|
ما المغزى من منع الشيشة في الخرطوم
|
كنا جلوساً في إحدى مقاهي الخرطوم هذا المساء ، فإذا بفرقة يقودها ملازم شرطة وتتكون من حوالي العشرة أفراد شرطة تداهم المكان باحثة عن (شيش) جمع شيشة .. وحيث أنه لم يكن هناك من يتعاطى الشيشة في ذلك المكان (عملاً بالمنشور الصادر مؤخراً من الولاية ) إلا أن الفرقة واصلت البحث حتى في مخزن المقهى وقاموا بجمع كل الشيش مع ملحقاتها وقاموا بإصطحاب صاحب المقهى إلى مقر شرطة النظام العام والذي خرج بضامن فيما بعد على أن يأت غداً صباحاً لإتمام الإجراءات والتي غالباً ما ستكون غرامة ما ..
المداهمة في حد ذاتها حدثت بشكل فيه من الإثارة ما فيه( بعضهم كان يحمل المدافع الرشاشة) ومن الرعونة في معاملة العمال في ذلك المحل بل وحتى صاحب المحل والذي تم إقتياده بشكل فيه من الإهانة ما فيه
هذا ما حدث
والآن إلى بعض التساؤلات ..
|
|
|
|
|
|
|
|
Re: ما المغزى من منع الشيشة في الخرطوم (Re: قلقو)
|
يا قلقو .. ياخي طيب دي مش أجوبة تخوف وتحزن كمان ؟
Quote: القرار غير حكومى بل هو قرار المتربع على كرسى رئآسة مؤسسة (شئون التقديس) بالسودان المدعو عبدالحى يوسف وذلك عندما افتتح عمر البشير (مسجد الضرار الأستثمارى) الذى (يملكه) الأول . |
طيب دي مشكله .. المد العاطفي المتجدد في العلاقة البين الحكومة وناس عبدالحي يوسف دي مش قصه تخلي الواحد يقلق ؟ والقلق ما مبعثوا الشيشه بس ( لانو خرمتنا خلي رمضان ده يخلص بنعرف وين نحلها) والمشكله مافي التمباك (ما تشيل هم) القصه في الصومال الجاي عدييل بالدرب ده وجاي بي سكة ناس عبدالحي ديل زاتهم ..
الله يستر
شكراً يا قلقو على المرور
| |
|
|
|
|
|
|
Re: ما المغزى من منع الشيشة في الخرطوم (Re: حاتم كاهن)
|
سلامات يا حاتم دائما بتخيل في زول في مكان ما .. هناااك خلف الكواليس .. يظهر حبه لحكومة البشير ويضمر في صدره غير ذلك هذا (الزول) يوعز للرئيس ولصناع القرار بمثل هذه الأفكار التي تزيد من كراهية الحكومة .. وتجعل الغالبية العظمى تكرهها .. أقول ليك حاجة .. خلي الشيشة وما فيها وما عليها من إحتمال الإصابة بمرض أو أي آثار ضارة مترتبة عليها أول أمس القريبة دي .. في شارع النيل .. حيث لا شيشة ولا يحزنون .. شارع النيل البقى المتنفس الوحيد لإستنشاق بعض الهواء النقي لكل الشباب في الخرطوم .. اول امس جات كشة تتكون من تلاتة دفارات وزي 30 عسكري لابسين رسمي و50 لا بسين ملكي أها الجماعة اللابسين ملكي ديل ماشين قدااام .. قايدين الركب .. نظام كشافة وكدة .. عشان النسوان المساكين والأدروبات ديل ما يمشوا يدسوا كراسيهم ورا شدر العشر .. .. والله يا حاتم هؤلاء الهمج إتعاملوا مع النسوان بأبشع صور الفظاظة والجلف والرعونة تكسير للكبابي وآنية تحضير الشاي بكل قسوة وتجرد من الإنسانية وأبسط صور الرحمة .. كان منظر مؤسف بشكل ما تتخيلو .. ونحن طبعا !! أنسى بس بي أضان نسمع في نحيب النسوان المساكين ديل .. وبالتانية نسمع صوت تكسير الكبابي الله عليك يا وطن اجزم بأن شارع النيل اليوم داك كان فيهو أكثر من ألف شاب او يفوقون .. لو كان قمنا على مجموعة الصعاليك دي وأدبناها ما كان ده حالنا .. لكن هي حالة الخنوع .. الشعب السوداني بقى خانع .. قرّررررب يفقد المروة .. بس نقول شنو !! يالله لوتري وللا هجرة ,, وللا أي حاجة
أتوقع بعد الأنفصال أن يتم الآتي : 1. لعب كرة القدم بالناطلين بدل الشورتات 2. توحيد الزي الجامعي للطالبات (عباية وطرحة تغطي الرأس بإحكام) 3. نزع جميع ميادين كرة القدم ذات النجيل الصناعي والتي غزت الخرطوم وتحويلها لخلاوي تحفيظ القرآن 4. 5. 6. 7. 8. إلخ .. إلخ
| |
|
|
|
|
|
|
Re: ما المغزى من منع الشيشة في الخرطوم (Re: قلقو)
|
Quote: يمكن اعتبروها من (آلات) الشروع فى الزنا. |
لو علي كدا ... مفروض يقبضوا اي راجل حايم في الشارع
لانو اي راجل شايل اداة زنا معاهو !!!!!
