|
|
 Re: ناس الزقازيق ... أجدع ناس ( 3 ) (Re: طارق جبريل)
|
بالله مذهبهم مالكي عجيب
طيب موضوع تحديد وقفة عرفات دي
صارت حق للسعودية بحكم تحكمهم في الحج
وبالتالي بتنصاع كل الدول الإسلامية بدون إستثناء
زمان عندنا في السودان لمن يجي برد شديد كان الفلاته
بيفرحوا شديد علشان صعوبة الوضوء لصلاة الصبح والعشاء
وكانت مقولتهم المشهورة عندنا - الله يجيب برد دا علشان عرب يخلوا صلاة -
| |
 
|
|
|
|
|
|
|
|
Re: ناس الزقازيق ... أجدع ناس ( 3 ) (Re: ميسرة سيد أحمد)
|
يتوجه اليوم الخميس صباحاً بعد صلاة الفجر جموع الحجاج
من منى الى صعيد عرفات الطاهر ،،، ويوم عرفة هو يوم
يفضل الصيام فيه لغير الحاج ،،،، نذكر الجميع بأن هذا
اليوم الخميس وقفة عرفة لنستقبل ذلك ونتقرب إلى الله بهذه العبادة
البسيطة تقرباً الى الله خوفاً وطمعاً .
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: ميسرة سيد أحمد)
|
اليوم هو يوم عرفة ويُشرع فيه التكبير من
فجر يوم عرفة إلى عصر أيام التشريق وهو اليوم الثالث عشر من شهر
ذي الحجة :
الله أكبر الله أكبر
لا إله إلا الله ،،والله أكبر ،،،
الله أكبر ولله الحمد
والله أكبر ،،، الله أكبر ،،، الله أكبر كبيرا
والحمد لله كثيرا ،،، وسبحان الله بكرةً وأصيلا
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: كمال الشادي)
|
كل سنة وانتو طيبين احتياطى كده
تجارب الناس فى السفر
حتى ولو كان لى جدة القريبة دى
انهم يا يسافروا ’ يا يتواصلوا
الأتنين شكلهم كده ما بيجوا مع بعض
الا الرشيد الحبيب
فهو استثناء فى التواصل مع السفر
هل انجح انا
اشيل معاى اللاب توب
كدى نسأل احمد
كان ناس طارق جبريل عيدهم السبت
ناس اخلاص محمد احمد ديل
عيدهم يكون الأسبوع الجاى يا ربى ؟؟!!
وقفة مبروكة وعيد سعيد وحب اكيد
| |
|
|
|
|
|
|
|
|
Re: ناس الزقازيق ... أجدع ناس ( 3 ) (Re: إخلاص محمد أحمد)
|
كل سنة وانتى واسرتك طيبين يا اخلاص
على فكرة يا اخلاص
قبل سنتين تلاتة كده
فى صالة القدوم بتاعت مطار الخرطوم
انا كنت راجع من القاهرة
صادفت فى الصالة زميلتنا نجوى ياسين النور
كانت راجعة من انجلترا مع وليداتها
عن طريق مسقط
قالت لى انك كنت معاها فى الرحلة
فتشنا عليك الصالة كلها ما لقيناك
دى انتى ولا نجوى كانت بنتقصد اخلاص مهدى
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: إخلاص محمد أحمد)
|
انت يا كمال الشادى
اخبار الكاروشة كيف ؟؟
الرشيد
نرجع لى ندى القلعة تانى
ومنو القال ليك انت جبت سيرة سماحة ندى القلعة ؟؟!!
انت جبت سيرة عزاز علينا
وانا جبت سيرة المضايرة
فيما يعرف بسياسة اللفح
ودى مكنة شايلة لمن تكون عايز ترمى ليك درابة
غالبا تكون تقيلة عليك
تقوم كده تلفح
وترمى سنارتك
شايلة الطعم
تقول الرشيد وزيزو قاعدين يتضايروا
يجيك احمد اسماعيل يكب الأعترافات التقيلة
وبالمرة نميل على كم اغنيية
بالله هو دروغبا قاعد يعمل زيى كده
اتاريهو لفاااااح
لكن لو ما لامبارد وناس اسيان
دروغبا ده كان بقى هداف الدورى
زمان مش البنات قالوا فى غناهم
سامى عز الدين
حسابو على
ضرورى فى التمرين
حسابو على
انت بس احرق البنسون
والباقى على
الله يخليك لى دروغبا
يا فرانك لامبارد
(ولو ما مقتضيات الحنكشة )
كنت قلت ليك يا مايكل ايسيان
لقيتنى كيف ؟؟
(بورتوووووو يا حاتم جبارة )
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: معتصم جعفر)
|
شايف الجماعة أول أمبارح إستغلوا عدم وجودي وأخدوا راحتهم بس الرد الليلة ما بينفع لأنه الموضوع طول ... لكن يا حلوين لابد ليكم في الكريبة وأبقوا مارقين ....
الكوتش محمد صديق حمد الله علي السلامة ....
يا ريس يا رومانسي ...
الريس ميسره منصور وصل ولا لسه ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زهير الزناتي)
|
يا منص ياخي موضوع ندي القلعة دا ما إتجاوزناه مالك عايز تجيب لينا الهواء ... كفاية الهواء بتاع الخروف .... نتمني لكم عيداً سعيداً في جده .... ويا رب تكون إجازة سعيدة ...
للجميع ...
كل عام وأنتم بخير ....
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زهير الزناتي)
|
مجنون أنا بالحب .. والحب مجنون بك ... قومي يعرفون الحب ولكنهم لا يعلمون كيف يحبوا ... أو يمارسوا هذا الحب .. لنقص في المعرفة ... وخلل في التركيبة .. ولأن للحب قوانينه الخاصة ... فهو لا يطرق الأبواب وإنما يتسلل إلي القلوب .. وأول ما يفعله ... يعبث بكيمياء النفس ... ويغير خارطة جيناتنا .. وشفراتها .. بحيث تغلق بأمره وتفتح عند حضوره ... لذا من أراد أن يحب عليه أن يغادر جغرافيته السابقة ... ويبدأ في تدوين تاريخ جديد ... ويتحدث لغة جديدة ... بمفردات مختلفة ... وقواعد تعتمد علي علم (نحو العشق) ... ومذاكرة فروض الحبيب ... نار الحب قد تحيلك إلي رماد إن لم تحسن مسك شعلتها ... ونورها قد يجهر بصرك فلا تري سواه من الكون ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زهير الزناتي)
|
صباح الخير يا وجوه الخير ،،،،
يوم عرفة يوم طيب ومبارك للجميع
التحية للمتداخلين الصباح وكل عام وأنتم بخير
منصور ، إخلاص محمد أحمد ، الشادي ، الريس معتصم
أخبار الحجاج :
تواصلنا اليوم كان مع فضيلة مفتى ناس الزقازيق
الحاج محمد آدم النور وأفاد بأنه إجتمع مع موسى عيس ويحلق بهم
محمد المبارك - تجارة - ولم يلتق الآخرين وعلى رأسهم جلال والجميع بخير
الأمطار التي هطلت على المنطقة الغربية وخاصة مكة ومنى وعرفات ومدينة جدة
وقد أدت السيولة الجارفة في وديان جنوب جدة إلى مقتل 48 شخص وجرف 100 سيارة
ونحمد الله على سلامة الحجاج .
