|
|
 Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ (Re: Murtada Gafar)
|
في هذا البوست أدناه حاول الأمنجي المتهافن جمعة أن يمارس سخفه المعهود
البشير يحرج سلفاكير !!
--------------
هنا خطاب البشير الذي إستمعت إليه عبر الفضائية السودانية و الذ وجدت نسخة سودان ميديا سنتر مطابقة لما سمعته و لنحاول أن نجاوب على سؤال البوست الرئيسي.. من أحرج من يا محمد حامد جمعة؟
إلى نص الخطاب:
http://www.smc.sd/ar/artopic.asp?artID=23358&aCK=AE
-------------
بسم الله الرحمن الرحيم الحمدلله والصلاة والسلام علي رسول الله , الاخ سلفاكير ميارديت النائب الاول لرئيس الجمهورية رئيس حكومة الجنوب الاخوة ضيوف البلاد الاعزاء نائب رئيس جمهورية يوغندا الشقيقة وزير خارجية اثيوبيا الشقيقة وزير خارجية كينيا الضيوف الكرام والسادة اعضاء السلك الدبلوماسي المعتمد في السودان.
المواطنون الاعزاء في جوبا وولاية وسط الاستوائية
السلام عليكم ورحمة الله تعالي وبركاته اسمحوا لي في البداية انو نحن نهنئ الناس كلهم بكل الاعياد التي تجمعت في وقت واحد نحتفل بعيد ميلاد المسيح وعيد الاستقلال واول السنة الميلادية وعيد الاضحي والان نحن بنحتفل بعيد السلام في جوبا حقيقة اجتماع الاعياد ده كلها مع بعض نحن بنتفاءل خير وذي ما الاعياد ديه تجمعت نحن عايزين نجمع اهل السودان كلهم وعايزين نوحد اهل السودان كلهم ما عايزين نوحدهم بالقوة ولابالعمل العسكري ولاوحدة اجبارية لكن عايزنها وحدة طوعية عايزنها وحدة يقررها الشعب السوداني لان معروف السودان حدوده الحالية عملها الاستعمار وواضح ان السودانيين خاصة في جنوب السودان ما كانوا راضين علي الوضع ده عشان كده حملوا السلاح وحاربوا مابنقول حاربوا هم كانوا مجرمين او كانوا خارجين عن القانون لكن حاربوا لان كان عندهم قضية بيؤمن انهم عندهم قضية عايزين الناس يسمعوها ويحلوها اليهم.
بنفس القدر نحن في القوات المسلحة كنا بنؤمن بوحدة الوطن وذي ما جاء في الميثاق بتاع منظمة الوحدة الافريقية الحفاظ علي الحدود المو
الاستعمار ده كانت قناعتنا في القوات المسلحة انو نحن بندافع عن وحدة الوطن لكن بعد الحرب والحرب استمرت وجدنا انو والله الحرب ديه مكلفة لكل اهل السودان وما في بيت سوداني ما دفع ثمن في الحرب.
الناس في الشمال دفعوا ثمن والناس في الجنوب دفعوا ثمن مضاعف عشان كده نحن عندما جئنا في الانقاذ وسميناها ثورة الانقاذ عشان ننقذ السودان وننقذ كل الشعب السوداني.
الشعب السوداني في الشمال وفي الجنوب نحن قررنا ننقذه من المشاكل التي يعاني منها واكبر مشكلة مواجهة الشعب السوداني كانت الحرب في الجنوب عشان كده نحن من اول يوم رفعنا شعار السلام وعملنا مؤتمر في الخرطوم حول قضايا السلام واتفاوضنا في كل المجالات.
الناس تعرف في اديس ابابا في نيروبي في اوروبا في مناطق كثيرة في ابوجا كلها كانت تفاوض عشان نجيب السلام وكان اصرار عن السلام وكلنا نتذكر ان حقيقة بعد مباحثات طويلة وصبر طويل توصلنا في الاول الي بروتكول مشاكوس البروتكول الذي حل القضايا الاساسية حل علاقة الدين والدولة واعطي حق تقرير المصير لجنوب السودان.