الناس ديل يا قلقو الله يدينا خيرهم ....
مره انا في امتداد ناصر في محل شيشة (دكان عادي) .. الراجل شاف الكومر جاي من بعيد
علي الايمان .. و لاااا اتلفت قام طابلنا ليك بي جوه و اتخارج ... جانا بعد ساعة
لكين مش لو طبلونا... لو دقونا عدييييل كدا ما بنخليها
| |
|
|
|
|
|
|
Re: ما المغزى من منع الشيشة في الخرطوم (Re: ناذر محمد الخليفة)
|
سلام يا ناذر
Quote: الكلام دي في شارع واحد وأربعين يا كاهن مش كدة ؟؟!! |
لا لا مافي واحد واربعين .. بس برضو في نفس المنطقة .. امبارح كان مركزين شديد على الحته ديك .. لكن تعرف بقينا نشتغل بالتلفونات .. يقولو لينا الليله ناس فلان شغالين .. نقوم نمش .. يجو يكشوهو نمش لي غيرهم وهكذا دواليك .. الجهجه دي كلها في شان شيشه .. إتخيل ؟؟
| |
|
|
|
|
|
|
Re: ما المغزى من منع الشيشة في الخرطوم (Re: ناصر احمد الامين)
|
Quote: لكين مش لو طبلونا... لو دقونا عدييييل كدا ما بنخليها |
ما بنخليها والله .. عارف يا ناصر .. انا سؤالي عن البدايل ما ساي والله .. لانو امبارح دي أنا سمعت إنو في ناس بدت فعلاً في إنها تجهز بيوت وشقق للشيش .. إتخيل ؟؟ وهسي في ذمتك يا ناصر .. لو القصة وصلت الشقق حتقيف على الشيشه المسكينه دي .. طبعاً لأ .. طيب كان في ليهو لزوم من الأول ؟
| |
|
|
|
|
|
|
Re: ما المغزى من منع الشيشة في الخرطوم (Re: محمد عبد الماجد الصايم)
|
ود الصايم يا صاحب
والله بلد تمحن .. عاين ارسل ليك ال CV وتجيبني الرياض ولا كيف ؟
ياخي السعودية فيها شيشة قالو .. !! طيب يعني دايرننا نبقى اشفت من الشفوت ولا شنو ؟
غايتو يا ودالصايم .. احمد الله الراحمك من جنس المغسه النحنا فيها دي .. والله لو حضرت بس كيف الناس دي قاعده تتداهم وانت بس قاعد تتفرج .. كان هضربت زي هضربتنا الهسي دي ..
بلد ساي ياخي
| |
|
|
|
|
|
|
Re: ما المغزى من منع الشيشة في الخرطوم (Re: ناصر احمد الامين)
|
ناصر سلامات
Quote: مره ناس النظام ديل لقوا واحد صاحبي قاعد في حديقة عامة و شايل لاب توب، صادروهو منو ... قالو اشتباه في وجود حاجات خليعة |
عليك الله البحصل في البلد ده طبيعي ما كاميرا خفيه يعني مثلاً ؟؟
Quote: يا رب بي فضل هذا الشهر الكريم .. اذا كانت تصرفات الجماعة ديل صحيحة .. فأهدنا و وفقنا للتوبه و العمل الصالح و اذا كان دا قمع و ذل لي شعب ما ناقص .. اللهم لا تقبضهم اليك الا بعد ان تريهيم احساس الذل و الهوان في الدنيا قبل الاخره |
آمين يا ناصر وازيد إنو ربنا يجعلنا شهود على اليوم الحيذيقهم فيهو نفس الذل والهوان البسقونا ليهو ده ..
شكراً يا ناصر على المرور
| |
|
|
|
|
|
|
Re: ما المغزى من منع الشيشة في الخرطوم (Re: محمد عمر جبريل)
|
محمد عمر حمدالله على السلامة ..
سمعت والله بالحصل في شارع النيل والبتقري برضو على خلفية قصة الشيشة مش كده بس وحتى الحصل في بيت الفنون .. ده كلو ما بمعزل عن كلام قالو عمر البشير قريب إظنو برضو يوم افتتاح الجامع داك إنو فيما معناه حيزيد التركيز على عمل النظام العام ..
والبعد الانفصال أسوأ يا عزيزي ..
ولوتري مافي ليك يا حبيب اقعد بس اتغبن معانا هنا ده .. يا غبننا ده جاب نتيجة .. يا متنا شهداء للمغسه
| |
|
|
|
|
|
|
Re: ما المغزى من منع الشيشة في الخرطوم (Re: وجدان جمال)
|
** حاتم .. ** مساءك خير ورمضان كريم.. ## لو الواحد متوضئ وعمل للشيشه حجاب وشغل شريط قرآن ,, وكبر وهلل مع كل نفس هل يعتبر آثم أم ذلك فى ميزان حسنات النظام اللاعام ؟؟ (ودام الود بين الجميع وأراحنا من همبتة النظام العام) (ابو محمد فؤاد) - الماكيكى..
| |
|
|
|
|
|
|
Re: ما المغزى من منع الشيشة في الخرطوم (Re: moaz elsir)
|
Moaz Elsir رمضان كريم يا حبيب
Quote: فى اعتقادي الخاص ان منع تداول الشيشة خاصة فى نوادي الاحياء ، الهدف منه هو مكافحة المخدرات. |
ده الإعتقاد العام يا عزيزي ، لكن الجاب الشيشة للمخدرات شنو ؟ ده قد يقودنا لي (لخبتة الشيشة مع البانقو أو غيرو) ، وهنا مفروض نتفق على إنفاء أساس (اللخبته) من حيثيات قضية المخدرات أو المواصلة في إصطحاب الأساس ده إلى ما هو أكثر زي : السجائر مثلاً وورق البرنسيس وقائمة تطول من أشياء تصلح (للخبته) مع البنقو .. وزي ما قال أستاذنا طارق الأمين إنو ممكن البيبسي برضو يتمنع لأنو ممكن شخص يرى فيهو ماده مناسبة لأن تخلط مع العرقي !!
