|
|
 لماذا لم يعد يحبني؟؟ عشان نقناقة!!!!!!!
|
نعترف كنساء بحب الكلام..
نحب معسوله ونعشق عبارات الغزل والمدح...
يظل الحب لدينا مشتعلا بقدر ما تستطيع كرجل ان تعبر لنا عنه...
وتزداد خفقات قلبنا مع كل كلمة حب او اطراء...
وربما اقل من ذلك!!!
فمجرد الحديث وتبادل الاراء يزيد حبنا اشتعالا...
نعشق ذلك الطفل,, الذي نوليه رعايتنا واهتمامنا ونلاحقه بالاسئلة للاطمئنان عليه...
وبالمقابل
ننتظر منه الاهتمام والعناية بنا ايضا...
وهنا نقف عند مفترق الطرق!!!!
ونبدأ "بالنقة" لاخباره بحوجتنا اليه
ولكن......
يبدو انه يتوجب علينا ان ننسى كل ما عرفناه عن اهمية التحاور, فالكلام قد يكون اسرع طريقة للانفصال!!!
لانك تتهمين عندها "بالنقة".
قرأت اليوم هذا المقال, الذي ساورده لاحقا, فعلمت لماذا يتهمنا الرجال "بالنقة"...
وادركت ان الامر لا يكمن في "نقتنا" بل في اختلاف طبائعنا وميولنا كنساء ورجال...
ومنه ادعوكن للتوقف عن "النقة" (دي غايتو نصيحة مني لوجه الله كان دايرات تحافظن علي رجالكن),, واعتذر بشدة لمن يظنني "نقناقة" مع وعد بعدم التكرار
|
|
 
|
|
|
|
|
|
|
 Re: لماذا لم يعد يحبني؟؟ عشان نقناقة!!!!!!! (Re: عاصم ابوبكر حامد)
|
ان الاسطورة الاولى فيما يخص العلاقات المشتركة هي ان التحاور مع الاخر امر ايجابي...
ولكن الحقيقة هي انه في غالب الاحيان يجعل الامور اسوأ!!!!
ان الكلام عن المشاعر, الذي هو امر مهديء بالنسبة للنساء, يجعل الرجال غير مرتاحين جسديا, فالذي يحصل في هذه الحالة (دة راي طبي بالله, سمح) هو تدفق مزيد من كميات الدم الى عضلاتهم. فهم يصبحون متململين, فيما تظن النساء انهم لا يستمعون لكلامهن!! (وتبدا النقة,, معناها ما بتحبني صاح؟؟ انا باتكلم من قبيل وانت ما شغال بي؟؟؟ اصلا انا اطلع شنو في نظرك,, ولا حاجة موش؟؟ )
ياخي والله بالجد معليش,, كنا ظالمنكم ساي واتاري دمكم كان بيتدفق
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: Dina Faisal)
|
يبدأ المقال بهذه النصيحة:
نقول للزوجات بكل شفافية: انسين كل ما سمعتن عن فوائد الصراحة, وعن اهمية تقاسم المشاعر مع الاخر, وعن اتاحة الفرصة امامه ليعبر عن مشاعره امامكن. فالابحاث العلمية الجديدة حول العقل الذكوري (بالله ما تنسوا اضافة الكامل ) تبين ان النقاش بين الزوجين قد يكون الطريقة الاسرع لقطع التواصل بينهما.
اصدر طبيبان نفسيان اخصائيان في معالجة مشاكل الازواج في امريكا كتابا بعنوان "كيف تفعلي زواجك دون الكلام حوله؟.. الحب ابعد من الكلمات". فما الذي يريده المؤلفان حقا؟
هل يشيران علينا بأن ننسى كل ما تعلمناه من فنون الحديث ومهارات الكلام التي امضت النساء عقودا طويلة لصياغتها؟؟
وان نعيد التفكير من جديد بكيفية تعاملنا مع شركائنا؟؟
الجواب هو نعم.....
