وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جمهورك

Quote: محمود عبدالعزيز لم يظهر في فترة الانقاذ ، بل قبل ذلك كنا بنحضرو لما كنا شُفّع في جنة الاطفال ( مسلسل الوردة البمبية ) وكان يغني مقدمتها مع الفنان الهادي حامد ( ود الجبل ) وأرتبط عندنا اسمو وصوتو منذ ذلك التاريخ بذلك المسلسل. أي زول في الدنيا دي مسؤول عن سلوكو الشخصي تسكر واللا تتصقع ، ما في زول عندو حاجة عندك ، طالما لم تخالف ، أو يتأذي غيرك من سلوكك حتى عند المخالفة ، يجب أن يكون هناك نظرة وتقدير لكل حالة ، إذا لا يمكن مساواة المبدع مع غيره! ثم أن محمود مستهدف من قبل ( بعض ) المحسوبين على الحكومة ، وأنا شخصياً ما عندي شك في الكلام ده !! يعني ما في زول في الدنيا دي غير غير محمود عبدالعزيز؟ الناس دي ما قعد تسوي السبعة وزمتها!! ثم أن هناك مليون طريقة ممكن تعدل بها حال زول خاصة لما يكون ( مبدع ) زي محمود عبدالعزيز، يعني زول ما عادي زينا كده .. الفنانين مزاجهم مختلف جداً عن أمزجتنا ، وهم في كل مكان في الدنيا عندهم احترامهم ومكانتهم والناس (مفروض) تقّدر وتتفهم خصوصية هؤلاء المبدعين واختلاف مزاجهم ومعاملتهم على ذلك الأساس.. محمود فنان فنان فنان ، شئنا أم أبينا.. شخصياً أقول أن محمود على المستوى الشخصي ود ناس ، يحيّرك بأدبه وتواضعه ، وطيبتو ( وخجلو ) مصيبتو في البطانة التي تحيط به ، إحاطة السوار بالمعصم ، والذين يزينون له السئ .. أرجو أن لا نفقد العشم في إنصلاح حال فناننا الجميل محمود ، وأن تكلل مساعي أخواننا هنا بالنجاح ، ويرجع محمود أحسن مما كان .. وكل سنة وإنتو كلكم طيبين..