|
|
 إفطار بورداب الرياض السـنوي ما أحـلاها من لمـة ..
|
مثل كل مره في هذا التوقيت يجتمع بورداب الرياض وأصدقائهم على مائدة شهر رمضان المعظم هذا الشهر الكريم الذي تلتقي فيه القلوب وتتصافي وهذا ديدنهم في كل الشهور ولكن حلاوة الشهر تجعل من اللقاء عظيماً وأجمل ..
جلس الجميع على مائدة الإفطار وتناولوا ما طاب لهم مما صنعت أيدي أسر البورداب ، بعدها قام الجميع لأداء صلاة المغرب ومن ثم إجتمعوا في مجموعات يتسامرون ..
بعدها حضر الأستاذ أحمد يوسف الوزير المفوض بسفارة السودان بالرياض وقبله حضر البوردابي الإستاذ قير تور نائب القنصل بالسفارة برفقة الأستاذ والبوردابي محمد الحسن عبدالمطلب ..
ألقى الأستاذ أحمد يوسف كلمة شكر فيها البورداب وثمن على الجهود الكبيرة التي يقومون بها بورداب الرياض وتحدث عن دور الإنترنت وسودانيز أون لاين بالتحديد في التثقيف ونشر الوعي بين الناس وذكر بأن الهجوم الذي تلقوه من المنبر أعطاهم دفعة قوية للوقوف خلف البسطاء وحل مشاكلهم وضرب الكثير من الأمثلة وطالب الجميع بالعفو والعافية وهو يغادر نهائياً لأرض الوطن بعد عيد الفطر المبارك ..
ومن ثم قام الحضور بأداء صلاة العشاء والتراويح وإعلان ضربة البداية لبرنامج الإفطار هذا العام والتي بدأها الأستاذ محمد الشيخ مقدم البرنامج مرحباً بالحضور وضيوف البورداب ثم تلأ الأستاذ محمود بكر أيٍ من الذكر الحكيم ثم أعقبه الريس أبوجهينة بكلمة ترحيبية متحدثاً عن إفطارات بورداب الرياض وذكر بأن هذا الإفطار هو السابع لهم ..
بعده قدم محمد الشيخ الأستاذ صديق الموج عضو البورد وهو رجل غني عن التعريف وأمثال صديق الموج يجب أن تفتح لهم أبواب قنواتنا الفضائية ليتحدثوا عن التراث السوداني وعن شعر الحقيبة ومغنيها قدمه في إضاءات عن ( الأثر الديني في أغنية الحقيبة ) وتحدث صديق حديث العارف بالحقيبة وأفاض فيها بالشرح الوافي ذاكراً العديد من الأمثلة وفي إنتظار أن يمدنا بحديثه كاملاً هنا في هذه المساحة ..
ثم طلب صديق من الأخ أبوالحسين مداخلة عن شعر الشايقية ونرجوه أن ينزلها هنا كاملة ..
وكان الموضوع الرئيسي لبرنامج الإفطار ( الثقافات السودانية ودورها في وحدة السودان من منظور إجتماعي ) تحدث فيها الدكتور صلاح فرج الله وللذين لا يعرفونه ..
هو من مواليد أم درمان حي الموردة ..
تخرج من جامعة القاهرة فرع الخرطوم ..
حاصل على شهادة الدكتوارة من جامعة القاهرة الأم سنة 1985م ..
دبلوم المعهد العالي للنقد الفني ..
أستاذ بجامعة أعالي النيل ..
أستاذ بالأكاديمية العسكرية العليا ..
له نشاطات أخرى صحفي وباحث ومدرب كرة قدم ..
