|
|
|
 Re: القبض على طالبة بكلية الهندسة بجامعة شهيرة تقوم بتصوير زميلها( ش.ع )عاريا داخل الكلية (Re: بهاء الدين سليمان)
|
في بداية الثمانينات لمن مشيننا نقرأ الجامعة في مصر
واحدة من الحاجات اللفتت نظري بقوة في الجالية السودانية العايشا في مصر
أنهم عندهم صورة ذهنية عن السودان اقل ما يقال عنها إنها غلط مية في المية
صورة السودان لحظة خروج جيل الاباء من السودان هي آخر ما لديهم
وظلت هي الصورة التي رسمها جيل الاباء للابناء عن السودان
اقل وصف لتلك الصورة إنها صورة مثالية جدا ولا تمت للواقع بصلة
كنا وقتها نحن القادمون من السودان نوصفه بأنه بلد سيء ( تصور في بداية الثمانينات )
جينا الخليج ووقعنا في نفس الخطا
أنا شخصياً أبتعد بشدة عن رسم أية صورة مثالية للوطن لابنائي الذين يعيشون معي خارج الوطن الان
يبدو للكثيرين الواردين هذا البوست ( وليس لدي أي اعتراض عليه أو على موضوعه ) يبدو أن الكثيرين
مصابين بنفس الداء
صورة ذهنية قديمة عن وطن رائع ومثالي في كل شيء في أخلاقيات الناس وفي تعاملهم
وطن لايوجد فيه حرامية ولا سراقين وجرائم ولا أولاد مطاليق ولا بنات .....
هذا الوطن الراقي الجميل موجود وبقوة
في حناجر المغنين
وفي قوافي الشعراء
الواقع ان هناك تغييرات تحدث يومياً
شئنا أم ابينا
تجعل من تلك الصورة المثالية بعيدة جدا الوقع
--
تحويله
---
قبل أكثر من سبع سنوات تقريبا في إحدى اجازاتي في السودان ومعي أحد أخواني الاصغر سنا ( بكثير ) مني
حاولت أن أكسر حاجز السن والعزلة والغربة والابتعاد بونسة تناسب سنه
طلبت منه الخروج مساءً في سيارته
بعد الخروج من البيت بقليل طلبت منو إنو ( يسهرنا ) سهرة محترمة
لمن حسيت إنو جاطط الامور في راسو
قلت ليهو إفترض إنو معاي في جيبي هسي أكثر من عشرة مليون جنيه وعايز اصرفها في سهرة محترمة معاك الليلة
وريني ( من بره بره ) وين وكيف ممكن تنصرف
وقلت ليهو عشان أطمنك أكتر انا ما شايل معاي ولا مليم في جيبي
والحمد لله انا ما بمارس اي حاجة تغضب ربنا
ولا عندي نية والحمد لله
بس عايز أقيم البلد الانا غايب عنها دي من زاوية وين وكيف الناس بتساهر بالليل
انا في ذهني خرطوم بسيط وسودان ابسط منو لمن طلعنا وخليناهو
---
كانت إجابة أخوي صاقعة على رأسي
قال لي :
( كانت الخرطوم ساعتها داخلة على عيد وتقريباً البلد شبه فاضية )
قال لي بالانجليزي انا راجل سلكتف ( Selective )
ومتخصص حاجات نضيفة بس !!!!!
قلت ليهو يعني شنو
قال لي بنات الشهادة العربية وبنات المغتربين وبس !!!!!!!!!!!!!!!!!!!!!!!!!!!!!1
----
قلت ليهو بالنص
يا أخي حرام عليكم
المغترب ده ما طلعتو عينو
يغترب عشان يقري أخوانو
ويعرس لي أخواتو
ويصلح البيت الجالوص
ويغير الادبخانة ويعملها سايفون
ويحجج امو وأبوهو
ولمن يفكر يتزوج
يلاقو صلعتو وصلت نص راسو
قمة التضحية و نكران الذات
تقابلوها بي زي ده ليه يا أخي
--
يجي المغترب في أجازة البلد كلها تنقلب ضده وعايزا تستغلو
هات هات
يقلعو ساعتو وجلابيتو
وحتى لباسو التحتاني
أهلو
وأصحابو وأخوانو
وعمايل الحكومة وجهاز المغتربين خلوها ساي دي قصة خلت الناس تهرب من الاجازة في السودان
لاي مكان في العالم ...
