|
|
 مترين لكل مواطن , دكاااااترة يا رسول الله!
|
مترين لكل مواطن
ما كنت متخيل الدكاترة ديل نسايين كده, وامال كانو قاديننا في حصص الكيمياء والفيذياء فوق كم؟؟
قصة الدكاترة البينسو الشاش في بطن المواطنين دي حكاية عجيبة جدا وعاملة لي نفسيات , يعني الدكتور ده طلع من بيتو الصباح وشرب الشاي ولبس الجزمة والشراب والبنطلون والقميص وغالبا النضارة وقروش المواصلات , ديل كلهم ما حصل يوم سمعنا بي دكتور نسي يلبس هدومو , بس لما جات علي بطن المواطن المسكين ده نبقي في آآآخ والله نسيتي لي مترين وآآآآخ نسيت لي ربع و"ما أدراكا"؟ الحاجة المزعلاني أكتر انو الدكاترة ديل ما بنسو الشاش ده الا في بطن المواطن , يعني ما سمعت لي بي دكتور نسي ليهو شاش في ركبة مواطن مثلا, يعني المواطن ده بطنو طامة وفايرة طبيعي كمان يبقن عليو طمام بطن ونسيان دكاترة؟
طالما وزارة الصحة ما قادرة تضع حدا لي قصة نسيان الدكاترة دي , فأقترح عليها انو الماهية بتاعتهم تكون بالمتر , وكل دكتور وأمتارو بقا , يعني الدكتور يجي يصرف الماهية الصراف يسألو : أها يا دكترة الشهر ده كم متر؟؟ والدكتور يرد: والله اتخيل لي زي عشرين متر كده.. مترين في مستشفي النو ومتر ونص في ابراهيم مالك وباقي الأمتار في البان الجديد (( حليلكم يا ناس البان جديد)) بعد شوية يقوم الصراف يسأل: يا دكترة شايف لي ربع متر ظاهر في الصرفية بتاعتك , دي عملية صغيرة ولاشنو؟ يقوم الدكتور عشان يتخارج من الصراف الغياظ ده يغمت ليهو زي خمسة جنيه, فالصراف طوالي يرد شكرا يا دكترة , كتر الله من أمتارك . بعد ده مفروض كل دكتور يمد رجلينو حسب أمتار , ومفروض الدولة تعمل أوسمة للدكاترة ديل , يعني يكون في وسام النيلين للتمتير الطويل , ووسام النيلين للخدمة المترية المتميزة , الخوف انو المسألة تمشي لي أبعد من كده ويقومو ينسو الموبايلات , والعيانين بطونهم تبقي فيها كل النغمات والناس تشيل وتضرب في تلفون الدكتور النساي تجي الرسالة: بأن هذا المشترك يستحيل الوصول اليه و للأبد , المشكلة حتكون عويصة للناس الوقع ليهم تلفون مظبوط علي هزاز!!! "جنس هز" إييييييييييييييك!.
يعني قصة النسيان دي لو استمرت أكتر من كده المواطنين ديل حينقرضو كلهم وبي كده حنكون مزقنا فاتورة المواطن (( وأودوماديكيا )) حنكون مزقنا فاتورة الدواء -بالضرورة- لأنو أساسا ما حيكون في مواطن من أصلو , ولما نمزق فاتورة المواطن , ده برضو يعني تمزيق بقية الفواتير زي فاتورة القمح وفاتورة الجمرة المعفنة ديك وفاتورة القناة الفضائية وفاتورة حق الفطور وفاتورة قفة الملاح وهلم جرا علي قول الصادق المهدي , والبلد تبقي فاضييييييييه والمواصلات برضو والدكاترة تاني ما حيحتاجو يضربو لأنو البلد حتكون فاضية من أساسو , وممكن يسكنو في حتات نضيفة ويرتاحو من الميز الوسـخان داك بتاع الدكتورات , يعني ممكن يسكنو في الفلل الرئاسية ولا في الفنادق الفخمة ولا في الحتات بتاعة الحناكيش , و بي كده حيفضلو الدكاترة بس لأنو المواطنين زي ماقلنا حيكون أنقرضو بسبب النسيان التراكمي وكده , ولما الدكتور زاتو يمرض يمشي للدكتور التاني وبعد كده حديد يلاقي حديد وكل دكتور ومترو , الواحد يادوب عرف تسمية الشريان المترالي جات من وين؟ الدكاترة دول ليهم "حاقات يا قدع".
(( اللهم لاتؤاخذنا ان نسينا))
|
|
 
|
|
|
|
|
|
|
|
Re: مترين لكل مواطن , دكاااااترة يا رسول الله! (Re: وليد عبد اللطيف)
|
Quote:
يعني ما كان في اي (امل عطبره) ينقذوها
|
لو كان في أمل (عطبرة) ينقذوها ، الحصل ده ما كان حصل ، ناس الأمل ديل شكلهم فالحين ينقذو لينا في هلال الملليم ويهدوهو الهدايا المجانية ، هههههههه ، لكن لكل ظالم نهاية .