ذكر الأستاذ صلاح بأن السودان به عدة ثقافات وبدأ متسائلاً لماذا لم تتلاقح كل هذه الثقافات لتشكل وجدان هذا الشعب هذا الوطن السودان قلب إفريقيا أو حسنائها معللاً ذلك أو شبهه بقانون المناطق المقفولة وذكر بريطانيا وإهتمامها بالسودان وقال الحكومات جميعها ساعدت على عدم قيام السوداناوية أو الهوية القومية السودانية وقال الزعيم الأزهري أول من نادى بالتحرير لا التعمير وكانت هذه غلطة كبيرة وقال أنه يحب الأزهري حباً شديداً ولكن السوداناوية التي نادى بها الأستاذ أحمد الطيب زين العابدين لم يعمل بها أحد وراحت مجهوداته أدراج الرياح ..
وقال للهوية معطيات ..
وللقومية معطيات ..
وتحدث عن اللغة والدين والتراث والأماني والأحلام المشتركة وقال كل هذه تشكل قسمات المجتمع السوداني وقال التصالح مع الذات هو حوار أدبي علمي وتمنى للسودان الوحدة والسلام ..
نرجو من الأخوان محمد الشيخ ومحمد عبدالجليل وصلاح شتات مدنا ببعض المقتطفات من حديث الدكتور صلاح فرج الله والبرنامج ..
وكان من المعقبين للدكتور صلاح كل من الأستاذ قير تور والذي تحدث عن الواقع وقال يجب أن نتحدث بشفافية وواقعية وأن لا نجافي المنطق رغم صعوبة الحديث ولكن يجب أن نبلعه لينصلح الحال ..
وتحدث الأستاذ محمد جميل عن ضرورة إحترام الثقافات المتباينة وكذلك تحدث الأستاذ الشاعر عصام عيسي رجب عن الثقافات في الجنوب وفي كل السودان ووجوب معرفتها ودلل على حديث رأس السمكة عند الشلك وحوجتهم لمعرفته كمثقفين وطالب الأستاذ قير بإقامة ندوة مفتوحة لمزيد من النقاش حول هذا الموضوع وأعقبه الأستاذ وليد حبيب بلدو والأستاذ عبدالعزيز أبوعاقلة والأستاذ محمد عبدالجليل والأستاذ محمد إبراهيم والأستاذ خالد المحرب وجميعهم تحدثوا عن دور الثقافات في توحيد الشعوب ..
عذراً إن سقط إسم أحد المتداخلين ..
وقد أدار الأستاذ يوسف السماني جزء كبير من حوار الدكتور صلاح فرج الله بعد أن بدأ بمدخل المناقشة ومزيد من الإضاءات حولها ..
وكان مسك الختام قصيدة للشاعر عصام عيسي رجب ..
وتمنى الجميع مثل هذه اللقاءات وعليه قرر بورداب الرياض إقامة إفطار ثاني لهم يوم الجمعة القادم 17 رمضان 1431هـ الموافق 27 أغسطس 2010م في نفس الإستراحة ( طيبة ) لذلك نرجو من الجميع الحرص على تواجده في مثل هذه اللقاءات والتي يقيمها البورداب لمزيد من التلاقي والتفاكر ..
صور بالكوم - طرف تمبس ..
