|
|
 Re: ناس الزقازيق ... أجدع ناس .. (Re: منصور عبد الرازق)
|
وزعتووووو
وزعت منو ؟؟ الكفيل طبعا
فعلا الزقازيق احساس داخلى جميل , ما عنده اى علاقة بى المكان , ولاحتى الزمان
الزقازيق حالة شعورية , حالة ان تفط وجبة الفطور وتلحق بباقى الحلة فى وجبة الغداء
وتنتشر فى وجبة العشاء حتى اذا ما صادفت من نوع الشقق التى يستضيفك فيها اصحابها
ويأمرون الشغالة بأن تخت العشاء , فقد وصلت تب وحرى بك ان (تضع اواعيك جانبا وتستلقى
وتعسكر عندهم حتى انقضاء امد الشيك انتظارا للشيك الذى يليه) , الزقازيف احساس ان تبدأ يومك
بفتح الدولاب الأصلا ما بيتقفل , فتفاجأ بأن قميصك الكويتو امبارح , لبسو الرشيد ولا رفعت
واستغل حالة كون ان محاضرته ولا سكشنه قبل محاضرتك ولا سكشنك , فيكون الحل فى انك تتوكل على الله الخلقك وتكوى قميص الرشيد بعد ما تجيبه من البلكونة وتقشر بيهو فى الكلية زى الماحصل حاجة ,
, الزقازيق هى حالة الذهول التى تصيبك وانت داخل بقالة ابو عماد فى شارع القومية
فتعرف انو فى حاجةخلقها ربنا اسمها لانشن , وحاجة تانية اسمها مارتدلا, وثالثة اسمها بسكويت بمبو وايسكريم
ما عارف شنو , فتتفرج فيهم لمن اعصابك تبوظ وتعرف تمام العرفة انهم من المحرمات بعد يوم
خمستاشر فى الشهر , وتمشى دربك عديل تأخد ليك ستة بيضات وتلاتة علب زبادى ورغيف جنز حاااااار
من الفرن البلدى , هذه الأشياء عندما احكيها لى ناس احمد وايثار ومجتبى (اولادى الكبار) , فأن امهم تبادر
للقول(اولادى يبروا ويستبروا من القراية الزى دى ) , ولكنهم الآن يطالعون هذا البوست وهذه الأجتماعات
الأسفيرية الحميمة , فيقولوا كما قال مهند الرشيد و(امنيته) , السودان لذيذ , لكن ما (فور ايفر )
كفيل الجن داير شنو تانى , استقيل انا يعنى ولا اعمل شنو ؟؟؟
(عدل بواسطة منصور عبد الرازق on 08-12-2009, 01:12 PM)
| |
 
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
Quote: وتمشى دربك عديل تأخد ليك ستة بيضات وتلاتة علب زبادى ورغيف جنز حاااااار
من الفرن البلدى |
يا منص بالرغم من انني متغدي قبل شوية لكن أول ما قريت كلامك ده اتذكرت الشعيرية بتاعتك و شعرت بالجوع...بيض شنو وجينز شنو الحار البتتكلم عليهو ده...الجينز الحار الوحيد الحار البتذكروا ليك كان الجينز الجبتو معاك لما جيت راجع من السعودية...كان دايما حار بعد المكوه...
نقول الزمن طول و محمد عيد روج لي موضوع الكركم ده...لكن رفعت موجود و حماده موجود...شوف لو لقيت واحد فيهم متذكر ليك حاجة غير الشعيرية...تعرف أنا لو نسيت أي حاجة ما بنسى ليك الشعيرية بتاعتك دي خصوصا في الشتاء يا مفتري...كان بالليل بيجوع جوعة ما يحلك منها الا كيمو...لأنه دايما كان بكون مدكن ليهو حاجه...البيض ده امكن لما كنت ساكن مع السناير أحمد المعتز و أبراهيم مختار...لكن من ما سكنت معانا حقرت بينا و بيتنا القوى...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد عيد)
|
ياشباب ياحلوين انا اول مابديت
ماقلت ليكم خليكم في البتسو فيهو وتابعو البوست
عادي ... وانا بخت صوري بهدوء واطلع
ما قايل الموضوع بجر كده
منصور
والرشيد
ومحمد عيد
وكمان ماننسي صلاح لامين
وزهير
وحديت الشغالات ورجل الفول من النضيف
وغيره كتير
وانت جبت المفيد يامنصور ياملك:
Quote:
لوحة ياسر نجيلة الرسمها , لا يناسبها تعليقا الا كلام صلاح الأمين او كمالن ممكن تقولوا (موسيقاه التصويرية) , والله يا ياسر انا كنت فى الزقازيق قبل فترة , اولادى من كثر ما انا قاديهم بالزقازيق وما ادراك ما الزقازيق , لمن شافوها , لغاية الليلة بيضحكوا على , قالوا الزقاويق شينة
وخاصة كلية الزراعة , تصدقوا انا زاتى لقيت كلامهم زى الصاح كده واتضاريت , طيب يا ربى الحصل لى شنو تانى لمن شفت صورك الجميلة دى يا ود نجيلة , تعرف معناها نحن بنتكلم عن (زقازيق عشناها فى خيالنا ) اكثر من كلامنا عن زقازيق (مدينة وشوارع وميادين )
|
اصدق تعليق بحاول اوصلو للشباب ....
ممكن الصور تتطلع جميلة وحلوه في نظركم لانكم بتشوفوها بعيون الماضي
لكن صدقوني لما نزلت من بص للزقازيق ... بعد عشرين سنة ... شعرت اني ارتكبت خطأ كبير بزيارتها وتمنيت لو ظليت محتفظ بذكرياتي القديمة .... وصورة الزقازيق الزماااااااااااااااااان
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ياسر نجيلة)
|
نواصل مسلسل الصور ... اقصد سمستر الصور ياجلا ... موسي عيسي ماتحجزني من الزول ده ...
ومن ميدان المحطة – أحمد عرابي – طوالي الى الجامعة
طبعا ياشباب ذهبت للزقازيق مرتين
اول مرة الخميس 16/07/2009 واستخرجت الشهادة الاصلية
بس كان نسيت الكاميرا فرجعت مرة ثانية الخميس 23/07/2009
ومعي الكاميرا مخصوص عشان اصور ليكم بس بكل اسف كانت
الجامعة وكل البلد في اجازة لأعياد ثورة 23 يوليو
و حاولت اجيب ليكم شوية صور من خلال سور الجامعة حيث لم استطيع الدخول اليها
طبعا الجامعة كلها بقت محاطة بسور مع وجود حرس في كل بوابة ....
ياحليل هملت الجامعة زماااااااان تدخل ليها من اي مكان ....
وتجدون المباني هي نفسها بل شابها القدم
ولكن هناك ميادين خضراء تكاد تكون على طول سور الجامعة وفي كل الكليات ...
مع الملاحظة ياشباب كل هذه الصور اخذت نص النهار ...
من الساعة 12 الى الساعة الرابعة ... سخانة تلحم .... وعرق للركب ...
تمثال لرمسيس بالحجم الطبيعي امام كلية التجارة بالشارع الرئيسي للجامعة
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ياسر نجيلة)
|
يا جلا ماتقول حكاية التصوير نصت نهار ده سيناريو
دقق في الصور كويس وشاهد ظل الأشياء والناس
حتعرف التوقيت صح ...
مباني كلية التجارة من خلف الاسوار
وكم انا حزين لم استطيع اوصل ليكم الصورة الحقيقية وما آلت اليه
الكلية من تغيرات ... دي فرصة لميسرة يوصل الصورة اكثر واقعية
مدخل الكلية مغلق للإجازة ...
صور من على البعد تظهر مبني مدرج تجارة (أ) الشهير بحجمة وعلوه الضخم – ستة طوابق
وقد حجب المبني (ب) مثيلة بمبني كلية التمريض الجديد
ميسرة ادينا تفاصيل اكتر من الداخل
ماتنسو تلاحظو المساحات الخضراء التي غطت المساحة الخالية من البوابة لمبني تجارة وامام آداب وتربية وحقوق
طبعا مدخل تجارة محل تجمع السودانين - محل المصطبتين ياموسي عيسي - حيث كنا نجلس ونجتمع وناخد شمس اغلق ...
كما انشأت كافتريا محمل مدخل وتجمع السودانيين بكلية الحقوق
الحقو ميسرة يصور ده كمان
اغلاق الجامعة فعلا اهدر جزء كبير من مجهودي ...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ياسر نجيلة)
|
سلامات يا ناس
.......وكنا نحن فى سنة تالتة...بنتذكر الولد الصغيرونى
الكان فى سنة اولى...لابس الردا والقميص...نضيفات زى صورة
ولد فى مجلة...الشبط اللامع...ما كنا وقتها بنعرف الورنيش
شعرو مسرح بى صورة جميلة...ومتموج...واللمعان من حاجة نحن
كنا قايلنه زيت سمسم...لكن لما يجى جنبك تشم فى الشعر ريحة
جميلة كأنها عطر نحن ما شميناهو قبل كده...والمنديل ...المنديل
المربوط على الرقبة...عرفنا انو عشان يمتص العرق وما يوسخ لياقة
القميص....الولد كان نضيييييييييييييييييييييييييف ونحن كناغبش
وفى الشتا الواحد مننا بيكون زى الفولة المدمسة....كنا بنستغرب
كيف يجمع ولد زى دا بين النضافة والادب والشطارة ...حاجة واحدة
ربنا ما اداها ليهو...الولد النضيف المؤدب الشاطر...كان كيشة فى
الكورة....
