سلام مونديالاب .. غايتو نحن دائماً بنجيكم في اليوم الثاني ..
* توقفنا عند مباراة البرازيل وكوريا الشمالية والتي جاءت متوسطة الأداء توقعنا فيها أن نرى نجوم السامبا كما عودونا ولكن يظهر أنو عهد النجومية ولى وأصبح الفكر التدريبي وطرق اللعب تتحكم في مجريات المباريات .. الحسنة الوحيدة في فريق البرازيل كانت في روبينهو ولو إجتهد الكوريين كثيراً لعادلوا نتيجة المباراة على العموم أبناء السامبا أصبح فريقهم ليس مخيفاً وإن كنا نتوقع إرتفاع مستواهم في الجولة الثانية وعاد كاكا لمستواه السابق .. * على عكسك يا أماني المباريات التي لا تلقى إهتمام بتكون جميلة وأنا أحرص على مشاهدتها ويوم أمس قدمت شيلي مباراة جميلة ضد الهندراوس وفازت عليها 1/صفر وكان ممكن تكون النتيجة أكثر من ذلك .. * المباراة الثانية كانت المفاجأة الكبرى في البطولة فوز سويسرا على المرشح الأول في البطولة إسبانيا وفي إعتقادي الأسبان محتاجين يغيروا طريقة لعبهم لأنها لا تخدم الفريق وهي التحضير الكثير أمام المرمى ومثل هذه البطولات للنقاط أكثر منها لتقديم العروض .. أختلف شويه مع صديقي قمر بوبا دخول نافاز شكل خطورة نعم ولكن أكثر من المراوغة وعكس الكرات في جسم المدافعين مما عطل اللعب كثيراً وكان بالإمكان أحسن من ما كان وأتفق معه في إنو توريس لم يضف شيئاً للفريق .. * لم يقدم أولاد البافانابافانا ما يشفع لهم الإستمرار في البطولة فقد خذلوا جمهورهم قبلنا وقدموا مباراة باهتة كأنهم كانوا ضامنين الكورة زي ما بقول محللينا السودانيين وإن كان الحكم ظلمهم كثيراً في ركلة الجزاء وطرد حارس المرمى النتيجة عادلة قياساً للعب الأورغواي فقد قدموا مباراة كبيرة وإستحقوا الفوز ..
واصلوا يا شباب تحليلات جميلة ومتابعة ممتازة .. يديكم العافية لقد أمتعتونا ..
06-17-2010, 08:36 AM
omer osman
omer osman
تاريخ التسجيل: 06-09-2007
مجموع المشاركات: 15218
Quote: Quote: في ما يختص باسبانيا - الأندلس سابقا - برضو ما عندهم سكه لقدام __ لي المجد و أنا استشرف المستقبل ، كشفا إلهيا و بصيرة من يري بنوره تعالي !!!! Amin Nota
ياخي ذكرتني النظرية الداروينية ولا منو ما بعرف بتاعة خلق الانسان من صدفة قال لو ختو الآلة الكاتبة لشخص لا يعرف الكتابة وقالوا ليه طبز حيقوم بعد ساعة يكتب ليه كلمة صاح بالصدفة وقال هكذا خلق الانسان....اما الكشف الالهي لو دفعت حقه كاش صدقني ما بتبصر بيه فهكذا استشرافك المستقبلي صدفة ليس الا...بالله تاني زح من الانجليز ...الناس ديل متوترين وانا متوتر معاهم
يا أماني الاسبان ديل بتعاطف معاهم عشان نجوم برشلونة ...بيدرو انيستا شافي والعوير بيكي والعجوز بويول...نحن ناس انجلترا ..المستعمرين..الامبراطورية التي لا تغيب عنها الشمس.
الشفيف مو..نافاز عجبني والله اتفق معاك في عكساتة الكانت بتضرب في المدافعين لكن حرك الجهة الكان شغال فيها وكان عنده كم تسديدة مباشرة في المرمي.
وما غايظاني الا قدلة جنابوا بعصاية النازيين .. بحلاله طبعا...لكن برضو حيترشوا بإذن الله
تحياتي للجميع
06-17-2010, 10:50 AM
معتصم دفع الله
معتصم دفع الله
تاريخ التسجيل: 12-18-2003
مجموع المشاركات: 12684
قمربوبا يا صاحب سلام .. ياخي أمس أشفقت على الاسبان من الطريقة البلعبوا بيها .. لأن كل الفرق ح تلعب معاهم وفق إستراتيجية معينة زي اللعب بيها الفريق السويسري معهم .. وانت عارف دفاعم وما أدراك ما الدفاع الاسباني هجمة واحدة ممكن تجهجه باكاتهم .. وأسلوب التحضير والرجوع للخلف لسحب المدافعين طريقة عقيمة لازم تفعيل الأطراف والهجوم من العمق والتسديد من خارج المرمى .. المهم الغريق قدام ..
Quote: وما غايظاني الا قدلة جنابوا بعصاية النازيين .. بحلاله طبعا...لكن برضو حيترشوا بإذن الله
غايتو فريق جنابو دا مافي حاجة ح تقيف قدامو .. لأن لاعبيه عارفين بعملوا في شنو وطريقة لعبهم تدوخ أي فريق الإنتشار في الملعب + القوة والسرعة والتهديف من أي إتجاه مع إجادة تامة للضربات الرأسية .. بصراحة جنابو لغاية الآن يكسب
06-17-2010, 10:13 AM
Elhadi
Elhadi
تاريخ التسجيل: 01-06-2003
مجموع المشاركات: 9604
( تميمة الحظ الأرجنتينية) حفيد الأسطورة مارادونا وابن مهاجم المنتخب الأرجنتيني "سيرخيو أغويرو" ( Benjamin ) حاضر في المدرجات في جنوب افريقيا لمؤازرة نجوم التانغو ..
06-17-2010, 10:41 AM
omer osman
omer osman
تاريخ التسجيل: 06-09-2007
مجموع المشاركات: 15218
ازيكم يا مونديالاب,, معليش الليله غبت عن البوست لأنه يومي زحمه خالص ومالاقيه فرقه أكتب,
الهادي أظنك الليله مبسووووط مع رباعية الأرجنتين مبروك الست نقاط و التأهل للدور التاني :) بالمناسبه شكرا علي الصور الحلوه بتاعت البيبي العسل حفيد مارادونا
سمارت مبروك تأهل الأرجنتين برضو :) طبعا الفريق فيهو ناس فلته زي ميسي وميليتو, والاتنين بشجعهم, خصوصا (ميليتو) في الانتر :) بس ما بحب (ماراضونا) ده, عنده جنون العظمه وبيحب (الشو) وعموما أنا (اللاتين أميركانز) ديل ما ناسي, أوروبية الهوي زي ما قالت أميره الشيخ
أميره الشيخ مشتاقين, بالغتي في تغيير الشفت أثناء كأس العالم, مبسوطه انك متابعه معانا, و انشاء الله تلقي فرقه وتفضي لينا شويه :)
جنوب أفريقيا هزيمه قاسيه امبارح أمام رفاق (فورلان) بكل أسف
يادوب ماشه أشوف مباراة نيجيريا الحاصل فيها شنو,,
بجيكم برواقه :)
06-17-2010, 05:25 PM
doma
doma
تاريخ التسجيل: 02-04-2002
مجموع المشاركات: 15970
* غايتو عشان ماما دوما دي الأرجنتين اليوم نيدها 10/10 قدرت تروض الكوريين بعد أن دوخوهم وكادوا أن يدركوا التعادل .. النسيب إغويرو قدر يغير شكل اللعب تماماً ويقلب الكفة لصالح التانغو مما أتاح الفرصة لميسي للتحرك بحرية وصنع هدفين جميلين .. مبروك لمشجعي الإرجنتين صعودها للدور الثاني كأول فريق في البطولة يصل لهذه المرحلة .. * ما عندي تعليق غير أقول ( إخييييييييي ) على النيجيريين فقد ضيعوا نصراً مضمومناً والسبب رعونة لاعبهم كيتا الذي طرد بسبب عدم تقديره للمسؤلية وإرتكابه لخطأ أحمق كلفه البطاقة الحمراء .. على كل حال ما كنا نطمح من المنتخبات الأفريقية الصعود للدور الثاني والمواصلة في البطولة من واقع ما شاهدناه في البطولة الأفريقية السابقة .. *في إنتظار فرنسا مع المكسيك لعل وعسى أن لا يخذلونا ..
