|
|
 Re: أبو آمنة حامد وذكرياتي معه (Re: د.كمال الدين عبد المحمود)
|
3) مرة كنا متواجدين بمنزله بحي الدناقلة وجاء أحد أبناءه وطلب منه بعض النقود وأذكر أن اسمه باسل ولديه مقدمة راس كبيرة هنا قال له أبو آمنة ( يا ولد أبعد مني ، الولد ده عامل جبهتو زي الجبهة المعادية للاستعمار ) و أضاف ( الولد ده من شكلو ما حيكون عندو مستقبل ومصيرو يكون باك شمال بنادي التزكار ( كان نادي التزكار في الدرجة الرايعة )
4) في واحد كسب تذكره طيران له ولأحد ابنائه في يا نصيب لألمانيا وكان الولد فيه شيءٌ من التخلف وبعد ذهابهم ورجوعهم للسودان قال أبو آمنة لهذا الرجل ( انت لما ربنا رفع قدمك ووصّلك لحدي ألمانيا الولد ده جايبو راجع معاك ليه ، ما كان أحسن ليك تبدلو بتفلزيون ملون ) .
5) مره بالقاهرة كنا ضاربين الفلس .. وكان لدى أبو آمنة سجائر مستورد و أراد استبداله بسجائر محلي هنا قلت له انا ( يا أبو آمنة ما تكون زي الناس الذين يبيعون الدجاج والبيض واللبن عشان يشتروا ويكة وهذا السجائر لو سهّيت من السجارة .. دقيقة تلقاها انطفت براها ) رد علي أبو آمنة كمان الواحد ما ممكن يكون لابس بدلة .. وكرفّته وتحت مافي بنطلون وقال لي هذا السجاير غير انو رخيص بيوفر ليك بكره حق الفطور والغدا والعشا ( يعني سجاير يقفل النفس ) .
6) أذكر مره ذهبنا لدكّان مقابل مستشفى أحمد قاسم وفي نفس الوقت كان الراديو يذيع اغنية سال من شعرها الذهب هنا قال أبو آمنة لصاحب البقالة .. القصيدة دي بتاعتي انا رد عليهو صاحب الدكان " لا القصيدة ما بتاعتك دي بتاعت الشاعر أبو آمنة حامد " رد عليهو أبو آمنة ( و أمال انا أبو قطاطي ) مع الإعتذار للشاعر الكبير أبو قطاطي .
7) مره كنا بدولة الإمارات العربية المتحدة وكان ابو آمنة قد وصل قبل أيام قليلة و لم ترق له الغربة و كان محبطاً ويود الرجوع للسودان وعند منتصف الليل وقف أبو آمنة فجأة وسأله كابتن فيصل عصبة لاعب نادي المورده سابقاً وقال ليهو ماشي وين يا أبو آمنة رد عليهو أبو آمنة ( ماشي الأوضة التانية اتفسح ، يعني حكون ماشي وين ) و أضاف أنا راجع السودان عشان لما بنزل المطر على بيوت الجالوص استمتع بالرائحة الحلوة ).
8) مره أتى إليّ بمنزلنا بحي المزاد بحري وكنا جالسين في الشارع وفجأة حضر إلينا صديق لا يعرفه أبو آمنة وكان يعمل بوكالة الأنباء السودانية وحينما تعرف على ابو آمنة قال له ان النميري عندو خطاب اليوم وبالخطاب فقرة عن الشاعر بو آمنة حامد ضرب أبو آمنة الجرسة الشديدة و قال ليهو يا أخ ما متزكر الكلام القالو عني النميري رد عليهو والله ما متزكر الكلام بالضبط لكن متاكد انو الكلام عنك هنا قال لي أبو آمنة ( ما تجييب ليهو كرسي لو ما اتزكر الكلام ) وبعدها اردف أبو آمنة وقال ( لو حدثت مشكلة مع مامون او خالد او زين العادلين الواحد ممكن يعالج المشكلة معاهم لكن اب عاج مره واحده منو البيقدر عليهو . خلاص انا انتهيت ) وبعد شوية لم يذكر النميري اسم أبو امنة بل قال ( بخصوص الصحفي الذي انتقد تعرفة المواصلات ، ده نقد بناء وهادف وعايزين كلو الصحافيين يحزو حزه ) هنا تنفس أبو آمنة الصعداء . وعدها ذكر النميري في خطابه وقال ( حينما اكتظت جماهير مدينة هيا الباسلة للقائي ) هنا صرخ أبو امنة وباعلى صوته وقال لي اقفل الراديو ده ، ده كزاب ، بقى مدينة هيا دي بلدي ولا يوجد فيها شخص غير ابوي وامي ومحولجي بتاع قطر ، كيف تلاتة انفار يكتظوا و تابع بعدها ، كان في واحد رابع معاهم بتاع طابونه قفّل من زمان ومشى .
9) ترشح أبو امنة للبرلمان خلال الفترة الديمقراطية بإحدى دوائر الخريجين بالبحر الأحمر وكان نازل اتحادي ديمقراطي وفي آخر لحظة سحب الحزب ترشيحه لابو آمنة . سالته لماذا ؟ قال لي ( قالوا انا شيوعي ، وانا ما كنت عايز حاجة من البرلمان غير ان فيه كشك فيه ليمون بارد وانا كنت عايز اشرب كباية ليمون بارده قبل ما ينط عليهم عسكري ويقلبها عليهم .
10 ) مره طلبت منو ان يعمل اليّ تاشيرة دخول للسعودية تكون دخول للرياض رد علي ( وهو انا قادر ادخل الرياض الحلة ).