مش البلد فيها مباحث ؟ طيب ما يرصدو المحلات البتخلط البنقو مع معسلنا ده وتسن عقوبات أشد والقيام بحملات تفتيش مكثفة من حين لآخر ... المانع شنو ؟ حجة إنو القرار فيه درء لإنتشار المخدرات ، كلام ما سليم .. لأنو زي ما كلنا متفقين إنو الناس ما حتبطل الشيشة وحتمشي تكوسها بدل في العلن ، حتبدا تكوسها في العالم التحت .. في الشقق.. في الجمبات .. والجخانين .. والعالم التحت لمن يشتغل يا حبيب .. ما عندو سقف .. يعني (اللخبته) الخايفين منها دي يا داب اللقت مرتع للبرطعه..
والله يستر
شكراً على المرور والمشاركه
كاهن
| |
|
|
|
|
|
|
Re: ما المغزى من منع الشيشة في الخرطوم (Re: عبد القادر حسن الحبيب)
|
الحبيب عبدالقادر الحبيب
Quote: ونقول الآن إن الوالي بقراره هذا يقود مدخني الشيشة للتدخين داخل منازلهم فتتعاظم الاخطار التي يخشى منها السيد الوالي من تدخينها خارج منازلهم. ومن هذا المنبر فإننا ( جماعة مدخني الشيشة بالخرطوم) ندعو السيد الوالي للعدول عن قراره، ودراسة الموضوع بشكل أعمق وبدون استعجال وعواطف وتشنجات قد تقود الشباب لانحرافات اكبر مما يتصوره السيد الوالي ويبرر له. |
ده الكلام .. بس البسمع منو ؟
شكراً على المرور
| |
|
|
|
|
|
|
Re: ما المغزى من منع الشيشة في الخرطوم (Re: حاتم كاهن)
|
حاتم رمضان كريم محلات الشيشه والمقاهي دي كانت شغاله عادي وبتدفع رسوم وبتصدق سنويا ومعظم المحلات دي حاليا عندها ترخيص من الحكومه الما قادر أفهمو أنا طالما الحكومة ما عندها إعتراض على الشيشه ومافي قانون بيمنعه بيبقى مافي مبرر يخلي الوالي يطلع منشور ينمع الشيشه والمبررات البتتقال زي إنو في ناس بيعملو في الشيشه ينقو دي مبررات فطيره يعني لو في ناس بقو يختو حبوب مخدره في العصير في المحلات حيمنعو العصاير في المحلات !! الشيشه دي كان حرام أو ممنوعه مفروض يمنعه القانون عديل وكان بيخلطو فيها بنقو دا شغل ناس مباحث يقبضو الزول البيعمل كدا وبدلايلهم ويحاكموهو وتفضل محلات الشيشه شغاله لكن منشور الوالي دا إسمو منشور كوز رمضان إستفزاهو وعاودو الحنين للوهمه القديمه
| |
|
|
|
|
|
|
Re: ما المغزى من منع الشيشة في الخرطوم (Re: مرتضى احمد عبد القادر)
|
مرتضى تصوم وتفطر على خير
Quote: الما قادر أفهمو أنا طالما الحكومة ما عندها إعتراض على الشيشه ومافي قانون بيمنعه بيبقى مافي مبرر يخلي الوالي يطلع منشور |
عارف يا مورتا أمبارح بعد ما اطلقوا سراح صاحب المحل بي ضمان ، حكى لي قال إنو قبل سنتين مره برضو عملو كشات زي دي وجابوهو للقاضي قال لي سالتو قلت ليهو يا مولانا إنت الشيشة دي حرام أو ضد قوانين الدوله ؟ عشان اذا كده حقو نحنا نبطل القصه دي .. فكان رد القاضي : يا زول شيل ورقك ده واطلع من هنا ....!!!
إتخيل .. يعني رد زاتو ما كان عندو ..
الله يجازي الكان السبب
شكراً مرتضى على المرور
| |
|
|
|
|
|
|
Re: ما المغزى من منع الشيشة في الخرطوم (Re: حاتم كاهن)
|
أين كان أصحاب " الكلاشن " عند غزوة أم درمان ؟
هذا عمل استخباراتي لشغل الناس من الأزمة السمتحكمة التي صنعها النظام الشمولي وبرنامج الإسلاميين في السلطة ،
هؤلاء ضد الحريات
قل لي دولة دينية تهتم بالحريات ! والتحية لصاحب الملف
| |
|
|
|
|
|
|
Re: ما المغزى من منع الشيشة في الخرطوم (Re: عادل سمير)
|
سلام يا حاتم...
