|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: وليد محمد المبارك)
|
التاني يا وليد السر قدور ده! مالو كده الزول ده ... ياخ ده جايطنا جوطة شديدة خلاص.. ما معقول الحلقة كلو صريخ وكوراك؟ إنتو مافي زول بيقول ليهو احسن يقول الأبيات في شكل شعر بدل يغنيهو لانو ما عندو طريقة للغني كلو كلو.. الله!!!
إحترام الموهبة ضروري ولو هو مريض كما تفضل الأخ ناصر فكان الأفضل ما يشارك في البرنامج حفاظاً علي صحتو. وإحترام الجمهور مطلوب من قبل السر قدور لانو الجوطة البيعمل فيهو ده ببيخ البرنامج تماماً.
Quote: محمود مريض يا وليد ... ربنا يواليهو بالعافية و جميع المسلمين |
الله يديهو الصحة والعافية
ناس شول ديل نزلة ساي خلي يوديهم التوج.
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: شول اشوانق دينق)
|
Quote: إحترام الموهبة ضروري ولو هو مريض كما تفضل الأخ ناصر فكان الأفضل ما يشارك في البرنامج حفاظاً علي صحتو. |
بالعكس يا شول لو ما السر قدور الناس ما كانت عرفت الماساة الوصل ليها محمود عبد العزيز ..محمود ما مريض مرض عابر محمود ماشي في درب ماردونا ولو ما الدوله ولا المهتمين بامر محمود اتصرفوا سريع محمود دا حا يكون مهزله والشلة الوصلتو للمرحلة دي كل حا ترفع يدها منو ..كل الاستديو الان بيتعامل مع محمود بي عطف وعلي اساس انو زول مريض اتمني انو يشعر بي التعامل دا ويقبل نصائح من يهمهم امره
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: khaleel)
|
. . . الزول بقول ليكم محمود طلع من الزمن محمود الحير علماء الموسيقى الروس طلع من الزمن محمود الكان بخلينا نسافر عشان نحضر حفلاتو تشر الغنيه ده ما ذنب السر قدور ده ذنب محمود واصلو كلام الشله وشنو ما بعرف ما سبب يبرر لي محمود يصل بيهو للمرحلة دي ...
حتى نقطة المرض بتاعتو سمعنا كتير ومن الاخبار الغير مؤكده كأصابته بالسرطان وغيرها من الاخبار لكن حتى يصرح محمود او اي جهة لديها التفويض المحمودي لا اظن ان معجبي محبي محمود حتى الثماله يغفرون لمحمود ان يشوه صروة فنانهم الاحب
اقترح تكوين لجنه لمقابلة محمود والعمل على ارساله الى اي مشفى متخصص في ايما اصابه ان كان مريض في اي بلدان الغريبه بعد الوعد منه ان ان يحافظ على محمود عبد العزيز لانه ملك لكثير من السودانيين لا ملك لنفسه
عد لنا محمود عشان ما نغني ليك بعد الفراق
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: شول اشوانق دينق)
|
و الله يا جماعة الحاجة السمعتها انو محمود مريض بمرض في الدم و محتاج نوع معين من العلاج .. و هو رافض الحكاية دي
مصدر المعلومة : شخص مقرب من محمود
فياريت لو واحد عندو تاكيد للخبر يورينا .. لانو محمود عمرو ما ظهر بالشكل دا في كل تاريخو
الوش باهت .. الجسم هزيل و تعبان .... و حتي الصوت طبقاتو رايحة
نتمني دوام الصحة لمحمود الذي ساهم بشكل لافت للنظر في التعبير عن مشاعر و ثقافة جيل كامل، و ما اعتقد انو في فنان علي مر تاريخ الغنا في السودان اصدر كمية البومات و اغاني جديدة زي محمود
خاص لي شول: يا شول احسن ليك ادفع بالحسنة ....... و لو ما داير تدفع ممكن تعزمني شيشة
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: وليد عبد اللطيف)
|
Quote: كان معي صديقي جمال فرفور هنا قبل كم يوم وحسب كلامة قال تناقشنا معه كثير جدا ولو يعيرنا اهتمام اصلو محمود راجل عنيد ويستحيل يقتنع بالساهل بالجد حاجة تحزن |
يا ولى الثورة ...
