أغاني للتوب السوداني

Quote: الأسمــاء الفلانيــة لموضــات التيــاب السـودانيــة ظهرت في الفترة الاخيرة واختفت موضة اسماء لدلاقين يلبسنها بعض الشابات في الحفلات مثل دلقان يسمى اديني حقنة وقماشة فصل الدين عن الدولة لكن التوب السوداني يظل رمزاً للعفة والسترة للمرأة السودانية وله اسماء طريفة جداً ساعدت في انتشاره وبقائه واستمراريته ولاحظ حولك البلد مليانة بالتياب التوتال والسادة والمشجر والمطرز واي توب.. بي اسم جميل منو قالوا منو السماه ما معروف.. وسمعنا في جلالات العسكرية اغاني مثل «بنيه لابس توبو صلاة النبي فوقو» البنات بيغنن لتوب «الساكوبيس» وكمان ظهرت موضة توب «تحرمني منك»، وتوب «المرسا»، وما ننسى توب «الكرب» الجابوه النقادة، و«العجب حبيبي» وهو من التياب الرخيصة وكمان توب «بالليل دا ماشي وين» وتوب الكرب هو توب الجيران توب بتلفحو الست وتحصل جارتها لي فت الشمارات، ومن الاغاني «شوف عيني الحبيب في حشمة لابس التوب» وكمان «عز التوب وكت ينشال وينشر وعلى الكتفين يتوه مرة.. عز التوب سماحة على بنات بلدي».. وكمان «غيرت بالتوب خلتنا في حيرة»، واغنية ثنائي الحتانة «متين لبستي التوب بتين كبرتي على انا»، ولعل سمية حسن كانت مميزة جداً بتوب «الحلم العربي» في الاوبريت والتوب ميزة للفنانات من زمن «حواء الطقطاقة» الى توب ندى القلعة واسرار بابكر «همس الخليج».. مع ان جواهر قالت بتلبسه في المناسبات والزيارات بس عشان جمهورها ما يعرفها إلا ان «اصالة» لما جات لبستو وظهر توب «اصالة».