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: Dina Faisal)
|
دينا
سلام يا نقناقة
النقة خصلة لا فرق فيها بين الرجال و النسوان
بل نقة الرجال بعد مرات أخطر
مثلا راجل طلع المعاش وقاعد فى البيت ينقنق فى أى حاجة لغاية ما المرة والأولاد يكرهو البيت.
النسوان مشهورات بالنقة لأنهم بيتكلموا فى الزمن الغلط.
مثلا راجل راجع البيت من يوم عمل مضنى
تقوم مرتو تسألو أها الشغل الليلة كان كيف
ولا عملت شنو مع فلان داك
وتكون دى آخر حاجة الراجل داير أتكلم فيها
ختاما
انحنا عندنا مقياس للنقة نطلق عليه أسم نقختر ودرجاته مثل درجات مقياس الزلازل رختر
فلو كان نقتك يا دينا أكتر من 4.5 على هذا المقياس واطاتك أصبحت و أخير تختى الرجال عديل.
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: عبد المنعم سليمان)
|
دينا كيفك
إنتى القال ليك النقة هى الكلام فى الحب منو ؟
باين لسة فعلآ (جداد) وما إتمرستى ؟
النقة بمعنى
تعرفى بداية الكلام لما تكون
(شوف يا راجل إنت) معناتو رجالتك الليلة إتمسحت
ولما تقول الأولاد أو أولادى الكلام ماشى ما بطال
لكن لما تقول أولادك عزلت روحا وعينك ما تشوف ...
جداد شنو ياخى إنتى ما شفتى الديك المزعوط من رقبتو
حب شنو يختى
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: رأفت ميلاد)
|
دينا , انا غايتو إتعودت علي النقة وخاصة نقة الصباح ومرات كثيرة
لما ما تنق معاي الصباح وامشي للشغل بحس كده زي ما اكون ناسي الإقامة
أو الجوال , والنقة مالها ؟؟ وهل الحياة تحلي من غير نقة , بس في حدود
المعقول لكن انتو معاكم تفاهم ؟؟؟ تقولي ليها بحبك تقول داسي مني شنو ؟؟؟
طنشتها تقول ليك الماخد عقلك وقلبك يتهنابو , حكمة الله عاد نعمل معاها شنو ؟؟؟
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: رأفت ميلاد)
|
| Quote: إنتى القال ليك النقة هى الكلام فى الحب منو ؟ |
يا رافت عليك الله ما تخرمج لينا البوست دة يقوموا يجوا يتلموا فيهو
العواجيز العندهم دستة عيال وهارشنهم نساوينهم والحب طار ليهم
احنا بنتكلم عن النقة العلي وزن الكلام الدقاق ياااخ
اها في الحالة دي طبعا العيال يمتنعون
| |
|
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: Dina Faisal)
|
كان يا ما كان في قديم الزمان,, قبل ان يخلق الانسان,, كانت الفضائل والرذائل تطوف العالم معا,,
وتشعر بالملل الشديد.. ذات يوم... وكحل لمشكلة الملل المستعصية.. اقترح الابداع لعبة واسماها
الاستغماية....
احب الجميع الفكرة,, وصرخ الجنون: اريد ان ابدأ,, اريد ان ابدأ
انا من سيغمض عينيه ويبدأ العد...
وهنا اتكأ الجنون بمرفقيه على شجرة وبدأ...
واحد.... اثنان..... ثلاثة.......
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: عبد المنعم سليمان)
|
وبدات الفضائل والرذائل بالاختباء...
وجدت الرقة مكانا لنفسها فوق القمر....
واخفت الخيانة نفسها في كومة نفايات...
وذهب الهدوء واختبأ بين الغيوم...
ومضى الشوق الى باطن الارض....
الكذب قال بصوت عالي: انا ساختبيء تحت الحجارة... ثم توجه الى قاع البحيرة...
