|
|
 هزلول المذهول ... قائد الاسطول "يوميات عائد من الاجازة"
|
كم تمنيت ان يكون لي ملكة صديقي وشيخي منصور في تطويع الكلم حتى يخرج هذا السفر بالكيفية التي اريدها له، ولكن وحيث أن عزائي هنا في ان "عزيزي" القارئ هم أهلي وعشيرتي واصحابي المتمم كيفي ود المك درقتي وسيفي، فإنئ اركن الا ان ذلك سوف يغفر لي الكثير من الهنات ويقيني أن "عزيزي القارئ" سوف يجد لي من الاعذار ماتتقاصر عنه رحلتي التي امتدت من:
الرياض جدة / جدة سواكن / سواكن سنكات / سنكات الدامر / الدامر شندي / شندي الخرطوم/ دا الذهاب بس "عشان تأمنواااا"
وبدون مبالغة كان ذلك هو خط سيري ورغم المعاناة الا ان هذه الرحلة لا يبزها امتاعا فيما سواها الا تلك التي كنا نقوم بها ايام الصبا الاول ارتحالا الي شمال الوادي ذهابا او عودة للدرة النفيسة التى لم يخبو بريقها الى الآن وسبب وجودنا كلنا هاهنا.
كانت بكل المقاييس رحلة اشواق واشتياق فبعد "اربعة سنوات غربة كاملة الدسم" قررنا و "بت الشيخ" ان نقضي اجازة هذا العام بالسودان وحيث ان صديقنا الكمندان "محمد حامد" قد تم نقله الي سنكات فقد تودد الينا ان نحضر الى السودان بالبحر عن طريق ميناء سواكن حتي نقضي بعض ايامنا معه وقد كان ... وحفظا للترتيب "الم اقل لكم انني لست منصورا" سوف نترك امر سنكات هذه جانباً ونبدأ من أول الرحلة التي سوف تكون ممتعة بجد
ابقو قراب ...
|
|
 
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: الرشيد بابكر)
|
دربني زمااااااااان في أهلي سنار الكوتش محمد جلودي "من ناس مدني" واذكر جيدا انه قال لي مرة حين احرزت هدفا "الليلة بتنوم بي كدارتك"
اها انقروا الليلة ما بنوم بي "كيبوردي" شيخي وشيخ شيخي اول المتداخلين ياله من شرف عظيم
دخلنا في الاستعداد للإجازة مبكرا ووعقدنا العزم على رحلة السيارة وبدأت المشاورات في ان سيارتنا اللانكروزر قديمة وجقروتة ولابد ان ندخل النادي الملكي لاصحاب البرادو وفعلا بدينا اول الخطوات في اغتناء واحدة "فخمة" تكون عونا لنا لزوم "الجخ" بتاع السودان ولكن جزا الله خير اخونا المتابع المستمتع موسى عيسى الذي اقترح بأن نتوكل على الحي القيوم ونسافر بالجقروتة لانها مفخرة الارض علي كل الطرق وان هذا الموديل الياباني العملوا مات وماجاء واحد تاني بعده...
المهم اود هنا ان اسجل انطباعي بأن مايدور في خلد كثير من الاخوة "المغتربين" تجاه امر الاجازة وتجهيزاتها ماهو الا محض خيال ويندرج في خانة تحميل النفس لزوم ما لا يلزم وهذا عن تجربة والله خاتمتها كانت ان كل من قدمت له هدية "لوي" بوزه متبرما من "ماعندكم زوق ياخ" وحدهم هم الذين "عصرت" لهم الكاش الذين اخترقت دعواتهم بطول العمر اذني. وآمنت تماما بان الكاش بيقلل النقاش.
حانت ساعة الرحيل وعند صلاة الفجر تماما ودعنا الرياض وكأني بها حزنت لفراقنا فلم تشرق شمسها ابدا الابعد ان اصبحنا على مشارف المزاحمية على بعد 40 كلم غرب الرياض في طريقنا الى جدة .