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: محمد عيد)
|
أجمل التهاني و التبريكات بمناسبة عيد الأضحى المبارك...اعاده الله علينا و عليكم بالخير و اليمن والبركات....
اخلاص وينك يا فردة...اختفيتي مالك فترة...كل سنة و انتي و أسرتك الكريمة بألف خير...
منص....اللفح ما عندك لكن...بعد شوية بتلحق ميسي...تحاور من النص و تهدف بعد داك...حسة قول لي جبت سيرة بنات النيل الأزرق العاملات زي الماكنتوش ديل زي ما قال صلاح التجاني...
أبو الزوز...عيني باردة و الله عليك الأيام دي بهجة فاكه الرقابة شوية ولا شنو...مستوى الرومانسية ده زايد عن الحد شوية بمقياس ريختر...و ممكن يكون مقدمات يا لزلزال أو بركان عديييييل كدة...
أما ما قلته عن نهلة نجم الدين فلقد أصبت كبد الحقيقة و عينها و لأنك من رمات الحدق في الوفاء...أي أنك وفي و أصلك طيب نبهت الى أهمية رد الوفاء لشخصية عظيمة مثل نهلة نجم الدين...
محمد عيد أسعد الله أيامك و عيدكم سعيد...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: محمد عيد)
|
يا رشدي مالك عايز تجيب لينا الهواء ... دي تهاويم بتاعت جنون .... ساكت ....
تعرف في عناوين بتاعت كتب تكون مرت عليك وراسخة في ذهنك لا تفارقه فمثلاً تعجبني مثل هذه العناوين :
لمن تقرع الأجراس ...
إنهم يتقلون الجياد (تلك الرواية الأمريكية البديعة) عليك الله يا رشدي لو مزاجك رايق فكفك لينا العناوين دي ،، ولا جيب لينا عناوين تخدش حياء الروح ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زهير الزناتي)
|
حبى وقلبى مجنون بكم جميعا فانتم الرايعون تسللتم كلكم الى قلبى..تقبل الله صيامكم اليوم وما تنسونا من الدعوات.. وحجا مبرورا لكل الحجاج وعودا حميداانشاء الله يرجعوا سالمين لاسرهم.
لكم جميعا احلى الامانى بمناسبة عيد الاضحى..كل سنة وانتوا سالمين وتامين ولا مين ومبسوطين .
يا ناس جده انتم المحظوظون بعيد ابنوسى اسفيرى . محمدعيد كمان يعنى عيدكم غير(وجدة غير-محمد عيد ومنص)
دمتم سالمين
نجاة حوفى
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: نجاة حوفي)
|
ترحيب حار بالزميلة الرائعة اخلاص والله مشتاقين .سعدنا بقدومك. واستمتعنا برؤية صورك انت والعزيزات سناء الصباغ وحنان الخطيب.. ما شاء الله شباب وحيوية..وجمال..
زوبة الله يرجع ليك ابومحاسن سالم ويتقبل حجته..
فافى مشتاقين ..
حاتم جبارة ابو امنية ما ظنيته بدا يستعد للهرولة والحج السنة الجاية معاك( شوف عينى ما جابو الى )
بمناسبة الكروش مهند اول ما ادوه الارقام فىKG1 جانى قال لى يا ماما الليلة ادونى 3
u khnow how to write 3?
small stomach like my stomach then big stomach like mum and dad.
قلت ليه يا ولدى حسه فى داعى فى زول سالك من كروشنا.
وبعربى جوبا بتاعه انه ابو امنية اكبر fat واحد فى البيت.
دمتم سالمين
وكل عام وانتو بخير..
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: نجاة حوفي)
|
| Quote: وبعربى جوبا بتاعه انه ابو امنية اكبر fat واحد فى البيت |
يا نجاة والله العربي لكن ما عندكم ... بس أبو امنية وحاتم جبارة ديل ممكن نعمل ليهم حج سياحي يعني مافيهو تعب ... بقدر الأمكان ... بس من هسه لازم يعملوا حسابهم ... وانا ذاتي معاهم .... السنة دي زي ما قالوا الحناكيش الناس كلها في الحج ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: مني يونس)
|
نجاة حوفي ياراقية كل سنة وانتي ورشيدالقوم بخير وسعادة ويخلي ليكم الحلوين أمنية و مهد ويديكم كلكم الصحة والعافية.
الرشيد الصديق الودود طولتا ما سمعت حكاويك الجميلة .
مني يونس ربنا يحفظكم جميعا وكل سنة وانتم في كامل الصحة والعافية.
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زينب التجاني)
|
سلام يا اهلنا
نحن غايتو الناس بكرة تضرب في اللحم ونحن نضرب في الكرواسون
شفتوا العوجة دي
غايتو المغاربة ديل محنونا عدييييييييييييييل
وان شاء الله يوم عيدنا (السبت) حا اوصف ليكم
المغاربة ديل بيعملوا شنو في الخروف
عندهم طقوس عجيبة في كل جزْء من الخروف
كل حتة عندها اكلة خاصة بيها
الليلة من اصبحت جبنا الخروف وهسي شغال يبعبع
يا زوبة بس خليك قريبة عشان الوصفات ما تفوتك
الف الف الف سلامة لي اختنا نهلة
وحباب اخلاص
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: طارق جبريل)
|
يا جبريلا انا غايتو في راي أضبح بكره مع المؤمنين سيبك من المغاربة العلمانيين ديل ... ما مضمونين يمكن يجوا يوم السبت يقولوا ليكم مافي ضحية ... زين العابدين بن علي السنة دي لغي الحج للتوانسة ... يا زول أسمع كلام أخوك ... وتابع المؤمنين الحقيقيين ... اهل القبلة ..