تحياتي ..
06-17-2010, 09:48 PM
أمين محمد سليمان
أمين محمد سليمان
تاريخ التسجيل: 08-08-2009
مجموع المشاركات: 8437
قمر الحقد المظلم !! إنت ما سمعت ب( اتقي فراسة المؤمن فانه يري بنور الله ) ؟ و بالمناسبه دي هاك حبة الفراسه دي عسي أن يزيل الله عنك سوء الطويه الليلتك دي : رغم انها بلا نقاط و تبقت لها مباراه واحده : نيجيريا - بحول الله و قوته - إلي الدور الثاني !!!!
06-17-2010, 10:44 PM
حامد محمد حامد
حامد محمد حامد
تاريخ التسجيل: 11-19-2008
مجموع المشاركات: 3085
Quote: و بالمناسبه دي هاك حبة الفراسه دي عسي أن يزيل الله عنك سوء الطويه الليلتك دي : رغم انها بلا نقاط و تبقت لها مباراه واحده : نيجيريا - بحول الله و قوته - إلي الدور الثاني !!!!
خال حمور الاديب سابق
مشروع فكى حاليا
شايفك كترت المحلبية ....نيجيريابح
واخيرا سلام
بطريقتك دى حتطفش الفرق كلها وتخلى المكسيك وسويسرا يلعبوا النهائى
06-17-2010, 10:53 PM
غباشي
غباشي
تاريخ التسجيل: 01-19-2007
مجموع المشاركات: 1729
الزحمة ما مديانا فرقة للكتابة ده غير التوقيت الما راكب عدلو ... المهم حضرت الشوط التاني لمباراة الارجنتين و كوريا الجنوبية و الارجنتيين ابدعوا في و سحروا الجميع في هذه المباراة و ميسي عجيب عجيب عجيب .
و الملاحظ يا أماني انو مارادونا بيختلف عن باقي المدربين فهو ماذال يحتفظ بروح اللاعب القائد على الرغم من انه المدرب ... مارادونا بمثابة قائد و ملهم و مدرب و صديق للاعبيي الارجنتين, فقط لاحظوا كيف يعانق لاعبيه عقب كل مباراة. مارادونا كان فلتة الملاعب و لا اقول ان سيكون فلتة كمدرب لكنه سيترك بصمة في هذا المجال ..... بس يسيب الكبكبة و التوتر البيعمل فيهم ديل , مارادونا كبير يا أماني ... كبير ... كبير ... كبير
Quote: * ما عندي تعليق غير أقول ( إخييييييييي ) على النيجيريين فقد ضيعوا نصراً مضمومناً والسبب رعونة لاعبهم كيتا الذي طرد بسبب عدم تقديره للمسؤلية وإرتكابه لخطأ أحمق كلفه البطاقة الحمراء على كل حال ما كنا نطمح من المنتخبات الأفريقية الصعود للدور الثاني والمواصلة في البطولة من واقع ما شاهدناه في البطولة الأفريقية السابقة ..
سلامات يا معتصم و مشتاقين و الله .. النيجيريين كعادة الافارقة ركنوا للمخزلين و مثبطتي الهمم و الطوابير الخامسة فكان لهم ما ارادوا و هو المركز الاخير في زيل المجموع و اول المغادرين لديارهم, لم اشاهد المباراة و الحمد لله على ذلك أفريقيا حالياً لا تقوى على مجاراة الكبار ... هذا ان جاز لنا أن نطلق على اليونان بانها من الكبار ..... الفساد و السقوط الاخلاقي يعيقان اي تقدم او انجاز ....
Quote: *في إنتظار فرنسا مع المكسيك لعل وعسى أن لا يخذلونا ..
فرنسا يا معتصم ايضاً الان في مفترق الطرق و كما قالها الشوالي في نهائي المونديال السابق "فرنسا لا تسوى شيئ بدونك يا زيدان" و بالفعل قد كان كما هو الان و كما في مونديال كوريا-اليابان , و هذه نتيجة حتمية عندما يشذ المدرب في ارائه و اختياراته و دومينيك اليوم في موقف لا يحسد عليه ففرنسا كلها ضده و تنتظره مباراة جنوب افريقيا ليحزم بعدها امتعته ....
حقق المنتخب المكسيكي، مساء اليوم، فوزا تاريخيا على نظيره المنتخب الفرنسي، بهدفين دون رد، في المباراة التي جمعتهما لحساب المجموعة الأولى، في نهائيات كأس العالم الجارية في جنوب أفريقيا.
يا حليلك يا زيزو وحقا ان نجاحات الامس ليس كفيلا لوحده بنجاحات المستقبل او الحاضر
اصبح امل الديوك فى الاستمرار فى عداد المستحيل وان كانت ضربة الجزاء مشكوك فى صحتها وربما الهدف الاول
معتصم دفع الله نشرتك اليوميه دسمه ودقيقه وبتعكس خبره وعين فاحصه للمباراه واصل لأننا بنقراك بتمعن :) وتسلم,,
غباشي:
Quote: و الملاحظ يا أماني انو مارادونا بيختلف عن باقي المدربين فهو ماذال يحتفظ بروح اللاعب القائد على الرغم من انه المدرب ... مارادونا بمثابة قائد و ملهم و مدرب و صديق للاعبيي الارجنتين, فقط لاحظوا كيف يعانق لاعبيه عقب كل مباراة. مارادونا كان فلتة الملاعب و لا اقول ان سيكون فلتة كمدرب لكنه سيترك بصمة في هذا المجال ..... بس يسيب الكبكبة و التوتر البيعمل فيهم ديل , مارادونا كبير يا أماني ... كبير ... كبير ... كبير
طبعا الزول ده لما الأرجنتين تجيب قوون بينسي انه المدرب بيقعد ينطط زي الشفع الصغار لووووووول المشكله انه حياته كانت كلها أضواء وشهره وكاميرات, حتي في أيام ادمانه وفشله ومعاناته, وفتره كده كان عنده برنامج تلفزيوني في احدي قنوات الأرجنتين أفتكر وتمت ترجمته للانجليزيه, الزول ده Self Centered والشهره وجنون العظمه بوظوا لليهو حياته :( عموما أنا بحترم المدربين الغامضين وما بيتكلمو كتير وما بحبو الظهور, شفت (فابيو كابيلو) ده كيف؟ بعدين شوف (ميسي) البيقولو انه أعظم لاعب كرة قدم في التاريخ, وفي ناس قالوا انه أفضل من (بيليه) !! عنده تواضع وبساطه مبالغ فيهم, حتي لعبوا في الميدان بتاع زول خجول وبحب روح الفريق, وما بحب (الشو), حقوا يبعدوهو من مارادونا عشان ما يبوظو ليهم لوووووووول
المهم أنا ما عندي راي في مارادونا اللاعب الزمان, بس قصة حياته البعد كده ومظهره الظهر بيهو في المونديال بيحسسوني انه مجنتر وما نصيح ولو ما شال كاس العالم, حتلقوهو لافّي في أقرب صينيه في الأرجنتين وبيقول أنا مركز العالم, وبينظم في المرور مع بتاع الحركه !!!
