|
Re: الريد سما، قال للسحاب خليك هنا، بنزل أنا (Re: أبوذر بابكر)
|
جوه فى نبض الوريد إتوهطت ريدتِك قَدَرْ حكاية الزول البِريد منسوجة زى طِرح المنى مغزولة زى ونسة قمر خت النجيمات البتضحك جنبو فوق بِرش السهر
قال ليك بريدِك يا قَدَرْ يمين بريدِك يا سفرْ مشوار قِصيّر وما انتهى ريداً يِحيّر ما انتهى وحكاية الزول البِريد مصلوبة فوق حزن الغنا مشدوهه فى القُرب البعيد
مرات أقول يمكن تجى تبسم اللحظة وتدون إسمك النديان حضور مرات أقول يمكن تهل تضحك الفجة وتدوزن رسمك المليان زهور
مرات أقول وأتمنى فيك أملا المحلات بالغنا وينضم ليا غنا القمر تتبهرج النجمات تجيك نشوانة زى رعشة وتر وأنسى العنا
ناديت سماك مسكت فى الفرح العنيد نزلت أمانى الشوق مطر الريد سما قال للسحاب خليك هنا بنزل أنا وقدام حقول أشواقى ليك غطى الجناحين بالرحيق وبسراع هطل
يا ريت تجى تصبح وجوه الدنيا عيد تضحك محطات السفر
نتلاقى فى الحلم البعيد تضحك عيونك وتحكى لى عن الحصل أحضن بهاكِ وأشيل غناك أرحل مع ريدك وحيد
يمكن تجى أو ليك أصل وكل الحصل من بعد ما ردتِك أكيد إنه البشارة بقت عيونك وبقيتى عنوان الأمل
| |
|
|
|
|
|
|
Re: الريد سما، قال للسحاب خليك هنا، بنزل أنا (Re: أبوذر بابكر)
|
الشاعر المرهف ابو ذر بابكر أيوه كده أظهر وبأن عليك الأمان
انت عارف يا ابو ذر والله العظيم عرفتك ( شاعر) قبل ما تنزل هذه
الأبيات عارف ليه لاني دائماً بلاقيك في مكان الشعر والشعراء
وقد لا تصدق مدي سعادتي وأنا أقراء في هذه الأبيات الجميلة
الراقية والليلة بقول النجوم زادت عدد , أملي كل أملي
أن تواصل ويبدو من شكلك في الصورة خجول شوية , يأخي
كلنا في الهوي سوا إلي الأمام يا شاعر الحوبا .
| |
|
|
|
|
|
|
Re: الريد سما، قال للسحاب خليك هنا، بنزل أنا (Re: أبوذر بابكر)
|
نتلاقى فى الحلم البعيد تضحك عيونك وتحكى لى عن الحصل أحضن بهاكِ وأشيل غناك أرحل مع ريدك وحيد
يمكن تجى أو ليك أصل وكل الحصل من بعد ما ردتِك أكيد إنه البشارة بقت عيونك وبقيتى عنوان الأمل
يا سلام عليك أستاذ أبوذر وتبقى أنت عنوان الأمل والريد شكرا يا فنان
| |
|
|
|
|
|
|
|