ما دام دخلت اول واحد فى صفحة 12 يا جلال نبتدى ببرلمتك التى اتمتدت معاك الى يومنا هذا
البرلوم جلال كانت لديه الرغبة فى الانضمام لسودانيزاونلاين وتحدث مع الاخ زهير عن تفاصيل التقديم وكدا .... وبالفعل تم التقديم للعضوية . وفى الشهر اللى فات اتصلت انا بجلال بعد ما غيرت صوتى وقلت ليهو معاك المهندس بكرى ابوبكر صاحب موقع سوانيز وقبل ما اخلص كلامى حسيت انو الزول قام من كرسيهو وترحيب شديد وكسير تلج مووووبالغة ... قلت ليهو وصلنى ايميلك وانا برحب بيك وعرفت انك من ناس الزقازيق بس حبيت اعرف شوية تفاصيل عنك شخصيا" ذى اتجاهك السياسى وعلاقاتك الاجتماعية كنت بتمشى مع منو وهل كنت مرتبط بزميلة ولا اى حاجة ذى كده ... اخونا نفى حكاية الارتباط لكن اكد صحبتو لسامى ومحمد الهادى وناس كده...... الهم بعد برلمة امتدت لاكثر من نصف ساعة ، قلت ليهو يلا ارجع افتح ايملك بتلقى الباسووورد وخليك حريص عليهو وربنا يوفقك ..... وقفلت الخط . ما كان من اخونا البرلوم الا واتصل بسامى عبدالوهاب يحكى ليهو عن كرم المهندس بكرى واتصالوا بيهو شخصيا" ، لكن بيسأل سامى انو ما لاقى اى ايميل ولا باسوووورد ويقول لسامى عليك الله اتصل ببكرى انا بخجل منو قول ليهو جلال قال ليك ما جاء ايميل منك وكبكبه شديدة .... سامى قال ليهو والله يا اخوى باين عليك اتبرلمت ، راجع تلفونك شوف الاتصال جايك من ياتو مدينة ..... بعد شوية تلفونى رنه ، لقيت جلال هايج ويكورك والله يا عبدالدائم تنزل الحصل ده فى بوست الزقازيق تانى ما اتكلم معاك ، قلت ليهو حاضر . لكن الان بعد ما استلم العضوية الحقيقية ادانى الاذن ما عارف هل عندو شمارات عاوز يفكها وعاوزنى امهد ليهو الطريق ولا شنو يا برلوم العضووووية ...
11-17-2008, 08:56 AM
سامي عبد الوهاب إدريس سامي عبد الوهاب إدريس
تاريخ التسجيل: 11-15-2005
مجموع المشاركات: 1509
خالص التعازى للاخ العزيز مرتضى الفكى فى وفاة والده وللاخ السمؤال عوض السيد فى وفاة ابن اخيه نسأل الله العلى القدير ان يتغمدهم بواسع رحمته ولاهلهم وذويهم الصبر والسلوان وحسن العزاء وانا لله وانا اليه راجعون ولا حول ولا قوة الا بالله .
11-17-2008, 10:00 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
التعزيه نسوقها حاره للأخ/ السمؤال عوض السيد في وفاة إبنه والأخ/ مرتضي الفكي في وفاة والده ، ألا رحم الله الفقيدين وأسبغ على أهلهم وذويهم الصبر والسلوان إنا لله وإنا إليه راجعون،،،،،،،،
11-17-2008, 10:16 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
يا جلال يا أٌبٌها إيه البرلمة دي كلها ،،،، معقول يا جلال يسرح بيك النضيف ويدويك البحر وترجع عطشان ،،، دي بصراحة من العيار التقيل بس أنا زمان قلت ليكم أعملوا حسابكم من النحلة دي قرصتها حاره ولا رأيك شنو يا ود نجيلة أها الشمار طلع ،،،، عايزين قصيدة بهذه البرلمة المؤلمة .
جاكم النحل أعملوا حسابكم
11-17-2008, 10:24 AM
ياسر نجيلة ياسر نجيلة
تاريخ التسجيل: 08-30-2006
مجموع المشاركات: 1798
خالص التعازى للاخ مرتضى الفكى فى وفاة والده وللاخ السمؤال عوض السيد فى وفاة ابن اخيه نسأل الله ان يتغمدهم بواسع رحمته ولاهلهم وذويهم الصبر والسلوان وحسن العزاء وانا لله وانا اليه راجعون
11-17-2008, 10:35 AM
ياسر نجيلة ياسر نجيلة
تاريخ التسجيل: 08-30-2006
مجموع المشاركات: 1798
Quote: اخونا نفى حكاية الارتباط لكن اكد صحبتو لسامى ومحمد الهادى وناس كده...... الهم بعد برلمة امتدت لاكثر من نصف ساعة ، قلت ليهو يلا ارجع افتح ايملك بتلقى الباسووورد وخليك حريص عليهو وربنا يوفقك ..... وقفلت الخط
والله يا جلال فت البرلمة بهناك .... انا خايف قلت ليهو انا بمشي مع محمد الهادي وسامي عشان اولاد بلدي سنار وبس .... غايتو الواحد ليهو زمن ماضحك بهذه الكمية ... عضك نضيف يا نحلة ...
الريس ميسرة دي عاوزة ليها معلقة عديل كده مش قصيدة:
لو مهاجر ماني هاجر ولو بغيب انا من عيونك انتا في عيني حاضر لا بتفارق لا بتغادر بس انا الممكون وصابر
اتاريك ياجلال ممكنون وصابر ......
11-17-2008, 11:49 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
مدثــر ابايزيد اول واحد فى وش الصورة لابس جاكيت بيج ركزو فى الصورة كويس وبعدين نديكم حكايتو ....
طالب بكلية الحقوق جاء ترانسيت من منطقة اسمها ارتقاشة بدنقلا للزقازيق يعنى العربى مكسر ، فى مرة من المرات كان عندنا احتفال بسيط فى الشقة ومعانا بعض الزملاء والزميلات ومن ضمنهم صديق حقوق وكان بيعزف على اله العود ، وطلبنا من الحضور كل واحد يردد المقطع من اغنية باداء منفرد انت حكمة ولا ايه .... ولا انسان انت صاحى ولا نايم ..... ولا طرفك من طبعو نعسان على طريقة بشير عباس والبلابل وبدأ كل واحد يردد المقطع لما يجى عليهو الدور ولما وصل الدور على مدثر ابايزيد فتح باب الشقة وقام جارى كان اجمل فقرة فى الاحتفال وسط ضحك الجميع .
Quote: كثيرة الكلام والهزار وشايله هم العرس دايما" وغير جاده كنا بنقول ليها عدم جديتك دى هى السبب فى اى واحد يفكر يرتبط بيك ... تـرد مكشــرة ** ليه مالي انا .... ** مالك شنو شينة وكمان بتأكلى واحد عيش بلدى فى الفطور يكفوك من وين .. ** عشان كده دايما" بتعاملونى ذى اخوكم ..... ** ايوا واحسن ليك تضمنى ليك عريس قبل ما تطلعى من البلد دى لانو لو رجعتى السودان موضوعك حيطول وخصوصا انك بتطلعى السنة بسنتين
القصة دي حقيقية يا عبدالدئم ولا من بنات أفكارك ولا بتكتب قصة على نمط موسم الهجرة إلى الشمال - أول مره نسمع بهذه القصة بالزقازيق ومين هي الأخت إلى كانت بتكتب جوابات لنفسها من خطيبها وتفتحوا قدام زميلاتها البنات أكيد ياعبدالدائم يا ديدو يا نحلة مقلب من مقالبك الكثيرة هل سمعتم بالكلام ده يا شباب ؟؟؟؟؟؟؟؟
11-17-2008, 12:53 PM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
والله يا ريس ما طالبنى حليفة حقيقية وكنا سامنها ...... الجنــنيتر .... يوم حفلة التخريج جاءت تطلع المسرح كعب العالى اتعلق ووقعت قدام الناس .... شفت الشلاقة اها دى كمان الدنيا كلها شافتها وعشان اقرب ليك الاسم قالو فى برلومة سألوها اسم خطيبها قالت ليهم ما بوريكم لكن الحرف الاول من اسمو عبدالقا.....
وقع ليك ..... واسأل بنات الانتفاضة لو ما مصدقنى
11-17-2008, 02:16 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22555
خالص التعازى للاخ العزيز مرتضى الفكى فى وفاة والده وللاخ السمؤال عوض السيد فى وفاة ابن اخيه نسأل الله العلى القدير ان يتغمدهم بواسع رحمته ولاهلهم وذويهم الصبر والسلوان وحسن العزاء وانا لله وانا اليه راجعون
11-17-2008, 09:34 PM
جلال عثمان جلال عثمان
تاريخ التسجيل: 09-13-2008
مجموع المشاركات: 1735
احر التعازى للاخوان مرتضى والسمؤل واحسن الله العزاء وجبر الله الكسر والله من قبيل بتاوق عاوز اخش اعزى مرتضى وولدنا السمؤل ده لكن عبدالدائم مافتاني فت وماخلا لي حتة اقبل عليها .... اه يانجيلة كلامي وقع ليك دحين يازول اختا الزول ده.
وشكرا ياديدو "كسير تلج" عشان تفك دربي
ياريس والله كلام عبدالدائم عن الاخت "الجننيتر" صحيح واظنك تكون عرفت من هي الان. مودتي
------------------------- انتو زهير خبرو شنو
11-18-2008, 07:25 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
Quote: ياريس والله كلام عبدالدائم عن الاخت "الجننيتر" صحيح واظنك تكون عرفت من هي الان. مودتي
يا جلال ما سمعت بهذا الموضوع خالص بس ما توضحوا هذا اللغز ولا هي فذوره أو برنامج سينمائي أم مصطلح متعارف بينكم ،،، بصراحة أنا مسطح والجننيتر ده يا خوي بيشتغل بالديزل ،،،، أنا منتظر مع المنتظرين لإحاطة اللثام عن هذه القصة الخيالية وكمان وقعت يا عبدالدائم في حفل التخرج ، كانت واحده شاغاله ولا شنو .
11-18-2008, 08:42 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
يا ميسرة شى طبيعى انت ما سمعت بيها لانو ده الجيل البعدكم ولقب جننيتر ده خاص بينا نحن اصحابها لكن هى فى الحقيقة ظريفة الظريفات حتى فى الكورة كان تشجيعها مختلف وعلى فكرة هى متابعة البوست ده من سنين وعلاقتى معاها كم هى واول امس بعد ما قرأت الموضوع اصرت على منحها العضوية وهى الان موجودة فى ليبيا واوعدك يوم ملتقى الزقازيق اديك تتكلم معاها ( قالت ليك كان تلقى لي وظيفة فى السعودية )
وبتسأل من خديجة ابراهيم رغم انها فى ليبيا وبقول ليها ارقامك فيها غلط وكمان بترسل سلامها لمشاعر بدوى وزهرة ابو على زراعة ومحى الدين اسحق وعاطف خليفة عجججججججججججيب وام جمعة لاعبة الكرة الطايرة . واستاذها خريج تجارة صفوت سليمان سيفين
11-18-2008, 05:21 PM
Hatim Gubara Hatim Gubara
تاريخ التسجيل: 11-14-2006
مجموع المشاركات: 704
أسامه موسي .... باخاف أحمد عوض .... ويييييين سميري طارق جبريل .... مافي حتي رساله واحده د. سناء الصباغ .... انت حكمه والا آيه (بالمناسبه سميره الصباغ وبكري جيراننا حيطه بالحيطه) وليد حقوق (وليد مبارك) .... بتتعلم من الأيام أمال البنجاوي .... أنا مالي وماله الأستاذ كمال الشادي .... ياضنين الوعد محمد صديق (جورج) .... حيرت قلبي معاك د. ياسر السراج .... ننساك انت انت بتتنسي د. قيس جمال الدين .... لمحتك قلت بر آمن وبديت أحلم الزعيم مبارك جادين .... في هواك ياجميل وبرضه الذكريات كمال خداري .... بدون تعليق د. عثمان الهادي .... من الأعماق يا حبيبي يا غالي ياسر شبيكه .... كل ماسألت عليك صدوني حراسك سمؤال تربيه .... الحسان في بربر يآآآآآآ عبدالماجد سقراط .... قامت ليه شوكه في راسه
والله انا ماعارف النضيف دة بجيب الحكايات دي من وين لكن قدر ما حكيت راسي ما عرفت الجنرييتر دي منو..غايتو حمدو في بطنه كما كانت الست الوالدة عليها الرحمة تقول؟؟؟؟؟؟؟ اخونا خلال والله الجاتك في passwardk سامحتك
حكاية زقازيقية عمنا ابراهيم سيلمان (كسلا)كلية التجارة ياريس الله يطراهو بالخير وحياه الغمام دائما كان عنده امتحان ملاحق دورة نوفمبر ..رجع من الامتحان بعد خروجه بوقت بسيط وعند سؤاله عن السبب قال لينا الامتحان ده انا ما بمر لاني لقيت (........)الكج..من الصباح غشان كدة جيت راجع الشقةمباشرة؟؟؟؟؟؟؟؟
مرحب اخونا جبارة بغد طول غياب
11-18-2008, 11:01 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22555
تابع فرمالات جبارة * جمعية الثريا بنــات - لى فى المسالمة غزال - حاول يخفى نفسو * ابو القاسم عبد الله تجارة - ما عدت قادر انتظر * عاطف على تجارة - الساقية لسه مدورة ( كان بيرفع عيونو كده لفوق ) * اميمة دفع الله تجارة - الليل الهادى * مكى تجارة - على الجمال تغار منا * مالك معهد تجارى - ان قلت والله يحبونى * زاهر الصادق زراعة - برسل ليك رسالة طويلة يا امى معاهو نابغة وامانى دفع الله
* ياسر شبيكة كان فى واحدة فى صيدلة بتعزف جيتار ما مذكر اسمها ؟
اما فرمالتى انا يا حاتم جبارة كانت اغنية نالت على يدها وان لم تأخذ حقها فى الانتشار حتى لكوظ ، وبعدها اغنية اوعك تخلف الميعاد اللى اخونا عماد شريف فى حفل تربية طلع بي سلم عالى قربت اتخنق وبالمناسبة كان صعب جدا لى واحد عندو صوت جميل يعمل بروفة مع عماد شريف الا يوم الحلفة وا قبلها بدقائق عشان كده كورالات تجارة كان كوجان فى كوجين ده غير اربعة تنفار ماسكين طرف ستارة القماش وجارنها فى المسرح .
وسبب شهرة اغنية نالت على يدها يرجع فى اطار استعدادات حفل تخريج تربية سنة 86 م رفض اخوانا الكيزان طلوع البنات على المسرح والاشتراك فى اى عمل غنائى ، وحصل شد وجذب بين رئاسة الاسرة والاخوة والاخوات الغير متكوزنين ، واخترنا اغنية نالت على يدها لكورال التخريج وفعلا" تمت البروفات ووطلعنا المسرح ( 3) صفوف من البنات اللى تعرف تغنى والما بتعرف واتقدمت الاغنية . رغم انى ما كنت مسيس الزمن داك لكن قمت بقيادة الكورال واصابنى ما اصابنى من هجوم ( والجريدة الحائطية التى علقت فى دار الاتحاد خير دليل ) ويا تبيدى خاتيها ليك اصبر لي .... واميمة دفع الله لسه برضو حالفة ليك ......
11-19-2008, 07:37 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
اغانى الكرتونة او كما يسميها نجيلة اغانى العروس الكلام مش فى البغنيها الكلام فى البيرقصها منو ، ولا ننزل الصور ونفتوووو ..... ما زمان قلنا غناء الكرتونة كان ليهو معجبيه ومرتاديه وفى ناس تشوفوهم تقول القبة فيها فكى .. وحاتكم لما ينشرح كده ما توقفوا الا البلكونة ....
ويا مبارك جادين ( الجننييتر ) بتعرفها عز المعرفة لكن الذاكرة بقت خربانة واحكى ليك عنها مرة كنا مستضيفين بعض الفنانين والعازفين لحفل تربية فى شقتنا وانت عارف بيحتاجو لشوية مزمزة واللازى منو رغم انى ما لي فيهم اها زولتنا جات دقت الجرس ، عاينت بالعين السحرية شفتها ، قمت سرعة سرعة لميت القزايز وختيتها وراء الكنبة ، اول ما قعدت .. عاينت كده قالت لي شقتكم دى مالا ريحتها متغيرة كده .. اها دى عليك الله يخارجوها كيف …
11-19-2008, 07:33 AM
عصام دهب عصام دهب
تاريخ التسجيل: 06-18-2004
مجموع المشاركات: 10401
صادق التعازي لزميلينا الفاضلين / مرتضى الفكي ـ السمؤل عوض السيد و نسأل الله تعالى أن يتغمد الفقيدين بواسع رحمته و عظيم مغفرته و أن يدخلهما فسيح جناته مع الصديقين و الشهداء و حسن أولئك رفيقا و أن يلهم ذويهم الصبر و يجنب الجميع مل مكروه ..
11-19-2008, 07:33 AM
عصام دهب عصام دهب
تاريخ التسجيل: 06-18-2004
مجموع المشاركات: 10401
صادق التعازي لزميلينا الفاضلين / مرتضى الفكي ـ السمؤل عوض السيد و نسأل الله تعالى أن يتغمد الفقيدين بواسع رحمته و عظيم مغفرته و أن يدخلهما فسيح جناته مع الصديقين و الشهداء و حسن أولئك رفيقا و أن يلهم ذويهم الصبر و يجنب الجميع مل مكروه ..
11-19-2008, 02:46 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
Quote: اخونا عماد شريف فى حفل تربية طلع بي سلم عالى قربت اتخنق وبالمناسبة كان صعب جدا لى واحد عندو صوت جميل يعمل بروفة مع عماد شريف الا يوم الحلفة وا قبلها بدقائق عشان كده كورالات تجارة كان كوجان فى كوجين ده غير اربعة تنفار ماسكين طرف ستارة القماش وجارنها فى المسرح
حيلك ،،،، حيلك يا فنان البوست النضيف ،،،، معقول إنت عايز تمسح تاريخ تجارة بجرة قلم أو بإستيكه ،،، لا يمكن تغيير التاريخ بسهولة كده إذا كان حصل شاهدت في بعض العهود الأخيرة لخبطه ده ما بغير الواقع تجارة كانت ممتلئة بفناني وموسيقي الزقازيق أمثال (كمال الشادي ، عاطف علي ، مكي أحمد محمد حمزة ، هشام محمد علي، أبو القاسم) وأنا ليست لي في الفن ولكن كنت في دورة 83/84 سكرتير ثقافي اسرة كلية التجارة ومعي فنان كلية التجارة الأخ/ مكي أحمد حمزة – رئيس الأسرة - وكنت أسكن مع فنان تجارة كمال الشادي و الأخ/ عماد شريف – عازف الأورغن ينزل عندنا في الشقة لعدة سنوات كلما زار الزقازيق وفي حفلات كلية التجارة التي كنا نشرف على إخراجها ومتابعة بروفاتها وكنا نستعيين ببعض الأخوة الذين يفهمون في الفن والموسيقى بحكم إرتبطاتناالإجتماعية والسياسية أمثال زاهر الصادق والفنان الموسيقار محمد العصامي طالب معهد تجاري وطالب معهد الموسيقى والمسرح في آن واحد وأرتبطنا عن طريقه بالفنان الموسيقار يوسف الموصلي الذي حضر حفلتين لكلية التجارة ونزل في إحدى المرات عندنا بالشقة أنا وكمال الشادي والثانية كان عند محمد العصامي وحضر بعض البروفات بحكم صداقته مع البعض وكانت من أجمل الحفلات التي قدمت في تاريخ الزقازيق التي أقامتها دورتنا في ذلك الزمن حيث أم الحفل الفنان يوسف الموصلي وفرقة الأكاديمية البحرية بالإسكندرية والأخ/ الصديق الفنان بدر الدين – بدر الدين شبين – وفناني كلية التجارة وفناني الزقازيق – وفنانين آخرين وعازفين أمثال مصطفى الجوخ ، وعازف الجيتار – الأول على مستوى جمهورية مصر في عزف الجيتار ،عادل الجبالي ، وقدمت فيها مسرحية جميله وإسكيتشات فكاهية وكذلك قدم فيها كورالات قدمت في معهد الموسيق والمسرح ونقلت إلينا عن طريق الأخ/ الفنان والموسيقار محمد العصامي إبن الزقازيق ، والتي كان مدخلها :-
يا مطر عز الحريق ،،،، ،،،،، يا مصابيح الطريق يا المراكبيه البتجبد ،،،، ،،،،، من فك الموج الغريق جيينا ليك ،، ،،،،،،،،،،،،،،جينا ليك والشوق دفرنا يا نشوق روحنا ودٌمٌرنا ،،،،،،،،،،،،،،، يا المحطات الحنيني ،،،، القصرت مشوار سفرنا يا مطر عز الحريق ،،،،،، يا مصابيح الطريق ’’’’’’’’’’’’’’’’’’’’’’’’’’’’’’’’’’’’’’’’’’ ،،،،،،،،،،،،،،،،،،،،،،،،،،،،،،،،،،،،،،،
هذه الحفلة القوية كانت حديث الزقازيق لسنوات طويلة وضربت حفلة الإتحاد بكل إمكانياته المالية ، وتوضيح سياسي أكثر علشان ما يكون عندنا كورال وتفشل حفلتنا رفضت معظم طالبات تجارة – الكوزات – في ذلك الوقت المشاركة وكشت أخواتنا الأخريات وقد فرض عليهم حظر واستجابوا للحظر ولكن كسرت الحظر المفروض على غزة أختنا البرلومة في ذلك الوقت أميمة دفع الله وأطلقنا النفير لناس التجمع ودٌعمنا من بنات الزقازيق حتى فاض ببناتنا المسرح وأكبر الدعم كان من لكوظ يا جماعة بقيادة الأخـت/ إحسان عبدالعزيز ، وأمال فضل الله ، ولبنى ، وفائقة وأخريات،،،،،
وبعدين يا فنان البوست يوم لمة الزقازيقات بمدينة جدة ح تودي وشك وين أذكرك إن جمال السنوسي ،عثمان الجيل كان رجع ، وحنان مجمر ، وميسرة ناس تجارة وموجودين في جدة وكمان الرشيد خواطر وناس يوسف الزبير وآخرين حاضرين من مكة وعادل الجعلي جايك من ينبع ، على العموم شد حيلك ،،،، ألم تسمع شاعر البوست الكبير – ياسر نجيلة – حينما قال :-
Quote: تجارة حضارة فن واصالة دوما فايزة وشايلة الجايزة حتي الكورة
يعني تجارة كانت حضارة وفن وأصالة وقدمت كورالات قوية وجميله يشهد لها التاريخ في ذلك الوقت ,,,,
وأحب أذكر هنا أنها كانت آخر فرمالاتى بالزقازيق ، وكنا (أصحاب الفرمالات) نتنافس فى أن يجدد كل منا فرمالته وتقديم العديد والجديد من الفرمالات . كانت أولى فرمالاتى أغنية (ليالى الأنس لزاز بلحليل ... وكان قد تغنى بها فى ذلك الوقت الفنان " نجم الدين الفاضل " حتى أننى قد لقبت ب " درب البير " لفترة طويلة من الزمن. وتلتها بعد ذلك عدة فرمالات مثل " أرجوك يا نسيم روح ليهو .. بأشواقى وصرح ليهو .. " ، وأغنية كمال ترباس " يا يمة الله يسلمك " وكنت أغنيها عندما يكون غالبية الحاضرين من أصحاب المشاعر الرقيقة والعواطف الجياشة وكان بعضهم ينهج بالبكاء ، وأغنية " أنا فى شخصك بأحترم أشخاص وطبعا عندى احترامك خاص " ، وغيرها من الفرمالات العاطفية والوطنية .
هذا الموضوع أستفز لدى بعض الذكريات والخواطر التى قاومت وأبت البقاء فى أسر الذاكرة
أذكر أنه كنا فى أول شهور لنا بالزقازيق - ومافى واحد فيكم يسألنى سنة كم - كانت دفعتنا فى الزقازيق (لكبر حجمها) فى كل الكليات والمعاهد قد غيرت معالم الحياة الطلابية بها ومصر المحروسة بصورة عامة وابتدأ ظهور ابداعات الموجودين مع نشاط وسرعة ايقاع القادمين يظهر بوضوح ويفرض نفسه وبقوة فى كل مجالات الحياة . يعنى بدأت التنظيمات السياسية فى الاستقطاب والتجنيد وطبعا كان هناك مجموعة لا بأس بها جلية جاهزة من السودان - كذلك حركة الخلط يا عبدالدائم (وطبعا هناك أماكن تشهد هذه التحركات مثل كازينو النهر ونادى الشرقية والشرقاوى وسويت بسام والسفر الى القاهرة وهلم جرا زى ما بيقول السيد الصادق المهدى ) - والثنائيات سواء كانت نسائية أم رجالية فى شتى المجالات ومن أمثلتها : الدرديرى وجمال – المرحوم عارف وطارق رضا – هدى مكى وعائشة كروم وجميعهم من كلية الصيدلة وغيرهم الكثير فى كل الكليات والمعاهد - أو مختلطة والتى انتهت معظمها بالزواج بدأت فى الظهور للعيان والتأثير والتأثر وامتدت العلاقات الى الأسر فى السودان و نحرص على تواصل هذه العلاقات حتى الآن
وفى السنة الأولى كنت أشارك ضمن المشاركين فى التحضير لحفل الاتحاد الذى كان وقتها برئاسة الدكتور / أحمد حامد أبو السبح ومن ضمن الفعاليات كنا نحضر لتقديم كورال " هام ذاك النهر .. يستلهم حسنا " للفنان الكبير محمد وردى . ومن الذين أذكرهم الأعزاء : - الدكتور / صلاح دفع الله - الدكتور / عبدالرحمن خليفة - الدكتور / محمد الحسن عثمان ( الباسم الكبير ) - الدكتورة / اشراقة الجيلى وشقيقتها الدكتورة / - الصيدلانى / أسامة مبارك وكثيرين لم تسعفنى الذاكرة بهم الآن خاصة وأنى بأكتب من الرأس مباشر للكيبورد
تم تقديم الكورال بصورة ممتازة وكنا فى قمة الفرح واستمتع كل منا بطلعاته الفردية وكان وقتها بالقاهرة الفنان الكبير عثمان مصطفى يدرس للماجستير فى معهد الموسيقى العربية وقد لبى مشكورا دعوتنا له هو والمبدع المتعدد المواهب الأستاذ عبادى محجوب. الطريف فى الموضوع أنه بعد نهاية الكورال سألنا الفنان عثمان مصطفى وهو الخبير والدارس والعالم بأسرار الأداء والموسيقى عن رأيه فى الآداء ، وكانت اجابته بأنه الأداء جيد ، الطلعات الفردية ممتازة .... لكن الايقاع بتاعكم مقلوب .............
سأل الحبيب عبدالدائم
Quote: • ياسر شبيكة كان فى واحدة فى صيدلة بتعزف جيتار ما مذكر اسمها ؟
والاجابة هى : الصيدلانية / ايمان أبوبكر
تحياتى وسلامى للجميع
ونواصل
11-19-2008, 10:36 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
أنهت اللجنة السياسة إجتماعها تواً بشقة شارع الشهيد أحمد إسماعيل صيدلية د. حسن بمدينة جدة والتي أنتهت الساعة 11:40 دقيقة مساءً على أن يكون تجمع الزقازيقاب جدة وما جاورها ، والضيوف الكرام يوم الخميس 13ذوالحجة الموافق 11 ديسمبر بعد صلاة العشاء مباشرة بمدينة جدة بحديقة الشرفيه شارع خالد بن الوليد جوار حديقة الدلافين وهذه الحديقة تم التجمع فيها سابقاً، حضر الإجتماع كل من عصام دهب وعبدالدائم وجمال السنوسي وميسرة ود. حسن وتم توزيع المهام والدعوه لجميع الإخوة خريجي الزقازيق وعائلاتهم وضيوفهم الكرام.
شباب رائع ... جميل ... والله ذاكرة تحسدون عليها... برغم مرور اكثر من عشرين سنة استمتاع بالمرور خلال هذا الفيض من الاحداث ... توثيق نتمني ان يكون بموقع خاص بنا ...
الريس ميسرة شبيكة حاتم جبارة طارق جبريل وجادين وساري الليل عصام دهب (ذكرياتك وزياراتك كلها بعد الساعة 12 بالليل) وكالعادة النضيف ... تشكرو ... وراجين المزيد منكم ومن البقية ...
شباب جده ان شاء الله يوم لقاكم 10/12/2008 بحديقة الشريفية، ماتنسو التوثيق بالصور بس احذركم ماتخلو موضوع التصوير للعزيز جمال السنوسي ... يصور اي واحد منكم ان شاء الله مشكاة بت الريس ... لانو الصور ما حنلم فيها لو السنوسي صوركم ... ثانيا عند التصوير ركزو على الصور الفردية وكترو منها عشان الوجوه تقع لينا من جديد بعد مرور كل هذه السنوات ... وماتنسو عيالكم ....
وهاكم دي:
امانه الفرقة لما تطول تولع فينا جمر الشوق نظل صابرين ونحسب نحن في الايام سبت واتنين ونفط الجمعة في الاسبوع نلاقي اليوم بقي سنتين نكورك ااه مشتاقين
11-20-2008, 09:41 AM
Tabaldina Tabaldina
تاريخ التسجيل: 02-12-2002
مجموع المشاركات: 11844
شايف ياسر شبيكة وميسرة اخدو ليهم قفزة تاريخية للوراء .. وبالمناسبة دى عايز اسأل عن دكتورتين لهم معزة ومكانة سامية فى نفسي .. ويا ليت ان اجد وسيلة اتصال بهم .. فقد وجدت منهم كل تقدير ورعاية واهتمام ايام نحن صغار وهم د. حنان ود. زينب . اتمنى ان لا اكو مخطئفى الاسم وكان يميزهما الثوب الابيض واظنهم من عطبرة كما اعتقد ..
بالله لو فى زول لاقى خبرهم يدينا كوول ..
___________
د. سناء الصباغ لك تحية ود وتقدير وإمتنان
11-20-2008, 09:56 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
hehehehe@U يا نضيف ياخى بالغت والله حسن اكشن كملالخلوة وحفظ المصحف وعمل السبعة وزمتها بعد داك اهلو قالو يجيبوهو يقرأ ياخى الزول لمن كان بلطش الجماعة فى البنغ بونغ انا كان المضرب بقع من يدى
بعدين قصيرونى دا سنة اولى يعنى حسي خالد سحلب الجنبي دا واحمد عوض ديل يطلعو قصيرونى تربيع
____________
بالمناسبة محمد طاهر الفى اقصى يسار الصورة دا بقى تاجر توابل كبير فى جزر القمر .. لو احتجت لبهارات ولا حاجة ..
اها ما فى زول لاقى خبر د.حنان وزينب
11-20-2008, 10:19 AM
طارق جبريل طارق جبريل
تاريخ التسجيل: 10-11-2005
مجموع المشاركات: 22555
الصورة دي حفل تخريجنا على ما اظن لكن محيت كل الناس غايتو محمد شمس الدين مطرف وراء كدة ومابرك جادين في الناس القدام ديل معاهو خالد سحلب وعزة التجاني في الطرف كدة وجنبها صالح البرلوم وانا وراء خالد سحلب طوالي وجنبي احمد عوض ومحمد حسن برلوم زراعة وجنبه حاتم جبارة وعبد الله ود تربية ظاهر دماغو من تحت والوراي دة اعتقد نادر فاروق من علوم الباقين كلهم صفيتهم
11-20-2008, 10:38 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
عبد الدائم البيطري المدسوس البرسل ليك الصور دة منو
الصف الامامي من اليمين: د.اسامة طيارة ود. محمد شمس الدين ود. هاجر ووليد ابو القاسم الصف الوراهم: د. محمد بكري عبد الوهاب وزينب التجاني (زراعة) ود. اروى احمد خالد ود. نور الشام كرم الله الصف الاخير: د. حاتم جبارة ود. عائشة ود. ياسمين الحاج الطاهر و. دولت عبد الله والاتنين ديل جليتهم ويمكن يكونوا ضيوف
11-20-2008, 10:58 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
انا كنت بجي بيطرة كتير لقريبى طارق النــور وصاحبى حاتم جبارة وكان عندى كاميرا اشتريتها من قروش الميز كل شهر بسرق لي ذى جنيهه جنهين كده وبلمهم واها فى ناس كانو مصاحبنى عشان الكاميرا ... مع انى كنت عارف العلاقة من طرف ووووووواحد ... لكن والله بحبهم وبذكرهم
والفى الطرف الاخيرة دى مزار عبدالعزيز زراعة زوجة احمد السيد زراعة
واها فضولى انا قاصد بيهو دولت عبدالله لكن طبعا" انت فاكرنى قاصدك ..
التحايا والاشواق للاخت نورا كرم الله وعندى صور لبيطرة كتير تدفعوا كم ... وانزلها .
11-20-2008, 11:05 AM
طارق جبريل طارق جبريل
تاريخ التسجيل: 10-11-2005
مجموع المشاركات: 22555
ياطارق حبريل أنا كان د. محمد شمس الدين إبن عمي والسنة الأولى كان ساكن معاى في شقة سفن آب بجوار المحلج بالمساكن وما كنت بمشي كلية بيطرة ولا زراعة ولو تصدقوا أكون في عمري مشيت مرتين تقريباً فقط المره الأولى كان في معرض وعزمتني الأخت / تماضر على ما أعتقدكان هذاإسمها وكمان كان ناس مؤتمر المستقلين كميه كبيرة جداً بهناك وكانوا أصدقائي جداً أولاد وبنات أمثال زاهر الصادق ونصرين وعبدالروؤف وآمال فضل الله ولبنى ، وإحسان عبدالعزيز والبنت الحلوه الرقيقة جداً سناء الرضي ولكن ما كنت بمشي كتير وهم كانوا بزوروني بشكل شبه يومي لأني سكنت شارع القومية سنين طويلة بس الناس البتمشي كتير دي بتضهب (زي ما قالت د. سناء) اسألوهم عندهم شنو هناك .
ولكن الحقيقة الصور جميلة جداً وذاكرتنا ما زالت تحفظ اشكال معظم الناس إلى في الصور دي بس أكيد أشكالهم إتغيرت وحصل تغيير كبير .
11-20-2008, 01:46 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22555
يااخوانا دي طلة من بعييبيد ولينا عودة قوية.. سلام والف سلام.. سلام لي ناسنا الحلوين..ناس الزقازيق...
سلام لي اخوانا اصحاب الجنريتر.. وسلام لي ناس الفرمالات... سلام لي الناس الكاسحين في تربية وقالوا ما بعرفوا دروبها... سلام لي الشعراء ...ال متوقين وببكو بعيون ناس تانين...
سلام لي الريس ...ومدام الريس... ولي ست ابوها... وياناس اجتماعات جدة ماتنسونا نحن بكرة راجعين.. سلام والف سلام ...عثمان الجيلي
11-20-2008, 03:37 PM
Tabaldina Tabaldina
تاريخ التسجيل: 02-12-2002
مجموع المشاركات: 11844
الأخ المحترم عصام دهب تحية واحتراما تحية خالصة لهذا البوست الذي احيا ذكريات جميلة واعاد الى ذهني شخصيات لكم تمنيت ان اسمع عنها ..وها انت بصورك الفريدة وذكريات الأخوة والأخوات تعيدوا لي ذكريات اجمل سنة قضيتها في جامعة الزقازيق ..جئت اليها برلومةمن عطبرة واناالحلفاوية من حلفا القديمة..سكنت في بيت المغتربات . زاملت فيه الأخت حنان علي ـ علوم ـ في غرفة واخدة ومعها صــدوقـة،وسوسن ، ونجوى علي ، من علوم .. ولان انسى اخواتي ياسمين وزينب التجاني في بيت المغتربات البيت الذي ضم احلامنا وامالنا والتي اتمنى ان تكون كل من زنيلاتي حققتها .وكان هناك ماهر شاهين في علوم ومحي الدين في طب ومحمد حسان سعد الدين في زراعة ..ومن حلفا الجديدة كنت اعرف عبد الخليم وعوض .ومن عطبرة ودالبيه وود الجعلي وسامية وصلاح الشوش ..لم اكن اتواجد في الزقازيق كتير لوجود اهلي بالقاهرة ، في حقوق بتذكر ، من دفعتي ، امال بنجاوي وعوضية وهلا السعودية ولم اواصل للأسف بالزقازيق لرجوعي للسودان لمواصلة الدراسة بجامعة النيلين . ولوبتذكر حفل تخريج علوم ( مجموعة صدوقة وسوسن ونجوى علي )) كنت انا من البسهم طوق الورود بمناسبة تخرجهم وكان هذا اخر حفلة تخرج احضرها في الزقازيق .. اتذكر من تجارة ـ نجاة ميرغني واحمد بري والذاكرة تساقط منها الكثير لهم المعذرة اتمنى ان اسمع عن كل من زاملتي الجميل وان يكونوا قد حققوا احلامهم .. احلام ... الدوحة قطر .... الف شكر لك عصام دهب ..
طارق جبريل خرفت باين... النضيف ما حضرناهو... شباب صغير الوجيه ودالجيلي.. سلامات.. يانضيف حلو البنطلون الأخضر... ذكرني كان عندي جزمه خضراء..صور بيطره دي حأدفعك عليها خلو رجل... ياأحلام الحلفاويه.. باتذكرك تمام... كنا بنعرف كميه من ناس تهراقا عن طريق ماهر شاهين... كنا نسكن أنا وهو وطارق جبريل في أول شارع القوميه... أظنك برلومه في الزمن داك... الزعيم مبارك جادين... ياحليل أيامك... نجيله يا أصلي... ابداع ماممكن... الزناتي وين يااخوانا.. في الخلاء لسع... ووين الصادق ... وشبكش.. ياريس.. كنت في اتصال دائم مع شمس.. لكن غيرالايميل... عندك ليه تليفون أو ايميل... بس مااتوفقت في تجاره حضاره دي يمكن قصدك كلمه تانيه... ود دهب... ماتبقى غريب...
سلام مربع لكل الجدعان ورد السلام للأخ والزميل الانسان صالح تبلدينا كلنارغم أنف الزول القال تبلديهم وانشاالله زي ماقال عادل امامالزول دا يجيهو اسهال وما ينفعوا الا التبلدي(برلومة وما بعرف اجيب الوشوش لكن ختوا اي وش يعجبكم). بمناسبة البرلمة يا جلال كنت اليوم داك عاوزة ادخل واقول ليك اتصل سريع بسامي عبد الوهاب واعمل معاهو اتفاق وانفي الواقعة الذكرها ديدو تماما وطبعا هو ما عندو اي اثبات لكن طلعت شليق واتبنيت الحادثة بسرعة لكن اهي عدت والعترة بتصلح الباسويرد. في ناس حاقدة كدا عاوزة تشكك في اناقة ديدو لكن انا لهم لبالمرصاد. مرحبا العزيزة أحلام وبمناسبة دخولك اسمحي لي احكي هذه الواقعة الطريفة والتي حدثت ببيت المغتربات في اول ايام حضورك للزقازيق: كانت تسكن معنا ببيت المغتربات والذي كان يضم جليط من الطالبات السودانيات والمصريات وبعض الفلسطينيات كانت معنا الاخت ضحي والتي كانت بكلية التجارة وهي ابنة خالة احلام وكانت لهم قريبة اخري لا أذكر اسمها الحقيقي ولكن كانت ضحي تناديها باسم بسكويتة وهو علي مايبدو اسم الدلع الذي كان متداولا في اسرتهم وكانت ضحي تنطقها بطريقة ظريفة لأنها كان لديها مشكلة في نطق السين اذ تنطقها بثكويتة وعندما حضرت احلام كانت ضحي ايضا تناديها باسم الدلع في اسرتهم وهو سمحونا (بتشديد الميم)او ثمحونا علي طريقة ضحي وبعد ذلك اصبح كل من في الدار يناديهن بهذه الاسماء وفي احدي الايام اتت الي احدي الاخوات المصريات وبدات الحديث وكانها تستجلي أمرا خطيرا وسألتني هي ياسناء صحيح بسكوتة أخت سمحونا؟؟ كنت اتحدث صباح اليوم مع الاخت نورا كرم الله وزوجها ياسر بماليزيا وهي تهديكم السلام. يا صالح سمعت ان احدي الاخوات اللتان تسأل عنهما بايرلندا لكن لا أدري من هي. حاتم جبارة انشاء الله اهلك طيبين فقد قمت بزيارتهم مرة في واحدة من الاجازات قبل خمس سنوات وشقيقتي رحلت من جنبهم لكن ما بعيد فتحياتي لهم.
11-21-2008, 11:56 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22555
اولا" نرحب بزميلتنا احلام والاستاذ الكبير محمد السنى دفع الله وكم نحن سعداء بانضماكم الينا رغم انك خليتينا يا احلام واخترتى النيلين ، وطبعا معانا عضو هو ممثل علوم الاخ مبارك جادين وكم مرة طالبناها يجيب صور علوم ويوعدنا ويبخل بالصورة ، وديل صورتين كده على الماش بس نسيتى ما ذكرتنى اسم ( دره علوم ) امانى سيداحمد علشان كده بنزل ليك صورة مخصوص واعتبريها هديه للاخ العزيز محى الدين عبدالستار .... ( مافى زول يجى يقول لي بتمشى علوم ليه ) ونجاة ميرغنى كان فى حقوق وقصدك حسن بري يا احلام وتحياتنا لكل بنات المغتربات المتجدعات رغم محاولاتى الحثيثة بدخول دار المغتربات .....
يا سناء الصباغ ، ضحى الحلفاوية دى كان صاحبة ياسر نجيلة وكانت قصيرة القامة وياسر طويل شديد كل ما تشوفو تقول ليهو ياسر نــخـــيــلــه اشوف فى شخصك احلامى وفى كل امتحان بتقع تدوخ وتطلع تبكى ......
حكاية زقازيقية :- نعود نواصل ما أنقطع من حكايات زقازيقية انتخابات أسرة كلية التجارة وكانت النتيجة خليط من مستقلين والاتجاه الإسلامي من المستقلين الأخ/ مكي أحمد محمد حمزة ، ميسرة ، عماد ، علي وقيع الله (الجعلي) ومن الاتجاه الإسلامي محمد الفاضل ، محمد توم ، الطيب شيبس ، وآخر كنا نحسبه إتحادي هو طيفور عبدالحكم طيفور ولكن طلع غير منظم والمذهل تعاطف مع الكيزان ودعمهم في كل المراحل بدون أي سبب ظاهر لنا وكان صديق شخصي للأخ/ مكي ولكن تحولت الصداقة إلى عداء لعدة سنوات وما إنجلت إلا في السودان بعد ترك الزقازيق والخوض في الحياة العملية ، ومن الأخطاء إلى كانت موجودة بلائحة الأسرة إن عدد أعضاء اللجنة التنفيذية (8) عدد زوجي وانقسمت اللجنة الجديدة إلى قسمين متساويين طيب كيف يمكننا انتخاب رئيس الأسرة الاتجاه الإسلامي يطلب أن يكون رئيس الأسرة هو محمد الفاضل العضو المنظم مهم ومؤتمر المستقلين رشح أن يكون مكي أحمد حمزة هو رئيس الأسرة كانت تعقد الاجتماعات بدار الإتحاد وتنفض بدون التوصل لنتيجة حاسمة وشاع الخبر في الكلية وبين التنظيمات السياسية والحقيقة كانت جميع التنظيمات تدعم أي فصيل سياسي ضد الكيزان المهم لم نتوصل نهائي إلى حل ونصحنا الأخ/ أحمد الكامل بأن نذهب إلى داهية كلية التجارة ونجد عنده الحل وأرشدنا إلى الأخ/ هشام – زوج زميلتنا أميمه دفع الله – وشرحنا له كل الحاصل وبعد مراجعة الأسماء في قائمة الاتجاه الإسلامي طلب منا بأن نرشح فلان الفلاني من قائمة الاتجاه الإسلامي لرئاسة الأسرة ونقوم بتزكيته ونجري عملية التصويت السري على أن نلتزم نحن بالمؤتمر بأن نصوت للأخ/ مكي أحمد حمزة رئيساً للأسرة ويصبح للأتجاه الإسلامي مرشحين لرئاسة الأسرة وقال لنا بالحرف الواحد :- (الناس ديل أنا عارفهم بحبو السلطة ولن يلتزموا بقرار حزبهم) وتوكلنا على الله وذهبنا إلى دار الاتحاد مساءً ونفذنا الخطة كما جاءت وقام أخونا المرشح من قائمة الاتجاه الإسلامي بأن صوت إلى نفسه وبقية الكيزان صوتوا حسب ما طلب منهم تنظيمهم والتزمنا نحن بالتصويت لصالح مكي وكانت النتيجة (4، 3، 1) لصالحنا وفاز مكي برئاسة الأسرة وكان يراقبنا من على البعد السكرتير الاجتماعي أحمد التوم وصاح بصوت عالي جداً (000قلت وأدى نفسه) – وحصل عدم رضا في الداخل وحصل صدام خارج الغرفة ألي كنا مجتمعين فيها والاحتجاج كان من جميع ناس التنظيمات بالخارج لماذا إذاعة أسرار ما يحدث في الداخل وكاد أن يتحول إلى صراع بالأيادي وبالتالي قمنا بفض الاجتماع مع تسجيل ما توصلنا إليه من مكسب وبعدها تحدث معي الأخ/ أدروب بشكل شخصي وقمنا في اليوم التالي بالتراضي ووزعت باقي المكاتب وقد أتهمنا بالخروج عن ملة الإسلام في الندوات الكيزانية . نقفل ملف أحدث كلية التجارة وننتقل إلى اتحادات التجمع ولجانه السياسية ونحكي بعض من أسرارها .
اختي سناء الجميلة وين انت ونفسي اشوفك مشتاقه ليك ونفسي اشوفك واعرف اخبار كل واحدة كانت معي في بيت المغتربات اخي حاتم كبارة ليك تحياتي وخرمانة للرطانة لو رميت لي كلمة كلمتين رطانة اخبار عبد الحليم وعوض من قرية 18 وكيف حالهم ووين ماهر شاهين واخبارك شنو وين اراضيك وكيف حالك مع المنى بتحقيق كل احلامك
عبد الدائم سيد احمد لك كل التحايا وشكرا على الصور الجميلة التي اعادت لي اجمل الذكريات الصورة الجماعية بالتحديد صورة تخريج ناس علوم ـ وفي الصورة نجوى وسوسن يالريت لو عندك صور اخرى وفي الصورة الطوق بتاع الزهور الذي البسته لهن..
شكرا لكم جميعا واتمنى ان اعرف كل اخباركم شمكرى وتقديرى لكل من منحنا الفرح اجلام ..
تحية و سلام لأجدع ناس .. و تحية و سلام كبير أوي لاختنا الزقازيقابية الفاضلة / أحلام و أحلام و إيا كان الفترة التي ـ أمضتها في الزقازيق فهي زقازيقابية أصيلة بروح الإنتماء التي دفعتها للتواصل مع أخوتها و أخواتها الزقازيقاب عبر هذا البوست .. لا نقول مرحباً يا أحلام فإنتي صاحبة دار ..
Quote: في حقوق بتذكر من دفعتي ، امال بنجاوي وعوضية
و على صعيد شخصي ـ و وفقاً لما جاء في مداخلتك ـ أكيد لم تسنح لي الفرصة لمقابلتكم بالزقازيق لكون دفعتنا في حقوق هي الدفعة التي تلت دفعة أمال بنجاوي و عوضية مصطفى و هويدا عثمان و هدية مصطفى يعني دفعتناجاءت بعد إنتقالكم من الزقازيق مباشرة حيث حضرنا للزقازيق في نهاية 1987م .
Quote: لا انسى اخواتي ياسمين وزينب التجاني في بيت المغتربات البيت الذي ضم احلامنا وامالنا والتي اتمنى ان تكون كل من زنيلاتي حققتها .
الأخوات الفاضلات زينب و ياسمين هم من بنات راشك و قد عهدناهم نعم الإخوات في الزقازيق ، و الأخت ياسمين تواصلت معنا من فنلندا عبر هذا البوست و كذلك تم نشر صورة إبنة الأخت زينب التجاني و أتمنى أن يستمر تواصلهما و كل الزقازيقاب معنا .
Quote: اتذكر من تجارة ـ نجاة ميرغني
الأستاذة / نجاة ميرغني هي في الحسبة خالتي ، و كانت زميلة تتقدمنا بدفعتين في حقوق و الآن هي موجودة بأبنائها في السودان .
Quote: ومن عطبرة ودالبيه وود الجعلي وسامية
الأعزاء عادل الجعلي وزوجته الفاضلة / سامية إسماعيل يقيمان في مدينة رابغ و بإذن الله سيكونا حضوراً في لقاء زقازيقاب جدة في العيد بإذنه تعالى ، أما الأخ ود البيه فنتعشم موافاتنا بأخباره من زقازيقاب الداخل . ألف شكر لك يا أحلام على تواصلكم الجميل النبيل و نتمنى إستمرار وجودكم ، و تحية عبرك مني و كافة الزقازيقاب إلى الرجل المبدع و ( الهلالابي الخشمو ملح ملح ) الأستاذ / محمد السني ، و ننتظر تشريفه لنا هنا .. و لكم تقديرنا و إعتزازنا ..
11-22-2008, 03:09 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
سلام وتحية لأختنا إحلام بنت الزقازيق على الرغم لم اتذكرك ولكن كنا نحن موجودين بالزقازيق وعلاقتي كانت طيبة وقوية مع ناس ترهاقا وطلعت معهم رحلات كثيرة بحكم علاقتي بالأخ/ عبدالحي إسحق إدريس والأخ/ صلاح عبدالمجيد ، وزوجتي منى يونس - كلية آدب - وخالد من كلية تجارة لكي التحية ونتمنى أن تواصلي معنا ونكمل التواصل الزقازيقي ، والتحية عطرة للأستاذ العلامة محمد السني دفع الله .
أخي العزيز الدكتور حاتم جبارة لك مني التحية والتقدير والود بخصوص دكتور محمد شمس الدين ما عندي حالياً هاتف ولكن سوف ارسله لك بإذن الله بخصوص تجارة حضارة انا أخذتها من شعر أخونا وشاعرنا ياسر نجيله . يوم أمس كان عادل الجعلي على الخط وسوف يكون ضيفاً عزيز علينا يوم 11/ديسمبر بجدة وحيكون متواجد هو وزوجته وأولاده حسب طلبنا منهم بشقتنا بجدة يومي الخميس والجمعة يلا يا أخوان ننجح هذا اليوم وقوة هذا التواصل . يا نجيلة أنحنا حنكون مسؤولين تماماً عن تصوير جميع الناس بصلعة وبدون صلعة ما تخاف وينزل في البوست هم وعائلاتهم ونعمل تسجيل للجيل الثاني الجديد من الزقازيقاب .
يا اجدع ناس مرحب ..وسلام مربع كما يقول حاتم جبارة الفرمالة بتاعتي زي ماقال د.جبارة هي الزكريات وبدات مع ناس علوم دكاكنية وناس اشررف ووليد ونادر كانوا بيجيبوا المناديل عشان العرق بتاع مواجهة الجمهور في البداية لكن بعد داك بقت حاجة عادية ..ثم مع ناس جورج (محمد صديق تربية)وجبارة وجبريلة كنت اغني زديني في هجرانك وطبعا جورج كان خطري في العود ....ويقول ليك تعال نغني اغاني دكاكينية من كل نوع والواحد بقى فنان بتاع مسارح بعد ان خلت الساحة من الفنانين الكبار ...كمال الشادي ..عاطف علي..اسامة موسى .
طبع انا ساعدني في الاداء الاستازالكبير زكي صديق (حقوق) كما اتطرق الي اخونا الاستاز الكبير جدا وليد مبارك ..وكان لايحب الظهور والمسارح لكن فنان كبير
الاخت احلام عندي ليك صورة لن ابخل بها كما يقول النضيف وسوف تنزل مرحب بيك يا برلومتنا
11-22-2008, 09:49 PM
جلال عثمان جلال عثمان
تاريخ التسجيل: 09-13-2008
مجموع المشاركات: 1735
سلام مربع للجدعان ودي طبعا استعارة من ادبيات اخونا حاتم جبارة له ولكم جميعا الود والتحية
والله الزول يغيب منكم يوم واحد تاني الا يزككم بي طيارة ولا يرجاكم في صفحة 13
اهة علي العموم بجيكم برواقة لاني والله لسة خجلان "الله يجازي محنك ياعبدالدائم"
Quote: بمناسبة البرلمة يا جلال كنت اليوم داك عاوزة ادخل واقول ليك اتصل سريع بسامي عبد الوهاب واعمل معاهو اتفاق وانفي الواقعة الذكرها ديدو تماما وطبعا هو ما عندو اي اثبات لكن طلعت شليق واتبنيت الحادثة بسرعة لكن اهي عدت والعترة بتصلح الباسويرد.
والله صدقت يادكتورة .... وقالوا شقي الحال يقع في ديدو
وتحية للزميلة احلام والرائع الاستاذ محمد سني دفع الله
مودتي .......
11-23-2008, 07:54 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 10986
جادين الرجاء تنزيل صورنا النادرة ولك كل الشكر والتحيات النضرة عصام دهب التحية والمودة يا اخوي الزولة دي ادعموها بالمشاركة في المنتدى وخلي بكري ابوبكر اديها باس وورد بسرعة بقيت ما بلقى معاها فرقة في النت تحياتي الى كل طلاب الزقازيق وبيت المغتربات البتحكي عنو احلام كان فيهو اختي الدكتورة فايزة هلالي اخت الشاعر الدكتور عزالدين هلالي واختي وقريبتي الأستاذة الهام شمس الدين والعديد من الاصدقاء الذين كانوا يقيمون الاحتفالات ونشارك فيها واخواني سعد دفع الله وصلاح دفع الله وكمال علي الذين كانوا لهم فرقة تسمى دراما شيرتو وكانوا يقدمون العروض المسرحية
لهم تحياتي ومودتي
11-23-2008, 08:54 AM
عصام دهب عصام دهب
تاريخ التسجيل: 06-18-2004
مجموع المشاركات: 10401
و تحية و سلام كبير أوي أوي للأستاذ المبدع / محمد السني ..
و ألف مراحب حبابك بين أخوتك و نسابتك الزقازيقاب ..
و حباب الزولة الجدعة / أحلام و هي تأتينا بـ ـ الرشاشة ـ الرائع الأستاذ / محمد السني .
Quote: الزولة دي ادعموها بالمشاركة في المنتدى وخلي بكري ابوبكر اديها باس وورد بسرعة بقيت ما بلقى معاها فرقة في النت
و معاً يا أجدع ناس لدعم وجود أختنا أحلام عضواً فاعلاً بيننا .. و حتى إستلامها للباس ورد هي و الأخت منى تعالوا ندعم جهود كل أخواتنا الزقازيقابيات الفاضلات اللائي يتواصلن معنا عبر باسويردات ( بعولتهن ) ـ يا السني و ميسرة ـ الذين لم يبخلوا عليهن بباسويرداتهم فتركوها لهن حتى أصبحوا لا يجدون فرقة معهن .. فعفارم عليكن أيتها الزقازيقابيات .. و الأن فقط و بعد أن نشر ـ عم جودة البوست ـ عبد الدائم الصور ، تذكرت الأخت أحلام ( بت علوم ) .. فربما ألتقينا و أنتي على وشك مغادرة الزقازيق أو أيام الإنتخابات و بالأمارة أنتي كنتي مع أخوانا التانين ( الإتجاه الإسلامي ) .. وأذكر أنه كانت هناك أيضا الأخت الفاضلة أحلام وداعة في تربية وأحلام أخرى في زراعة إن لم تخني الذاكرة ..
Quote: وبيت المغتربات البتحكي عنو احلام كان فيهو اختي الدكتورة فايزة هلالي اخت الشاعر الدكتور عزالدين هلالي واختي وقريبتي الأستاذة الهام شمس الدين والعديد من الاصدقاء الذين كانوا يقيمون الاحتفالات ونشارك فيها واخواني سعد دفع الله وصلاح دفع الله وكمال علي الذين كانوا لهم فرقة تسمى دراما شيرتو وكانوا يقدمون العروض المسرحية
التحية للدكتورة / فايزة و الأستاذة إلهام والأخوان سعد دفع الله وصلاح دفع الله وكمال علي ولكل الأفاضل من الزقازيقاب و أصدقائهم و لك مجدداً يا أستاذ / محمد .. و مجدداً أهلاً حللتم و سهلاً نزلتم و البوست بوستكم فكم يشرفنا وجودكم بيننا ..
11-23-2008, 09:37 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
Quote: و الأن فقط و بعد أن نشر ـ عم جودة البوست ـ عبد الدائم الصور ، تذكرت الأخت أحلام ( بت علوم ) .. فربما ألتقينا و أنتي على وشك مغادرة الزقازيق أو أيام الإنتخابات و بالأمارة أنتي كنتي مع أخوانا التانين ( الإتجاه الإسلامي )
يا دهــــب انت راكب غلط ، احلام الانت تقصدها وظاهرة فى خلف صورتى مع امانى علوم هى الاخت احلام مختار الموجودة فى اللسته ادناه وقبل فترة حضرت منتدى الزقازيق فى الخرطوم ونشرت لها صورة حديثة والتحيه لها اينما كانت ، ولكن احلام ( محمد السنى دفع الله ) هى اصلا" ما قعدت معانا سيادتك نزلتها فى لسته عديل كده .... ياخى ما تبقى برلوم ويا احلام بالله اسمك بالكامل
انا غايتو فــل ليســت ...
11-23-2008, 10:06 AM
عصام دهب عصام دهب
تاريخ التسجيل: 06-18-2004
مجموع المشاركات: 10401
Quote: يا دهــــب انت راكب غلط ، احلام الانت تقصدها وظاهرة فى خلف صورتى مع امانى علوم هى الاخت احلام مختار الموجودة فى اللسته ادناه وقبل فترة حضرت منتدى الزقازيق فى الخرطوم ونشرت لها صورة حديثة والتحيه لها اينما كانت ، ولكن احلام ( محمد السنى دفع الله ) هى اصلا" ما قعدت معانا سيادتك نزلتها فى لسته عديل كده ....
أنتا يا نضيف عارف ( الكبر دخل ) و عشان كدة الواحد بقى مرات .. مرات كدة بيخرمج .. أنا أفتكرت أنو أختنا أحلام هي الظاهرة في الصورة أو هي أحلام مختار ( الإتجاه الإسلامي ) وعذراً إن لم تكن من في الصورة هي أختنا أحلام التي تتداخل معنا الآن .. و لكني و كما قلت أذكر ( الأحلامات ) الفاضلات .. أحلام وداعة أحلام الإمام و أحلام مختار و كلهم ماشاء الله تبارك الله فل ليست..
Quote: انا غايتو فــل ليســت ...
و أنا أقول ( سقوطنا) الوكت دا كلو سببو شنو ؟؟ تاريك ( غواصة ) يا نضيف .. تهيصو معانا و تصوتوا للتانين .. عشان كدة .. عرفنا حاجة !!
الحاجة المحيراني لحدي هسع و ما لاقي ليها تفسير منطقي كلو كلو ؟؟ التجمع في إنتخابات 1990م سقط كيف في الزقازيق ؟؟ مع إنو الحكاية بالحساب كدة كانت حقتناومضمونة ؟؟ و يا حاج / تبيدي الله و النبي تجي تشرح لينا ؟؟ عملتوها كيف بس ؟؟
ـ معليش يا شباب البوست دة عمرو ما حيكون ركن نقاش سياسي لكن و الله الحكاية دي ما عايزة تتبلع لي كلو كلو .. قاعدة لي كدة في حناني دة !! ــ تسلموا جميعا تجمع و كيزان و محايدين ..
احلام دي عندها نكتة مع دكتور عبدالرحمن الشنقيطي كنا ماشيين رحلة الي الفيوم بعد ملاحق دورة سبتمبر قام الشنيقطي سالها (انت من وين ؟)قالت(من عطبرة) قال ليها انا عطبرة زرت فيهابت عمتي في حي السكة حديد وعندها بت اسمها امل كان بت جيرانها اسمها (احلام) عمرهما زي 7سنة كدة فقالت احلام انها البت التي كانت تاتي للعب مع بت اخت الدكتور ؟؟؟؟
الصورة الاولى فيها اخونا الشايل باقةالورود فضل لله حقاركان دفعتنا في المؤتمر الثانوية وحضر معاناالزقازيق وكمان فيها زول في الركن الشمال ما ظاهر دة عادل يسلم وبرلومنا عمار باب الخير الان في امريكا الله يديك العافية يا عبد الدائم
11-24-2008, 12:37 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
حكاية زقازيقية :- طبعاً سمعتم بحريق الباخرة 10رمضان زمان وكنتم في المرحلة الثانوية والبعض الآخر كان معنا بالزقازيق انعكس حريق الباخرة هذا على وضع الطلاب السودانيين بجمهورية مصر العربية بحيث توقفت الملاحة بين وادي النيل وحدثت أزمة قوية بالطيران لا أذكر سببها ولكن لم نستطع السفر إلى السودان في نهاية العام وتكدس الطلاب والطالبات بجمهورية مصر وكان الحل بين الحكومة السودانية والمصرية ولكن السفر كان بالطيران الحربي المصري وتم التسفير إلى قاعدة حربيه بجنوب مصر وغالباً كان وصولنا ليلاً جلوساً على الأرض في انتظار الطائرات وكانت الطائرات بعدد كبير ووافر ولكن المفاجأة بأن هذه الطائرات عمودية ولا توجد بها كراسي ولكن كان هناك حزام على نظام كرسي وتجلس عليه وتمسك وكأنك تجلس على مرجيحه والطائرة تقلع بقوة شبه عمودية إلى السماء وكانت مشاعرنا ما بين المزح والجد والخوف وهبوط الطائرة كان أفظع من إقلاعها . هبطت الطائرات أرض السودان في منطقة عسكرية سودانية غير مسفلته وغير مستوية بالمنطقة الشمالية وكانت هناك قطارات جاهزة مخصوصة للطلاب وكانت رحلة العودة إلى الخرطوم من أصعب الرحلات في حياتنا . حدثت أحداث كثيرة وبعض الزملاء والزميلات لم يركبوا طائره من قبل ولكن حظهم العاثر أوقعهم في هذه الطائرات الصعبة ولكن لا نرغب في ذكر هذه الأحداث ،،،، و من القفشات الجميلة والممتعة وما زالت في الذاكرة نزول زميلنا علي وقيع الله الجعلي السكرتير المالي لأسرة كلية التجارة – وكان جعلي جد جد – في منطقة خلاء بالشمالية لا يوجد بها أنس ولا شئ عدا الهوام وبعد أن هدأ القطار من سرعته بالإتفاق مع السائق وقفز أخونا الجعلي إلى الأرض وأرسلنا له شنطة الملابس وأغراضه على وجه وهو على الأرض وسط هتاف وتصفيق الزقازيقاب ومن ضمن القصص التي حكاها أخونا على وقيع الله وكان يتريق على جمال دفعه بأنه لما كان عمره خمسة سنوات أقلع عن سف التمباك – وهو لا يمزح في ذلك –
11-24-2008, 01:02 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
لا تعذبوا حالكم الصور للزقازيقاب وهم من اليسار وقوفاً ، كمال جابر ، ميسرة ، واحد من أولاد عطبره ، إسحق ، الطيب شيبس وأخيراً على الشمال جلوس محي الدين .
عطبرة بلد الحديد والنار والناس الطيبين وفي عطبره تم إستضافتنا من بعض الزملاء أهل عطبره وأخيراً وجدنا ماء للحمام. هذه الصورة يتقدمها الصديق الفيلسوف الزقازيقي محمد ابكر كلية آداب
الحمد لله أصبحت الوجوه مقبوله بعد عطبره وإنتهاء رحلة العذاب إلى السودان يضاف إلى هذه الصورة من اليمن جلوساً خالد نوح محمد كلية التجارة محمد حسب الرسول - سكرتير شوؤن الدار بإتحاد ناس هباني - كلية آداب وفي الوسط الصف الثاني جمال الدين عثمان الطاهر - جمال دفعة - وفي الأعلى شمالاً أخونا محمد أبكر وشخصي ، والبقية بصراحة نسيت أسماءهم .
11-24-2008, 03:56 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
عم دهب مشكور على الدعم في الوقوف بشدة لمنح احلامنا الباس وورد البوست بقى مهم في التوثيق للجمال عارف يا عصام الصور الهنا فيها كل تقليعات السبعينات وبداية الثمانيينات طريقة الشعر والازياء القمصان الكاروهات وتحرمني منك وقصة الأسد عند اخواتناوظاهرة في صورة الصور تحفظ لنا تحول كامل وتاريخ لاينسى شكرا على هذا البوست وقلت لي رشاشه مبروك عليكم الكاس
11-25-2008, 09:49 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
حكاية زقازيقية :- أذكر انه في عام 1984تقريباً كان معنا زميل دراسة زقازيقي لا أذكر اسمه وكان هذا الزميل قد عشق بنت مصرية من أبو كبير ونوى الزواج بها وأحضر أهله من السودان وكنا نحن موجودين بعد سفر معظم الزملاء إلى البلد وكنا مع المنظرين لأخذ تأشيرة العمرة وفاجأنا هذا الزميل بيوم الحنة والتي كانت بدار الاتحاد على ما أذكر وكنا قليلي العدد ويوم الزواج تم استئجار عدد أثنين مايكرو باص على حساب العريس وسافرنا مع أهله وكانت معنا بعض الزميلات الزقازيقيات ودخلنا أبو كبير وكنا نغني أغينة سيرة ولكن بالطريقة المصرية ،،، على النبي صلي ،،،،،،، صلي أبو كبير دي بحري،،،،،،،، بحري وكانت الزغرودة بالسوداني من والدة وأهل العريس وأخواتنا الزقازيقات في أبو كبير كان العرس أمام باب العمارة وكانت هناك راقصة لابسة من غير هدوم وبدأ هز الوسط والكل مهيص وأنحنا على طريقتنا السودانية قمنا باركنا للعريس والعروس كل الناس قاموا عملوا نقطة للراقصة وكانت تصيح فينا :- سلام ،، سلام ،،،، للجدعان ،،،،، سلام ،،،، سلام لأهل السودان ،،،، وأنحنا آخر طناش سلام لأحلى ناس ،،،،، وأحسن ناس ،،، ورقصني يا جدع ،،،، ويستمر الهز مرة أخرى ،،،،،،،،، سلام للحلويين ،،،، أبنا النيل ،،،،، يقوم العريس ويعمل نقطه و أنحنا كنا مجموعة كبيرة لو كل واحد دفع جنية يصبح عندها مبلغ محترم وأخوانكم مطنيش والناس جالسه وما عندها بريزه وأستمر العرض والرقص حتى صاحت أخيراً العريس ،،،، آه ه ه ه الجيران ،،، آه ه ه ه أهل أبو كبير ،،،، آه ه ه ه السودانيين ،،،، السودانييين ،، لا آه ه ه ه ورأسني يا جدع .
في واحد من الناس يتذكر أخونا العريس هذا وأين صار حاله اليوم وأخص الناس (دفعة عبدالدائم النضيف وإنت نازل)
Quote: عارف يا عصام الصور الهنا فيها كل تقليعات السبعينات وبداية الثمانيينات طريقة الشعر والازياء القمصان الكاروهات وتحرمني منك وقصة الأسد عند اخواتناوظاهرة في صورة الصور تحفظ لنا تحول كامل وتاريخ لاينسى شكرا على هذا البوست
الأستاذ محمد السني قال المفيد لاحظوا محي الدين أحمد حامد جالس على شمال الصورة الأخيرة وطريقة شعره تشبه قصة الأسد على الرغم من التراب والعفر وكذلك صورتي وشعري الكثيف آخر الصف وذي شعر أخوان مايكل جاكسون في الثمانينات أو نهاية السبعينات وكذلك كمال جابر لابس قميص تحرمني منك وفعلاً حدث تحول كامل في كل شئ حتى أولادي الصغار معجبين خالص بالصور القديمة دي وكنت استغرب ماذا يعجبهم في هذه الصورة المعفرة بالتراب ولكن الجيل الجديد يسأل عن القديم ، شكراً للأستاذ السني والملاحظة كانت في مكانها وهذا إرث قديم ومش دروووز ياالنضيف بس هي دروووس من الماضي . يا مبارك جادين في إنتظار الصور .
11-26-2008, 04:05 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
Quote: نجحت سيدة بمحافظة قنا بصعيد مصر في ذبح ذئب، كان قد هاجمها أثناء "حشها للبرسيم " لتضعه لبهائمها، ولم يوقفها نهش الذئب عقلتين من أصابع يديها اليسري واليمني، وأصابتها بجروح قطعية بالوجه والرقبة، في مقاومته حتي ذبحته، وأسقطته صريعاً بجوارها حسبما ذكرت صحيفة الأهرام اليوم. وكان مدير أمن قنا قد تلقي "إخطاراً" من العميد أحمد عبدالغفار رئيس المباحث الجنائية بإصابة بخيتة حسن شمندي 55 عاماً من قرية العليقات بمركز قوص ببتر أصابع قي اليدين اليسري واليمني، وجروح قطعية في الوجه والرقبة إثر مهاجمة ذئب لها، وتم نقلها إلي مستشفي قوص المركزي، فيما تولت النيابة التحقيق.
رأيكم إيه يا جماعة في الخبر ده ديل هن الدروز الحقيقيين ، وبصراحة البوست ده مش حينام جوعان
11-26-2008, 04:44 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
البوست صن ... البوست ده مالو صن ... ياشباب ادونا رنة ... او حتي ان شاء الله مس كول كان الشاب همة ونشاط ... زي جوعه عزابة في ليلة شتا حول صحن فول ود جبريل وود جبارة كلمة .... غنوه .... حتي لو اشارة... او قصة من لكوظ النصيف وين الصور وين الارشيف وحكاوي الطالبات ومن خشمكم سمح القول يا ريس ميسرة وحرمة المصون بداية حلوه واصلو الحديث والذكريات ذات الشجون صاحب الحوش اهدانا احلى تواصل دا الاصيل اصلو ملمع من دهب شنقول يلا ياشباب جلال والدبيب ود جادين ما تخلو البوست يصن ويعدم مطر الخريف سامي وزهير ومعاكم بت الصباغ ساقية تدور بالذكريات والسياسة والغزل العفيف ود شبيكة وود الجيلي والباقين ما تخلو اكل الويكة سبب لتواصلنا يقيف ...
... ملك الساحة بدون منازع ياريس ... واصل ذكرياتك ... برغم صمتنا وعدم مشاركاتنا ... بس متابعنك باهتمام ولذة شديدين ...
11-27-2008, 06:37 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
ياخى المصريات ديل صعبات بالجد ردحى وصوت عالى وصفيق يدين حسب ما تصورناهم فى المسلسلات والافلام وده كان انطباعى لما مشيت برلوم وظنى ما خاب واتطبقت فينى نظرية خلتنى اتصبصب عرق فى عز البرد اول ما مشينا برالمة سكنا مجموعة فى شقة شمال دار الاتحاد مكان مستشفى الجاويش حاليا كانت موجودة في المكان ده اكبر معلمة فى الزقازيق ( المعلمة نعيمة ) بتاعت الطعمية والايجارات والسمسرة فى الشغالات وكلو .. كلو ..... طويلة وتخينة وصوتها عالى ومن عينيها يطاير الشرر .... رسلونى البرالمة اجيب طعمية للفطور فى يوم برد شديد ، اخذت الطعمية وسلمتها القروش ولما عايز امشى سألنى الراجل المعاها هات يا عم الفلوس ... بكل ثقة قلت ليهو الفلوس .... اديتها الــمــره القاعدة دى ..... بسم الله الرحمن الرحيم ..... الــمره جاتنى طايرة من محلها ... انا مــرا يا آبن المـرا وطبت فى رقبتى وهاك يا ردحى ويا كلام كدا اول مره اسمعوا ... المهم فك فكك فك فكك ... فكونى منها .... مشيت الشقة حكيت ليهم ، طبعا زول فهم حاجة مافي ... غيرنا الشارع بقينا ما بنجى بجنبها ولا بناكل طعمية منها . بعد فترة عرفنا انو كلمة مــرا دى عندهم نــبــذ وكلمة غير كويييييييسة ..
11-27-2008, 12:24 PM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
وتحية للناس السالت عني ، والغياب لظروف السفر المتواصل في ربوع السودان ، وعدم توفر النت بسهولة في كتير من الحتات ، وحقيقة السودان دا الخرطوم ، وفي مدن كتيرة من السودان مستغرب إنو الناس قاعدة فيها لغاية الآن ليه .... وما جات الخرطوم .....
والآن أنا أكتب من مدينة جوبا ،،، الجميلة .... وتحية ليكم بعربي جوبا ،،، ومتابع معاكم حديث الذكريات ،،، لكن الكلام إتناول فترة تاريخية محددة ... عشان كده في ناس كبت الزوغة ....
وسلام تاني
11-27-2008, 02:45 PM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
الاخت اماني عباس فردة هلا ايوب واميرة سيداحمد كما جاء من ارشيف جلال عثمان ..تعمل الان في السفارة النيحيرية بالخرطوم سكرتيرة للسفير الداير يتصل عليها دة تلفونها 0923763916
الصورة الكانت عحيبة هي حقت السناير بتاعننا خالد عثمان يس عاطف حسن الخضر عادل الخليفة محمد نور محمد عثمان سوسن ونجوى والدفعة الدكتور احمد عوض الكريم
11-28-2008, 03:18 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
يوم غد السبت هو أول أيام شهر ذو الحجة وننبه الأخوة الزقازيقاب وضيوف البوست بأن يراعوا إذا أراد أحد أن يضحي ودخل شهر ذي الحجة فإنه يحرم عليه أن يأخذ شيئاً من شعره أو أظفاره أو جلده حتى يذبح وذلك لحديث الرسول صلى الله عليه وسلم (إذا دخلت العشر وأراد أحدكم أن يضحي فليمسك عن شعره وأظفاره) وفي لفظ آخر (فلا يمس من شعره ولا بشره شيئاً حتى يضحي) وهذا الحكم خاص بمن يضحي فقط أما المضحى عنهم - الأهل - فلا يتعلق الأمر بهم . وهناك من أفتى بأن الحلق أو قص الأظافر مكروه وليست حرام ،، والله أعلم فضل عشر ذي الحجة:- فقد ورد عن فضلها أدلة من الكتاب والسنة منهاعلى سبيل التذكير :- 1- قال تعالى (والفجر وليال عشر) وقد قال إبن كثير رحمه الله : المراد منها عشر ذي الحجة كما قال إبن عباس وأبن الزبير وغيرهم، ورواه الإمام البخاري
2- قال رسول الله صلى الله عليه وسلم (ما من أيام العمل الصالح فيهن أحب إلى الله من هذه الأيام العشر ، قالوا ولا الجهاد في سبيل الله ؟ قال (ولا الجهاد في سبيل الله إلا رجل خرج بنفسه وماله فلم يرجع من ذلك شئ.)
ما يستحب فعله هذه الأيام(الأكثار من الصلاة ، والصيام وخاصة يوم عرفة لغير الحاج التكبير والتهليل)
وكل عام وأنتم طيبين وبالنسة للذين ينون الحج هذا العام سوف نكتب تفصيل دقيق لبعض مناسك الحج الأيام القادمة ، نأمل التكرم بالمتابعة والإستفادة .
فريق بيطرة الرهيب من الامام: - د. اسامة علي محي الدين ود. محمد بكري عبد الوهاب - د. احمد المصطفى ود. طارق عوض الكريم - د. كمال يوسف (زولوجي) وطارق جبريل ود. محمد البشير ود. اسامة فرج الله (طيارة)
11-29-2008, 01:16 AM
Dr.Elsadig Abdalla Dr.Elsadig Abdalla
تاريخ التسجيل: 12-10-2005
مجموع المشاركات: 2198
salamat to all Thank you Essam Dahb for asking. I was very busy recently. Where is Mohd.Alhady and Osama Tyaraa?? I am arranging a very rare and nice photos in the near future!!
11-29-2008, 03:34 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
حكاية زقازيقية :- حديث الذكريات السابق كان لفترة معينه والبعض لم يعاصره ولكن قصدنا أن نغوص في الماضي البعيد عسى أن نربط الماضي مع الحاضر ، وسوف نركز باقي الحكاوي من فترة إتحاد الانتفاضة ( إتحاد التجمع) ، حتى يكون الشباب الجدد مواكب للأحداث
مرحب بدكتور الصادق ونأمل التواصل ونقهر الظروف معاً ولنجعل تواصل الزقازيقاب نبراس لنا جميعاً .
وكل عام وأنتم بخير ،،،،،،،،،،،،،،،،،
11-29-2008, 11:55 PM
Dr.Elsadig Abdalla Dr.Elsadig Abdalla
تاريخ التسجيل: 12-10-2005
مجموع المشاركات: 2198
سلامات للجميع. مرحبا بالاخ سيف وعودا حميدا. كنت في مكالمه طويله مع الاخ زهير علي وهو في اميركا ويبلغكم جميعا تحياته ووعدنى بارسال بعض الصور التحفه. زهير كان مغرم بطبيخ الفاصوليا. لذلك لمن تمشى شقتو لازم تلقى فاصوليا فى احد المواقع التاليه: 1-الثلاجه. 2-البوتاجاز. 3-فاصوليا مبلوله جاهزه للطبخ.
11-30-2008, 10:58 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
Quote: RE: دعوة مقبولة From: sufian ali ([email protected]) Sent: Sunday, November 30, 2008 8:37:37 PM To: [email protected] الاخ ميسرة السلام عليكم ورحمة الله وبركاته اخي العزيز لقد حاولت المشاركة على موقع سودانيز اون لاين لكن لم اتمكن من الدخول والمشاركة وان شاء الله على تواصل معكم اما بخصوص الدعوة انني سوف اقضي اجازة العيد في السودان ان شاء الله وسوف اكون معكم واتواصل عبر الموقع سفيان علي عبد الهادي جوال /0501986896
نجدد الدعوه للأخوة الزقازيقاب وعائلاتهم وضيوفهم الكرام سوف يكون اللقاء يوم الخميس 11ديسمبر بحديقة الشرفية بجوار حديقة الدلافين . كل عام وأنتم بخير،،،،،،،،،،،
12-01-2008, 07:42 AM
عبد الدائم سيد أحمد عبد الدائم سيد أحمد
تاريخ التسجيل: 10-28-2006
مجموع المشاركات: 4220
ناس علوم السنة حاجين وصل الى الاراضى المقدسة الحاج / نادر فاروق والحاجة / رجاء الطيب وحيكونوا معانا يوم 11 ديسمبر انشاء الله بعد اتمام منسك الحج وحجا" مبرورا" وسعيا" مشكورا" وذنبا" مغفورا"
وياناس بيطرة هووووووووي احسن ليكم تحصلوا الحج تعبوا ما اكتر من مشوار المساكن لكوظ وبالعكس واللى ناوى يتصل بهانى برعى عندهم مخيم فى الحج بنصف القيمة للزقازيقاب وبلالالالالالاش لناس اداب مع صالح الدعوات
يا ميسرة انا ابتديت اوزع كروت الدعوة ليوم 11 ديسمبر ولميت لي حوالى 8 تنفار جداد لنج استقروا فى جده بواسطه احمد السيد زراعة وحتشوفوهم فى الملتقى كان ربنا سهل
طارق جبريل يعنى عاوز تقول لينا انك كنت قاعد تسافر بفوووووووق .
12-01-2008, 08:40 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
للأخوة حجاج بيت الله الحرام:- 8 ذي الحجة ( يوم التروية ) • قضاء هذا اليوم في منى ليس فرضاً . • يمكن للحاج التوجه مباشره إلى عرفات . • الإحرام مع التلفظ الصحيح بالنية (إن لم يكن محرماً ) والتلبية . • التوجه إلى منى وقضاء الليل هناك . • أداء الصلوات الخمس في منى أن أمكن (الظهر، العصر، المغرب ، العشاء والفجر ) • التوجه إلى عرفات بعد شروق اليوم التاسع .
9 ذي الحجة ( يوم عرفة ) • التوجه إلى عرفة . • قضاء النهار وأداء صلاتي الظهر والعصر (تقصر ركعتين وتجمع في الظهر ) ( أذان واحد وإقامتان ) . • الإكثار من الدعاء .
ليلة 10 ذي الحجة المبيت في مزدلفة • أداء صلاة المغرب والعشاء جمعاً حالما تصل إلى مزدلفة أو حيثما كنت إذا كان الوقت قرب منتصف الليل (يقصر العشاء إلى ركعتين ، أذن واحد وإقامتان ) . • اجمع الحصى من مزدلفة تطبيق للسنة (يمكن جمع الحصى من منى أو من مكان أخر ) • أقض الليل ( يمكن للضعفاء والنساء والأطفال المغادرة بعد منتصف الليل ) . • أداء صلاة الفجر. • الدعاء والذكر . • التحرك إلى منى فبل شروق الفجر . • واصل التلفظ بالتلبية قدر المستطاع. • النفرة إلى مزدلفة بعد غروب الشمس . • واصل التلفظ بالتلبية قدر ما تستطيع.
10ذي الحجة ( يوم الحج الأكبر ) • يعرف هذا اليوم بـ( يوم النحر ) ( يوم التضحية ) أو يوم العيد . • التوجه إلى جمرة العقبة وهي أقرب إلى مكة ثم أرمي 7 حصوات كل حصى منفردة عن الأخرى مكبراَ ( الله أكبر ) . • توقف عن لفظ التلبية وأكثر من التكبير قدر الإمكان • أذبح أضحيتك ( يتم توكيل الشركات المتخصصة ) • الحلق أو التقصير ( الرجال عليهم حلق الرأس او التقصير النساء عليهن جمع الشعر وقص قدر بوصة من مكان واحد) . • الأفعال السابقة ( الرمي الذبح الحلق ) يمكن القيام بها بأي ترتيب . • ترفع محظورات الإحرام جزئياً (ويمنع ممارسة العلاقة الزوجية ) . • يمكن الاستحمام والتطيب للرجال ولبس الملابس العادية . • التوجه إلى مكة إذا تيسر ( يمكن القيام بذلك في اليوم التالي ) ثم القيام بطواف الإفاضة وأيضا سعي الحج . • ترفع محظورات الإحرام بعد إتمام الطواف والسعي. • العودة إلى منى لقضاء الليلتين أو الثلاث القادمة .
11-12-13 ذي الحجة ( أيام التشريق ) • واصل التكبير قدر الإمكان ( حتى عصر اليوم الثالث ) . • رمي الحصى للأيام الثلاث . • يبدأ وقت الرمي بعد الزوال حتى الغروب الشمس ( وبعد ذلك عند الضرورة ) . • إبدأ بالجمرة الصغيرة وأرم 7 حصوات كل حصاة منفردة عن الأخرى قائلاً الله أكبر . • تحرك جانباً وتوجه إلى الكعبة ثم ادعو الله . • توجه إلى الجمرة الوسطى وكرر ما سبق . • ثم توجه إلى الجمرة الكبرى وارم كما سبق ولا دعاء عند الإنتهاء .
طواف الوداع • إذا أرت مغادرة منى يوم 12 ذي الحجة يجب عليك القيام بذلك قيل غروب الشمس ( ولكن بعد الزوال والرمي ) . • أداء طوف الوداع كأخر المناسك قبل العودة للوطن . • تكون بذلك قد إنتهيت من مناسك الحج ، تقبل الله منك .
12-01-2008, 02:55 PM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
رجل من الزقازيق،،،،،،،،، كان منظم ويعمل بالسياسه ويفهم بها ،، متواضعاً قوياً في الندوات الثقافية والسياسية كنا نشاهده من على البعد ولكن جمعتنا ظروف العمل السياسي والنقابي ، عرفت فيه الإنسان الطيب والخدوم والمحترم والمطلع على ببواطن كثير من الأمور يتمتع بقدر كبير من الذكاء والثقافه ، كنا زملاء درب على الرغم أنه كان سكرتير ثقافي لإتحاد الإنتفاضة – إتحاد التجمع – ولكن عمل معنا بروح التجرد في جميع المكاتب وخاصة المكتب الإجمتاعي الذي كان يشغله الشيخ بشير على العبيد وكان هذا هو حال إتحاد التجمع الكل تنازل عن هويته السياسية وبدأ العمل بروح وطنيه عالية ، وكانت هناك مواقف كثيرة جداً تستحق الوقوف والتأمل فيها ونذكرها لاحقاً . والأخ الزميل هو مجدي النعيم والذي شاهدته على شاشة التفلزيون رئيس أو مدير لتجمع ثقافي بالقاهرة.
مخطوطة بقلم الأستاذ / مجدي النعيم - بالزقازيق /من أرشيفي الخاص
Quote: أذكر انه في عام 1984تقريباً كان معنا زميل دراسة زقازيقي لا أذكر اسمه وكان هذا الزميل قد عشق بنت مصرية من أبو كبير ونوى الزواج بها وأحضر أهله من السودان وكنا نحن موجودين بعد سفر معظم الزملاء إلى البلد وكنا مع المنظرين لأخذ تأشيرة العمرة وفاجأنا هذا الزميل بيوم الحنة والتي كانت بدار الاتحاد على ما أذكر وكنا قليلي العدد ويوم الزواج تم استئجار عدد أثنين مايكرو باص على حساب العريس وسافرنا مع أهله وكانت معنا بعض الزميلات الزقازيقيات ودخلنا أبو كبير وكنا نغني أغينة سيرة ولكن بالطريقة المصرية ،،، على النبي صلي ،،،،،،، صلي أبو كبير دي بحري،،،،،،،، بحري وكانت الزغرودة بالسوداني من والدة وأهل العريس وأخواتنا الزقازيقات في أبو كبير كان العرس أمام باب العمارة وكانت هناك راقصة لابسة من غير هدوم وبدأ هز الوسط والكل مهيص وأنحنا على طريقتنا السودانية قمنا باركنا للعريس والعروس كل الناس قاموا عملوا نقطة للراقصة وكانت تصيح فينا :- سلام ،، سلام ،،،، للجدعان ،،،،، سلام ،،،، سلام لأهل السودان ،،،، وأنحنا آخر طناش سلام لأحلى ناس ،،،،، وأحسن ناس ،،، ورقصني يا جدع ،،،، ويستمر الهز مرة أخرى ،،،،،،،،، سلام للحلويين ،،،، أبنا النيل ،،،،، يقوم العريس ويعمل نقطه و أنحنا كنا مجموعة كبيرة لو كل واحد دفع جنية يصبح عندها مبلغ محترم وأخوانكم مطنيش والناس جالسه وما عندها بريزه وأستمر العرض والرقص حتى صاحت أخيراً العريس ،،،، آه ه ه ه الجيران ،،، آه ه ه ه أهل أبو كبير ،،،، آه ه ه ه السودانيين ،،،، السودانييين ،، لا آه ه ه ه ورأسني يا جدع .
يا ميسرة
بالغت ما عرفتو ده منو
ده محمد احمد من تربية وسااكن في الرياض في الخرطوم والوقت داك كان عندهم محل فاتح على أتني بشارع الجمهورية بالخلف ( يا حليل زمن أتني يا ياسر شبيكة) والزول ده انا بعرفوا عشان كنا بنتنافس في كرة الطاولة (تنس) جنني جن وجننتوا جن مشينا السودان اجازة جينا لقيناهو عرس
تسلل: عصام دهب وينك يا زول شنو يعني ماسور حفياني دي غرقتكم كده اظهر وبان عليك الخميس
12-01-2008, 07:12 PM
ياسر شبيكة ياسر شبيكة
تاريخ التسجيل: 04-16-2008
مجموع المشاركات: 597
رجل من الزقازيق ،،،،،،،،،،، شكراً يا عبدالدائم لهذه الصورة الجميلة التي جمعت لأثنين من رجالات الزقازيق الذين نكن لهم كثير من الود والوفاء ،،، والصورة تجمع الزميل مجدي النعيم والزميل جمال فارح والتي جمعتني معه موده ومحبه خاصه جداً وكان نعم الأخ/ الصغير والصديق ، وجمال إسماعيل فارح من أكثر الشخصيات التي تعاملت معي بإحترام وأدب عالي جداً وكان أخي جمال قد سكن معي لفترة من الوقت بشقتنا سفن آب بجوار المحلج عند أول عهده بالزقازيق وشكراً مره أخرى لهذه الصورة لأنه مضى وقت طويل لم اشاهد الأخ/ جمال بن فارح .
مخطوطة بقلم الزقازيقي الرائع جمال فارح،،،،،،،،،،،،،،،،،،
12-02-2008, 11:03 AM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
الأعزاء ناس الزقازيق اجدع ناس وتباشير عيد الأضحي المبارك ، وبا رب كل الناس العام القادم تامين ولامين ، وربنا يمسح أحزان العام السابق التي ظللت سماء ناس الزقازيق ، بفراقنا لعدد من أصدقاءنا ناس الزقازيق ، وعدد آخر من أعزاءهم .....
12-02-2008, 11:10 AM
زهير الزناتي زهير الزناتي
تاريخ التسجيل: 03-28-2008
مجموع المشاركات: 12241
جئت بخطابين من أعز الأصدقاء وشهادتي فيهم بالتأكيد ستكون مجروحة ... فمجدي النعيم هو استاذنا جميعاً وندين له بالفضل مع كثيرين وأنت منهم وجدناهم بالزقازيق بكثير من الوعي الذي ندعي أننا نمتلكه ، فمجدي من اكثر الذين طلموا في الزقازيق وقد نجد العذر للذين ظلموه وهم بعيدون عنه ، إلا أن ظلم ذوي القربي أكثر مرارة وأكتفي بذلك .. الخطابين يعكسان أدب الخلاف السياسي وكيف تكون مختلف سياسياً بأدب وتهذيب وتفرق ما بين العام والخاص ،،، اما الصديق فارح فهو من ابرع الذين يكتبون الخطابات ، وكنا وصلاح الأمين وبعض رفاق الزقازيق ، نختلس خطابات فارح الشخصية ونستمتع بقراءتها ، فهي قطع أدبية ثمينة ، فكان فارح يكتب الخطابات طوال ليالي عديدة ، ويهملها في غرفته المبعثرة ، ونادراً ما يرسل هذه الخطابات ، .... فارح أديب ضل طريق الأدب ، عله يصبح مثل حنا مينا ويكتب بعد الأربعين رغم انه قد شارف علي الخمسين ... التحية للزميلين والتحية الخاصة لميسرة سيد احمد الرجل الإستثنائي ...
12-02-2008, 07:53 PM
ياسر شبيكة ياسر شبيكة
تاريخ التسجيل: 04-16-2008
مجموع المشاركات: 597
Quote: الأعزاء ناس الزقازيق اجدع ناس وتباشير عيد الأضحي المبارك ، وبا رب كل الناس العام القادم تامين ولامين ، وربنا يمسح أحزان العام السابق التي ظللت سماء ناس الزقازيق ، بفراقنا لعدد من أصدقاءنا ناس الزقازيق ، وعدد آخر من أعزاءهم .....
مشتاقين يا زهير تمنياتى لك بالتوفيق
مع تمنياتى الصادقة للجميع بدوام الصحة والعافية
12-03-2008, 08:58 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
Quote: هل تذكرونهم ؟ أتوقع أن يجاوب الزقازيقيين القدامى/QUOTE] يا ياسر شبيكة تقريباً أنا والكاشف أخوي من أقدم من يكتب في هذا البوست على الرغم من أنه سبقتنا أجيال وأجيال ولكني لم أتعرف على صورة الزقازيقاب نأمل التوضيح من جانبكم ، وكل عام وأنتم بخير
12-03-2008, 10:25 AM
ميسرة سيد أحمد ميسرة سيد أحمد
تاريخ التسجيل: 09-13-2008
مجموع المشاركات: 3175
Quote: Birthday Reminder - esam dahaab's birthday is tomorrow December 3
يا عصام دهب .. جانى الايميل دا امبارح والله ما عارفو جا طاشى من ياتو موقع .. على العموم كل سنة وانت طيب .. رغم فلسفتى فى اعياد الميلاد .. وعدم حبي لهذة الاحتفالية فأننى ارى عندما يحل يوم مولدك احرى بنا ان نزعل على قصر مدة إقامتنا فى هذه الفانية وضياع سنة من عمرنا لا نعرف مقدار حسناتنا او سيئاتنا فيها .. فعيد ميلادك يعنى قصر اقامتك وموعد افول نجمكـ فيجب ان لا نفرح بقدر ان نقف ونقيمم ماذا فعلنا ؟ وماذا تبقي لنفعل ؟
لك ولهم الود والتهانى وهبي بيرث دى تو يو ..
___________
أرحب بالاخ العزيز سامى عبدالوهاب الذى حل بيننا الاسبوع الماضى وتمتعنا بخروف وعضة ( نسابته ) ترحيبا بقدومه واسلرته الصغيرة ححلت اهلا ونزلت سهلا ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
جلال عثمان
عبد الدائم سيد أحمد
سامي عبد الوهاب إدريس
ميسرة سيد أحمد
ياسر نجيلة
طارق جبريل
Hatim Gubara
عصام دهب
ياسر شبيكة
محمد سنى دفع الله
سناء الصباغ
زهير الزناتي
Dr.Elsadig Abdalla
جمال السنوسي
فيس بوك
تويتر
انستقرام
يوتيوب
بنتيريست