|
|
 
|
|
|
|
|
|
|
 Re: إفطار بورداب الرياض السـنوي ما أحـلاها من لمـة .. (Re: طارق جبريل)
|
ايها الناس كمرتى لحقت جمل اللمين ودخير
كيمرا جابت سهول البطانه وجابت احست لقطات وكانت من الكيمرات المنافسه
لى كمرة تمبس والباوقه وصلاح غريبه نظيفه اصابتها عين سيدا ماقال تبارك الله
بعد ان استمتعنا بليله البارحه بفطور بورداب الرياض وصورت بها احسن اللقات التى
كان لى فيها مافيها من التعليق عبد القادر على مع الباوقه وصور الفطور
وصورة تمبس بى كمرتو حمزاوى وصديق الموج والاخ قيرتور ما عارف كدا الاسم صاح ولا
غلط يا سعادتك والكسره والملاح واخر انبساط انتهينا من الافطار والندوه الجميله
وركربنا عربيتنا وماشين اهلنا اختنا عفاف ابوحريره اقترحت مع بناتها بان يمشوا
الهرم تلت الليالى اعمل ايه قلنا تم نزلو فى الهرم وقت يا ولد اكسب الزمن امشى
جيب لحم من منفوحه بدل ما انزل السوق الذى لا اطيقه ابدا كان مشين اشترى
حاجه لى رقبتى بشتريها من اول محل بدون مفاصله وبتخارج اى والله المهم مشيت منفوحه
وقفت عربيتى ونزلت لى زبونى البا كستانى الذى عندما يرانى يهش ويبش لانى بشترى منه لحمه
بى الجمله المهم عندما رجعت الى العيال واخذتهم فى طريقى للبيت تذكرت الكيمرا
وطبعا بداية نفتش والعربيه ماشه وبعد ان فقدنا الامل فى التفتيش السريع وقفنا ونزلنا
وقلبنا العربيه فوق تحت لم نجدها فهى اخذت عندما وقفت اشترى اللحم وكان الباب اليمين
غير مؤمن وانا الان كل مره امشى افتش الجلابيه وبراى اقول الجاب الكيمرا لى الجلابيه شنو
الحاجه المؤسفه توجد بها كميه من الصور المهمه
معتصم انا فاتح لى بوست من صباح الرحمن وفارش بى هناك لى كمرتى
| |
|
|
|
|
|
|
|
|
 Re: إفطار بورداب الرياض السـنوي ما أحـلاها من لمـة .. (Re: haroon diyab)
|
هارون دياب يا صاحبي ..
أولاً نبارك ليك رمضان تصوم وتفطر على خير ..
تاني نبارك ليك نقطة دبي 
تحاياك وصلت لبورداب الرياض ..
بعدين صدقني نحن شغالين بصمت ..
عارف دا رمضان السابع يعني مافي بورداب بقدروا يفوتونا ..
أقدمية ساي وخبرة نحن التوب ..
يديك العافية ..
وتحايا لبورداب قطر وللجميع ..
| |
|
|
|
|
|
|
|
|
|
Re: إفطار بورداب الرياض السـنوي ما أحـلاها من لمـة .. (Re: خالد المحرب)
|
حباب الأرباب أبوأحمد ..
الجاتك في كاميرتك سامحتك ..
والله أنا لو فقدت صور ساي في كاميرا بزعل خليهو أفقد الكاميرا في ذات نفسها ..
معليش ربنا يعوضك بأحسن منها ..
أنا كنت بعيد من البورد ويا دوب جيت كتبت بوست الإفطار ..
الشكر للأسرة الكريمة ولأختنا عفاف لحضوركم المميز دوماً ..
ولك مثله أضعاف من الشكر ..
| |
|
|
|
|
|
|
|
|
|
Re: إفطار بورداب الرياض السـنوي ما أحـلاها من لمـة .. (Re: خالد المحرب)
|
الاخ الشفيف معتصم - تحياتي
باغتتنا الأمسية بثرائها وقد هوم بنا الاخ الأديب
صديق الموج تهويمات جسام في فضاءات الحقيبة
رموزها وتأويلاتها البعيدة العاصفة وشروحاته
عبر أبجد هوز حطي كلمنت حتى رأيت الخال حمزاوي
واجما لأول مرة وهو يرى صديقه اللدود صديق وقد
خلا له الجو فغاص غوص من لا يخشى التخطئة .. ثم
كان الأستاذ صلاح فرج الله الذي وجد الحضور مسترخياً
يتوقع كلمتين حول الثقافة تليهما موسيقى وغناء
ليفاجئهم بكلمات مدوية وعميقة وصادقة
تحكي قصة تاريخ السودان عبر العصور والحقب ..