وحيث ان جدة غير فلا بد من إفراد مداخلة خاص بجدة وناس جدة واحب جدة ياخ ...
وناس جدة بتحبوا...
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: جلال عثمان)
|
كان الريس ميسرة اول المتصلين في ذلك الصباح الجميل "وجقروتتنا" تمخر عباب طريق الرياض الطائف ذو ال900 كلم تقريباً وحيث اننا واجهنا اول المشاكل فلم نشاء ان نقلق الريس واخبرناه بأننا نسير تمام التمام وقريبا نكون بطرفهم الا ان الحال غير ذلك ...
حيث بدأت المشاكل بتعطل جهاز التكييف بالسيارة وقلنا ما مشكلة فتحة السقف سوف تقلل حجم المشكلة ولكن بعد ذلك بقليل اهتزت السيارة من جنبها الايمن لثواني وطاااااخ الكفر "اللستك" الامامي اليمين يحدث فرقعة عالية ... كانت تجربتي الاولي طوال فترة قيادتي للسيارات ان يضرب لي كفر وكمان قدام ... لكن ربك رب الخير وبفضله ورعايته استطعت ان اسيطر علي السيارة ساعدني في ذلك خلو الطريق تماما من السيارات المحازية على اليمين او اليسار .... وغيرنا الكفر ولذلك قصة اختصرها لكم في ان ابن حلال سوداني "وكيف يكون الحال لو ما كنت سوداني وأهل الحارة ما أهلي" سائق شاحنة اوقفها خلفي تماما وحلف الا امد يدي علي شيئ وقام بكل ذلك العمل تدفعه فقط سودانية موغلة في السودانية ... شكرا الاخ جمال "من اولاد الحصاحيصا" تسبب ذلك الامر في ان نتوقف بمدينة الطائف لمدة 4 ساعات او تزيد وغيرنا 4 كفرات جديدة "دنلوب" ماسترترك" وظبطنا المكيف ووصلنا السيل الكبير واحرمنا للعمرة وعمرنا .... وخلينا الريس وناس جدة يضربوا اخماس في اسداس
...
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: جلال عثمان)
|
Quote: ابو الجل يا طاعم
خليت الناس كلها فاتحا خشوما وراجياك
أهم حاجة في صور والله لا
|
التقيل جاي وراء ياكيمو
واخانا الذي بكازا دا بخلى ليك يبكي بي دموعوا
حندكة شديدة ياخ .... والله هو نان جنس دفيق وجنس حسوة
وجنس ونسات فوق رمال القوز وحرزا هناك كان مركوز
...
الشادي كان في كلمة غلبتك اضرب للمسنوح دا في المغرب بوريك ليها
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: جلال عثمان)
|
Quote: تعرف برغم من طول المسافة وعقباتها الكتيرة لكن أنا متأكد إنك إستمتعت جدا
|
والله ياسمسم فعلا رغم طول المسافة الا انها رحلة ممتعة والحمد لله كانت آمنة ولم يحدث لنا ما حدث لسائق الشاحنة المسطول:
قال ليك سواق ترلة مسطول "تماااام" نازل من الحتة بتاعت العقبة ديك ...
اها قامت المقطورة اتفكت وجات ماشة ليك جنبو فوووو...
زولك قال "الكتلة والله الحبش ديل بجرو جري"
....
سمسم دي المرة الكم حكيتا ليك غايتو ما وصلت 513 بتاعت ابو الزوز
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: جلال عثمان)
|
إعتمرنا والحمد لله ... وللوقوف الخاطي تم سحب جقروتتنا بواسطة شرطة المرور مما ادي الى تأخرناعن مواعيدنا مع الريس الذي ما فتئت مكالماته التلفونية تتابع رحلتنا وقد اصبحنا على مرمي حجر منه ... وعند الثالثة صباحا وجدة تستعد لاستقبال صباح جديد وضئ يمحي عنها خطايا ليل صاخب ...
كانت الاسرة المالكة جميعها في استقبالناعند مدخل منزلهم العامر بجدة ... وهنا تعجز الكلمات تماما عن التعبير عن هؤلا الاحباب ... ولكن وحيث اجدني دائما اهاب مثل هذه المواقف كان الريس ومنى هم ميسرة ومني منذ اخر لقاء لي بهم منذ سنين عددا ... تلك الابتسامة الودودة الصادقة ... والمحنة التي لو قسمت بين اهل الكون جميعا لكفتهم ... وياله من استقبال ... ودلفنا الى تلك الجنة التى احاطها ميسرة بكل رعايته وحبه وحنانه وجملتها مني بكل رعايتها وترتيبها ... لكم الله احبتي ولا اقول الا كما تقول والدتي ان شاء الله يوم شكركم مايجي
وبعد السلام والتحيات والونسات .... هاك يانومة ...
ولا يفوتني هنا ان اشكر اخي عنتر ... اللى هو اخو الريس علي كل مابزله وقام به من اجلنا وتلك الخبرات التى لو ماهو لواجهتنا الكثير من المتاعب فشكرا جزيلا اخي الكريم ونتمني ان نلتقي دائما في ساعة خير ....
اصبحناوتواترت المكالمات والنضيف الذي وعد فاصدق وتلك التسجيلات النادرة "نفسي اعرف مخبي الحاجات دي وين" صالح الضي وسيد خليفة وعبدالدافع والتاج والموصلي والفلاتية والبلابل وكان النظيف سبباً في امتاع الكثيرين في ذلك البحر المحيط حيث استمعوا لهذه التسجيلات من خلال "لاب توبي" ولتلك قصة سنرويها حينها ...
اجمل امسياتي بجدة كان هذا المساء حيث اجتمعنا والحبايب حولينا ...
كل الحبايب ...
الريس / النضيف / جمال السنوسي / عثمان الجيلي / احمد سيد عبدالعال / عمر المهدي / هالة ايوب وبعلها علي "وانعل ابو الذاكرة البقت صفاية" الحقنا بالله ياريس بالصور عشان نرجع شريط تلك الامسية الجميلة الرائعة .... لا انسى هنا الاسر والزهور الحلوين الذين اضفوا على المكان صخبا جميلا ... وتسامرنا وعدنا بالذكريات لتلك الازمان والعوالم والشخوص وكانت سهرة من الف ليلة وليلة ...
وافترقنا على وعد اللقاء ...
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: عمر المهدى)
|
جله حبيبنا ...
قالو الواضح ما فاضح ...
انا لابتابعك ولا حادخل بعد اليوم ...
بس عندي وصية ... والوصية امانه ...
اول ماتخلص ... باذن الله
اعمل لي مس كول ...
لأنو زمان تابعت واحد صاحبنا في المغرب في قصة الصبي البناي ...
وورطنا في نص القصة ...
وجاب لينا ضغط ... وسكري ... وشلل أطفال...
وكمان خايف صورك تبقي زي صور نادي الشرطة ...
ودي جابت لينا ... هرشه من بت الشيخ ...
اها ياخوي الصحة الباقية ما بتتحمل ... جلطات اضافية ....
والهرشي مع بت الشيخ كملناهو ....
اصلو العمر مابعزأأه ... مثل كوري ....
عليك الله ما مشيت جهة سنار ... وسنجة .... دي ايام الخضرة والهمبريب الأصلي ...
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: زينب التجاني)
|
أهلاً بالطاعم وهزلول المذهول ،،، قائد الإسطول
حمد لله على السلامة ورحلتك المكوكية من وإلى السودان
يبدو أنها كانت ممتعة ،،، ربنا يوفقك في كل ترحالك
كنا منتظرينكم على أحر من الجمر ونحسب الأيام ولكن فوجئنا
بمقدمكم الميمون إلى مدينة الرياض ،،، معليش خيره في غيره
بعض الصور التي عرضت في البوست لعلها تذكرك بأيام جده غير
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: ميسرة سيد أحمد)
|
شنو يا طاعم
| Quote: الشادي كان في كلمة غلبتك اضرب للمسنوح دا في المغرب بوريك ليها |
إنت قايلني شايقي من الحبشة والله شنو
أنا يمين من شوايقة لندن ( دي بتعرفها )
وبعدين لمن تغلبني حاجة توديني للمسنوح داك
مالك علي يا أخي
كمل عليك الله
وقرض على الحتات البتبكيهو عليك الله
باقي الزول قبل شهرين تلاتة كده
بكي البورد كلو
وشبكنا ليك
حموني الاجازة
حموني الاجازة
حموني الاجازة
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: جلال عثمان)
|
الشكر الجزيل لكل من مر مشجعاً ومؤازرا ...
خصوصا انو "الجابتر" الجاي دا يتطلب المؤازرة ... قالك ايه ...
تشبعنا معنويا بلقياء الاحباب بجدة وجزي الله الريس والسيدة الاولى كل خير فقد اخجلوا تواضعنا في الاستعداد لرحلة البحر وما يليها. فلم يقصروا في شيئ "بل نحن المقصرون" المهم ... توجهنا نحو تسليم السيارة للشركة الشاحنة وعدنا لاصطحاب العيال لامتطاء تلك الخردة المسمي "اعتباطا" عبارة ... وقليل من الاهتمام ياتوكيلات باعبود لن يضيركم فهي بواخر ركاب وليست كونتير شحن ... وزاد كل ذلك السوء سوءا الإجراءات الطويلة ورحلة الزحف نحو الدخول للباخرة حيث امتدت من بعد الظهر لحين تحرك العبارة عند العاشرة ليلاً ...
من المشاهد الجميلة التي لن تنمحي من الذاكرة منظر ميناء جدة الاسلامي والباخرة تمخر عباب "الاحمر المهتاج" دي على وزن الاحمر الوهاج عشان خاطر محمد عيد الذي تأسفت كثيرا لعدم ملاقاتي له بجدة وكم كنا نمنى النفس بملاقاة هذا "الشاب" الرائع رغم مريخيته.
نعود لمنظر تلك الاضواء التى تخفت رويدا رويدا كلما ابتعد منها جبل الحديد ذلك . لا ادري ولكن دار بخلدي هنا ان كل اول ليهو آخر تلك الكلمات التى كثيرا ما ترددها الوالدة حفظها الله وفعلا بعد كل تلك الاضواء "والبهرجة" غابت عنا اضواء الميناء واحتوانا ليل بهيم.
لم استطع النوم في ذلك القفص المسمي غرفة اعتباطا لسببين غير ضيق المكان ... كان محمد ابني يكثر من الصياح "والنطيط" ولم استطيع ووالدته السيطرة عليه ربما كان فرحا بما هو فيه ... والسبب الثاني تمرجح الباخرة يمنة ويسري وانا لم اعتاد النوم كالطفل في ارجوحته لذلك توكلت على الحي القيوم وخرجت ابتغي اعلى نقطة في جبل الحديد هذا وسميري "اللاب توب" وسيديهات اتحفني بها الظريف النضيف ابوعناب .. كانت تسجيلات قديمة ونادرة لمجموعة من كبار مطربينا وحقيقة ذهلت تماما حيث اكتشفت ان هذا النظيف قد اهداني كنزا ... ووجدت العزر لمنصور ان "قداكم بالابود" حيث من المؤكد انه يحتوي هذه الدرر.
تصادف ان كان بقربي في ذلك الجو الجميل رغم تلك الرطوبة الخانقة، ثلاث شباب "اولاد مغتربين" ورغم صغر سنهم الا انهم بدرجة عالية من الوعي جعلتني اشكر اسرهم على حسن تربيتهم ... اكثر ما اعجبني فيهم ارتباطهم الوثيق بوطنهم بل قل وطنيتهم التى جعلتهم على قدر كاف بالالمام بقضايا الوطن ... حدثوني في السياسة فذهلت لمواكبتهم وفي الاقتصاد والرياضة وكل مناحي الحياة ... واخيرا استلموا اللاب توب وسيديهات النضيف ... ياسلام عليهم شباب زي الورد ياخ ... استمعنا وسهرنا حتى مطلع الفجر ...
وودعتهم ومشيت نمت ...
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: جلال عثمان)
|
| Quote: من المشاهد الجميلة التي لن تنمحي من الذاكرة منظر ميناء جدة الاسلامي والباخرة تمخر عباب "الاحمر المهتاج" دي على وزن الاحمر الوهاج عشان خاطر محمد عيد الذي تأسفت كثيرا لعدم ملاقاتي له بجدة وكم كنا نمنى النفس بملاقاة هذا "الشاب" الرائع رغم مريخيته. |
ابو الجل الحبيب ...
ياخى والله انا الزعلان جدا لعدم ملاقاتك بجده ... والله يسامح اكل العيش
الخلانى اكون على بعد 180 كلم متر من ملاقاتك ... هناك على جبال الطائف ..
مع المجانين والقرود ..!
لكن انشاء الله يكون لنا لقاء قريب نستمتع فيه بصحبتك الحبيبة ..
**********
خاولت اليوم فى عجالة متابعة اطباعاتك عن زيارة الوطن الشقيق قبل الفرتقة
وما شاء الله الســرد جميل جدا ويستحق ان يصنف فى زاوية ادب الرحلات ...
سأحاول باذن الله التداخل فى بعض الملاحظات التى دونتها عن انطباعات رحلتك ...
حفظك الله .. وتحياتى للاسره
| |
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: عفاف علي ميرغني)
|
وحيث سهل الله لنا من امرنا "نفيفيج" ندلف به الى هنا ...
يتوجب ان نعيد شحذ الذاكرة بذكري عوالم قد طال شوقنا اليها...
وقد كانت تلك الرحلة يا احباب مقصود ان تتم بالكيفية التى تمت بها
ليس حباً في عناء وتكليف النفس بما لا تطيق ... ولكن حبا ولهفة للقياء من ظل حبهم يؤرق النفس
وقبل ان نستكمل ... وخصوصا ان القادم به من المعاناة الكثير ...
شكري لكل الاحباب الذين مروا من هنا مشجعين ومؤازرين
فاصل ونواصل ....
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: جلال عثمان)
|
غايتو من الله خلقني
ما شفت لي يوميات زي دي
اليوميات بتاعتو من جدة ووقفت و يادوبك خاشي على السودان
و زولكم رجع السعودية
و أنا أعيط
و الكفيل جدد ليهو الإقامة
و أنا أعيط
و المدارس فتحت
و أنا أعيط
و العيال عايزين يمشو المووول نظام يوم الخميس و كدا
و أنا أعيط
و عيد الأضحى فاضل ليهو يومين
و أنا أعيط
إنتو قايلين أنا بعيط ليه؟؟؟؟؟؟
لا بالله ...قايلني فارة....شوووف البوريك
قال يوميات قااااال
أقول ليك حاجة غير العنوان
يمكن تلقى ليك حاجة تكتبها
زمان قالو لينا
لا تؤجل عمل اليوم إلى الغد
و خلاص
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: محمد آدم النور)
|
انت لو من زمان "عيطت" لينا عياطك ده كان اجلنا عمل اليوم للغد
ولا بس فصاحة منك ... لا وشنو قال ليك غير العنوان
انت قايلني فارة ولا شنو امال نجر رجلكم هنا كيف ما لازم "نتجرجر" كدة عشان الشوق يكتلكم ياخ
والشوق غلاب ياخ ...
اها ان شاء الله بعد دة تورينا بتعيط مالك ...
عليك الله ما تغيب من هنا ... يعني نقعد نحنس فيكم ولا شنو ...
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: جلال عثمان)
|
اشرقت شمس وجدنا ونحن نرنو لمعانقة الوطن العزيز بعد غيبة امتدت سنينا عددا، وتجاوزت الساعة العاشرة بقليل عندما نهضت من "كومتي" داخل تلك الزنزانة المكيفة ... صحوت على جلبة العيال وهم يتقافزون بأن يابابا قوم خلاص وصلنا السودان ... ولا يخفى عليكم ان نصفهم لم يرئ السودان ...
المهم ... حزمنا امتعتنا استعدادا لمغادرة تلك الباخرة وحمدنا الله كثيرا ان رحلة معاناتنا مع "سجم الرماد" تلك سوف تنتهي قريبا ولم نعلم بأن القدر يخبي لنا الكثير غير ذلك ...
بدأ الركاب في الاصطفاف خارج كبائنهم في تلك الممرات الضيقة استعدادا لمعاناة النزول عبر تلك الخنادق الى خارج الباخرة ... لم ادري لماذا تذكرت في الموقف هذا تلك الافلام القديمة التى تصور الحرب العالمية الثانية ومنظر جنود الحلفاء وهم يختبئون ابان الغارات الهتلرية ... ربما نفس المعاناة
خرجنا والحمد لله الى رصيف ميناء سواكن وكانت تلك هي اول لفحة لشمس الوطن العزيز وكم كنت في اشتياق لها "لتخرت" عن مفاصلي رطوبة ذلك البحر العظيم ...
واستقبلتنا وجوه اهلنا الطيبين رغم مايعلوا تلك السحنات من نظرة حالكة لا تشعر معها بالود مطلقاً الا انها وفي جميع الاحوال اكثر ودا من وجوه كثيرة تعودنا عل رؤيتها صباح مساء.
وسواكن وما ادراك ما سواكن ...
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: جلال عثمان)
|
| Quote: اشخت لي حنان الضحية ذاتووو |
ما تقول أنا ماشي كسلا
ولا أقول ليك
أشخط لي كسلا و الضحية زاتو
| Quote: والله حاجة غريبة ياخ ... ما جاك خبر هنا بي كم؟ |
1200 ريال سعودي بدون عقااال
بي عقااال إحتمااال يكون 1500 ريال
| Quote: عشان نقوم نلحق الحج ... |
و الله أنا حنيت ....لكن مسافتي بعيدة
غايتو بختك إنت القريب ممكن تلحق
حا أقوم أفترع بوست دي من فرع
يوميات زول ماشي لي كسلا عشان يشوف خروووف الضحية و صل كم و يجي راجع
| |
|
|
|
|
|
|
|
|
|
Re: هزلول المذهول ... قائد الاسطول "يوميات عائد من الاجازة" (Re: أبوبكر حامد الأمين)
|
حمدا لله على السلامة يابكور ...
والجيب واحد والله "قصدي البوست" حيث انك عائد من الاجازة معناتو السكر والضغط بس
هم مايتوفر عندك مرحليا....
بالله شفت السودان دا "سمح" كيف؟
غايتو نحن احسن من "مغتربين كتار" قريبين عهد بالسودان لما كان مليون ميل مربع
غايتو في ناس كدة لما يمشو بلقوه بقى مية بس ... الله يستر
كل سنة وانت طيب وراجيك تحكي هنا عن رحلتك وكيف لقيت السودان
| |
|
|
|
|
|
|
| |
جلال عثمان
منصور عبد الرازق
الرشيد بابكر
عبد الدائم سيد أحمد
طارق جبريل
كمال الشادي
سامي عبد الوهاب إدريس
عمر المهدى
ياسر نجيلة
زينب التجاني
ميسرة سيد أحمد
حيدر حسن ميرغني
أحمد إسماعيل
محمد عيد
عفاف علي ميرغني
محمد آدم النور
أبوبكر حامد الأمين
محمد صديق
فيس بوك
تويتر
انستقرام
يوتيوب
بنتيريست