اتركوا كل شئ وحاربوا ظاهرة إنتشار البنقو في الجامعات ...

Quote: نجي لسؤال برضو مهم: لييه الطلبة بقو يفضلوا البنقو على السوائل الكحولية (العرقي)؟؟ من غير فلسفه كتيرة (الهروب من النظام العام) العرقي ريحتو بتطق، والعسكري بقول ليك انفخ في القرطاس دا وبكرفسك في الحراسة وبتجلد تاني يوم زي الترتيب، والبت (بت الناس) في ثقافتنا السودانية لو لقوها شاربه عرقي ياها عاهرة راسو عدييييل كدي طيب فوق كم، نفسين والراس يتظبط وبجي داخل على امي وابوي وشاقي الحلة بالنص ومافي زول جايب خبري زمان الشاب لمن يسكر، اول حاجة بعملها برجع بيتهم بعد ما يكون ابوهو نام، احترام وكده عشام الريحة وبتلبد ويتسحب براحه لحد ما يصل السرير وتجي امو من بعيد تتاوق وتطمئن انو ولدها رجع البيت سكران ما سكران المهم رجع واطمأنت عليه، بكره بكبر وبعقل وبسيب البسوي فيهو دا، ابوهو زاتو بكون عارف لكن بكون راخي ليهو الحبل شوية عشان ما يفلت بالضغط. لانو لو شاكلو وفيهو ريحة عرقي بكره بشرب بنقو وتاني ابوهو امكن ما يعرفو، وهو كأب، اخير ليهو ولدو يشرب عرقي ولا يشرب بنقو، لكن مين البفهم الحكومة اها الضغط دا جابتو الحكومة زااااتا، لمن خلت الناس تفتش في طريقة تزبط فيها الراس من غير فضائح وجلد، ومعاملنا واقسام الشرطة ما عندها الامكانيات لحد ما تعمل فحص دم لمعرفة نسبة الحشيش في الدم الكشة لو جات، بتجدع اللفة يا تعمل زي الشفوت وتبلعها. ممكن ضباط الشرطة هنا ممكن يساعدونا في اثبات تهمة تدخين الحشيش. لو مافي معروضات ما بقدر يفتح فيك بلاغ. عكس بتاع العرقي. ريحتك بتجيب فيك العيد اذن، مزيد من ضغط النظام العام الاسلامي يعني مزيد من مدخنين البنقو. موش كان اخير العرقي، على الاقل مساوئه اقل من البنقو.