يسيب مرتو وراهو كل صعاليك الحي والقبيلة تعاين ليها ولو ما عملت حاجة غلط ما تسلم من كلام الناس النفوسا معفنة
يرسل بتو تقرأ يصنفوها شهادة عربية
ويجو جماعة السلكتف يتخصصو فيها
يرسل ولدو يقرأ في السودان يصوروهو عريان
رسل ما مريحنو
ما رسل ما ريحنو
عمل بيت مليون واحد عينو عليهو
وعايز يسكن فيهو والله يستغلو في حاجاتو الخاصة
ما عمل بيت عووووك
زمان الكابلي غشانا وقال الغربة سترة حال
اللهم أسترنا
اللهم استرنا
اللهم استرنا وأستر اعراضنا وأولادنا وأهلينا
اللهم آمين
| |
 
|
|
|
|
|
|
|
 Re: القبض على طالبة بكلية الهندسة بجامعة شهيرة تقوم بتصوير زميلها( ش.ع )عاريا داخل الكلية (Re: Khalid Kodi)
|
سلامات يا معتصم ...
يا جماعة الخير ...
أنا في إعتقادي أن أخونا معتصم بنقله لمثل هذه الأخبار ... يحاول أن ينقل لقراء سودانيزاونلاين بعض الأخبار التي قد لا تصل إليهم في منافيهم البعيدة والمتناثرة في كل أصقاع العالم وأركانه ... وأن يجعلهم يعيشون الأحداث داخل الوطن الجريح بحلاوتها ومرارتها ... فهو لا يؤلف هذه الأخبار .. ولكنه يقوم بنقلها لنا بعد أن يتم نشرها في الصحف السيارة داخل السودان ... وعليه فهو غير آثم فيما يقوم به حيث أنه يقوم بذلك لتعريف من هم خارج السودان، بما يدور في الوطن .. ومستوى التردي الذي وصلت إليه الأخلاق والقيم ... هذا عن نقل مثل هذه الأخبار ...
بعد ذلك يأتي دور المتداخلين من أعضاء المنبر لمناقشة الخبر كظاهرة سالبة أو إيجابية .. ويتم تبادل الآراء وطرح الحلول وتحليل الأمر للوصول إلى نتيجةٍ بشأن الخبر ...
أما أن يقوم أحد المتداخلين بالإساءة لطلاب الشهادة العربية ولأولياء أمور هؤلاء الطلبة والطالبات بهذه الطريقة الفجة وغير المسؤولة ... فهذا أمر مرفوض تماماً .. خاصة وأنه كلام مرسل بلا إحصائية ولا إستبيان يتم الإستدلال به .. وقول بني أساساً على السماع والقيل والقال والشمارات ... وهو قول خطير في حق شريحةٍ من أبنائنا وبناتنا السودانيين إضطرتهم ظروف أولياء أمورهم لأن يتم تصنيفهم كطلاب شهادةٍ عربية ... هذا كله على الرغم من شهادة أحد أساتذتهم بالسودان ...
والأدهى والأمر أنه يعتقد بأن البيئة التي نشأوا فيها (السعودية والإمارات) ربما تكون هي السبب في إنحرافهم وسوء سلوكهم ... ولكن ليعلم هذا العضو الزميل ... أن مراقبة الأبناء والبنات في دول الخليج من قبل الوالدين .. ومتابعتهم في دراستهم وتصرفاتهم وسلوكهم وعلاقاتهم ... تكون محكمة بشكلٍ أكبر ممَّا هو الحال في السودان ... وبالتالي، يكون الإشراف على الأبناء والبنات إشرافاً مباشراً من أولياء الأمر ... وفي المدارس ... ولهذا تجد أن نسبةً كبيرةً من المتفوقين في الشهادة الثانوية من أبنائنا وبناتنا السودانيين .. وقبل فترةٍ وجيزة كان هنالك بوست يتعلق بتفوق السودانين في الإمارات ... والتفوق والإنحراف ضدان لا يلتقيان ...
وفي إعتقادي ... لا تثريب على الأخ معتصم إن حاول إشراكنا وإطلاعنا على ما يجري في وطننا ... وعلينا تقبله سالباً كان أم إيجابياً...
ولكن يتعين علينا أن نتناول الأمور بشئ من التروي ... لتجنب التجريح والإساءة لأيِّ شريحةٍ من شرائح مجتمعنا ... خاصة وأن في هذا تجريح وإساءة لأنفسنا في المقام الأول ...
