ديمقراطيون وكت الفراغ . . حزب سوداني جديد

Quote: لو نحن جادين كشعب في إنو يوما ما يكون عندنا وطن خير ديمقراطي ، لابد من إشراك أولادنا و بناتنا في كل القرارات اللي بتخص حاضرهم و مستقبلهم لابد من تعليمهم قيم الديمقراطيه و معاني الشوري و التسامح و تقبل الرأي ألاخر . الوطن الخير الديمقراطي بيتبني من البيت و ليس العكس !!!

وحدة . . ديمقراطية . . عـدالة " *
الترتيب دا اعتقد اصح مش ؟ . . الوحدة ، و ألا الديمقراطية ؟

وحدة الشعب السوداني ممكنة . . لكن بطريقة واحدة فقط . . و ( رياضية ) بحتة !!
قول لي كيف ؟
د. عادل سجيمان كتب عن ( فكرة ) لحل مشكلة الرئاسة - فتشت البوست سماء ارض ما عرفت خفس وين ؟ - ايام الانتخابات ( المخجوجة ) ديك
فكرتو ( رئاسة دورية ) ، و انو الاطناشر مرشح ما في داعي يسو في البسو فيهو دا من نبيشة و شيل حال . . كلهم يبقوا رئيس و خلاس !

اما ( فكرتي ) انا . . انو الرئاسة ما تكون مقصورة على المرشحين الاطناشر بس . . لا ياخ ! . . لازمن نبني الديمقراطية صاح ، و الكرسي الرئاسي دا لازم يتعود على مؤخرات كل الشعب . . دي الديمقراطية الحقة و المساواة في الحقوق الدستورية على اساس المواطنة ؟
اها افتراضات عشاني و عشان " النظرية "
- 40 مليون - كشششش - هو العدد الكلي لسكان السودان نسوان و رجال بما فيهم المجانين و السغار و الكبار و الرضع و اللسة قبل الخلق و التكوين ذاتم . . المافي شنو ؟!
- اي بلد ( في الكيس استدي دا " السودان " ) = حكومة + شعب
لتوسيع دايرة المشاركة و مد الظل الديمقراطي ليتمتع كل مواطن بحقو الدستوري في الرئاسة ، ح نقوم نعمل مؤسسة رئاسة مكونة من 39,999,999 مواطنة لي مواطن - حكاية " ليدز فريست " دي ما حاكو حاكو للخواجات يا عمك ، انها الكترة، الكترة بس ! . . الكترة الغلبت الشجاعة - اها هم يتبادول الوظيفة الرئاسية . . آي ياخ الرئاسة وظيفة . . و مؤقتة كمان ! انت قايل شنو ؟ . . و الباقين توزعوا من مستشار ، لي وزير اتحادي ، لي وزير دولة اتحادي ، لوزير ولائي و الي . . الخ من البدع الانقاذية الكتيرة و مسخة دي !!
اها يا عمك كدا حسمنا موضوع الحكومة . . لكن على قول عادل إمام ، لابد للحكومة من شعب تحكمه لكي تشكمه . . مش ؟
يلا من الـ 40 مليون بعد ما طلعنا منهم الحكام . . اها الشعب السوداني بقى كم ؟
الشعب السوداني بقى ( واحد ) ** . . ياخ !!
و هو المطلوب


----------

* الحقوق محفوظة لصاحب مرايا سودانية ( " وعد " حزب الوحدة ، الديمقراطية ، العدالة . . حزب في عالم افتراض ) أيمن حاج

** 40,000,000 - 39,999,999 = 1 . . مش ياهو الحساب يا ناس الحساب ؟

(عدل بواسطة قيقراوي on 05-28-2010, 08:27 PM)