ما تحكون عنه مؤلم ,,, وكلمات محمد عمر جبريل تكاد تكون هى الفكرة الغالبة,, والألم بعينه لمن يفكر فيما حدث مؤخرا فى بيت الفنون وغيره..
الخنوع والهروب!!
والمرعب تماما هو إحتمالات العودة للمربع الأول والمدعم بتخريجات الشيخ عبدالحى!! أين وصلت تلك القضية المتهم فيها إبنه بالمناسبة!!! قضية التفجيرات تلك وبعدها قضية إغتيال غرانفيل ما هى سوى مقدمات لما يمكن أن تتجه نحوه الأمور إذا لم يوجد الحل سريعا!!!
| |
|
|
|
|
|
|
Re: ما المغزى من منع الشيشة في الخرطوم (Re: أيمن الطيب)
|
بإسم النظام والدين يهاجمون نسوة ورجال يتكسبون من مهن شريفة يمارسونها فى العلن ويدفعون ضريبة أعمالهم من عرق جباههم وأفواه تنتظرهم لتأكل وتشرب تحتاج لكراسات وأقلام !!
كلنا يعلم أن الخرطوم يحدث فيها ما يحدث من فساد وإفساد بكل ألوانه وأشكاله وكلنا يعلم أنهم يزيدون معدلات القبح فينا بوتيرة عالية ولكن ما يحير أن لا أحد يحاول العلاج الصحيح وكل نيران حقدهم موجهة نحو البسطاء وأصحاب الأعمال الصغيرة!!!
وحوش النظام العام الأشاوس يتلذذون بمذلة المواطنين وسرقة أغراضهم وهتك أعراضهم لأنهم فى نظرهم مستباحو العرض والمال لأنهم مجرمين فى نظرهم أيضا !!!!
يذكرونى هؤلاء المعوقين أخلاقيا بلعب الأطفال التى تعبأ ب(الزمبلك) تُملأ وتطلق لتفنجط حتى تفرغ التعبئة!!!
| |
|
|
|
|
|
|
Re: ما المغزى من منع الشيشة في الخرطوم (Re: أيمن الطيب)
|
أيمن يا حبيب
- إبن عبدالحي ( قصة التفاوض) - قتلة قرانفيل (الهروب) - زيارة أحد قادة إحدي التيارات السلفية السودان ومقابلته كبار المسؤولين - حديث سوارالدهب (إشارته إلى أن السودان قد يصبح مأوى للإرهاب) - الخلايا النائمة - بيت الفنون (المداهمة) - الشيشة (بعد همس مع الرئيس) - لافتات لحزب التحرير ترى في الإنفصال (جريمة)
وعناوين أخرى أكثر لا تشي إلا بما هو أسود ، فقط علينا أن نختزل في هوامش المتوقع عندنا ما هو قادم فقط درءاً للدهشة .. وتهيئاً للزوال ..
دمت يا حبيب كاهن
| |
|
|
|
|
|
|
Re: ما المغزى من منع الشيشة في الخرطوم (Re: حاتم كاهن)
|
كاهن يا عزيز..
ياخ الناس ديل ما يوجهو جهودهم دى نحو البنقو والمخدرات التى تهلك الشباب وأصبحت حديث الشارع !!!أولاد وبنات هايمين فى الفراغ العريض ويخافون مواجهة الناس والضوء كالخفافيش و يعيشون أيامهم فى ملكوت السطلى والسرحان فى إنتظار أن يأتى الحل من السماء,,,
بلد تتمزق أمام أعين العالم وليس من وجيع سوى أهلها المغلوبين على أمرهم,, وصل الفساد فيها لدرجة لا يعلمها إلا الله سبحانه وتعالى وساستها مبلغ همهم كنز الأموال و اللهث وراء العمولات والصفقات المشبوهة,,,
شيشة شنو وشيشة منو يا كاهن!!! أخبار البلد بقت مليانة بروائح الشيشة وأخبارها!! لاحول ولا قوة إلا بالله,,القصة أكبر من كدا,, المهم عندهم إنك بس تتروض وتبقى جاهز وتنتظر مفاجآت يوم باكر,,تست ون يا مان,,,
وخلى ناصر الأمين يحكى ليك لما فجأة لقوا نفسهم محاوطين بالنظام العام والعساكر والأسلحة وعالم تتقافز من الحيطان وجنازير وعكاكيز وأطواق وضرب بتشفى وحقارة لكل من يقف أمامهم وكل القصة لمة أسرية فى عيد ميلاد طفلة في بيت إنسان وقلم يحترمه العالم والديبلوماسة عليه رحمة الله,,,
| |
|
|
|
|
|
|
Re: ما المغزى من منع الشيشة في الخرطوم (Re: أيمن الطيب)
|
أيمن يا حبيب
والقادم اسوأ .. فالمقدمات لا تنفصل عن النتائج وما يحدث اليوم سواءً تخبطاً كان أم بوعيٍٍ ممن يقودون هذا الوطن إلى العدم .. إلا أنه ليس لا .. مقدمات .. ما ستأتي به الأيام يا صديقي - طالما هابيل ما أرعوى - لهو أحلك وأمر ..
