|
|
 Re: ناس الزقازيق ... أجدع ناس ( 3 ) .. (Re: محمد آدم النور)
|
Quote:
وكمان كانوا بيلعبوا ســيجة وصـفرجت فى ضل الحيطة جنب خور جانقى
وبالليل بيتموها الرمــّه وحرّاسها فوق كوم الرملة القدام الدكان . |
والله يا محمد عيد بدات تتغير لي كثير من المفاهيم نحن كنا
قايلنكم اولاد بحري و الخرطوم ديل حناكيش و كده لكن طلما كنت
بتعرفوا الحاجات الصعبة البقول فيها جلال وود جبريل دي الظاهر
الحكاية جايطة لا فيها خرطوم ولا فيها غيره !!!!
عموما البرنامج للرحلة القادمة لناس الزقازيق مشتركة في الخرج
حيكون في برنامج شدتت و حاره ام الجري و اي كرش ما تحول بيهناك!
الكلام ليك ما المنطط عينيك ؟.
الشي التاني يا جماعة اليوم البيكون فيه الواحد مشغول يلقاكم بتقولوا
كلام حلو حلاة ومن كل المخضرمين عمر مهدي و ود الشادي و طارق وكما جنابو
الليلة قدر يسترد عافيته و يرجع و العجب جلة متالق بس بالله يا شباب خلو
لينا شوية معاكم و حددوا لينا الفورة كم اول حاجة وشوفوا جلا دا بتاع
صلبطة ساي ما دايرنو معانا في القيم الجاي يمشي يلعب من الرجال الكبار
بهناك ناس ال..........وم...........................؟
الليلة يا جلال ما وقعت معاهم بس العكاكيز ...!!!!
| |
  
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: موسي عيسي)
|
بالله عليكم الله شوفوا كلام ود الشادي دة
ياخي الدينصاور دة يمين امين محمد الحسن الشهير بأمين السمين قال جاء لقاهو خريج
يا جلال زولك دة من زمن بحكوا ليهو فاطنة السمحة وشمطت قمطت في قــ......ـة الصغير فيكم
تعرف يا ود عيد زولك دة بيكون اشتغل عطشقي قطارات حتى جاء الزقازيق
يعني نحن لمن ابوي زاتو ما فكر فيني ود الشادي كان حايم بي اللباس ابو استك داك
ورجيلنو من العرق عاملة خرايط بيضاء
غايتو زولكم دة ان بقى اتبنج يمين يطلعلو كلاما بي عجاجو من القُدُم
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: طارق جبريل)
|
بالله اشهدوا على يا ناس
بالله انا ماشقي حال
جنيت على نفسي براي
قمت قبل شوية قلت البوست حلو محتاج طارق يخش
رسلت ليهو رسالة على الجوال
( عليك الله خش على النت )
أها انشاء الله شفتو النتيجة
والمصيبة الكبيرة كمان
راس ا لصفحة من فوق يعني لغاية ما الصفحة دي تقلب ان شاء الله
انا عمال أتهزأ
الله يقطع شرك يا مبنج
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: كمال الشادي)
|
ود الشادي مسوي راسك اكنك سغنبوتي
انت وكتين بلغتة انا امي باقيلي ما خطبوها
يعلم الله ونستك قالوا كلها عن الدحشة والحمير اكرمكم الله
تجي تقولي ماك عارف سكج بكج
والله انت تلقاك ((أول حول)) لعبتها
ياخي انت وكتين تشرك للقمري والدباس في السواقي
انا ابوي جاب لي كنار*
ـــــــــــــــــــ
* هو كنار دة شنو أكنو
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: طارق جبريل)
|
آلاف التبريكات لكل الحلوين
بت ريسنا وخطيبة ولدنا علا معتصم ... وأمانة ما إتلومنا معاها نجي نبارك ليها آخر ناس
ولروان عمر مهدي ... ومبروك لوالدها العزيز عمر مهدي وجعلها الله دائماً من المتفوقات ..
ولميس فتحي ... بت ناس حوفي ... ولكل آل حوفي وكمان صديقتي حاجة محاسن لازم نوصل ليها التحايا والتبريكات ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: زهير الزناتي)
|
الاخ محمد عيد ، كان زمان عندو حاجات كدة رائعة بيجيبها من وين ما عارف
انا لافي في النت ( المنبر الحار ) لقيت حاجة بتشبه الحاجات الكان بيجيبها محمد عيد
ايه رايكم نقراها سوا
----------------------
كيف تقود سيارتك في السودان؟
القاعدة الذهبية في القيادة في السودان:ـ
ـ'عامل جميع السيارات الأخرى كخصوم وأعداء لك'!!!ـ
اشارات الإنعطاف:ـ
لا تستعمل أي إشاراة انعطاف ضوئية أو يدوية.ـ
لأن في ذلك كشف لنواياك وإتجاهاتك للأعداء.ـ
وإذا تطلب الأمر، إعط إشارة لليمين ثم إستدر يسارًا أو العكس.ـ
المشاة:ـ
المشاة قوة معرقلة لك، لا تأبه لهم ولا تنظر اليهم.ـ
مع ذلك تجنب أن 'تطقش' أحدهم ما لم تكن مهيئاً للفرار دون أن يدركك أحد أو ان تكون مهيئاً ماليًا لتحمل تبعات ذلك. ونحن هنا نفضل الخيار الاول.ـ
سيارتك (قديمة أو جديدة)ـ
إذا كانت سيارتك قديمة ...ـ
إعتمد على مبدأ: 'اللي خايف على سيارته يزح '.ـ
أما إذا كانت سيارتك جديدة ...ـ
فإبتعد عن السيارات المعفنة والمهكعة.ـ
لأنها عدو لا يرحم وأصحابها يتلذذون في خدش سيارتك.ـ
الدخول للصينية:ـ
حين تدخل الى الصينية ، لا تنظر الى السيارات القادمة من اليسار.ـ
لان من ينظر اليهم يعني أنه منتبه لهم، لذا يجب أن يعطيهم الطريق، فيفقد بذلك حق من حقوقه المكتسبة.ـ
الإزدحامات المرورية:ـ
إعتمد على قاعدة: 'اللي يدخل سيارته أولاً يربح'،مع الاستمرار بالضغط على البوري 'بييب بيييييب'.ـ
ولكن إحذر أن تستخدم هذه القاعدة مع سائقي "الهايسات و الروزات " خوفاً على سيارتك وحياتك!ـ
عند السير البطئ:ـ
لا تترك مسافة بينك وبين السيارة التي أمامك أبدًا.ـ
لان ترك مثل هذا الفراغ يعني دخول سيارة أمامك، وهذا يكون على حساب كرامتك ومكانتك الشوارعية وفق المفاهيم السائدة حاليًا.ـ
خطوط المسار الطولية:ـ
حاول دائما ان يكون خط المسار بمنتصف سيارتك.ـ
هذه طريقة مثالية لحجز مسارين، في حال خسارتك لمسار لأحد الأعداء، يبقى لك المسار الآخر، مع فرصة لإسترجاع المسار المفقود من الخصم.ـ
إشارات المرور:ـ
عند الوقوف لاشارة المرور الضوئية، يجب البدء بالبوري 'بيييب بييييييييب' عندما تتوقع اقتراب اللون الاخضر.ـ
مع توقع ارتطام ميكرو من الخلف ، ولكنه معذور، فالزبون ينتظر في الشارع يا حرام.ـ
الطريق السريع (الهاي وي)ـ
إحرص على أن تلز او تلزق سيارتك بالسيارة التي أمامك، وحين يراك سائقها و انت ملاصق له بإصرار يكون هناك ثلاث إحتمالات:ـ
إذا كان ذلك السائق جباناً
فلا بد أن يفسح لك المجال لتجتازه، وبذلك تكون قد حققت نصراً معنوياً عليه، ولك أن تنظر له نظرة إستصغار واحتقار وأنت تجتازه.ـ
إذا كان مؤدب 'شوية'ـ
سيفسح لك المجال لإجتيازه، ولكن آنذاك قد تسمع بضعة كلمات قد يكون فيها أسماء حيوانات أو أهالي أو أشياء أخرى. فلابد أن تتوقع ذلك. وما عليك في هذه الحالة الا الاشارة بيدك 'وانت مبتسم'. ـ!!!!!
أما إذا لم يكن مؤدباً (وهم الأغلبية السائدة في الشوارع حاليًا)ـ
فسوف يبدأ بالتباطؤ، والانعطاف ناحيتك 'يحدك' على صبات الطريق او شبك , او شجرة ، ففي هذه الحالة يجب أن يكون حزام الامان غير مربوط حتى تنزل بسرعة من السيارة وتبدأ معركة صغيرة بالأسلحة البيضاء. وكن على اتم الاستعداد لمثل هذه الحالات بعصا، شاكوش، مفك. مع تكرار نفس اسماء الحيوانات والأهل مع بعض التعديلات (انت وحظك).ـ
وفي الأخير
يجب أن تعرف أن القيادة فن و ذوق وأخلاق
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: معتصم جعفر)
|
سلام يا اجدع ناس
معليش للبارسا وما بشجع الانتر
مبروك لبت الريس معتصم ولبت ود المهدى وللميس فتحى ولكل الفاتنى
واتلومنا وما عملنا احتفالية لمنصور
الليلة عيد ميلادو ال26\
كل سنة ومنصور واسرتو بالف صحة وعافية
يا عيد لحقنا حاجة
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد عيد)
|
صبحكم الله بالخير و السرور
أجمل التبريكات و التهاني لملك الجمال و الذوق...العزيز اللذيذ زي آيسكريم كون زون...حبيبنا الأولاني فلان الفلاني...منصور بن عبد الرازق محمد فضل بمناسبة عيد مولده...يا منص ان شاء الله تعيش و تتهنى و عمر مديد و سعيد...و التهنئة لي أماني و لجميع أفراد الأسرة من أحمد و حتى مدرار مرورا بايثار الجميلة ومجتبى و حجازي...
كنت عايز أكسر تلج أكتر من كده لكن خفت ألحق ليكم البوست ده تيتانيك...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: الرشيد بابكر)
|
| Quote: لكن يا زنوبه ما زريتينى زرّة الترزى يوم الوقفة ..! |
و الله إنت خاطي براك!!!
في زول مولود يوم عيد الإستقلال يوم 1/1 يسو ليهو عيد ميلاد؟؟؟؟
ما كفاهو عيد الإستقلال
غايتو نسوي شنو غير نقول
كل عام و السودان يظل حراً أبياً... و كمان منصور
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد آدم النور)
|
صباح الهناء والسرور ...
منصورنا الجكاك كل سنة وانت بالف خير وعقبال سنوات عديدة ومديدة كلها صحة وعافية وهناء وسعادة .. ممكن اهدي جكة عيد الميلاد ... بهديها لي كل الحلوين الجاكين والمهرولين ...
اخونا جلا كان ما شغال بالكورة السودانية واخر عهدوا بيها ايام ناس صديق منزول وصحبه وفي رواية اخرى من ايام الرياضة الجماهيرية ...
طيب مالك ومال المعز .. ممكن تكون فاكرو ابوالعز ...
يا جلا هـــــــوي الحوش دا عندو بوليس اسمه جنابو محمد صديق .. قوم لف هسه بخلي عصام دهب يعمل ليك بلاغ انتحال شخصية بوليس هو انت قايل البلد فوضى .. ما عذبتنـــــــا ...
يا ود جبريلا كيفنك .. العصفورة قالت لي انت جاي البلد قريب .. انشاء الله تجي بالسلامة ..
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: عمر المهدى)
|
يا منص كل سنة وانت طيب
يا البادي النية في بس الله يجيب حق التذكرة وقروش الاجازة
الملاهط ما فيها مشكلة لانه زهير واعدني كل يوم يعزمني
عشان كدة يا شباب انا حا اقترح اقتراح جميل
العايزني انزل معاهو اسبوع في طريق العودة من السودان
من هسي نشوف المغريات شنو
اها يا ناس جدة
اها يا ناس ابوطبي
اها يا ناس قطر
المغريات لازم يكون فيها الفيزا
والاقامة والملاهط والفسحة والهدايا الما خمج
ودفع تكاليف العفش الزايد
البيعمل ديل كلهن بنجي ناطين عنده
لو عملتوا ميتين بنمشي عن طريق مصر
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: أحمد إسماعيل)
|
سلامات يا ناس
منصور كل عام وانت بخير ..وعمر مديد ان شاء الله
Quote: المغريات لازم يكون فيها الفيزا
والاقامة والملاهط والفسحة والهدايا الما خمج
ودفع تكاليف العفش الزايد
البيعمل ديل كلهن بنجي ناطين عنده
لو عملتوا ميتين بنمشي عن طريق مصر |
يا جبريل وفى طريقك للسودان ..أنا حاجزك وديل كلهم بعملن ليك.
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: جلال عثمان)
|
Quote: يا جبريلا في الإنتظار بس بلاش المحركة الكتيرة دي ....
|
ابو الزوز دة هسي يعتبرو شنو
نطيت من الملاهط ولا شنو
Quote: يا جبريل وفى طريقك للسودان ..أنا حاجزك وديل كلهم بعملن ليك.
|
والله يا جورج عداك العيب
شايف ناس الخليج مافي اي زول قدم اقتراح
معناها نمشي بي مصر
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: طارق جبريل)
|
جمعتكم مباركة
لعلكم بخير يا جماعة... مالكم... سمعتو و لا جابو ليكم...
لابدين كده ان شاء الله خير...
أنتو يا مهججين يا لابدين...حاجة في النص كده مافي...
الأسبوع الفات جننتونا جن...
حفلة في الرياض و رحلة لي قندهار...مدخلين يدينكم في الشية لي كيعانكم...
و تكاوا فينا بالرسائل..
ناس الرياض مهججين و يضربوا ليك في التلفونات أنصاص الليالي...
لا مطره وقفتهم و اشتغلوا بيها الشغلة...
أمبارح و الليلة مالكم...
اشنو ده يا أخوانا الأقوى من مطرة الرياض...
و كتاحة سوق الناقة...
المعروف بقندهار...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: الرشيد بابكر)
|
سلام للحلوين
كل سنة اتفاجا بانو فى ناس لسه متذكرين عيد ميلادى
لمن ارجع البيت
القاهو مقلوب والهدايا بتتطاقش
كل مرة استغرب و ثم انسى الأستغراب
لغاية ما يتكرر السنة البعدها
السنة دى استغرابى دبل , مرتين يعنى
حقيقة ضربت لى نجاة حوفى العزيزة و ولكنى لم انتبه لمكالمتها
ثم حدثنى العزيز الرشيد
ولمن قال لى كل سنة وانت طيب
استغربت من اول جديد, لأن استغرابى كان يوم الاربعاء
لمن رجعت من الشغل ولقيت البيت مقلوب
ما دخلت البوست من يوم التلاتاء الفات
وعندما وجدت اشارة بت النوبة العزيزة
راجعت تلفونى , انا البليد فى متابعة التلفونات
زينب التيجانى , انتى يا راقية يا ست المبادرات الحلوة
كلكم تسلموا ويباركوا ليكم السمح ان شاء الله
وان شاء الله لا اعدمكم و لا اسمع فيكم شيتا كعب
ويعلم الله قلعت اللاب توب ده من الشباب قلع
عشان اكتب المداخلة دى
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: منصور عبد الرازق)
|
سلام لاجدع ناس
فاتنى ابارك لولدنا عيسى موسى
الفين مبروك
يا منص يا ابنوسى
لا يا اجمل غابة ابنوس مطيرة
برضو عام جديد وعمر مديد
كان ما باركنا ليك نبارك لمنو
وشكرا يا عيد
دى ما زرة دى ثقة وفى مكانا
انت فنان مبدع وعرفته تلميح زهير يا عيد
ال كلفتة ال
الرشيد تمشى وتجى بلسلامة
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: زينب التجاني)
|
الحمد لله اللطيف المنان، الغني القوي السلطان، الكريم الرحمن.
الحمد لله الواحد الديان، العظيم، كُلَّ يَوْمٍ هُوَ فِي شَأْنٍ
لا مانع لما وهب، ولا معطي لما سلب،
لا رادَّ لما قضى، له الحمد في الآخرة والأولى.
المتعالي عن الأنداد، المقدس عن النقائص والأضداد،
المتنزِّه عن الصاحبة والأولاد، رافع السبع الشداد،
واضع الأرض للمهاد، المطلع على سرائر العباد.
سبحان الله! لا يخفى على سمعه خفي الأنين، ولا
يعزب عن بصره حركات الجنين، ذلَّ لكبريائه جبابرة
السلاطين. العظيم في قدره، العزيز في قهره،
العالم بحال العبد في سره وجهره، نحمده على القضاء حلوه ومره.
الاحبة الكرام لكم التحايا و الاشواق .
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: موسي عيسي)
|
| Quote: فاتنى ابارك لولدنا عيسى موسى |
شاكرين يا زنوبة و انشاء ربنا يوفق الجميع و يجعل
ايامك كلها نجاحات ، و ليك وحشة والحمدلله اللي جابت لينا
ميلاد الشاب منصور و طلعتي لينا علشان كده اقترح ان يكون
للاستاذ منصور كل شهر عيد ميلاد !!!!.
و جلا كمان علشان ما يجي يقول ليه منصور بس ،،منصور لانه
صاحب اشهر جـــــــــــــــــــــــكه في التاريخ ؟
فعقبال مليون جكة قادمة ...............
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: زينب التجاني)
|
صباح الهناء والسرور ...
اصبحنا واصبح الملك لله ...
يا جبريلا يا ود امي احسن ليك مصر .. وشباب الخليج والمغتربين عامة الفيكم اتعرفت .. نحن شباب الداخل تعال فرح ليالينا وبالملاهط الما خمج ليك ولينا ...
وبرضو مبروك لي ولد جيران ناس جلا في كسلا ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: البادي النور)
|
| Quote: وشباب الخليج والمغتربين عامة الفيكم اتعرفت |
يا ود جبريل و الله انت مكانك في القلب و ما تسمع كلام المغرضين
ديل نحن نفرش ليك الصحراء ورد و نشيلك جوه العيون بس انت اشر
و نحن في الانتظار ؟ و كل طلبات اوامر .
و ياحبيبنا البادي كيفنك و بالله قولت لي الاسماعلية كيف ! العجب فيها
جنس حمص يفك الدبرسة ، تحياتنا للراجل الراكب الحافلة و راكب طرف
جبن الشباك و جاي من المربعات .............
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: موسي عيسي)
|
صباح النور صباح الهنا والسرور
اللهم انا نسألك خير هذا اليوم
فتحه ونصرهـ ونورهـ وبركته وهداهـ
ونعوذ بك من شره وشر مابعده اللهم
بك أصبحنا وبك أمسينا وبك نحيا وبك
نموت وإليك النشور ، اللهم فاطر السماوات
والأرض عالم الغيب والشهادة رب كل شيء ومليكه
نشهد أن لا إله إلا أنت ، نعوذ بك من شر أنفسنا
ومن شر الشيطان وشركه اللهم انا نسألك
العفو والعافية والمعافاة الدائمة في ديننا ودنيانا
ووالدينا وأهلنا ومالنا.
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: أحمد إسماعيل)
|
اول حاجة مبروك عيد ميلاد منصور عبد الرازق
وكل سنة وإنت طيب
ومادام ده عيد ميلادك ال 26 فيبقى انا اطمن وانوم قفا
لانو الاسبوع الفات كريم ولدي بيسألني عمرك كم يا بابا
انا عرفت خلاص عمري
حا أمشى اقول ليهو عمو منصور عمرو 26 يبقى انا زيوو
مش كده يا منص
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: كمال الشادي)
|
صباح الخير ،،، يا وجوه الخير
أصبحنا وأصبح الملك لله ،،، وحده
عدنا إليكم بعد إنقطاع قهري دام لعدة أيام
ونكمل التهاني للأبناء بمناسبة النجاح في مرحلة الأساس
وللعزيز منصور كل سنة وأنتم طيبين وربنا يديك الصحة وطولة العمر
ولأخونا رشيد القوم تمشي وترجع بالسلامة ،،،،،،
طارق ود جبريل أفضل ليك تجي السعودية وتزور مكة والمدينة
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: موسي عيسي)
|
Quote: تحياتنا للراجل الراكب الحافلة و راكب طرف
جبن الشباك و جاي من المربعات ............. |
اخونا موسى عيسى راكب الحافلة كمان بيسلم عليك شديد ..
نحن حناكل احلى حمص في الاسماعيلية .. ولا يفوت على فطنة القارئ انه السفر حيكون بالتونسية ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: البادي النور)
|
| Quote: ولا يفوت على فطنة القارئ انه السفر حيكون بالتونسية ... |
البادى الجميل .. كلنا فى الهواء سواء
او كما تقول العرب .. كلنا فى الهم شرق ..
*********
على ذكر التونسية .. هناك حكاية زقازيقية شيقة فى هذا الخصوص
اذكر ان أخانا وزميلنا / برهان الدين المكى ( بيطرة ) كان عضوا" فعالا فى محراب الآداب
والفنون وكان يقرض الشــعر الفصيح كما كان يكتبه شعراء الجاهلية .. بحور وقوافى واوزان شعرية
وكانت لديه قصيدة جميلة لا يلقيها الا فى جلسات خاااصة ولأقرب الاصدقاء ...
وهى بعنوان ( تونسية ) .. وقد كتبها متغزلا فى مضيفة جوية تونسية .. رمته الظروف للالتقاء
بها فى احدى السفريات الجوية ..
وقد حاولت كثيرا الحصول منه على نسخة مكتوبة منها لانزالها فى نشرات المحراب ..
ولكنه كان يرفض بصلابة شديدة ..!
* هل يا ترى يسعدنا الحظ ونجد نسخة منها لدى ياسر نجيلة او الكوتش او ود جبرين ؟؟
* كما ان السؤال الذى يطرح نفسه .. هل من يدلنا على مكان برهان الآن .. اتمنى ذلك
فقد انقطعت اخباره عنى منذ سنين عديده ، واذكر آخر ما سمعته عنه انه فى ليبيا ..
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد عيد)
|
Quote: وكانت لديه قصيدة جميلة لا يلقيها الا فى جلسات خاااصة ولأقرب الاصدقاء ...
وهى بعنوان ( تونسية ) .. وقد كتبها متغزلا فى مضيفة جوية تونسية .. رمته الظروف للالتقاء
بها فى احدى السفريات الجوية .. هل يا ترى يسعدنا الحظ ونجد نسخة منها |
محمد عيد يا رائع .. باقي القصيدة حيجيبو ليكم الترجي ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: زهير الزناتي)
|
مرحب بثلاثة عشر كوكباً من الزقازيق ..... أي زول ورد أسمه في القائمة السابقة عليه مراجعة إيميله ...ويا جماعة ما تحرجونا مع بكري بس نشوفكم أول ايام وتاني الزوغة الياها ... بكري ده تاني ما بيدينا العضوية دي بأخوي وأخوك .... شدوا حيلكم معانا ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: طارق جبريل)
|
Quote: يا ميسرة ياخي مغرياتكم شكلها ما مشجعة كدة
ما اديتونا تفاصيل |
تفاصيل شنو يا شقى ..؟
يقولوا ليك الحكاية عمرة وزيارة وبركات وايمانيات .. تقول تفاصيل ..!
اكان كايس للنخجى .. غايتو راااقد .. بس نوع .. حى قيوم ..مداحين ساى
والله يا جبريلا احسن ليك تحرك البوصلة بى هنا ساكت ...
يمين الله اكان ما جيت لحقت ليك عمرة وزيارة للحبيب هسه تانى البيخارجك من ناس سيدى ومولاى
ديل شنو ؟؟
انوى يا حبيب وانشاء الله تلقى رموشنا فارشة طريقك من جده الى مكة ومن ثم الى طيبة الطيبة
هاك التلج ده ( الجو مولع نار ) .
* رشا الحبيب ... حمدا لله على السلامة وربنا يزيدك اطمئنانا على صحة الاخت منى
ويواليها بعاجل الشفاء انشاء الله .
* شوش العزيزة .. نورتى الديار ... بس ما ينفع نوع سلام الصباح بالحيطة كده
ادفرى الباب وخشى لا جوه .. البنابر عامرة بالناس ...
* والباقين انشاء الله نتكحل بى شوفتكم بعقاب اليوم ده والا ابو الزوز رافع مهدداته ..
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد عيد)
|
البركة الجات منك يا الجامع
الليلة بقت عليك يا شقي الحال
| Quote: كان كدي ياني المشيت بي مصر |
نفيستك في مصر
روح مصر
عديلة عليك
نوع كلام ناس محمد عيد داك ما بينفع معاك يا أخوي والله شنو ؟
يا سيد الدنيا فيها عمرة
والعمرة دي تمشي مكة
ومكة دي فيها بيت الله الحرام
وبيت الله الحرام ده تشوفو في التلفزيون اسود والناس بيطوفو حوالينو
هسي بيطوفو حوالينو دي اشرحها ليك كيف
شايف جكة نمروز من مرتو
حاجة زيها كده
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: طارق جبريل)
|
| Quote: بيت الله ما ابيناهو لكن الفيكم اتعرفت |
أنت في دا و لا أنا.....
غايتو أنا مجهز لي نبوت بتاع الحرامية داك
و ممسحو بي زيت نعام
ودافنو في الواطة ليهو 15 يوم
الفيكم اتعرفت دي ... ما ينفع معاهاحاجة
عشان كدا تقوم تفتش ليك عن وسائل أخرى مساعدة
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد آدم النور)
|
منو منكم من وردية الليل؟؟؟؟
ومنو منكم ماسك و ردية النهار؟؟؟؟
ما تقولو الزول دا الليلة مالو؟
أنا عايز أفرِّز الكيزان
أقصد الكيمان
الرشيد إنت برا الحساب
و بعدين ربنا يجيبك بالسلامة
وربنا يكرم بتنا الناجحة و النابغة بدوام الصحة و العافية
وتجي بالسلامة
عايز إجابة لتساؤلاتي
لأنو سأحدد بعدها حاجات كتيرة
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد آدم النور)
|
إنت يا جلا الليلة مالك راميك جمل
ولا شارب كوني مورووو،، ولا قدو قدو
يا ود جبريل والله تجينا في بلد الله الحرام دي
إلا نكيفك ونظبطك وعينك ما تشوف إلا كل ما هو جميل
ونعمل إحتفال ما بنعمل حتى للبشير ،،،،،،،،،
وبيت الله ده روحانيات تكون كسبان مرتين ،،،بس أمرق تعال
رشيد القوم ربنا يوفقك في مشوارك ده ،،،،
منتظرين شوش على قناة النيل الأزرق في البوست العام
مبروك الأخ/ أسامة أبتر وبنته ،،، وعقبال الدكتوره للجميع
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: ميسرة سيد أحمد)
|
Quote: إنت يا جلا الليلة مالك راميك جمل
ولا شارب كوني مورووو،، ولا قدو قدو |
أولاً تشكرات يا ريس
و لا عدمناك ياك البتسأل و ياك السائل فينا
بالمناسبة الوالد و الوالدة يسلمو عليكم كتير و الشوق كميات قال ليك
الحمد لله ما راميني جمل
لكن الحاجتين الآخريات ما عرفتهم
خلي جلال يجي يترجمهم لي
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد آدم النور)
|
Quote: ياجلا هدي نفسك الموضوع دا بتحل بدون عكاكيز
انا خايف الجماعة يقولو سيبو دا هراش ساكت |
ود المهدي ..
الموضوع لو بيتحلى طيب الزول دا مؤخرني لغاية هس ليه؟؟؟
داير أسألك أنت معانا و لا مع الخيانة؟؟؟؟
بعدين حركات الزول الطاعم دي يا ود المهدي ما بتنفع معاي خليك عارف أأأ!!!!
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: ميسرة سيد أحمد)
|
الف سلامة للوالده محاسن ونسال الله ان يواليها بعاجل الشفاء ..
*************
Quote: يا محمد عيد والشادي
بيت الله ما ابيناهو لكن الفيكم اتعرفت |
يا حبيب .. وانا مااااالى مغتسنى مع ناس الكفر ووتر ديل ..!؟
انحنا كبيرنا سيجة وسكج بكج ...
وبنقولها ليك تانى .. انت بس أنوى وسترى ما يســرك ..
بعدين انت خايف من شنو ؟ ما قدامك ناس جلا وجمال فارح ..!!
Quote: السؤال الأخير
كم يبلغ طول أطول بنطلون في العالم |
عادى ولا طيحنى ..؟
فتش ايميلك تلقى الاجابة ...!!!!!!
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد عيد)
|
| Quote: فتش ايميلك تلقى الاجابة ...!!!!!! |
ما يها دي زاتها المشكلة!!!!
الغريبة فتشت الإيميل فلقيت الإجابة قبل ما أسأل السؤال
لكن الغايظني ما لقيت الفي مرادي!!!!
النشوف آخرتا
غايتو اترقب إنو حا أشد ليك سلك
زول عليكم الله يا ناس قاعد في بلد الله
مخو يجي الساعة أتناشر؟؟؟؟
دا شنو دا!!!!
ولا أقول ليك
فيك حاجة ناقصة!!!!
ورورورورورورك يا منصور
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد آدم النور)
|
| Quote: أجرت اليوم الحاجة محاسن والدة زينب التجاني عملية عيون بمستشفي مكة بالرياض (الخرطوم) وقد غادرت إلي المنزل ... ألف حمد الله علي السلامة |
الف حمدلله على سلامة الوالدة يازنيب .... وان شاء الله ماتشوفو شر ...
جلا تحياتنا ... بالله ايميل صغيروني من عيد ... يجرسك كده ...
طبعا انت عارفني بنوم ... اقصد حدي ساعات الشغل في الكمبيوتر ...
في البيت ماعندي فرصة ... حجوزات كتيرة ... ومراقبة لصيقة
عشان كده نحنا ناس نهار ساي ... وجمعة وسبت اجازة ... مكرر 514
عشان كده سؤالك وصلني اليوم الصباح ... حسي يعني ... بطل جرسه (هاك الكنومورو والقدوقدو)
هل توجد علاقة بينهم ... اشرح يا .... منو .... خايف اقول ولدنا احمد اسماعيل
الف مراحب ببتنا اشراقة - شوش -
لو جينا السودان ندخل بياتو صالة ..