==============
ده واحد كان بيحكى عن اسامة ابتر.....
مهداة الى زهير الزيناتى....
وايضآ الى الذين يزيفون الحقائق
احبكم ...حب زهير لتزييف الحقائق
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
واصل يا نجيلة العزف الجميل
وحقيقة تغير المعالم .. ربما هو السبب فى ذلك الاحساس
بأنها ليست هى تلك المحبوبة نفسها ..
وهذا شىء طبيعى فى اعتقادى ..
لأن ما يربو على العشرين سنة ..
أكيد فعل فى تلك المحبوبة الكثير .. وده حكم الزمن
" يا اخوانا ما تحرفوا الكلام انا بأقصد الزقازيق .. طيب يا جلا ؟)
وايضا لا تنسوا ان الزقازيق تعتبر مدينة فلاحين يعنى التطور نفسه
لم يصلها الا مع قيام الجامعة ..
واعتقد مع ظهور بعض الابراج الشاهقة وتحديثات الجامعة
ومحطة القطار .. كتر خير الدنيا ...
ولو تذكرون ان الاهتمام بتطوير المدينة منذ ايامنا قد كان معدوما
وتذكرون تلك الطرفة التى كان اخواننا المصريون يتندرون بها على
محافظ الشرقية وقتها واذكر اسمه : امين ميتكيس ( 100 كيس )
وكيف انه كان فى اجتماع مجلس الوزراء يعيد للدولة وفورات فى ميزانية
كل سنة باعتبار انتهائه من كل مشاريع المحافظة وعدم احتياجه للمزيد
وكان الفائض يحول فى كل سنة الى الاسماعيلية حتى اصبحت بذلك الجمال
الذى تعرفونه جميعكم ..
بينما السيد ( 100 كيس ) يترك محافظته نهبا لغبار الشوارع
والبعوض ابو 44 كراع داااك .. والبراغيت والذباب الشارب موية الترعة
وتقارير ناس بطة كل ليلة تقول :
الامن مستتب والشوارع خالية الا من السودانيين وال..... الضالة !!!
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد عيد)
|
اول شئ اعتذار كبير للغياب
لانه كنت في مهمة خارج الرباط
كنت في طنجة على بعد 12 كيلو من اسبانيا
بالمرة قلت يا ولد انت اصلك ما عندك اجازة
تقوم تسوق الاولاد معاك عشان يمشوا البحر شوية
خصوصا محمد مجنني جن (عايز امشي اعوم في البحر البعيد)
بكرة بنزل ليكم صورته وهو عامل فيها كيجاب
مع انه الرباط مليانة بحر لكن هو بيعجبه بحر طنجة
طبعا لانه طنجة بتطل علي الابيض المتوسط والاطلسي
تاني حاجة ترحيب كبير باسرع زول في الزقازيق
كنا في الكورة بنتواتاهو انا وكمال زولوجي الله يطراهو بالخير
ازيك يا موسى عيسى ياخ
يا نجيلة كيفنك وصورك في السلك
كدي ادخل لينا لكوظ ينوبك ثواب
صلاح الامين ذكرياتك منقة خصوصا الشغالات
واكتر واحدة متذكرة بعد ام احمد حقتنا
واحدة كانت شغالة في شقة ناس الدرديري ومحمد صديق
كانت عندها جكسيها بجبها في الشقة وهي تطبخ
مريت على اصيلة المغربية
المغاربة ديل والله العملوه مع الطيب صالح رحمه الله
ما عمله اي سوداني
عملوا ليه حفل تابين عجيب
وكمان سموا اكبر حديقة في اصيلة باسمه
حا انزل الصور والكلمات في بوست منفصل
يا جلا ايه الحياة غير ليمك كانت في السلك
بكتب لي في قصة اسمها (حفرة دخان سكينة بت ود جيب الله)
عايز اتمها كلها حتى انزلها عشن ياسر نجيلة ما يزعل مننا
يا ياسر قريت قصة (حواء بت الخضر ود كنيش نازلي الخرطوم)
| |
|
|
|
|
|
|
|
|
|
Re: ناس الزقازيق ... أجدع ناس .. (Re: طارق جبريل)
|
طارق جبريل و الله جاييك
بس خليني أشوف محمد صديق دا الأول
Quote: كنا بنستغرب
كيف يجمع ولد زى دا بين النضافة والادب والشطارة ...حاجة واحدة
ربنا ما اداها ليهو...الولد النضيف المؤدب الشاطر...كان كيشة فى
الكورة.... |
وعشان نفش زعلنا منو .....
نقوم نقول ليهو إنت حارس مرمى و عندك مستقبل كويس
زولكم يصدق
و قالو المؤمن صديق
و أكتر زول غتيت الزول القاعد جاري في الكنبة
ويقوم يقول ليهو تعال نمرنك حارس مرمى
الزول الغتيت داك يشوف أكتر حتة فرناقة
وهاك يا جديع كورة
مرة شمال و مرة يمين
يعني يرجع البيت حالتو مهبدلة للآخر
المغصة تكتل مدرب الحراس في اليوم التاني
لمن الولد يجي أنضف من اليوم القبلو
المهم الزول إستمر في برنامج الغتاتة بتاعتو دي
لدرجة إنو ربت مرتين
لغاية الولد النضيف حصل الزول الغتيت داك
و أصبحو في فصل واحد
و كمان في فريق واحد
كل منهم لا يستغنى عن الآخر
لكن المغصة الكاتلاني أنا
الولد النضيف جمع بين كل الحاجات حتى الكورة الكان فيها كيشة
و أكيد الزول دا ما أسامة أبتر
أحبكم يا ناس
حب أسامة أبتر للنضيف
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
الأخ ياسر نجيلة
ممكن الواحد يا دوبك يديك شهادة مساعد مصور
لا شك الصور جميلة
أنا غايتو دمعتي نزلت
شوفو محل السهم الأسود
هنا أكبر حادثة في الزقازيق تعود للقرن ال20
في عام 1984
حيث تعرضت الدكتورة بتاعت القانون يا موسى عيسى
للمشاغلة من الأخ سعد السمين
أظن المدرج (أ)
الناحية الغربية
والذي رسب في هذه المادة بدرجة أسكتو خلوها ساكت
أحبكم يا ناس
حب سعد السمين للقانون التجاري
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
Quote: لأن ما يربو على العشرين سنة ..
أكيد فعل فى تلك المحبوبة الكثير .. وده حكم الزمن
" يا اخوانا ما تحرفوا الكلام انا بأقصد الزقازيق .. طيب يا جلا؟ ) |
هس يا جماعة
أنا قلت محمد عيد دا أصبح كبير على الحب و الحاجات دي .....؟؟
وما بستحمل أي هناي؟؟
ولا فتشت مسيرتو العاطفية نحو السودانيات و المصريات؟
و الغريبة لما كنت قاعد إتونس مع والدتو في زيارتنا لديارهم العامرة
قالت ولدي دا و الله قلبو حنين خلاص
وبنفس كلام محمد عيد
قالت لينا ما تفهمو كلامي غلط ..... تذكر يا الرشيد؟؟
و إنتو أنا حاسباكم كلكم زيو....
أحبكم يا ناس
حبي لوالدة محمد عيد
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
| Quote: بكتب لي في قصة اسمها (حفرة دخان سكينة بت ود جيب الله) |
إنت يا طارق جبريل؟
درست في كلية البيطرة.....؟
و لا درست في كلية العلوم قسم الجيلوجيا.......؟؟؟؟؟
مالك و مال الحفر ياخ؟
و بعدين إذا قصتك دي زي بتاعات محمد صديق
يبداها و نواصل معاهو فيها....
أنا ما عندي مانع
غير كدا!!!!
خليني مع فرمالة محمد صديق
الذكريات صادقة و جميلة
أحبكم يا ناس
حب ولد طارق جبريل لي بحر طنجة
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
معانا هنا في الشغل اتنين من المصريين أبناء الزقازيق...واحد دفعة ناس صفوت حسن عمر...و صفوت طبعا برضو معانا هنا...فأول ما جاء صفوت للمنطقة قابل الراجل و ما شاء الله عليهو صفوت اتذكر الرجل فناداه باسمه...أحمد سامي...أيوه أحمد سامي...أنا صفوت...صفوت مين أنا ماعرفكش...صفوت يا راجل زميلك في كلية الزراعة الزقازيق...اهللللللا صفوت كيفك يا راجل...أسر لي أحمد بعد ذلك بأنه لم يتذكره وقال انهم كلهم كانو شبه بعض أنا حأفتكر مين ولا مين...
كثيرا ما نتسامر أنا و هؤلاء الاخوه فكان أحمد سامي الأقرب الي و كان كل ما اذكره يكون معروفا له...أما جمال سعد الشخص الثاني فلقد تخرج في منتصف التسعينات...يعني دفعة ناس زهير كده...و كنت كل ما أقول حاجة يقول لي انت بتتكلم عن ايه يا باشا...فأقول ليهو معليش يا جمال احنا بتكلم عن حاجات أيام رفاعة رافع الطهطاوي وزكي جمعة...
الحقيقة صور ياسر نجيلة دي خلتني أجدد مبررا لدهشة جمال سعد من الكلام البقولو...ولولا ياسر نجيلة صور لي محطة الزقازيق و ميدان عرابي...كنت افتكرت الصور دي من مكان تاني...
دي الحقيقة زكرتني مرة و نحن برالمة و قبل ما أمشي الزقازيق...جاء والدي الى القاهرة لتفقد أحوالي...وكان والدي من خريجي مصر أيضا وعاد اليها عدة مرات أيضا بعد تخرجة..ثم غاب عنها ليعود اليها بعد فترة طويلة هذه المره و لتفقدي..فأخذني أبي الى وسط البلد...و كان يقول لي تعال نعرفك على البلد...فنمر على الشارع فيقول لي هذا شارع سليمان باشا فأفاجأ كما يفاجأ هو فلافتة تقول غير ذلك وهكذا تكررت المسألة مع عدة شوارع...فاضطر والدي مع ضحكاتي التي حاولت أن أخفيها الى الاعتراف بأن البلد تغيرت ولم تعد كما كانت في زمنه....
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
Quote: إنت يا طارق جبريل؟
درست في كلية البيطرة.....؟
و لا درست في كلية العلوم قسم الجيلوجيا.......؟؟؟؟؟
مالك و مال الحفر ياخ؟
|
يا جلا ياخي ما تتصلح معانا ياخ
محمد صديق شنو البتلمني معاهو
ياخي محمد صديق دة كان جنه ليلات شمعية وشعر وسحسحة
وانا اليوم كله ادافر في الجواميس والبغال
بعدين ياخي حفرة الدخان دي انت ماخدة من الناحية الجيولوجية مالك
شوفها من الحتة التانية ياخي
حتة القطيعة ونميمة النسوان لمن يكون بيدخنن
الله يسترنا من الصورايخ الحا تجينا من بنات الشيخ
تليشة:
احب جلا الجيولوجي
| |
|
|
|
|
|
|
|
|
|
Re: ناس الزقازيق ... أجدع ناس .. (Re: طارق جبريل)
|
Quote: و الغريبة لما كنت قاعد إتونس مع والدتو في زيارتنا لديارهم العامرة
قالت ولدي دا و الله قلبو حنين خلاص
|
يا جلا انت وزهير الزناتي بتجرجروني في كلامات بكون ما عايز أقوله و بتجبروني أقوله...و بتخلو
الجماعة يزعلو مني...و محمد صديق يتهمني باني بلفح الكلام...و محمد عيد يقود هجمات مرتدة تتكسر
تحت أقدام باري ديمبا و سامي عبدالله...
لما كنا بنتونس مع والدة محمد عيد قالت ليناانها دايما بتقول محمد ده ما ولدي...عشان محمد ده كبير و من مواليد سنة ........وبيكبره وعشان ما يقولو ليها معقول الزول العجوز ده ولدك...الزول الشعره كلو شيب ده...
أنا طبعا ما كنت عايز أقول الكلام ده لكن الله يجازيك يا جلا...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
محمد صديق...ذكر فالذكرى تنفع المؤمنين
الحاردلو :
بَعَرْفَكْ وَكِتْ تَقومْ في حَجَازَة واجْواديَّة
تَبْذُلْ فيها جَهْدَكْ بي صَفَاوَتْ نِيَّة
مَعْلومْ تَصْلِحْ البَطْحاني والشُّكْريَّة
لاكِينْ المِطِيرِقْ ما بْتَجي غير دِيَّة
* عبدالله :
شِيلتَه في الحقيقة مِثَبّتابَ الجَيَّه
خوفْ مَسْكْ الضَّهَرْ واللوم مع الكُلِّيَّه
في سَبَبْ المِطيرِقْ لا تَسيلَكْ دَيَّه
أنا مَلْزوم بها وتاني الضَّمانة عَلَيَّ
( دَيَّة بفتح الدال : اللغط والأصوات التي تحدث عند المشاجرة )
*الحاردلو :
أَصْلَها مِن بَشَم مردَا مِن الغَصَّان
ونوناياً كَتير جادْعَه على الجِدْيان
سَرَّاق المطيرق فيهو نوع رَسَيان
مو سَرَّاقْ حُمارة أل إسْمو اخوك حَسَّان
* عبدالله :
شَرَّفْتْ المطيرق سِيتَه زَيْ الزَّانْ
ودا كُلُّه السَبَبْ بُرَيبَتْ العِنْقانْ
ما لُمْناها ها السرقة أمْ جَديداً بانْ
كان تِتَّنى فوقَه نْكَتِّرْ الأوْزانْ
* عدلان :
جِيبْ قافَ المطيرق خَلْ بيهوها النسَّلَى
نَجَّادَع بو في مَجلس أخوك عِبْد الاه
أضْحَك وانْبَسِطْ خَلْ فاطْرَكْ ال أنْحَلَّ
مي مَسْروقَة أظنَّها عن بِرِنْجي الحِلَّه
*الحاردلو :
طَوَّلْ بالعَسينْ قانِصْ بدَوِّر كَلْبي
ما لْقيتْ من يَحِقْ نَمِّي ونوادِر قَلْبي
عادْ يا بْنَيَّة كانْ فَدْ ليلْ معاي تِنْسَلْبي
هاكْ يا سَمْحة شِنْ ما دُّوري مِنِّي أطُلْبي
* عبدالله :
من حَسَسْ أُمْ رشومْ الحارْ بقول واغُلْبي
وما لْقيتْ لَيْ طبيباً يَعرِفْ الحاصِلْ بي
شَمْبانيها مو بَرَّاني خافِسْ قَلْبي
زَيْ هَنْتَرْ نِهارْ زِنْهارو واقِفْ حَرْبي
*الحاردلو :
أعْضاي انْشَوَتْ والارْضْ بِقَتْ مَلاله
وعُمري بَلا لماكْ قط ما بَشُوفْ لو طَلاله
بِتْ السُّرَّة كان حَكَمَتْ عَلَيْ بي لالـه
رَضْيَانْ إن بقيتْ ودُّوني لي الشَيَّالَه
(الملالة : رماد حار فيه بقية من نار . لماك : أصلها من لمّ والليم هو اللقاء . طلالة : في القاموس معناها البهجة والحالة الحسنة . الشيالة : المشنقة . )
* عبدالله :
مطيرق الحارْ عليها الليلة جِبْنا مَقَاَلة
وهي بِقْيَتْ سبب والمعنى لي من شَالَه
سِتَّاتْ اللّبيق والفَاطِرْ ال بِتْلالا
بت السُّرَّة فيهن جاز حَسَن في هْلاله
(بت السرة : هي الرضية بت السرة . جاز حسن : صاحبة القصة في بني هلالة)
*الحاردلو :
طالْتَ المُدَّة من فرق ام لِهِيجْتَنْ نَيَّه
مَرَّاً تعتذر ومَرْ تابَ الجيَّه
كان سِمْعَتْ لنا الْ قُلْناهو في الحَمَديَّة
ما بْتَحْوجْنا في مطيرق تِسِيلْها قَضيَّه
(الحمدية : جارية مشهورة بحسنها قال فيها الشاعر شعراً جيداً )
* عبدالله :
البَهَمْ الحَقيقَتْ نِسْلو كبَّاشيَّه
بتمايَح بَرا مُقْدَ الجزيرة النَّيَّه
حاشاها المَلامْ في السَّمتة والعَرْضِيَّه
خَلْ كُتْرَ الكلام ارْجانا ها العِشويَّه
*الحاردلو :
من فَرْقْ الدُّغُسْ دايْمَ الابد قَرْهانْ
ومن قِلْ الفلوس أَصْبحْتَ في حِرْمانْ
فَتَّشتَ البلد عَدلانْ مع عَرْمانْ
مالقيت ليك متيل ياأم قرقداً كِيمانْ
(القرقد : الشعر الكثيف الجعد .)
* عبدالله :
الكابورْ ضَرَب واتجمَّع البيشانْ
وجن بنُّوت رُفاعة ولِبْسَنْ النّيشانْ
حين جاتْ الرضِيَّة وعبَّتْ الدُّشمانْ
زَيْ هنتر نِهار يوم صابَحْ أم درمان
(هنتر : هو القائد الإنجليزي الذي دخل مع الجيوش الإنجليزية إلى السودان)
*الحاردلو :
تفْسير المطيرق ما بِدورْ لو حَديسْ
وأصلها من بَشِمْ مِنْطرحة غير تَحْميسْ
إن صَحَّتْ فراسْةَ الكلمة في التَّقييسْ
من غير المُوَضَّح فيها معنى غَميسْ
* عبدالله :
زينت السِّرِّدار الطَّيَّع الدرويش
في الذوق واللدَب مثلك خلاسْ ما فيش
غَيِّك من زمان سَبَّب لنا الطرطيش
البنوت براك يا أم خَدْ طُراهِنْ ليشْ
*الحاردلو :
طاريهِنْ براها اصلو مالي لزومْ
شالْتْ الشُّوفْ بَعَدْ ما تْجَمَّعَنْ لي لزوم
في غْناكْ السَّبَقْ ما قُتَّ أنا ملزوم
لا هَسَّعْ معايْ وَحَّه وأنينْ وبَزوم
* عبدالله :
الوفا داكْ حَصَلْ ساكِتْ بقيت زولْ لومْ
وصَدَقوا القائلين مو عاقِل المَصْرومْ
بي زْيادَة التَّضرُّع نَخْتِم المنظومْ
فوقْ سِتْ البناتْ عَوَضْ أمْ نَعيم ونْجومْ
(أم نعيم : جارية أحبها الشاعر وكثر فيها القول ولعل شعره في أم نعيم هو أصدق شعره على الإطلاق . نجوم : اسم جارية أخرى . )
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
قيل ان الخليفة عبد الله ود تور شين كان لديه باب قصير يحيث اذا دخل احد الاعيان او شيوخ القبائل يضطر الى الانحناء قليلا
وقد فطن ابو سن لذلك فدخل بطريقة لا تشى بالانحناء
وكان من ضمن جلوس الخليفة الشاعر الحاردلو
وقال الخليفة مين دا ؟
فرد عليه الحاردلو
دا أن أداك وكتر ما بقول اديت
ابدرق الموشح كله بالسوميت
البروسو بكر
حجر شراب ستيت
كتال فى الخلاء
وعقبا كريم فى البيت
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
طارق...وينك يا حبيب
يا أخوي يا أقلبه مسادير يا أقوم أطقع...أحسن ياتو...