شكراً لك أخي معتصم ...
شكراً لك أخي الأستاذ عبد المجيد المقابل ...
شكراً لك أخي عبد اللطيف بكري ...
شكراً لكِ أختي داليا الكباشي ...
ويا عمر بوب ... التخصص لا علاقة له بالأدب وسوء الأدب والتربية ...
| |
|
|
|
|
|
|
|
|
|
Re: القبض على طالبة بكلية الهندسة بجامعة شهيرة تقوم بتصوير زميلها( ش.ع )عاريا داخل الكلية (Re: هاشم محمد الحسن عبدالله)
|
الاخ الجميل عبد الله كسلا
| Quote: والأدهى والأمر أنه يعتقد بأن البيئة التي نشأوا فيها (السعودية والإمارات) ربما تكون هي السبب في إنحرافهم وسوء سلوكهم ... ولكن ليعلم هذا العضو الزميل ... أن مراقبة الأبناء والبنات في دول الخليج من قبل الوالدين .. ومتابعتهم في دراستهم وتصرفاتهم وسلوكهم وعلاقاتهم ... تكون محكمة بشكلٍ أكبر ممَّا هو الحال في السودان ... وبالتالي، يكون الإشراف على الأبناء والبنات إشرافاً مباشراً من أولياء الأمر ... وفي المدارس ... ولهذا تجد أن نسبةً كبيرةً من المتفوقين في الشهادة الثانوية من أبنائنا وبناتنا السودانيين .. وقبل فترةٍ وجيزة كان هنالك بوست يتعلق بتفوق السودانين في الإمارات ... والتفوق والإنحراف ضدان لا يلتقيان ... |
كلامك صحيح
بس كلام زول زعلان
شوف الكلام القتلو صحيح وواقعي
بس كلام معتصم محمد صالح سيد البوست برضو صحيح
| Quote: غالبية طلاب وطالبات الشهادة العربية يسكنون في شقق او منازل خاصة على عكس الاخرين وغالبيتهم تاتيهم مصاريف شهرية اكبر من احتياجاتهم الفعلية وتتوفر لهم احدث اجهزة الهاتف السير واللابتوبات وفوق ذلك كله لا رقيب عليهم من الاسرة او الاهل .. في اعتقادي انها اسباب كافية جدا لانحراف اي منهم خصوصا ان اغلبهم لم يتخطوا سن المراهقة .. |
وده واقع لازم نعترف بيهو
طالما أنا بعتقد إنو أولادي أهم شيء في الدنيا
لمن يجو لمرحلة الجامعة ولازم يفارقو أهلهم ويمشو يقرو بعيد عنهم
لحظتها كل الدنيا في كفة والقرار الثاني في الكفة التانية
يمشو براهم والله نمشي معاهم
والصحيح نمشي كلنا
طالما قاسينا الغربة كلنا مع بعض
المنعرج الخطير في حياتنا كاسرة في اللحظة دي أهم من أي حاجة في الدنيا
تغور الدنيا و لاينحرف الولد أو البنت لا سمح الله
شيل عزالك وسافر إنت ومرتك وأولادك أكان في السودان والله في الواغ واغ
قري أولادك وبناتك وخليك جنبهم
عشان تطمن عليهم من ناس سلكتف ...
| |
|
|
|
|
|
|
|
|
|
Re: القبض على طالبة بكلية الهندسة بجامعة شهيرة تقوم بتصوير زميلها( ش.ع )عاريا داخل الكلية (Re: كمال الشادي)
|
واحد صاحبي في الرياض بيحكي لي على واحد قريبو
إغترب عمرو كلو في السعودية
وعندو ثلاثة بنات بس
لمن الكبيرة وصلت مرحلة الجامعة
رجع السودان نهائي
ولمن رجع السودان ما إشتغل بالسودان فيهو شنو وما فيهو شنو
قرر إنو يوقف مع بناتو لغاية ما يعدو مرحلة الانتقال من السعودية للسودان
والاختلاف الكبير في شكل الحياة بالنسبة للبنات
كان قرارو إنو ما يشتغل
قعد عاطل في البيت خمسة سنين
ومتفرغ بس لي بناتو
كانت النتيجة شنو
زوج بناتو الثلاثة
وقراهم أحسن قراية
بعد خمسة سنوات
رجع إشتغل تاني في سودان السجم والرماد
| |
|
|
|
|
|
|
|
|
|
Re: القبض على طالبة بكلية الهندسة بجامعة شهيرة تقوم بتصوير زميلها( ش.ع )عاريا داخل الكلية (Re: كمال الشادي)
|
| Quote: ضبط الحرس الجامعي باحدى الجامعات الشهيرة طالبة بكلية الهندسة تقوم بتصوير زميلها ( شهادة عربية ) عاريا في منطقة معزولة من الكلية والطالب يقيم في شقة بمفرده واسرته خارج السودان . |
الخبر الان بقى سلوك الســودانيين والأتتيــود بتاعهم تجاه المرأة.. وهـذا البوست فضح حقيقـة المثقفين
الذين طالما إدعوا نصرة المرأة والدفاع عن حقوقها.
