|
نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 Re: ناس الزقازيق ... أجدع ناس (4) .. (Re: أحمد إسماعيل)
|
Quote: لسان الحال يقول
ليت الشباب يعود يوما +++ لأحدثه بما فعل المشيب |
ههههههههههههه
هاهاهاهاهاهاهاهاها
أبو حميد مع علمي التام بأنك و طارق جبريل على نقيض
إلا أنني و بكامل قواي العقلية
و أجزم بالعشرة أنني لا أعرف مكان لتياب الربط
مداخلتك تقرأ في كل السياقات
عشان كدا لا يوجد تبرير بعد ما تكتب
أن تكتب هذا يهمك
و لكن أصحاب الخيال الواسع كثر
و أنا منهم
على كل
اللخو وعدني و قد صدق
| |
 
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
الزول السمو طارق جبريل ده
يغيب ويغيب , ويجى يجيب لينا البلاوى دى
انا عارف البير وغطاهو
عارف الحرشو منو , وعارف كمان البيرسل ليهو جنس التصاوير دى
التصاوير دى عندها قصة
مش تصاوير طارق , كلمة تصاوير زاااااتا , فى عضما دا
قالوا ليك الجماعة بتفرجوا على تلفزيون الأل بى سى , ايام عزو ومجدو ديك
فى اقوال تانية , الفرجة ما كانت فى الال بى سى , قالوا كانت فى التلفزيون الحبشى
والفرجة زى ما عارفين مدارس
المهم فى الموضوع , قالوا ليك واحد من الفراجة , الفى حياتو ما شاف غير جمال محيطه الضيق الحوالينو
لما شاف سماحة اللبنانيات (لكن من عندى انا غايتو اعلنها داوية , وشن سماحتن كمان , المعصعصات الكملانات من لحم الدنيا ---- والآخرة كمان)
والرواية التانية بتقول لمن شاف سماحة الحبشيات ( والأعلان من عندى المرة دى اكثر دويا واعلى صوتا , هن كمان الحبشيات سماحتن سماحة نصاح )
لمن شافوا تلكم السماحة , المخلوقة والمصنوعة فى رواية , والمعطونة فى لون البرونز ونكهة البن المعتق (عمركم شفتوا ليكم بن معتق ؟؟)
واشكل عليهم ان يزاوجوا بين واقع عاشوه , وخيالات صور يرونها لأول مرة فى شاشة البللور المتلفزة , هتفوا مقتنعين
وما زالوا يفعلون بايمان كامل لا يساوره الشك لامن بين ايديه ولا من خلفه
انها (مجرد تصاوير )
ومن نفس الباب , انا هنا اتزعم الهتيفة الطالعين فى مظاهرة على الود طارق جبريل بمناسبة صورته التعبيرية الفوق دى
تصاوير ساااااى يا طارق !!!!!
| |
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
ضربتا لى طارق جبريل بمجرد ما شفتا صورة (الكرعين اعلاه)
شفتها بى هناك , فى وش الكتاب
الزول ده حقيقى زول جميل
من مدة , كنت مشتهى لى معاهو ونسة
عارف جواهو زول متمرد , بيطلع منو حاجات زى (الليل)
كلما سرحت بيهو روحه المتمردة , فى سماوات عاشها وخبرها
تمرد طارق ده , خلق منو , رغبة خوض لتخطى الخطوط الملونة التى تبدو من اول نظرة انها ما عادية
انحنا فى دنيا الزقازيق الأسفيرية , كان هنا ولا فى وش الكتاب ولا فى اى ساحات تانية
نعيش عيشة الأسرة الواحدة , زملاء وزميلات , منهم زوجات وازواج , لكن يعلم الله اننا فى الأول والأخير
اخوان واخوات , بمقايييس اسرية سودانية عايشنها فى كل بيت
فى بيناتنا كل شى موجود فى كل بيت
فى بيناتنا الخجل , والحياء , والصراحة , والوضوح , وفى بيناتنا الأحترام , والجرأة , والأقتحام ,
كل حاجة من ديل نختها فى حتتا
لا نزيدها لا ننقصها
بنعرف تماما , انو اخواتنا وزميلاتنا , لأنهن سودانيات , متربيات فى بيوتنا البنعرفا
وبى حكم تربيتهم , عندهم حياء يمنعهم من الخوض فى بعض الأمور , التى يتم تقسيمها واعتبارها ونسات جندرية خاصة
كلام نسوان بين النسوان , يستحى منه الرجال ولا يقوون على الخوض فيه
وكلام رجال بين الرجال , تستحى منه النساء ولا يقوين على الخوض فيه
ياهو ده الفهم البسييييط , المجرد من كل زيادة ونقصان
فى كل بيت وكل عائلة وكل اسرة
فى ونسة الرجال , وفى ونسة النسوان , دى عارفنها وديك عارفنها
ونسة الرجال ما بتقلل من احترامهم للنسوان , وونسة النسوان البيناتهم , لا تطعن فى احترامهم للرجال
وتجنب زميلة لونسة رجالية اسفيرية مفهوم , كما ان تجنب زميل لونسة نسوان ما (على قلتها ) ينطبق عليه نفس التصنيف
الطيب صالح مثلا , كتاباته فى مصطفى سعيد وشخوص موسم الهجرة , وحكاويه ونوادره وحتى ونساته الدقاقة
يقرأها الجميع , وستمتع بها الكل , نساء ورجال , ولكن مناقشة الفاظها , والتطرق اليها نقاشا وتمحيصا , لا يقوى عليه لا كل الرجال ولا كل النساء
ولكن بت مجذوب , نموذج سودانى للحبوبة (القاهرة) , لايعنى (حياء ) الكثيرين من جراتها , انها نموذج غير موجود
اغلب الظن ان بت مجذوب تثير (حياء ) الجميع , ولكنها تثير اعجاب الجميع ايضا فى نفس الوقت
المناقشة فى مواضيع بت مجذوب التى تدلف اليها دائما (توش ) دون احم او دستور
تبقى ممكنة ومتاحة عند القليلين , لا لأنها (بت لذينا ) بس , ولا لأنها (مرة قاهرة ومقطوعة طارى )
بل لأنها تتكلم لغة يحب ان يسمعها الكثيرين ان لم يكن الكل , ولكن يتحدثها (القليلون )
يا طارق جبريل , اخدش ما شئت , بس براحة علينا شوية
لأننا مرات , بنلقى نفسنا ضاربين ليك تلفون , ان لم نستطع مثلك , ان نكتب جهارا , ما نود ان نقوله لك فى (التلفون )
آخر ما قلته للمسنوح ده فى التلفون , (حالتك حزنان وابوك ميت )
فصدمتنى روحه الحزينة ولكن المتمردة , وعرفت طوالى ان (نفيسى بت بغدان ) , ما ماتت لى الليلى
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
ألف إلا خمسين .... شمعة
لابوزوز وعزيز الرحمن ...