قاعد براي و ناس الليل خذلوني الليله ما ظهروا...قلت أقوم أوزع ليك الباصات بالليل عشان
يجو ناس محمد صديق بالنهار يشوتو في القوت طوالي...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
Quote: بكتب لي في قصة اسمها (حفرة دخان سكينة بت ود جيب الله)
عايز اتمها كلها حتى انزلها عشن ياسر نجيلة ما يزعل مننا
يا ياسر قريت قصة (حواء بت الخضر ود كنيش نازلي الخرطوم)
|
والله ياطارق ولدي ... متابع كل كتاباتك "بمغصة"
من زمن الولد الطلبة صبي البناي ...
المغصة دي ابت تنزل ...
ولما قريت قصة (حواء بت الخضر ود كنيش نازلي الخرطوم)
حسيت كمان انها ما انتهت ... شدة ما مسكتني عقدة من قصصك ...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
صبحكم و مساكم الله بالخير...و نهاية أسبوع سعيده...و جمعة مباركة
أمبارح السهرة طولت و اليوم ماشي قاصد عيالي...و العيال منتطرني ببرنامج ما فيهو أي رحمة
فقلت أقول ليكم كل السلامات و الأمنيات عشان أنا مآخد اجازة من البوست الخميس و الجمعة وبجيكم
السبت ان الله أمد في الآجال...
خط رجعة:
امكن أتاوق و أستمتع...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
يا اخوانا
الهكر الملعون جانا بقوة
من عصر اليوم ومحاولات جارية بشدة
انا وعثمان الجيلى وجلال وعصام دهب وزهير
والمسألة محيرة ..
عموما ارسلنا رسائل للاخ بكرى لمعالجة الوضع
والمقاومة الان تقوم بها قواتكم الساهرة على الثغور
الهكر دخل باسم / فوزى سليمان ( لعنة الله عليه )
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
رسالة من مبارك جادين
Quote: كل يوم حكاية من الزقازيق اليوم حكاية خرطومية
حصلت لاخونا الشريف عباس الشريف في خرطوم غردون
الحاصل انو اخونا الشريف بعد تعب في شغل التجارة قرر العودة مرة اخرى الي الدراسة وبحث عن شهادته التي تخرج بها من جامعة الزقازيق كلية العلوم قسم الجيلوجيا .ناس الجامعة قالوا ليهو لازم تقوم تقوم الشهادة في التعليم العالي .وصاحبنا مشى الي الموظف المسؤل والذي طالبه باحضار جواز السفر الذي يتبت انه كان يقرأفي مصر في تلك الفترة .لحسن الحظ وكعادة الشريف المرتب احضر لهم الجواز والذاستعمل قبل اكثر من عشرين سنة امسك الخشب يا النطيف .والطلب التاني كان كان احضار تاكيد من الخارجية السودانية بان الشريف قد تحصل على البكالريوس من الزقازيق . في الخارجية ناس التوثيق قالوا ان ختم السفارة في تلك الفترة غير موجود لاحظ .ولكن الشريف حصل على تصديق من سفارة مصر تؤكد ان اختام الجامعة صحيحة وبالتالي الشهادة صحيحة
الحكاية مهدهة للبنج دينق الور وزير الخارجية وايضا الي وزير التعليم العالي دكتور بيتر ادوك
|
اللهم أرجع باسويرد مبارك جادين كما رجع باسيورد موسي عيسي
أحبكم حب الهكر للتهكير
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
الليلة أتفسح براي في الحوش ، زي ما تقول كده ناس بيتكم يسافروا
وتكون قاعد براك في البيت ، في البداية تكون متكيف لكن بعد شوية تزهج
تقوم تنادي أولاد الحلة تلعبوا كشتينة ، اها انا الليلة حا أمشي أجيب
أولاد الحلة أتونس معاهم ....
معليش يا جماعة ، الهكر دا بالغ معاكم عمل ليكم حظر جماعي والله يجازي اللي كان السبب
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
اخيرا وبحمد الله
نجحت فرقة الصاعقة المرابطة فى ثغور الحوش
وفى تمام الساعة الثالثة صباحا ..
من القضاء على هذا الهكر الملعون المسخوط الرذيل
الذى قام بتهكير البوست وتشفير باسوردات اعضاءه
فـ شكرا لتحرك الاخ بكرى ابو بكر بعد استلامه لرسالتين منى ومن الاخ جلال
كما لا ننسى تحركات الاخ زهير من الوطن العزيز
محاولات الاختراق بدأها الاخ جلال بمحاولتين
ثم تليته انا بمحاولة أخرى اظهرت المشاركة فى المنبر العام
ولكنها اختفت فى الصفحة ..
عموما هذا درس يا شباب ..
نرجو فى حالة ورود اى اسم غريب على الحوش عدم مداخلته والرد عليه
وتبليغ الاخ بكرى على الفور
النقطة الثانية والمهمة ان نقوم بحفظ الصفحات منفصلة
فى مواقع اخرى على الكمبيوتر او على فلاش ميمورى او هارد ديسك خارجى
كفانا الله شر اولئك الهاكرين عديمى الذمة
وأعداء النجاح ..
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد عيد)
|
وهذه تجربة اخرى للتأكد
من تفعيل البوست
ربنا ستر والحمد لله يامنصور
الحوش قرب يلحق بوست يوم الخميس الفات الليله يا حليلو
والغريبو انو برضو حدث يوم الخميس
جلا وانت لافى البقاع شوف لينا واحد مكـــرّب يكتف لينا البوست ده
صديق وابتر .. اطلبوا تحويل للاستخبارات الحكاية دى ما بينسكت عليها
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ياسر نجيلة)
|
وكمان شوية من كلية الصيدلة
وين ولدنا ياسر شبيكة ... من زمنكم نفس اللافتة الزمان حتي صارت "كلبة" بدل "كلية"
والماسمع اسم كليتو يحاول يتخيلها في الصورتين ديل ياعبدالدائم
نادي ضباط الشرطة
انشأ مقابل كلية الصيدلة والطب
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ياسر نجيلة)
|
الى من يمتلكون المحبة والموده فى قلبى
اقول لهم ...
رفع الله قدركم وفرج همكم
واسعد ايمكم وشرح صدوركم
والبسكم لباس العافية
وبارك لكم فى شعبان وبلغكم رمضان
وكل عام وانتم أقرب الى الله ..
* جمعة مباركة *
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد عيد)
|
سلامات يا ناس
يا نجيلة صحى انت لكوظ دى مالا عيبا لى
وزراعة مالا؟؟؟
مبروك للهلال ومبروك للسودان وعقبال المريخ
يا منص تعال مارق الليلة الجمعة
موسى عيسى قايم بى نمرة اربعة الظاهر بطلت منو
وين عصام جلى ؟؟؟؟واحمد اسماعيل وعروة والسمؤال
=========
ما فى زول رد التحية لى حسن طبلة
تعالوا يا ناس
جلا لسه هارش من الهكر
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
سلامات يا ناس
صباحات الجمال
والتفاؤل
اللهم لك الحمد والشكر عدد خلقك وعدد ما احطنا
وما لم نحط..
اللهم لك الحمد على نعمة العافية والصحة والحب
اللهم اجتمعنا بفضلك فى هذه الدنيا فاجمعنا بفضلك
فى الاخرة...آمين
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
سلامات يا ناس
حليلك يا الرشيد..كلما اخش القا ليك الحبيب ده
غاتس فى الصفحة التانية...ناس الليل والنهار وين؟؟
يا عيد انت الناس ديل بدل تصرف ليهم كركم....تقوم
تفطرم ملوحة؟؟اها ياهم ديل نايمين لى هسة...يا ابتر
حرك ليك قوة طلع الناس ديل لى برة...
يا منص...انت فوز الهلال ده ما عاجبك ولا شنو؟؟؟
يا نجيلة منتظرين صور لكوظ وزراعة...قبل كده قلنا صور
كازينو النهر وما عبرتنا...
الريس ميسرة ..اجازة سعيدة ..وغطى لينا الحتات الما غطاها
نجيلة..ش الحمام...ش وادى النيل ...الحلة حقت السجن ديك
ميدان المنتزه...كبرى ام عثمان...دار الاتحاد والجاويش
ش الشمس...كبرى الشبان المسلمين...ش مولد النبى وعمر افندى
كبرى السوارس...قصر فرساى...المنشية وكفر الزند...ش فاروق
الخ ..الخ..الخ..
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
الأخوة الأعزاء نأسف للانقطاع المفاجي
للسفر خارج الرياض مع الأبل والطبيعة
الصحراوية مش داخل البحر يا العزيز
طارق جبريل ليك وحشة و شايفك نشيظ
في أماكن ثانية و مارجعك إلا العزيز
ياسر نجيلة و الله انا ما مصدق أن هده
الصور هي كلية التجارة أو الجامعة
التي نحتفظ بذكرياتها و شكل الصورة
مقلوب عندي خالص و الله يا ياسر أنا
كنت بفكر انزل في أقرب إجازة لكن صدقني
سوف اعمل بنصحيتك لكي يظل محراب الذكريات
كما هو دون تغيير أنت عارف ياياسر الشباب
عندي عاملين لي مشكلة و ذلك لرغبتهم بزيارة
الزقازيق الأنا عامل ليهم جن بيها؟ بس لازم
تحاول تربطنا بكامل الزقازيق يعني كازينو
النهر وين و كبر الشبان المسلمين شارع المكتبات
صور شارع القومية و شارع المحافظة و نادي المعلمين
سينما قصر الثقافة مع كبري المحافظة الجواميس
والبط شرق الجامعة هل كل هذه الأشياء في عالم
النسيان ؟
| |
|
|
|
|
|
|
|
|
|
Re: ناس الزقازيق ... أجدع ناس .. (Re: موسي عيسي)
|
الشباب محمد صديق وطارق جبريل وموسي عيسي
كويس انو الريس ميسرة في الزقازيق وحيغطي ليكم كل الاماكن
التي لم استتطيع تغطيتها ... صدقوني المسألة شاقة جدا جدا جدا
نص النهار وتحوم كداري ... متخيلين الموقف
بالمناسبة طبعا انا زغت من الاولاد ومشيت الزقازيق براي
اولا عشان اخد حريتي في التجوال
تانيا عشان ما انصدم بتعليقاتهم زي اخونا منصور ...
ونواصل ماتيقي من الصور ....
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ياسر نجيلة)
|
ياحلوين سلام يالزيزين احترام
انت عارف يا جورج الهكر ده جاء بسبب زهير الزناتى
عليك الله كدى اسأل مصطفى محمدالحسن يقول الشنب من العصر التيراسى او الجوراسى
ويمكن يكون مسجل مع حفرة طارق جبريل
انا بحب النضيف ونفاجو
| |
|
|
|
|
|
|
|
|
|
Re: ناس الزقازيق ... أجدع ناس .. (Re: موسي عيسي)
|
التحية لأجدع ناس
والتحية ليك يا محمد صديق وأنت تأتينا بأخبار أخ عزيز جدا ألا وهو الأخ:
حسن طبلة
رجل محفور في ذاكرة كل من عرفه
دائم الإبتسامة
مواقفه الطريفة كتيرة جدا
وإمكن آخر هذه المواقف صاحبتنا في رحلة عمرة سنة 89 وكان وقتها قد تخرج (يعني عمرة وزوغة) ورجعنا إلى مصر ولم نتقابل بعدها
وأتمنى أن يتواصل معانا حتى ولو عبر الإيميل لأنو أكيد حيكون عندو الكثير
لك سلامي وأشواقي يا حسن طبلة
ومشكور مرة تانية يا محمد صديق
_________________________________________________________
ومواصلة لإقتراح منصور بخصوص بعض الشخصيات
أين بهاء الدين سليمان أزرق (ودّو)
خريج تجارة
ربما 88 / 89
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ياسر نجيلة)
|
مستشفي المبرة - الجديد
جامع الفتح "عبدالحليم حافظ"
يعني الترتيب الجديد وانت قادم من المساكن –زقاق المحلج
تصادف اولاا مستشفي المبرة
بعدين الجامع
بعدين مباني الجامعة اول شي مستشفي الجامعة بعدها باقي الكليات
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ياسر نجيلة)
|
الله يعطيك العافية يا أبو أحمد هيجت فينا شجون و بدأنا
نسترجع تلك الأيام وزي ما قال أخونا منصور ليس الجمال
بجمال المكان و إنما بالنفوس ، بس يبدو على يا نجيلة
جليت مكان مستشفي المبرة دأ ما قادر اتذكر مكانه بالضبط
إنت جاي من المساكن هو قبل المسجد و اذا كان كذلك اذكر في
ملعب شرق استاد الشرقية خلف المسجد مباشرة هل تم الاستغناء عنه
الشى الثاني كنت فاكرك تمشي تقيف على الاطلال و اعني دار
الزميلات (تونتي ون ) قبل ما تخلينا نبشك أكثر ؟ هات !
| |
|
|
|
|
|
|
|
|
|
Re: ناس الزقازيق ... أجدع ناس .. (Re: موسي عيسي)
|
ياحبايب سلام
خميس وجمعة اجازة , عشان رمضان
تجهيزاته يعنى
بت الشيخ قالت لى السنة دى عايزين نرتب نفسنا بدرى
اصلو رمضان ده كل سنة بيجينا بدرى , فجأة كده يعنى
يقولوا ليك بكرة رمضان
وفى السنوات الأخيرة , الواحد كان تلقاهو يادوب جاى من الأجازة
زى حال الرشيد كده
عشان كده استعدادات رمضان , تروح فى حق الله
لأنو الواحد لسه بيكون فى مود ما بعد الأجازة
اها السنة دى , الآبرى وصل من بدرى , والرقاق كمان
دقيق القراصة جهزناهو , والعصائد كمان
باقى لينا بس الصوم , ياحليل ريحة (الزريعة ) المالية الحيشان
ده زمان طبعا , واهم شىء الفهوة والبن , دى بقى عندها خلطة سرية العاوزها يرفع ايده
جلا نزل ايدك , انت كمان بيوروك الفهوة والبن
عارفك لو عايزن بتركب ليك فى جيب وتقطع الحدود
تمشى لى ناسها واسيادها
هسى عليك الله فى رابط بين كلامى عن القهوة والبن
وقصة طارق جبريل الجديدة , عن الدخان وحفرته
جلا قال جيولوجيا قال
دى علينا نحنا , الجاب الجيولوجيا للدخان وحفرته شنو ؟؟؟
ياخى ده بيولوجى عدييييييل
ولو انى حسيا انو الواد طارق ود جبريل ود جيرانا , داير يديها ابعاد (سسيولوجية كمان )
اها , اتجدع يا ود جبريل , فنحن دايما , متابعين , وحتما , مستمتعين
وعن شناة الزقازيق , ووحشتها , الا فى الصور والدواخل , حا ارجع واكلمكم
وعن قون حمودة , ونظام (الهلال الجديد ) , برضو عندى ليكم كلام
ده لو الكفيل , ادى منصور ود عبد الرازق فرصة
محمد صديق , عندكم سمبوسة فى رمضان ؟؟ وتيب
احبكم , حبى للشوربة الحااااارة
والليمون الباااااارد
والحلو مر الطااااااعم
والقطر قام
| |
|
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
يا نجيلة فى مثل بقول المرسال كان ريح بالك ما بريح كراعك
يعنى من صورك دى ما فهمنا حاجة
طيب وانت جاى من المساكن بزقاق المحلج فى نهايتو على اليسار
مستشفى المبرة وبعدو نادى الشرقية ونهاية النادى تلف يمين
فى شارع صفير تمشى فيهو ذى 100 متر وتلف شمال عشان تدخل
الجامعة من خلف كلية طب الى ان تصادفك جاموسة علوم وعينك هناك
لكلية تربية قافلة السكة ، تلف يمين اذا كنت قاصد حقوق وتجارة
او شمال قليلا" اذا كنت ماشى اداب
سؤالى استاد الزقازيق مش فى نفس الشارع الصغير البعد نادى الشرقية
بس بدل ما تلف على الجامعة بتمشى طوالى ( سـيدا )
** وجامع الفتح بيقع على يدك اليمين اول ما تخلص زقاق المحلج ؟
انا كده ماشى كويس ولا طاشى يا جماعة ...
ـــــــــــــــــــــــــ
اتخيل لي الهكر كان قاصدنى انا لانو دخل باسم فوزى عبدالفتاح
وده جارنا فى الصحافة افتكرتو جاء يسلم علينا واول ما الصفحة 45
عملت حركات كدا وابتدت تفور وتغلى عرفت الحكاية فيها آآنه ويا جلال تانى ما تجازف
بتلحق صاحبك .
الريس واولادو رجعوهم من المطار يوم الخميس بحجة انو دخول مصر لازم بتأشيرة
من السفارة المصرية ورجع وعمل التأشيرة اليوم وحيسافر الساعة 6 مساء
ما عارف ليه المصريين رجعوا نظام التأشيرة للسودانيين ؟
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عبد الدائم سيد أحمد)
|
يا شباب مسؤلين من الخير الشيخ أمين سر بنات الشيخ
الحاصل ليهو شنو يبدو اللياقة ما أوكي من آخر مداخلة
ليه شايف النفس قايم تقول طالع ليه عالي ؟ طبعا يالرشيد
جلا كان مصاحبنا في الزقازيق و بيني بينك كان في موضوع
الجكس دا ما عندو ليه لياقة كافية أول ما حاول يعمل ليه ريش
قال لي أنا انشاء الله عايز اشوت ضفاري و كيف يا جلا قال يا
أخي .............. خالط وطالع ونازل أنا مالي ما عندي حنك؟
غاب عننا يومين ثلاثة و جينا الكلية شفنا ليك جلا الما بغبانا
الظاهر جاه شيك طاير اخفاه النمس عننا و طلع على طول علي بورسعيد
و عينك ما تشوف إلا النور آخر كشخات والغربية الشالات ما تديك
الدرب و آخر كرفتات و واقع خلط شديد في المصريات و آخر حنكشة و
حاجات تانية كثيرة علشان موضوع التضامن مع بنات الشيخ دأ ليه
مسببات كثيرة .و إن عتم عدنا . يا جلا
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عبد الدائم سيد أحمد)
|
| Quote: جليت مكان مستشفي المبرة دأ ما قادر اتذكر مكانه بالضبط |
يا موسى عيسى لو انت طالع من رسبشن تونتى ون وعينك لشقة ناس سامى وجلال ومحمد الهادى
مستشفى المبرة بيقع على يدك اليمين ، هو فى نهاية ابوطرطور بالضبط
بتلقى حول السور كتير من العجائز كبار السن منتظرين وقت الزيارة والواحد فيهم بيسألك
هى دى ( المشــفشـتيي ) بالفلاحى ،،،،
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عبد الدائم سيد أحمد)
|
يا عبدالدايم بيني و بينك الكبر ما حصل الواحد
فينا طبعا ساكن منشية أباظة قرب المدرسة العسكرية
و اغلب الأوقات كنا بتمرن في الميدان الشرقي
لاستاد الشرقية و لكن والله ماقادر حتى الآن استحضر
ذلك المستشفي و لكن أذكر أنه بعد استاد الشرقية بجي
مستشفي الجامعة الظاهر في الصورة و خلفة كلية الطب
و اذكر الجاموسة تمام وبالمناسبة جنب الجاموسة كانت
كانت هناك ام عرفة بتعمل سندوتشات طعمية خطيرة جدا
و طبعا ارخص سعرا من سندوتشات الجامعة و كمان يا
ياسر نجيلة بتذكر بتاع السندوتشات الفي المزارع
البين صدناوي و مدرج التجارة د دأ طبعا أبو الرخا
بعرفوهم الطلاب الفلاحين فقط ؟ بس فيه سندوتشات لاشون
و بيف حاجة ما تخلص ؟
| |
|
|
|
|
|
|
|
|
|
Re: ناس الزقازيق ... أجدع ناس .. (Re: موسي عيسي)
|
مساكم الله بالخير
تلفوني مع منصور يوم الخميس وأنا في الطريق الى أبوظبي كان يدور حول استعدادات رمضان...بيني و بينكم حسدته عليها لأني عايش شبه عزابي هنا...الخميس و الجمعة صحيح الواحد بيحس بطعم رمضان...و أنا لي رمضانين كده لم أشعر لهم بطعم و لا رائحة...رمضان ده بدينا الرائحة في السودان..حيث كانت ريحة الأبري تزكم الأنوف في أركويت حتى ان زهير الزناتي الخفيف اللفيف قال لي يا الرشيد الجماعة بيجهزو ليك في الأبري ولا شنو...قلت ليهو يا زهير انت من زمن الأبري البيجهزوهو في البيت...حسة بقو يشتروهو جاهز...
المهم نحن و الله الحاجات ما قصرن معانا...و الحاجات ديل والدتي و والدة نجاة حوفي...يعني نحن أبرينا جاهز و عصيدتنا جاهزه و بصلنا و دكوتنا و بهاراتنا جاهزين...لكن طباخنا السوري هنا ما بيغرف يعمل العصيدة...و العصيده دي أهم زول في قطور رمضان...و الواحد يقعد مشحتف لحدي يوم الخميس عشان يحس بطعم و رائحة رمضان..يا حليل رمضان ولمة رمضان...
و العصيدة دي يا أخوانا اذا لم يتحلق حولها الناس مثلما تحلقنا حولها عند ناس محمد صديق فلن تتذوق لها طعم...فطعم عصيدة ناس محمد صديق وبالرغم من ان خالدة سكبت فيها عصارة خبرتها الا أن طعمها جاء من وجود جلا وزهير و محمد صديق و خالده و ابتهاج....
و الأبري و العصيدة يقودانني الي حكاية لطيفة..كان في جماعة بيفطروا في الشارع...و في يوم كان الأبري كتير جدا بالجرادل لكن عصيدتهم شوية يا دوب تكفيهم...جاء واحد ماشي فقالو ليهو يا زول تعال أفطر...فلبى الرجل الدعوة وجلس ليفطر...كلما يمد الراجل يده للعصيده الجماعة يدوهو ليك كوز أبري كبير...يشرب الكوز يجي يمد يده يدوهو ليك كوز تاني...المهم مد ديه للعصيدة قامو الجماعة مدو ليهو كوز الأبري...قام قال ليهم الحمد لله من الأبري....
بجيكم راجع
| |
|
|
|
|
|
|
|
|
|
Re: ناس الزقازيق ... أجدع ناس .. (Re: موسي عيسي)
|
Quote: ياحبايب سلام
خميس وجمعة اجازة , عشان رمضان
تجهيزاته يعنى |
بالله عليكم الله اتخيلو الزول الما جايب خبر دا!!!!
أدوهو راسو.....
يا منصور خلينا نحن العندنا بسبوسة في رمضان!!!
إنت عندك هكر؟؟؟؟؟ وتيب
Quote: يا نجيلة فى مثل بقول المرسال كان ريح بالك ما بريح كراعك
يعنى من صورك دى ما فهمنا حاجة |
كدا يا ياسر نجيلة كلامي القلتو قبيل في محلو
رؤيتك الإخراجية تحتاج إلى مراجعة
رسل الصور بي فلاش للأخ سيد الحوش عفواً سيد البلد زهير الزناتي
محمد عيد معليش نسوي شنو غلبو كانو بي حقهم!!!!
| Quote: و إن عتم عدنا . يا جلا |
يا الرشيد موسى عيسى لا زول ليل لا زول نهار
بعدين مش في مثل بقول
العفش داخل البص على مسؤولية صاحبه
زولكم حسب وجود الكفيل (موسى عيسى داخل المكتب على مسؤولية الكفيل)
الكفيل موجود يعني مداخلات مافي
الكفيل مافي زكرياتو ما عندها حد
أقول ليك حاجة يا موسى أنا لا عدتم و لاعدنا
جلال و الله عايز أصاحبك و أقيف في صفك
و شايف نفسي قاعد أشوت ضفاري في البوست دا....
بس درستك كويس ..... المشكلة ما عندك حاجة مميزة..... ولا مغريات و لامشهيات
بالله رجاءً أبرز ما عندك أي حاجة تشفع ليك
عشان تكون صحبي
أحبكم يا ناس
حب جلال لي كفيلو
تخريمة
أعكسو شعور جلال للكفيل بطريقة إيجابية
أكيد حتلقوني
| |
|
|
|
|
|
|
|
|
|
Re: ناس الزقازيق ... أجدع ناس .. (Re: موسي عيسي)
|
Quote: يا موسى عيسى لو انت طالع من رسبشن تونتى ون وعينك لشقة ناس سامى وجلال ومحمد الهادى
مستشفى المبرة بيقع على يدك اليمين ، هو فى نهاية ابوطرطور بالضبط |
ماشاء الله عليك وعيني باردة يا شيخي - والله الذاكرة تمام ياعبد الدائم
تصور انا يوم الخميس يوم الهجمة الهكرية الفاتت دي يتصل على (محمد عيد)
اقوم اقول ليه - منو معاي - اها زولك ما حريف ياخ وكلوا زوق وتجنباً لاحراجي يقوم يقول لي:
الظاهر عليك كبرت وداير ليك كركم - اها طوالي نقشتوا.
احبكم .... كل ما تقدمنا في السن (وطششنا)
--------------------------------
جلا الشعارات بتاعتي دي حقوق الطبع محفوظة - بس ممكن تستعملا
اها الجاب الكلام ده شنو:
بهاء الدين السأل منو سامي ده زول غاية في الظرف واللطافة
وكنت كل ما اشوفو أقول ليه وين يا(بهو)
اها زولك طوالي يقول لي بالله يا جلال ما تستعمل أدبيات أمي لو سمحت
تحياتي له اين ما كان ... وادونا اخبارو بالله
سمسم (مشتاقون ياخ)
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
السلام والتحايا العطرة لأجدع ناس ...
جميعكم بدون فــــرز ...
وربنا يزيدكم ويوفقكم ويحفظكم ...
اتهكـــرنا والله فكانا فله الحمد والشكر ..
وانت يا عبدالدايم كنت غاطس وين ؟؟؟
ارسل ليك ايميل عشان تشوف لينا بكري
تدق طناش؟؟؟!!!
بااااالغت لكن ... (وجه مستغرب)
تخريمة:
الصور الزقازيقية الخالصة ردت فينا الروح
وكانت لنا ايام
شكرا ياسر نجيلة
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
Quote: جلال و الله عايز أصاحبك و أقيف في صفك
و شايف نفسي قاعد أشوت ضفاري في البوست دا....
بس درستك كويس ..... المشكلة ما عندك حاجة مميزة..... ولا مغريات و لامشهيات
بالله رجاءً أبرز ما عندك أي حاجة تشفع ليك
عشان تكون صحبي
أحبكم يا ناس
حب جلال لي كفيلو
تخريمة
أعكسو شعور جلال للكفيل بطريقة إيجابية
أكيد حتلقوني |
سبحان الله يا ود الحلال - شوف الفرق بين مداخلتى الفوق دي ومداخلتك الفوقها طوالي
عشرة دقائق ... بالظبط
ده الوقت الانا دايس فيهو (رد) وقام الكفيل اتصل هاتفيا بيسأل من بعض الامور
اها وزعتو (زي ما بعمل منصور) وكبست رد
رجعنا للحوش لقيتك كاتب الكلام الفوق ده
والله حاسي بيك .... واليوم داك زهير قال ليك (جاك بلا)
وأنا بقول ليك صابونك جا ...
انت دي عارفها ... شوف الوالد (بحكم عمله سابقاً في الشرطة)
عندو صعلقات كده ما بعرفوها الا ناس محمد صديق وابتر وعمار ....
اها لامن بت الشيخ تقوم تناديني لايً حاجة وانا ادق الطناش ... طوالي زولك يقول لي:
شوف صابونك ده عاوز شنو ... انا بيني وبينك مانقشتها كم مرة كدة
قمت سالتو (وليتني لم افعل) صابونك يعني شنو؟
بالله شوف زي ده مابتعرفك صابونك؟ طيب المخليك نضيف كده شنو!!!
لكن انت رايك شنو في صابون عبدالدائم؟
المهم ياسيدي
كامل تضامني معك في محنتك بعدم مقدرتك للوقوف في صفي
موسى عيسى .... مساء الفل يا باشا
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
| Quote: جلال عثمان...طمني عليك بالله رمضان بالخبراء الأجانب و لا بالمحليين |
حمدلله على السلامة يالرشيد (ورجعت لي قواعدك سالماً) طبعا قصدي تلفون منصور بتاع يوم الخميس
المهم ياحبيب رمضان بالخبراء الاجانب طبعاً ياخ .... انت ما شايف السبعة نقاط دي ياخ (ولا عزاء لمحمد عيد)
طبعاً بقو محليين (مازدا رجع تاني)
وتضامنا مع حوشنا ده (عشان دهب - عيد - موسى عيسى) تاني منو ما ينقطعوا ان شاء الله يفوزوا اليلة
وما يرجعوا للموز ابو نقطة تاني
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
Quote: احبكم .... كل ما تقدمنا في السن (وطششنا)
--------------------------------
جلا الشعارات بتاعتي دي حقوق الطبع محفوظة - بس ممكن تستعملا |
المداخلات السابقة أفتكر تمت في زمن واحد أو قل متقارب
و الغريبة أنا قلت لي جلال
أبرز ما عندك حتى يشفع لك لأن تكون صاحبي!!
كدي يا جلال راجع شعاراتك دي
و أنا شايفها قاعد تتعارض مع شعاراتي
حتى و إن كانت متشابهة شكلاً و مضموناً (حسب تعبير زهير)
إلا أنها مختلفة برضو شكلاً و مضموناً
كيف؟؟؟ ما عارف
مافي زول يسألني و يقول الكلام الفات دا ما فاهمو....
أحبكم يا ناس
حب محمد عيد للمريخ
وحب محمد صديق للهلال
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
| Quote: جلال عليك الله استعمل أدبيات حاجه أمونة...ما عندي مانع |
تسلم ياحبيب
وألف رحمة ونور للحاجة أمونة ... بس ياخ الدعم الفني ده انا بحولو ل طارق جبريل
ياخ زول حكاياً لامن مسلط ....
دحين دخاخينو القال عليهن ديك ريحتن ما طقت؟
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
ابو الزوز مبروك ياخي...أها من منازلهم و لا من جوا الاستاد...لو من الاستاد بتكون ما غيرت المساطب
عشان القونين جو في الشوط التاني....
و بعدين قبل ما يجي الهكر أنا قلت ليكم متابع و مستمتع بس...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
يا رشدي أمبارح الناس من صلاة الظهر ملأت الإستاد تماماً ، وقدر عدد الذين خارج الإستاد بحوالي
25.000 متفرج ، والله الكلام دا حقيقي وداخل الإستاد أكثر من 40.000 متفرج يعني كوره موت عديل
كده ؛ حضرت المباراة مع محمد صديق بحضور قائده المباشر وحكومتنا المحلية ، واستمتعنا من منازلهم
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
Quote: و لا من جوا الاستاد...لو من الاستاد بتكون ما غيرت المساطب
عشان القونين جو في الشوط التاني |
إنت يا الرشيد
المباراة الإنت حضرتها
كانت وين؟
في زريبة العيش؟
ولا المقبرة؟
و لا المفخرة؟
و لا القلعة الحمراء؟
ولا الأستاد الإفتتحو بلاتر؟
أحبكم يا ناس
حب مازدا للتلاتة تلاتات
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
Quote: دكتور احمد أمين ...
منور يا باشا والله وحمدلله على السلامة |
و الله يا جلال أنا إجتهدت عشان أعرفو
ما قدرت
خشيت الملف بتاعو
لقيتو فاضي غير أنو هو رجل و متزوج
دفعة منو؟؟؟
ما عارفين
بحب شنو (مش منو)؟؟
الله أعلم
لونو المفضل؟؟
ما مذكور
في الحقيقة أنا خفت يكون الهكر زاتو
لكن تحذير محمد عيد بإسم غير د. احمد
خلاني أجازف و أخش الملف بتاعو
غايتو ما في حاجة غير إنو أقول ليكم
أحبكم يا ناس
حبي للناس البدس معلوماتها
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
Quote: و الله يا جلال أنا إجتهدت عشان أعرفو
ما قدرت |
ده معناهو واضح .....
يعني من يوم كفيلك زهير رسل ليك الباسويرد دخلت الحوش توش في الميل كم كده ماعارف
يعني ولا مرة رشيت الحوش ده من صفحة (1)
دعوة لدكتور أحمد أمين يجي يوري جلا انو خريج سنة حفروا البحر 
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
مساء الفل يا حبابينا والله يازهير طبعا من الرجفة
جيت العصر البيت و مافي اي نفس للغداء عملت فيهابتاع
قران و حاجات كده و منتظر الساعة السابعة بفارغ الصبر
جيت من صلاة المغرب اول ما قعدت تسمع توش قون قونين علي
طول على المسجد تاني و منه للنت و الحالة خليها على الله
آخر طفش و زهج و ربنا يستر ناس البيت طبعا اي سؤال في
التنك طوالي يعني منها للفراش على طول و ما عايز اعرف
النتيجة كم ،
والله الحمد لله يا جلال الشفنا ثلاثة اربع مدخلات
حتة واحدة الكفيل داالله يهكروا ليكم اسبوع اسبوعين ؟
الشي الثاني يا جلال ابوك دا شفت بشهادة بس اعمل حسابك؟
بالمناسبة في الاجازة الفاتت معاي الوالد والاولاد جاءوا
من السودان و تعبت بنزلة برد شويه ابوي قال للصادق اخوي
قول لاخوك دا ما يجر في جلده الشوك ؟ والله حتى اللحظة ما
عارف الشايب بقصد شنو ؟
| |
|
|
|
|
|
|
|
|
|
Re: ناس الزقازيق ... أجدع ناس .. (Re: موسي عيسي)
|
لقيت الدار جلا اقصد خلا وقلت اجدع شوية علشان
بعد شوية حيجي الرشيد ناطي و يقول ليك الوردية
تبعنا نحن زاتنا عاملين زايغين قبل ما تجوو
و حنختفي يومين ثلاثة كده لغاية ما الشباب ينسو
موضوع الكورة دا بعدين نظهر والله يكون في عونك
يا محمد عيد والله الدراب يجيك من الامارات ؟ اعمل
نظام زوغناك و حاجات كده ؟ انت عارف ناس تربية
كانوا لسانهم طويل خلاص لحظة ما يقابلوا تجارة
ترصعهم ليك يختفوا من الشوارع كلها لا تشوف كشاح
ولا عبدالمجيد ( العربيِ) و جنابو بكسح لكوز!علشان
كده نحن اليومين دي في مامورية خارج الشبكة و سلام
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
سلام يا احباب
د.احمد حمد لله على السلامة
ناس الحلومر والآبري ما تمطقوا بينا ياخي
في البلد البعيدة دي الويكة بتصلنا بعد تلتلة
محمد عيد ونجيلة وموسى عيسى هاردلك
عشق المريخ دة ما خاضع لي قانون الربح والخسارة
دي حاجة بتجري في الدم (((الاحمر))) اكسير الحياة
| |
|
|
|
|
|
|
|
|
|
Re: ناس الزقازيق ... أجدع ناس .. (Re: طارق جبريل)
|
طارق جبريل...كنت تقول ياخي كان دبرنا ليك حلو مر...و لكن على سبيل المداعبة ياخي وليس الشماتة...أفتكر الهلال و المريخ قاموا باللازم...
الليلة محمد عيد ما فاضي ليك يا طارق...الراجل فاتح ليهو معركة بي هناك مع الشمات...أنا أدعوه للعوده لدياره سالماو ينسى الكورة...فالكورة غالب و مغلوب...أو هكذا كانت زمان لما كان عندنا كورة حسة بقى ما عندنا كورة و أصبحت الكورة غالب بس و طوالي نحن مغلوبين...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: طارق جبريل)
|
الللله يا طارق من ريحة الأبري...و الله حبوبتنا الأولى العملت الأبري ده لو حصلت أيام براءات الاختراع و الملكية الفكرية دي كان غنت لي جد جدها زي ما بيقولو...لو شفت كمية البهارات الفي الأبري ده...تهيج ليها أعتى قولون...و برضو حاجة لذيذه...توليفة غريبة من المكونات المتناقضة تعمل العجب العجاب...المره دي لو عرفناها منو كان عملو ليها تمثال زي بعانخي و تهراقا و الجماعة ديل...
الغريبة يا طارق تكون عطشاااااااااان تشرب الأبري ده العطش كلو يروح...و العجيبة ريحتو في التلاجة و خصوصا في رمضان...تفتح التلاجة تجيك ريحة الأبري طاقة تضربك في دماغك محل بيدي اشارات العطش ديك...يقوم يغلبك الصبر للمغرب...طارق ما المغرب حقتكم...أذان المغرب يابا...
و كمان يا طارق الأبري التاني...عصير التيشوز...داك كمان ما عجيب...داك تروية و شبع....كان شربت ليك كبايتين بيحمنك الفطور عديل كدة...الا تمشي التراويح تهضم شوية بالصلاة و بعدين تجي تآكل...زي جيرانكم الموريتانين...ديل لو عزموك فطور اعتذر طوالي...ديل الفطور بتاعهم شوية شوربة و عصير وتمر...و بعدين يصلوا المغرب ويمشوا يصلوا العشاء و التراويح و بعدين يجو يفطرو...انت لو ما عارف تمشي تصلي العشاء و تتخارج تمشي تشوف ليك لقمة بعد الجوع الدخلو فيك الجماعة...يلاقوك تاني يوم يقولو ليك انت مالك ما رجعت للفطور بعد الصلاة...
و بعدين يا طارق ما كل الأبري أبري...في أبري طاعم و لذيذ...و في أبري لو ما هيج قولونك ما بتعرفه أبري...و الخبره بتلعب دور في الحته دي...الخلطة و كمان العواسة زاتها ليها دور ...يا زول القصة ما ساكت كل من هب و دب بيعمل أبري...و بعدين عواسة الأبري دي مشهورة بيها بيوت معينة...زي زمان مفتاح الكعبة كان في بيت وسقيا الحجاج في بيت و هكذا...زمان كمان كان في بيوت معينة مشهورة بعواسة الأبري...
لكن حسة القصة جاطت...و أكل العيش دخل في القصة...لكن ما زالت تلك تحتفظ بسمعتها...يعني كان في زول بيعزك شديد بيجيب ليك البري من بيوت معينة...لكن كمان كان داير يخمك بيشتري ليك من حق السوق وده بعدين لا طرقته ريحته بتصبرك ولا شرابه بيرويك....لكن الطرقة العندك دي أظنها أصلية يا طارق المحتفظ بيها ليك كم رمضان دي...و الله عافي منها العاسته...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
إنتو قبيل أنا مش قلت ليكم مازدا عاشق التلاتات
طيب المشكلة شنو؟؟
المهم الريخ عندو فرصة يلعب مع أول المجموعة الثانية
بس إنشاء الله ما يجي بي تلاتة
أوع واحد يقول لي إنت برة الشيكة
أحبكم يا ناس
حب طارق جبريل للآبري الأحمر
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
يا شباب
عندي مباراة مصيرية مع بوستين
الأول مع بحري طراوة
و الحمد لله تعادنا معه و فتناهو بي صفحة
الثاني الشعبية نجمة تزين......
شدو حيلك الناس ديلك واقفين في الميل 60
زيدو الجرعات ربنا يديكم العافية
أحبكم يا ناس
حبي لي قلب الصفحة دي
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
الرشيد كيفنك ابوي
تعرف زمان عواسة الحلو مر دي كانت امنقة حاجة
طبعا كل بيت في الحلة عنده يوم
ولو عندك جكس ملبدو من الحلة يوم عواسكم تجي بجيك لحدي عندك
خليني ساكت ياخ نقوم نرمي جواكرنا في الليل دة
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ياسر نجيلة)
|
صباح الجمال ما قدرنا نختفي و شايف محمد صديق
بمعلومته دي رجعني عن الزوغة يا محمد صديق على مدار
أربعة سنوات تربية ما غلبت تجارة غير مرة واحدة في
دورة الخريج 88 بنتيجة 4/2 و اذكر الاهداف انت هدفين
والسيد السنى هدفين طبعا ما حانساه مطلقا لأنها كانت
حارة شلنا الكاس و نحن مغلوبين؟ يعني يا جنابو كنتم
أغلب الأوقات ملطشين زي لطيشت المريخ امس دي ! و يا طارق
جبريل و ياسر نجيلة وود عيد بسيطة هي اصلو الكورة
غالب و مغلوب زي ما قال الرشيد و بعدين بكرة الحكايةدي
بتتنسي لازم نخلي اخلاقنا كوروية .العجب يا ياسر الاولاد و
البنات كلهم بيشجعوا المريخ الا امهم متمرده و الله البارح
واحد فيهم اتعشى مافي ؟
| |
|
|
|
|
|
|
|
|
|
Re: ناس الزقازيق ... أجدع ناس .. (Re: موسي عيسي)
|
صباح الخير و الجمال عليكم
Quote: العجب يا ياسر الاولاد و
البنات كلهم بيشجعوا المريخ الا امهم متمرده و الله البارح
واحد فيهم اتعشى مافي ؟ |
موسى عيسى ...أنا شن قلت يا أخوي...قلت ليك بركة بنات الشيخ دي ما سهلة...حسة عرفت سبب الهزيمة ولا أكلمك...بت الشيخ تبعك طلعت هلالابية....
بعدين المتعشين ليها شنو....مش كفاية بتنا الهلالابية دي تعشي فيكم طول عمرها...والله لقيتوها...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: موسي عيسي)
|
د/ احمد امين وووو الله القلوب شواهد
امس اتذكرتك وكنت عاوز ارسل ليك ايميل اسأل عن احوالك
لكن لم يصلنى اى ايميل منك بخصوص تهكيرك و ليك العتبى يا سنيرنا
يا برالمة هوووى بما فيكم رشيد القوم د/ احمد خريج بيطرة 84م لكن ما زال شباب
يعنى دفعة ناس منصور و سهير ابو طيارة
ــــــــــــــــــــــ
ونشوف عمر نملوز قال شنو فى اصحابو محمد صديق وحسن طبلة
في لفته رائعه من الصديق محمد وعد بالبحث بايجاد تلفون حبيب الكل حسن الطبال وهي صفته الصديق
وعد فاوفى فله من البعد:-
الصديق صفاتك عالي ماك حقير
من يومك بدرنا وشلت كل تقدير
الواجبات فروضك تتم بدون تقصير
بنحلف بشروقك رزقنا يبقى وفير
طبعك ياالمجمر صافي ماهو عكير
كلماتك رصينه باينه زي تعمير
بتطلع من قليبك موزونه بالتعبير
نفحاتك نسيمه شميمه كله عبير
الصديق مهذب فات صغير وكبير
قليبك فتحته بدون لزوم تشفير
وايدك بتكسي كل ضعيف بحرير
غلطان من يلومك ياشهم انت امير
من منا لم يمازحه ويصادقه اكاد اجزم صادقا انه داخل الجميع وسكن قلوبهم واسكنهم حبه بل لابسهم واستلبسهم.. حسن علي حسين أشهد باني لم اسمع منه ولو على سبيل المزاح كلمة لا ياتيك كانه صاحب حاجه ولو صبرت وتتبعت خطاه لوجدته يسعى لقضاء حاجة من لاتعرف، احب الجميع حسن بسرعة بديهته وخفة دمه وروحه يلقى الكلمه ويتلقاها بكل عفويه وتشعر حين تلقاه بانه يستبصر شئ لاتراه ... يتواجد في كل الامكنه وفي نفس الزمان حاله حال المريد وسره كان ومازال يسري وكان يدري، سالته في احد المرات ليه ياحسن؟ فصمت برهة ظننت انه لايحب ان يرد السؤال القصير الطويل
واجاب بصوت غير الذي تلبسه: كل شئ بوقته وجرعه وبتكمل، أحسست لحظتها بصدقه وكيف لا ولم اسمعه يوما ناقلا للكذب اوشماتا في الغير. كان ومازال يحب الجميع.
تواصلت بالامس القريب مع الطبال واتاني صوته الذي تتخلله ضحكته بين كل جمله والاخرى وتيقنت انه جرعته الاوله قد اكملها وينهل الان من توتيل سيدي الحسن. سوف اعود لاحكي عن الطبال من الزاويه التي رايتها..
عمر نملوز
0031647103728
[email protected]
| |
|
|
|
|
|
|
| |
منصور عبد الرازق
الرشيد بابكر
محمد صديق
محمد عيد
ياسر نجيلة
طارق جبريل
محمد آدم النور
جلال عثمان
زهير الزناتي
موسي عيسي
اسامة أبتر
سامي عبد الوهاب إدريس
عبد الدائم سيد أحمد
فيس بوك
تويتر
انستقرام
يوتيوب
بنتيريست