يا ولى الشعبية
محمود شاب يحتاج الى ايدى قريبة منــه يثق فيها ..
جمال فرفور من اقرب الناس ليهو فى الوسط الفنــى ومن حيث الجوار زمان ...
فرفور هو انسب من يقود مبادرة مثل هذه ..
والعمل الجاد ينطرح طوالــى فى القادمات من الايام ...
ونبحــث عن رعايــة ..
ثم الدعوات لربنا بأن يشفيــه ...
شول ( ادفع احسمن ليــك )
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: وليد عبد اللطيف)
|
الأخ وليد
تحياتي ورمضان كريم والبنيه مبروكة وتتربى في العز
والله منذ بداية رمضان وأنا أفكر في توصيل مثل هذه الرسالة للفنان محمود عبد العزيز صاحب الصوت المميز والدفء الطاغي ولم أوفق لكنك اليوم فعلت ولك الشكر واري أن هذا البوست غير كافئ في قرع جرس الإنذار لفنان في جماهيرية محمود أن يذهب هكذا سنوات من الإبداع ثم الإنزواء والتراجع أو التلاشئ والساحة تحتمل محمود لعقود من الزمان في أن يسهم في تشكيل وجدان كثير من السودانيين بصوته الدافئ . لكن يبدو أن الأمر أكبر مما نتصور وبذات القدر يحتاج لجهد أكبر مما نكتب لوضع الفنان محمود في المسار الصحيح . وعلي جميع الجهات ذات الصلة أن تتحرك اليوم قبل الغد .
بحيراوي
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: البحيراوي)
|
Quote: غنى ظبية البص السريع فابدع أيما إبداع! تأدب الجميع فى حضرته ولم يتجاسر احد برفع عقيرته واكتفوا بالهمهمة! قالوا التايوتا لو شايلها فى كيس بتدور ! يا محمود انت لو مركب درب بتغنى! للاسف نحن أمة لا تحترم مبدعيها لا فى شبابهم لا فى شيخوختهم اتمنى ان يستعيد محمود عافيته ليعود للساحة جضورا والقا وصوتا متميزا كما كان! يوم تم حد محمود جلدا فى الهواء الطلق فى الفاشر ونقلته كاميرات الهاتف وتداولته عبر الاسافير ايقنت ان محمود سيمضى فى نفق مظلم! لقد تم جلد محمود وكل معجبيه ومنهم شخصى الضعيف يومها قلت لصديق لى ان من يستحق الجلد هو الرئيس الذى يرقص فى الهواء الطلق وامته تتضور جوعا وهو يتفانى فى قصفهاباسلحة الموت لا محمود! محمود كان من الممكن ولا زال ممكنا وقبل ان يضيع من ايدينا الاهتمام به من كافة الاجهزة المعنية: الاعلام والثقافة والصحافة والراديو والتلفزيون ونقابة الفنانين وزارة الصحة والشباب ومنظمات المجتمع المدنى وكل معجبى محمود! هؤلاء المغتين والشعراءوسائر الوان الطيف الفنى هم الذين يجملون حياتنا ويزرعون فيها الامل لا اهل ساس يسوس الذين ظلوا ينخرون فينا نخر السوس يقتلونا يأسا بعجزهم وفسادهم! الاذاعة والتلفزيون لا تساوى شيئا بدون ساعات البث اليومى لنتاج هؤلاء المبدعين وهى تحصد الملايين عبر دس الاعلانات فى دسم فواصلهم الغنائية لماذا تبخل عليهم بدراهم معدودات تنفقها عليهم ردا لجمائلهم التى سلفت! الويل لامة تجلد وتهين وتهمل مبدعيها! جنى
|
Quote: داعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم |
وليد اخوى الصغير زمان كانت الناس بتعالج الملاريا بمنقوع خشب الكينا المر والان بقوا يغلفوا الحبوب لكى يصير طعمها مبلوعا وما شاءالله انت لسة شغال بخشب الكينا وبجرعات عالية! اهل بورتسودان يعرفون الطاهر حسيب اعجوبة الكرة السودانية والذى انتقل اللهلال السودانى ويومها ايقن الكثيرين ان هذا العبقرى اذا ترك فى حاله لسحب البساط وتهاوت عروش وتم اغراقه بالكحول حتى ذوى وذبل! اهل الخرطوم جنوب وامتداد الدرجة يعرفون الساحر الذى كان بحق وحقيقة ساحرا يخلب الالباب لا تدرى رجله اليمنى ما فعلت رجله اليسرى والعكس صحيح وانتقل للهلال وتم اغراقه كحوليا! محمود مستهدف وانا لا اعفيه واخشى ما اخشى ان يكون مصيره مصير الطاهر والساحر! جنى
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: jini)
|
مش زمان قالوا اسمع الشعر من تلاتة النابغة اذا رهب وامرؤ القس اذا طرب ومنو كده اذا رغب (اظنو زهير).. أها يا محمود غناي إذا رغب .. غايتو انا محمود ده يطلع برة الزمن يخش جوة الزمن صوتو يروح صوتو يرجع دمو يتحرق دمو يرجع تاني فمحمووودي هو محموودي .. له حضور وجبروت عجيب اما كمية الكورجة القاعدة قدامو دي.. بالرغم من انو اداء محمود ما بيشبه محمود إلا إنك تحس كل الناس القاعدة دي قاعدة تأدباً لي اداء محمود ..تحسهم وكأنهم خجلانين يغنو ومحمود قاعد معاهم ..تحسهم يخافون لو تداخل محمود بصوته القوي الخارج من عمق الحجاب الحاجز (مش اصوات الحلقوم ) فتذهب اصواتهم جفاء..أشعر وكأن كلللللل الفنانين والفنانات في اغاني واغاني ديل مركبين شرايط محمود في عرباتهم .. محمود مر بنفس الفترة دي قبل خمسة سنوات وفي اول ظهور لمحمود في حفل في قناة النيل الازرق كان بي الرفيرا تقريبا ويومها لبس البنطال(ما حق لبنى) الأسود والقميص الابيض وضرب مزيكا حيييرت البشرية وجاب صوت محمود البيشرط الساوند داك .. غاب محمود فجأة وعاد بتسجيل في قناى الشروق بعد بروفات وعمل مضني فسجل بصوت محمود الذي سمعناه في حفلات الفندق الكبير وبيت الثقافة (ده ما ود عم بيت الفنون بيت الفنون بيعملوا فيهو سمايات ).. بالمناسبة خروج محمود برة الزمن عادة عند محمود من زمااان وفي عز مجد محمود ..والنسيان ديدن محمود ومحمود أحسن زول ما بيحفظ غنا واستدل ليك بي حاجة عجيبة جداً .. الناس استشهدو بي عظمة وقمة وروعة اداء محمود في شريط (سكت الرباب) اللي اتسجل في روسيا وكيف ادهش محمود الروس و و و ..امشي اسمع الشريط ده وتحديداً أغنية (حبيبي فاكرك معاي) ولو لقيت فيها كوبليه واااح غير الأول اتغنا صاح ليك علي يا وليد كسوة عيدين وبدون شباطة تشمل حتى المولودة الجديدة مع إنو دي كانت اشهر اغنية تغنى بيها محمود وحبوها الناس لكن محمود كده .. محمود أذا نوى يغني وقال نويييت أن أغني فصدقني الموضوع انتهى زز قالها محمود لما اقول عايز اغني فانا بغني عشان امتع نفسي اول شي .. وعليه يا وليد فمحمود الذي تشاهد يغني اداء واجب وليس ليمتع محمود فقط انتظر متى ما محمود نوى .. محمود عبد العزيز لو ابكاني شئ فهو خوفي على الجسد النحيل وبهتان ملامح الوجه المرهق ورغما عن ذلك يكسوه خجل وتواضع وثقة في النفس قلما تجدها في شخص.. حوووتا أو الصحابي كما يلقبه المعجبين غنااااااااااااااااااااااااي ..
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: عمر الفاروق)
|
حبيبنا عمر
نحن اولاد المدارس المصرية جمال عبد الناصر تحديدا بنعتبر محمود ده حقنا .. باريناه وسمعناه والناس ما كان بتعرف .. محمود ده منو زاتو .. انا كان عاجبني قبل كده ونحن اطفال .. وكت ظهر في مسرحية بنت السلطان وكان بغني
قوم يا حتيته ويلا قوم قوم قوم يا حتيته وكفاية نوم
او وكت يقول انا بلهوان
اول حفل حقيقي حضرته لمحمود كان تصدق او ما تصدق سنة 86 قيدومه لي بت خالتنا في الديم وكنا بنسال الولد البحاكي حيدر بوسودان ده منو لانو كان شغال باروغن الحفلة قاعده وشريطها في
بعد داك باريناه نحن رمتالة جمال عبد الناصر .. ما خلينا يوم فراعي في المكتبة القبطية .. عشنا تفاصيل ايامه مع ود الجبل كلها
ووكت جينا للكورة .. كان كل المعسكرات يصدح فيها شريطين فقط
محمد احمد عوض محمود عبد العزيز
بالتوالي
اول حفلة لي محمود بعد ما مرق من السجن او من الاصلاحية
كانت في الثورة الحارة الاولى مرقوه العصر وغنا المساء هناك انا حضرتها ( شفت الجنون ) بتذكرها زي الليلة يا عمر.. لابس مبشتن زي ايامو دي .. بنطلون جينز ######ان .. وفنيله ممطوه وقديمة ابيض مسطرة بالاسود وتسطيرها عريض
اول غنية ضربها وشوف الكلام ده كان في بداية التسعينات كانت حنيني اليك وجا مرقها في شريط في الالفينات
ما حصل يا عمر حتى ايام صوتو كان فيه مشكلة ما حصل انا شفت محمود بالسوء ده
ما بهمني شكلة ولا لبسة بضرب بنقو بضرب حبوب بضرب اخماس في اسداد .. ده شي خصو لكن اداءه وصوته بخصونا نحن جمهورو .. وطالما انه في تدهور في ملكاته .. حا نسكو وعرف السبب شنو
لانو يا عمر نحن راسنا ده تخين .. وفهمنا تقيل .. وما بقنعنا زول بالساهل ومحمود اقنعنا .. عشان كده مستائين
الحوت تعبان يا فرده تعبان شديد
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: jini)
|
Quote: اليوم كادت الدموع ان تفر من عيني وانا استمع لمحمود وهو يشاتر |
اها يا وليد .. انا دمعتي فرّت عديل وما قدرت أمسكها وحلفت ما أحضر أي حلقة تانية يكون فيها محمود .. أصعب حاجة في الدنيا دي ياخ انك تشوف زول بتحبو في لحظة ضعف!
لا أعتقد انو الناس اجمعت قبل كدا على حاجة زي ما اجمعت على إنو محمود فعلاً يتهاوى بخطى حثيثة ويحتاج للمساندة الفورية! باب الشفقة والعطف سيكون مرفوض من ناحية محمود وهذا حقه ... يبقى اللجنة البتكلموا عنها الناس هنا لازم تكون لجنة محبي العملاق محمود عبدالعزيز .. ولازم تشمل كل شرائح المجتمع البتحب محمود وبتعشق فنه .. وما أظن في أي إنسان في الدنيا ممكن يرفض كلام ناس داخلة ليهو من باب المحبة! يبقى من المهم جداً أنه الناس تشرع في التحرك في الموضوع دا وتحدد deadlines للخطوات القادمة!
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: السيد المسلمي)
|
. . . يا السيد المسلمي
سلامات ورمضان كرمي
من منا لا يسكنه محمود عبد العزيز فعني رحلة عشقي له بدات منذ عام 1988م بشرائط (فورسكفون بشارع الديم) وطوال هذه الفتره عشت كل فيها كل اخباره افراحه واتراحه حفظت عن ظهر قلب كل ما شدى به واعتقد ان لدي ارشفه صوتيه تليق بمحمود عبد العزيز وقامته في دواخلي لهذا عندما اقول الاسراع في تكوين لجنه لبحث امر محمود عبد العزيز لا احس انه واجب علينا تجاه محمود وانما هو مشروع لرد الجميل الذي طوقنا به محمود طوال هذه المسيره الضخمه من الغناء الذي استطاع فيها بجداره ان يحرك بصيلات الاحساس فينا ....