وحركة السكان وصراعاتهم حتى أصبح الوطن على ما
أصبح عليه على طرف جرف هار .. خرج الجميع
وهم راضون تماماً بعد مساء رمضاني معرفي يضيف.
| |
|
|
|
|
|
|
|
|
 Re: إفطار بورداب الرياض السـنوي ما أحـلاها من لمـة .. (Re: طارق جبريل)
|
قهوة بعد الفطور .. عمران في الوسط .. يمينو اسماعيل عباس ومعتصم ومحمد الشيخ ويسارو تمبس .. وشوية كدا من ادريس وشوية كمان من يوسف السماني .. الكلام دا طبعابعد الفطور بي شوية والوكت داك ماف كلام طبعا .. لانو الرؤية لحدت الآن ما اتضحت .. يللا يوسف السماني كان لابس لبس خمسة .. وطرف ليهوب ي كباية بتاعت قهوة من القهوة طبعا بتاعت أم رامي الخطيرة جدا .. ثم سجارة ما بعد الفطور .. وليد حبيب بلدو + سمير صديق البورداب .. ويظهر فوق معلق في الحيطة رامي يوسف السماني  باشمهندس محمد إبراهيم .. بدنكل في سفة ما بعد الفطور شمالو معتصم من مجموعة الشيشة .. وذلك قبل بداية البخبخه ..  إدريس خليفه علم الهدى .. وزير الري لبورداب الرياض .. طبعا (سفة بعد الفطور) دي بتجهجه لو ما كنت (متغدي تقيل)  (عدل بواسطة tmbis on 08-21-2010, 02:02 PM)
| |
|
|
|
|
|
|
|
|
|
Re: إفطار بورداب الرياض السـنوي ما أحـلاها من لمـة .. (Re: محمد عبد الماجد الصايم)
|
اخي العزيز معتصم
رغم ان الافطار لم ينتهي كما تعودنا بطرب الا ان الدكتور صلاح فرج الله اطربنا بحديثه العذب.
اما عمي صديق الموج فادب الحقيبة ادب الويل وفاجا الشباب
بابجد وهوز وثم حطي خلي ناس ايهاب نميري يتلفتوا..
لم يتطرق احد لباسطة المعلم باباكوستا... ان شاء الله ما تنفعكم
المره الجايه حلوا بي قنقليس.....
تعرفت علي القنصل قير تور... رجل جميل ومثقف وبسيط
اتمني ان تكون له فرصة اخري في برنامج كامل.
وتعرفت ايضا علي ابو الحسين...
تتصوروا ما كنت قايل نسيبي ده قيافه كده
بي لسانو الطويل داك
_____________
همسه
طبعا جماعتنا من البركل تحت....
تمبس بالله لز نص الصور لي عمك...
| |
|
|
|
|
|
|
|
|
 Re: إفطار بورداب الرياض السـنوي ما أحـلاها من لمـة .. (Re: داليا الكباشى)
|
لابد من كلمة شكر ..
للأخ أيهاب نميري عضو بورداب الرياض وأصدقائه الذين رافقوه في حضور هذا اليوم ..
وهم يجلسون خلف الساوند سيستم الخاص بالأخ أيهاب ويقتطعون الكثير من وقتهم ..
شكراً أيهاب ..
شكراً جميلاً ..
وكذلك الشكر لأبي الصادق مهدي والذي أحضر معه الساوند سيستم الخاص به ..
شكراً أبوالصادق دائماً حاضر ومشارك بقوة ..
يديك العافية ..
| |
|
|
|
|
|
|
|
|
|
Re: إفطار بورداب الرياض السـنوي ما أحـلاها من لمـة .. (Re: معتصم دفع الله)
|
سلام معتصم....ورمضانكم كريم وجميل وانشالله دايماملمومين بسعاده وهارمونى....
....برنامجكم كان فعلا دسم بالثقافه ...وفاتتنا دى........
بس فعلا اهنئ لجنة البورداب على ابتداع هذا البرنامج المميز ....واللمه السمحه....
بس يا اخوى مزعول من الخير....مالم العزابة مستحوذين كده على الجو والميكروفونات والصور .....وقابضين
حتى على الصفر الرئيسية والكشاتين ؟؟؟وويييين البوردابيات؟؟؟؟
أيامكم والله..........يخوانا اقترح البرنامج الجاي تدوا البنيات نفس معاكم.....(نفس فى البرنامج وأى نفس تانى ترونه مناسبا).