الليلة صاحبك جبارة وصل السودان
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زهير الزناتي)
|
أول أيام عيد الأضحى المبارك...كل عام و أنتم بخير...أحياكم الله و أبقاكم و بلغكم أمانيكم جميعها...
العيد في أبو ظبي...ما به و ما عليه...
رغم السهر الى وقت متأخر و حتى ساعات الصباح الأولى بسبب الحمى التي اصابت مهند...الا أنني حرصت على أداء الصلاة في المسجد...و كان ذلك...التهليل و التكبير وسط الجماعة في المسجد أعطاني قليل من الاحساس بعيد السودان رغم ان آخر عهدي بالعيد في السودان انه أصبح يشبه العيد في أبو ظبي كثيرا و ليس هو نفس العيد الذي كنا نعرفه زمان...
صلينا صلاة العيد والتفت الى أقرب الجالسين لأصافحه مهنئا فوجدته غير مهتم بذلك فسحبت الفكرة من رأسي قبل أن أضطر الى سحب يدي محرجا...أحد العرب يجلس قريبا مني بدأ مثلي يبحث عن مصافح..يبدو أنه أسير أشواقه مثلي...صافحته فصافحني بقوة و حب و كأنه يعرفني منذ ألف عام...أكتفيت به مهنئا و أخذت سجادة الصلاة التي لم أحتاج اليها...كنت أحسب انني سأصلي خارج المسجد...فوجدت نفسي في الصف الرابع أو الخامس داخل المسجد...أين ذهب المصلون هذا العام...ربما ذهبوا الى مسجد آخر...ربما..و لماذا كل هذه الأسئلة طالما وجدت لنفسي مكانا داخل المسجد...سألني صديقي زهير البارحة عن أسماء الروايات التي تعلق بالأذهان لموسيقية الاسم...خطر ببالي اليوم...مائة عام من العزلة...لا أدري لماذا..انه مجرد خاطر...
الخروف أو الأضحية...قمت باتصالاتي التلفونية قبل يومين من العيد لترتيب مسألة الخروف هذه..بعض الأصدقاء لهم معرفة بالمسلخ الموجود بمنطقة بني ياس خارج أبوظبي وعدوني بأن يصلني الخروف في مكاني و لا داعي للحضور...ذكرتهم أن يكبروا الله و يذكروا اسمي عند الذبح...هل تريدون أن تعرفوا اسم أمي..لا لا لا أظن ذلك فلا حاجة له هنا...لست من المؤلفة قلوبهم و لكن أحيانا تجد بعض الممارسات هي ليست من الدين في شئ ولكن مجرد عادات أو اعراف تجعلك تتشكك في ما هو من الدين و ما هو مجرد عادات أو أعراف..
حضرت الى البيت...ما زال مهند يعاني و لكنه تحسن كثيرا...نجاة يبدو عليها السهر و الارهاق..أما أمنية فهي نائمة مطمئنة و الحمد لله...ألقيت بالعمة على أول كرسي قبل ألقي بالتحية و التهنئة على أم أمنية...نجاة تركز كثيرا على الحج السنة القادمة باذن الله...هل هي أشواق...أم أنها قد حققت كل الأماني وتبقى لها منها الحج فقط...نسأل الله أن يحقق أمنياتها جميعا يا رب...
هذه خواطري عن العيد حتى الآن...أتوقف لأبدأ اتصالاتي للسودان مهنئا و معايدا الأهل و الأحباب و ألأصدقاء و من لم يصله اتصال مني يكون الرصيد كمل قبل أن أتصل به...و كل عام و كلكم بخير و عافية و يحفظكم الله و أسركم....
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: أحمد إسماعيل)
|
صباح الخير وعيد سعيد
لكل المتداخلين والمتابعين والقارئين
العيد البيخطى لمة الهل فى السودان
يبقى عيدا ناقصا
ولكنى سعيد بان اول محاولات تكملة الناقص فى العيد
انما تبدا بكم
لا اخصص احدا
ولكن يمكن لكم كلكم ان تشعروا بانى اخصكم بتحية عيد خاصة
مهند الرشيد له منى عيدية خاصة
ملخصها تبرى وتستبرى من حمى العيد
كانت تزور فى الظلام , كما وصفها المتنبى
مالها قد اصبحت اكثر تحديدا فى تخصيص مساءات العيد وظلامه
انا احبكم جميعا يا زقازيقاب
اكثر من العيد الفات بالتأكيد
شبكة الأتصال التلفونى حرمتنى مع الحديث مع قائمة طويلة من مقاماتكم العالية
ولكنى اطمع فى ان تتحسسوا مواقع قلوبكم
فى البطينات والأذينات
كما فى اغشية التامور
ستجدونى معكم
نهلة نجم الدين عيد سعيد
وكلام زهير الزناتى اسعدنى مرات عديدة
وعجبت ان كيف للمتشابهين ان يتقابلوا كل هذا التقابل
راق لى وصفك لنهلة يا زهير
فهى كذلك بل تزيد
تحيات عيد دافئة لكم من جديد
وانا فى طريقى الى جدة
فى محاولة جديدة وجادة واكيدة
للبحث عن (عيد وميسرة )
وهربا من (اللاعيد والصعاب )
منصور , امانى , احمد , ايثار, مجتبى , حجازى , مدرار
مطار الملك خالد الدولى فى الرياض
الصالة الداخلية
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: طارق جبريل)
|
Quote: والف سلامة لي مهند الرشيد
والله يا الرشيد نفس الشي حاصل عندنا
ريم من امبارح بتستفرغ
والليلة مافي عيد
يعني كمية دبرسة كدة خليها علي الله بس |
ألف سلامة على الإبن مهند والأبنة ريم وما تشوفوا شر
يا طارق جبريل صدقني معظم الدول دي عيدها مسيخ
خلاف ما تكون في السودان أنحنا منتظرين منصور علشان
يحلي لينا عبد جدة علشان تكون فعلاً جده غير .........
تهبط بإذن الله طائرة منصور الساعة 7:30 مساءً بعد أن تأخرت
لمدة ساعتين ونصف بمطار الرياض ،،، نستعد الآن بالتوجه إلى مطار الملك عبدالعزيز بجدة
لزوم إستقبال الحبيب .....
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: أحمد إسماعيل)
|
جبريلا سلامة ريم و نسأل الله أن يعافيها و ينعم عليها بدوام العافية...و ان شاء الله تقوم بكرة تجضم ليكم اللحم زي المافي حاجة....
بالله يا جبريلا جيب لينا الخروف بعد ما تبشتنوهو....