الحل : الثأر
كاهن
| |
|
|
|
|
|
|
Re: ما المغزى من منع الشيشة في الخرطوم (Re: أيمن الطيب)
|
Quote: ياخ الناس ديل ما يوجهو جهودهم دى نحو البنقو والمخدرات التى تهلك الشباب وأصبحت حديث الشارع !!!أولاد وبنات هايمين فى الفراغ العريض ويخافون مواجهة الناس والضوء كالخفافيش |
دا الكلام المؤلم يا ايمن
Quote: وخلى ناصر الأمين يحكى ليك لما فجأة لقوا نفسهم محاوطين بالنظام العام والعساكر والأسلحة |
خليها في سرك يا حبيب ...
بالمناسبة : في معسل جديد بي نكهة الفياغرا في زول جربو ؟؟؟
| |
|
|
|
|
|
|
Re: ما المغزى من منع الشيشة في الخرطوم (Re: حاتم كاهن)
|
مره كنا بنشيش في شارع واحد، و كان معانا بنات زميلاتنا، واحده منهم بتشيش، فجأه جا كومر ونزلوا منه عساكر بي عصايات و (انتشروا) زي التقول مداهمين ليهم وكر عصابة ... و الله ما فاضل الا يجيبو معاهم ال###### البوليسي.
البت المعانا ..براااحة ادت الشيشة لي الولد الجنبها
بقي داك ماسك شيشتين ... واحده في الشمال و التانية في اليمين
العساكر ديل دخلوا جوه و مرقوا البنات دفير و لزلزة و شتايم .. و رفعوهم في الكومر
و صاحبي قاعد بين الشيشتين .. ماسكهم و بتلفت. البت طلعت ليها لبانة و لاكتها عشان تغير ريحة الشيشة
واحد عسكري شاف المنظر .. جا لي صاحبنا (ابو شيشتين) قال ليهو الشيشة التانية دي حقت منو؟ طبعا قال ليهو بتاعة صاحبي في الحمام، العسكري (نظر شزرا) و فرتق ...... حمدنا الله.
انا كنت مشغول بي منظر البنات الفي الكومر .. و منظر العار و الخيبة واضح في وشهم، متغطيات و مدمدمات زي التقول قبضوهم في بيت دعاره، كل واحده فيهم بتفكر تقول لي اهلها شنو ... لو طلع العساكر ديل اولاد ناس و فتحوا ليهم بلاغ !!!
لانو لو ما اتفتح بلاغ .. و طلعوهم كدا ساكت (بعد حين) .............. اكيد كانت هنالك بعض المفاوضات و شروط للتنازل و درء الفضيحة
| |
|
|
|
|
|
|
Re: ما المغزى من منع الشيشة في الخرطوم (Re: أيمن الطيب)
|
كتب ناصر احمد الامين:
Quote: مره كنا بنشيش في شارع واحد، و كان معانا بنات زميلاتنا، واحده منهم بتشيش، فجأه جا كومر ونزلوا منه عساكر بي عصايات و (انتشروا) زي التقول مداهمين ليهم وكر عصابة ... و الله ما فاضل الا يجيبو معاهم ال###### البوليسي.
البت المعانا ..براااحة ادت الشيشة لي الولد الجنبها
بقي داك ماسك شيشتين ... واحده في الشمال و التانية في اليمين
العساكر ديل دخلوا جوه و مرقوا البنات دفير و لزلزة و شتايم .. و رفعوهم في الكومر
و صاحبي قاعد بين الشيشتين .. ماسكهم و بتلفت. البت طلعت ليها لبانة و لاكتها عشان تغير ريحة الشيشة
واحد عسكري شاف المنظر .. جا لي صاحبنا (ابو شيشتين) قال ليهو الشيشة التانية دي حقت منو؟ طبعا قال ليهو بتاعة صاحبي في الحمام، العسكري (نظر شزرا) و فرتق ...... حمدنا الله.
انا كنت مشغول بي منظر البنات الفي الكومر .. و منظر العار و الخيبة واضح في وشهم، متغطيات و مدمدمات زي التقول قبضوهم في بيت دعاره، كل واحده فيهم بتفكر تقول لي اهلها شنو ... لو طلع العساكر ديل اولاد ناس و فتحوا ليهم بلاغ !!!
لانو لو ما اتفتح بلاغ .. و طلعوهم كدا ساكت (بعد حين) .............. اكيد كانت هنالك بعض المفاوضات و شروط للتنازل و درء الفضيحة |
يا والي الخرطوم اسع في داعي للكلام ده،يا جماعة ما تخلو الناس في حالة، وربك كفيل بافعاله.
| |
|
|
|
|
|
|
Re: ما المغزى من منع الشيشة في الخرطوم (Re: هايل زين)
|
Quote: كاهن... رمضـان كريم... حجة السلطات أن (بعض) رواد مقاهى الشيشة بيلخبطوا (البنقو) مع المعسل ! عشان كـدا القرار طلع بحظر الشيشة فى الأماكن العامة . |
'طيب انا سمعت انو في ناس بلخبتوالعرقي مع البيبسي
اقترح عليه اغلاق مصانع البيبسي
منعا للرزيله
وكده
| |
|
|
|
|
|
|
Re: ما المغزى من منع الشيشة في الخرطوم (Re: Abdulrahman Gorashi)
|
الحبيب عبدالرحمن قرشي شاكر مرورك
Quote: ياشباب انتو منع الشيشه دى بس لزوم رمضان ولا المنع دا الا ان يبعثون؟ |
ما عارف والله يا عبدالرحمن ، بس بستبعد إنو يكون لزوم رمضان وإذا كان لفتح ذلك باباً أوسع للتساؤل .. فالراجح لحدي الان (يبعثون) .. والايام دي مقدمات لما هو .. أكبر ...