وما زال الجنون مستمرا في العد....
سبعة وسبعون.... ثمانية وسبعون.... تسعة وسبعون......
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: عبد المنعم سليمان)
|
وقبل ان يصل الجنون الى المائة
قفز الحب وسط حزمة من الورود
فتح الجنون عينيه وبدأ البحث صائحا....
انا ات اليكم..... انا ات اليكم......
كان الكسل اول من انكشف... لانه لم يبذل جهدا في اخفاء نفسه...
ثم ظهرت الرقة المختفية في القمر...
وبعدها خرج الكذب من قاع البحيرة مقطوع النفس...
وخرج الشوق من باطن الارض...
وظهر الهدوء من بين الغيوم....
وجدهم الجنون جميعا... واحدا بعد الاخر...
ما عدا الحب.....
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: Dina Faisal)
|
كاد الجنون يصاب باليأس والاحباط في بحثه عن الحب....
الى ان اقترب منه الشوق وهمس في اذنه: الحب مختبيء في شجيرة الورد....
التقط الجنون شوكة من الشجيرة وبدأ في طعنها بشكل طائش ليخرج منها الحب.....
ولم يتوقف الا عندما سمع صوت بكاء يمزق القلوب....
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: Dina Faisal)
|
ظهر الحب وهو يحجب عينيه بيديه... والدم يقطر من بين اصابعه....
صاح الجنون نادما: يا الهي ماذا فعلت؟؟؟ لقد افقدتك البصر......
ماذا افعل كي اعيد اليك بصرك؟؟!!!!!
اجابه الحب: لن تستطيع ان تعيده لي... لكن هناك ما تستطيع فعله لاجلي....
كن دليلي.......................
ومنذ ذلك اليوم اصبح الحب اعمى.... يقوده الجنون!!!!!!!!!!!!!!
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: Dina Faisal)
|
الأخت دينا ....
والله بصراحة؟ النقة ما بتندار .. والواحد يا منها إتعلم الطناش يا جاهو ضغط دم وجلطة.
| Quote: مثلا واحدة تضرب ليك في المكتب وانت ما قادر تحك راسك عشان تسالك "بتحبني"؟؟ |
القال ليك منو دي نقة؟ .... يا ريت كل النقة زي دي.
| Quote: احنا بنتكلم عن النقة العلي وزن الكلام الدقاق ياااخ |
أما الكلام الدقاق ده ... برئ كل البراءة من النقة. وبصراحة البنات بيمارسوهو قبل ما يجيبو رجل الراجل .... وبعد الزواج مافي غير النقة. وطوبى لمن تمارس الكلام الدقاق بعد الزواج.
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: Dina Faisal)
|
| Quote: يا زول بسم الله,, وقفلوا السماعة في وشي كمان |
إنتو بس كتروا من نقة الحب دي .. لكن البتجيب أجلكم بالجد النقة من نوع .. أنا من العيد الفات ما اشتريت لي توب .. والا الواحد يجي من الشغل تعبان .. تقولي ليهو: دي ما عيشة دي .. سايبنا محبوسين زي القاعدين في قفص .. يالا طلعنا خلينا نشوف الدنيا زي العالم والناس ..... إلخ ..إلخ
ودة النوع الغنو فيهو الأغنية (((نقناقة تنقنقي .... إنتي لا بد تتطلّقي)))
هسي شفتي ليك واحدة طلقوها عشان قالت للراجل بحبك؟ والا سألتو: إنت بتحبني؟
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: محمد البشرى الخضر)
|
| Quote: أنا كنت مهيئ نفسي للحديث في موضوع النقة بفهمها العادي ( بتاع بكرة النقة بكرة النقة) |
انت من جماعة رافت والا شنو؟
| Quote: و أنا موقع تعهد بخصوص المشاركات في المواضيع الزي دي |
وقعتو وين ياخ,, اوعى يكون بس في لاهاي
خلاص يا محمد ناقش لينا بفهم بكرة النقة بتاعك,, ومنكم نستفيد برضو.
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: Dina Faisal)
|
دينا فيصل
النقة لكن ما خشم بيوت
نقة نكدية زي مشيت وين ليه جيت متاخر منو دي الضربت ليك في موبايلك
وليه ما بتركز في كلامي
نقة نص كلتش امشي معاي السوق نمشي ناس فلانة ولدت
نقة تلات ارباع كلتش والله العظيم قبل ما تخطبني كانو دايرني تلاتين واحد لكن نقول شنو القسمة
غايتو
نقة عيار تقيل ( انت قائل روحك جايبني من الشارع)
نقة قاتلة( طلقني ياخ وفي ستين داهية)
تقوم تطلقها ( ميتين ابو اهلها اطلع)
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: khaleel)
|
أنا أتفق و أختلف مع الباحثين في رايهم
زي ما المرة بتحب تسمع الكلام الشاعري و بتستمتع بالتعبير عن الحب
أيضا الرجل بيعني له الكثير سماع كلمة أحبك من زوجته
و يفتقدها كان طول منها
بس الفرق الرجل ممكن يكتفي بأشكال أخرى من التعبير
مثلا يجي يلقى زوجته تقابله بأجمل إبتسامه و مظهر مرتب
أو إبداء نوع من الإهتمام
وأشياء و اشياء (خليها حسي)
كلها رغم بساطتها تزيد الإحساس بالحب و تقوي الرابط
أما المرأة
فبالإضافة للإحساس المتوفر تحب تأكيده سماعيا و تحب وقع الكلمات الرومانسية على أذنها و مشاعرها
و المرأة بطبعها أكثر شاعرية من الرجل
و من ناحية تانية كلمات مثل أحبك و يا حياتي و ....وكدا
تعطي المرأة الأمان , يعني رغم تأكدها من مشاعر الرجل لكن يبقى الفار يلعب في عبها من ناحيته وتحب تسمع ما يطمإنها و يدلل على مكانتها في قلب عباس
و دي النقطة الغايبة على كثير من الرجال (السودانيين خاصة) الواحد بيعتبر إفصاحه عن مشاعره ضعفا لا يليق .
و للأسف المرأة رغم حبها لزوجها لما تفقد الحنية و المشاعر بتلقى ذئب يحاول يستغل الناحية دي و يبدأ يعزف على أوتار معينة لغاية ما يقع المحذور (الكلام هنا غير معمم)
ولان المرأة راسها خفيف إلى حد ما(و برضو الكلام غير معمم) على الرجل إرضاءها و عدم ترك الفرصة لتولد إحساس بعدم الأمان العاطفي لديها
فنقة الزوجة ممكن إعتبارها رسالة لعباس عليه التفاعل معها
أتمنى ألا أكون قد خرجت عن صلب الموضوع
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: محمد البشرى الخضر)
|
Quote: الرجل بيعني له الكثير سماع كلمة أحبك من زوجته
و يفتقدها كان طول منها
بس الفرق الرجل ممكن يكتفي بأشكال أخرى من التعبير
مثلا يجي يلقى زوجته تقابله بأجمل إبتسامه و مظهر مرتب
أو إبداء نوع من الإهتمام
وأشياء و اشياء (خليها حسي)
كلها رغم بساطتها تزيد الإحساس بالحب و تقوي الرابط |
Quote: و المرأة بطبعها أكثر شاعرية من الرجل
و من ناحية تانية كلمات مثل أحبك و يا حياتي و ....وكدا
تعطي المرأة الأمان , |
احنا كدة ما مختلفين نهائي يا محمد
الرجل والمرأة مكملين لبعض.. يعني ما ممكن المرأة تسمعك كل يوم عبارات الحب التي تستشعرها حقا
وتهتم براحتك وتفاجئك كل يوم بباقة من الازهار وعشاء على ضوء الشموع وتحاول المستحيل لكي تبدو
دوما جميلة في نظرك,, ما تخلي ليها نيولوك ما تعملوا,, وبعد دة كلو ما تسمع كلمة اطراء واحدة
اوغزل عشان تحمسها لتقديم مزيد من التفاني والابداع... الحب محتاج لرعاية من الطرفين.. وبالذات
الرجل,, لان المراة زي ما انت قلت شاعرية وينبع احساسها بالامان من خلال عاطفة مستقرة.. ونضيف علي
شاعريتها عطاءها,, فالمعروف عنها امكانيتها على العطاء بلا حدود اذا ما وجدت الاهتمام والحب
والعطف والحنان من جانب الزوج... حاجة كدة زي زبدة لورباك... كلما دللت بقرتك تحصل على افضل
انواع الزبدة
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: khaleel)
|
| Quote: نقة تلات ارباع كلتش والله العظيم قبل ما تخطبني كانو دايرني تلاتين واحد لكن نقول شنو القسمة غايتو |
هسي يا خليل النقة دي ما ممكن نختها تحت بند الكلام الدقاق
زولها بتذكرك باهميتها عشان تحس علي دمك ياااخ,, انتو ليه ما رومانسيين كدة
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: Dina Faisal)
|
الاخت دينا كتبت
(نعترف كنساء بحب الكلام..
نحب معسوله ونعشق عبارات الغزل والمدح...
يظل الحب لدينا مشتعلا بقدر ما تستطيع كرجل ان تعبر لنا عنه...
وتزداد خفقات قلبنا مع كل كلمة حب او اطراء)
وهدية ليك اقول ليك
اتغزل حين يشع الالق بريقا في عينيك
حين يثور جمالك
يصرخ خجلا احمر في خديك
اتغزل حين
يسيل الشهد كلاما من شفتيك
حين يغازل سمعي همسك
فيذوب القلب هياما بين يديك
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: د.محمد حسن)
|
Quote: اتغزل حين يشع الالق بريقا في عينيك
حين يثور جمالك
يصرخ خجلا احمر في خديك
اتغزل حين
يسيل الشهد كلاما من شفتيك
حين يغازل سمعي همسك
فيذوب القلب هياما بين يديك |
قرأتها فاثرت الصمت عملا بمقولة "الصمت في حرم الجمال جمال"
فأبت احرفي الا ان تخط شيئا هنا
هذا من اروع واعذب ما قيل لامرأة
فهنيئا لها بقلبك 
| |
|
|
|
|
|
|
|
|
|
Re: لماذا لم يعد يحبني؟؟ عشان نقناقة!!!!!!! (Re: إيمان صالح)
|
Quote: دينا يا اختي ما تعاينوا لي
انا خشمي عندي وجني وجن النقنقة دي |
انتي؟؟؟؟؟؟؟؟؟؟؟؟؟
انتي الشايلة مفراكتك ولافحة توبك وحايمة تمسكي في دة وتطلقي دة؟؟؟؟
بري يا يمة جنس حالتك دي اخير منها النقة والردحي كمان....
حدثنا الخلا بالبلا
لفة
ايمان اللذيذة, بزيارتك بيتنا نور كلو زينة.
دة طبعا كسير تلج اتقاء لشر لسانك الطويل
| |
|
|
|
|
|
|
|
| |
وليد محمد المبارك
عاصم ابوبكر حامد
عبد المنعم سليمان
هشام المجمر
رأفت ميلاد
هاشم أحمد خلف الله
doma
محمد البشرى الخضر
عواطف ادريس اسماعيل
محمد أبوالعزائم أبوالريش
فيصل نوبي
khaleel
معتز القريش
د.محمد حسن
إيمان صالح
بشير جبريل علي
فيس بوك
تويتر
انستقرام
يوتيوب
بنتيريست