أحمد اسماعيل بسم الله ما شاء الله...ربنا يحفظ ليك شفق و شاكر أحمد اسماعيل....ربي اجعلهم من الصالحين البارين بوالديهم...حفظك الله لهم و حفظهم لك ...
ننتظر وصول الطائر الميمون الذي يقل منصور عبد الرازق محمد فضل الى مطار جدة....
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: الرشيد بابكر)
|
| Quote: ننتظر وصول الطائر الميمون الذي يقل منصور عبد الرازق محمد فضل الى مطار جدة.... |
وصلت بحمد الله الطائرة بعد رحلة عذاب منذ نهار اليوم
وكان فى استقبال منصور واسرته .. الريس ميسرة حبيب الكل ...
واكتملت فصول تعذيب سعودى طييير بعدم وصول الامتعة مع الطائرة ..
البرنامج سيبدأ يوم غد باذن الله ...
وما زلنا فى انتظار اتصال سيف النصر للانضمام للكوكبة
حيث ان معظم ناس جدة اما فى الحج او خارج السعودية
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: طارق جبريل)
|
جبريلا حمدا لله على سلامة ريم نسأل الله أن يتم لها العافية......
مهند أيضا يتحسن...
حمدا على سلامة وصول منصور و أسرته الى جده...نتمنى لكم يا محمد عيد برنامج جميل...بس أطلعوا من المحلات المقفولة دي ورونا بحر جدة ده..اذا كان الجو جميل.....
سوق الزول ده المول لمحلات Big & Tall أشتري ليهو لبستين لحدي ما يجي عفشه..
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: طارق جبريل)
|
عيد سعيد ...
مهند الرشيد ....
ريم طارق ... سلامتكم والف كفارة
عيد سعيد
شفق وشاكر أحمد إسماعيل ربنا يخليكم ..
والسنة الجاية أكبر وأحلي
عيد سعيد ...
أحمد .. إيثار (ودي صاحبتي) ... مجتبي ... حجازي ... مدرار
وإجاوة عيد جميلة في جدة
عيد سعيد لكل أعضاء البوست دون فرز .... من الريس معتصم والريس ميسرة حتي السمؤال وعبد السميع
كل عام وأنتم بخير ربنا يحقق لكم كل الأماني الممكنة والمستحيلة ... وليت يأتي العام القادم ويجدنا غير ومختلفين وحققنا بعض أحلامنا الشخصية والعامة ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زهير الزناتي)
|
| Quote: سوق الزول ده المول لمحلات Big & Tall أشتري ليهو لبستين لحدي ما يجي عفشه.. |
رشيد الحبيب ... حأحكى ليك فى الماسينجر نكتة صاحبك وهدومو الما وصلت لى هسه ؟
جبريلا وزهير ... لو عاوزين تقروها .. الغاوى ينقط بى طاقيته ..!
&&&&&&&&&&
معذرة ..
سلامات والف كفارة لمهند الرشيد وريم طارق جبريل
وربنا يواليهم بالشفاء ...
**********
يا اخوانا .. الكوتش وينو .. حتى ما ظهر يعيّد على الناس ..
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زهير الزناتي)
|
صباح الخير ...
العيد ... ولي ..... واللحم راح في مرقة ....
كل عام وأنتم بخير .... جميعاً دون إستثناء ... من هم داخل السودان أو داخل قلوبنا ... ومن هم خارج السودان ... ولم يخرجوا يوماً من دواخلنا ... إليكم نهدي هذا العيد ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زهير الزناتي)
|
Quote: رشيد الحبيب ... حأحكى ليك فى الماسينجر نكتة صاحبك وهدومو الما وصلت لى هسه ؟
|
محمد عيد...شربوتكم قوي والله...ما وصلني أئ شئ في المسينجر.....
شربوت بلدنا و لا باربيكان الجيران....جادت علينا قريبتنا الكريمة المقيمة معنا هنا بأبوظبي بشربوت...قالت أنه ليس به أي شبهات و يا دوب معمول من أمبارح...صدقنا الرواية و جلسنا بعد أن تناولنا وجبة بين الفطور و الغداء كثيرة الشواء ...و تعددت فيها أصناف اللحوم...شية جمر...و شية الجمر دي اسم بس لكن لا شفت جمر و لا حاجة....و شية الصاج اللذيذة ديك...ألمش و المخللات و الشطوط...احي أنا من الشطوط الخلتني مساهر الليل كله...أكلنا اللحم و شربنا الشربوت الخفيف المبلول من أمبارح...و بعد تسرب الشربوت الى العروق...حدثتنا قريبتي قائلة أنها كانت جالسة تتفرج في التلفزيون فسمعت صوت فرقعة عالية و صوت يضرب بقوة في الباب الخلفي حيث تجلس...خافت بشدة و مشت على أطراف أصابعها لتى ماذا هناك....و جدت ان الجركان الذي به الشربوت قد أنتفخ حتى طار غطاه من مكانه و ضرب في الباب....
قلت ليها....طار طار تكلمينا بعد شنو....و الله شربوت بلدنا و لا باربيكان الجيران...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: الرشيد بابكر)
|
Quote: العيد ... ولي ..... واللحم راح في مرقة ....