هل تصدق يا وليد انو الانقاذ في الحكاية دي كان بأيدي بحرواية صرفة "علي الصعيدين الطبي والقانوني والشرطي"...... ولكن........ فتابع معنا!!
| |
|
|
|
|
|
|
|
|
|
Re: مترين لكل مواطن , دكاااااترة يا رسول الله! (Re: على ميرغني)
|
Quote:
لماذا بشق الانفس ... وين الحكومة ووين حكومة ولاية الخرطوم ... ووين ديوان الزكاة ووزارة الصحة الاتحادية ... بل اين دعم الاخوة المصريين الذين سيزرعون الاراضي البور البلقع في القزيرة |
عليك الله ((الوينات)) الكتيرة الفوق دي أمشي أعمل بيها يافطة سممممممممحة وعلقها في مدخل كل المستشفيات والأجنحة الخاصة , بالله ما تنسي تجي تورينا النتيجة , ويكون جميل جدا لو طلعتو لينا مظاهرة كااااااااااربة كده زي بتاعة لبني ديك , تمام؟
| |
|
|
|
|
|
|
|
|
|
Re: مترين لكل مواطن , دكاااااترة يا رسول الله! (Re: Mohamed Abdelmotalib Hassan)
|
الاخ محمد بن عبد المطلب
عيدك سعيد
1- برضو نحن دكاتره ومتميزين على العرب و العجم.
2- بالله عطبره فيها مستشفى مؤهل للجراح؟ والله طفره وتقدم
3-الحمدلله الشاش وافر عندكم شديد!!!!
4- هل الشاش فى العمليات من مسؤلية الجراح؟؟؟ اسأل اهل الذكر!!!
5- من الذى باشر العلاج بالعاصمة ؟؟ دكتور ولا تمرجى ولا شنو؟؟؟
*****
اتمنى لك عيد سعيد وان شاء الله ما تجي حايم علينا!!!****
| Quote: (( اللهم لاتؤاخذنا ان نسينا))¿ |
| |
|
|
|
|
|
|
|
|
|
Re: مترين لكل مواطن , دكاااااترة يا رسول الله! (Re: Mohamed Abdelmotalib Hassan)
|
| Quote: - برضو نحن دكاتره ومتميزين على العرب و العجم. |
بأمانة شديدة نحن لسه واهمين روحنا بي إننا متميزين علي العجم وباقي الكلام الماسكين فيهو لينا سنين طويلة ، لكن ما سمعنا بالعدد الهائل من الحوادث بتاعة الإهمال الشديد خاصة في الأخطاء الطبية القاتلة برا السودان ، يعني نسيان الشاش ده ما حصل سمعت ليهو الإ في السودان ، حقو الناس تفوق وتصحي من الفرمالة بتاعة والله نحن متميزين وعايشين علي كده ، ولما تمشي المستشفيات تسمع العجب العجاب.
إصحو يا عالم.
| |
|
|
|
|
|
|
|
|
|
Re: مترين لكل مواطن , دكاااااترة يا رسول الله! (Re: Mohamed Abdelmotalib Hassan)
|
| Quote: - بالله عطبره فيها مستشفى مؤهل للجراح؟ والله طفره وتقدم |
والله سؤالك ده وطريقة كلامك المبهمة دي ، ما عرفتك قاصد شنو؟ قاصد تقول إنو في تعارض بين واقع المستشفي وواقع القضية البسرد فيها دي ولا عايز تقول إنو كتر خير الناس إنو عملو مستشفي مؤهل للجراح في عطبرة؟ ولا ............. ؟ ولا ....................؟
لو الإفتراض الأول هو المقصود فالوقائع دي حصلت ، وأنا حاضرها ، وأُتخذت إجراءات قضائية بشأنها ، وأصحاب الشأن لازالو علي قيد الحياة ، كما إن الطبيب لا زال مواصلاً في رحلته مع الطب والنسيان والسرحان و ( قرض ) الشعر والناس قبل و أثناء وبعد العمليات.
ليكم الله وعيشة السوق يا ناس عطبرة ، ده طبعا لو ما نقلوهو حته أسمح.
| |
|
|
|
|
|
|
|
|
|
Re: مترين لكل مواطن , دكاااااترة يا رسول الله! (Re: Mohamed Abdelmotalib Hassan)
|
| Quote: -الحمدلله الشاش وافر عندكم شديد!!!! |
يعني عايز تقول شنو؟ الشاش فعلاً وافر؟ ولا سؤال بتاع زول عايز يقول إنو في نقص في الشاش؟
لو عايز تقول الشاش وافر ، فده واضح جداً ، لأنو من كترت ما هو وافر الطبيب حتي ما كلف نفسو يطلعو من بطن العيانة ، نساهو جوا البطن ، ولسان حالو الشاش وافر خليهو جو (ما بسوي شي) الشاش وافر الشاش وافر ، ما في شاشاً كلتو زول.