عشان ما نبقي فى "تهميش الأقليات" والكلام الكبارده!!
....اتخيل لي بورداب الرياض اكتسحوا الافطارات....!!
| |
|
|
|
|
|
|
|
|
|
Re: إفطار بورداب الرياض السـنوي ما أحـلاها من لمـة .. (Re: Shiraz Abdelhai)
|
إزيك يا دكتورة شيراز ورمضان كريم ..
وصلتي الرياض ولا لسه هناك في البلد ..
البرنامج فعلاً كان جميل وشيق وفيه حضور مقدر ..
ما كان في تهميش ولا حاجة إنما البرنامج فرض نفسه فقط ..
نحن على الوعد أن يكون قادم البرامج نسائي بوردابي فقط يلا همتكن معانا ..
على فكرة قبل كده عملنا برنامج رمضاني قامن به بنات البورداب وكان أجمل ما يكون ..
وزي المقترحات دي كويسه وجميله وهذا ما نتمناه من الجميع ..
حسب رؤيتنا لهذا اليوم فإننا راضون عنه تماماً ولله الحمد ..
لكِ الود والسلام ..
| |
|
|
|
|
|
|
|
|
|
Re: إفطار بورداب الرياض السـنوي ما أحـلاها من لمـة .. (Re: محمد عمر الفكي)
|
محمد عمر يا حبيب ..
النرد ليك هنا وهناك ..
رمضان كريم تصوم وتفطر على خير ..
والله فطورنا كان زي ( العجب ) فطور مجيه فيه ما لذ وطاب ( كيتاً في طارق جبريل ) ..
نحن عندنا فهم في موضوع الصور دا خصوصاً صورالأكل ..
يعني ناس أمريكا ديلك بضيعوا ساي كان نزلنا ليهم الصور
وشيوخنا تمام التمام أكلوا تمام وإستمتعوا تمام ..
أما شبابنا ما شاء الله عليهم ..
من عمران لا عند تمبس كلو تمام التمام ..
بس قول لي عمران يرسل ليك طعمية من الرياض
غايتو إلا كل يوم تطلبه طلب ..
الورقة دي لزوم تكتيكات معينة ورسم الخطة تقول كروجر ..
إلا مسعول من الخير كروجر دا جايي تاني لي شنو عجبته الملاريا ..
أها نحن دربنا مرق الباقي كلو على ود جبريل دا العامل ليهو فطور في المغرب ..
يديك العافية يا حبيب ..
وسلامك وصل تب ..
البوست بوستيك خد راحتك ..
| |
|
|
|
|
|
|
|
|
|
Re: إفطار بورداب الرياض السـنوي ما أحـلاها من لمـة .. (Re: طارق ميرغني)
|
الحبيب طارق ميرغني ..
سلام ومحبة ..
تصدق نسيت مداخلتك والتي طلبت فيها من صديق يحدثنا أكثر عن الحروف أبجد هوز حطي كلمنت ..
لقد كان اليوم دسم حتى الإشباع إفطار شهي ومادة شيقة أتحفنا بها صديق ودكتور صلاح ..
أما الباسطة كوم تاني لكن ناس تمبس وعمران ضيعوني فيها ساي
شكراً لكل الحاجات الحلوة القاعدين تعملوها لينا ..
قاعدين تدونا جرعات إطمئنان لقادم الأيام ..
يديكم العافية ..
| |
|
|
|
|
|
|
|
|
|
Re: إفطار بورداب الرياض السـنوي ما أحـلاها من لمـة .. (Re: طارق جبريل)
|
ابو عمر (صاحب البوست)
يا اخي معليش ما سلمنا عليك شغلنا النقد الهادق عن تحيتك فمعذرة.
ود جبريل،
تعرف انا من الفيلم دا كله محتار من حاجة واحدة!!! يوسف السماني دا لابس السروال والعراقي ديل لشنو!!!!! مافي حاجة بيلبسوها ليهم اللهم الا اذا كان في "بطان" ولا يكون داير يصارع.