|
طيب ما تلايقوها....الأيام دي يا أبو الزوز تكون بهجة متفننة في أم رقيقة...تكون عملت ليها كمان مخزون استراتيجي من شوربة الضلع...غايتو باقي السنة لياقة سااااكت...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: الرشيد بابكر)
|
احلى عيد لأحلى ناس
نعم اتلتلنا فى رحلة السعودية اير تلتلة العدو
نعن اضطرينا لقضاء ليلتنا الأولى من الأجازة فى جد
بدون احتياطى ملابس الا تلك التى علينا
ولكن دفء الأستقبال وحرارة مشاعر اهل جدة الرائعين
ميسرة وسيدة الزقازيق الأولى
ومحمد عيد
جعلت كل هذه التلاتل المتلتلة آخر اهتماماتنا
عندما امسك بيدى فجاة
وانا انتظر الشنطة التى لم اكن اعرف انها ماجاية فى ذلك اليوم
على السير الكهربائى المتحرك
ذلك الأسمر الصغير
الذى لو وجدته وسط الاف الأطفال
لعرفت مباشرة انه
منذر ميسرة سيد احمد
انت يا عمو مش اسمك منصور
خلعنى ليك خلعة
انت الدخلك هنا شنو ؟؟
زوغت من البوليس فى مدخل الصالة
وقف معنا فى حافة السير (وقفة طفل كألف رجل)
انت عارف ياعمو الأيام دى كثير الشنط قاعدة تتأخر
وقفة منذر معنا
اعادت الى شريطا من وقفات ميسرة زمان
يا الهى
منذر ميسرة يعيد انتاج الشريط القديم من جديد
ما اسعدنى بهكذا معارف
ويا لهناى بمثل هكذا اصدقاء واصحاب
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: منصور عبد الرازق)
|
اليوم العيد فى المغرب
لذا يلزم كل سنة وانت طيب خاصة لطارق جبريل
مع سلامات كبيرة لريم طارق
وسلام بالزاف وتحية فيها حلاوة عيد المغرب البيقسموا فيهو الخروف طرانشات طرنشات
لى ام ريم بت شيخ اخونا طارق
وارد التحايا باحسن منها الاف الاف
لكل من اتصل على
او نوى
او حا يتصل
زينب التيجانى الشبكة قصرت معاى فى تلقى اتصالك المقطوع مرة
ثم قصرت معاى مرات اخرى لمحاولاتى الحثيثة لرد الأتصال
وكذلك نهلة نجم الدين
كما ان اتصال عفاف
اسهم فى تصدير عيد الرياض الى
بعد ان خيل الى للحظة
اننى تركته ورائى
وتقبل تحيات صاحبتك ايثار منصور يا زناتى زهير
وهى مليانة فرح وسعادة امامى
فنحن ماشين
لى ناس محسنة ميسرة
وهذه حكاية تانية اجيها بعد شوية
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: منصور عبد الرازق)
|
رحلتنا مع لحم العيد
لم تبدأ بعد
لكنها ستبدا يا دوب بعد شوية
الشنط جات ووصلت
تاجلت خرفان العديد من الأصدقاء والمعارف
الى مابعد اليوم الأول
بسبب توقييت رحلتنا الى جدة
اولهم خروف العزيزين ميسرة ومنى يونس
ولكن ميسرة من صباح الرحمن فى الحلقة
وسوق الخرفان
ظروف جده وامطارها فى الأيام الفاتت
جعلت من ازدحام العيد
ازدحاما مزدوجا
بسبب الخرفان
وبسبب مياه السيول والمطار
يعنى يا طارق جبريل
ما انت بس العيدكم الليلة
نحن ذاتنا لحمنا لسه يادوب حا يبدا بعد شوية
انا عارف ناس السودان خلاص العيد واللحم عندهم اصبح ذكريات
يا زينب التيجانى امعانا كده فى حندحتك بى ذكريات جده
فنحن بدينا امس حسب برنامج منى يونس وميسرة
بى دجاج البيك الشهى الطاعم واللذيذ
الاسبايسى الحراق
ونبدأ رحلة المشاوى وام رقيقة والشطوط بعد قليل
اما الشربوت , فلو بكرنا لقيتوا كلامنا ما ياهو
ملخبط يعنى ولا فيهو اى لكلكة
طوالى افتحوا بلاغ فى منى يونس دى
النتيجة عموما يا بكرة , يا بالليل
حسب درجة الشربوت بمقياس (ربيكا ست العرقى )
يا نجاة حوفى
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: منصور عبد الرازق)
|
سلام يا شباب
قلتوا لى الشربوت كيف ؟؟
ياخى الشربوت بتاع منى يونس
خلى منصور يكتب ليكم من حساب ميسرة
زى نكتة الزول الأحول الزمان داك
القبضوهو فى الأمتحان
بيكتب ويحل فى ورقة زميله
عموما بعد الغداء والشربوت ده
محمد عيد قلت لى منتظرنا فى مول شنو
مول الغرب
مش اسمه كده ؟؟
ربيكا ست العرقى الجنبنا
آخر اخبار قالوا اعتزلت
ما بتعتزل كيفن
اذا كانت منى يونس عاملة ازمة بلح وعجوة
فى جده كلها
قلتوا لى فيضانات وسيول
وين دى
شربوت ساااااااااااى
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: منصور عبد الرازق)
|
يا رشا أم رقيقة تبدأ من بكره .... والولد مهند كيف أصبح ... والبت ريم إنشاء إستمتعت بالخروف والعيد ....
يا ناس جده عايزين تقرير الرحلة بتاعت منصور إنشاء الله شنطة الملابس جمعت ... ويا محمد عيد إنشاء الله جبت لمنصور الوصية ... دبل كليك ... سطر جديد
الناس دي لسه معيده ...
كل سنة وإنتو طيبين العيد مبارك علي الجميع
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: مني يونس)
|
بمطعم البيك كانت السهرة حتى الساعات الأولى من فجر اليوم التالي
جلسنا نجتر الذكريات ويبدو أن منصور يتذكر أشياء كثيرة عن الزقازبق
وعن الفترة التي كنا نلتقي فيها بالخرطوم خاصة بشارع 15 العمارات كنا نلتقي
كثيراً بإستديو كاميرأرتست .
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: مني يونس)
|
منصور داخل دارنا ويجلس على اللاب توب جوار مشكاة ويعمل مداخله
بعد الشربوت قال عايز يرسل جك لناس الرشيد وحوفي والغريبة رسل
شوية لناس المغرب أخونا البعيد هناك ناس العيد المخالف طارق ود جبريل
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: مني يونس)
|
إنسجام تام بين أبناء جيل الزقازيق الثاني الأولاد إهتموا بلعب البليستيشن.
إهتمام البنات إنصب في الإنترنيت
آخر إندماج وكأنهم يعرفون بعضهم البعض منذ سنين
نتوجه بعد ساعة من الآن إلى ساوث مول وسهرتنا مع العزيز الغالي محمد ود عيد
السهرة صباحي وبكرة تشوفوا الصور ،،،، بس ناس جده معظمهم مسافرين أو حاجين أو متابعين حجاج
حليلك يا دودو .
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: مني يونس)
|
يا سلام يا ناس جده المحظوظين .. ويا سلام علي العيد مع منصور ... بس يا جماعة أي زول يكتب حاجة يوقع لينا إسمه ... الظاهر الشربوت لخبط ليكم الرامات ما عارفين البيكتب منو والبيقرا منو ... غايتو هنا الناس في السودان معظهم وقعوا الشامبيون وهو لا يقل تأثيرا عن الشربوت ..