بعدها ياجماعه نحن قلنا بعد التطور الذي حصل ما في داعي الحرب تستمر تاني ولازم نعمل وقف اطلاق النار عشان نكمل قضية السلام والتفاوض لكن شاءت الاقدار ان اخواننا في الحركة يقولوا لا نحن ما بنقيف الا اذا وصلنا الي سلام واستمرينا نتفاوض وحقيقة لما التفاوض وجدناه ما ماشي بالسرعة المطلوبة قلنا لازم نرفع المستوي بتاع المفاوضين وانتوا كلكم بتشهدوا انو جلس الراحل قرنق والاخ علي عثمان في مشاكوس في نيفاشا ايام واسابيع وشهور اتفاوضوا واتحاوروا الي ان اتي السلام الذي نحن بنحتفل به اليوم.
نحي في اليوم هذا كل صناع السلام وكل الناس الذين ساهموا في السلام والناس الذين ساعدونا عشان ناتي بالسلام برضو نشكر الاخوة في كينيا الشقيقة الناس الذين رعوا التفاوض وقادوا التفاوض والي ان اتي السلام نحي الرئيس موي كيباكي والرئيس اراب موي ونحي الوسيط الكيني الجنرال سمبويا الذي كان حقيقة بحنكة شديدة وصبر قاد المفاوضات الي ان وقعنا السلام والاتفاقية ذي ما معروفة ومكتوبة ومفصلة نحن نلتزم بها التزام قاطع لان حقيقة هذا اهم انجاز في تاريخ السودان بعد الاستقلال هي اتفاقية السلام الشاملة ونحن جبنا الاتفاقية ونحن الحريصين عليها ونحن اهلها وما ممكن الواحد يعمل انجاز بهذ الحجم ويسعي لتدميره لان هذا تاريخ وذي ما قلت في نيفاشا لما وقعنا بالاحرف الاولي ان التوقيع علي السلام هي بداية جديدة للسودان وهي مرحلة جديدة للسودان وهي تكملة استقلال السودان نحن بنقول السلام كان ناقص لانه كان في جزء كبير من الوطن وهو كل جنوب السودان كان بيعاني, الان ياجماعة عملنا اتفاقية , والاتفاقية فيها تفاصيل كثيرة وحقيقة نحن مصرين ان ننفذ كل الاتفاقيات وكل التفاصيل بتاعتها لكن عندما جئنا في النواحي العملية حقيقة واجهتنا مشاكل.
المشكلة الاولي التي واجهتنا نحن عندنا ستة اشهر قبل بداية نهاية الفترة الانتقالية الناس العارفين الاتفاقية في ستة اشهر قبل بداية الفترة الانتقالية وهي بدات 9/1/2005 الي 9/7/2005 ففي الفترة ديه كان مفروض عمل اشياء كثيرة جدا تتم وتحضيرات كبيرة جدا تتم واجراءات تتم لكن الاجراءات ما تمت ليه في هذه الفترة ديه يا جماعة.
اذا نحن عايزين نحاسب انفسنا ونتكلم بصراحة ذي ما تكلم الاخ سلفاكير, لازم نحن نعرف وين التقصير حصل وين التاخير حصل وما اللوم كله واقع علي المؤتمر الوطني نحن قعدنا ستة اشهر منتظرين اخوانا في الحركة عشان ياتوا الخرطوم عشان نؤسس كل المفوضيات ونعمل كل العمل ل29 اجراء بعد ملاحقة الاخ الراحل جون قرنق قال الناس مفروض ياتوا الي الخرطوم موزعين بعضهم في استراليا وكندا وفي امريكا واوروبا وهو ما عنده قروش عشان يجيب الناس ديل حولنا له من الخرطوم ( 60 مليون دولار ) عشان الناس ديل يصلوا الخرطوم لان نحن حريصين الناس ديل لازم ياتوا قبل نهاية الفترة الانتقالية عشان نكمل الشغل بتاعنا لكن انتظرنا ستة اشهر ودفعنا ستين مليون والناس ما جات , الناس ما وصلوا .
