محاوله لجمع كل الأغاني السودانية التي تتعلق بالسواقه ( القيادة ) وسائقي مركبات النقل وعلاقتها بوصول الحبيب من بعيد أو بذهابه ورحوله أو تكون أنت علي ظهر هذه المركبة وتناشد السائق أن يطوي بك الأرض ويضعك سريعا في أرض الحبيب أو تستعجله لكي تدرك قطارا أو طائرة أو حتي باخرة. أعزائي أطمع كثيرا في مشاركتكم وزكرياتكم . دمتم
البنية ما بنية يا ست العربية عربيتك الصالون خضراء ومليحة لون بتسابق البالون والبجري في العتمور غناها الفنان حسن عطية ولي عودة يا تومي معاوية في موضوع السواقة والسواقين عميد الفن السوداني الحاج محمد احمد سرور كان سواق يعني البوست حيلمو فيه ناس احمد الامين ويسوقوه ليك من سايق الفيات مرورا بالوبوباي وانتهاء بالكامري
03-09-2007, 11:24 AM
SAMIR IBRAHIM
SAMIR IBRAHIM
تاريخ التسجيل: 01-05-2007
مجموع المشاركات: 2628
حسن عطيه فى كسرته بعيده شندى يحث سائق الاتومبيل على الاسراع" طير يا تومبيل وصلنى المطار" من اغنيات البنات خلال الحرب العالميه الثانيه وسفر الاحباب لجبهات القتال ضد هتلر..كذلك كما قال احمد عجوز اغنيه" ست العربيه" التى لها لحنان اولهمالشاعر الاغنيه نفسه الزراعى العليل بشير عبد الرحمن مؤلف اغنيه جبال التاكاوبنت النيل ويؤديه حسن عطيه اما لحنها الاخر فلعبدالمعين ويؤديه ثنائيا مع الفلاتيه فى اكثر من مناسبه..عبيد الطيب الذى اعاد استنساخ صوت سرور صدح ب " ياسايق يارايق النظره ماشى وراك وقف وقف وسوقنى معاك" كذلك يغنيها الاتبراوى وابو داؤد...ثنائى النغم زينب وخديجه تغنيان " سايق العظمه سافر خلانى" واحيانا يؤديها زيدان فى قعداته التى يصفو فيها ويتجلى كثيرا وينفح الاذن باغنيات لاخرين كحسن عطيه الشفيع وابراهيم عوض....زكى عبدالكريم غنى " سايق القطار قم بينا لبت الشمال ودينا "...ود المقرن غنى " سافر قطارو حبيبى ودع قام"...ود القرشى على حنجره الكنار الشفيع صدح كثيرا للقطار وحركته ...بلبل كردفان ناشد الكباشى السائق الشهير ان يوصله ود بنده فى اغنيته الليمونى وعبد القادر سالم " اللورى حل بى دلانى فى الودى" وموسى ابا غنى" بركب الكركابه بدلى فى امروابه " .. كثير من الفنانين والشعراءعملوا سائقين مثل سرور الذى كان هو نفسه سائق الفيات مع العبادى وزين الشباب وامين الناس على الاطلاق وسيد عبدالعزيز عمل سائقا بالنقل الميكانيكى واغنيته الرائعه "مسوا نوركم وشوفوا من جبينا صباح..الصباح ان لاح شن فائده فى المصباح" من وحى سفريه تعطلت بها شاحنته فاعاقته من حضور تكمله زواج خدنه عبيد الرحمن ف"اشتكى للقمرى ولم يعيره جناح" والقصيده الاغنيه ملهمتها زوجه عبيد صديقه .. ود ماحى عبدالله كان يعمل سائقا فى الثلاثينات بوزاره الصحه بين مكوار ومدنى السنى..
Quote: صدقني يا معاوية بي طريقتك دي يوم بتكتل ليك زول !!
فعلا يا ناذر والله يسترنا ساكت من شغل معاوية وعجوز ديل ياخ الناس ديل وقعوا فينا(تاح تراح) غناء نضيف وحس عالي ومرهف وعزالين غناء نضيف ورسموا معا علي ارض هذا المنبر اجمل اللوحات.. ورجعونا للزمن الجميل.... معاوية ياخ الله يديكم العافية ولعجوز كل الحب والتقدير... (الكلام النضيف نضيف..والغناء الما خمج بعجب بدون شك)...وواصل يا زول ومعاك
03-10-2007, 08:05 AM
Moawia Mohammed
Moawia Mohammed
تاريخ التسجيل: 10-24-2006
مجموع المشاركات: 3777
الفنان صاحب الصوت الحنون الخير عثمان صاحب الاغنية الجميلة خالص (حنتوب الجميلة) كان سائق تاكسي بودمدني . الشاعر حميدة ابو عشر(وداعا روضتي الغناء ) كان سائق لوري. والسواقة فن وذوق البوست ضم ناس يحلو معاهم السمر وتحلو بصحبتهم السواقة والواحد بسوق بمزاج لمن يكون الراكب جنبو انسان جميل كان خلقة او اخلاق. وآ ناري الما بقيت سواق اطلع العالي وانزل الدقداق.