ربنا يكضب الشينه
كاهن
| |
|
|
|
|
|
|
Re: ما المغزى من منع الشيشة في الخرطوم (Re: حاتم كاهن)
|
حاتم كاهن والمجموعة تحياتي يا شباب وتصوموا وتفطروا علي خير
طبعآ بقرأ في البوست ده غير مصدق حتي منع الشيشة ده بسمعوا ومرة نقلت ليه موضوع لكن ما قريته لكن والله ربنا يكون في عونكم إمكن ده أكتر بوست في المنبر يديني معلومات موثقة ومؤكدة للوضع في السودان عشان كده أنا حا أعيد حساباتي تاني بالنسبة للرجوع نهائيا للسودان تسلموا يا شباب وما تستاهلوا والله
| |
|
|
|
|
|
|
Re: ما المغزى من منع الشيشة في الخرطوم (Re: ASHRAF MUSTAFA)
|
أشرف مصطفى كل سنة وانت طيب يا حبيب وتصوم وتفطر على خير
Quote: عشان كده أنا حا أعيد حساباتي تاني بالنسبة للرجوع نهائيا للسودان |
لا لا يا أشرف ما تعيد حساباتك ، البلد دي بي الحال الحرن ده محتاجه لي إنو الناس ترجع .. أقلاها ياخي عشان نتشارك الهم ده .. مش كده بس .. السودان .. بعيداً عن قصة الشيشه دي .. قاعد يمر بي منعطف تاريخي وأحداث حتنتج واقع ما مر على تاريخنا قبال كده .. تعالو ياخ .. وخلو الحيبقى علينا نحنا (الشعب السوداني الفضل ) يبقى علينا كلنا ..
كل الود كاهن
| |
|
|
|
|
|
|
Re: ما المغزى من منع الشيشة في الخرطوم (Re: سيف اليزل برعي البدوي)
|
أخوي سيف اليزل رمضان كريم
Quote: معا ضد تقييد الحريات
ولكن التدخين ضار بالصحة
|
بس قصتنا هي تقييد الحريات دي يا سيف .. والتدخين فعلاً ضار ونسأل الله إنو يهدينا .. وأنا حاتم ده ما ببمانع لو إنو التدخين يتمنع في الاماكن العامه بأمر من الدوله (وده ما حاصل).. أو إنو يكون في إتجاه عام للدولة للمحافظة على صحة المواطنين من التدخين السلبي وكل ما يضر البيئة مثلاً(وده ما حاصل) .. أو تسن عقوبات للمدخنين تحت السن القانونية تطال حتى أصحاب المحلات ومن يقبض متلبساً ببيع (السجائر مثلاً) لقاصر.. كده بكون ده إتجاه عام دون ممارسة وصاية على الناضجين الما محتاجين لي وصاية .. بس أنا الزول الواعي ده ما داير جهة تحجر علي حرياتي الخاصة إذا ما إتعدت على حريات آخرين ..
كامل ودي
كاهن
| |
|
|
|
|
|
|
Re: ما المغزى من منع الشيشة في الخرطوم (Re: حاتم كاهن)
|
الحبيب حاتم كاهن سلامات واتـمنى لك موفور الصحة والعافية
Quote: والتدخين فعلاً ضار ونسأل الله إنو يهدينا .. |
هل يستطيع المرء أن يضمن أن لا تصيبه مصيبة من أضرار التدخين قبل أن يهديه الله ؟ أليس عين العقل الإقلاع عن التدخين فورا طالما به ضرر على صحة الإنسان ولو بنسبة 1% ؟ اؤيدك في باقي ما تفضلت ذكره حول ضرورة منع التدخين في الأماكن العامة منعا باتا حفاظ على أرواح الشباب أمثالكم الذين نحسبهم ذخرا للوطن في الارتقاء به نحو التقدم والنماء.
تحياتي ومودتي
جعفر عبدالرحمن
| |
|
|
|
|
|
|
Re: ما المغزى من منع الشيشة في الخرطوم (Re: Gaafar Ismail)
|
الحبيب جعفر عبدالرحمن أشكرك عزيزي الفاضل على المرور
Quote: هل يستطيع المرء أن يضمن أن لا تصيبه مصيبة من أضرار التدخين قبل أن يهديه الله ؟ أليس عين العقل الإقلاع عن التدخين فورا طالما به ضرر على صحة الإنسان ولو بنسبة 1% ؟ |
بصالح دعائكم نرجو من الله القبول والاستجابة وان يكتب لنا هداية قبل الأذى ..