والمشكله انه لو شال الكاس برضو حيعمل كده لووووووول
سلوفينيا مع ال USA ومهم نشوف مستوي الأمريكان حيستمر بنفس القوه والتكتيك العالي الكان قدّام انجلترا وللا لأ :)
أمّا الجزائر وانجلترا, فنتمني مفاجأه, أصلو المونديال بقي مليان مفاجات, ومافيهو كبير :)
(عدل بواسطة Amany Elamin on 06-18-2010, 08:05 AM) (عدل بواسطة Amany Elamin on 06-18-2010, 08:11 AM) (عدل بواسطة Amany Elamin on 06-18-2010, 08:13 AM) (عدل بواسطة Amany Elamin on 06-18-2010, 08:29 AM)
06-18-2010, 07:37 AM
أمين محمد سليمان
أمين محمد سليمان
تاريخ التسجيل: 08-08-2009
مجموع المشاركات: 8437
غايتو قمر الحقد و حامد قريبي بتاع الأزيار علاقتهم بالكوره ما بتسمح ليهم يتفرجو فيها أصلا ، خليه يجو يحللو لينا كاس العالم !!! و بالمناسبه يا قمر الظلام : إنجلترا ماشه الكوشه براها ما محتاجني اشجعها !!!
06-18-2010, 08:38 AM
غباشي
غباشي
تاريخ التسجيل: 01-19-2007
مجموع المشاركات: 1729
Quote: طبعا الزول ده لما الأرجنتين تجيب قوون بينسي انه المدرب بيقعد ينطط زي الشفع الصغار لووووووول
Quote: المهم أنا ما عندي راي في مارادونا اللاعب الزمان, بس قصة حياته البعد كده ومظهره الظهر بيهو في المونديال بيحسسوني انه مجنتر وما نصيح
و الله يا أماني مارادونا في اي مكان و اي زمان خاطف للاضواء و مثير للجدل .... و كان ما عمل كدة ما يبقى مارادونا إبن ام مارادونا .... شفتي لمساته الساحرة للكرات التي تخرج من الملعب مارادونا عجيب و لن تنتهي عجائبه لسة متزكر برنامجه المترجم اللي تم عرضه في قناة الجزيرة و كان بمثابة عمر جديد انكتب ليهو بعد ان تعافى من الادمان و تخلص من الوزن الزائد باجراء عملية تدبيس المعدة و حقيقة يا أماني في اول ظهور ليهو بدا و كأنه مارادونا بتاع كاس العالم 86 و قد بالفعل قد يكون مصاب بجنون العظمة الا انه لا يزال متربع على قلوب الكثيرين منا و ما احلى جنونه .... لكن بس يسيب الكبكة و الوسوسة بتاعتو دي .... ياخ دا من كترة ما متوتر ... لابس ساعتين في ايديهو الاتنين
و كلو كوم و البدلة كوم تاني .... عامل زي اخو العروس الصغير
باين منديال افريقيا عايز ينصف المهمشين ويخذل الكبار! معقول البحصل دا.. فرنسا ، المانيا ، اسبانيا ، نيجريا ، انجلترا ، حتى البرازيل مش كانت ولا بد.. دي المرحلة الاولى ياكبار ؟؟؟؟؟
أميره الشيخ : اتفقنا علي الفرحه بفرملة الماكينات الألمانيه أنا أروبية الهوي, صاح, لكن ألمان ما معانا بس عشان خاطر ماما دوما حبيبتي بشمت فيهم براحه, ماحأشمت شديد
أدعي لي لكورة بالليل تحصل فيها مفاجأه والجزائر تغلب انجلترا !!!!! أصلو كاس العالم ده كل شئ فيهو بقي وارد,
وأفريقيا تنصر المهمشين علي قول استاذنا الملك ههههههه
تصدقي هسي سلوفينيا غالبه أمريكا 2 : 0 !!! ده يوم المفاجاّت, وبتمني ينتهي بهزيمة انجلترا علي يد الجزائر الموضوع الظاهر عليهو نفسي, وبمجرد ما فريق صغير يهزم فريق كبير, باقي الفرق الصغيره بتتشجع وبتلغي عامل الخوف وبتتحدي الخصم
06-18-2010, 04:28 PM
doma
doma
تاريخ التسجيل: 02-04-2002
مجموع المشاركات: 15970
بالمناسبه سامي ولدي برضو كسر كبايه مويه في مطعم بحضروا فيه المباره لما الحكم طرد كلوزا . موني وبت الشيخ بالغتو معانا شديد . ربنا يوريني فيكم يوم تنهزم البرازيل يا قادر يا كريم .
06-18-2010, 05:21 PM
smart_ana2001
smart_ana2001
تاريخ التسجيل: 04-17-2002
مجموع المشاركات: 5695
كفارة يا خالة دوما.....و قولى لسامى معليش..لكن انا بالجد شمتاااانه فى المانيا صحيت من النوم لقيت المانيا اتغلبت وبعد شوية امريكا اتغلبت 2 صفر.
الامركان لعبوا كورة ذى الزفت فى الشوط الاول. الشوط التانى لعبوا كانهم فريق مختلف تمام..اصرار ...هجوم متواصل و لعب منسق.
الهدف التالت للامركان (اللى ما اتحسب) صحيح 100% ....لو فى فاول مفروض يكون لصالح الامريكان. فى لاعب كان ماسك مايل برادلى. لكن ولد المدرب الامريكى مايكل برادلى و الله فشانا شوية مبروك للامريكان التعادل....جاء بطلع الروح....و لو استمروا يتغلبوا فى البداية و بعد داك يحاربوا عشان التعادل...ما بيمشوا لقدام __________________________________________________________ امانى .....مردونا ده يعمل اللى عايزه ..يا اخى ده مردونا .... الايام دى شغال شتيمة فى بليه و بلاتينى..امس شايفاه اعتزر لبلاتينى ..
ديل (الموتى )المقصودين يا بت الشيخ.. باكر تعالى شوفي (دافاتناالاورنج ) تخمج الواطه كيف .. هعععع. .. يا جماعه وين الكباتن؟ قمرنا دا يكون نفسه طمت والا كتبه (شيخ) امين؟ اصلو امين من صاحب (آل البيت ) بقت منه خوفة..هاهاها
06-19-2010, 03:52 AM
doma
doma
تاريخ التسجيل: 02-04-2002
مجموع المشاركات: 15970
ما تشمتوا فينا المانيا تومض من تحت الرماد متل ما طلعت من دمار الحرب العالميه الثانيه . الانجليز ديل يستاهلوا يتهزموا مليون مره . ثار بايت وكدا ما بريدهم عشان كانوا مستعمرين السودان وعشان انجليزهم البنكلموه بي تحت نخريهم دا .
06-19-2010, 09:52 AM
محمد علي شقدي
محمد علي شقدي
تاريخ التسجيل: 04-25-2010
مجموع المشاركات: 2730
إزيك يا غباشي .. الشوق كتير يا صاحب .. أتفق معك في كلامك عن الفرق الأفريقية وزي ما قلت الفساد هو سبب دمارها .. بس برضو برجع وبقول اللاعب الأفريقي هو السبب الأول في خسارة فريقه .. غايتو ما راجين منهم حاجة يعملوها .. أما عن فرنسا أمرها محير بالجد والمدرب دومنيك ساعد كثيراً لوصول الفريق لهذه النقطة .. وأمر صعودها أصبح في خبر كان بعد أن هزمتها المكسيك شر هزيمة ولا نرجو منها أن تقدم لنا شيئاً إن حالفها الحظ ..
يا أماني إزيك .. يعني من بكره الواحد يربط ليهو كرفته ويمشي على التلفزيون عدل
محمد على طه الملك .. التحية لإبنك وقول ليهو واصل بقوة .. دائماً ما أتمنى ظهور سوداني في الدوريات الأوربية وإن شاء الله يكون إبنك هوالأول .. ونحن عارفين كورتنا السودانية دي ما ماشه لي قدام ..
أمين خال حمور .. سلام يا صاحب ومشتاقين .. قمر بوبا دا بتكون طفشته إنت
* صربيا ومفاجأة البطولة فقد ألحقت هزيمة مستحقة على ألمانيا وإن كان طرد كلوسا أثر كثيراً على الألمان .. معليش يا جنابو وهاردلك ماما دوما .. * المباراة الثانية بين أمريكا وسولفينيا كانت قمة في الإثارة تقاسمها الفريقان شوط لكل كما تقاسما النتيجة هدفان لكل .. * الجزائريون قلبوا الطاولة على الإنجليز وأجبرهوهم على الخروج بالتعادل .. لقد أظهر الإنجليز مستوى ضعيف وهذا لا يقلل من المستوى الجيد الذي لعبت به الجزائر .. وزي ما قال حمور الإنجليز طايرين براهم
الصباح مشغوله ماقادرت أدخل البوست, بعد الظهر دخلت أهنئ استاذنا الملك بتأهل هولندا ملوك الأورانج وفوزهم علي ناس برمجة Urska (الهوندا اليابانيه), لقيت هجمه هكريه من النوع العنيف, أودت بالبوست الي الصفخه الثانيه, فأجلت التهنئه لأنه الصفحه الثانيه أكثر أمانا علي البوست من أيدي الهكر الغاشمه :) الحمد لله جات سليمه
أستاذنا م. الملك, Congrats وست نقاط نظيفه وتأهل مستحق, اليابانين الليله عصروكم شديد, لكن علي مين؟ Congrats لولدنا حسام الملك :)
Quote: ديل (الموتى )المقصودين يا بت الشيخ..
ياأستاذنا الله يرضي عليك,, موتانا ديل مالك دايرهم يمشوا كاس العالم؟ يعني هسي صقور الجديان حقتنا دي تمشي تلاقي ألمانيا والأرجنتين, ماياها الفضيحه اللا حقت لابقت, والعشره صفر ما بتحلّهم, ونبقي في الحادثه الماحصلت في سجّلات الفيفا, وسيرتنا تبقي علي كل لسان, أكتر ما هي أصلا علي كل لسان ,,
يا أستاذنا اكرام الميت دفنه, خليهم, الستره أولي,,
(عدل بواسطة Amany Elamin on 06-19-2010, 04:21 PM) (عدل بواسطة Amany Elamin on 06-19-2010, 04:27 PM)
غانا تبلي بلاءا حسناً,, الناس ديل مرّزقين ضربات جزاء, في مباراتين اتحصّلوا ضربتين جزاء ويحرزهم نفس اللاعب Gyan, نتمني ليهم التوفيق, لو انتهت المباراه بتعادلهم مع استراليا حيبقوا أوائل المجموعه بأربعه نقاط,,
Quote: امانى .....مردونا ده يعمل اللى عايزه ..يا اخى ده مردونا .... الايام دى شغال شتيمة فى بليه و بلاتينى..امس شايفاه اعتزر لبلاتينى ..
طبعا زولكم شغّال ملاسنات مع الجماعه, والصحافه ما مقصّره شغّاله معاهو بطريقة (المديده حرقتني) قالوا الصحفيين قالوا ليهو بيليه صرّح قال مارادونا قبل قيادة الفريق الأرجنتيني عشان خاطر المقابل أو العائد المادّي الحيعود عليهو من التدريب, زولك ما قصّر قال ليهم بيليه ده يمشي يشوف ليهو متحف يتلمه فيهو (الكلام ده جد بالمناسبه) قالوا ليهو بلاتيني قال بيليه أعظم لاعب في العالم, قال ليهم وأنا أقول من زمان بلاتيني ده مالو معاي؟ ما صاحبي وعلاقتي بيهو مش خالص !!!! يعني (ماراضونا) ده لو سكت وما علّق علي الصحافه المصره تجعل منه ماده للتندر والأقاويل مالو؟
Quote: ما بريدهم عشان كانوا مستعمرين السودان وعشان انجليزهم البنكلموه بي تحت نخريهم دا .
تصدقي ديل السببين العشانهم بحب الانجليز ؟!! كلية غردون والاَكسنت البريتيش العاجبني الامبراطوريه التي لاتغيب عنها الشمس ياماما دوما, بس لو ما امبارح كانو لاعبين مع الجزائر مون امور, كنت شجعتهم حتي الفوز لكن من هنا ولي قدام في المونديال انشاء الله ناسي تماما هههه
أخونا محمد علي شقدي, ياهلا بيك وشكرا علي انضمامك لركب البوست,, الصفحه التالته دي صفحة الأرجنتين بجداره, الكل مراهن فيها علي الأرجنتين, والأرجنتين لحد الاَن تكسب الرهان :) خليك متابع معانا وشاركنا :)
معتصم ياصديق,,
Quote: يا أماني إزيك .. يعني من بكره الواحد يربط ليهو كرفته ويمشي على التلفزيون عدل
الجزيره الرياضيه رأسا, وسوق معاك قمربوبا لما يرجع من الحردان هههههه
أخوانا المسجّلين غياب: جعفر محي الدين و قمربوبا, أبقوا مارقين, انجلترا اتعادلت ساي مع الجزائر ما اتغلبت لسه الخال العزيز أمين ياسمين, قلنا من الصفحه الأولي, لازمو فكي كاااارب يكتفوا لينا بعيد من التلفزيون
----- بنهظر معاك ياخال, انت الخير والبركه
(عدل بواسطة Amany Elamin on 06-19-2010, 04:53 PM) (عدل بواسطة Amany Elamin on 06-19-2010, 04:57 PM)
غانا شنو يا اخي تم طرد اللاعب الاسترالي من الدقيقه كم وعشرين لاعبين ضد 10 بس وما عملوا شئ ولو ما ضربت الجزاء دا ما كان جابو شئ خدمهم الحظ بس . الكاس دا بتاع الارجنتين
06-19-2010, 05:15 PM
غباشي
غباشي
تاريخ التسجيل: 01-19-2007
مجموع المشاركات: 1729
Quote: يعني (ماراضونا) ده لو سكت وما علّق علي الصحافه المصره تجعل منه ماده للتندر والأقاويل مالو؟
يا أماني ناس مارادونا ديل من ناحية الدوير و الزعل زينا و غادي مننا ... وطوالي اخلاقهم في نخرتهم اذا زعلتم حاجة .... (براك شايفة اوكامبو ... شايلة تقيلة كيف مع ....... خلينا في الكورة احسن)
غانا فرطت الليلة و أخشى ان تكون الدقسة اللي فيها اللحسة خصوصاً كورتهم الجاية مع المانيا و صربيا يمكن براحة تغلب جيراننا الاستراليين ديل (استراليا دي جنينة المجموعة) غايتو الله يكضب الشينة و البركة في الـ Weekend و اهو مساهرين لحدي الساعة 4 صباحاً يعني الشفع بتاعين غانا ديل لو كان مدربهم مفتح كان رشَّا عواجيز اوستراليا مصير غانا الان اصبح في يد الاستراليين عندما ينازلون صربيا
06-19-2010, 05:40 PM
معتصم دفع الله
معتصم دفع الله
تاريخ التسجيل: 12-18-2003
مجموع المشاركات: 12684
* هولدنا وبأقل مجهود تتخطى اليابان وتصعد للدور الثاني .. بالرغم من إجتهادات اليابانيين ومحاولتهم الظفر ولو بنقطة من الطاحونة الهولندية إلا أن برمجتهم إتهكرت وخرج كمبيوترهم بدون مقابل .. في رأيي المتواضع لو وجدت هولندا مهاجم صريح بجانب بيرسي ح يكون لها شأن كبير في الدور الثاني لأنها تخطو بهدوء وثبات نحو البطولة وبدون التوتر بتاع الفرق المرشحة للبطولة مما أعطاها طمأنينة كبيرة .. واحد يجي يكضبني
* للأسف الآن أيقنت تماماً بأنه تشجيع الفرق الأفريقية ما هو إلا فقع مرارة وحرق أعصاب ساي .. غانا كان بالإمكان أحسن مما كان لقد ضيعت فرصة تاريخية للصعود للدور الثاني للبطولة قبل لقاء ألمانياالمرتقب ولكن لم تغتنم هذه الفرصة بعد طرد المدافع الإسترالي والتفوق العددي لغانا وتظل مشكلة التهديف هي العقبةالتي تواجه معظم الفرق وخصوصاً الأفريقية لكثرة التحضير أمام المرمى وعدم ( نجاعة ) المهاجمين زي ما بقول الشوالي .. غانا أدخلت نفسها في مأزق لأنها سوف تقابل ألمانيا الجريحة والتي تسعى للظفر بالثلاثة نقاط وعدم التفريط في الصعود للدور الثاني وبالتالي سوف تكون المباراة بينهما من نار ..
على كل في إنتظار الجولة الثالثة للبطولة وزي ما قلنا ح يكون فيها كاسوري جد ..
يا أميرة الشيخ مشتاغووون ياخ .. المره دي البرازيل مافي ليها لأنو دي ما البرازيل البنعرفه .. ومعليش الحبتين عند اللزوم دكتور كاريكا ومهند ديل إتلومو تب
06-19-2010, 06:43 PM
GamarBoBa
GamarBoBa
تاريخ التسجيل: 03-07-2002
مجموع المشاركات: 4985
الشفيف مو ياخي امين نوتة والله كرهني الكورة ياخي الزول دة بقي يركب عوده علي قول السماسرة في اي حاجة وبقي يخرب من طرف والمسألة اتعدت مسألة انو كج الي مخرب من الدرجة الاولي فياخي والله الزول انا متضرر منه عديل
يا جنابو وماما دوما المانيا حتكسب ومع انو متعاطف مع غانا لكن غانا فريق هش والالمان تكتيكيا من اكبر الفرق
ناس الجزائر طلعوا ناس ما بروفشنال خالص لما استهزءوا بروني والمنتخب الانجليزي لانهم فرحانين بالتعادل
تحياتي للجميع ونتمني لصمويل ايتو الفوز بعد ساعة من الآن ..الزول زولي من ايام برشلونة ..شخص خلوق وفوق ده كله تمنياتنا لماما افريكا بالنجاح
06-19-2010, 07:13 PM
smart_ana2001
smart_ana2001
تاريخ التسجيل: 04-17-2002
مجموع المشاركات: 5695
الان هم فى راس المجموعة ...لكن المبارة دى ممكن تجيب اجلهم . خاصة ان المبارة القادمة مع المانيا ...اللى ح يكونوا جايين ب "يا انت يا اغرق" يا اخى الاستراليين ناقصين لاعب و الجماعة ما عرفوا يعملوا حاجه ؟؟؟
سمارت وغباشي ومعتصم,, مجموعة غانا حساباتها اتصعبت جدا فعلا,, لكن لسه غانا عندها فرصه كويسه في رايي, ببساطه لأنه في أوبشن اسمه التعادل
حاليا المجموعه كما يلي: غانا عندها 4 نقاط, المانيا ,3 صربيا .3 استراليا نقطه واحده المباراه الجايه انشاء الله, ألمانيا مع غانا, وصربيا مع استراليا, غانا ب11 لاعب تقفل اللعب وتلعب دفاع بس, وتطلع بنقطه واحده من المباراه بتضمن الصعود بخمسه نقاط, بصرف النظر عن المباراه التانيه اليحصل فيها شنو,
ياجماعه المطلوب من غانا التعادل بس قدام ألمانيا, 11 لاعب يحرسو المرمي, وما يفكرو يلعبوا هجوم وللا يقدموا عرض كويس :) في الحاله دي ألمانيا هي الحتبقي رهن المباراه التانيه وللا شنو؟
يا مورتا الكاميرون دقت كفر صح لكن كالعادة منتخبات اهلنا الافارقة فيها مشكلة تشطيب انيتا هنري هوتنبيرق او التجربة الدنماركية زي ما هي في فلم عادل امام فازوا عشان دنمراكيين بس
ايتو ما قصر والكاميرون ما قصرت والمدرب ماسورة لكن ما شديد انا لله...انا غايتو ببطل تشجيع تاني شكلي...انا شابك ليك امين انت كج لكن كل البشجعوا طلعوا كج نشوف من دوري الـ 8 البحصل شنو لانو مافي داعي للرهق ده
اتمناك طيب
06-19-2010, 09:53 PM
Al Sunda
Al Sunda
تاريخ التسجيل: 01-18-2005
مجموع المشاركات: 1854
سلام للمونديالاب هل لا تزال حظوظ الافارقة قائمة في المونديال ج. افريقيا الدولة المنظمة للبطولة خرجت نظريا من المنافسة بحصولها على نقطة من المباريتين وبأهداف(_) 3 الشيء الذي يستوجب انتصار لها على فرنسا باكثر من 5 أهداف وخسارة اي من المكسيك او الارجواي ولحقتها نيحيريا بهزيمتها من الارجنتين واليونان ونقاطها اللاشيء الكميرون بهزيمتها اليوم ودعت البطولة نهائيا الجزائر موقفها احسن إلى حد ما فوز الجزائر باكثر من هدفين على امريكا وهزيمة بريطانيا يصعد بالجزائر كفريق ثاني في الجموعة مع سلوفينيا وغدا إذا شاء الكريم نرى ماذا سيفعل دروبا ورفاقه
سلام يا مونديالاب.. ياخونا الولد دا بطريقته دي حيجيب لي اللوم معاكم يا اماني وقيقا ومعتصم.. انا عايزه يرد على تعليقاتكم الخاصه بيهو بنفسه.. وهو الايام دي غرقان مع زمايله في احتفالات استلامهم للدبلومات .. بالنيابة عنه اشكركم على تشجيعه وامنياتكم الطيبة له.. .. تصدقي يا اماني انت بقيتي اخطر من كباتنا المحللين .. انا ماقايلك دا كله ما شاء الله.. قلت ليّ اكرام الميت دفنه.. تصدقي انا حسيت بالغيرة لما شفت (الكوري) داك بكى عديل لما عزفوا النشيد الوطني بتاعهم.. ما عارف ليه ذكرني بحركته دي (الجماعة).. لما كانوا يجعروا مع اناشيد ساحة الفداء..ههه .. عارف يا معتصم لوما تحليلاتكم دي ما افهم الحاصل.. ياخي ثقافتكم الرياضية ممتازة فما تنقطعوا بالله.. يا خي انا كنت زول قوووون وصفقة ساااي.. اي واحد يجيب قون في الفريقين انا معاه.. المهم القون.. ( واخد بالك من قون دي) اها انا من الزمن داك ما زدت شبر.. تحليلك للطواحين في محله.. المدرب لعب المباراتين براس حربة واحد (فان برسي) ( كده صح ؟).. بقية الهدافين اصحاب الخبرة لا زال يحتفظ بيهم على مقاعد الاحتياطي.. على الرغم من انه حركته دي ما مرتاحين منها الهولنديين بصفه عامة.. .. شاكر ليكم يا جماعة تبريكاتكم وموازرتكم .. واتمنى ان يحافظ الاورنج على تفوقه لحد النهائيات.. رغم انه تاريخهم بقول انهم بخذلوا الناس في نهاية المطاف.. متعكم الله بالعافية.
