراكِ إتضارى من أحزانى بيه مُحبْ مُطاردْ من بلاده والعجيبه بلادهُ فيه خافقه فى كُلْ نبضة ليه وشايله أمطارْ فى عينيه -3- جيتَ قايلِك لىْ ضَرايه ولىْ صَدُر يهجعْ معايا وكنتَ شايلِك لىْ تميمه وكنتَ كاتبِك لىْ محايه ولما جات الحارة دايره ودارتْ الأيامْ عليّا لقيتكْ إنتِ غريبة عنى … وواقفه فى جانبْ عِدايا كأنه يومْ ما كنتِ ليّا وكنتَ ليكى هدفْ وغايه كنت قايلِكْ لى برايا … وفى النهاية .. بقيتْ برايا !

Quote: الصبر ياخ احتمال يكون فى برنامج الزيارات بتاعة النائب الثانى شايفنو كل يومين فى الصحف بصحبة وزيرة الرعاية الاجتماعية فى زيارات للعديد من المبدعين تحياتى ورمضان كريم

Quote: أجيك عاشق مسافر ليل ( سيد أحمد الحردلو ) أجيكْ عاشقْ مسافرْ ليلْ واجيكْ ولداً جَنَبْ بلحيلْ اجيكْ لا خَاتِراً مكسورْ ولا فارساً مَهيِضَ الحيْل أجيكْ سيفاً سنينْ مسلولْ وراكزْ ضُمه فوقَ الخيلْ أجيكْ مسدارْ من الدوبايْ واجيكَ دُعَاشْ وراهُ السيلْ واجيكْ لا خَاتي ... لا ظالمْ واجيكْ في القدلة زيَّ النيلْ واجيكْ يا مُبتَدا التاريخْ ويا خَبرَ اللِي كانوا قِبيلْ لأنَكْ ديمة كُنتَ معايْ مسولتْ بَيْ نهارْ في ليلْ ودايماً كُنتَ ليّا أصيلّ ولاكْ بَرَاني .. لانِي عَميلْ ودايماً كُنتَ بيّا كبيرْ ولاكْ هَيِّنْ .. ولانِي قليلْ وأهلَكْ ديله ..هُمْ أَهَلِي البِشيِلو الشيله فوق الشيلْ وانتَ أبويْ .. وأنتَ أخويْ وانتَ الهُولي .. ما هُولْ زولْ بشوفَكْ هَالي في حلفا وفي نِمُولي .. وفي توتيلْ واجيكْ يا موطنَ الحلوينْ ويا نيلاً ضُلُولُه نخيلْ عَشَانْ ما زالْ لدينا كلامْ ... كلاماً كُلُّه زينْ وعديلْ أجيكْ الليله شَانْ أفديكْ وشَانْ تَبْقَالنَا ديِمه دليكْ وشَانْ أديكَ عُمري الفاتْ وكُلَّ الجايي .. جيلْ في جيلْ عَشَانْ أشقي وعَشَانْ تلقي وعَشَانْ تَبْقَالنَا ديِمة جميلْ ! صنعاء – الخرطوم –11/11/1992

Quote: عاجل الشفاء للشاعر سيد أحمد الحردلو.

Quote: يعني يموت المبدعين بصمت لحد زيارة سعادته

Quote: الأمر هنا لا يخضع لأى مزيدات سياسيه بل شأن انسانى فى المقام الاول لـ رجل يستحق اكثر واكثر

Quote: يا غابة قمحية مشرورة فوق البلود زي الصباحية يا مزرعة باباي غضبة الهبباي يا نخلة مسقية من ريق دبيشية يا مقطعين دوباي نازلين على الدنيا أشواق وحنية ياسمح يا زين يا ليل ليل وليلية يا نيل ونيلية يا مرمي تحت الشمس للقيلة ضلية يا سحنة نوبية يا كلمة عربية يا وشمة زنجية

Quote: تقول لي شنو وتقول لي منو ونحن السور ونحن الحور ونحن بناتنا محروسات ونحن ولادنا ضلالات ونحن أماتنا ياهن ديل ونحن أبواتنا ياهن ديل وجيب وريني زيي منو وتقول لي شنو وتقول لي منو ونحن فزع ونحن وجع ونحن اليمة واليابا ونحن أريتو بالتابة ونحن يمين إذا حرت نخلي الواطة رقابة تقول لي شنو وتقول لي منو ونحن زغاوة والعطرون ونحن الدونا مافيش دون ونحن ولاد ملك حزتيت وساب الجر وحجر السكة والتاكا وسيدنا الفي الجبل داكا ونحن يمين نضمنا كتر وشيتنا كتر واسعل ناس كرن والطور واسعل يا جنا الخرتوم وشوف كيفن زلنا كتر وشوف كيفن زعلنا كتر أنحنا الـ للرجال خوسة ونحن يمين جنات موسى تقول لي شنو وتقول لي منو ونحن الدوكة والضلالة والدونكة ونحن الدانقة والراكوبة والواطة ونحن الفكة والشبكة ونحن الحجزة والعكة ونحن الجود ونحن أسود حديثنا إذا أردتو رطان وحين دايرين نسوي بيان تقول لي منو وتقول لي شنو ونحن الخلوة والدايرة ونحن تكية العايرة ونحن الضل ونحن الكل ونحن سبيل غريب الليل ونحن صباح مسافر ليل ونحن فناجرة الدنيا ونحن حباب حديثنا حباب تعال شرف وشوفني منو وتقولي لي شنو أقيف لسع وأقيف واسمع ونحن صديري منضوم ويل ونحن القرمصيص بلحيل ونحن التوب ونحن الووب وناس حبوب وناس حرم ونحن اليانا ديل يا زول وتسعلني وتقول ل ونحن إذا رأينا كبير نقيف طولنا ونقوله حباب ونديه البكان ترحاب وتقول لي شنو وتقول لي منو أقيف لسع وأقيف واسمع ونحن التاية والإنداية والزريعة والعيزومة واتفضل ونحن الراية مرفوعة ونحن الكلفة مرفوعة ونحن حلفت مدفوعة أنا الكعب البسوي الويل وأنا الزول السمح بالحيل وداير منهم ياتو وتقول لي شنو وتقول لي منو