|
|
|
 Re: بلادي أنا بلاد ناسا في أول شئ مواريثهم كتاب الله (توجد ربة)... (Re: سيف اليزل برعي البدوي)
|
أنحنَا السَّاسْ
ونَحنا الرَّاسْ
ونحن الدّنيا جبناهَا
وبَنيناها
وبِيوت .. في بِيوتْ
وأسْعل جدي ترهاقَا
وخلي الفَاقة ... والقَاقا
***
تَالا أبوي .. بعنخي اَزَمْ
وتَالا اللُمْ .. أَبويْ أوْلبَابْ
وأمي مهيرة بتْ عبودْ
وأخويا المهدي .. سيد السيفْ
والخلى النصارى تقيفْ
هناك ...في القيفْ ’
***
ونحن الشينْ
ونحن الزينْ
ونحن العقبه والعتمور
ونحن القِبله .. والقرعانْ
ونحن الشانْ
ونحن النانْ
أتينا عشانْ نسوي الدّنيا للإنسانْ
***
ونحن الصّفي
والوَافي ’
ونحن الشّافي
والكافِي ’
ونحن الزادْ
ونحن العِينه
والزِّينه ’
ونحن - يمين - أهالينا
أهالي سرورْ
ووَكتين ينزل المستورْ
تَرَانَه النور
***
ونحن الجبنه واللبريقْ
ونحن قداحنا سَاوات ضيقْ
ونحن بيوتنا مفتوحاتْ
مَسَايْ ... وَصباحْ
ونحن السمَحه
والقَمحه
ونحن الطله ... واللمحه ’
ونحن الصِيدْ
ونحن العيدْ ’
***
ونحن عُزَازْ
ونحن حَرَازْ
ونحن هَشَابْ
ونحن قُمُوحْ
ونحن تُمُورْ
ونحن عُيُوشْ
ونحن النيلْ
وَكضَاب - يازويل - منْ قالْ
إنّك .. تاني لينا متيلْ ’
***
ونحن الحَجه والتوبه ’
ونحن الهِجره .. والأوبه ’
ونحن كُتَارْ
ونحن كُبَارْ ’
ونحن - يمين - جُماَل الشيلْ
ونحن - يمين - نَضِمنا قليلْ ’
***
ونحن مِحايه
نحن طِرايه
ونحن فِدايه
نحن سِمايه
نحن حجاب
ونحن اللوحْ
ونحن شَرَافه في الدنيا
ونحن كِتاب عِلمْ مفتوحْ
على كل البُلودات ... نورْ ’
ونحن - يمين - مَداين نورْ ’
ووشنا نورْ ’
***
ونحن الحِنه والجرتقْ
ونحن الزفه والسيره ’
ونحن ... أبشري والشبال ’
ونحن السَيْ
ونحن الوَي
ونحن الرقبه ... والتُمْ تُمْ
ونحن اللَم
يكون في الدنيا ... متلنا ... لمْ
***
ونحن العَاجْ
ونحن الصَاجْ
ونحن البوشْ
ونحن الحوشْ
ونحن الناسْ
وكتيم الديارا ... يباس
وإن درت العديل والزين
تعال يازول ’
وإن كست الكعب والشين
أرح ... يازول
***
ونحن السورْ
ونحن الحُورْ ’
ونحن بناتنا محروساتْ
ونحن ولادنا ضُلالاتْ
ونحن أُماتنا ياهُنْ ... ديلْ
ونحن ابواتنا ياهُنْ ...ديلْ ’
’
***
ونحن فَزَعْ
ونحن وجَعْ
ونحن اليَمه ... واليَابَا
ونحن أريتو بالتَابَه ’
ونحن - يمين -إذا حَرّتْ ’
نخلي الواطه ... رُقَابه ’
***
ونحن زَغَاوه والعطرونْ
ونحن الدُونَا .. مافيشُ دونُ
نحن وِلاد مَلك خِرتيتْ
وسَابَ الرْ
وحجَر السِكه ’
والتاكا ’
وسيَدنا الفي الجبل ... دَاكَا
ونحن -يمين - نضِمنا كُتُرْ
وشَيتنا كُتُرْ
وأسعَل ناس كَرن والطُورْ ’
وأسعَل كَرري .. والَتْمُورْ
وأسعل - ياجَنَا - والخرتُومْ ’
وشوف كيفن زعلنا كُتُرْ ’
وشوف كيفن فرحنا كُتُرْ ’
أنحنا أل للرجال خوسَه ’
ونحن - يمين - جِنَات موسى ’
***
ونحن الدوكه
والضُلاله ’ والدونكه ’
ونحن الدانقه ’
والراكوبه ’ والواطه ’
ونحن الفَكَه
والشِبكَه
ونحن الحجزه ... والعَكَه ’
ونحن الجُودْ ’
ونحن أسودْ ’
ونحن النَانْ ’
حديثنا إذا أردتو رُطَانْ
وحين دايرين ... نسوي بَيَانْ ’
***
ونحن الخَلوهَ والدايره ’
ونحن تَكيه العيره ’
ونحن الضُّلْ ’
ونحن الكُلْ ’
ونحن سبيل غريب الليلْ ’
ونحن صباح مسافر الليلْ ’
ونحن فَنَاجرةَ الدّنيا ’
ونحن حَ بَابْ
حديثنا حَبَابْ
تعال شَرِف ... وشوفني منو ’
***
أقيف لِسَعْ
وأقيف وأسمعْ ’
ونحن صديرس منضوم ويلْ
ونحن القَرمصِيص .. بلحيلْ ’
ونحن التوبْ
ونحن الووبْ
وناس حبوبْ
وناس حَرّمْ
ونحن إذا رأينا كبيرْ
نقيف طولنا .. ونقولْ لُه ... حَبَابْ
ونديه البُكَان ... ترحابْ
ونحن اليَانَا ديل ... يازولْ
وتسعلني .. وتقول ليِ منو ’
وتقول ليِ شنو ’
***
أقيف لسعْ
وأقيف ... وأسمعْ
ونحن التَايَهْ
والأندايَهْ
والزِريعهْ
والعيزومهْ
واتفضلْ ’
ونحن الرايَه مرفُوعه
ونحن الكُلفَه مرفُوعه
ونحن حلفتَ ... مدفوعه
***
وأما عجيبْ
وأما غريبْ ’
وأقيف لسعْ
وأقيف ... وأسمعْ ’
***
أنا الكَعَب البسوي الويلْ
وأنا الزول السَمِحْ .. بلحيل ’
وداير ... منَّهُمْ ... يَاتوُ .. ’؟؟؟
http://www.aucbm.org/images/aniflags/sd.gif
--------------------------------------------------------------------------------
| |
 
|
|
|
|
|
| |
سيف اليزل برعي البدوي
محمد الكامل عبد الحليم
فيس بوك
تويتر
انستقرام
يوتيوب
بنتيريست