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زهير الزناتي)
|
يا ناس جدة والله صوركم تشهي الواحد الجية ليكم...صور المطعم المقسم لي كابينات ده ذكرني زيارتي للرياض قبل أربعة سنوات حيث تمت دعوتنا للعشاء من أحد أقرباء نجاة و كانت أول ما لاحظت ان المطعم مقسم الى كابينات صغيرة تسع أسرة...و اندهشت لأنه لا يوجد مثيلها في الامارات...لكنني و جدتها مريحة و تعطي الأسرة كثير من الخصوصية....
العيال ما شاء الله عليهم آخر اندماج...ربنا يحفظهم جميعا...
منص...يا حليلك يا يابا الشوف خلاص بقى الا بالنضارات عيار 24 قيراط...الله يكون في العون...مع شعرك الشايب ده خلي الناس ديل يعفوك من الشربوت ده...تقوم تفلت تطلع ليهم القديم و الجديد...و أنا خايف يدوك شربوت موجه تقوم تفتني أنا بس و تكون رحلة جدة ضيعت عفشك و ضيعت كرامتي...
استمتعوا يا أهل جده...فجده اليوم غير...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: الرشيد بابكر)
|
يا منص كراعك خضره لما غرغقت جده0000كل سنه وانته طيب
يا ناس جده جعلهاالله سقيا خير وبركه وكل سنه وانتم طيبين
يا رشيد ما بجيش ليه ابقى تجى وعيد سعيد
يا عيد كيف العيد اكيد فيهو كل جديد
يا حجاج نحن فى الانتظار بالسلامه
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: الرشيد بابكر)
|
يا اجدع ناس شنو ضربتوا السية والشربوت ورخمتوا..
يا ناس جده والله بختكم اكيد منورة بناسها بس منصور سندى ده ذو نكهة خاصة يعنى لو اكلت معاه طعمية تحسها انها ترايفل بنكهة كل فاكهة الدنيا الشفتوها والفى الجنة كمان..
منى وميسرة والله ابداع وتسجيل للاحداث ممكن تكونوا مراسلون لقناة الجزيرة. الله يديكم العافية ويخلى ليكم الاولاد الحلوين ومن حسه انا حاجزاكم كلكم العيد الجاى معانا فى ابوظبى..
يا عيديعنى انت ومنصور فى جده احلى بقاع الارض التى ضمتكم بس ذى ما قال الرشيد اوعى من الشربوت العياره تقيل بعدين تفلتوا ويدردقوكم فى الكلام. تحية حارةللمدام والاولاد والله يجعل ايامك كلها عيد.
زوبة شكرا على التلفون وجاينكم يوم كرامة عمر.
طارق جبريل سلامة ريم وربنا يواليها بالعافية.وعيدسعيد(يعنى اى شى عندكم مشاتر وقفة عرفة دى متفق عليهاانت احسن شى عيد مع اغلبية ناس الزقازيق ودى مقولة متفق عليها)
يا حاتم جبارة اكلت المرارة ما نفعت معاك ولا شنو . زهير بالله افقد لينا الولد الحنكوش الامريكانى ده
ما يكون الجو والموية غيروا معاه ولا يكون شاف ليه ضبيحة خروف داخ.
برجع ليكم الايام الجاية برررررررررررررررى شديد غايتو الا تقوموا جارين منى
دمتم سالمين
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: الرشيد بابكر)
|
يا اجدع ناس شنو ضربتوا السية والشربوت ورخمتوا..
يا ناس جده والله بختكم اكيد منورة بناسها بس منصور سندى ده ذو نكهة خاصة يعنى لو اكلت معاه طعمية تحسها انها ترايفل بنكهة كل فاكهة الدنيا الشفتوها والفى الجنة كمان..
منى وميسرة والله ابداع وتسجيل للاحداث ممكن تكونوا مراسلون لقناة الجزيرة. الله يديكم العافية ويخلى ليكم الاولاد الحلوين ومن حسه انا حاجزاكم كلكم العيد الجاى معانا فى ابوظبى..
يا عيديعنى انت ومنصور فى جده احلى بقاع الارض التى ضمتكم بس ذى ما قال الرشيد اوعى من الشربوت العياره تقيل بعدين تفلتوا ويدردقوكم فى الكلام. تحية حارةللمدام والاولاد والله يجعل ايامك كلها عيد.
زوبة شكرا على التلفون وجاينكم يوم كرامة عمر.
طارق جبريل سلامة ريم وربنا يواليها بالعافية.وعيدسعيد(يعنى اى شى عندكم مشاتر وقفة عرفة دى متفق عليهاانت احسن شى عيد مع اغلبية ناس الزقازيق ودى مقولة متفق عليها)
يا حاتم جبارة اكلت المرارة ما نفعت معاك ولا شنو . زهير بالله افقد لينا الولد الحنكوش الامريكانى ده
ما يكون الجو والموية غيروا معاه ولا يكون شاف ليه ضبيحة خروف داخ.
برجع ليكم الايام الجاية برررررررررررررررى شديد غايتو الا تقوموا جارين منى
دمتم سالمين
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: نجاة حوفي)
|
مليون سلام
والله يا منصور عملتو لى شحتافة روح
يا منصور انا وسونا بتى لما كنا فى جدة اى بيك فى جدة اكلنا منو لدرجة عمر بقا يلف من الشوارع الفيها البيك
واله مستمتعة معاكم وفرحانة ليكم وشكرا للزقازيق الجمعت الصفوة دى عيد سعيد يا عيد ويا منى ويا ميسرة وللابناء الاعزاء
طبعا هنا ناس محاسن وريل برضو شاركو فى العيدية دى بانهم اتعرفو على اخوانم الزقزيقيست
حنعمل للصبايا والشباب ديل بوست يتواصلو بيهو
ربنا يخليهم كلهم ويحفظم
طارق جبريل كل سنة وانتم بالف خير
سلامات يا ريم جبريل ما تشوفى شر
مجهزين الورقة والقلم للوصفات المغربية
السودان منور بى حاتم جبارة وعبد الدائم
منى والله كنا عايزين نرسل ليكم الزناتى للصور بس ما قصرتى
عيد ومنصور الشبكة خزلتنى وتلفوناتكم ما دخلت معاى
والله مبسوطة شديد لناس جدة استمتعو
نانى ما شكرا على واجب مهند دة ما ولدى ياخ مع انو بتكونى عاملة للموضوع توم وشمار بس الولد دة ما بنرضى فيهو
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زينب التجاني)
|
يا حوفي الولد حاتم جبارة قبل شوية طلع من هنا معاهو الوجيهين نادر فاروق ومحمد حسن البرلوم .. بس إبتهاج قالت ليك كل سنة وإنت طيبة .. وبتسألك قالت ليك الكمونية عملها ليك منو . وخروفكم فيهو مرارة ولا ما فيهو ... أصلوا إنتو المغتربين ديل عندكم حاجات بتعرفوها براكم ....
