ما هو المزمار ؟

Quote: Quote: صديقتي تيسير..حبابك كتر خيرك على المفاهمة.. نبدأ من أخر نقطة في كلامك.. لم ارى من الصديقات تيسير شخصيا ما يثبت حق الناس في حرية التعبير..و لم ارى ذلك من الصديقات عزاز شامي.. سناء خالد.. اماني الأمين.. الصديق الفاتح ميرغني انتبه للنقطة دي..و أكد الحق في حرية التعبير.. الصديقة سارة على.. جات و قالت من حقها (في حدود).. ثم الصديقة نبراس..و اخيرا الصديقة نهال كرار.. و السؤال هل فكرة حرية التعبير (الأخوات تيسير..عزاز..اماني..سناء) ما شايلهن معاهم ولا الفكرة شنو؟.. بالنسبة لجوهر كلامك.. هناك فرق بين تثبيت حق الناس في التعبير عن ذاتها ..و بين مناقشة محتوى التعبير ( و دي الحتة الجايطة في راس صديقنا كمال عباس..و ما قادرة تقع ليهو).. هسع ده بعد النقة دي كلها.. لو الأخوات المذكورات و معاهن اخونا كمال عباس.. جوا قالوا لينا ما عندنا مشكلة مع حق الناس في حرية التعبير.. لكن مشكلتنا مع محتوى التعبير.. تاني ما ح نعتب على الخيط ده..! لأن الناس بتكون عندها احكام مسبقة و على ضوئها بتمارس الإنتقائية ( انا ذاتي انتقائي و لي حاجاتي البقيس بيها الحاجات البتنفع معاي والما بتنفع معاي.. لكن ما بفرض كلامي على زول زي الحاصل هنا).. انت ذكرت ثلاثة فئات..و جوهر الثلاثة فئات دي ح تنحصر في فئة واحدة.. انو الناس معظمها منطلقة من فهم ديني..فالعادات و التقاليد البتتكلمي عنها في نهايتها محكومة بالدين..يعني هو التيرميتر البتتقاس بيهو الحاجات..و بالفهم ده يعني مسألة غيبيات و مافي حتة نمسكها بيها..و ده ما مشكلة.. المشكلة بتكون لمن الناس تنجر ليها فهم و تسندو للدين و بعد داك تجي تضبح بيهو الناس.. النص المقدس نعم مقدس.. لكن فهم الناس ( اعادة انتاج النص) هو محل التساؤل و هو ليس مقدس.. يعني فكرة الجواز الشرعي البتقوليها دي هي اجتهاد ( القرآن ما فيهم مياعة ..فيهو وضوح و نصوص قاطعة في تناولها للأمور)..يعني الجواز هو تقدير البشر..و البشر ليست آلهة حتى نقدس ما تقول.. اها انت يا تيسير لو جيتي لقصة التقاليد و الجواز الشرعي و ما ادريك ما الجواز الشرعي.. صوتك (كأمرأة) بفهم المعايير دي هو عورة..خليك من كونك بتقولي في شنو ..و بتحاولي تعبري عن شنو.. اها باقي ليك فهم زي ه ممكن ندافع عنو ..و نحتكم ليهو؟..و اهو داك القرآن قدامك.. جيبي لي آية بتقول عن كلام المرأة في الإيحاءات الجنسية و ما ادراك ما الإيحاءات الجنسية؟..(بالمناسبة أنا مؤمن بالقرآن و قاعد اقراهو).. ما لاقتني حاجة يا تيسير اسمها قاعدة جندرية..و لو الحتة دي ابتداع منك.. تعالي اشرحيها لينا اكتر.. المحاكمة الحاصلة هنا يا تيسير.. هي محاكمة المرأة لأختها المرأة بمعايير صنعها الرجل.. يعني تطبيق ممتاز للذهنية البطرياركية.. فالعادات و التقاليد و منظومة الأخلاق السودانية صنعتها الذهنية البطرياركية الذكورية يا تيسير.. يعني الرجل هو البحدد شنو المقبول من المرأة و شنو المرفوض.. مش المرأة هي البتحدد..و لو في مؤمنات طيبات لازلن يستمرأن عبوديتهن للذهنية البطرياركية فهن مخيرات.. لكن كمان ما يقمعن كل من تحاول الخروج من دائرة العبودية.. البطرياركية السودانية شارع لإتجاه واحد في التعامل مع المرأة.. يعني كل فهمها انها آلة جنسية..و من هنا تم تفريخ الكثير من ادوات المحاكمة.. يعني أي شوية بوح ..طوالي نرجع لتروميتر الجنس (السواهو الرجل مش المرأة).. يعني لمن تجي بعض الأخوات هنا تقول لينا البصل اسقاط جنسي.. فده بالنسبة لي أنا شخصيا محمد النور كبر.. هو اعادة انتاج سيئة و مفجعة للبطرياركية..يعني انتو مركبين مكنة رجال بدون ما تشعرن..! الكتابة موضوع النقاش.. ما بتكتل زول..و لم تنقص من حق زول.. ولا بتسئ لزول.. اللهم الإ كن الناس قاعدة على الهبشة ساكت..و القعاد على الهبشة بيعني انو الناس ما واثقة من حاجاتها.. الناس البتصنف هنا ديل ناس كويسة و التانيين كعبين.. انما هي محاولة رخيصة لإرضاء فحولية البطرياركية.. يعني البطرياركية هي المتحكم في الأمور.. و دي وضعية بنقول حقو الناس تمرق منها شوية.. المرأة فلتكن كويسة بحاجاتها هي مش بي حاجات الآخر(الرجل) .. حتة تانية .. فكرة اللبيراليين.. الديموقراطيين.. و العلمانيين..و الفهم المغلوط..و الربط بقصة الحريات المطلقة.. الكلام هنا يا تيسير ( عليك الله ركزي و ما تجوطي زي جوطة اخونا كمال عباس).. عن الحق في حرية التعبير.. الناس تثبتها اول حاجة..و بعد داك تجي لفكرة محتوى التعبير.. تتفق معاهو أو تختلف ده موضوع تاني ( لكن ما تقمعهم من شاكلة اتخارجو..و شوفو ليكم منبر تاني.. يعني في منبر تاني اللي يتقال الكلام الكعب لكن هنا لأ.. طيب ليها ما ترفضوا قولوا في أيتها حتة..مش ده ياهو النفاق في ذات نفسو..ماعلينا).. الحريات المطلقة دي نقة كبيرة و كتيرة..و ما عندها شغلة بالموضوع هنا.. اللهم الإ كن يكون الناس راس الخيت رايح ليها..! التحدي الحقيقي في المحددات و الضوابط..و على مزاج منو بيكون تحديدها.. الإنجليز زمان حسمو الموضوع في القياس..و قالو (قدم الملك).. اها انتو جيبو لينا قدم ملكة و اقنعونا انو ممكن يكون ده القياس..! محنة الجماعات التي ذكرناها يا تيسير مش مرتبطة بالخيط ده فقط.. لكنها مرتبطة بسياق قول سوداني عام.. و منتديات سودانية كثيرة فاكة اشاعة انها مع حرية التعبير و بتدافع عنها..و في أول منعطف بترميها بعيد و بتلبس ليها جبة قمع ما انزل الله بها من سلطان..و الغريبة معظم اهل السياق ده مركبين مكنة ليبرالية و علمانية و ديموقراطية..عشان كده كان سبب كلامنا.. يعني نفهم من موقفك ده يا تيسير أنو شرطة النظام العام من حقها تجلد الصحافية لبنى حسين..و الطفلة سلفا..و غيرهن من البنات الطيبات المسكينات بدعوى التزي بزي ما بعجيب النظام العام؟.. مش ياهو قاعدين تتكلموا عن ذوق عام..و هناك برضو نظام عام..و حياء عام..و شنو شنو كده عام..!! حيرتونا ياخي..! كتر خيرك يا تيسير..و نشوفك طوالي.. كبر