بالمناسبة لحدي هسي لم نرى ما يثبت انه الناس دي اكلت حاجة.
شخصياً اتوقع انه الرد حيكون الصور راحت في كاميرا ود المحرب!!!! الشكية لله ود المحرب دا مو صايم زيكم؟
والله يا طارق جاتك مقشرة
| |
|
|
|
|
|
|
|
|
|
Re: إفطار بورداب الرياض السـنوي ما أحـلاها من لمـة .. (Re: طارق جبريل)
|
دا مفروض يسموه حفل ضياع الكاميرا
وما شاء الله ناسك لياقتهم البدنية في السما لمن يلعبوا في البينغ ؟ غايتو اللعب دا لو بعد الفطور مباشرة يعني واحد من اتنين انه تمبس دا يا فاطر وداكي رمضان عديل يا ما صلى المغرب. شخصياً انا بعد الفطور مباشرة لو قالو لي مد الريموت دا ما بقدر خلي العب بال "بيضة". !!!!
مبروك شايف لي صحن ظهر في الصور، قطع شك الصحن غلطان
| |
|
|
|
|
|
|
|
|
|
Re: إفطار بورداب الرياض السـنوي ما أحـلاها من لمـة .. (Re: محمد عمر الفكي)
|
هيييييييييا عربي انت
ما تشوف ليكـ شغلة غير أكلنا وشرابنا الساكيهو ده
انت شن عرفكـ بالأكل زاتو يا وهم
غاية آماملكـ كان عيشايي بايتي تاكله مع شاي الصباح " مدكِنه في جيبكـ "
اليسمع اكلكم دي يقول ضبحته لينا لامن جيناكـ
ما ياهو حيطكم القصيرة البيكـ الساكن جارو ده ( ان شاء الله ما ينفعكـ )
| Quote: اخ طارق اشكرك شكراً جزيلاً على تعريفي بان مافي الصحن هو باسطة !!!! لانه قدر ما ضربتها ما عرفتها شنو، |
باسطة ؟؟
دي كانوا بحكوها ليكم في قصص النوم بس تعرفه كيف يا عربي انت ؟؟
ما يغشكـ الشايقي الفوق ده يعمل ليكـ فيها رايح وهو سيد الشي زاته
أخير ليكـ يا ود الفكي تتخارج
باقي اليوم ده بفطر بيكـ كان جيت تاني
| |
|
|
|
|
|
|
|
|
|
Re: إفطار بورداب الرياض السـنوي ما أحـلاها من لمـة .. (Re: عمران حسن صالح)
|
بورداب الرياض الما منظور مثليهم
حقيقة كانت الامسية جميلة وممتعة العميان صديق الموج
ادهشني بحديثه الشيق عن الاثر الديني في الحقيبة يعني قال
لعوض بابكر ما براك العوام في بحر الحقيبة
د. صلاح فرج الله كانت محاضته دسمة ومشبعة
الشاعر محمد جميل لم يسعفه الزمن لاكمال مداخلته
وقد وعد بكمالها يوم الجمعة القادم
مداخلات الحضور اثرت اللقاء
النجاح الذي تحقق اغرى لجنتنا الموقرة ان تكرر القاء الجمعة القادم
اخر سطر
يعني ياتمبس بكمرة امريكا دي ما عندي في المهرجان ده ولا صورة
| |
|
|
|
|
|
|
| |
معتصم دفع الله
طارق جبريل
خالد المحرب
haroon diyab
Mohamed Abdelgaleel
tmbis
محمد عبد الماجد الصايم
الحارث سرالختم عبد الله
خدر
Kostawi
الفاتح الجنيد
محمد عمر الفكي
عمران حسن صالح
د.محمد حسن
MOHAMMED ELSHEIKH
Osman Musa
داليا الكباشى
Shiraz Abdelhai
ادريس خليفة علم الهدي
محمد علي شقدي
انعام حيمورة
فيس بوك
تويتر
انستقرام
يوتيوب
بنتيريست