اليك السيد المسلمي والى وليد محمد مبارك والى كل محبي ذلك النغم الشارد من الاودية السحيقه ليعطر سمواتنا حتى يبقى بيننا ما قدر ما شاء له الله اكرموه في مرضه وكرموه في صحته اظهروا له الحب الاصيل حتى يعود متالقا كعادته حنجرة تفتت القلوب وتدمع العيون حتى لاتنحبس غدا هذه الدموع التي اسالها منكم حبا ووجدا حتى لاتنحبس في مآقيكم خجلاً لانكم كففتم من يد العون حين بانت منه ملامح انه يحتاجكم انتم لا تلك الصحبة التي تذهب به الى مسارب الهلاك ... اسرعوا الى تلك المضارب وعودوا بمحمود عبد العزيز الذي نحب وتحبون ويحبه كل الشغل السوداني طوال مايقارب ربع قرن من الابداع والالق الذي نتمنى ان لايخبو اذهبوا به الى المشافي العالمية المتخصصة هو ما بخل عليكم باعصابه وحنجرته ولياليه فهل ستبخلون عليه يوم تبدت منه ملامح الاستجاد بكم حتى من نفسه التي بين جنبيه
اخيرا هل حقا تحبون محمود عبدالعزيز اذن كونوا لجنه واذهبوا اليه اظهروا له الحب قبل العافية ان ابى واظنه كذلك فهو انف اصروا عليه واكثروا لا تذهبوا الا وانتم تحملون امل عودة ذلك الالق البهي وناضر وندي
ياخي كونوا لجنه دي عاوزه تفكير محمود بروح بين ايديكم انتم تنظرون
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: أبو عبيدة البصاص)
|
Quote: من منا لا يسكنه محمود عبد العزيز فعني رحلة عشقي له بدات منذ عام 1988م بشرائط (فورسكفون بشارع الديم) وطوال هذه الفتره عشت كل فيها كل اخباره افراحه واتراحه حفظت عن ظهر قلب كل ما شدى به واعتقد ان لدي ارشفه صوتيه تليق بمحمود عبد العزيز وقامته في دواخلي لهذا عندما اقول الاسراع في تكوين لجنه لبحث امر محمود عبد العزيز لا احس انه واجب علينا تجاه محمود وانما هو مشروع لرد الجميل الذي طوقنا به محمود |
والله ياابوعبيدة الواحد بقي ماعارف يعمل شنو ؟ قبل شوية كنت بسمع في ( الحنين البي ليه ماقدروا ) بصوت محمود .. وجيت قريت مداخلتك دي ! نفس الرسالة وإن أختلفت الكلمات .
ــ لك التحية والإحترام .. ونشوف أخر البوست التاني شكلنا ح نعمل فيه حاجة .. قول يارب .
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: Amir Omer)
|
مرحب امير عمر فعلا اصعب حاجة في الدنيا دي ياخ انك تشوف زول بتحبو في لحظة ضعف!