ودي واحترامي وتقديري
كاهن
| |
|
|
|
|
|
|
Re: ما المغزى من منع الشيشة في الخرطوم (Re: عادل سمير)
|
أخي عادل سمير
Quote: أذكر في حوالي عام 1989 بعد الإنقاذ صدر قانون محلي في الخرطوم إسمه " قانون منع الشيشة في العاصمة
القومية" !! و قد الغي هذا القانون لاحقا..!! يعني المسألة دي من زمـــــااااان..!! |
فعلاً من زماااان .. بس الكان قديم ده .. الجابو شنو تاني ؟ ما ياهو الهم يا عادل إنو القديم يرجع .. والجرح يتجدد ..
| |
|
|
|
|
|
|
Re: ما المغزى من منع الشيشة في الخرطوم (Re: حاتم كاهن)
|
Quote: هل إذا في الأمر حرمة مثلاً لما لا يمنع تصنيع وإستيراد السجائر أيضاً أو إغلاق محلات التمباك ؟ |
تدخين الشيشة يا حاتم كاهن ... غير الحرمة التى تخرج صاحبها من المِلّة ... فهى جريمة خطيرة على المجتمع والأمن العام ... لأن تقتل روحاً أو تنهب أو تسرق أو تختلس بنكاً أو شركةً أو وزارة ... أهون عند الله ألف مرّة من أن "تجرّ ليك نفس" ....
وتخزين الشيش غير المستخدمة يعتبر ضرب من ضروب الخيانة العظمى ... ولذا يتوجّب - لو لاحظت - استخدام الرشاشات ... (مع الإعتذار للهلالاب) ...
... المهم ....
| |
|
|
|
|
|
|
Re: ما المغزى من منع الشيشة في الخرطوم (Re: تبارك شيخ الدين جبريل)
|
تبارك رمضان كريم
Quote: تدخين الشيشة يا حاتم كاهن ... غير الحرمة التى تخرج صاحبها من المِلّة ... فهى جريمة خطيرة على المجتمع والأمن العام ... لأن تقتل روحاً أو تنهب أو تسرق أو تختلس بنكاً أو شركةً أو وزارة ... أهون عند الله ألف مرّة من أن "تجرّ ليك نفس" .... |
يعني البركة في الجاتنا لحدي هسي (المنع الساي ده ).. غايتو قدر أخف من قدر ..
Quote: ولذا يتوجّب - لو لاحظت - استخدام الرشاشات ... (مع الإعتذار للهلالاب) ...
|
نحنا فعلاً رشاشات لكن والله البشايفنو هنا ده ياخي طلعتو ظالمننا ساي .. طلعنا غلابه يا تبارك
تتبارك على المرور يا حبيب
| |
|
|
|
|
|
|
Re: ما المغزى من منع الشيشة في الخرطوم (Re: معاوية عبيد الصائم)
|
فردة جناحي التاني معاوية
Quote: تيب مش فى المريخ ؟ تانى شنو |
أهو قوووووول كده وقامو شطبو طارق مختار ووارقو .. وحالهم إنصلح .. نحنا نعمل شنو تاني ؟ نتلفت ولا كيف ؟ ياخي الليله لو الحكم بس كان طرد ليهم زول تاني كان غلبو عدييل .. وكان بقى علينا المثل : لا شيشة لا مريخ .. اقعد وآكل فسيخ ..
او اي حاجه زي دي
كاهن
| |
|
|
|
|
|
|
Re: ما المغزى من منع الشيشة في الخرطوم (Re: معاوية عبيد الصائم)
|
Quote: غايتو قدر أخف من قدر .. |
ما شايف سيف اليزل برعى قال ليك عَسَى أَن تَكْرَهُواْ شَيْئًا وَهُوَ شَرٌّ لَّكُمْ وَعَسَى أَن تُحِبُّواْ شَيْئًا وَهُوَ شَرٌّ لَّكُمْ وَاللَّهُ يَعْلَمُ وَأَنتُمْ لاَ تَعْلَمُونَ ... يعنى كدا كدا انت الخسران ...
وبالمناسبة حا يمنعوا سكاكين المطبخ والسبغة وامواس الحلاقة والأسبرو والتيار الكهربائى ... وكل احتمالات الإنتحار البطئ أو السريع حفاظاً على سلامة المواطنين ... وبالرشاشات ....
... المهم ....
| |
|
|
|
|
|
|
Re: ما المغزى من منع الشيشة في الخرطوم (Re: تبارك شيخ الدين جبريل)
|
تبارك غايتو هممتني زياده على الهم المالينا .. أبداً ما خففت
Quote: وبالمناسبة حا يمنعوا سكاكين المطبخ والسبغة وامواس الحلاقة والأسبرو والتيار الكهربائى وكل احتمالات الإنتحار البطئ أو السريع |
جيت للمهم شفت نحنا ما تشوفنا كده جلدنا ميت وما بنحس وحنعمل رايحين رايحين وحنتساغل جنس سغاله يا تبارك ولا بيهمنا زاتو ..
بس كلو إلا الإنتحار ده ..دي حتكون حركة ما ظريفة منهم .... كان بقينا عليهو الله لا وقفهم في وشنا
خالص الود
كاهن
| |
|
|
|
|
|
|
Re: ما المغزى من منع الشيشة في الخرطوم (Re: Tragie Mustafa)
|
الفاضل حاتم كاهن
كل سنة وانت طيب
يا تراجي رمضان كريم
Quote: العالم العاملين متعوربين ديل الا يعرفون ان اسيادهم العرب عشاق للشيشه؟؟!!