الذي نعاني منه نحن اليوم وهي الاجراءات الامنية مفروض بعد اسبوع من التوقيع ياتي الي الخرطوم وفد عسكري عشان نعمل قانون القوات المشتركة ونأسس مجلس الدفاع المشترك ونعين القادة بتاعين القوات المشتركة عشان تتكون القوات المشتركة في مارس, يعني مفروض الناس ديل ياتوا وفي مارس يكون القانون جاهز ومجلس الدفاع يتشكل والقادة اتعينو والقوات تحددت قبل شهر مارس نحن الي حد ان اتي الاخ سلفاكير ادي القسم الناس العسكريين من الحركة لم ياتوا الي الخرطوم عشان كده تاخر تاسيس وتكوين القوات المشتركة ومثلها كثير.
عشان كده نحن قلنا نحن الشريكين المؤتمر الوطني والحركة الشعبية المسؤولين امام الشعب السوداني وامام الله سبحانه وتعالي من الاتفاقيه هذه لانها هي والانقاذ لاهل السودان واي مشكلة او رجوع عن الاتفاقية سوف تكون كارثة لكل اهل السودان وكارثة لكل المنطقة وللسلم والامن في المنطقة كلها عشان كده نحن مسؤولين انا والاخ سلفا ده مسؤولين مباشرة من تنفيذ الاتفاقية, عشان كده نحن قلنا نعمل لان نحن الحزبين او القوة الاساسية الموقعة علي الاتفاقية والمكونة لحكومة الوحدة الوطنية ان نعمل اليات بيننا عشان نتشاور ونحل المشاكل التي تواجهنا وكونا الاليات ديه وحصل الاجتماع الاول لكن اخوانا في الحركة ما نشطوا علي المواصلة ,الاجهزة التي كونت وهي برئاسة الامين العام للحركة الشعبية ونائب رئيس المؤتمر الوطني والية ثانية برئاسة الرئيس ورئيس الحركة عايزين نحن الاليات ديه تشتغل عشان الموضوعات بدل نناقشها في منبر ذي ديه نناقشها في المكاتب ونحلها وما نمشي للشعب مباشرة نشكي اليه نعم في مشاكل وفي اختلاف في الاراء نعم نحن ملتزمين بنصوص الاتفاقية, واذا تحدثنا عن برتكول ابيي , برتكول ابيي كان الحدود التي كانت موجودة بين كردفان وبحر الغزال في 1905 م حدود بحر الغزال وكردفان في 1905 الخبراء خرجو لنا بالوضع الذي كان سائد في سنة 1965 م نرجع لبرتكول ابيي اذا في اي حديث علي ان ممكن نحن ننظر الي وضعها السائد في عام 1965 م ونحن نقبل براي الخبراء لكن الخبراء عندهم تفويض و (1 و2 ) التفويض الاول يخبرونا بالحدود كانت اين في 1905 م والتفويض الثاني يعملوا لنا خرطية وفي الوضع ديه هم قالوا نحن ( we failed) اذا فشلوا يحددوا الحدود ياتوا راجعين الي الجهات الموقعة وهي الحركة الشعبية والمؤتمر الوطني عشان ممكن نحن نعطيهم تفويض جديد لكن لا يحق لاي انسان ولاي جهة تغيير في الاتفاقية الاتفاقية ديه اتفاقية موقعة واتفاقية ملزمة وبرتكول ابيي ملزم .
برتكول ابيي قال هذه الحدود هي حدود 1905 م ما تحدث عن حدود 1965 م ولا الاوضاع السائدة في 1965 م وما في حدود في 1965 م كانت موجودة.