Quote: أعتقد انو الناس اجمعت قبل كدا على حاجة زي ما اجمعت على إنو محمود فعلاً يتهاوى بخطى حثيثة ويحتاج للمساندة الفورية! باب الشفقة والعطف سيكون مرفوض من ناحية محمود وهذا حقه ... يبقى اللجنة البتكلموا عنها الناس هنا لازم تكون لجنة محبي العملاق محمود عبدالعزيز .. ولازم تشمل كل شرائح المجتمع البتحب محمود وبتعشق فنه .. وما أظن في أي إنسان في الدنيا ممكن يرفض كلام ناس داخلة ليهو من باب المحبة! يبقى من المهم جداً أنه الناس تشرع في التحرك في الموضوع دا وتحدد deadlines للخطوات القادمة! |
كلامك ده ممتاز
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: أبو عبيدة البصاص)
|
محمود هو محمود ، يمكن يكون عايش فترة بتاعة إستياء وقرفة ، لكن ياهو ده حالو ، يعيش في نفسيات تأثر علي أداءه شوية ويرجع تاني زي الأول ، بعدين بصراحة في الحلقة دي بصفة خاصة أنا شايف إنو محمود فعلا حس بي إحساس إنو ما مفروض يختوهو راس بي راس بي عاصم ، وفرفور ، وطه ، والصادق ، ونادر ، والبنيات الكتار ديلاك ، يعني محمود لما بدا الغنا ولا واحد من ديل كان في زول بعرفهم ، لكن واضح إنو الحلقة إتفرضت علي محمود ، علي الرغم من إني بعرف محمود صعب تتفرض عليهو حاجة ما عايزها لكن شكلو إضغط شديد في المشاركة دي ، محمود نجم كبير جدا وإتظلم ظلم فادح في الحلقة دي وجاهو إحساس إنو ما تم تقييمه صح ، وده برضو واضح من طريقة لبسو وتسريحة الشعر حتي في أغنية عاصم بتاعة المهرجان محمود نام عديل كده في نهاية الأغنية كتعبير عن إستياء وملل شديدين، وبرضو الناس قارنت بين مظهر محمود ومظهر الناس الباقية ، كلهم عاملين ليهم جضيمات وممسحين وقاشرين ، وهو شكلو معشكب عشكبة شديدة ، وأصلا محمود جا للحلقة دي بطنو طامة ، طبعا ده ما بيعني إنو صوتو كان صوت محمود المعروف ولا الأداء أداء محمود المعروف ، لكن يا الشفت محمود ده بيغني من متين؟ ياخي ده لو كان مكنة كان اتكسرت ، الناس خاتا محمود في مكانة كبيرة شديد وما بتقبل منو أي حاجة أقل من العارفنو عنو ، لكن الناس ناسية انو محمود بني آدم لحم ودم وليهو مشاكل ، ومحمود مشي مشوار في عمره صعب شديد ، ونحت الصخر بي أظافرو عشان يبقي محمود الشايفنو ، فالراجل أدوهو فرصة يرتاح شوية وأدوهو كمان فرصة يظهر بالمظهر ده لأنو دي حالات نادره وبتمر علي أي إنسان ، محمود راجل بغني لي نفسو وصاحب مزاج عالي جدا في الغنا ، وزول فعلا ما مهتم بي نفسو زي باقي الفنانين لكن ده محمود اللي ناس عرفتو بيهو فحقو الناس تقبلو بي حالو ده وتخليهو يعيش حياتو الطبيعية ، يظهر بالطريقة البتعجبو ويغني بي صوت منشز أحيانا ، ويخلي شعرو طاير زي ما عايز ، ما يهتم بي أكلو وشرابو زي ما عايز ، محمود صنع نفسو كده والناس إرتضتو وسمعتو وحبتو كده ، فمحمود صفقة متكاملة لا تقبل "التبعيض" والتجزئة ، فيا الناس تاخدو كلو بي علاتو ، ولا كمان تخليهو وتشوف غيرو ، لأنو محمود البعرفو لا بتغير ، ولا عايز زول يغيرو ، ولا بستحمل زول يقول ليهو ده صح وده غلط ، ، ولا بشتغل بي زول ، ربنا خلقو كده ، وحيعيش كده ، وحيموت - بعد عمرا طويل طبعا - كده.
محمود نجم في سماء عاليه إتخت في حلقة مع مغنيين ، محمود ما قدر يستوعب انو يكون وسطهم!!
غايتو الزول الجبر محمود يجي الحلقة دي ما عمل خير كلو كلو!!
عليك الله يا وليد الناس العايزة تعمل لجنة والكلام العجيب ده ، عبرك أقول ليهم خلو الزول في حالو ، ظروف وتعدي ما تهتمو!!
إطمنو شديد ، ما بتجيهو عوجة ، ياهو حالو!!