يا اخي في الاردن الاب يقعد في المقهى ويطلب لزوجته وبناته جميعهن حجارة شيشه اي فحم! ويدخونا معا!! |
ناس السودان بقعدوا يشيشوا في المقاهي مع زميلتي وصديقتي ....اما اختي وزوجتي وبنتي في المقاهي شيشة وونسة وقهقه لسة حارة عليهم وديل لو عاوزين يشيشوا يمشوا يشوفوا زميل ولا صديق
| |
|
|
|
|
|
|
Re: ما المغزى من منع الشيشة في الخرطوم (Re: Dr.Mohammed Ali Elmusharaf)
|
ياخي ديل أولاد ######ة علي قول المصريين وحياة ربنا الواحد ما عارف الناس دي تقبل وين ! هسة كمية الأسر والعوائل و الأفراد من الجنسين البسافروا مصر وسوريا وماليزيا وأثيوبيا بسافروا عشان سبب واحد
عايزين يشموا الهوا عايزين يتنفسوا أكسجين نضيف مافيه ريحة الحكومة بت الحرام دي انا شخصياً مدخن بشوت لي ستعةسبعة حجارة شيشة يومياً دة في البيت حجرين تلاتة لو ربنا سهلا في الكافيه
لكن كلامي دة بقولوا عشان الناس البتركب الطيارات عشان يقعدوا في مقهي عادي ومافي زول يفتح خشموا معاهم
انا ما شايف حاجة بتردع المدخن لو ما أقتنع بي نفسو ويكفي البسملة بتاعة مصانع السجاير ما عملت حاجة (التدخين ضار بالصحة) إلي باقي الآية
البنات ماخدات راحتهن في مقاهي القاهرة
ودة كلوا بي سبب الحكومة دي ما داير أقول حكومة أولاد حرام عشان الصيام وكدة لكن ليك علي أفطر و أجي كان دُرت
| |
|
|
|
|
|
|
Re: ما المغزى من منع الشيشة في الخرطوم (Re: حبيب نورة)
|
حبيب نورة بتي وحبيبنا
Quote: انا ما شايف حاجة بتردع المدخن لو ما أقتنع بي نفسو |
مش كده ؟ ياخي دي عمايل بتخلي الما بشيش يمشي يكوس الشيشة محل ما تكون فالممنوع مرغوب .. والبيضّرا .. عندو طعمو برا
Quote: لكن ليك علي أفطر و أجي كان دُرت |
أفطر بالهنا وتعال .. تلقانا لسه .. خرمانين ...
ودي
كاهن
| |
|
|
|
|
|
|
Re: ما المغزى من منع الشيشة في الخرطوم (Re: Dr.Mohammed Ali Elmusharaf)
|
الفاضل د.المشرف رمضان كريم
Quote: ناس السودان بقعدوا يشيشوا في المقاهي مع زميلتي وصديقتي ....اما اختي وزوجتي وبنتي في المقاهي شيشة وونسة وقهقه لسة حارة عليهم وديل لو عاوزين يشيشوا يمشوا يشوفوا زميل ولا صديق
|
ان قصدت بذلك انه الشيشه ليست عيب بالمجتمعات العربيه. وهم عاملنهم مثلهم الاعلى عشان كده قلنا لهم اقتدوا بيهم وبطلوا الهباله. رغم موقفي من التدخين.
حبيب نوره حرام عليك نفسك يا اخوي 7 حجاره باليوم؟؟!!انت ما قديت صدرك لكن؟؟!! تابع فيديوهات سيف اليزل دي وادينا رايك بعدها.
حاتم كاهن ده عامل مقاطعني ولا شنو؟؟؟
| |
|
|
|
|
|
|
Re: ما المغزى من منع الشيشة في الخرطوم (Re: Tragie Mustafa)
|
تراجي رمضان كريم
Quote: وبقول لكم التدخين جدا ضار بالصحه. وعارفاكم عارفين وبدعوا الله ان يمكنكم من تركه.
|
آمين يا تراجي .. لكن إنت عارفه إنو الاشكال مافي الشيشة .. لانها محلولة .. بس فرض الوصاية البيتم بي فرمانات الوالي دي .. تب ما مقبول .. تعال لي بي نصيحة بي فيديو بي صور بي مقال .. حاصرني بي حملة منظمة وانيقة محل ما اقبل .. لكن ما تجيني بي رشاشك وتقول لي .. أوع .. كده لو ما عندي معاك قضيه براك البتخلقها ... وتبقى في التحلك من تبعات العملتو ...
شكراً على المرور كاهن
| |
|
|
|
|
|
|
Re: ما المغزى من منع الشيشة في الخرطوم (Re: تبارك شيخ الدين جبريل)
|
تبارك يا صديق طبعاً ما حاغالتك في سبب منع الشيشة .. الممكن يكون : - عشان البنات ما يشربو الشيشة زي ما قلت . - عشان المعسل بببقى (أظرف) إذا إتلخبت بي حبة بنقو. - عشان رمضان . - عشان الشيشة حرام . - عشان في ما يسمى بالجمبات بتقدم الشيشة مع حاجات تانية . - عشان في ناس قالت ليهم كده . - عشان سغالة ساي . - كيتاً في أوكامبو. - كيتاً في الفيفا . - أسباب أخرى .
بس دي بغالتك فيها :
Quote: (عندهم قسم متخصص..) ...
|
بغض النظر القسم كان شنو أو متخصص في شنو .. غير أقسام الشرطة دي يعدمهم كان عندهم قسم تاني ..
كاهن
| |
|
|
|
|
|
|
|