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: ياسر نجيلة)
|
اللهم صلي على محمد وآل محمد
اللَّهُمَّ إِنِّي أَسْأَلُكَ فَوَاتِحَ الْخَيْرِ وَخَوَاتِمَهُ، وَجَوَامِعَهُ، وَأَوَّلَهُ وَآخِرَهُ، وَظَاهِرَهُ وَبَاطِنَهُ، وَالدَّرَجَاتِ الْعُلَى مِنَ الْجَنَّةِ آمِينَ. اللَّهُمَّ لَكَ أسْلَمْتُ، وَبِكَ آمَنْتُ وَعَلَيْكَ تَوَكَّلْتُ، وَإِلَيْكَ أنَبْتُ، وَبِكَ خَاصَمْتُ، وَإِلَيْكَ حَاكَمْتُ، فَاغْفِرْ لِي مَا قَدَّمْتُ وأَخَّرْتُ، وَأَسْرَرْتُ وَأَعْلَنْتُ. أَنْتَ إلهِي لاَ إِلَهَ إِلاَّ أَنْتَ. اللَّهُمَّ اغْفِرْ لِي جَمِيعَ مَا مَضَى مِنْ ذُنُوبِي، وَاعْصِمْنِي فِيمَا بَقِيَ مِنْ عُمُرِي، وَارْزُقْنِي عَمَلاً زَاكِياً تَرْضَى بِهِ عَنِّي
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: موسي عيسي)
|
بسم الله الرخمن الرحيم
الله أهدنا و اهد بنا
اللهم نسألك رضاك و الجنة
ونعوذ من سخطك و النار
اللهم آمين
طبعاً اليوم دا يوم استثنائي
أولاً هذه المداخلة رقم 1000
طبعاً أي واحد حيقول ما جبت حاجة من عندك
وفي ناس فاتوك
طيب ما بيناتنا
ثانياً يصادف هذه المداخلة يوم الحصول على باسويرد
في ناس يقول ليك حاجة عادية
ثالثاً و الأهم إنو تكون من ضمن إمبراطورية الميم
سكتو مالكم؟؟؟؟؟
عليه تشكرااات
للأخ بكري أبوبكر
و لي حبيبنا زهير الزناتي
و أولى الحلقات هذه الصورة
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: موسي عيسي)
|
الف مبروك لكل اولادنا وبناتنا الممتحنيين والممتحنات
كما جاء في مداخلة نملوز
يا منصور انا من الذين يقولوا ليك كل عام وانت بخير وعمر مديد بدون اي تورية اوحاجات خبيثة كما قصد
صديقك ود الزناتي الفاكر نفسوا لسةفي كيجي تو لكن قريب الناس بتجي تتكلم وتخطب ميار بس
يومداك الذي يراه بعيدا ونراه قريبا اوع تنسانا من الدعوة
هذا وقد هاجمني اخونا نادر واختنارجاء الطيب عندما رايت ابنهم البكراحمد نادر فاروق الياس ربنا يحفظوا ويعلي مراتبه والذي يدرس بالصف الثاني ثانوي
بينما ولدي احمدايضا في الصف الثاني بس اساس اوابتدائ قديم عليهما بانني لو عندي ولد في تانية ثانوي يانى خليتهوه منوبي السامي في تجمعات ناس الزقازيق في قندهار وسمك عوضية ونادي الشرطة وحتى المجاملات يعني بقول ليهو كدي امشي على اعمامك ديل وغيرها واكتفيت انا باللبن البارد والنوم بعد صلاة العشاء كما يفعل اخونا جلا
لكن تقول شنو جاءت كدة
مبروك خاص لبنت ابتر
الف لاباس للحاجة محاسن والدة زينب
وانشاءالله اجر وعافية
تحية للريس ميسرة
ولاخونا حلال
واخونا البادي والذي يغيب عن دعوات قندهار بدعوة انه يسكن مع مراعاة فروق الوقت
لكن انا عارف السبب والداير يعرفو يجينا فب الماسنجر
وين يا ريس معتصم
يا ود جبرين مرحب بيك
ونضم صوتنا لجورج باننا انحنا جاهزين من والي
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: مبارك جادين)
|
صباح الخير،،، يا وجوه الخير
أصبحنا وأصبح الملك لله ،،، وحده
دعاء للوالده محاسن أم زينب التجاني
بسم الله الرحمن الرحيم
يا ودود يا ودود ، ياذا العرش
المجيد ، يا مبدئ يا معيد، يا فعالا لما يريد،
أسألك بنور وجهك الذي ملئ أركان عرشك
وأسألك بقدرتك التي قدرت بها على جميع خلقك
و أسألك برحمتك التي و سعت كل شيء
أن تمن عليها بالشفاء العاجل والكامل
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: مبارك جادين)
|
* التاريخ : 3-5-2009
* المناسبة : مرور عام من مشاركة كوكبة حرف الميم بقيادة الماسترو منصور.
* المكان : سودانيز اولاين .
ياسر نجيلة :
دلفو بقوة الى ساحة البوست ...
تناسو الى غير رجعة الولوج خلسة عبر النفاج ...
وجودهم حتما سيسعدنا ...
مكانكم شاغر بدون استئذان ..
باسثناء اسامة ابتر ... جمعكم البوست وحرف "الميم" ايضا
محمد صديق
محمد عيد
محمد ادم النور - جلا
منصور عبدالرازق
موسي عيسي
تشكر يا زهير الزناتي على مجهوداتك المقدرة دوما ...
موسى عيسي :
بالباب عديل دخلنا وليك يا الزناتي شكرنا و لكل ناس الحـوش دبايوا مطـرنا سـلامـنا
وبي جنب عنقريب الريس ميسرة وود الجيلي حطينا رحالنا وفي نـص سهلة الحوش الـكبير
عرضنا كلامنا جيناكم عديل بعد ما استضافنا العزيز جلال عثمان وانشاء الله يا جلال ربنا
ما يجيب يوم شكرك والتحايا موصولة للجميع وانشاء تامين وما ناقصين .
الرشيد بابكر :
يا منص و الله حبابك الف...
يا راجل انت قبيل ضربت لي بتعافر في الدخول آخد نومه و أجي ألقاك منبرش...أحمد قعد
جمبك ولا شنو...على أي حال جيتن جيت و نورت الحوش و الله...
شايفك العربي و الدين و الحساب ديل نسيت ما تقول الشعيريه الكنت بتعمله لينا في العشاء
يوم يكون العشاء عليك...شعيرتك دي والله ما بنساها يا منصور خصوصا في الشتاء...ياما عانينا
منها...الواحد فينا قبل ما ينوم يكون جاع...الحمد لله حسه لقيناك محضر لينا وجبه دسمه وأظنها
مبشره كمان بوجبات أكثر دسامه...
انت كلام ود جبريل خلاني أظن وان بعض الظن اثم انك كنت بتخليني نايم وبتمشي من وراي رحلات بيطره
الرحله الكنت قاعد فيها وراء دي مشيته بتين يا شقي الحال...وتجي من الرحله تعبان تعشينا
شعيريه..ونسألك كنت وين يا منصور تقول كنت بقرأ مع ناس علوم غذائية...والله عليك حركات.
والله بس قلت أرحب بيك ترحيب يليق بقدرك...بس أسأل أحمد يوريك مكان الزال في الكيبورد .
محمد ادم النور (جلا).
ما قلت ليك ياعبد الدايم أقيف بعيد و أعمل 5 شخيط
ذكر الأخ الفاضل ياسر نجيلة و لقيتو شاطر شديد
و أن هناك 5 شخيط للناس الدخلو البوست وكل أسماءهم تبدأ بالميم
و أنحنا أولاد جيش ذكر الأقدمية مهم
منصور أم محمد عيد و الأثنان مميزان أفيدونابالأقدمية يا جماعة الخير
محمد آدم
محمد صديق
موسى عيسى
مع إنو دفعة لكن الحروف الأبجدية أدتني الحق دا
هناك شخيط سادس جاييكم في السكة
الكمندان أسامة أبتر
معليش يا أسامة نسوي شنو جات كده
عبد الدايم قلت لي عملت 100 شخيط و زحيت
الحمد لله طارق جبريل قال حيضارا
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: مبارك جادين)
|
صباح الهناء والسرور ...