كل سنة انتو طيبين ...
ونحنا مهنئين ....
============================
الصفحة دي لما تقلبوها ...
اضربو لي تلفون عشان ... اجيكم ...
ود جبرين ...
دي عينة من الجوكم بيت الفراش للعزاء ... في المغرب
تاني ما الفرشات عندكم ... 
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
صبحكم الله بالخير
فتح باب الأسانسير و أنا نازل ماشي علي الشغل...
فاذا بفتاة عربية من احدى دول الهلال الخصيب...
كانت ترتدي بنطلون محزق و تي شيرت أكثر (تحزيق و لا حذاقة)...
كانت لوحدها في الأسانسير لذلك ترددت كثيرا في النزول معها...
فلقد حدثت كثير من المشاكل هنا لبعض الأخوان السودانيين..
و كلهم من الأخوان المعروفين بالورع و التقوى...
و اتضح في النهاية ان الفتيات يقمن بمحاولة ابتزاز هؤلاء الأخوة...
فبعضهم يخشى أن يؤدي الأمر في الآخر الى فصلة عن العمل أو ابعاده من البلد..
فيرضخ لابتزاز الفتاة و يدفع مبلغ من المال نظير سكوتها عن شيء لم يفعله...
و البعض الآخر يتحداها و يصل الى الشرطة و يثبت اجرامها و لكن بعد تلتله...
كان في ذهني كل هذه الأشياء لذلك كان ترددي بل خوفي ظاهرا...
لكن هذه الحذاقة جعلتني أفكر بنقيضها الذي جاء في كلمات الراحل حميد...
كانت ماهـا في...كانت في المراح...شدتـلـو الحمار...تحلب في الغنم
لي شاي الصباح...والطير ما نضم...ما رسل نغم...
ديل يا كافي البلا يشدن في البنطلون من صباح الرحمن...
قلت ليها بأدب شديد و خوف..اتفضلي...
قالت لي أتفضل تعال مافي شي اتفضل...
قربت أدخل معاها و لكن حرصي الشديد خلاني أغير رأي في آخر لحظة...
لا معليش اتفضلي أنا متأخر شوية...
بدأ الامتعاض الشديد على وجهها من تصرفي...
و أظنها بعد داك تكون قالت (هو شو مفكر حالو السوداني هاد)...
كم من عشرة تدوني على تصرفي ده...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
| Quote: لا معليش اتفضلي أنا متأخر شوية... |
غايتو أكتر زول سعيد أنا دا
قول لي كيف؟؟؟
لأنو الساعة البيلوجية بتاعتك ظبطت
قلت لي ناس الهلال الخصيب!!!!
و كمان صوت بس!!!!! و تصوير من عندك
يعني صورة مافي!!!!
أنا بنتظر ناس جبريل بجيب ليك النجيضة هس
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
صباح النور يابعول الذين تعدوا الخمسون
ياجلا صحبك إتصلت عليه قلت أقول ليه
( الحاري أفضل من المتعشي ) متعشي لمن غلط
وذلك بوجود الوالدين معاهو
أخونا ود جبريل الله يرحم والدهـ نقول ليه
البرقص مابغطي دقنو
خليك من المشجعين العاملين فيها
مكر مفر مقبل ومدبر معا
الذين (يشركوا ويحاحوا)
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
| Quote: كم من عشرة تدوني على تصرفي ده... |
10/10 ما كان تكون الرشيد "الحكيم" لوما اتصرفت كدة
انا غايتو عندي رأي في ناس هلال شلعوها الكيزان القلت عليهم ديل
لايأمن غدرهم الا زول مسيكين ساكت ... والحكمة فاكرين نفسهم "يادنيا ما فيكي الا نحن"
اي نعم سمحين لكن غدارين وكعبين خلاص ...
تسلم من كل شر يا رش
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
Quote: غايتو أكتر زول سعيد أنا دا
قول لي كيف؟؟؟
لأنو الساعة البيلوجية بتاعتك ظبطت
|
ليه...
Quote: ناس جبريل حيقولو ليهو تصرف ########
على مسئوليتى الكلام ده ...
|
طالما الكلام فيهو شلوخ...
أكيد حيقولوهو ناس جبريلا...
Quote: ما كان تكون الرشيد "الحكيم" لوما اتصرفت كدة
انا غايتو عندي رأي في ناس هلال شلعوها الكيزان القلت عليهم ديل
لايأمن غدرهم الا زول مسيكين ساكت ... والحكمة فاكرين نفسهم "يادنيا ما فيكي الا نحن"
اي نعم سمحين لكن غدارين وكعبين خلاص ...
|
يا سلام عليك يا جلجل..
و الله انت الفيهم...
| Quote: انا غايتو بديك راكوبة. |
كل واحد و علامو...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
Quote:
و أظنها بعد داك تكون قالت (هو شو مفكر حالو السوداني هاد)...