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: وليد محمد المبارك)
|
Quote: مرحب عثمان اخبارك وشكرا على الثقة
الزول قالوا ما بقبل اي تدخل في خصوصياته
نتمنى ليه تمام الصحة |
السلام عليكم يا وليد يا اخى بطلوا حركات ,, وامشوا للزول عديل كدة محل ما قاعد وما تسمع الكلام البنقال فى الهواء ساى .. وما دام انتوا مهتمين بمحمود لهذه الدرجة امشوا ليه واعرفوا الحاصل تماما وتعالوا اعكسوا لينا ما وجدتموه بكل صدق ( والشاف ليس كمن سمع ) ما يبقى كلام لإستهلاك الوقت .. وبعدين اسه البوست ده مش اكبر تدخل فى الخصوصيات يا وليد,, بل فيه حتة بتاعت اساءات عديل كدة انو الراجل بتاع بنقوا ومخدرات وهذه كلها كشف عيوب وفى شهر رمضان الكريم كمان .. امشى للراجل وقول ليه انا من معجبيك وربما تكون لك به علاقة شخصية لان وسطكم متقارب فى العلاقات .. وقول ليه جيت ابارك ليك رمضان واطمئن على صحتك وشوف النتيجة وتعال ورينا بالحاصل .. مع تحياتى لكم . وتمنياتنا بالشفاء العاجل بحق هذا الشهر العظيم للفنان المبدع محمود من جميع العلل الجسدية والنفسية والروحية.. ولمحبيه ومعجبيه كل الود.. ورمضان كريم
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: Mohamed Abdelmotalib Hassan)
|
محمد عبد الطلب ازيك ياخ
Quote: لكن ده محمود اللي ناس عرفتو بيهو فحقو الناس تقبلو بي حالو ده وتخليهو يعيش حياتو الطبيعية ، يظهر بالطريقة البتعجبو ويغني بي صوت منشز أحيانا ، ويخلي شعرو طاير زي ما عايز ، ما يهتم بي أكلو وشرابو زي ما عايز ، محمود صنع نفسو كده والناس إرتضتو وسمعتو وحبتو كده ، فمحمود صفقة متكاملة لا تقبل "التبعيض" والتجزئة ، فيا الناس تاخدو كلو بي علاتو ، ولا كمان تخليهو وتشوف غيرو ، لأنو محمود البعرفو لا بتغير ، ولا عايز زول يغيرو ، ولا بستحمل زول يقول ليهو ده صح وده غلط ، ، ولا بشتغل بي زول ، ربنا خلقو كده ، وحيعيش كده ، وحيموت - بعد عمرا طويل طبعا - كده. |
ما عندنا اي مانع ..شرط انو محمود يغني كمحمود
يعني محمود لو غنا كويس بالصورة البنعرفوا بيها .. كان جا لابس لباس عزابة ما شغالين بيه
لكن وكت يغني شين زي ما حصل اكيد النقد بحصل
والله ماهو نقد مقصود بيه تشفي او انتقاد لكن هو نقد محبة
والله يشهد
ودي
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: وليد محمد المبارك)
|
بالضبط يا وليد الموضوع انو محمود غني الاغنية في سلم عالي اعتقد انو مي الكبير , الحتة الانت بتتكلم عنها دي محمود أنجز فيها المدي العالي بصعوبة لانو محمود منطقتو الصوتية مختلفة من منطقة الكاشف الحادة, المنطقة الدخل معاهو فيها عصام كانت منطقة مريحة اصلا لانو المنطقة العالية كانت اوريدي انتهت و عصام ما لحقو لكنو شارك معاهو و ده تقليد مجادعة بين المغنيين معروف و محمود سكت عشان يدي صوت عصام فرصة يدخل . ده كل الحصل , مافي فرقة خالص
محمود ما مريض ولا شي بس مرهق شديد و صحتو تعبانة , لو اتعشي كويس و نام يوم كامل زي ما قلت ليك حا تسمع حوتة صاحبك البتحب غناهو زاتو تاني .. ما تستعجل و تظلمو ساي ياخ
___ فيما يخص الفرقات في الغنا يا وليد , راجع حتي المغنيين الكبار , كتير جدا فيهم من يفرق و دي ما بتتحسب ليهو لانها خاضعة لظروف الحفل و الغذاء الجيد و الراحة قبل الحفل . الفنانيين السودانيين ما بتعاملوا مع غناهم بإحترافية كما يليق.