سلامتك يا امنا حاجة محاسن والدنيا كلها كرامتك ...
كفارة يا زينوبا وربنا يحفظ الوالدة من كل الشرور ...
اخونا جلا انشاءالله خير مالك شايل عكازك وصوط العنج والله الموضوع ما بيستاهل كدي باركا ...
ويكون في علمك ولد جيرانكم داك الجاب ليهو 238 الله يشهد انا باركت وهنيته مرات ومرات يعني يا دجانقو افرز ...
اخونا مبارك جادين اهلا بعودتك .. لكن يا ود امي انا ما هبشتك ولا سالتك مالك شايل حالي بالمسنجرات المليانة شمارات .. يا اخواننا دي شبكة شنو دي .. كل يوم بنقول يا لطيف الطف علينا .. انت يا خوي المسلطك علي دا منو .. ما انا قاعد هادي ولطيف وما عملت اي هرجلة زي ناس كدا وبرضو ما عايز تخليني في حالي ..
الحوش دا عنده بوليس حارسه لو كلمتو ليك حيبهدلك .. لكن المرة دي مشيناها ليك .. لكن وحات شيخ جلا تاني تهبشني الا اكلم ليك البوليس .. غايتو جنس صلبطة ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: البادي النور)
|
بالله نحن تمينا سنة !!!!!
عمر الزهور والله , عمر الغرام , وكمان عمر الهنا
ما باقى لينا الا نقول
نتمنى يوم تجمعنا , جنات حبنا , تبقى الأميرة , والبيطيع قلبى انا
هسى يا ربى دى مشاركتى الكم
ما عارف والله , هو انتو بتعرفوها كيف , هى بتلقوها مكتوبة جنب اسمكم !
غايتو انا يتخيل لى اكثر من جلا , واكثر من موسى عيسى , واكيد اكثر من (مسامة ابتر )
مسامة ابتر دى ولا فيها خطأ املائى ولا حاجة
مش هو اصلو ما قاعد يمر علينا كتير , طيب لزوم التدقيق فى اسمه شنو
نكتبوا اسامة نكتبوا مسامة فهو اسم زول غايب (العب بيهو زى ما داير )
لكن غيابه ما يمنع انه بوليص وممكن (يخجك خج )
عشان كده الزول يتضاير زيحترم نفسه ويقول ليهو مبروك لى بنيتك النجاح
وانت كمان مبروك ليك , مرة قالوا لينا الماجستير وتانى رجعوا قالوا لينا الدكتوراة
انت نقى زى ما داير وخت جنبها مبروك
كل سنة وانا طيب يا شباب
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: منصور عبد الرازق)
|
شفتوا , ما قلت ليكم اكثر من جلا , واكثر من موسى عيسى
لقيتا ليكم الف وتمنتاشر مداخلة
هسى عليكم الله ما احتفلتوا بى الفيتى مالكم
محمد عيد بتذكر زمااااان مرة جاب طارى الألفية دى واحتفل بيها التكنوا
باعتبار ان المشاركات سرعة مشى وتحرك
انا وجلا اتضح انو سرعتنا الف مداخلة فى السنة
يعنى بواقع 2.73 مداخلة فى اليوم
الزول بطريقتوه دى , خائف يراجع ملفه فى المرور , يلقاهم مليان مخالفات
معناتها تأشيرتنا بتاعت الخروج والعودة , ما اتجهجهت
محمد عيد مثلا , سرعته فاتت التلاتة مداخلات فى اليوم
لمن (كتل ليهو ) وليد صغير فى الملاهى بتاعتم
الحمد لله , الرشيد بابكر , شغال ليهو فى خلا , لا فيهو شفع ولا تقاطعات
والا كان بى سرعته ديك , كتلنا كولنا
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: الرشيد بابكر)
|
تحيات من على البعد يا الرشيد
و طمنا على صحة الأمورة
لغاية ما محمد عيد يجي
المداخلة دي بتاعت منصور
| Quote: والله دخوا البيوت من ابوابها اتارى طعمه تانى , طعمه مختلف . زى العشاء بتاع الميز زمان لمن كل يوم يكون (حساب عربى دين )على قولة اخونا ربنا يطراهو بالخير (محمد المرتضى عبد العزيز ) , الحساب طبعا ياهو اخونا الفول المعلب . العربى لايتعدى ان يكون على نفس المنوال والوزن حبيبنا البيض (وده ياهو السبب الأساسى فى حمل بعضنا من الزملاء لقب (بيض بجدارة ) كناية عن المساخة والتكرار وكترة الطلة , اما (الدين ) فلأنه الحصة الثالثة وممكن تكون يوم فى ويومين مافى فهو بلاشك صاحبنا الزبادى اللى لو قدرنا طعمناه بحلاوة طحنية فيا سعدنا ويا هنانا باليوم المختلف |
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد آدم النور)
|
إعتذارات منصور
| Quote: (ملاحظة مهمة يا جماعة , حرف الزاى لايعمل فى كمبيوترى ولعله عيب خلقى و لزا اضطر دائما لتحويله الى زين دون ان احمل عب التصحيح لثقتى فى فطنتكم دون ان اكون واثقا نفس الثقة فى لغتى العربية الودتنى زراعة ) |
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: الرشيد بابكر)
|
زوبة حمد الله على سلامة ماما محاسن
ربنا يواليها بالعافية , ويحفظها ليكم من كل مكروه
هسى يا الرسيد مش يفترض انك فى اجازة
وفى الأردن كمان , والأردن دى فرقها من ابوظبى ساعتين بالناقص
يعنى يا دوب الساعة عندكم تسعة ما لحقت
المصحيك زى الوكت ده شنو يا شقى الحال
مبارك جادين , جنس شوق جنس شوق جنس شوق
ومال لو شفتوا احمد ولدى الفى اولى ثانوى تقولوا شنو
دايرين نعرس ليهو الأجازة الجاية ونخلص من الموضوع ده , بس قولوا لينا رأيكم شنو
وبعدين انت البادى النور ده ما تفتوا لينا فى البوست العام ده
اقول ليك , انت بس رسله لى فى الخاص
وانا بتحمل عواقب النشر
سلم لى على نادر فاروق ورجاء , وقول ليهم مسجدكم بارد برد
والعجب السفن اب
ونومة زهير ومحمد المرتضى فى سرير الصالون الجوة
انتو انا سفنجتكم المشيت بيها الصلاة ديك
رجعتها ليكم ولا شالها محمد صديق ؟؟؟؟؟
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: منصور عبد الرازق)
|
البادي يرحب
Quote: صباح الخير على وجوه الخير...