يارب تنصر الالمان علي الاعدقاء اول مره اعرف انه الناس كاجانا كدا بالغتوا معاي والله يا اماني ومع سامي ولدي لو ما الحكم التــــــــــــــــــــافه داك ما كان لقيتوا فرصه شماته فينا لكين يوم الثلاثاء اولادنا بجيبوها راجعه المانيا العظيمه تطلع من تحت الرماد طلعتوا كلكم صهاينه والله خساره
أخوانا مورتا و Al Sunda ياهلا بيكم وبانضمامكم لركب البوست, واتفضلوا و Wave your flag :) شكرا أخونا Al Sundaعلي ملخص حظوظ الفرق الأفريقيه الواضح انها فعلا علي كف عفريت,, ربنا يستر ,,
ماما دوما,, خلاص عشان خاطر سامي انشاء الله غانا تتعادل مع ألمانيا (عشان نضمن صعود فريق علي الأقل من الماما أفريكا), وصربيا واستراليا يتعادلوا عشان تتأهل ألمانيا بفارق الأهداف :) لقيتيني كيف وأنا بحلم؟ ياماما دوما والله أنا خايفه علي غانا, وعارفه جماعتكم حيوروها النجوم في عز الظهر فماتخافي, وطمنّي سامي, الخايفين موت ناسنا بتوع غانا من الماكينات الجريحه هههههههه
المباراه الأولي ما شايلاها,, لكن غباشي وسيوبرفايزره حيحضروها أكيد لووووول
غباشي,, ايطاليا مع نيوزلندا, حتشجع منو؟ أنا غايتو الليله يومي, ومع الأتزوري أكيد اللي أتوقع انهم يلعبوا مباراه قويه ويستردوا كرامتهم,,
أمّا ساحل العاج والبرازيل, فدي مباراه أصعب من انه الزول يقدر يقعد ويحضرها ههههههههه نتمني للبرازيل شر هزيمه من برازيل افريقيا الأفيال العاجيه
أميره الشيخ مشجعه منو؟ أووووووعه البرازيل؟ ههههههه
أستاذنا م. الملك, تسلم والله, حسام يجي علي مهلو, نحن بس عايزين نقشر بيهو, عشان لما يبقي مشهوووور انشاء الله, نقول والله كان بيتونس معانا عاااادي في بوست المونديال
06-20-2010, 08:21 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
ذكّرتوني في كأس العالم 98 يا 2002 ما متذكر ناس تلفزيون السودان كانوا عاملين استوديو مباشر، جايبين كمية منظراتية وقاعدين يتكلموا في كورة البرازيل وفريق تاني المهم البرازيل كانت معصورة والجماعة شابكين ليكـ الاستوديو مفروض زجالو يدخل منو ويمرّق منو وكمية تنظيرات! أها اتصل عليهم واحد، سلّم عليهم وقال: إنتو جادين، عاملين عممكم الكبيرة دي وجايين تنظروا لينا في زجالو والبرازيل؟ يعني دايرين تعملوا فيها أحسن من مدرب البرازيل؟ طوالي سمعنا ليكـ (توت توت توت) الخط قطع، بتخيل لي كان داير يقول ليهم (قوموا لفّوا)، يا كمان طلع ليهم برررره المعايير
يا مونديالاب سلام أماني يا صاحبتي عذراً على الانقطاع الذي لازم الويك اند راجع ليك بي هدية و لي كل ضيوفك و المتابعين و شفع الجيران تطبيق على الفيس بوك اسمو (2010 World Cup Jersey) بيسمح ليكي تختاري قميص فريقك المفضل من الفرق الاتنين و تلاتين اللاعبة في كأس العالم بالرقم الانتي عايزاهو و تكتبي عليهو اسمك :) فكرة تسويقية و تشجيعية ممتازة للناس العايزين يقودو حملات لصالح فرقم المفضلة
* كما توقعت فقد خرجت الكاميرون بسهولة من كأس العالم بعد هزيمتها من الدنمارك التي لعبت بواقعية وتعامل لاعبوها مع المباراة بخبرة ولم يجاروا الكاميرونيين في لعبهم وفازوا بأقل مجهود .. نرجع ونقول الفرق الأفريقية لم تستفد من التجارب الكثيرة في مثل هذه البطولات وأضحت لا تقدم أي شي وفي المقابل نجد معظم الفرق المشاركة إن لم تكن كلها تلعب بوتيرة واحدة مع غياب تام للأهداف ونفس الشي شاهدناه في أمم أفريقيا السابقة والقبليها مع سهولة ولوج مرماها بأهداف سهله كما حدث أمس أمام الدنمارك ..
* براغواي تتخطي سلوفاكيا 2/صفر وتقترب من الصعود للدور الثاني لم أشاهد المباراة كلها عشان كده ما بقدر أحكم عليها ..
يا أماني مساء الخير .. غانا خلاص باي باي .. الفرق التي تلعب للتعادل غالباً ما تخرج مهزومة والماكينة الألمانية ح تدور تاني عن طريق غانا للأسف لأنها فرطت في فوز كان يضمن لها التأهل دون الدخول في حسابات مع بقية الفرق لكن نقول شنو حكمتو بالغة ..
قمر بوبا يا صاحب .. أمين دا إلا نبرّك ليهو فكي عشان ما يجي حائم بي جاي يا زول أنا معاك في الإنجليز ديل رغم المستوى الظهروا بيهو ..
أستاذنا محمد على طه الملك .. يديك العافية ياخ .. مع كل الأمنيات لحسام بالتوفيق وقول ليهو ألمانيا جايه جايه .. والله الشباب ما قصروا قدموا تحليلات شيقة وممتازة ..
تسلم ..
06-20-2010, 05:38 PM
معتصم دفع الله
معتصم دفع الله
تاريخ التسجيل: 12-18-2003
مجموع المشاركات: 12684
* أجبر النيوزلنديين الطليان للخروج بالتعادل معهم في المباراة التي جمعتهم قبل قليل .. الطليان فريق التعادلات العالمي وهي الطريقة التي يلعبون بها الخروج بأقل الخسائر .. من المفارقات في مرة من المرات في بطولة كأس العالم صعد الطليان للدور الثاني ومجموع أهدافهم هدف واحد كفل لهم الصعود .. عشان كده ما بحب كورتهم تحس بيها عقيمة وفاترة ..
غايتو يا أماني الطليان ديل كان صعدوا يكونوا ببالغوا عديل كده .. حظك يا غباشي قهرتو لينا الطليان ديل ياخ ..
06-20-2010, 06:16 PM
smart_ana2001
smart_ana2001
تاريخ التسجيل: 04-17-2002
مجموع المشاركات: 5695
Quote: يارب تنصر الالمان علي الاعدقاء اول مره اعرف انه الناس كاجانا كدا بالغتوا معاي والله يا اماني ومع سامي ولدي
خالتى دومة .... و الله يا خالتى دومة ما كاجنكم .....بنحبكم و بنحب عرباتكم( و انا شخصيا بحب ادواتكم الكهربائية شديد) و بلدكم النظيفة السمحة ...لكن كورتك ؟؟؟ما بنطيقها! المشكلة انكم بتلعبوا كورة ذى ما بتعملوا تصميم لعربية.....الكورة لازم تكون فيها حبة ابداع بشرى ...و تلقائية.... اما انتى و سامى ...بنحبكم شديد...بالجد!!!!!
اى زول بيشجع فرنسا ؟؟؟ الجماعة ديل خلاص ..موضوعهم انتهى. امس استقال مدير الفريق و مدرب اللياقة ....و الفريق رجع من غير تدريب...انهيار تام...
جاهزين لاحباط جديد من فريق افريقى ؟؟ استعدوا للكورة الجاية ...البرازيل و ساحل العاج!
06-20-2010, 06:16 PM
smart_ana2001
smart_ana2001
تاريخ التسجيل: 04-17-2002
مجموع المشاركات: 5695
Quote: و الله يا خالتى دومة ما كاجنكم .....بنحبكم و بنحب عرباتكم( و انا شخصيا بحب ادواتكم الكهربائية شديد) و بلدكم النظيفة السمحة ...لكن كورتك ؟؟؟ما بنطيقها! المشكلة انكم بتلعبوا كورة ذى ما بتعملوا تصميم لعربية.....الكورة لازم تكون فيها حبة ابداع بشرى ...و تلقائية.... اما انتى و سامى ...بنحبكم شديد...بالجد!!!!!
لوووووووووووول اسمارتي انا تصدقي انا بقول لابو سوزانا انهم جادين اكثر مما يجب . ما بعرفوا يخرمجوا ولا يعملوا اي شئ بصوره ارتجاليه الا كل شئ بتخطيط محكم . لكن مهما نقول عنهم من صفات سالبه هم شعب عظيم منتج و ومبدع ليتنا كنا بعشر احترامهم للعمل واتقانهم له .