ولو عايز تقول أنو في نقص شديد في الشاش وبالتالي الطبيب حيكون حريص وما ينساهو؟ فبقول ليك : ده حالتو الشاش في أزمة ، طيب لو كان وافر علي قولك ، كان حيحصل شنو أكتر من الحصل؟
| |
|
|
|
|
|
|
|
|
|
Re: مترين لكل مواطن , دكاااااترة يا رسول الله! (Re: Mohamed Abdelmotalib Hassan)
|
عارف يا بن عبدالمطلب انو مشكله الطب دائما تحت المجهر لانه يمس صحه المواطن مباشرة
المحاماه والاعلام وهلم ما جره ....ديل ناس سوق ساى لذلك مافى مجهر موجه عليهم ...**
الواحد الحمدلله دقس بس:::::::
****
الاخطاء الطبيه فى اميز المراكز العالميه موجوده ومدونه ...
مستشفيتنا و الله حالها لايغنى عن سؤالها!!!!! وتعال نفرجك...والله الشاش احيانا لا تجده ....
****
يا اخى
هى على الله ساى .....
***
وراجع ليك فى الموضوع الاساسي .....
| |
|
|
|
|
|
|
|
|
|
Re: مترين لكل مواطن , دكاااااترة يا رسول الله! (Re: شرفى عبدالقادر)
|
| Quote: النقطة دي بالذات عايزك تشرحها بإسهاب ، عايز أعرف البحصل شنو بالظبط ، والشاش ده بكون وين؟ والدكتور بيعمل شنو؟ والمسئول منو؟ والدكتور مسئوليته ومهامو تبدأ وين؟ وتنتهي وين؟والشاش ده بيحصل ليهو عد ومعروف عدد القطع قبل العملية ولا لا؟ |
***
بالنسبه لللسؤال اعلاه ...
الجراح نهائى لا علاقه له بالتحضير (من شاش ومعدات ومستهلكات) ولا علاقه له كذلك بالتخدير
مثال...
انا عندما احضر للعمليه اجلس فى غرفه بعيده جدا من الغرفه المعده للجراحه وبعد ان يتم تخدير المريض وتجهيز المعدات وتحضيرها
بعد التعقيم الكامل ....آخر شئ هو استدعائي للعمليه تم بعد الجراحه اعود الى غرفة القهوه ...والمريض لازال تحت التخدير العام.
بعد ذلك المريض يخرج الى الانعاش حيث التقى به آخيرا بعدها يخرج الى اهله 100%...
***
باسهاب كمان شويه ....
الشاش مسؤليه المحضرين ...اذا قال لك المحضر ان عدد الشاش بعد العمليه ناقص
وجب عليك فتح المريض فى الحال وارجاعه للجراحه حالا....
****
تمام يا خى محمد
| |
|
|
|
|
|
|
|
|
|
Re: مترين لكل مواطن , دكاااااترة يا رسول الله! (Re: Mohamed Abdelmotalib Hassan)
|
كيف الشاش مسئولية المحضرين؟
الكلام ده بيعني شنو علي وجه الدقة؟ هل بيعني إنو تحضير الشاش قبل العملية مسئولية المحضرين؟ بمعني تقطيعه وتحضيره ولفه في أشكال معينة أو "تطبيقه" بطريقة محددة؟ ولا إحضاره الي داخل غرفة العملية؟ ولا معناهو إنو مسئول عن مناولة الشاش للجراح أثناء الجراحة؟ ولا بيعني بعد الجراح يستخدم الشاش لغرض غسيل مكان العملية يقوم بتسليمه ومناولته للمحضر مرة تانية؟ ولا بيعني إنو المحضر مسئول عن التخلص من الشاش بعد نهاية العملية برميه في ا لمكان المخصص ليه؟ وهل الشاش ده بيكون محسوب العدد قبل وبعد الجراحة؟
| |
|
|
|
|
|
|
|
|
|
Re: مترين لكل مواطن , دكاااااترة يا رسول الله! (Re: Mohamed Abdelmotalib Hassan)
|
بيبقي السؤال : هل محضر العملية بناول الطبيب الشاش يداً بيد؟ ولا الجراح بشيل الشاش براهو؟ وكذلك المشرط أو غيرها من أدوات الجراحة؟
نفترض إنو محضر العملية ناول الشاش للجراح ، هل محضر العملية بيستخدم الشاش ده وينظف جسم المريض قبل بداية العملية في الجزء المحدد لفتح البطن؟ ولا الجراح هو البيعمل كده؟ ولا مساعد الجراح؟
| |
|
|
|
|
|
|
| |
Mohamed Abdelmotalib Hassan
وليد عبد اللطيف
معاوية عبيد الصائم
شرفى عبدالقادر
ناذر محمد الخليفة
علاء الدين محمد بابكر
فيس بوك
تويتر
انستقرام
يوتيوب
بنتيريست