كم من عشرة تدوني على تصرفي ده... |
بتوقف الأمر على حاجات كتيرة
* نجاة كانت معاك ولا براك
* ما جبتا لينا صورة البنطلون المحزق
* صورة طارق جبريل بتاعة طفايات قاعة الصداقة دى , كانت فى بالك ولا بال جلال
* االسانسير كان طالع ولا نازل
* كنت متأخر ولبست هدومك كلها مرة واحدة زى المرة الفاتت , ولا كنتا راااايق , وسويت لى نفسك قهوة ولنش بوكس ؟؟
* باركت لى زهير وعزيز الرحمن عيد ميلادهم المية ولا لسا
* قبل ما تنزل , سمعت صوت تنفس امنية فى الغرفة المجاورة , ولا صوت تنفس نجاة الجنبك , ولا ما سمعت صوت اى تنفس خير شر ؟؟
* اتعشيت امبارح ولا نمتا القوا
* آخر مرة شفتا ولا سمعتا صوت موسى عيسى متين ؟؟؟وبالعدم صوت جلا
* شفتا الموضوع معقد كيفن , دايرنا نجاوب ليك كده ساااااكت , لى اصلو انحنا طارق جبريل ؟؟؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
المساحة الموجودة ما بين الصفحة 42 و الصفحة 63
تشبة ما يسمى فى عالم البناء بالطاير ...
يعنى ما تتكلو على الزيادة دى شديد
ممكن عادى ( الشئون الهندسية ) المتمثلة فى بكرى ابو بكر
يجيب كراكتو و يحرت الشارع ...
اخير ليكم اكتبو مداخلاتكم و دعواتكم
عشان ما نبقى جارين وراء الحكومة فى مسائل التعويضات ..
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
صبحكم الله بالخير
اليوم من الصباح و التداخل متعثر للانشغال...
و جيت لقيت تحذيرات ديدو قدامي..
و الله يا ديدو ما فهمت قاصد شنو...
قاصد انو أي صفحة بعد الصفحة 42 ممكن تتهردم و تقع...
و كل مداخلاتنا تروح شمار في مرقة...
و لا قاصد مافي داعي تاني نعمل مداخلات سمينة طالما الصفحات مهددة بالسقوط...
نجي نصبح بس و نمشي...
بالله عليك أسهب في الشرح لي ناس برالمة أسافير زينا كده...
ينوبك ثواب...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
Quote: يجيب كراكتو و يحرت الشارع ...
|
بعدين خلي بالك في ناس مزارعين هنافي البوست ده...
يعني ..كراكه...و شارع ..و يحرتو...
ديل ما عاملات ماتشينغ مع بعض...
كنت عايز أسهب في الشرح...
لكن خفت اسهابي يكون تقيل على البلكونة الطايرة دي و تتهردم...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
أكتبوا يا شباب كراكة واحدة ما تدهسك
ننقل ما كتبه لكم الشاعر الزقازيقي
Hussein Shingrai
Apr 7
صوت الغلابة
كلمات: حسين شنقراي
ترانيم في رثاء الشاعر حميد
غاب النجم
غابت معاهو سحابه
والضل إنقشع
ساطعة الشمس تقابه
راح المغطينا
وبقينا نحنا غلابه
ضاعت بلدنا
وضاع كمان زريابه
جيدو خضرة نيلها
ودماهو تسقي ترابه
شارب هموم الناس
ضامر في حشاهو صعابه
أرضا سلاح
يا ناس ما توقفوا الدبابه
كلماتك رنين
دخلت في الذهن يادابه
جفت مزارعنا خلاص
وإتحت الورتابه
راحت مسرتنا كمان
وإتقطعت أسبابه
يالسائل دوام وتقول
أزيتنا مين الجابه
ياخي ناس شينين
في النفخة كم كذابه
لا شبهونا لا عرفونا
لا سر يمه لا سر يابه
ناس في العيد
بكوسوا حرابه
ناس الهم من كيف
حتملأ جرابه
ناس في البنك
دوام تغذي حسابه
ناسيه الآخره
ناسيه عقابه
راحت بلدنا ورحنا
حاكمانا نحنا عصابه
لا فور لا بجا
لا كمان جلابه
مقطع أخير:
(قالت الريح العجوز)
(ما إستحت قالت: يجوز)
كل شيء من بعدك يجوز
نزعل ونمدو بوز
كنت للوطن الرموز
كيف تاني من بعدك نفوز
في بعدك إنعدم النفوذ
هل يجوز ؟؟؟؟؟؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
صبحكم الله بالخير
ألف رحمة و نور على والدنا الحاج سيدأحمد...
نسأل الله أن يحسن منزلة و أن يتقبله بقبول حسن....
و ندعو الله بأن تمر ذكراه القادمة و أٍسرته الكبيرة أكبر و أعز...
و نخص أسرة أخونا ميسرة بالدعاء بدوام الصحة و العافية و النجاحات و التقدم...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
علاء محمد سعيد محمد الحسن ...
34 سنة ... قانوني يعمل محقق بشرطة أبوظبي ...
متزوج وله طفل واحد ....
هو ابن خالتي ... وصديقي ..
قبل أن يكون اخو زوجتي ... رشا محمد سعيد ...
داهمة المرض اللعين ... ففتك بالمرئ ...
زاحفا الى المعدة ...
اكتشف المرض فجأة ... وبدون أي مقدمات تذكر ...
سوي تكرار حرقة عند الأكل ...
وذهب للمستشفي ... وعمل منظار ...
فعرف السبب الصاعقة ...
غادرنا فجر اليوم لايرلندا ...
في رحلة علاج نسأل الله أن يكتب له فيها الشفاء التام ...
بدعاءيكم .... ودعاء الطييبن الذين عرفوه .....
صورة لولدنا علاء عندما كنا في زيارة الاخ الرشيد ونجاة حوفي بمنزلهم العامر بابوظبي ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
اللهم ارحم والدنا و عمنا سيداحمد و أبدله داراً خيراً من داره وأهلاً خيراً من أهله
اللهم اجمعنا وإياه في مستقر رحمتك
،،،،،،، ،،،،،،،،،،،، ،،،،،،،
خالص الدعوات للاخ علاء بالشفاء العاجل و ربنا يطمئنكم عليهو يا نجيلة
وتحياتنا للاخت رشا الى ان نتصل عليها ..
اللهم رب الناس، أذهب البأس، واشف، أنت الشافي لا شفاء إلا شفاؤك، شفاءً لا يغادر سقماً...
اللهم رب الناس، أذهب البأس، واشف، أنت الشافي لا شفاء إلا شفاؤك، شفاءً لا يغادر سقماً...
اللهم رب الناس، أذهب البأس، واشف، أنت الشافي لا شفاء إلا شفاؤك، شفاءً لا يغادر سقماً...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
فى مباريات كده
تخليك كا عارف انت امنيتك يفوز منو
منها مباراة الليلة العصر بين ارسنال وما نشستر سيتى
الله يعلم اى غلب لى ارسنال بحرقنى جنس حريق
لكن برضو الليلة ما داير الهزيمة لى مانشستر سيتى , عشان مانشستر يونايتد ما يوسع الفارق
ويقوم احمد ولدى بشمت فينى , وما نشستر تجيهو بااااردة فى عبو
عشان كده , يا رب انصر ارسنال على مانشستر سيتى
وانصر كوينزبارك رينجرز على الشياطين ديل
اللهم آمين
* رحمات الله وغفرانه على عمنا سيد احمد والد ميسرة , وسلامنا لى امنا حاجة محسنة رفيقة دربو وين ما كانت
واللهم انزل شفاءك ولطفك باخونا علاء محمد سعيد محمد الحسن
اللهم لا نسالك رد القضاء ولكننا نسالك اللطف فيه
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
نجيلة...
ألف سلامة لولدكم علاء الدين
ألهم رب العرش...
أذهب البأس واشفه شفاءا لا يغادر سقما...
ربنا الذي في السماء عرشه ، ربنا الذي في السماء تقدس اسمه، أمرك ماض في السماء والأرض ، وكما رحمتك في السماء ،فاجعلها في الأرض، اغفر لنا ذنوبنا وخطايانا، إنك أنت الغفور الرحيم ، اللهم أنزل رحمة من رحمتك ، وشفاء من شفائك ، على ما بـعلاء الدين من وجع .
------------------------------------------------
نترحم على العم المغفور له بإذن الله سيد أحمد
ونسأل الله العلي القدير أن يدخله الجنة
وأن يرحم أمواتنما جميعا وأموات المسلمين
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
سلامات يا ناس
* رحمات الله وغفرانه على عمنا سيد احمد والد ميسرة , وسلامنا لى امنا حاجة محسنة رفيقة دربو وين ما كانت
واللهم انزل شفاءك ولطفك باخونا علاء محمد سعيد محمد الحسن
اللهم لا نسالك رد القضاء ولكننا نسالك اللطف فيه
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
صبحكم الله بالخير
في واحدة من سرحاتي الطويلة قعدت أفكر...
و شغلت الآلة الحاسبة الافتراضية..ثلاثية الأبعاد...
و قعدت أحسب كيف قضيت ما انقضى من عمر...
كم النسبة المئوية للنوم بافتراض انها ثمانية ساعات في اليوم فقط...
تطلع معانا 33%...
كم النسبة الوقت و أنا قاعد آكل... 8%
و أنا زهجان مكشر و مكرمش الوش...
و هذه و لو أنها كانت تتناقص تدريجيا مع التقدم في العمر...
الا انها نسبة مقدرة نقول انها 15%...
كم نسبة الوقت القضيتو قدام التلفزيون...
مع محاولة سحب نسبة الأكل و نسبة الزهج...
يمكن تطلع 20%...
المجموع 76%...
قفلت الآلة الافتراضية ثلاثية الأبعاد و سرحت أفكر في كيفية تعديل النسبة فيما تبقى من عمر...
Quote: عشان كده , يا رب انصر ارسنال على مانشستر سيتى
وانصر كوينزبارك رينجرز على الشياطين ديل |
تحققت نصف أمنية منصور...
بهدف أرتيتا...فاز الأرسنال..
و قتل روني و اسكولز أحلام السيتيزن...
و أماني منصور...
و بات الشياطين الحمر أقرب للقب البريمير ليق...
في أسبانيا انتكاسة أخرى لريال مدريد أمام فالنسيا...
ربما تهدي لقب اللاليقا مرة أخرى لبرشلونة رقم تقدمه بأربعة نقاط كاملة...
و في ايطاليا انتكاسة لميلان أمام فيورنتينا...
صعدت باليوفي الى الصدارة و ربما الفوز بالكالتشيو...
و في فرنسا فاز باريس سان جيرمان على مارسيليا...
و صعد الى صدارة الترتيب مرة أخرى متساويا مع مونبيليه...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
نتمني عاجل الشفاء للأخ علاء الدين ... وربنا قادر انه ياخد بيده عشان أسرته واولاده والناس البتحبه ..
ولأن الشفاء من الله ثقتنا كبيرة في أنه علاء يجي راجع بكامل صحته وموفور ابتسامته ... قلوبنا معاكم
يا ياسر ورشا ومع علاء وأسرته ، وكل أمنياتنا وأمانينا .... قادر يا كريم ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
والله يا كوتش عشان خاطر انت والرشيد والريس ميسرة وياسر نجيلة باقي القوم ديل
عادل الواحد بيقابلك في عرصات الاسافير ... ومهداوي النت ... اها بقيتو رابطننا
بالبيت القديم ... يمين لو ما كده المنبر ده انا زمان كان فارقت دربه ....
بعدين في حاجات بتغيظ والواحد يغلبه يعلق عليها زي قصة الرشيد بتاعت
الأسانسير ... اكتفيت انه عضيت اصبعي علي طريقة المدرسات ...
هسه زي الرشيد ده الواحد يصاحبه ليه ... ياخي الناس المثاليين ديل هم البيجيبو
ليك الضغط والسكري .... الغريبة انت وميسرة نفس الحكاية ... الواحد خايف
يصاحبكم ويجي البوست ده كتير يبقي مثالي ... وتبقي مشكلة كبيرة دي ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
Quote: بعدين في حاجات بتغيظ والواحد يغلبه يعلق عليها زي قصة الرشيد بتاعت
الأسانسير ... اكتفيت انه عضيت اصبعي علي طريقة المدرسات ...
هسه زي الرشيد ده الواحد يصاحبه ليه ... ياخي الناس المثاليين ديل هم البيجيبو
ليك الضغط والسكري .... |
ياخي قصص زي دي تقعد بعدين تحكي بيها لي مجد...
ليه قلت مجد و ما قلت حنا...
عشان حنا طالع مثالي زي بهجة و زي عمو الرشيد...
لكن مجد طالع ابن......زي أبوهو...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
مثالية شنو يا زهير الداير تتهم بيها صاحبى الرشيد ؟؟!!
يبرى صاحبى ويستبرأ كمان من مثاليتك دى
انتا ما قريت الموضوع كويس ولا تشابه عليك البقر ؟؟
الزول ده قال ليك اليوم داك كان مستعجل ولبس هدومو كلها فى لحظة واحدة
تقوم تقول ليهو مثالى ؟؟؟
غايتو ناس الفيس بوك ديل يجوا يجوطوا لينا بوستينا ده سااااى ويفرتقوا !!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
صبحكم الله بالخير
لا أملك سماعات خارجية في الكمبيوتر بتاع المكتب...
و جيت لقيت الفيديو بتاع جبريلا للراحل زيدان و الناس مجقلبة...
و ما حبيت أستعمل سماعات الراس من صباح الرحمن بالمكتب...
قعدت أخمن يا ربي دي ياتو أغنية تجي الكاميرا على الراحل زيدان أقول دي أكيد يا خاين...
تمشي الكاميرا على الجمهور أقول ما ممكن تكون يا خاين...
الناس ديل مهججين شديد...و الكلوجة دي كلها ما ممكن تكون يا خاين..
دي شكلها كده في الليلة ديك..لا لا و دي كمان أغنية بطيئة شوية...
الناس ديل حاتنو حت شديد...
مع الحت ده دي أكيد أغنية قصر الشوق...
في الآخر فاض بي و تركت مثاليتي و طلعت السماعة وسمعت الأغنية ...
لا هماك عذابنا لا دموعنا و شقانا
نهديك المشاعر و تخون الامانة
ييا ييا ييا يا...
شكرا يا جبريلا على الهدية...
فتح الأسانسير هذا الصباح.......
و كان خالي...من غير تحزيقات أو مطبات...
و لا حتى اختبارات مثالية...
توكلت و ركبت...
على أن لا تكون هنالك أي مفاجآت بين الطابق الثالث و الأرضي...
لم تحدث أي مفاجآت في الطريق حتى الطابق الأرضي...
ركبت عربيتي و مشيت للمكتب...
و حكينا الكلام ده لييييييه...
عشان نعرف قيمة الجنيه...
و لا عضت (بضم العين) أيدي المدرسين .....
و المدرسات كمان....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
صباح الخير ،،، يا وجوه الخير
أصبحنا واصبح الملك لله وحده
عشرة تمنع عشرة
- سورة الفاتحة ***** تمنع غضب الله
- سورة يس ***** تمنع عطش يوم القيامة
- سورة الواقعة ***** تمنع الفقر
- سورة الدخان ***** تمنع أهوال يوم القيامة
- سورة الملك ***** تمنع عذاب القبر
- سورة الكوثر ***** تمنع الخصومة
- سورة الكافرون***** تمنع الكفر عند الموت
- سورة الإخلاص ***** تمنع النفاق
- سورة الفلق ***** تمنع الحسد
- سورة الناس ***** تمنع الوسواس
صباحكم جميل صباحكم عسل بصوت العندليب زيدان وطلة سامي
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
عارف الواحد بيقابل ناس مثاليين كتار في حياته يا منص ....
والله فعلا المثالية دي مشكلة خاصة الزول البيعمل ليك الحاجات
بالكتاب (الكوتش نموذجاً) ... تعرف محمد صديق ده لو مستعجل
ما تركب معاهو خالص ... كمثال علي المثالية بيسوق العربية
زي ما الكتاب قال .... أول حاجة يربط الحزام ، يشغل المكيف
يشغل المسجل (اكيد واحد من الرمضانات) جا يقيف لازم يقيف
بره الشارع خالص .. يقفل المسجل ... يقفل المكيف ... يطلع الحزام
يرفع فرامل اليد ... حتين بعداك يبطل العربية ...
اها انا بدور العربية وقبل ما اقلب المفتاح كويس بكون طلعت
قبل ما نور الزيت يبقي اخضر مش يطفي كمان ,,,, اها نسيت
اقول ليك بيسخن العربية اقل حاجة عشرة دقائق الصباح ,,
ياخي فعلا يا منص المثاليين ديل قبلهم وحدهم وبراهم
ياخي ديل الفيس بوك ده ما بيجوه ... ونسيت اقول ليك
معاهم احمد اسماعيل الشهير بابو عمر ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
Quote: جا يقيف لازم يقيف
بره الشارع خالص .. يقفل المسجل ... يقفل المكيف ... يطلع الحزام
يرفع فرامل اليد ... حتين بعداك يبطل العربية ... |
و الله صحي المثالية درجات يا أبو الزوز...
أنا غايتو ما وصلت الدرجة دي من السمو...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
Quote: اها انا بدور العربية وقبل ما اقلب المفتاح كويس بكون طلعت
قبل ما نور الزيت يبقي اخضر مش يطفي كمان |
دي ما ياها شفقتكم قدت مكنتكم زاته...
انت كمان لاحق شنو....
انت حسه الكوتش ده مفروض يكون أُثر فيك بي شوية مثالية...
من عاشر قوما ياخي...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
سلامات يا ناس
Quote: والله يا كوتش عشان خاطر انت والرشيد والريس ميسرة وياسر نجيلة باقي القوم ديل
عادل الواحد بيقابلك في عرصات الاسافير ... ومهداوي النت ... اها بقيتو رابطننا
بالبيت القديم |
ياخى كتّر خيرك.(ليس منّا من لم يُوقِّر كبيرنا)
بس استمر على كده.
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
Quote:
تعرف محمد صديق ده لو مستعجل
ما تركب معاهو خالص ... كمثال علي المثالية بيسوق العربية
زي ما الكتاب قال .... أول حاجة يربط الحزام ، يشغل المكيف
يشغل المسجل (اكيد واحد من الرمضانات) جا يقيف لازم يقيف
بره الشارع خالص .. يقفل المسجل ... يقفل المكيف ... يطلع الحزام
يرفع فرامل اليد ... حتين بعداك يبطل العربية ... |
اصلو شنو ياخ !!!
اوع تقول لى كمان , اول ما يقعد فى المكتب , طوال بيطلع الورقة الدايرا
وبلقى قلمو قااااعد
وبلقى شريطو العايزو كمان وش
والقميص الداير يلبسو يطلعوا ليك فرترب من وسط اخوانو القمصان
طيب ده ما يشتغل بوليس طوالى على كده !!!!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
يا رشدي هل يصلح الكوتش ما افسده الدهر ..... ياخي ستة واربعين سنة سبهللية ... يمين انا
خايف لو قعدت تاني سنة مع الكوتش ده اضيعه ليكم ... عشان كده بيكون اكتر واحد مستفيد
من إغترابي ...
بعدين يا كوتش حا ننفذ التعليمات كل يوم مداخلة ما كفاكم .؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
يا ابو الزوز ايام الامتحانات
بنكون معسكرين في لكوظ انا وود جبارة والولا ناصر كشري
اها محمد صديق يقول لينا نظبط لينا قهوة عشان نذاكر كويس
لمن يعملها حاتم وكشري بيكون ناموا
ياخي عنده طولة بال تعِل رسمي
انت اتخايل لي يوم القيامة لو جوا يحاسبوه حا يلقوه قاعد عند ست شاي
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
سلامات يا ناس
لقيتكم ما خليتو لى جنبة....وخاصة
طارق جبريل (وعندى ليهو نظام خاص) وأول حاجة
حأديهو دوز عالى من (البنج)..لانو ما حيتحمل(أوعك تجى تخت
لى الوشوش بتاعتك البتتراقص ديك)....
كنت عايز ارد ليكم واحد واحد ...لكن قلت اول حاجة أفك الحزام.
ملحوظة: ابتديت افك الحزام قبل ساعة بس.
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
مساء الورد والفل
على كل الناس المثالية
والناس الرابطا حزام الامان
والناس المفكرا تفكو وليها ساعة وكده
الكوتش
منصور
والرشيد
وميسرة
وزهير الزناتي
كيفنكم يا شباب
بصراحة الواحد بيسلم عليكم وعينو في الواطا
زي السارق ليهو حاجة
او عامل ليهو عملا
الفيس بوك ده اتاريهو بيوطي الراس
انا ما كنت قايلو كده والله
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
اجمل الامنيات والتهاني القلبية الصادقة نسوقها
لبنتنا روعة نادر فاروق ورجاء
ولابننا محمد المصطفي موسى عيسى
وابننا مصطفى محمد عيد
بمناسبة نجاحهم الباهر ونسأل الله ان يوفقهم ويجعلهم في اعلى المراتب دائما ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
النجاح ...
شئ جميل ... وبه تعم الافراح
اللهم اجعل ايامنا كلها افراح ... بنجاحات أولادنا ...
ألف مبروك ... للجميع وبدون فرز ...
===========================
واكبر مبروك ... لأهم نجاح ...
هو احتفاظ ولدنا محمد صديق ... الشهير بالكوتش والكمندان
بمثاليته ...
من أيام الروضة ...ومرورا بالابتدائي ... والدراسة المتوسطة والعليا ...
وأيام الجامعة لما كان في لكوظ مع طارق جبرين وحاتم جبارة ...
وكذلك بقترة مابعد التخرج ...
وفترة العمل ..
وظل مواظبا لمثاليتة برغم اقترانه ومعاشرته ...
لهمجية زهير الزناتي لفترة طويلة ...
فظل صامدا ....
للدرجة التي جعلت مرارة ولدنا زهير ... تفقع ...
تفقع بس ... ده فكاها وطلع في السعودية ...
السعودية بس ...
ياخي ده جري المنطقة الشرقية ...
عفارم عليك ولدنا الكوتش ...
ألف مبروك .... مثاليتك ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
صبحكم الله بالخير
سعيد أنا بالنجاح الباهر الذي حققه الزقازيقاب الصغار...
محمد و مصطفى و روعة و رنا...
التهنئة للأبناء أولا ثم لأمهاتهم و من بعد ذلك لآباءهم...
سعيد كذلك بعودة كيمو الجاهز...
مكانك محفوظ دائما يا كيمو ....
ان جيتنا ليل و ان جيت دغش...
طوالى أدفر الباب و خش...
البيت دا بيتك يا حبيب
ادخل مخير وماك غريب
انمد في اقرب عنقريب
مبهول في حوضو الهمبريب
النيمة يا العنابة ضل
اغشي التكل خرمان في شاي
جيعان اكل
وداك التمر والزير قريب
بايت من البارح ملان
راقد في صدر الهمبريب
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
التحية لكم جميعا اهلي الزقازيقاب و انشاء الله نبارك
للجميع في الثمح و الافراح , حقيقة سعدنا بنجاح العيال
و لكن الفرحة اكبر بكلماتكم الجميلة و التهنئة الحقيقة
كمال قال اخي الرشيد للرابطات و الماسكات علي جمرة
التربية بنات شيخنا فهذه دعوة للجميع ان نرفع القبعات
احتراما لهن و نسال الله ان يديم عليهم نعمة الصحة لمواصلة
العطاء لتكملة المشوار فلهن التحية والتقدير فهن صانعات
النجاح اكرر شكري لهن جميعا و اخص بذلك ام العهود هنيئا لك
النجاح .
و اكرر شكري للجميع المتداخلين و الذين حالت ظروفهم دون
ذلك , بس عندي زول واحد و هو عارف نفسو عامل فيها مشغول بالرحيل
و حاجات تانية برضو ما في عذر !!! عندك حتى مساء اليوم كحد افصى
بعداك لا تقبل التهاني الا بطلب موافق عليه من قبل الريس و حاشيته
دودي و محمد عيد والرشيد !!!!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
صباح الخير ،،، يا و جوه الخير
أصبحنا وأصبح الملك لله وحده
نجاوى صباحية لنجاح أبناء الزقازيقاب
اللهم لك الحمد ملء السموات وملء الأرض
وملء ما شئت من شئ بعد
اللهم لا مانع لما أعطيت
ولا معطي لما منعت
والحمد لله كثيراً
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
سلامات يا ناس
Quote:
اجمل الامنيات والتهاني القلبية الصادقة نسوقها
لبنتنا روعة نادر فاروق ورجاء
ولابننا محمد المصطفي موسى عيسى
وابننا مصطفى محمد عيد
بمناسبة نجاحهم الباهر ونسأل الله ان يوفقهم ويجعلهم في اعلى المراتب دائما ...
وكمان رنا جمال السنوسي 257 |
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
Quote:
من أيام الروضة ...ومرورا بالابتدائي ... والدراسة المتوسطة والعليا ...
وأيام الجامعة لما كان في لكوظ مع طارق جبرين وحاتم جبارة ...
وكذلك بقترة مابعد التخرج ...
وفترة العمل .. |
ايام الروضة , الأبتدائى , الدراسة المتوسطة والعليا
ما بعد التخرج , وفترة العمل
كلو ده عرفناهو وفاهمنو
انجاز الزول ده عارفو وين يا نجيلة
كونوا يقدر يبقى مثالى
ايام الجامعة , مع ناس طارق جبرين وحاتم جبارة ديل
تحت تحت كده كمان فى واحد قال لى , زيد ليهم جمال فارح وشبوكشى
مثالية مع ناس زى ديل , تستلزم للزول ده , دبورتين تلاتة فوق لى دبابيروا الكتيرة ديك
* مع انو هسى مثاليتو بدت تفك , ده بقى يمشى الفيس بوك ياخ , تتصور , تانى عاد باقى ليهو شنو غير السجاير والعرقى ؟؟!!!!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
Quote:
* مع انو هسى مثاليتو بدت تفك , ده بقى يمشى الفيس بوك ياخ , تتصور , تانى عاد باقى ليهو شنو غير السجاير والعرقى ؟؟!!!! |
ونانسى عجاج كمان
دى زهير اللئيم ده قال لى اكتبا
بحجة انو الكوتة بتاعتو بتاعت سودانيز اون لاين , خلصت الليلة
جنس لاءامة غايتو , انتو لاءامة دى بكتبوها كيف ؟؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
يا جماعة والله عملتو لي فتنة مع عديلي ساي ... أنا اصلاً ما قاصد الحاجة البتقولو فيها دي ...
ياخي انا بمدح في الراجل وطاير بيهو السما .... بقدرة قادر تطلعوني أنتقد في الراجل
اها دي الحركات البيتخلينا ما نجي بوستيكم ده ... علي العموم ده بيان نشر في
كل وكالات الانباء المحلية والأجنبية ... وشعارنا للمرحلة القادمة .... الكوتش وبس
وما عداه حرف ومهن ... بالله ياسر نجيلة ومنص وطارق جبريل ومن لف لفهم ما دايرين
فاتن حمامة ... كله إلا الكوتش ده ....
فلت لي يا كوتش الباب ماله ... دي زي قصة الراجل الطلق مرتو قال بتعصر المعجون من نصه ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
| Quote: جنس لاءامة غايتو , انتو لاءامة دى بكتبوها كيف ؟؟ |
يازوووووول الكلمة دي صعبتها كده ليه ...
ياخي دي ساهلة خلاص ...
لآآآآآآآآآآآآمه ....
والقاعدة ...
بتقول لإلتقاء الألف والهمزة ... ادغمت الألف في الهمزة ... واستعضنا عنها ... بالمد ...
كدي اسألو اولادكم النجحو ديل ..... انتو عجائز ...
==========================
يامنص ....
انا كنت متوقع يجي واحد ناطي فيني جوز ... في الكلمة ... دي
| Quote: بدعاءيكم.... ودعاء الطييبن الذين عرفوه ..... |
لحدي هسع ماعارفا صح ... ولا غلط ....
زهير .... ياخوي موضوع اللغة ده مابخصك .... استريح ......
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
سلامات يا ناس
| Quote: * مع انو هسى مثاليتو بدت تفك , ده بقى يمشى الفيس بوك ياخ , تتصور , تانى عاد باقى ليهو شنو غير السجاير والعرقى ؟؟!!!! |
يا منص : سلام
دى بس جبتها من وين؟
انت عارف الفيس بوك ده انا بعدت عنو عشان صلبتّو دى...زول يرسل رسالة تقبلها
طوالى يسرق خشمك يودى بيهو رسالة لى زول تانى.
ما تصدقوا الفيس بوك.(مالكم كيف تصدقون)؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
مثالية جورج
مرة الامتحانات دخلت في العضام قلت ليها ياخي ارحكا نمشي نجيب لينا فطاير من فطاطري المزلقان
قال لي دقيقة اكمل قهوتي واضرب لي حجر من الشيشة دي
لمن طلعنا لقينا الناس طالعة من صلاة الفجر
مع العلم انا قلت ليه الكلام دة الساعة عشرة مساء
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
هوي يا طارق جبريل ما تعمل لينا مشاكل ... انا اصلاً ما قاصد الحاجة البتقول فيها دي ...
انا قصدي تاني خالص ... انه محمد صديق بيعمل الحاجات بالكتاب ... ده قصدي ... يعني
زي ما بيقول الكتاب بيعمل الحاجة ... وانا زي ما قلت قبل كده برضو بعمل الحاجات بالكتاب
بفتح الكتاب اشوفه قال شنو بعمل عكسه تماماً ... ده قصدي يا فاتن حمامة ... يعني مثلا
تكون مع الكوتش في العربية ... يضرب التلفون اول حاجة يعملها يقيف يمين الشارع حتين
يرد علي التلفون ... انا مرات بكون بشرب في سجارة وشاي وبتكلم في التلفون وسائق العربية
وبعد ده متخطي وما عندي رخصة .... بس حقيقي رفقة الكوتس من الحاجات الزول بيحن ليها
كل يوم ... يا سلام علي استاد الهلال مع الكوتش ومشاهدة هوبة مهند فرش وعلي الهواء
مباشرة ... ولا تشرب ليك شاي رهيب هناك في شارع الختمية بحري ... والونسة الطاعمة
اللذيذة ... ولا شاي عصرية معاهو في البيت ... من البت خالدة ... بس اكيد لكل حاجة
ضريبة وضريبة رفقة الكوتش الجميلة دي ... انك تسمع الرمضانات وناس صلاح احمد عيسي
ولي فوق ...
تحيات صباحية للكوتش .... محمد صديق ... ولا نامت أعين الجبناء ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: جلال عثمان)
|
صبحكم الله بالخير
من قبيل قاعد ازازي أفتش لي مدخل...
كل يوم بجي شايل معاي مدخلي و بدخل بي ايدي و شديدي...
اليوم عصلجت عصلجة السنين...
قلت أستغل الحملة الشرسة على منابع الجمال و الابداع (الكوتش)...
و أرد بقوة على الذين جمعوا صفوفهم و شدوا خيلهم و تحاملوا على الكوتش...
لكن خفت مع الأجواء التعيسة بتاعت الأيام دي تقوموا تتهموني باني بحارب بالوكالة...
قمعت بطلت و قعدت قعدت أتفرج في تبريرات أبو الزوز...
تبريرات مطعمة بي شاي و طعمية و هوبة مهند الطاهر...
و لأن الكوتش قلبو أبيض فواحدة من هذه المطعمات بترضيهو...
حتى و لا في داعي لي هوبة مهند الطاهر...
و لو أني عارف ان الكوتش كان بيفضل شوتة على الطاير من كاريكا على هوبة الغزال...
الأٍسبوع ده كان فيهو مباراتين لي ميلان و اتنين لريال مدريد و برشلونة...
مباراة لمانشستر يونايتد و سيتي و أرسنال..
مبارة لباريس سان جيرمان و مارسيليا...
مباراة هلال مريخ دي يشوفوها كيف حسه الليلة...
الا أمشي أعيد برمجة عيوني ديل تاني...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
يا رشدي والله انا ببرر لانه الناس حورت كلامي تماماً بحاجة انا ما قاصده حقيقي ...
وده صيد في الماء العكر ... للنيل من العلاقات الراسخة مع عديلي ولكن هيهات
ان ينالوا من هذه العلاقات الأزلية ... بعدين ياخي الكوتش ده لو غلطت في حقه
اصلاً طوالي بجي اعتذر ليهو دز كده زي ما بيقول فارح ... انا كنت عايز اسوق
النقاش لحتة بتاعت انه في ناس كتار في الزقازيق مثاليين ... وبيعملوا الحاجات
بالكتاب ... ودي حاجة كويسة وترفع الراس ... دي النقطة الأساسية ... بعدين
ياخي أعداء الوطن يحتلوا هجليج وأنت تقول لي حفل شيرين في استاد الخرطوم
لغوها .... ولا كنت بتتكلم عن هلال مريخ ... معليش ... انا بقترح انك
كل مباراة تشوفها بعيون براها ..................
إذا خرج الهلال من مباراة اليوم بالتعادل فهو منتصر ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
Quote: بعدين ياخي أعداء الوطن يحتلوا هجليج وأنت تقول لي حفل شيرين في استاد الخرطوم
لغوها .... |
ياخي لغوها...ما معقولة...
يعني تشوف كورة هلال مريخ...
و تطلع النتيجة ما في الصالح ..لا قدر الله...
و نجوم الغد انتهت...
و حفلة شيرين لغوها...
أعمل شنو...
منو شيرين دي؟
Quote: انا بقترح انك
كل مباراة تشوفها بعيون براها ..................
|
ما قادر و الله...
يعني ممكن تشوف ليك كم مدينة جميلة و لما تجي الخرطوم...
تعمل فيها كأنك ما شفت حاجة...
و لا تسافر عبر كم مطار و لما تجي مطار الخرطوم بيكون عادي...
لازم تقعد ليك كم يوم كده تعيد فيهم البرمجة بتاعتك...
حسه الكورة دي هجمونا بيها...
كان يعملوها بعد كم يوم من مباريات الدوري الأسباني عشان نتعود...
هم زي ما لغوا حفلة شيرين كانوا يلغوا هلال مريخ كمان...
ما كلو عند العرب ترفيه...و انصرافية كمان...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
مبرووووووووووووووك للهلالاب ...
دخلت مخصوص يوم الجمعة
واخدت تصريح من الحيكومة ...
عشان نبارك ليكم ...
بالرغم من أن الجمعة ... يوم المكوي
اسرع هدف ...
تلاتة نقلات سريعات ... ومدقنات ...
والرابعة في الشبكة ...
معز محجوب ... لعمر بخيت ... لسادومبا .... وبشة من لمسة واحدة ... في الشبكة
بالضبط اقل من 15 ثانية ...
وجماعتنا العويرين ... مساكين الكورة الــ 90 دقيقية ...
ماعارفين طريق الشبكة ... بي وين ... وواقعين ضرب في العراضة ...
هسع العراضة دي لو ختوهم كلهم في خط ستة ...
وقالو ليهم ...
اضربوها ... حيجلوها كلهم ...
ده طبعا لو كانت المنافسة في ضرب العراضة ...
جنس عوارة ... غايتو ...
مبروووووووووووووووووك تاني ... يالهلال ...
جمعة مباركة للجميع .....
| |
|
|
|
|
|
|
| |
محمد صديق
عبد الدائم سيد أحمد
طارق جبريل
محمد عيد
أحمد إسماعيل
الرشيد بابكر
محمد آدم النور
منصور عبد الرازق
جلال عثمان
ميسرة سيد أحمد
ياسر نجيلة
حافظ انقابو
زهير الزناتي
سامي عبد الوهاب إدريس
كمال الشادي
موسي عيسي
فيس بوك
تويتر
انستقرام
يوتيوب
بنتيريست