معتصم ياصديق, الهجمه الهكريه لليوم الثاني علي التوالي, أودت بالبوست الي الصفحه الثانيه حيث الوضع أكثر أمانا :)
ود الصايم,,
Quote: بتخيل لي كان داير يقول ليهم (قوموا لفّوا)،
هسي نقوم نلف Clockwise وللا Anti clockwise؟
مالك ياود الصايم؟ فريقنا القومي ما يشارك, فنانينا ما يغنوا في الافتتاح, نحن ما ننظّر؟ تشجيع ساي ما نشجّع؟ انا لله ! بعدين الفرق دي لو كلهم مدربينهم شطّاااار كده, مالهم كلهم ما شالوا كاس العالم؟
Quote: يا أماني مساء الخير .. غانا خلاص باي باي .. الفرق التي تلعب للتعادل غالباً ما تخرج مهزومة والماكينة الألمانية ح تدور تاني عن طريق غانا للأسف لأنها فرطت في فوز كان يضمن لها التأهل دون الدخول في حسابات مع بقية الفرق لكن نقول شنو حكمتو بالغة ..
أنا لسه مصره انه الغانيين لو تقّلوا دمهم ولعبوا زي لعب النيوزلنديين بتاع الليله ده, بيقدروا يجيبوا التعادل, الفرق الكبيره البطوله دي بتتهزأ علي يد فرق صغيره, معقوله الغانيين يفرطوا في الصعود بعد ما قرّبوا منو كده؟ ربنا يستر :)
Quote: غايتو يا أماني الطليان ديل كان صعدوا يكونوا ببالغوا عديل كده .. حظك يا غباشي قهرتو لينا الطليان ديل ياخ ..
حرام عليك, أنا والمشجعين الايطاليين الفي الاستاد قربنا نبكي هههههه
لكن صدقني لسه عندي فيهم ثقه, حاليا باراغواي مترأسه المجموعه بأربعه نقاط, ايطاليا ونيوزلندا عندهم نقطتين, وسلوفاكيا نقطه واحده,
الطليان باقي ليهم مباراه مع السلوفاك, ونيوزلندا باقي ليها مباراة مع باراغواي ,
سلوفاكيا دي (جنينة المجموعه) ياقول غباشي وو وانشاء الله الباراغواي تهزم (رعاة البقر) الاسمهم ال All Whites ديل وتخلصنا منهم هههههه
Quote: معتصم والمايك متجول بين شيوخ الكره هنا افتونا في سته فرق افريقيه بعضهم سمان حد التمكن لا تنتج الا اصفار او اشباهها
شقدي سلام .. كيفك يا حبيب ..
أولاً لازم نقدر لأفريقيا ظهورها المتميز في بطولات الفيفا مما أجبرها لإختيارها كمنظم لكاس العالم 2010م ودا في حد زاته إعتراف بقوة فرقها وقدرتها على مجابهة الكبار .. لاحظنا منذ فترة ليست بالقليلة المشاكل التي تحيط بالاعبين الأفارقة المحترفين في الدوريات الأفريقية مع منتخبات بلادهم وهذا ظاهر في الهجمة الإعلامية عليهم وما تصريح روجيه ميلا عن إيتو إلا نتاج سلبية المحترفين الأفارقة والدليل على ذلك أيضاً لجوء الكاف لتنظيم بطولة أفريقيا لللاعبين المحليين التي تقام في السودان مطلع العام القادم لتقليل الإعتماد على المحترفين .. في بطولة أمم أفريقيا الماضية ظهرت الفرق الأفريقية بمستوى ضعيف ولاعبين سلبيين لذلك إنهزمت معظم الفرق الأفريقية المشاركة في كاس العالم من مصر الخالية من المحترفين عدا واحد أو إثنان لمدة قاربت الخمسة سنوات .. لو نظرنا لمستوى اللاعبين نجد مستواهم عالي جداً ومتميز فقط كأفراد ولكن كمجموعة لم تقدم شيئاً بل نالت هزائم من فرق متفوقة عليها تماماً .. الحسرة كبيرة وأفريقيا تنظم هذه البطولة لأول مره في تاريخها وكنا نمني النفس بالمواصلة وتقديم ما يجعل فرقنا في وضعها الطليعي بين فرق العالم ..
تحياتي ..
06-21-2010, 08:10 AM
معتصم دفع الله
معتصم دفع الله
تاريخ التسجيل: 12-18-2003
مجموع المشاركات: 12684
* البرازيل تتلاعب بالأفيال وطرد كاكا يفسد الأفراح ( العنوان دا عشان أميرة الشيخ ) .. لم يجد أبناء السامبا صعوبة في التغلب على الفيل الأفواري بعد أن فرض سيطرته على مجريات المباراة وتحرك لاعبوا السامبا في كل مكان من الملعب بفضل حركة كاكا في وسط الملعب وإيلانو وروبينهو على الأطراف يساندهم الطرف الأيمن مايكون مع صحوة لويس فابيانو وعودته لإحراز الأهداف وجاءت الأهداف سهلة لعدم تعامل مدافعي الإيفواري مع الكرة وإن كان الهدف الثاني مشكوك فيه تماماً .. طرد كاكا ساعد في عودة الفيل الإيفواري لأجواء المباراة ومهاجمة الفريق البرازيلي محرزاً هدفهم الوحيد ولكن الوقت لم يسعفهم لمعادلة النتيجة .. وكما أقول دائماً على اللاعبين الأفارقة التعامل مع مثل هذه المباريات بطريقة تضمن لهم الفوز وعدم الإستهتار وتضييع الفرص السهلة أمام المرمى لأنها تكلفهم الكثير .. الدفاعات الأفريقة أوضحت ضعفها وفشلها التام في كل المباريات ومعظم الأهداف التي ولجت المرمى لأخطاء فردية وتنظيمية .. مبروك للبرازيل .. ومبروك لأميرة الشيخ ..
Quote: معتصم ياصديق, الهجمه الهكريه لليوم الثاني علي التوالي, أودت بالبوست الي الصفحه الثانيه حيث الوضع أكثر أمانا :)
أماني صباح الخير .. وحاتك الهكر دا ما شفته .. وأنا أقول أنا قاعد أكتب براي مالي الليلة الحاصل شنو
Quote: معقوله الغانيين يفرطوا في الصعود بعد ما قرّبوا منو كده؟
الغانيين فرطوا زماااان .. يا أماني ما معقول تجيك الفرصة لغاية عندك وتضيعيها .. كل الفرق الأفريقية للأسف ضيعت فرصتها في الصعود للدور الثاني .. مع إنها تتفوق على معظم الفرق التي لاعبتها وبفضل خبرة لاعبيها المحترفين في أقوى الدوريات الأوروبية لكنها لمتشفع لهم .. ربنا يكضب الشينة وغانا تصعد للدور الثاني .. صدقيني ولا أخفيك سراً أنا أحب غانا جداً ومتحسر لغياب مايكل إسيان لأنه القائد واللاعب الخبرة في الفريق .. دي بس زعلة من الفرق الأفريقية ساي ..
قلتي لي جعرتوا عديل كده عارفه الطليان ديل قاعدين يصعدوا سلفقة ساي وفي نفس الوقت بشيلوا البطولة كيف ما عارف .. الدوري الأيطالي يعج بالنجوم من البرازيل والدول الأخرى عشان كده تأثيره على اللاعبين الطليان كبير لذلك تجدين نقص واضح في التشكيلة الأيطالية وخصوصاً في خط الهجوم دفاعهم متميز مافي شك والوسط لحدٍ ما ممتاز .. على كل حال عندهم فرصة للصعود وما أظن يضيعوها ..
Quote: معتصم ياكبير المحللين شايفاك زى الماعجباك البرزيل كدا.. حلل بحياد والله اسي نملا ليكم الاستديو دا حجار,,
أميرة الشيخ مشتاغووون ياخ ومبروك للبرازيل .. ياخي أنا ما قاعد أشجع الفريق البشجعوهو كل الناس هههه .. عارفه أنا وصلاح شتات الشحمة والنار في البرازيل دي .. هو ما عنده فريق تاني في العالم غير البرازيل وللأسف بحب أيطاليا وبكره فرنسا .. وأنا قلت ليهو كله إلا فرنسا دي ياخ .. غايتو بعودة الروح لكاكا عادت السامبا من جديد لعزف أجمل الألحان .. لكن يا فرحة ما تمت كاكا عادوهو الطليان وخلوا أخلاقه ( كعبه ) ..
