|
|
 ماشي أحضر ليكم إفتتاح معرض الفنان التشكيلي الطيب الحضيري
|
يا حليلكم....
في إحدى فعاليات جدة الجميلة.... سيتم بعد قليل افتتاح معرض الفنان التشكيلي الطيب الحضيري برعاية السفير/ أحمد التيجاني - القنصل العام لجمهورية السودان بجدة.. وذلك بقاعة بيت الفنون الجميلة.....
أنا ماشي الافتتاح....وجاييكم إن شاء الله
الكلام على الصور...إنجليزي قدر كدا ما عندنا...إلا أقوم أجيب الصور وأرسلها لأهل المعرفة يقوموا يعلقوها ليكم هنا...أنا يبقى لي بي نار أكان قلت ليكم بعرف أعملها براي...
الدعوة لكم إلى عوالم من الدهشة والجمال....
لمن يريد التواصل:
هاتف الصالة: 0096626614651
جوال الطيب حضيري 00966569475357
|
|
 
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: Mahmoud Mustafa Mahmoud)
|
الافتتاح كان رائعاً....محضوراً ... فيه تمثيل دبلوماسي عالي كمان...
القنصل..ونائبه ...ورئيس الجالية...وسكرتيرها الثقافي أظن...
ولفيف من المهتمين والأسر...والله فاتتك حاجات يا سجيمان..
والشفع جنس قلة حياء....
بس غايتو ..المعرض جميل فعلاً...
والأعمال الفنية عالية الثراء من ناحية الفكرة واللون....
أنا باعتباري صاحب العريس..بسم الله صاحب الفنان...جبت ليك داك يا شريط زانفير.. والمزيكة الختيرة ديك....
الطيب الحضيري كان إصراره شديد على إن الموسيقى الخلفية لازم تكون غنا سوداني عدييييل... من عثمان حسين وإنت طالع....
غايتو جنس جن وجنس ملاواة في الدنيا دي....
المهم ... الصور جاياكم...
مودتي
| |
|
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: Mahmoud Mustafa Mahmoud)
|
.
ياسلاااااااام يا محمود يا أخوي
و الله ليك وحشة ما بتعرف رسايل
أريتك و العيال طيبين
الليلة جبت سيرة راجل
و تعال ...مالو الطيب الحضيري اتملا شيب كدة؟؟
هسع بعد عاوز اقول انو دفعتي اتراجعت    
هو في الحقيقة دفعة خالنا حسن النور عيسى في كلية الفنون الجميلة و التطبيقية في زمن الديمقراطية الحلو..أنا كنت بحضر (الدبلوما) أو معارض التخريج لمدة خمسة عشر عامآ!! و كان بالطبع لي هناك أصدقاء و حبيبات لووول..كان عصمت بورتوبيل و اسامة الحويرص و شريف و عبدالغني و عيييييييييييييك..
ذكرتنا زمن سمح
يا دووووووبك عشرين سنة لي وراء
ما كتيرة على الحي
كان الأستاذ الطيب الحضيري يكتب على الحائط (جرعات : ود الحضيري)
ردآ على (كبسولات) ..
و كان طعم الديمقراطية في الخشم
سلام للفنان الراقي الطيب الحضيري و لأعماله و لضيوفه
بعدين القنصل بتاعكم دة اسمو يشابه اسم صاحبنا المقدم شرطة حسن التجاني..يكون أخوهو؟
.
| |
|
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: Mahmoud Mustafa Mahmoud)
|
الطيب أخوي...كيفنك آآآخوي... على الحرام مشتاقين لدرجة القَرْيَفَة..شايف التشكيل دا كيف؟؟ نحن ناس كيبورداتنا عربية حرة...الحروف ما بنلقطها زي لقيط الهناي بتاع البتاعة البنصقعوا بيها المصاقيع الدمهم خفيف ديل..
أبشرك...والله نحمد الله نحن والعيال في أمان الله..أها إنت وعيالك طيبين؟؟
سألت:
| Quote: و تعال ...مالو الطيب الحضيري اتملا شيب كدة؟؟ |
الطيب الحضيري الصورة دي قبضناهو ليها قبض..أظنه كان بيتأمل في طاحونة...ولأجل ذلك يا أخي الكريم لعلنا نحسب أن هذا ليس شيباً...وإنما دقيق ناااااااااااااااعم....والله أعلم..
| Quote: هسع بعد عاوز اقول انو دفعتي اتراجعت |
لا بالله أحسن ما تتراجع..الطيب طيب الليلة ولا أمس؟؟
Quote: هو في الحقيقة دفعة خالنا حسن النور عيسى في كلية الفنون الجميلة و التطبيقية في زمن الديمقراطية الحلو..أنا كنت بحضر (الدبلوما) أو معارض التخريج لمدة خمسة عشر عامآ!! و كان بالطبع لي هناك أصدقاء و حبيبات لووول..كان عصمت بورتوبيل و اسامة الحويرص و شريف و عبدالغني و عيييييييييييييك..
ذكرتنا زمن سمح |
والله ياأبو بشير فعلاً كان زمن جميل..ياخ الناس ديل كلهم بعرفهم حد المعرفة..لكن الحبيبات ديل ما قدرت أخمن ولا واحدة...ها زول نعل ما كنت مداقرني في واحدة ...والوكت داك إت ظابت في البوليص؟؟ وأنا أقول مالو الرماد كايل كل محاولاتي (النبيلة)؟؟
| Quote: بعدين القنصل بتاعكم دة اسمو يشابه اسم صاحبنا المقدم شرطة حسن التجاني..يكون أخوهو؟ |
المقدم صاحبكم ولا دفعتكم؟؟ غايتو أنا العارفو إنه دفعتكم عمداء عدييييييييييل...أكان شردت من شيب الطيب...(الرُّطَب) دي بتطير منها ويييييييين؟؟؟ لووول.
ياخي حضورك هنا كان بهياً وجميلاً كما رائحة المسيد...
ودمت أخاً عزيزاً
| |
|
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: Mahmoud Mustafa Mahmoud)
|
كورجة .. وزخم لونى حار .. والحلة نافره .. ياربى الناس ديل مارقين
كده يطالعوا شهر رمضان والله شنو..؟؟؟ والنسوان ديل ،
بجهزو للآبره والحلو مر أنا بتوارا لى كدى ...
ياناس ...... الحله دى ما براها قطع شك بكره العيد !!!!!! ..
ألوان حارة وريحتها طالعة جت .. تجدد فى رؤية جمالية
أخرى مأخوزه من أصول بنائها فى أفكارإبداعية قائمة
بذاتها ، مظهرة لقيمها الجمالية فى تشكيل لونى متعدد
عمل يستحق الإشادة والتهنئة ..
أخى / محمودمصطفى .. لك الشكر والثناء على الإهتمام يا ظريف ..
محمود بشير / كيف حالك يارجل والشكر موصول لكل من تذوق شيئا
من هذا الطعم والنخب الجميل .. شكرا وتحيتى ...
محمد مختا جعفر ..
| |
|
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: Mahmoud Mustafa Mahmoud)
|
الأستاذ الفنان القدير محمد مختار جعفر
تحياتي وتقديري....
مرور العارفين قطعاً ليس كمرور الكرام...ولو إني ما عارف ليش الناس بيقولوا الكرام للمرور السلبي أو السطحي..
لقد كان مرورك كريماً ...وكلماتك ليست كالكلمات..كلام الزول العارف الحاجات وحاسي بيها..كلام من سبر أغوار اللون والرؤية والتكنيك والموضوع...والله إني لا أدعي أهلية الرد على مداخلة من هذا العيار...ومن شخصية بهذا الوزن...
شاكرين تلطفكم الكريم ببهاء الحضور هنا...
| Quote: محاضر ... ( فنان تشكيلي .. مخرج صحفي ، وإعلامي ) |
ودمت أخاً جميلاً ....أيها الفنان الأصيل...
| |
|
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: Mahmoud Mustafa Mahmoud)
|
الاستاذ الطيب الحضيري..
رافقنا في رحلة الدراسات الميدانية لمنطقة جبال النوبة ..ونحنا طلاب بالسنة التانية بالكلية 94..
كانت فرصة جيدة للزول البيلقى طريقة ويطلع مع الطيب يلوّن..بلا شك تستفيد من تجاربه..
بداية من تقنيات إعداد الورقة للتلوين..مروراً بإختيار الزاوية والمشهد ..ثم تقنيات إستخدام الالوان..
لازلت أذكر كيف ان الطيب نهاية كل يوم- وبالذات في منطقة "الرشاد" الجميلة-..ينادي الشباب ويرصو الاعمال قدام القُطية ..ويبدا يعلق عليها ..
" بعداك طبعاً بيتفرغ لي جر سبحتو .."
قبل هذا كله الطيب الحضيري عمل أستاذا لمادة الفنون بمدينة ود مدني ..ردحاً من الزمن ..
بلا شك ساهم في إخراج كثير من التشكيليين والتشكيليات بمدينة ود مدني ..بالإضافة الى مشاركاته في المشهد التشكيلي في مدني والجزيرة عامة..
لك ياالطيب كثير التحايا..وتمنياتي بمزيد من المعارض والالوان ..واهو ناس جدة شكلهم عامريين..
وسلام وتحايا يا مصطفى ..
| |
|
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: Mahmoud Mustafa Mahmoud)
|
الأخ العزيز أبوعبيدة...
تحياتنا لك ولأسرتك الكريمة...وأنت كما العهد بك.. حاضراً في حراك الإنسان السوداني بهذه المدينة...عروس البحر (طبعاً البحر عنده عروس سودانية بهناك..غنى لها إبنها حيدر)..
| Quote: ومضت السنوات انقطعنا خلالها عن تلك العوالم، فأبت إرادة الله إلا أن تسخر لنا الأخ الفنان/الطيب الحضيرى، لينقل لنا صورة مصغرة عن الريف السودانى الشاخص عبر عدد من اللوحات الناطقة بالبهاء والجمال. |
شكراً على هذا الكلام العذب...وماك مشحود عليهو...فأنت فنان ومثقف مطبوع..
| |
|
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: Raja)
|
معقولة بس؟؟؟
رجاء هنا؟؟
يا جماعة دا جمال شنو دا؟؟
يا الطيب الحضيري هووووووووووووووووووي.... ألحقنا...
رجاء جابت الجمال كلو وجاتك...
شكراً لك وأنت دائماً سباقة لكل جميل...
والله مرورك أسعدنا غاية السعادة...وقاصدين شفاعتك في عوالم الجمال..عشان كدا تكلنا ليك البوست في يومياتك اللذيذة..
وشكراً على الإطراء...الحضور كان بدافع الحب...أما التغطية فهي عفوية خالص..يا ربي عشان كدي أعجبتي بيها؟؟
مودتي التي لا تنتهي..
| |
|
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: الطيب بشير)
|
الطيب أخوي اللذيذ...
ياخ والله بتدور تقطع مصارينا ديل بالضحك...
قلت لي:
Quote: لكن دبارة تخليك تعمل خلفية لصورتكم السمحة دي باللوحة السمحة دي ما عندك!!
استعنت بصديق؟؟ |
إت هسع أكان (استعنت) بالكتمان..ما كان أخير لينا كلنا؟؟
الله يجازي محنك...
والله يشهد الله سلامك وكلامك السمح دا والقبلو..بلغناها للفنان الطيب الحضيري...وأرجو أن تقبل تحياته وتقديره الشديدين..
غايتو ناس صعبين خلاص...بالله الزول يستكتروا عليهو الخلفية؟؟ ياخ زول رفع ليكم اللوحات ديل كلهن..تقول لي ما بعرف؟؟
(التقول رافعن فوق كتفي)..لول..
تحياتي لأسرتك الكريمة وسلام خاس جداً (للأخي) محمود بشير..
| |
|
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: Mahmoud Mustafa Mahmoud)
|
لست أجيد الكتابة
ولأنكم هنا في معية أخي الحضيري
فمجبر أخاكم لابطل
كانت ولادته كما هو حاله مختلفة
امتنع خروجا حتى أكمل سنة كاملة ببطن أمه
وجاءنا هكذا مدوزن بالمحنة والحميمية
وكأنه كان يعلم أن لاثمة حنين
وبدأ عراكه مع الحياة
صبي فران عجان وتعجنة الحياة في أوارها
عرف كم هي الحياة قاسية وجسده الرهيف لايقوى
لهذا كان يترك الدراسة ليعود إليها
عمل بالتدريس
عرفه أهل كل دار قصدها لأنه مسكون بحب الناس
وكان لابد له من روما
فدخل كلية الفنون فاتحا
تخضب بحناء اللون فكان عرس الجمال
درويش مسافر في تلافيف التباريح
لاغرو فهو سليل مانجل
عرفته ردحا فسكن الخاطر والذاكرة
سأعود حينما تحضرني ما يتوجبه حرفي
ولبعض التحليل
عن تحربة الحضيري البصريه
وشكرا مجددا أخي محمود أن أتحت لنا كل هذا
أتمنى أن توصل إيميلي للأخ الطيب
[email protected] om
وسأعود
ودي
نورالهادي
| |
|
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: Mahmoud Mustafa Mahmoud)
|
الأخ الفنان نور الهادي..
والله الطيب الحضيري فرح فرحة كبيرة خلاص بمداخلتك المنصفة...(قريتها ليهو بالتلفون ساكت)...
وقلت:
Quote: وكان لابد له من روما
فدخل كلية الفنون فاتحا
تخضب بحناء اللون فكان عرس الجمال
درويش مسافر في تلافيف التباريح
لاغرو فهو سليل مانجل
عرفته ردحا فسكن الخاطر والذاكرة |
فأنصفت..وكفيت ووفيت على قول خليجيينك ديل..
وقلت:
Quote: سأعود حينما تحضرني ما يتوجبه حرفي
ولبعض التحليل عن تحربة الحضيري البصريه
وشكرا مجددا أخي محمود أن أتحت لنا كل هذا
أتمنى أن توصل إيميلي للأخ الطيب
[email protected] om |
سمح آآخوي..لكن لو متوقع الطيب يراسلك بالإيميل...تكون بالغت..غايتو موبايلو أنا كاتبو ليكم فووووووق...
ويبقى الوعد بالعودة هو أحلى الوعود...
لك الود الكنا بنشيلو زمان..
محمود
| |
|
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: Mahmoud Mustafa Mahmoud)
|
نور الهادي السمح....
والله إنصاف دي من أجمل الأغاني فعلاً..وشكراً على الذوق العالي
الأداء رفيع وجميل..
الرحمة لأستاذنا التاج مصطفى
وقد كان لي شرف الغناء معه في برنامج الأستاذ علم الدين حامد (صالة العرض)
ذلك البرنامج الناجح في ذلك الزمن السمح...والغريبة نفس الأغنية..
دي طبعاً ما قشرة ولا حاجة...
هسي يجي ناطي لينا ناذر يقول لي عايز شريط...
لول
مودتي العميقة
| |
|
|
|
|
|
|
|
|
|
Re: ماشي أحضر ليكم إفتتاح معرض الفنان التشكيلي الطيب الحضيري (Re: ناذر محمد الخليفة)
|
الفنان اللذيذ ناذر
ياخي نورت الحتة والله
| Quote: الواحد مما بدا البوست دا بيتاوق ساكت ويتفرج لكن مادام طلعت فنان وبتغني قلت النخش ونسمع الغنية |
ومتاوقة الفنانين ذاتها فن ...شكراً للمتاوقة الجميلة
أما الطلة الحلوة فهي قطعاً إضافة تستحق الضبيحة...
بركة الجيت يا عشاي..
لكن الشريط دا حكايتو حكاية..
كدي شوف لي موضوع قطعتي الفي صالحة...أرسل ليك عشرة مليون وشريط كمان...
إنت يا ناذر سمعت النكتة بتاعة أدروب العسكري؟؟؟ هسي يقولوا لينا دي عنصرية وشنو وشنو...ياخ خليتها ذاتو
مودتي الشديدة
| |
|
|
|
|
|
|
| |
Mahmoud Mustafa Mahmoud
الطيب بشير
محمد المختار الزيادى
محمد مختار جعفر
gessan
أبوعبيدة محمد الأمين
Mustafa Mahmoud
Raja
ناذر محمد الخليفة
Khalid Kodi
فيس بوك
تويتر
انستقرام
يوتيوب
بنتيريست