نحن ملتزمين ونجلس مع بعض ونتحاور حول كل النواقص, نعم واحدة من المشاكل التي واجهتنا المليشيات , المليشيات كانت 40 الف وحتي الان حلينا مشكلة 30 الف من المليشيات والمحاولات والاجراءات مستمرة لحل المشاكل العالقة بال 10 الف الباقين وسوف نحلها اما الواحد ينضم الي القوات المسلحة ويتحرك الشمال واما نعطيه حقوقه وهذه التعليمات التي اعطيناها للقوات المسلحة انه عدم وجود اي مليشيات في الجنوب لان الاتفاقية واضحة لكن كانت مشكلة حقيقية اربعين الف ما ممكن نحلها بين يوم وليلة وهذه من المشاكل المحتاجة لحلول عملية مواجهة لحل المليشيات وحل مشكلة المليشيات نفتكرها مشكلة تواجهنا نحن, نحن ممكن في الخرطوم نعلن انه نحن حلينا كل المليشيات ونوقف الدعم لكل المليشيات لكن سوف يظل الناس ديل موجودين علي الارض موجودين مع قبائلهم سوف يكونوا مشكلة لحكومة الجنوب نحن عايزين حل يرضي الناس كلهم ما عايزين حل يخلق مشكلة لا لينا ولا لاخوانا في حكومة الجنوب والحل هو ان بالتراضي نحل مشكلة المليشيات ده كلها لكن نحن ملتزمين ان نحل المليشيات وتصفيتها تصفية نهائية انشاء الله.
اما الحديث ان القوات المسلحة تدعم جيش الرب ياجماعة نحن عايزين ادلة وانا المسؤول من القوات المسلحة وانا اؤكد نحن ما عندنا اي علاقة بقوات جيش الرب ونحن اليوم مستعدين نجيش الجيوش والقوات المشتركة عشان نقضي علي جيش الرب للابد نحن ما عايزين جيش الرب في السودان , نحن راينا قبل الاتفاقية يجب القضاء علي هذه القوات وعملنا بروتكول مع اخوانا في يوغندا للقضاء علي تلك القوات وجددنا البروتكول اكثر من مرة واشتغلنا في تعاون تام في القضاء عليها ودخلنا في معارك وتكبدنا فيها خسائر ونحن راينا اليوم ان هذه القوات ما في علاج لها الا نحن نحسمها عسكريا او نطردهم لبلادهم ويسالموا اخوانهم هناك.
نحن مرة ثانية نحي كل الناس الصنعوا السلام ونبدأ بالمقاتلين من الطرفين , الناس العاشو في الأحراش الناس القدموا الشهداء الناس القدموا المعوقين البزلوا الدماء والعرق الي ان اتينا بالسلام هؤلاء لهم تحية خاصة ونقول لهم ان هذا السلام سلام عزيز ومافي عودة للحرب تاني ونحن لانحارب في الجنوب تاني لاننا أعطينا الأمر لأخواننا في الجنوب والان حكومة الجنوب هي المسؤلة عن الأمن وعندنا قوات مشتركة هي حاتقعد كنواه لقوات قومية أذا الأخوة في جنوب السودان قرروا وحدة وأذا ما قرروا وحدة ما تبقى من قوات تترحل شمالاً , نحن ياجامعة لوكنا عاوزين نحارب في الجنوب نحن كان عندنا أكثر من مائة الف في الجنوب كم تبقى الان , انا مابقول نحن ياجماعة حتى الان الحديث عن انسحاب القوات المسلحة أو أعادة انفتاحها الحديث عن شمال خط 1-1- 56ما بتكلم عن مناطق نحن نتكلم عن جملة القوات كم عدد القوات التي إنسحبت من الجنوب ومشت شمال خط 1-1-56 حانلقي انو النسبة هي النسبة الموضوعة في الإتفاقية نعم قد يكون الإنسحاب ذايد عن بحر الغزال أو من الإستوائية وفي تأخير في أعالي النيل لانو في أعالي النيل برضو الإتفاقية حددت انو القوات المشتركة هي الوحيدة تكون موجودة هناك نعم لا قوات مسلحة ولا قوات الحركة ولا مليشيات مناطق البترول تكون فيها القوات لكن ياجماعة في قوات من الحركة موجودة وفي مليشيات تابعة ليها موجودة في المنطقة فأذا تحدثنا عن البرتكول الأمني نتحدث عنه كاملاً لانه مثلما في التزام علي القوات المسلحة في التزام على قوات الحركة الشعبية من الجانب المامنفذ من الأتفاقية.
