يا سلام يا د*ياسر وبنت الحسين ونادر

تراب بلدي

كلمات الشاعر الرائع : السر عثمان الطيب

غناء الفنان : محد كرم الله


انا وامغستي رحل تلوت الليل شقاوتي رحل تلوت الليل

مسالكي ضلمه ما بتنشق سكت روح نويرة الفرقة

جوة الجوف تسوي البق

مشيت لا زاد أشيلو معاي ولا زولاً معا اترفق

ولما خلاص بقيت مارق نجيم الليل مشي إتفرق

بكيت وبكيت طريف العين متمسح بالدموع رقرق

عشان مظلوم زماني الليلي شتت للشمل فرق

بسوي الووب نحاس احزاني جوه قليبي ينقر دق

يوهدبي يلوعني واخاف من المصير واشفق

اوادع الناس وافوت مجبور يجيني نغيم من الطنبور

اشوفلي جني وقف صفق ينط لا فوق

يطير يندق واطير واندق

وادنقر فوق تراب بلدي أخم بي إيدي في رحلي

اقول يا ليل وافارق الدار اجر فوق الوداع مسدار

أنوني أنوني شاق الواح محال ارتاح

ادخل إيدي في رحلي تراباً فيهو تسوى الكون

تراب بلدي

اشيل منو اشم وارتاح اشم طيبة اهلي

منو تفوح ترد الروح عويناتن تلوح وتلوح

عراريقن طواقيهن طواريهن سواقيهن

انين الساقي لما تنوح حسيس البربخ المفتوح

واعاين يا تراب بلدي اشوف فيك صورة ماب تنشاف

واشم ريحة الكُليت والشاف بنات بلدي بنات بلدي

طريحاتن مناديلن رقيصاتن شبابيلن

حليلي حليلي يحليلن

واشيل من زادي واتكرف

واشوف فيك يا تراب بلدي الحنين المابي يتوصف

سماح ناساً حلاة ناساً بلا السكر

طعم قراصه في قدحاً من الدبكر

كواريك شفع المغرب يقلبوا في الجمر قنقر

ولاد بلدي نقاقيرن طنابيرن جبابيدن سنانيرن

وافوت يا ناسي في دربي أقول يا أهلى واغلبي

خلاص ريدكن ملك قلبي منو الغيركن بشيل حبي

تراب بلدي بنات بلدي ولاد بلدي