03-12-2007, 11:12 PM
Moawia Mohammed
Moawia Mohammed
تاريخ التسجيل: 10-24-2006
مجموع المشاركات: 3777
Quote: وآ ناري الما بقيت سواق اطلع العالي وانزل الدقداق.
انت زاتك كنت سواق تتذكر لمن كنت سايق بص الحقيبة الكان شغال في خط الصحافه ونحن كل يوم مشمعين فيهو ومابين نتدلي كنت أحرف سواق في الخط داك وفعلا كنت بتطلع العالي وتنزل أأخ أيام ربنا يعودها
03-11-2007, 06:56 PM
عبد الدائم سيد أحمد
عبد الدائم سيد أحمد
تاريخ التسجيل: 10-28-2006
مجموع المشاركات: 4220
العزيز معاوية والله مواضيعك دائماً متفردة ودمها خفيف ومكتوبة بكرتين.. وهاك المشاركة دي مني: القطر الشال معاوية يتكسر زاوية زاوية القطر الشالك إنت يتكسر حتة حتة هي بداية لأغنية طويلة كتبتها عاتكة بنت الحارث التغلبية في معاوية بن أبي سفيان عندما علمت بأنه مسافر إلى نجد.. وعاتكة هذه قيل بأنها امرأة دميمة وحاسدة وقريبة مهوى القرط لذلك استخدمت لغة (عليّ وعلى أعدائي).. ويدخل الطيارون ضمن نقابة السواقين والشاهد في ذلك إنو في واحد شاكل أخوهو وكان شغال طيار وقال ليهو (إنت متقرضم كده قايل نفسك شنو؟ ما سواق طيارة بس).. طيري يا طيارة طيري.. امشي لابوي في بلد الغربة.. ومن الأغاني المشهورة أغنية قطار الشوق متين ترحل وهي من الأغاني الجميلة والمحببة للناس.. وكان لقيت فرصة بجيك صادي إن شاء الله..
03-11-2007, 09:48 PM
عصام دهب
عصام دهب
تاريخ التسجيل: 06-18-2004
مجموع المشاركات: 10401
الأخ / معاوية تحياتي و أشكرك على هذا الجهد القيِم .. في بداية التسعينات و في أحد مكاتب القومسنجية بمدينة الأبيض ( الأبيض / النهود ) كنت أجلس مع صديقي و بعض السواقين و عرفني بواحد منهم هو الأشهر في الغرب و هو العم كباشي المذكور في الأغنية الشهيرة ( كباشي كان برضى وصلني و د بندة .. خلي نأخد سندة .. الفرع البي فوقي .. قمريتا بتقوقي .. جراري خاجوقي .. نساني أشيل توبي .. زراعنا في البورة .. واطاتا ممطورة .. زولن سمح صورة .. بالفاتحة بندورا .. الوالد سيبيني .. الجراري راجيني .. برادك الصيتي .. قريافة راميني .. ) و ليتك أتحفتنا بتسجيل لهذه الأغنية مشكوراً ..
03-12-2007, 11:41 PM
Moawia Mohammed
Moawia Mohammed
تاريخ التسجيل: 10-24-2006
مجموع المشاركات: 3777
Quote: والله مواضيعك دائماً متفردة ودمها خفيف ومكتوبة بكرتين..
فعلا مكتوبه بكرتين وملفوفه بكيبوردين
Quote: هي بداية لأغنية طويلة كتبتها عاتكة بنت الحارث التغلبية في معاوية بن أبي سفيان عندما علمت بأنه مسافر إلى نجد.. وعاتكة هذه قيل بأنها امرأة دميمة وحاسدة وقريبة مهوى القرط لذلك استخدمت لغة (عليّ وعلى أعدائي)..
هسه دي يانصر بكم كـ.... لكن لقيتك خيالك وااااسع
Quote: وكان لقيت فرصة بجيك صادي إن شاء الله..
عليك الله بسراعك نعمنو كلامك لذيذذذ تسلم يا جميل
03-12-2007, 11:24 PM
Moawia Mohammed
Moawia Mohammed
تاريخ التسجيل: 10-24-2006
مجموع المشاركات: 3777
اما الفنانين الجداد فاغلبهم سواقين رقشات: محي الدين اركويت: سائق منهم
عمي محمود حسين الله يرحمو: شاعر لاغنيات كثيرة لصلاح مصطفي: وعائشة الفلاتية ومني الخير وتيمان عطبرة...ونادر خضر حديثا...ومصطفي سيد احمد قديما...برضو كان سائق تاكسي حريف
بالمناسبة موصلي كمان لحن ليه اغنية يا خدارنا:
03-13-2007, 03:25 AM
khaleel
khaleel
تاريخ التسجيل: 02-16-2002
مجموع المشاركات: 30134
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة