|
نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 Re: ناس الزقازيق ... أجدع ناس (4) .. (Re: ميسرة سيد أحمد)
|
مساكم الله بالخير
لسبب لا أعرفه أنا لا أستمتع بصور منصور لأنها لا تظهر عندي...
بالرغم من اني عامل فيها ميكانيكي كمبيوترات و حاولت معالجة المشكلة لكني فشلت...
فبجي بس أقرأ كلام منصور المكتوب و لا صور...
مرات بقوم أتخيل منصور و الأولاد والمحلات الما خمج...
امكن مافي حاجة مزعلاني قدر صور دوسلدورف و كولون في ألمانيا...
و قريت كلام منصور عن الصورة التي كان يرسمها في خياله لألمانيا...
و استغربت لهذه الصورة ...من أين لمنصور بهذه الصورة...
فهي عكس الصورة التي في خيالي عن ألمانيا بل و مشاهداتي لها من خلال الصور...
و صور حية أثناء بعض المناسبات الرياضية ككأس العالمو بطولة أمم أوروبا...
و بعض المباريات الودية التي تقام في ملاعب ألمانيا...
و رغم ما تتميز به مدن مثل ميونيخ و برلين من جمال في الطبيعة و العمران...
الا انني كنت أعتقد دائما ان مدينة شتوتغارت مدينة نموذجية...
و كنت أصفها بأنها مدينة من القرن القادم و ليس الحالي...
و لأني لم أزر شتوتغارت بل شاهدتها بعيون الكامبرا من خلال تقرير عنها أثناء اقامة احدى المباريات بها...
فاني أتحفظ في الوصف الذي وصفته لها...
فالكاميرا لا تعكس كل الحقيقة بل تعكس الجانب الجميل من الحقيقة...
تظل كل ألمانيا و معظم المدن الألمانية مدن تم أعمارها بعد الحرب العالمية الثانية...
لذلك فهي تتميز بنوع من المباني الحديثة التي تعبر عن تلك الفترة...
ان كان كمبيوتري و كسلي قد حرموني مشاهدة صور منصور...
فأن كسلي حتما لن يدوم ان لم أفلح في اصلاح مشكلة الصور في كمبيوتري...
و سأشاهد كولون و دسلدورف و ان طال السفر...
| |
 
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
يا سلام اولاُ كفارة لسيدة الزقازيق الاولي ... وربنا يجعلها ليك كفارة ....
ثانياُ نرحب بعودة العزيز عمرة نملة ويا ريت تبقي زيارة متصلة غير منفصلة ...
ثالثاً : يا منص ياخي قلنا ليك نحن ما مستعجلين ياخي ارجع احكي لينا زي ما بديت تحكي في المطار
الصور دي نعتبرها صور توضيحية ... يعني ما تستكردنا في الحكي الجميل ... ياخي اوربا دي الله اعلم
نمشيها .... خلينا نشوفها بعيونك ... حتي لو مشينا يكون عندنا فكره .... اكيد اتبرلمت احكي لينا
عن المواقف والطرائف والتناقضات ... عايزين نشوف اوربا بعيون زول من العالم الثالث .... ياخي عايزين المتعة
وقت ما تلقي فرصة احكي لينا ...
| |
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
صباح الخير ،،، يا وجوه الخير
يـارب :-
ناداك نـوح فنجيته مـن كربـه....
ونـاداك أيـوب فكشفـت مابـه مـن ضـره
ونـاداك يونـس فنجيتـه مـن غمـه
ونـاداك زكــريا فوهبـت لـه ولـدا مـن صلـبه....
بعـد يـأس أهلـه وكبـر سنـه
ونـاداك إبراهيـم فأنقذتـه مـن نــار عد وه
وأنجيـت لـوطـا وأهلـه مـن الـعذاب النـازل كلـه....
سبحـان مـن أيـَد اليتيـم بجبـريـل
ودمَـر أبـرهـة بطيـر أبابيـل
يامـن هـو فـوق عبـاده ظاهـر....
يامـن هو مطلـع عليهـم وناظـر
أعنا على ذكرك وشكرك وحسن عبادتك يـارب
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
مساكم الله بالخير
بدون آهات و وجع..
أتمنى لو يرجع بي الزمان الى الوراء...
حيث كنت أجلس الى قلب دافيء و حضن أخضر و حنين متدفق..
تفترش الأرض أو ابرش من سعف النخيل و نلتحف سماء زرقاء صافية...
و تقعد تسمع يا طالع الشجرة ...جيب لي معاك بقرة...
تحلب تعشيني ...بالصحن الصيني...
أو ترنيمة من صوت خافت رخيم...
يا القمراء يا القمراء...
فيك السنسن الحمراء...
شوفي أبونا ليه ما جاء....
ثم أظفر بعدها بقطع من حلاوة اللكوم...
و ربما كيس أو كيسين من دندرمة الكركدي المثلجة...
أو بالعدم...
أيسكريم من هاقن داز من احدى حكايات صيف منصور الأوروبي...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
صباح العسل ياناس ياعسل
والله يامنصور ماقصرت كلو كلو
وإستمتعنا بالرحلة معاك
وفعلاً توثيق أكثر من رائع
شكلك كدة عندك موهبة بتاعة إخراج
تحياتي لكل الجدعان وسرني جداً أن يكون العزيز حيدر حنين في السودان
ولو عارفين رقم تلفونه أرجو مدنا به
ودمتم
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عمر هواري)
|
Quote: مساكم الله بالخير
بدون آهات و وجع..
أتمنى لو يرجع بي الزمان الى الوراء...
حيث كنت أجلس الى قلب دافيء و حضن أخضر و حنين متدفق..
تفترش الأرض أو ابرش من سعف النخيل و نلتحف سماء زرقاء صافية...
و تقعد تسمع يا طالع الشجرة ...جيب لي معاك بقرة...
تحلب تعشيني ...بالصحن الصيني...
أو ترنيمة من صوت خافت رخيم...
|
الرشيد كيف حالك ؟؟
والله كلنا بنتمنى كدة
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عمر هواري)
|
Quote: صباح العسل ياناس ياعسل
والله يامنصور ماقصرت كلو كلو
وإستمتعنا بالرحلة معاك
وفعلاً توثيق أكثر من رائع
شكلك كدة عندك موهبة بتاعة إخراج
تحياتي لكل الجدعان وسرني جداً أن يكون العزيز حيدر حنين في السودان
ولو عارفين رقم تلفونه أرجو مدنا به
ودمتم |
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: قيس جمال الدين)
|
مواليد رمضان ديل مالم كتار كده يا جبريلا
كل سنة وانت طيب يا عيدنا وعقبال ميه شمعة
يا منى عباس لو انتظرتى شوية كان طفيتى الشمعة
ولا لحقتى الفطور مع ناس موسى و قيس
رزق الاخ الفاتح على البشير ( زراعة ) يوم امس بتؤامين زى الـورد ( ترتيل و تسنيم )
الف مبروك يا ابو احمد يتربو فى عزك و الف حمد الله على سلامة المدام
وديل بنات صالحات جايات فى رمضان و يوم جمعة و بداية العشر الاواخر
الف مبروك و شد حيلك
وشغل البيت كتر فى رمضان يا ميسرة مش كده
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: قيس جمال الدين)
|
مساء أمس إبتلت العروق لدينا وذهب الظمأعند الأخ قيس بالخرج
ربنا يثبت الأجر ويحسن ويبارك ويزيد الأخ قيس وأسرته رزقا طيبا
ـــــــــــــــــــــــــــ
كنا نمني أنفسنا بصحبة أخانا الذي بالدمام ، لكن الظاهر ينسى
أنه مرتبط بكفيل ( نوع جديد من الزهايمر ) وهذه الحالة الثانية
إننتبه ماتحصل الثالثة000 وإلا حنقول وجبت
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
الأخ الحبيب محمد عيد ألف مبروك بمناسبة شمعتك رمضان 1432
وأتمنى لك كل توفيق وأن لا تفارق السعادة حلكم وترحالكم
ـــــــــــــــــــــــــ
ألف ألف مبروك للأخ الفاتح علي بشير بالتوأمتين وإن شاء الله
بمقدمهن تزوركم مزيد من البركة والمودة وألف حمد الله على سلامة المدام
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
طولنا من المرور بي جاي ... باقي رمضان قرض تب اللحم والعضم وداخل على الدم
نسأل الله ان يجعلنا واياكم من عتقا هذا الشهر الكريم ... وان يتقبل منا ومنكم الطاعات
لكن والله الظاهر عليكم الاسواق عاملة فيكم عمايل ما مدياكم نفس للمتاوقة هنا
انا الحمد لله لامجال للسوق الا جمعةً لانو طول اليوم مصاقر الدوام
وتقريبا الجمعة الامس دي قضينا شغلتنا كلها وباقي بس شوية حاجات كدة
وزاتها مافي داعي ليها لانو ممكن الزول يعمل فيها على سفر ويسقطها
امس بت الشيخ قالت لي جيب لينا بالله حاجات الخبيز ولوازمه عشان نجهز بدري
قلت ليها خبيز شنو كمان انتي ناسية انو نحن معيدين في المدينة وباقي العيد في جدة
غايتو برطمت ما عرفتها قالت شنو .... لكن عموما يا ناس جدة اخبزوا لينا معاكم
اها ... تحياتي ليكم جميعا واتمنى البلقي فرقة يدينا طلة عشان ما نقعد نفتش للبوست دا في سقط لقط
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
مساكم الله بالخير
المحل ده بقى زي برنامج أغاني و أغاني....
مش البوست بتاع أغاني و أغاني في الفيس بوك بتاع أخونا داك صاحب علي قاقرين...
لا لا زي برنامج أغاني و أغاني بتاع السر قدور...
كلو اعلانات وبس...أعياد ميلاد و ميلاد و طهور و فطور...
تاني يعدمو الحبه دي...
منصور و عذرناهو في حالة سفر تمنعه من مواصلة برنامج أسفار و أسحار...
لكن الباقين مالهم...
أنا ذاتي معاكم...انتو قايلين أنا مطلع نفسي من اللوم...
و الناس البتجي هنا حتى و لو كان اعلان برضو أحسن مني و الله...
لأن التواجد في حد ذاته مهم و مهم جدا...
مش زي جلا لا يقرب النت و لا يتعاطى الشات في رمضان...
أنا كنت عايز أضرب ليهو تلفون أقول ليهو و الله عفارم عليك...
بعد ده يكون فضل ليك ال............بس....
| Quote: رزق الاخ الفاتح على البشير ( زراعة ) يوم امس بتؤامين زى الـورد ( ترتيل و تسنيم ) |
مبارك عليكم ترتيل و تسنيم يا الفاتح...يتربو في عزكم و ربنا يجعلهم من الصالحات البارات بكم....
أنا خايف جلا يجي يقرأ البارات دي يقول ليكم عرفتو لي أنا مقاطع النت في رمضان...
| Quote: غايتو برطمت ما عرفتها قالت شنو .... لكن عموما يا ناس جدة اخبزوا لينا معاكم |
يا جلال شايف ست بيتك بقت مهادنة في رمضان ده...
بقت تبرطم ساكت من غير جرجرة اضنين و لا كفيت...
و لا حتى أضعف الايمان مفراكة...
أظنها مراعية لي ظروفك الصحية...
قالت الراجل ده حسه أقوم أديهو كفين و لا أضربه بالمفراكة يموت لي في يدي....
الكلام الأخير غالبا يكون دي البرطمه الكانت بتبرطمه ست بيتك...
أقعدوا عافية و ما تطولو الغيبة...
البكان ده من غيركم بيبقى خلا و بيعشعش فيهو الطير...
مافي داعي أخسمكم بالنبي تعالوا ساكت براكم بدون خخسيم....
كنت عايز أودعكم بي قصيدة لكن خفت على كمبيوتراتكم...
قولو لي كيف؟؟.....ما سامعكم...قولوا لي كيف؟؟...
في رمضان ده أي زول رووحو بتكون محرقاهو و يشاكل في ضلو...
تجي ماشي في الشمس تلقى ضلك مباريك تقول ليهو ياخي ما تزح مني كده و لا كده....
تشاكل بتاع الدكان و تشاكل الشغالة في البيت ..
تشاكل من طرف...
خفت أكتب ليكم قصيدة أودعكم بيها تقوموا تشيلوا كمبيوترات تضربو بيها الحيطة...
تقولو لي دي حسه مواعيد قصيدة و تشيلوا الكبيوتر تضربو بيهو الحيطة...
أنا حسه من قبيل روحي محرقاني..
و قربت أعمل شكله مع منى عباس في تست تست حقتها دي...
ليه يا مني تقولي لينا تست...تست...
لكن تاني قلت مافي داع......
و رمضان كريم...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
تصدق يا رشدي تست تست دي حقتي انا .... يعني كنت عايز تشاكل الزوله ساكت
يا محمد عيد كل سنة وانت طيب وعقبال مية شمعة . مع الصحة والعافية والسعادة .......\
مبروك يا الفاتح الامورتين .... اكيد انت زول جميل عشان كده ربنا رزقك بالبنات ...........
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
اهلي الرائعين ...
سلام يغشاكم.. بنبارك تومات الفاتح وحمدا لله علي سلامة المدام وانشاء الله يتربو فى عزكم
وكمان نبارك ولد قيس وباركنا بغادى انشاء الله يكبر يقضى الغرض ,حبوبتنا زمان كنت اسمعها تقول الولد يقضي الغرض اقول ليها والبت كمان ...غايتو ماظنيت كلامى عجبها وعدته غيره وبس لكن يا الفاتح يتباركن بركة الشهر الكريم
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ابتهاج عبد الله)
|
مساكم الله بالخير
يا أبو الزوز انت العملت تست تست...
كويس اني قريت كلامك ده بعد الفطور...
بعد ما ذهب الظمأو ابتلت العروق...
يعني مسامحنك على عملتك لأنها رجعت لينا منى عباس مرة أخرى للمنبر....
يعني حنرجع نستمتع تاني بي مداخلاتها الكل تلاتة شهور ديك...
بس يا منى ما تحسبي لينا تست تست دي مداخلة...
لأني المرة الجاية حأقول لي زهير ما ترجع ليها الباسورد...
يا بهجة كنت عايز أقول ليك حبوبتك دي دقة قديمة...
لكن خفت الحبوبات يزعلوا مني...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
سلامات يا ناس
وصباحاتكم ندية
الظاهر عليكم ما انسترتو مع رمضان
يعنى كلكم كده لابدين وسايبين البوست غاتس
وحكمة الله بقيت كلما القى لى فرصة فى الدخول ما القى
البوست فى الصفحة الاولى ...
المحيرنى منصور ...بعد الايقاع السريع داك والنشاط رجع نام
منصور :ارجو تأكيد موعد الوصول.
زهير فاتح مليون بوست لحدى قلت ده زول تانى.
ابتهاج مبروك عودتك للكتابة .
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
ولدنا منص متجدع بالطول والعرض ..
والله أنا حاسدو عديل كده ...
ما عشان الإجازة الفي أوروبا ... ولا عشان هو كتاب ..
وآثرنا بالوصف الجميل الممتع ..
ياخي انا حاسدك عشان ...
بتلقي الوكت ده كلو من وين ...
رمضان ده .. ماجاكم ... ولا خليتو في امستردام ...
يعني معقول يامنص ...
لا عندك شغل في المكتب ... ولا الدوام قصير ...
ولا في البيت رمي طعمية ... ولا غسيل عدة وأكياس زبالة ...
خليناهو الكنس والمسح والنظافة ...
ياكافي البلا ... لا بتبل حلو مر ... ولا حتي بتصفيهو ....
ياخي طيب تعال امسك معاي فارس ده ...
يمين هو في عمر الآن ... ناوي اجيب ليهو حارس مرمي عديل كده...
يقبض ده ... ويفك ده ... يمشي ويقع ... ويتاتي بالطرابيز .. ويمسك الفوطة ويجر كل الموجود بالطاولة ...
و الحاجات تجي في وشو ... وهاك يابكا ... ويقع من السرير ... ووو
والعجب لو مسك في طربيزة التلفزيون ... تلفزيونات السجم العاملة زي الهبابة ...
وخاصة انا تلفزيوني الداخلي لامعلقو في حيطة لاخاتيهو في وول ينت ...
وحاتكم طربيزة بعجلات عشان اتحكم في الاتجاه ..
وبالله تخيلو الجهجه الانا فيها ...
وزونا منص ولا هماهو واقع كتابة ... ونزيل صور ... فعلا اماني ماشايفه شغلها ...
اكيد في الحته دي .. موسي عيسي تذكر مأساة صاحبه داااك ...
ماعندو شغلة في البيت غير يمسك الشافع الصغيروني من ما يدخل البيت لحدي تاني يوم الصبح مواعد العمل ...
اها يا موسي زولك ده لسة قاعد ولا ... اغترب ... اكيد انا ماقصد جلا ...
طبعا هذا الحوار لا يخص ولدنا كمال الشادي لا من قريب ... ولا من بعيد ...
الصورة ده عشان لولدنا محمد عيد ...
لانه بستخدم في صور ة قديمة واحدة لاسرتي ... من زمن جلسة بيت الرشيد ديك ..
والصورة دى تشمل كل أفراد الأسرة ... وذكرتني زمااااااان لما نتفق مع أولاد الحلة ...
أو أصحابك في المدرسة ... نقوم نمشي الاستيديو عشان نعمل صورة جماعية ...
تلقي الشعر خنفس ...والبناطلين شارلستون ...
والقمصان تحرمني منك ... وكمان الشبط أو الجزمة دبابة ...
في يوم قررنا نعمل جواز لفارس ...
وهو ضمن آخر المواطنين اللذين عمل لهم جواز في ظل خارطة السودان القديمة ...
والجواز يحتاج صورة ... وقمنا مشينا كلنا ... و أتصورنا الصورة دي ...
لا تركزو كتير في الصورة ... صدقوني صدفة والملابس بتاعة بيت ...
وموضوع العمة ... من زماان انا مغيوظ من عمه ولدنا الوجيه سامي ...
وقلت لازم اتصور بعمتي وان شاء الله ترتيبي يكون نمرة ميه بعد سامي في الوجاهه ...
برضو حاكون أكثر وجاهه من ولدنا زهير ...
أنت يا ود الزناتي مش بتعرف تلفها مدنكلة برضو ...
============================
والله اللوم ... لا بسني من رأسي لساسي ..
كل ما أقول اضرب للريس ميسرة والسيدة الاولي حرمه ... لزوم اكفر ليهم ..
أقول هسع الصباح بدري والجماعة بكونو في الشغل ..
اها يجي الليل ... ندخل في الفطور ... صلاة العشا والتراويح ..
أجي اضرب أقول الجماعة... صلاتهم جات ..
انتظر شويه ادخل في أغاني وأغاني ... والنوم ..
ياريس التلفون ساهل .... بعملو ليكم ولو بعد حين ...
لكن المشكلة لو صايم رمضان بدون عصيدة ... بعد الضلوع الاتكسرت دي ...
=====================================
زمان قلنا ولدنا ده .. محمول ووحيد.. وبعيد من الأولاد ...
عشان كده بنعفيك من التلفونات ...
لكي تكون على اتصال بأولادك اقلها خمسة مرات في اليوم ..
بالرغم من انو رمضان ده ... قاعد ومجدع وسط أولادك ... آخر راحة ..
وحتي زهجك زاد وبقيت تشاكل في ضلك ...
ورصيد التلفون راقد بالهبل ...
طيب لزومو شنو الطناش ده ... ولا حتي تلفون مباركة رمضان ..
طيب ياخي ما تخليها ... مسج
إياك اعني يارشيد القوم ... فاسمع يالنضيف ...
ودجبارة عجلة شنو لبتك ام 17 سنة ..
كدي اسمع دي ...
طبعا في بلد الغربة السجم دي .. عشان أولادك يلعبو لازم تكون معاهم لحام ...
في الكورة ولا سك سك ولا ام الحفر ولا لعب في المولات ... وخاصة لو كانو صغار
يعني مازي السودان ... الحلة والاهل .. شايلين الهم ده ...
المهم لما احمد وعمار كانو صغار ويحبو يلعبو بالعجلات .. زي كل الاطفال
فلازم نلغي كل البرامج ... وخاصة نهاية الاسبوع ... عشان يلعبو بالعجلات في ميدان أو حديقة ..
ودايما الصدام مع امهم ... لان هذا يتتضارب مع برامجها .. التسوق والتسكع في المولات ..
طبعا انا بكون فرحان لبرنامج العجلات ... عشان بفرش لي سجادة وبكوع ... وهاك يارقاد ... لحدي مايزهجو ..
بعد ما اعمل لي جكة خفيفة بالحديقة ..
طبعا امهم بتكون ورمانه ... وماعندها شي تعملو ... غير الثرثرة ...
مرة بغيظ شديد ... بعد ما طرشقنا ليها برنامجها ... ومشينا الحديقة .. بالعجلات ...
قالت لي بحنق شديد " اسمع ... انا تاني مابجي الحديقة معاكم ... لو مااشتريتو لي عجلة ...
يمين بالله الضحكة الكتمتها يومها ... لي هسع عاملة لي مشاكل في البطن ...
تقول لي بتك .. اشتري ساي ... ياخوي
طارق جبرين انت دفعتي ...
فاكيد عمرك لم يصل الخمسين ..
اقصد الواحد وعشرين بحكم زهير الزناتي ثلاثة وعشرين ..
وكمان محمد عيد ما كبير لدرجة الرشيد ومنصور ..
لاني حصلتو في آخر دورة لمحراب الآداب والفنون ...
عمر مديد ... وسعادة مطلقة ...
بتمناها لكم ... ولكل الحبايب ...
مبروك المواليد الجدد ... بدون فرز ....
قال عمر بن الخطاب:
" ما اعطي الله عبدا بعد الإسلام خيرا من أخ صالح،
فإذا رأي أحدكم ودا من أخيه فليتمسك به "
أسال الله أن لا يحرمني صدق إخوتكم وبركة محبتكم ...
لكم جميعا ...
واخص حبيبنا محمد صديق ...
دي مداخلتي في رمضان ده ... والجاي ..
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
سلام للكل ...
مبروك ولدنا عمر المولود وانشاءالله يربى في عزكم وحمدا لله علي سلامة المدام
............ ..........
صدق يا الرشيد ايوا هي دقه قديمه ويمكن ده كلام الحبوبات كلهم..انا دايما بتجينى العباره دى لانها كانت تقيظنى جدا.يعنى اخته مالا
مازيه ..
ابو فارس :حلاته فارس الله يحفظه ليك واخوانه وامهم.
بنسلم على البوليس والشباب كلهم
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
مشتاق ليكم
عمرنا وزرنا , ودعينا ليكم
اول دعوانا كانت , يا ربى ترزق ياسر نجيلة ده بى صور جديدة لنمج
فتحنا البوست لقينا ربنا استجاب
قلنا ربنا ان شاء يكتر بنيات الفاتح على بشير , لغاية ما ربنا يدخلو الجنة بى سببن , ربنا باركنا بى ترتيل وتنسيم , يتباركن يا ربى ويطول همرهن مع عمر ابوهن وامهن
ربنا ده ما كريم ياخ
الدايرنى ادعو ليهو منو ؟؟؟يرفع يده ويتصل بى
منصور عبد الرازق متطفلا على حساب محمد عيد بينما هو يصلى . وبعد شوية من حساب النضيف وميسرة
حسابى داك خلوهو ان شاء الله يخمر
جنابو , نبلغك حال ركوب الباخرة
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
سلامات يا ناس
Quote:
حرف إستجداء
* * *
توسلت بشيئ في عينيك
حدق هوناً .... شوقاً ... فيًّ وفات
تذرعت بأني ميت فيك ..
وبأني سعياً .. سأعود إليك حياة
أخبرت بذلك .. أول خفقة قلب حين رأيت
وأول شوق حيث دُعيت
فأخبرني عشقي الليمون بلونك..
ونهانه قمريات يبكين
وسحابات جئن يعزين
فبكت عماتي النخلات ....
|
فرحات عباس
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
ما دام مداخلاتكم بقت كولللها سمبهارى , ولى رمضانين لى قدام
هاكم مداخلة سمبهارى , وجماعيى كمان
عصيدة ما عارف منى يونس دى اتعلمتها من وين ؟؟؟ ومتين
ده حالتو قالوا ضلعتها مكسورة !!!!
رمصان جدة غير , وفطور منى يونس غيرين !!!
ولمن يفطر معاك , جمال السنوسى , وعثمان الجيلى
ويشربوا شاى بعد الفطور فى الكبايات الشوب
وقهوة ما بعد الفطور فى الفناجين الذهبية الفاخرة
تقرر طوالى انك تكون صائم الدهرين
لو بتضمن الفطور يكون زى ده
ما يخفى عليكم
ان منصور عبد الرازق يسرق هذه المداخلة من حساب الريس
بينما هو مع الباقين , مشغولين بالقهوة , وانا بينى وبينكم مشغول بالفناجين
هى يا ربى الفناجين دى لونها شنو ؟؟!!!!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
سلامات يا ناس
ألف سلامة لمنى يونس والتحايا للريس
Quote: ما يخفى عليكم
ان منصور عبد الرازق يسرق هذه المداخلة من حساب الريس
|
انت الزيك منو ؟
تسرق حسابات ناس جدة ....وتسرق زمن ناس الخرطوم:
شيل شيلتك مولانا جلا حيقيم عليك الحد.
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
مساكم الله بالخير
عندما عاتبني أخي الحبيب ياسر نجيلة عتاب المحبين في مداخلته التي وعدنا فيها باللقاء في رمضان القادم...
خجلت من نفسي....و قلت يا الله ان الحياة فعلا شغلتني عن من أحب...
فقلت واجب علي أن أهاتف الرجل و أحاول أن أعوض ما فاتني من القيام به من واجبات...
فعلمي ان الرجل قلبه أبيض و مسامح و كريم أيضا...
اتصلت عليه فكان تلفونه مغلقا..ربما لم أتخير الوقت المناسب...
عندما قمت للتهجد وجدته قد اتصل بي ما بعد منتصف الليل بقليل و كنت نائما وقتها...
اتصلت به نهارا...رن هاتفه و لكنه لم يرد...عرفت انني لم اتخير الوقت المناسب مرة أخرى....
ثم كلمني عصرا مكالمة طويلة جدا لا أدري كم استمرت...
لكني أعرف انها لم تتوقف حتى قام كل منا بشرح موقفه و ظروفه للآخر...
لم نكن نحتاج لذلك و لكننا لم نصدق أن نجد آذنا صاغية فأسهبنا...
لأخي الحبيب ياسر و آخرون نحبهم شغلتنا عنهم أموالنا و أهلونا...
لكم العتبى حتى ترضوا......
Quote: الأول: والله انت على كده بتكون قسمت الخدمة النص بالنص مع بت شيخك ....
الثاني: هاهاهاهاه ... قول قسمت الخدمة النص بالنص مع الشغالة ...
بت شيخي ما عندها علاقة بالمطبخ في رمضان ....
|
يا نجيلة والله صاحبك ده لكن ما قصر مع الشغالة....
أما بت شيخه فواجب عليها أن تقيم الليل تشكر ربها عليه...
الزول ده ما غريب علي...
انشغلت كثيرا في اليومين الفاتو ديل....
فلم أتابع ما يدور في المواقع المختلفة...
عن ما يدور في كواليس لقاء جدة المرتقب...
و الذي حرمتنا منه ظروفنا التي هي التي نفسها التي حرمتنا من اصطحاب منصور...
أعرف أن الزناتي خليفة سيتوجه ظهر الجمعة الى الرياض و منها الى مكة...
فالكريسيدا المصانة جيدا لا تحتمل قطع المشوار دفعة واحدة...
و الزناتي أكثر ما يحب من آيات القرآن هذه الأيام (من كان منكم مريضا أو على سفر فعدة من أيام أخر)...
يا كوتش الله ما يجيب يوم شكرك ياخي...
ياك البتفقدني و تسأل مني و تسأل عن أخباري رغم مشغولياتك المعلنة و غير المعلنة...
مش زي ناس كده...و زي ما بيقولوا المصريين اللي على راسو بطحه يحسس عليها...
قبل فترة كده اشتقت لي جلا...طولت منو شديد...
ضربت ليهو بدل ما يقول لي السلام عليكم..
قال لي أسمع انت قاعد مع أولادك في أبو ظبي و ما بتحتاج لي مسافة مقدره ضارب لي مالك...
قلت ليهو ياخي أنا ضربت ليك عشان انت تسألني من أخباري....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: جلال عثمان)
|
سلامات يا ناس
كل مداخلة من الصفحة التانية ...لمتين الكلام ده؟
Quote: يا كوتش الله ما يجيب يوم شكرك ياخي...
ياك البتفقدني و تسأل مني و تسأل عن أخباري رغم مشغولياتك المعلنة و غير المعلنة...
|
ياخ انت تستاهل كل خير
وتأكد ان قلوب الجميع معك
وفقك الله.
لما وصلت الحتة دي اتحسست رأسي
الحمدلله انو راسك موجود.
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
Quote: قال لي أسمع انت قاعد مع أولادك في أبو ظبي و ما بتحتاج لي مسافة مقدره ضارب لي مالك...
قلت ليهو ياخي أنا ضربت ليك عشان انت تسألني من أخباري.... |
السلام عليكم وإن شاء الله جميعنا نكون ممن صام رمضان إيمانا وإحتسابا وغفر له ماتقدم من ذنبه
على وزن كلام جلا أعلاه
أسمعوا أنتم ماعارفين بأن الزمن بيسرق من أعماركم والشركة المزمعة لا عملنا فيها
شخيط ولا أقيف بعيد
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: Hatim Gubara)
|
من قبيل عامل شغب مع بت شيخي..
كيف وكيف لينا كم سنه ما إتصورنا صوره جماعيه للأسره..
عملتها فينا يا نجيله..
بركاتك يا شيخنا..
أولت امبارح.. اتزنقت زنقه في الشغل..
من ما أصبحت من إجتماع لإجتماع..
وناسنا الأمريكان ديل النقه حقتهم..
وأنا مع الصيام ريقي ناشف.. غالباني الكلمه أمرقها..
لمن الساع واحده ونص جات.. أنا خلاص كملت..
قلت للكفيل يازول أنا ماشي أتمشى شويه..
من عادتنا وقت اللنش معاي دكتور مجدي الشفيع..
بنمشي نتمشي في بارك جنبنا..
منها رياضه ومنها نغير جو الشغل..
فعلا مرقنا أخدنا مشيتنا زين.. ضحك وونسه.. فرقنا تمام..
رجعتنا على مكاتبنا..
لقينا ليك البنايه عن بكره أبيها في الشارع..
ناس مسخسين وناس يتجاروا من هنا لي هناك..
قلت لي مجدي.. الله.. جرس الإنذار ضرب..
و الظاهر في زول داخ والا حاجه..
سألنا واحد الحصل شنو..
قال لينا إنتو وين.. الزلزال دا ما شعرتو بيهو?
زلزال شنو ياخوي.. نحن هسع جايين من البارك ما شعرنا بأي حاجه..
ياجماعه دا زلزال كبير إستمر قريب دقيقه بمقياس 5.8..
العماره إتهزت لمن داير تقع.. وفي ناس داخوا من الخوف..
فضلنا واقفين ومتحيرين في الزلزال الفاتنا دا..
بعد صنه كدا قلت لي مجدي..
شفت لو ما كنت جرجرتك للمشي كان نكون في عز المعمه دي..
قال لي.. كان كدا..
بركاتك يا شيخنا..
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
مساكم الله بالخير
اليوم ليلة 27 نسألكم فيها الدعاء و خاصة الذين يتحلقون حول الكعبة المشرفة هذه الأيام...
و بالأخص الأخ الصديق موسى عيسى...بالله دعوات كاربات ياخي...
حاتم حمد لله على سلامتك ياخي...
الظاهر الشمار كان بدرجة 8 درجات من مقياس ريختر لدرجة أنكم لم تشعروا بالزلزال أبو 5.8 درجات....
جلال..اتحسس راسك يا أخوي...
جلا ده كان مجرد مثال...
ولكن هنالك الكثيرون مثله و انت أولهم...
بغفر ليك في حالة كربت لينا الدعوات في العمرة...
أبو الزوز بالله ما تنسانا من صالح الدعاء...
فأنا مؤمن بأن الله يضع سره في أضعف خلقه...
و أضعف دي ما مقصود بيها الجسم...
تقوم تصدق و تكتر الصور بالتي شيرتات...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
توفي صباح اليوم السمؤال الزناتي أح زهير الزناتي
تغمد الله الفقيد بواسع رحمته والهم اهله وذويه الصبر
والسلوان ،،،،
إنا لله وإنا إليه راجعون
====================================================
الأخ زهير يتواجد الآن بمدينة جدة لقضاء إجازة العيد حسب برنامج ناس جدة
بعد أداء العمرة وصل المدينة المنورة كل من
موسى عيسى
جلال عثمان
كما غادرنا بعد أداء العمرة أخونا منصور عبدالرزاق وهو يتمتع بإجازة بالخرطوم
=====================================================================
يتقبل التعازي على بوست عزاء موقع منبر ناس الزقازيق
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
تم الغاء الحفل المزمع اقامته بمدينة جده على شرف الزقازيقاب الواصلين اليها من المدن الاخرى وسيتم الاعلان عن برنامج بديل لاحقا ...
احر التعازى للاخ / زهير فى وفاة اخيه السمؤال
للتواصل مع زهير هاتف محمول : +00966566847522
انا لله وانا اليه راجعون
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
كل سنة وانتم طيبين ونتمنى لكم عيد سعيد
وعمر مديد وجعل الله ايامكم كلها أفراح
===================================
نرحب بجميع الزقازيقاب الواصلين إلى مدينة جدة
والقادمين في الطريق ،،،،
تزدان مدينة جدة بقدومكم جميعاً وسوف يكون
يوم غد تجمع زقازيقي بعد إلغاء الحفل الغنائي
وربما يكون بالساوث مول لدى محمد عيد بعد صلاة العشاء
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: Hatim Gubara)
|
صبحكم الله بالخير
كل عام و أنتم بخير و أعاد الله عليكم الأعياد و أنتم تنعمون بالخير و العافية...
ثاني أول أيام العيد ليس كأوله مع كثير من أوجه الشبه بين اليومين...
فاليوم الأول يختلف عن الثاني في كونه به صلاة العيد...
و في أنه تلتقيك فيه بعض العمم السودانية و تكون التهنئة أكثر حرارة....
و في اليوم الأول نصعد و نهبط المبنى الذي نسكن فيه لنبارك العيد لجيراننا من السودانيين....
و لأننا نسكن في نفس المنطقة منذ فترة طويلة فتمتد الزيارات الى مباني مجاورة....
في اليوم الأول سخر مني أبنائي عندما رأوني ألبس العمة الكبييييييرة....
قالت أمنية حقوا نخلي ناس الBuilding كل واحد يدفع خمسة دولار و يجو يتفرجوا فيك...
أما مهند فقال من الأفضل أن يأتوا و يتصوروا معاي عشان كلما يكون الواحد فيهم زعلان يطلع الصورة ويضحك....
لم يستغلوا كوني أب مسالم لا يؤمن بالعنف و حسب انما استغلوا أيضا انه أول أيام العيد...
و الا لكنت رميت كل تاريخي المسالم في مزبلة التاريخ و وريتهم (المكشن بلا بصل)....
كان ملاح النعيمية من ابداعات ست بيتي في أول يوم الا اننا لم نستمتع به في الافطار...
و ذلك لأننا سهرنا حتى الصباح فكانت الرغبة في النوم أكبر من الرغبة في الأكل...
الا اننا عوضنا ذلك في وجبة جمعت بين الغداء و العشاء...
في اليوم الأول استمتعت ايما استمتاع بمحمد الحسن سالم حميد بتلفزيون النيل الأزرق...
هي حلقة بشرنا بها تلفزيون النيل الأزرق فانتظرتها و كنت أتمنى لو تطول و لو قليل...
سهري حتى الصباح و زيارات الجيران و حلقة حميد كانوا وراء شخيري في الكنبة و أنا في زيارة أخي محمد مساءا...
Quote: بناتي بيسموا التوب.. the thing that sudanese women wrap themselves with..
ياللا دي اجمعها لي.. |
دي اتخيل لي جمعها ربراب يا حاتم...
ما ربراب بمعنى نضام...
و لا رواب بمعني القليل من اللبن الرايب أو المخمر الذي يدخر لتخمير الكثير...
و لا رقراق و هي الفتحة الصغيرة في النافذة أو البابو التي تدخل منها الشمس...
و لا رواق و هو ما يستخدم لتنقية الماء و ترسيب الأجسام العالقة...
بل ربراب يا أخا العرب...
مع العلم ان هذا لا هو بعيد اللحم....
و لا فيهو شربوت...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
فعلا ناس الزقازيق اجدع ناس
والاخت عفاف علي ميرغني مثالا وزوجها الكريم الاخ
محمد عثمان
فقدنا والد زوجتي من مصلى العيد
وبحثنا عنه في كل مكان
الا ان جاءني تلفون من الاخ محمد عثمان يفيد بوجوده
معه في منزله
عثر عليه الاخ محمد عثمان بالصدفة وهو يقود سيارته
وبنخوة السودانيين الاصيلين اوقف سيارته وساله
عن وجهته وعندما علم بانه تائه اخذه معه الى منزله
وقام معه بكرم الضيافة وواجبها( جزاه الله عنا خير الجزاء )
تحية خاصة للاخ الكريم محمد عثمان
وزوجته الاخت الكريمة عفاف
وللجميع ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
صبحكم الله بالخير
أول حاجة خلوني أشكر ود جبارة على تلفونه الجميل مساء البارحة...
رقم غريب و صوت شاب أنقذني من متابعة البرامج البايخة لكل القنوات...
قال لي مالو صوتك كده...كنت نايم و لا شنو..مع اني كنت في كامل صحياني...
كنت عايز أقول ليهو و الله الكبر لكن اتراجعت و غيرت رأي...
لكن خلاني تالت يوم في العيد كما يسمى في السودان...هنا يوم اجازة عادي....
خلاني أودع الجلابية و العمة و أطلع حزائي الرياضي و ملابسي الرياضية...
خلاني من صباح الرحمن أواصل ما انقطع من جكة بسببب رمضان...
الكبر ده يوصل اللحم يوصل العضم ممكن تدسو بالمكياج و تكتر من البدرة أو ال foundation...
لكن وقت يلحق الصوت بتبقى مشكلة كبيرة و مشكلة عويصة كمان...
فقلت لا بد من جكة صباحية اليوم في كورنيش أبو ظبي الجميل صباحا....
خاصة و ان الجو اليوم و مع بدلية شهر سبتمبر يبدو أنه يودع صيفا كان حارا في أيامه الأخيرة...
مع بداية الجكة شعرت باهتزازات في أماكن لم تكن تهتز من قبل...
عرفت ان الاجازة و رمضان عملوا عمايلهم و ان الأمر سيتتطلب زيادة زمن الجكة...
و بيني و بينكم أستمرأت الاجازة و عجبتني حكاية الجكة الصباحية دي...
ان شاء الله الجكة تجيب نتيجة قبل ما تنتهي الاجازة و ننزل للشغل تاني...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
Quote: خلاص فكوكم....
بسم الله الرحمن الرحيم..... |
حاسي كدا زي الكنت خاشي معاك صندوق
و طبعاً الصرفة الأولى حقتك
على العموم ما بيناتنا
الأسرة بخير و في أتم الصحة و العافية
أما فيما يخص صحبتك فهي بخير
يوم العيد طلبت هي و أختها الكبيرة عشرة جنيهات كاملة
لزوم مصروفات عيد و كدا
طبعاً أخوك ما ناشف
فبديت أسألها عايزاهم لي شنو
المهم عددت حاجاتها و حاجات أختها أكتر من مرة
و خت في بالك يا بابا ولدك عمر ما معانا لأنو ولد
في النهاية زهجت مني و قالت لي
إنت ما تفهم الكلام؟؟؟ ما قلنا ليك الكلام دا أكتر من 15 مرة
غايتو أكلتها في حناني
و سرت العشرة جنيهات كاملة غير منقوصة ولا هللة
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد آدم النور)
|
بالهنا والسرور العيد عليك مبروك
يا ست النجيمي الفي العقل مشبوك
قدمك للمجاربو بيودر ام سمبوك
زولك غير نعال بي تترسيه الشوك
الاحباب اينما كنتم لكم كل الامنيات الطيبات
بالصحه والعافيه ودوام المسرات
بالامس كانت ليله في جده ولا كل الليالي
ليله في الساوث مول في حيث الضيافه الراقيه
من محمد عيد والتغطيه الاعلاميه المتميزه من
الريس ميسره ومولانا عصام دهب ومحترفين
انتدبو خصيصا لتغطيه الحدث الهام وكان رئيس المراسم
كالعاده عبد الدائم ومساعدته عذاري في استقبال الضيوف
بكل الود والترحاب سعدنا فيها برؤيه اخوه كرام وابناء عزاز
كان حضورا بهيا في انتظار الصور حتى لاانسى احد كل عام وانتم بخير
سلام خاص لجلا
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عمر المهدى)
|
لكم الشكر أينما كنتم
في جدة أو أمبدة
لك الشكر و التقدير ود المهدي
النسعلك
لابسين كيف؟؟؟
المعنى الهدوم اللابسنها شنو؟؟؟
أفرنجي و لا بلدي؟؟؟
جزم إيطاليا برتقالية و لا مراكيب؟؟؟
البرنامج كبف؟؟
في طوطاحانيات لي ناس عذارى ؟؟
العضة شنو فرش و لا لحم مجمد؟؟؟
لا تفوت على فطنة القارئ أو العاطل
أن هذه الأسئلة ليست للإجابة
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد آدم النور)
|
قضينا ليلة ساهرة
قضينا ليلة ساهرة تضمنت محاسن
من كل روضة عينة ومن كل عينة زهرة
قضينا ليلة ساهرة تتوجت قياصر
تلالات كواكب من اطيب المناظر
الحبيب جلا
تنوع الحضور صغارا من عذارى حتى الهميم الامين الذي سعدنا بقدومه من الدوحه
وكانت الاناقه حاضره بين عمم ترباسيه وشالات مشايخ وبين هدوم اولاد جون بحضور
زاهي للدكتور سيف النصر الذي التقيه لاول مره وتدرج من المراكيب الى (جزمه ام رباط
تسوي زط زط عا########ي )اما المعايش فحدث ولا حرج من صيد البحر اصغره (الجمبري)
الى اكبرها البقري مرورا بالمحمر والمشمر من طيور مغلوبه على امرها ولم ننسى النباتيين
وامسك حبل الصبر *خلو قلبك مايبقي ني
اصلو ود ابزيد كل يوم من بلدنا بطفش جدي
الاعلاميون نائمون بعدعيديه حتى صلاه الفجر
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عمر المهدى)
|
Quote: يوم العيد طلبت هي و أختها الكبيرة عشرة جنيهات كاملة
لزوم مصروفات عيد و كدا
طبعاً أخوك ما ناشف
فبديت أسألها عايزاهم لي شنو
|
حسه مزرزر صاحبتي الزرزرة دي كلها عشان عشرة جنيهات....
و كمان ليها و لي أختها ما ليها براها....
هن شن طعمن العشرة جنيهات...
ما هي كلها كم لولي بوب و كم آيسكريم...
انت كنت يعني عايز تديها أبو قرشين الصغير داك بتاع أيامكم ديك...
يدوك أبو قرشين تمشي تشتري ليك ساندوتش سلطة دكوة....
و تتشارك مع أصحابك تشتروا ليكم بطيخة تكسروها في النقعة....
بتعرف النقعة و لا البندر خربتك...
يعني كان قالت ليك أديني مية جنية كنت وديتها لي طبيب نفساني....
و لا كنت أديتها ليها و مشيت انت الطبيب النفساني...
عافي منها صاحبتي و بركة القهمتك...
يقهمك ال.................اليقهمك...
ود المهدي عيدك سعيد...
خلاص اتلميتو و جايين تغيظونا بالصور...
بي عممكم و مراكيبكم و جزمكم البي رباط...
تعالوا بي أي حاجة...
بس عليكم الله صندوق chicken nuggets بتاع الساوث مول ده أبعدونا منو...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
عيد ولا كل الأعياد ..
لمــّة ولا كل اللمات ...
جلسة ولا كل الجلسات ..
لقاء فوق السحاب ...
دهشه .. وفرح وذكريات جميلة ..
وجوه أسقط عليها الزمان بعضا من غبار السنين ..
الا انها مازالت تحمل عبق الايام الجميلة ..
جاءوا من الدمام والرياض والطائف ومكة المكرمة ورابغ .. بل وحتى من الدوحة ..
أكثر من عشرون زقازيقيا جميلا مع اسرهم أحاطوا بعضهم البعض بباقات الورد والتحنان ..
المكان ازدان بهم .. والجمال لم يغادر المكان طيلة ساعات اللقيا ...
امتد السمر حتى فجر اليوم التالى وقبل الشروق بلحظات ..
الكل بدا وكانه يشتاق لتلك الايام والذكريات الحبيبة .....
ابتدر اللقاء اتصال حميم وجميل من الجميل الودود .. حاتم ود جبارة ..
وعبره ارسل تحاياه لكل الحاضرين ..
كم انتم رائعون ومصطفون يا زقازيقاب
كثيرة هى صور اللقاء المشهود ..
وكثيرة هى الاحاديث الجميلة التى دارت فيه
وكثيرة هى احداث اليوم السعيد ...
ولكن اصبروا علينا قليلا فاكل ما زال هائما حتى الآن
فى اجترار سعادة هذه اللمـــة ..
والكل مازال فى سبات عميق
ويعانى من الرهق والتعب .. ووعثاء السهر والسفر ..
ابقوا معنا وسيأتيكم ميسرة والنضيف ودهب بمدونات هذا اللقاء
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
سلام عليكم ياحلوين..
جلا.. ياحربي..
بناتك إتنين تديهم عيديه دولارين ونص بس?
ياجماعه هوي.. منص ركبو واجعينو من العمره والا شنو..
رش.. دافن ليك كلام الربربه..
ما تقعد تقول لي تلفونك أسعدني وما أسعدني..
بيجو.. عيدت? والا الفلاته السمحين لسه ما عيدوا?
كل سنه وإنت طيب ياولدنا..
ما تجي بعدين تقول لينا ما سألتو..
العيد عندكم يا ناس السعوديه..
أمانه السلام علي الحبيب المصطفى ياجلال..
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عمر المهدى)
|
لله درك يا وطن
رغم أن العيد فرحة و بهجة
إلا أنه لم يكتمل
في الجوف غصة
و في العين دمعة
دمازين السكون و الطيبة تتحول إلى غير ذلك
لعن الله الحرب
لعن الله الحرب
اللهم ألطف بنا
اللهم لا تؤاخذنا بما فعل السفهاء منا
اللهم لا تسلط علينا بذنوبنا من لا يخافك و لا يرحمنا
اللهم آمين
و إنه لأضعف الأيمان منِّي
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد آدم النور)
|
صبحكم الله بالخير
أبدأ بما انتهى به جلا و أقول آآآآآآمين....
و لا أريد أن أعمل فيها جهبذ في السياسة و أفتي في الأمر...
فأنا حقيقة عاجز عن الفتوى...و عاجز حتى عن مجرد الادلاء برأي...
فما قيل و كتب عن السلام و الحرب في بلادي يحتاج الى 100 سنة أخرى لقراءته....
فلا نفع الصادقين صدقهم و لا نفع الماكرين مكرهم....
كلنا خرجنا خاسرون من هذا الصراع...صراع السلم و الحرب....
فقط أود أن أقول ان الدعاء وحده لا يكفي....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
اتصل بي والدي و السعادة بادية في صوته....
بعد أن سلم علي و سألني عن أحوالي و أولادي...
قال لي منصور معانا هنا في البيت....
ثم أعطاني التلفون و تحدثت مع منص مطولا....
شكرا يا منص على زيارتك للوالد و الوالدة و التي أسعدتهم كثيرا...
فأنت تثبت كل يوم بأنك كبير...
رافقتك السلامة أنت و العائلة في طريق عودتكم الى الرياض...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
يمن بالله ياودجبرين ...
وجاهه فايته حدها ...
وانا لو مكانك ... ماانزلها من راسي خالص ...
عشان ناس الرشيد وود جبارة ... يسكتو شويه ...
وخاصة عيني بارده على الشعر الموجود في الشنب ... والحواجب ...
==========================
غايتو النضيف ضمن وكيل ... لعرس بناتو ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
زمان كانت العسكرية محبوبة للناس وكانت تستقبل كل الفاقد التربوية
واليدابو فك الخط إذا كان في خلوة ولاخلافو ، في واحد من الريف عابز
يتجند وعندما وصل مركز التجنيد قالوا ليه التجنيد إنتهى ، ثاني إلا السنة الجاية
قال ليهم طيب ماتشوفوا لي رتبة ضابط أتسلى بيها لحدي التجنيد.
برضو قلنا نسليكم بالصور دي من لمة جدة لحدي برنامج ناس جدة يبدأ
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عصام دهب)
|
نعود اليكم بعد أن امطرنا حبايبنا ناس الزقازيق
بحبهم ومشاعرهم الجميلة بتجمعهم الكبير بمدينة جدة
والجميل في هذا اللقاء إلتقينا بناس لم نلتقيهم منذ أيام الزقازيق
وحضر الجيل الثاني من الزقازيقاب وإندمجوا جميعاً وكأنهم يبدأون مرحلة
جديدة لإنشاء تواصل زقازيقي آخر،،،،،
تشرفت جداً بقربي من زهير الزناتي ورفيقته إبتهاج وأفراد عائلتهم
ووجدت زهير هو الشخص الذي كنت أظنه و ارسمه في ذهني شاهدت زهير
الأخ الزميل والصديق الوفي والزوج الجميل والأب الرحيم
هنيئاً لكي يا إبتهاج بهذا الرجل الرائع وهنيئاً لكم يا ناس الزقازيق
بهذا الزناتي الجميل ،،،،،،
سوف نمطركم صور فتحملونا ،،،،،،
| |
|
|
|
|
|
|
| |
طارق جبريل
ميسرة سيد أحمد
الرشيد بابكر
زهير الزناتي
عمر هواري
معاوية عبيد الصائم
قيس جمال الدين
عبد الدائم سيد أحمد
أحمد إسماعيل
جلال عثمان
محمد صديق
ابتهاج عبد الله
ياسر نجيلة
كمال الشادي
محمد عيد
Hatim Gubara
محمد آدم النور
عمر المهدى
فيس بوك
تويتر
انستقرام
يوتيوب
بنتيريست