إبتهاج تغري التحيات لكل الناس وسلام خاص للناس المتواجدين في البوست ومرابطين ايام العيد .... ناس جدة ... ميسرة ومنصور ... ومني يونس .. وأسرتيهما ...
ولرشيد القوم ونجاة حوفي ... قالت ليكم كل سنة وإنتو طيبين بس إتذكروا العيد الجاي معاكم رغم إنه الدعوة موجهة لناس جدة بس ... لكن من الآن حا نعمل حسابنا إنه العيد الجاي معاكم ...
ومني أنا أقول ليكم ده كلام شربوت ساكت ... ولاتأخذوا من شرب الشامبيون منا ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زهير الزناتي)
|
سلام يا اجدع ناس
الحمد لله تم فك الحظر عن الخروف وقمنا بذبحه على سنة المصطفى عليه الصلاة والسلام
المغاربة ديل يا نجاة حوفي مشاترين في كل شي
تخيلوا موش ضبحنا لي هسي ما شوينا
اول حاجة بياكلوها اسمها البلفاف
ودة عبارة عن الكبدة مقطعة صغارة وملفوفة بي الدهن البيكون حولين الكرش داك
بتاع الودك داك وبيشوها في الجمر ويدوك معاها الاتاي (الشاي الاخضر المنعنع)
وبعداك في الغداء بيعملوا الكمونية ودي بيسموها (الدوارة) وبيكبوا معاها وهي بتنجض شوية كبكبي
وما بيهبشوا الخروف الا تاني يوم لحدي ما ينشف حسب وصفهم
طبعا بيطيريا طريقتهم صاح
المهم يا زوبة بكرة غايتو جهزي دفاترك حقت الاكل وانتظريني
يا ناس جدة والله بغرتونا غايتو السنة الجاية ان شاء الله بنختكم في الحساب
بس حج مع الحناكيش (الرشيد وحاتم) ديل ما بينفع
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زهير الزناتي)
|
| Quote: بس حج مع الحناكيش (الرشيد وحاتم) ديل ما بينفع |
ثالث أيام العيد و نحن نزلنا الشغل...و زي ما جده الأيام دي غير برضو أنا الشغل غير...حيث حضر معي وفد على مستوى عالي تتقدمه أم أمنية و أمنية و مهند و حتى مساي الشغالة بتاعتنا...الجماعة مبسوطين من رحلة السفاري دي...
جبريلا...أخير ليك تحج معانا...الحج بتاعنا VIP ...تمشي تحج براك يلموا فيك الجماعة يحججوك الحج العلى أصوله لمن تآمن...أخير ليك...الندامه ما بتنفع بعدين..
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: الرشيد بابكر)
|
Quote: ولرشيد القوم ونجاة حوفي ... قالت ليكم كل سنة وإنتو طيبين بس إتذكروا العيد الجاي معاكم رغم إنه الدعوة موجهة لناس جدة بس ... لكن من الآن حا نعمل حسابنا إنه العيد الجاي معاكم ...
|
بهجة حبابك ألف...كان ما شالك الراس بنشيلكم جوه العين...الأخيره دي أنا شافيها من نجاة حوفي و ما عارف قلتها صاح و لا غلط...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: زهير الزناتي)
|
نهاركم سعيد..
منى وميسرة الصورة رائعة .. واشبال الزقازيق ما شاء الله عليهم.البنيات حلاوة ماكنتوش بس ما شاء الله عليهن.
يا سندى من حسه حجزنا امانى الصغيرة لمهند الرشيد0(ولد بالشكولاته وعمو ابنوسى اها فى احلى من كده عريس).
الدعوة بتاعة العيد الجاى لكل ناس الزقازيق محجوزين عندى بابوظبى..
يا بهجة كل سنة وانتى طيبة والدعوة لكل الرائعين بدون فرز وحسه دى منى ليكم بالذات انا لاقياكم وين بس انتوا اصلونى والله اشيلكم فى عيونى واغطيكم برموشى.
يا منصور عليك الله شوف الناس ديل كلهم ما مصدقين انى بقدر على الضحية والله والله اسالواابو امنية وبما انه حكى ليكم موضوع باميتى بالبرستو بعد 13 سنة اكيد حا يقول الحقيقة.
بهجةوالله ضحيتى اريتها ضحية السرور اول شى قبل يومين بجهز المش وكل انواع المخللات والشطة خضراء وبالدكوة وملخبطة والبصل بالليمون. السنة دى منعوا الكمونية فى ابوظبى يعنى من المزبح ما بدوك ليها. رغم انه عادة بتجى شبه نظيفةوانا بظبتها تماماسالوا المراقب الدولى المعاى عشان تتاكدوا العيد الفات المرارة انهردت من الغسيل كبيت ليك فيها صابون لوكس السائل بتاع العدة والموية الحارة واحد قريبنا قال لى دى مرارة ولا بشكير ابيض.
ويا بهجة كمان الشربوت بعملوا كل عيد بس السنة دى جابتوا لينا قريبة الرشيد.
اقول ليكم تعالوا كلكم والخبراء الاجانب عشان تامنوا.
طارق جبريل كيف ريم انشاء الله ما تشوف شر. والله يعينك على الضحية مع المغاربة ده ما سمعنا بيه يعنى الواحد عينى فى الخروف يخلى لتانى يوم حتى ياكله؟!!!! تتصبر بكبدة وكمونية !!!!!
حاتم بيطريا صحيحة دى كيف ؟؟
السنة الجاية اخير ليك ضحى فى بلدك والله فى بيت ناس حبوبتى فى ام درمان شية الجمر بقطعوها والخروف معلق فى الباب.. بطعموا المرارة فى الصينيةوشية الصاج اللذيذةديك. اقول ليك شىجيب اولادك تعال ضحى معانا فى ابوظبى اصلا عيد الضحية الجاى زقازيقى والدعوة عامة والفيزا علينا.
راجعة ليكم ببرية طوييييييييييلة انا الايام دى فاضية لا شغل ولا مذاكرة الا تقولوا الروووووووب
يا شبوكشى وسناء الصباغ كل سنة وانتوا طيبين مشتاقين شديد.
دمتم سالمين
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: نجاة حوفي)
|
جيتكم تانى..
كنت فاكرة ابو امنية مشغول فى المكتب لقيتوا يبرى الظاهر انه اليوم يومنا .. استعدوا للبرى الاصلى بالشربوت .. الله يستر.