فهنا لا فرق بين حرس الجامعـة البسيط وبين خريجيها من زمااااان الذين يناقشون الموضوع هنا.. العقلية هى هى..
وهى الهيمنـة الذكروية على المرأة وإدانتها حتى ولو بجريمة الرجل.
فإن المنطق البسيط كان يقتضى إعتقال الولد الذى خالف القانون بتعريه فى الكلية، وأخذ شريط الصور من البنت
ليكون دليلا على إدانته.. وحتى أخذ الشريط كان الواجب أن يكون بعد إذنها، أو بأمر قضائى لو رفضت..
لكن التصوير ما دام فى مكان عام مثل الكلية فلا يجرمها.
| |
|
|
|
|
|
|
|
|
|
Re: القبض على طالبة بكلية الهندسة بجامعة شهيرة تقوم بتصوير زميلها( ش.ع )عاريا داخل الكلية (Re: Abureesh)
|
غايتو يا جماعة مفروض الزول ما يقعد ينظر للبلد - سواءَ هو زاتو كان بالخارج أو بالداخل - ويستثني نفسه من الصورة .. يعني ما معناها واحد يجي يقول ليك البلد أصبح فيها فساد معناها هو ملاك وبيحكم علي الآخرين .. ثم إن الفساد والإفساد ليس مرتبطاً بالغني والفلس ولا الزمان ولا المكان .. يعني السودان زمان لم يكن أفضل .. والعفة والفسوق ليست محصورة في جيل دون جيل ولا في المدن دون القري .. ولا في أبناء المغتربين دون شماشة البنزين .. في كل بيئة وكل فئة وكل الأعمار وكل الاجيال .. يمكنك تمشي محل الفجور تقول والله أفجر من المجتمع ده مافي وتفقد ثقتك بالجميع - ده إذا كنت إنت ذاتك فيك الخير - وإذا مشيت محل الذكر والذاكرين تقول والله أصلح من المجتمع ده مافي ..
ونظرة أي زول للمجتمع الحوله سواءً من بعيد أو من قريب تتلون حسب عمره ذاته .. فأنت حين الطفولة تري الدنيا زي الورد وتري كل الكبار آخر عفة وطهر .. تكبر شوية وتراهق تشوف الدنيا كلها غريزة في غريزة وأذكر كيف كانت مراحل الدراسة في نهايات اللابتدائي والثانوي العام حيث كان بعض الطلاب يمارسون العادة السرية في فصول الدراسة - ده غير التحرشات والاحتكاكات الشاذة المعروفة - .. ثم يتطور العمر لمراحل الثانوي العالي والجامعة فتتجه نزوات الشباب من الجنسين تجاه الجنس الآخر .. ويتطور إنتقال النزوات والشهوات لما بعد المراحل التعليمية داخل دواوين الحكومة ومع إزدياد السعار الجنسي المكبوت تتفجر التحرشات والممارسات في كل شقوق المجتمع ويراها بوضوح كل من يبحث عنها أو يحتك بأهلها، بينما يظل العفيفون علي عماهم ..
فيا جماعة ما تحاولوا تقنعونا بأن الناس زمان كانت كويسة وهسة الناس باظت .. الناس ياهم الناس .. البني آدم ذات نفسه يمكن بين يوم وليلة يصبح من ملاك طاهر لشيطان رجيم أو العكس .. والأولاد والبنات والشبان والشابات والكهول والكهلات الحايمين ديل كلهم سواء كانوا في الغربة أو داخل البلد ، لو لقو ليهم كتلة بيكتلوها إلاّ من عصم ربي ..