نرحب يالناس الحلوين وبي طلتهم البهية ، وسلام مربع يا جدعان لي إمبراطورية (ميم) الذي دخل منهم واللي في طريقه إلى باب الحوش ، أنتم إضافة حقيقية لهذا المنبر الإسفيري ، متاوقاتكم بالنفاجات المشرعة كانت لطيفة وحلوة ، يلا شدو أوتار التواصل وأضربو على الكيبورد بذالها وزالها حتى نستمتع معا بحديث الذكريات ولو كانت عن فترات أجدادنا القدماء وإكتشافهم للنار (الغاز)...
|
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد عيد)
|
اول من تداخل من قوات الغزو ..
كان العقيد مظلات / محمد آدم النور الشهير فى مناطق شعيرية وكبكابية بـ جلا
Quote: شكراً زميلي زهير
و يا جماعة الخير password يجي الساعة الثانية صباحاً
ده معناهو أقيفوا بعيد و أعملو 5 شخيط
بعد ده أقفلو نفاجاتكم وشبابيكم
آن لأبو حذيفة أن يمد رجليه |
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد عيد)
|
| Quote: ومعذرة يا جلا .. صعوبات تقنية يبدو انها بفعل فاعل ..!! |
أنا قلت كدا!!!
البركة في استجابة موسى ومنصور السريعة
لكن عليك الله زول زي منصور دا
يذكروهو عيد ميلادو
و يذكروهو سنوية دخولو سودانيزاونلاين
ويذكروهو إنو ولدو اسمو أحمد
مش عليك الله حقو يقرو ليهو الحمدو سبعة مرات في راسو الكبير دا!!!
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد آدم النور)
|
صباح الهناء والسرور ... (كلاكيت تاني مرة)...
تحياتنا لرشيد القوم ربنا يردك سالم وغانم وربنا يشفي اختنا ويشفي جميع مرضى المسلمين ...
اليوم دا الله يعديه على خير ... يا منصور في شنو يا ود امي .. دايرين تتاجرو بي شماراتنا ونظام عمولات كمان .. يا جماعة السترة سمحة (وان كان انا ذاتي ما فاهم الموضوع) لكن للضمان كدا خلو الطبق مستور ...
وا بوليساه .. وا بوليساه .. اين انت يا بوليس الحوش .. انا خايف جنابو محمد صديق ذاته يشترك في المؤامرة ويبيعني ...
وا شيخاه (جلا) .. وا شيخاه (جلا) .. تلحقنا وتفزعنا ومن الشمارات تسلمنا.. ومن المؤامرات والدسائس تسلمنا ...
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: البادي النور)
|
ثم منصور ( بشير عباس )
| Quote: المهم ياجماعة زهير الزناتى بى توقيت باسويرداته الوزعها علينا دى , بقى لى زى اخونا صلاح عبد المجيد نصر لمن كان يملأ ليك دار الأتحاد لمن تقول بس , شىء عدس وشىء سكر قبل مواعيد الجمعية العمومية بى يوم يومين , فلتعلم يا بكرى ابو بكر ان عدس صلاح وسكره تحول الآن الى باسورد بكرى ابوبكر والغريب ان طعمهما واحد (فهو سكر فى الحالتين ) ونحن نقبل كلاهما بكل حب وامتنان ونعلن ان صوتنا لزهير الزناتى اليوم فى حدائق الشهداء ولو كان ثمنه باسورد بالطعم البيجنن ده |
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد عيد)
|
ثم أتى العمدة .. موسى عيسى
Quote: بالباب عديل دخلنا وليك يا الزناتي شكرنا و لكل ناس الحـوش دبايوا مطـرنا سـلامـنا
وبي جنب عنقريب الريس ميسرة وود الجيلي حطينا رحالنا وفي نـص سهلة الحوش الـكبير
عرضنا كلامنا جيناكم عديل بعد ما استضافنا العزيز جلال عثمان وانشاء الله يا جلال ربنا
ما يجيب يوم شكرك والتحايا موصولة للجميع وانشاء تامين وما ناقصين |
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد عيد)
|
ثم .. العبد لله
Quote: صباح الصباح والجااااى انشاء الله احلى من الراااح
وأصلوا ما الطلاّّت خشوم بيوت ..
لكن الطله من قدام عتبة البيت .. طعمها غير ..! وشكلها غير ..!
فاصل التشكرات :
اولا الشكر اجزله لكل ناس الحوش الذين أغدقوا علينا بالامس وتفننوا
فى نثر درر الترحاب ، وانشاء الله جيرة ونسب !!
العرفان يمتد للاخ الفاضل زهير لمجهوداته العظيمة فى وصول العضوية
متزامنة مع يوم تاريخى بانعقاد الجمعية .
ايضا لا انسى كل الشبابيك والنفاجات التى كانت لنا قبل التابعية
تأشيرة الزيارة المعتبره ذات الخمس نجوم واخص بالتحية الاعزاء .. عصام دهب
وعثمان الجيلى والريس ميسرة وعبد الدائم وزهير والعزيز جلال .
اما رشيد الحبيب .. فألف شكر على التحية المميزة .. وللحديث بقية |
| |
|
|
|
|
|
|
|
|
|
Re: ناس الزقازيق ... أجدع ناس ( 3 ) .. (Re: محمد عيد)
|
حمد الله بسلامة الوالدة يا زوبة
وكفارة وربنا يديها الصحة والعافية
،،،،،،
امبراطورية ميم بالله تميتو سنة
شــن جـده تحت المخدة
ما ياهو الحال فى حالو كل يوم تلفونات بالتقيل وايميلات
نزلى لى ده ورينى ده وخت لى ده
وكمان جابت ليها تحميل اغانى فى I POD
غايتو نجضتونا نجاض السنة الفاتت دى بمداخلاتكم ( السمحة ) الفاتت حد الــ 1000
عموما نقدر نقول حسن جيد
واخير من الدفعة البعدكم ...... كااااااك
| |
|
|
|
|
|
|
| |
موسي عيسي
عمر نملة
طارق جبريل
كمال الشادي
زهير الزناتي
معتصم جعفر
زينب التجاني
محمد عيد
الرشيد بابكر
محمد آدم النور
عبد الدائم سيد أحمد
ياسر نجيلة
عمر المهدى
أحمد إسماعيل
محمد صديق
جلال عثمان
منصور عبد الرازق
ميسرة سيد أحمد
فيس بوك
تويتر
انستقرام
يوتيوب
بنتيريست