تتميز الشركة التى اعمل بها بتعدد الجنسيات العرب قليلون واقول العرب الذين تستطيع ان تتحدث معهم بالعربى تفهمهم ويفهموك..بس برضو اغلبيتهم اردنيين او لبنانيين .. واحد من الشركاء لبنانى وهو staff partner دائما يفخر بالDiversity وتطبيقها فى المكتب المهم يوم جيت متاخرة ختانى فى راسه.. تانى يوم لقانى ما فى مكتبى قال لزميلتى امشى ليه فى مكتبه.. مشيت منزعجة ويتطاير الشر من عيونى وقلت الرزق من الله اقول لنفسى علمت ان رزقى لن ياخذه قلبى فاطمأن قلبى.. دخلت مكتبه . قال لى بونجور
(طبعا انا برد عليه ذيه بونجورين زناتى يعنى صباح الخير بالفرنسى) فسالنى بكل رقة :نجاة ليش ع بكرة مأخرة؟؟ اذددت غضبا قلت ليه كيف يعنى ؟ كيف يعنى انا امبارح اتاخرت بفتش فى Parking وبكرة يعنى حا تتنبأ انى حا اتاخر انا صراحة ما بقبل الكلام ده . وانفتحت شى فهمه منى وشى لا .. فقال لى نجاة انا افتكرتك صافنى(يعنى مريضة) اتفضلى ارتاحى ليه انت زعلانة الظاهر ما فهمت كلامى . قلت ليه ده كلام واضح ما عايز ليه شرح قال لى بس عابكرة يعنى اليوم الصباح باكرا طبعا خجلت وقعدت اشيل واعتزر واتشكر فيه شكرا انك قلقت على ومعليش وشرحت ليه انه عندنا فى السودان بكرة يعنى غدا او tomorrow .كل واحد بشتغل فى الخليج عليه ان يعوج لسانه شوية
يوم العيد اتصل بى زميلى فى الشغل قلت ليه نحن مضحيين ومعاى اقرباء زوجى للغداء فقال لى صحتين مشيت بعيد وقلت ليه على البك(يعنى على قلبك) خوفا من ابو امنية وقريبه الساخر.
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: نجاة حوفي)
|
نجاة حوفي كيفنك وكيف مهند هسي ان شاء الله بقى تمام
ريم الحمد لله تتحسن بس الالقحة تاعباها شديد
يا دوب الليلة استمتعنا بالشواء الجميل (القضبان على الطريقة المغربية)
يا ستي دعوتكم مقبولة وان شاء الله السنة الجاية معاكم كان ما العيد الاجازة نمر علي السودان ونجيكم
بس بلدكم الفيزا ليها صعبة خلاص والله تقول عايز تدخل الجنة
المهم من هسي اعتمدوني زائر في الصيف ان شاء الله لو ربنا هون
احسن لي اجيكم زيارة بدل اتبهدل مع حج الحناكيش ديل
آل في أي بي آل
هههههههههههههههههه
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: طارق جبريل)
|
هنيئا لك اكل الشية المغربية\(صحتين على البك)
وحمدلله على سلامة ريم.
والفيزا بالعكس ساهلة جدا طيران الاتحاد والامارات بعملوها فى 5 يوم .. تعرف انه الامارات دى اسهل مكان تدخل ليه كمان من المطار بتاخد ترانسيت فيزا وعموما .. يا سيدى تشرفونا فى اى وقت الكفيل طال عمره(ابو امنية حاضر.. ما بقصر) .
غايتو الما بمشى الحج السنة الجاية ما يمشى انا شخصيا بمشى معاهم جنى وجن التعب .. رمى الجمرات سندى الابنوسى برميها لى من امبارح كلمته.. انا غايتو مع ال VIP
زهير زاتو ماشى معانا .. سجلوا من حسه العدد محدود.
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: نجاة حوفي)
|
يا نجاة خايفين حج الحناكيش دة الله ما يقبلو
عشان كدة اخير لينا نشوف محمد صديق تراهو زولا مدروش زي
انا غايتو بحج مع محمد صديق ومحمد عيد
لكن منصور دة من الضحك ببوظ لي حجتي عشان كدة ما بحج معاهو
يا نجاة المغاربة ديل اكلهم غريب وعجيب بس اتعودنا عليه مجبورين
نسوي شنو ما عندنا حل عاد
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: طارق جبريل)
|
صباح الخير يا وجوه الخير ،،،،
يوم أمس السهرة كانت لدى العزيز محمد عيد
وكانت حتى تباشير الصباح ونتحفكم بصور جميلة
تحكي عن تمارين الشباب في ملعب صالة البولينق
أنحنا من دلوقتي قبلنا الدعوة الكريمة الموجه لينا من أهلنا العزاز
في أبو ظبي ،،، وكمان ننتظر بإذن الله حج الحناكيش حتى لو كانوا من السودان
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: ميسرة سيد أحمد)
|
منص يعود أكثر إصراراً ويرمي بالكورة ويطيح بكل قزازات اللبن إلا واحدة في وسط متابعة من مدرار ومشكاة تصفيق منص
تشجيعاً لنفسه، يعود عيد ويرمي كل الزجاجات ويسجل أول إنتصار لناس جدة بالساوث مول وينك يا ديدو طبعاً ديدو كان يرمي
الكورة والقزاز يطيح لوحده،،،، هأ هأ هأ هأ هأي
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) (Re: ميسرة سيد أحمد)
|
ميسرة يلتقط التحدي ولتدعيم تفوق جده على الرياض وتخفيفاً للشحوم وتصغيراً للكروش
مشكاة تراقب والدها عن قرب وتفرح بأن والدها لم يسقط سوى واحدة فتبرعنا بها لمنصور
حتى يكتمل العدد وتكون النتيجة تعادل .
أنا والله ما خايف إلا من تعليق زهير الزناتي والرشيد وعلشان أريحكم كانت مباراة الجلاكين
ممتازة ورائعة ،،، وشكراً
| |
|
|
|
|
|
|
| |
ميسرة سيد أحمد
إخلاص محمد أحمد
كمال الشادي
منصور عبد الرازق
معتصم جعفر
زهير الزناتي
محمد عيد
الرشيد بابكر
نجاة حوفي
ياسر نجيلة
مني يونس
زينب التجاني
طارق جبريل
عفاف علي ميرغني
أحمد إسماعيل
عبد القادر بابكر
فيس بوك
تويتر
انستقرام
يوتيوب
بنتيريست