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: وليد محمد المبارك)
|
يا وليد الانت بطالب بيه ده حقك كمستمع و كمعجب بمحمود ، أنا مشكلتي الناس البطالب باكتر من حقوقها بحجة حب محمود : مافي زول عندو الحق يتدخل لزول في حياتو الشخصيه ما لم يكون قريب أو صديق مقرب ، خاصة إذا عرفنا إنو الزول ده ما بقبل التدخل ده . أما رايي الشخصي في غناء محمود من يومو : أخير احتفظ بيه لنفسي عشان ما تطردوني بره البوست ده !!!
---------- الله يديكم الصحه و العافيه , والله يا وليد العملتو معاي ما عندي ليكم عليه جزاء أسال الله أن يجزيكم عليه كل الخير في الدنيا و الاخره ...
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: أمين محمد سليمان)
|
وليد سلامات
Quote: مرحب عبد الرحمن حمد النيل
مختلف معاك يا حبوب .. محمود شتر الغنية وفرق تونة كان ما فرق زمن المزيكا خاشة واطي وهو خشا عالي بصورة مشاترة |
وانا بختلف معاك وان شاءالله اختلافنا يوصلنا لاتفاق
Quote: الايقاع نوعين واحد الرزم العادي والتاني مستوى الصوت وتوافقه مع المجموعة او المزيكا ومحمود فرق التانية |
الايقاق نوعين دي ماسمعتة بيها قبل كدة الايقاع يتكون من نوعين من الضربات ( دُمْ ) و هي الضربة القوية( تَكْ )الضربة الأقل قوة بالاضافة للضربات الخفيفة وللايقاع ستة اشكال مااظن تكون قاصد الحاجة دي(رندزبلانش ..الخ).
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: عبد الرحمن حمد النيل)
|
الاخ وليد كتبت
Quote: مؤسف
اليوم كادت الدموع ان تفر من عيني وانا استمع لمحمود وهو يشاتر .. حين كان يؤدي اغنية وداعا روضتي الغنا الحوت يُشاتر !!!!؟
وكتر خير عصام اللحقو
يا محمود راجع نفسك .. انت تسير نحو الهاوية بسرعة الصاروخ |
وواصلت
Quote: لاصورة لا صوت لا ايقاع |
لغاية ماوصلت لحدي النقطة دي
Quote: والله يا خدر كلامك سليم
سمعت المقطع صوت بس .. ما جاني اي احساس شتره
بالعكس كان جميل جدا
للصورة كان دور كبير في توهمي |
البوست دخلوهو3298 وعدد المشاركات 84 علي اي اساس فتحت البوست لانك ركزت في الصورة وبس!!! شايف انك قسيت شديدعلي محمود بعنوان البوست وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جمهورك
| |
|
|
|
|
|
|
Re: وداعا محمود عبد العزيز .. ان لا تحترم نفسك فانت حر .. لكن يجب عليك ان تحترم فنك وتحرمنا جم (Re: Ashraf el-Halabi)
|
سلامات يا وليد ..
أكتر تلاتة مداخلات عجبتني في البوست دا هي مداخلات: الفنان طارق أبوعبيدة عمر الفاروق محمد عبد المطلب
كانت منطقية وعقلانية جداً وبتحس فيها في نفس الوكت قدر شنو أصحاب المداخلات دي بيتعاملوا مع محمود وصوتو بي حب وبيحترموا إرادتو وخصوصيتو والأهم من دا كلو قادرين يتفهموا الـ variation البيطرأ على حالة وصوت محمود ..
يا خوانا ما في زول في الدنيا بيقبل الوصاية بالطريقة الحاصلة دي حتى لو كان محتاج يد العون أو الناس شايفنو ماشي في سكة غلط! ياخ أولادنا الما قاموا من قعر الواطة ما بيقبلوا إننا نتعامل معاهم بي وصاية بي حجة إننا دايرين مصلحتهم !!
| |
|
|
|
|
|
|
|