والفساد - إذا ركّزنا علي الفساد الجنسي - موجود في الشقق الفاخرة كما في الدوانكي كما في الجروف كما في القيزان كما في المواصلات كما في مكاتب العمل كما في فصول الدراسة كما في البيت الأبيض .. مافي شئ جديد .. بس الأمور كل يوم بتأخد لون جديد ومختلف .. والزول ال ما عارف الحقائق دي يكون لسه ماعرف حاجة ..
فما مفروض دائماً الواحد يقعد بعيد ويعمل فيها مندهش ويؤشر علي الآخرين ، لأنو الآخرين كلهم برضو مندهشين وشغالين بيؤشروا عليه و علي الآخرين .. والعالم كلها في الهوا سوا.. وبرضو إلاّ من عصم ربي ..
أنا زاتي ما مفروض أنظِّركتير، لكين أسوي شنو قايل نفسي فاهم حاجة وشالتني الهاشمية قلت أشارك !!!..
| |
|
|
|
|
|
|
|
|
|
Re: القبض على طالبة بكلية الهندسة بجامعة شهيرة تقوم بتصوير زميلها( ش.ع )عاريا داخل الكلية (Re: Munir)
|
Quote:
وشالتني الهاشمية قلت أشارك |
معتصم راح الفطور وأنا أتوليت مكانو
ياخي شارك
ما تشارك
هو نحن ذاتو فيلم ليلة القبض على فاطمة دا خاشينو لوج
يعني قول قبل نصف قرن من الزمات
وفي هاتيك المآقي
كان الحرس بقول " لأبطال الفيلم "
أحرر ليكم محضر بالمخالفة ولا أويدكم النشاط
وطوالي بختارو النشاط
عشان المخالفات بتضعهم تحت طائلة القانون
وبجي النشاط مكركرهم
ويعلن بصوت جهوري
ياجماعة
لقيت الاتنين ديل ....
( في تلك اللحظة تتجه الأنظار نحوهما وتتسلط الحسرات حولهما والأفكار بينهما)
في موضع فاضح
ووافقوا على عرضهم هنا
( طابور عرض )
وتصدر همهمات من الحاضرين
وتقوم المعروضات تمشي
وبكرة يجو يشربو الكركدي...
بس موضوعاتكم دي شوفوا لها حل
| |
|
|
|
|
|
|
|
|
 Re: القبض على طالبة بكلية الهندسة بجامعة شهيرة تقوم بتصوير زميلها( ش.ع )عاريا داخل الكلية (Re: نادر النور آدم)
|
أخي نادر النور ... شكراً أولاً على الترحيب بي بينكم ...
وأنا سعيد فعلاً بذلك ...
أما بالنسبة لهذه الجزئية من كلامي ... فأنا لا أعني بالمراقبة المحكمة ...الكبت الذي تلمح له أنت في مداخلتك ...
نعم الكبت يولد الإنفجار ... ونعم ... قد تكون هنالك نتائج عكسية إذا كان هنالك كبت ...
فالكبت نتيجته واحدة سواء كان الطالب/ة شهادة سودانية ... أو شهادة عربية ... وهي الإنفجار متى ما سنحت الفرصة ...
ولكن ما أقصده يا خي هو أن المتابعة تكون عن قرب نسبة لأن أولياء الأمر في بلاد الغربة يقضون فترة أطول من اليوم مع أبنائهم وبناتهم في المنزل ... والأمهات بصفةٍ خاصة ... مقارنة بما يحدث في السودان ... حيث ينشغل معظم أولياء الأمر في السودان في كثيرٍ من الأحيان بالمجاملات الاجتماعية الكثيرة والمتكررة ... والمشغوليات الأخرى التي تأخذ من وقتهم الكثير ... على حساب وجودهم مع أبنائهم وبناتهم في المنزل ... ومتابعتهم ... ومتابعة تحصيلهم ... وتصرفاتهم وسلوكهم وعلاقاتهم ... وهذا هو إيقاع الحياة في السودان ... وطبيعتها التي لن تتغير ...
لذا، أعتقد بأن التعامل مع الأبناء سواءاً في الغربة، أو في السودان، يجب أن يكون بمبدأ (لا إفراط ... ولا تفريط) ...
ودمت ،،
| |
|
|
|
|
|
|
| |
كمال الشادي
Mohd Ibrahim
معتصم محمد صالح
عبد الله كسلا
هاشم محمد الحسن عبدالله
Abureesh
المسافر
Munir
نادر النور آدم
يسرى معتصم
فيس بوك
تويتر
انستقرام
يوتيوب
بنتيريست