11) حينما أغلق محافظ الخرطوم مهدي مصطفى الهادي بيوت الدعارى بالعاصمة كتب أبو امنة في إحدى الصحف المحلية اليومية وقال ( جميل ان بغلق المحافظ بيوت الدعارة ولكن الآن أصبح البغاء للأصلح ).
12) احدى الصحف الاماراتية طلبت منه عمل لقاء صحفي مع رئيس دولة اثيوبيا حينها منجستو وبدلا من ان يسافر من الامارات لاثيوبيا فضل الرجوع إلى السودان وعند اجازتي السنوية قلت له ( الجماعة ديل لازال منتظرين التحقيق الصحفي مع منجستو ) رد علي ( والله إلا اعمل ليهم مقابلة مع منجستو لاعب نادي المورده ) .
13) مره دخل شقة طلاب اصدقاءنا بالقاهرة وفتح التلاجة ووجد بها باقي صحن فول وزجاجة ماء فارغة فقط هنا قال لهم ( التلاجة دي حقو تأجروها عشان تستفيدوا منها ) .
14) احد اصدقائنا بمدينة بحري ترك الدراسة عند المرحلة الابتدائية ولم يلتحق بأي عمل طيلة سنوات عمره ، الصباح جالس تحت ظل الشجر بالشارع ، العصر تمارين كورة قدم الليل اما في السينما او اول كرسي تلقاهو عند أي حفلة و ما مهم أهل الحفلة يعرفوه او لا .. مره ابو امنة قال ليهو اتفضل اتغدا معانا رد عليهو هذا الشخص وقال ليهو ( يا استاذ انا مستعجيل وما بقدر اتغدا معاك ) رد عليهو ابو امنة ( ليه انت مستعجل اصلو انت محصل المكتب؟ )..
15 ) مره ذهبت معه ومعي شقيقي محمد الحسن عبدالمحمود لزيارة الزميل محمد عثمان علي عمر وكان شيوعيا احمراً ، طلب منه محمد عثمان ان يسجل له بعض القصائد وسجل له ابو امنة العديد من القصائد وكانت كلها موّجه ضد ثورة مايو وبالتحديد ضد النميري وبعد ان فرغ من التسجيل خاطبت انا محمد عثمان وقلت ليهو ( بالله عليك الشريط ده ما يسمعو أي زول ) رد علي محمد عثمان وقال لي ( انا حسمعو لشخص واحد بحبو ) وهنا تدخل ابو امنة قائلا لمحمد عثمان سّمع الشريط ده للشخص البتحبو و القمندان البتحيو ، ورجل الأمن البتحبو اصلو انا ما بتجيني ورطة الا من اولاد عبد المحمود ديل ) .
16) كان ذات مره بالقاهرة مع الشاعر السر قدور ووقع ابو امنة من السلم قال له السر قدور حرّك اصابعك وحبنما حرك ابو امنة اصايعه رد السر قدور مافي كسر ، هنا نظر إليه أبو آمنة والذي كان يعاني من الأمل وقال للسر قدور ( عيادتك في أي شارع يا دكتور ؟ عشان لو حصلت مضاعفات ممكن اراجعك
المهم بعد ما عملوا ليهو صور الاشعة اللازمة وجد به 3 كسور وبكوع اليد اليمنى ( ده طبعا من اصعب انواع الكسور ) وادخل ابو امنة مستشفى الطلبة بالقاهرة وكان في كل غرفة يوجد طالبان ذهبنا انا وشقيقي محمد الحسن عبد المحمود و موسى بيرق وخضر فضل الله لزيارته وحضر الممرض المناوب لإعطاء حقنة منومة ( فاليوم ) اصلا كانت مقررة لأبو آمنة . هنا قال ابو امنة للممرض ( الحقنة دي ما بتاعتي بتاعت الطالب المصري الراقد معاي بالغرفة واشار الى الطالب رفض الطالب الحقنة وصاح فيه الممرض يا جبان تخاف من حقنة و بالقوة اعطى الممرض الحقنة للطالب المصري وهنا قال أبو آمنة ( ايوه كده احسن ينوم و يخلينا ننوم طول الليل يكورك آه آه آه ) .
ويتبع غداً
|
|
 
|
|
|
|
|
| العنوان |
الكاتب |
Date |
| أبو آمنة حامد وذكرياتي معه | د.كمال الدين عبد المحمود | 03-12-07, 05:47 AM |
| Re: أبو آمنة حامد وذكرياتي معه | abas | 03-12-07, 05:57 AM |
| Re: أبو آمنة حامد وذكرياتي معه | Adil Osman | 03-12-07, 06:39 AM |
| Re: أبو آمنة حامد وذكرياتي معه | abas | 03-12-07, 02:15 PM |
| Re: أبو آمنة حامد وذكرياتي معه | صديق الموج | 03-12-07, 03:09 PM |
| Re: أبو آمنة حامد وذكرياتي معه | د.كمال الدين عبد المحمود | 03-13-07, 05:36 AM |
| Re: أبو آمنة حامد وذكرياتي معه | Osman Musa | 03-13-07, 06:29 AM |
| Re: أبو آمنة حامد وذكرياتي معه | د.كمال الدين عبد المحمود | 03-13-07, 12:07 PM |
| Re: أبو آمنة حامد وذكرياتي معه | Kamal Karrar | 03-13-07, 01:46 PM |
| Re: أبو آمنة حامد وذكرياتي معه | Kamal Karrar | 03-14-07, 02:07 PM |
| Re: أبو آمنة حامد وذكرياتي معه | د.كمال الدين عبد المحمود | 03-15-07, 09:53 PM |
| Re: أبو آمنة حامد وذكرياتي معه | د.كمال الدين عبد المحمود | 03-16-07, 10:52 PM |
|
| |
فيس بوك
تويتر
انستقرام
يوتيوب
بنتيريست