الجمارك ياجماعة الجمارك إتحادية وقوات الجمارك تمشي تقعد في الحدود هناك حتي الان نحن فشلنا في ان نوصل شرطة الجمارك الي النقاط الجمركية في الحدود من المسؤول خوانا؟ حكومة الجنوب هم المسوؤلين وهذه إيردات ضائعة على الجنوب وإيرادات ضائعة على الحكومة الإتحادية لانو في إيردات جمارك وكلنا نعرف حجم البضائع الداخلة من كينيا وحجم البضائع الداخلة من يوغندا أين جمارك هذه البضائع ومن الذي يأخذ جمارك تلك البضائع هذه جمارك خاصة بالحكومة بتاخذها الحكومة الإتحادية وتعطي نصفها لحكومة الجنوب ونصفها للحكومة الإتحادية هذه كلها أموال ضائعة ياجماعة نعم هنالك مشاكل في تاخير نعم في أسباب موضوعية ولكن ماكلها المؤتمر الوطني , المؤتمر الوطني عنده والأخوة في الحركة الشعبية عندهم أيضاً واسباب التأخير كثير جداً من الإجراءات ' ترسيم الحدود بين الجنوب والشمال نحن ظلينا نلاحق اخواننا في الحركة الشعبية يرسلوا ممثلين للحركة الشعبية في لجنة ترسيم الحدود لما جابوا لينا جابو لينا واحد وزير ورئيس اللجنة مدير المساحة قال مابشتغل والي ان غيروا الوزير وجاء الممثلين كان الخريف دخل وطبعاً مافي عمل في الخريف هل يستطيع شخص ان يتحرك في الخريف في (أعالي الطين) نعم هي أعالي النيل ولكن نحن نقول اعالي الطين وأي شخص اشتغل في أعالي النيل يعلم جيداً الطين في أعالي النيل شكله شنو نحن متفقين ياجماعة بعد ترسيم الحدود أذا طلعت بئر محسوبه في الشمال وطلعت هي في الجنوب كل البترول بتاعها اللي طلعتوا من 9/يناير 2005م أي بترول طلع من الزمن داك لقاية الليلة يتحسب مثل البترول الذي يحسب منتج من الجنوب وستدفع وزارة المالية نصيب حكومة الجنوب من كل برميل طلع من الابار الي حاتطلع في الجنوب وهي كانت محسوبة في الشمال الحكاية دي (حساب ولد) ياجماعة في النهاية الحساب ولد, ونحن نتحاسب بعدين نشوف كل بئر إنتاجها كم وكل بئر حق الجنوب كم وحق الولاية كم وحق الشمال كم أو حق الحكومة الإتحادية نحن متفقين ياجماعة نعطي الجنوب حقه كاملاً لان الإتفاقية نحن مضيناها وإتفاقية وقعناها ونحن متفقين فيها.
التحية لاهل الجنوب كلهم ولكل مواطني الجنوب وبنقول ليهم السلام الي اتحقق دا سلام عزيز ولازم تحافظوا عليه ونحن بنلاحظ الكثير من المناوشات والصراعات القبلية وبين القبائل في بعضها وصراعات حول البقر وخلافه ياجماعة الناس أخذت كفاية من الحرب ماعايزين حرب تاني نحن كلنا فترنا من الحرب ماديرين حرب بين القبائل ماديرين حرب بين الجهويات ما دايرين حرب في دارفور ونحن نؤمن بأن سلام دارفور هو إلتزام بالنسبه لنا وأن نجيب السلام في دارفور ولكن مشكلة دارفور ليست هي الجنجويد مشكلة دارفور بعد التوقيع هي جبهة الخلاص هي العناصر الرافضة للسلام والتي بدأت تحارب من جديد وتعيد الحرب لدارفور من جديد نحن ملتزمين بإتفاقية ابوجا وتنفيذ إتفاقيةابوجا وندعوا كل العناصر التي لم توقع ان تنضم للسلام لكي كل السودان ينعم بالسلام وهذه تحية لكم اهل جوبا ولأهل الاستوائية جميعاً ولأهل الجنوب جميعاً وتحية لك يا اخ سلفاكير ونحن مع بعض مسؤولين من انفاذ الإتفاقية مسؤولين من أمن السودان مسؤولين من ان نوصل ان شاء الله لغاية نهاية الفترة الأنتقالية أو الانتخابات القادمة واذا اتغيرنا تبقى القوة الجديدة هي المسؤولة من تنفيذ الأتفاقية حتى نهايتها بعد ستة سنوات ان شاء الله الله أكبر والعزة للسودان السلام عليكم.
-------------------
ترى من أحرج من؟
مرتضى جعفر
|
|
 
|
|
|
|
|
| العنوان |
الكاتب |
Date |
| 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Murtada Gafar | 01-10-07, 05:38 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Murtada Gafar | 01-10-07, 05:53 PM |
 Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Yasir Elsharif | 01-10-07, 05:54 PM |
 Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | JOK BIONG | 01-10-07, 06:12 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | yagoub albashir | 01-10-07, 06:33 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Murtada Gafar | 01-11-07, 09:13 AM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Murtada Gafar | 01-11-07, 11:10 AM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Yasir Elsharif | 01-10-07, 09:28 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Murtada Gafar | 01-10-07, 10:37 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Yasir Elsharif | 01-10-07, 10:48 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Murtada Gafar | 01-10-07, 11:10 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | بكري الصايغ | 01-10-07, 11:19 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Murtada Gafar | 01-11-07, 12:57 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Bashasha | 01-11-07, 04:33 AM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Tragie Mustafa | 01-11-07, 05:03 AM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Murtada Gafar | 01-11-07, 05:02 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Murtada Gafar | 01-11-07, 08:32 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Abdulgadir Dongos | 01-11-07, 09:03 PM |
 Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | dombek yai | 01-11-07, 09:06 PM |
 Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | JOK BIONG | 01-11-07, 09:41 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | محمد عادل | 01-11-07, 09:49 PM |
 Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Yasir Elsharif | 01-11-07, 10:17 PM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | dombek yai | 01-12-07, 09:09 AM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | فتحي البحيري | 01-12-07, 09:20 AM |
| لا بد أن ينتصر السلام... لا بد من احترام العهود والمواثيق.. | Yasir Elsharif | 01-12-07, 10:14 AM |
| Re: لا بد أن ينتصر السلام... لا بد من احترام العهود والمواثيق.. | Murtada Gafar | 01-12-07, 04:34 PM |
| Re: لا بد أن ينتصر السلام... لا بد من احترام العهود والمواثيق.. | omar alhag | 01-12-07, 11:13 PM |
| Re: لا بد أن ينتصر السلام... لا بد من احترام العهود والمواثيق.. | Yasir Elsharif | 01-13-07, 11:43 AM |
| Re: لا بد أن ينتصر السلام... لا بد من احترام العهود والمواثيق.. | Haydar Badawi Sadig | 01-13-07, 04:27 PM |
| Re: لا بد أن ينتصر السلام... لا بد من احترام العهود والمواثيق.. | Haydar Badawi Sadig | 01-13-07, 07:40 PM |
| Re: لا بد أن ينتصر السلام... لا بد من احترام العهود والمواثيق.. | Murtada Gafar | 01-14-07, 11:52 AM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Elbagir Osman | 01-15-07, 04:52 AM |
| Re: 9 يناير ثورة ستنتصر حتما...SPLA OYEE... و من أحرج من يا محمد حامد جمعة؟ | Haydar Badawi Sadig | 01-19-07, 03:40 AM |
|
| |
Murtada Gafar
فيس بوك
تويتر
انستقرام
يوتيوب
بنتيريست