06-21-2010, 10:53 AM
غباشي
غباشي
تاريخ التسجيل: 01-19-2007
مجموع المشاركات: 1729
سلامات يا مونديالاب و الله يا معتصم ماشة باسطة مع All Whites و الناس هنا مصدقة البحصل الصباح لما مشيت الجامعة كل دكاترة القسم و الاسطاف دايرين يطيروا من الفرح و الابتسامات للضرس الاخير ..... هاهاهاها بالجد ما متوقعين انهم يظهروا بالمستوى دا .... وهم كانوا فرحانين من تعادلهم مع سلوفاكيا اما كورتهم بتاعت امبارح مع ايطاليا اتخلعوا بيها عديل واحد من الدكاترة قال لي It is unexpected result يا جماعة انا قلبت و بقيت مع فريقي الجديد بتاع المفاجأت GO ALL WHITES GO! .... ALL WHITES و كفانا من افريقيا و احباطاتها المستمرة ....
زي ما قلت ليك يا أماني الناس ديل ما عندهم كبير غرض مع السوكر , يوم السبت الفات فريقهم بتاع الرجبي All Blacks كان لاعب مع ويلز في مدينتنا طبعا مدينتنا دي نتشة بالله الاعمى شال المكسر جونا عملوا لينا زحمة و كملوا لينا الاكل وصفوف عشان الاوتوغرافات و التصوير مع نجوم All Blacks (طبعا هم ما نجوم ولا حاجة ديل عبارة عن رباطة بس, بالله الواحد فيهم عبارة عن مسطبة) الكلام دا دا بيني و بينكم .... الدنيا ما معروفة السنة الجاية كأس العالم للرجبي و منظمنوا هنا و انا من هسع حاشتري التي شيرت بتاع All Blacks و ربنا يحيينا ..... شوفي ناس الجرايد هنا قالوا شنو عن All Whites Vs Italy
Quote: Great result, but not one of NZ's biggest sporting upsets
Quote: A 1-1 World Cup draw against world champions Italy today represented the greatest result in New Zealand soccer history
Quote: "Today's result was probably the greatest New Zealand soccer's ever had,"
Quote: International journalists touted it as a huge shock, saying New Zealand had proved far more resilient than anyone had imagined, although Switzerland's win over world No 2 Spain remained the upset of the tournament for most.
Quote: "Let's just celebrate (today's result) for what it is"
و دا كلام مدربهم بتاع كاس العالم 82 و من الزمن داك ما شموهاالا في الكاس دا
Quote: the result was wonderful
Quote: "Absolutely incredible. Stunning. You can't use enough superlatives to pronounce the end result," he said.
Quote: However, even without considering getting past the group stage, the team had outstripped all past achievements by the country in the sport.
و الله مدربهم القديم دا الحاصل عليهو زي ما قال عادل امام (بتجيلي روح معنوية) لمن ما قادر يعبِّر والله ناسي ديل متصالحين مع نفسهم خالص
06-21-2010, 11:07 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
* البرتغال تتلاعب بكوريا الشمالية وتسحقها بالسبعة .. لم يجد الفريق البرتغالي صعوبة في الفوز على فريق كوريا الشمالية رغم أدائه الممتاز في الشوط الأول والذي إنتهى بنتيجة 1/صفر ولكن إنقلبت الإمور تماماً في الشوط الثاني والذي إستقبلت فيه الشباك الكورية 6 أهداف من أصل 7 كل هدف يحكى عن روعته .. المباراة في مجملها جميلة وسريعة بسط فيها البرتغاليون سيطرتهم على مجريات المباراة خصوصاً الشوط الثاني وكان لأداء رونالدو نجم المباراة الأول حسب إعتقادي الدور الكبير في النتيجة ولتألقه الملفت .. بهذه النتيجة تكون البرتغال قد أدخلت الفيل الإيفواري في نفق ضيق ولن يستطيع هزيمة الكوريين بهذه العددية ..
Quote: و الله يا معتصم ماشة باسطة مع All Whites و الناس هنا مصدقة البحصل الصباح لما مشيت الجامعة كل دكاترة القسم و الاسطاف دايرين يطيروا من الفرح و الابتسامات للضرس الاخير ..... هاهاهاها
غباشي إزيك .. ياخي أنا زاتو كيفوني للطيش كيه في الطليان ديل ياخ .. أنا كل ما ألقى لي فريق يزنقهم بشعجه ليك طوالي ..
أستاذنا محمد على طه الملك .. يديك العافية يا حبيب وشكراً على التشجيع ..
06-21-2010, 05:40 PM
معتصم دفع الله
معتصم دفع الله
تاريخ التسجيل: 12-18-2003
مجموع المشاركات: 12684
* برأسية مارك كونزاليس شيلي تفوز على سويسرا 1/صفر .. إجمالاً مباراة متكافئة مع بعض التفوق للفريق الشيلي وإماكنية مضاعفة النتيجة لولا سوء الطالع الذي لازم المهاجمين .. بهذه النتيجة يصل الفريق الشيلي للنقطة السادسة والصعود للدور الثاني وبقاء سويسرا في نقاطها الثلاثة وفي إنتظار ما تسفر عنه مباراة إسبانيا وهندوراوس ..
06-21-2010, 05:51 PM
GamarBoBa
GamarBoBa
تاريخ التسجيل: 03-07-2002
مجموع المشاركات: 4985
انا غايتو جيت راجع قبيل حضرت لي كورة امسخ من موية السحور..نعستني عديل بين شيلي وسويسرا اخوكم طشا شبكة المونديال للنتائج الغريبة الحاصلة غالبا ادخل الشبكة فوز الاسبان ولو اتغلبوا غايتو بطش تاني
.... انتو في ده ولا مشيت الليلة المكتب لقيتهم قالوا تونس هزمت السودان 7 حاجة كدة انا قايل الكلام في التسعينيات ولا اقدم قالوا امس بس طيب ولا كنت عارف
الكلام دا لو جد بقى انا محتاجة اعتذر للتوانسةالمعاى هنا رسمى وشعبى لانى غالطهم غلاط السنين وقلت ليهم دا طبعا امنيتكم تهزمونا6/2 لكن نوى وى لانو اصلا مافى ماتش معلن بينا والدورى فى,اى مكان واقف بسبب كاس العالم.. قلت ليهم الا تكون المبارة دى ملعوبة فى بيت مافى استاد,
مساء الخير يا مونديالاب,, بعتذر عن الغياب, بس والله مشغوله خالص خالص, لدرجة الليله ما حضرت أي كوره, لكن ناويه أحضر كورة أسبانيا انشاء الله,
معتصم الله يملاك عافيه,, ملخصك جميل وبيديني فكره عن الحصل في المباريات بمنتهي الدقه, تسسسسسلم,,
المونديال بقي تراجيدي وحزين وقلبنا وجعنا خلاص ههههههه
امبارح ساحل العاج والبرازيل حضرت الشوط الأول وغلبني أكمّل, أنا بكره البرازيل (دي علي وزن أنا بكره اسرائيل لووووول) ,
أميره الشيخ شجعتي البرازيل ومبسوطه بفوزهم؟ زعلانه منك (علي قول حمودي ولد أختي)
الليله ناس البرتغال عرفت انهم غلبوا كوريا الشماليه سبعه صفر !!!!!! (زعلانه منهم) برضو, كوره وللا حرب؟ حركه ما ظريفه منهم أربعه أقوان ما كفايه؟ عملوا الفريق (جنينه) واتفسحوا فيهم (ياقول غباشي)؟ انا لله !! غايتو احتمال يكون الخال أمين ياسمين شافهم في رؤيا ولا حاجه, السبعه صفر دي ماطبيعيه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة