|
|
 شيوعى
|
المحطات والمسافات والقطر ..
والمبادى البين ضلوعى...
النقابات والنضالات والسفر..
دا البحدد ليا نوعى..
دا البحقق لياذاتى ودا البيروى ليل ظماى ..ودا البيشبع ليا جوعى ..
قالوا ثورى قلت ايوا كمان شيوعى..
يانضالات ردى روحى
وبى حقيقة امرى بوحى..
ابقى بلسم لى جروحى ..
ولى الشفيع المات معلق دام حزنى وطال نوحى ..
يبقى ملهم فى الجنوب ويبقى معلم فى الشمال..
وفاطنة فاقت كم رجال..
فاطنة يا ام النضال..
السترة والعيشة الحلال..
والمشاوير الطوال..
واروى ياقطر الشرق..
زول يناضل وينشنق..
الشفيع جوزيف قرنق..يحيا فينا وما انشنق..
انت مامشنوق وحيد..
انت يا اروع شهيد..
انت يا جبل الحديد..
والله ماهزتك ريح..
انت يا انبل مسيح..
ابقى ارقد واستريح..
وابقى فى الشوق والحنين ..
لى الرجال قاسم امين..
يوسف حسين..
انتو يااشجع رجال تملوها عزا الف عين..
صوتها صفارة القطر..صنٌُ اضنى صن..
انا دمعى جارى وقلبى حن..
للمبادى وللوطن..
وابقى غارق فى الحزن..
فى متاهات الزمن..
قاصدوا كهفك ياحراء..
ليها قاصد عطبرة..
اقوى كلمة معبرة..
ولى ابوى المعذرة..
الجسد فى المقبرة..
والروح تحلق فى الذرى..
والمناضل مابيموت..
يحيا فى كل القلوب ويبقى فى كل البيوت..
وسط الورش مليان زيوت..
ونحنا النضال فينا انغرس..
صوت النضال فينا انحبس..
حب النضال داسنو دس..
داير النضال راجلا كلس......
عمار محمد ادم
|
|
  
|
|
|
|
|
|
|
|
Re: شيوعى (Re: عمار محمد ادم)
|
(كنت اصحبه فى عربة الفرمله بالقطارحيث كان يعمل)
انا لسه راكب فى القطر قاعد هناك فى الفرمله
من كسلا والسكة الحديد ابدا الحديث بالبسمله
واسقيهو من شوق القرير يروى البلد بى اكملها
دى رساله من عمق الفؤاد تبلغ ابوى مستعجله
انا من ابوى وابوى انا.. يبقى الوجود زى الفناء
والعزه فينا مؤصله
وابويا فى الفردوس ملك ثلة ملوك متسلسله
التاكا والبركل سوا..العزة والسكة الحديد
انا من ابوى وابوى انا ..يبقى الوجود زى الفناء
وابوى مش انسان وبس..دا ابوى مد مليون سنه
كل النفوس مطمنه كونك هناك انك هنا..فرق الزمان والامكنه
وانا لسه راكب فى القطر قاعد هناك فى الفرمله
يا كسلا يا امى الحرم
ضجت مدن والقاش هدم
خالط فرحنا مع الالم
جفت صحف رفع القلم
وابويا واقف كالهرم
ما هز يوم عصف الرياح
ما فت عضدو وما انهزم
والقاش علا..غرق ملا
ادروب يعزى كاسلا
شيخا يرتل فى الفجر
يسعى ويفتش فى الاجر
يقرا ويقدم للدروس
للخير يكوس..فى كل ناحية او شبر
ابكيك انا تبكيك جبال تبكيك بحور
يازول قوى ويا زول صبور
يا شيخ وقور..فى وجهو نور
تبكى التراويح والسحور
تهفو الجنان مليانه حور..وتستقبلك
تبكيك طيبات الوشوش..يا زول بشوش
تبكى المأذن والسحب
تبكى المنابر والكتب
تبكى الميامين النجب
تبكى القلوب مليانه حب
ياسر مخبأ جوه جب
يبكى القطر..يبكى الصيام والدنيا حر
يبكى السجود وكت السحر
يبكى الدعاء يوم السماء جاد بالمطر
وتبكى هداليا وتندلاى..وتبكى المصاحف آى وآى
وابكيك انا واحزن عليك واحس فراغ من غير حدود
وارتد لى اصل الجدود
يرجاك ابوك ادم هناك..يلقاك عمر ولدا اغر
وانعم جوار وادى البشير واخوك حسن
ويبكى الوطن
وينزل مبادئك فى جناك..فى يومنا داك..فى عطبره
وانا لسه راكب فى القطر قاعد هناك فى الفرمله
لاكون ابوى ود البلد
لى زول ضعيف كم كان سند
دا الامرو جد..لآمن توسد فى اللحد
يا ربى اشملو بى رضاك اجعل جنانك مرقدو
بى خيرك الوافر الكتير يا ربى زيدو واسعدو
عمار محمدادم2003
(
| |
|
|
|
|
|
|
|
|
|
Re: شيوعى (Re: عمار محمد ادم)
|
الكشة
------
الديك بيرسل فى صياحو
محمَد يكابس من صباحو
كايس القريشات لى ملاحو
محمدمسيكين ياحليلو
شقيان نهار مهموم فى ليلو
السوق بعيد كيف الوصول
عربات تمر مابقفلو زول
كيفن يقيف ود الأصول
لى زول ضعيف
كيفن يقيف
ولدا نضيف
لى زول خشن لابس قديم
كيفن يقيف ولدا نعيم
محمًد مسيكين ياحليلو
بى بص قديم محمد وصل
فرش الخدار كوَم بصل
العقل راح رًوَح سريع
راح البويت..
كيف ألبنات ام البنات
كيف الرضيع
محمد يبيع
فجاءة انتبه..الكشة جات
جدعوه فى كومر كبير
ساقوه لى سجنا حقير
محمد رقد محزون حسير
محمد بكى موت الضمير
بلدا يجوع فيها الفقير
عدمان فرش حتى الحصير
ناسا تنوم فوق الحرير
عرباتها لنج موديل جديد
مافيش حسد ياربى زيد
لكن كمان شوفو التحت ماتشوفو فوق
شوفوا التعب ضوقوه ضوق
الناس يمين اكلت صبر
الناس يمين شربت صبر
وبعض الخلوق راحو القبر
ما نادية ست الشاى ..اذاى
تعتر تموت ويطول بكاى
(
نادية كتلك ما جريمة
ونادية تل قصة موت اليمة
كان تداعب فى حليمه
كبت الشاى لى زبونها
ايدها فى المنقد تهبهب
وراسها يحسب فى ديونها
قد تكونا ولا نكونا
نادية مستورة وحنونة
بادى حزنا فى عيونها
وفى عباراتها وشجونها
خاتها بتها فى قليبها
والكليمات الحبيبه
روحها زاخرة وخالى جيبها
ما بتدردرها ما بتجيبها
والسخانه بقت رهيبة
نادية شالت للكبابى
وبين طياتها المصيبة
شافت السوق يغلى فار
اجروا اجرو ياالصغيربن والكبار
كشة ماكنة وسوقها حار
نادية تجرى
دموعها تجرى
شايلى بنبر فى يمينها
ماسكى قفتها فى شمالها
يا حليلها وياحليها
قاعدى ساعاتا طويلة
شوف ادياتها البترجف
والقعاد هاديلها حيلها
الهموم فى القلب راقدى
والايدين مابيها حيلها
ياحليلها وياحليلها
الناس تعاين فى حويلها
فيها اتقزت حديدة
الحديد فجر وريدها
مابى يسغفها بالكريسيدى الجديدة
كيف يخلوها تموت وحيدة
الشمس حارى وشديدة
ماتشيلوها وخفيفى
مابتأثر فى اللساتك والبلالى
مقعدا واحد يشيلها واصلو خالى
نادية تنزف بنبرها الخائن يخونها
كاشة قاتله يزيد جنونها
الحرارة تزيد سخونة
ماتت المسكينة تنزف
الصقور الحايمى تخطف
لابتعين لابتوظف
بس بتكتل
تمام سيادتك
عال عال فل فى الفل
عمار محمد ادم 2009(
................................................................................................................
سيرة ذاتية
_____________
مانى الغول يا فاطنة السمحة محمد اخوك
طمنى امك وبرضو ابوك
مانى الغول يا فاطنة السمحة محمد اخوك
واسمعى سيرتى..وهاكى حقبقتى
كان ميلادى هناك فى ارضا زى الجنة وجنب النيل
كلها خضرة وظل ظليل
طيور بتغنى فوق لى نخيل
نلعب فيها السك وشليل
نوح القمرى وشدو الطير
ومن الجدول جاييى خرير
فوقى المنقة وتحتى حفير
بلدنا قرير تفيض بالخير
وفيها اتشرب قلبى معانى
والطمبوركون وجدانى
بقلبى الحانى هاك الحانى
واحلى اغانى..تحرك فينى الشى الجوانى
×××
ومما كبرت شويه شويه
جيت محمول يابت فى الايد
كانت كسلا محط رحالى
سكنا هناك فى السكة حديد
بحب ياناس السكة حديد
ومما قمت وكنت وليد
عامل فيها ولد صنديد
طبعا هين وبرضو عنيد
كنت نحيَف مانى غليد
مرة اهبش فى النافورة
ومرات العب فى الماسورة
اشخبط اسمى فى السبورة
وارسم وطنى بالطبشورة
قليلا جدا العب كورة
بحب الورشة وصوت وابورها
(
!
وجينا سكنا بحى عمال
وعشنا معاهم احسن حال
كا البينا العشرة الطيبة
ما بيناتنا مصالح ومال
وضم الحى الوان واشكال
شرقى وغربى جنوب وشمال
همنا واحد تجمع بينا السكة حديد
وفى سنه تالتة رحلنا كمان لى حى جديد
بيوت من طين فيها المويه مكانها بعيد
اشيل فى كتفى الناحل جوز اقصر حبلا باقى مديد
وفى سنه رابعه بقيت انصارى
اناقش مرة فى التوحيد
واقول فى الدين برأى جديد
قضية المرأة والتقليد
عامل فاهم ورايى سديد
عامل فيها ابو عرام
هذا حلال هذا حرام
جنى فصاحة وجنى كلام
حتى وصلت الثانوى العام
ديمة مشاكل وديمة صدام
وفى حلتنا مع ادروب
اكلت العجوة شربت الروب
حلبت البقرة ركبت حمار
وشلت الصارم سيف بتار
وكيف الناس بتجيب التار
ترد الظالم والحقار
ولى ادروب فى نفسى وقار
لى ادروب فى نفسى مكانة
مكانة رفيعة معظم شانها
وزى ما خطفوا اطفال فى فشلا
كنت طفل مخطوف من كسلا
ما فى داعى الليلة ابوح
هذا حديث يحتاج لى مهلة
وجيت الجامعة وشفت تجارب
مرة سجبنا ومرة محارب
طفت الدنيا وشفت عجايب
خبرت الناس بى كل مشارب
وجانا كلب عيونو حمر
سنونو صفر..رمونى جماعة جوة البير
كان الوضع جد خطير
كان الخلق فى التدبير
وكان الخالق فى التقدير
وجيت الجامعة احاول تانى
جيت فى زمانا ماهو زمانى
لقيتك جالسه تحت الشجره
زى ما تقولى خايفه وحذره
زى ما تقولى غزاله ونافره
شى من دنيا وشى من اخره
وقلتى الحكمة المابنساها
عمار محمد ادم جامعة الخرطوم2009
(
| |
|
|
|
|
|
|
|
|
|
Re: شيوعى (Re: عمار محمد ادم)
|
اعاين فى الشرق حميد
واعاين فى الغرب حميد
اقولك يا اخى جيدا جيت
اقولك يابا شن سويت
اشوفك بى تحت مريت
انا ديك يا اخى كيف امسيت
وتمرق بى ضراه البيت
تقولى انشاء الله جيت مبيت
ترانى فى الدجى اتواريت
وجانى الشعر دابى بديت
اقولو تعال يقولى ابيت
تقول عنى مشيول حال
وعندى الليلى ليك سؤال
دا موعدنا ذى الحجة
وليه اخرتو لى شوال
دا اصلو معاى ما بطال
وعرسك من زمن راجينو ياحميد
نضبح فى الصباح عتان
ونضبح فى الضهر حملين
تغنى الشول عديلة وزين
بقيت غريس لحقت الزين
وقالت عاشى ما بترجى
بخيت وسعيد بختك جاء
عقب انسد باب الريد
الكان متاقة زمان
وكنت الشاعر المسئول
يمين حاشاك ما عربيد
لاك درويش ولاكا بليد
وقال قبلى كم عدو
فضل انا الويحيد
وقتلو اطرانى يا حميد
دحين اطرانا يوم عرسك
وجيب سيرتى فى نفسك
يبقى اكون معاك عريس
انطط زى دحيشا قى الزرع مطلوق
يمين ممكون برانى الشوق
تقول مجنون واصلى عشوق
حمى الريدى فى احشاى
واصلو الريد سكن جواى
اكيد معيون ومانى براى
حليلك انت يا حميد
مجلبط فى الوغش بالطين
وباقى اليوم هموم وحنين
جعيص حميد وما مسكين
شيوعى كمان وحبة دين
يغنى العوده والفوده
ويمدح فيهو سيدى على
وقال لى تعال
امانى الليلى ما وقعت قبض شركها
تعاند الدنيا تتملص وطب حميدسريع مسكها
خطة قوييى السر حبكها
وضاع العمر فى العيشة
فى الفى وما فيشها
جدادى خلاص نتف ريشها
امانى الدنيا ما خاينى
يعجبك فينابرطيشها
وبعد الليلى منو البيعزى فى البكيات
ومنو البيوارى للاموات
ومنو البيكفكف الدمعات
وسف سعوطو واندله
تطوف اقدامو فى الحله
ويعاين فى خلايق الله
وبعد ما شاب واصبح جد
ولدلو ولد
جلدو تخين
سمى وليدو قاسم امين
قبض حميد
يمين قبض حميد
الا المتلو ما بيقبض
يبقى الشى..
حقوق الثورى فى التركة
نصيب الختمى فى البركه
حزب شيوعى والحركه
مسك ايديهو تب فركها
وقت براى فى نفسى
وقع حميد ماسم لعن ابليس
اصلو زولا حى وماهو فطيس
بقالنا عريس
خلاص حميد صبح مشغول
يكابس فى قديرة الفول
وقبل روحى ماتنسل
طلعت بطل
وانسرينا يا حميد
يبارك ليك ربى يزيد
يكسر فى الوغش واقود
يدندن بى غنى المولود
| |
|
|
|
|
|
|
|
|
|
Re: شيوعى (Re: خالد العبيد)
|
العزيز عمار
ثمة صدق في تجربتك
أتمنى أن تكتبها كاملة
ولا تشطب ما تكتب
قرأت ما كتبت كلمة كلمة
وتذكرت سفراتي مع أبي في الفرملة
وفي المنامة
واللعب في الكشك وفي الملوينات
(بس البيارق كانت أحمر وأخضر
والفوانيس أحمر و أخضر
ما فيها أصفر)
أتمنى أن أقرأ تجربتك كاملة
الباقر موسى
| |
|
|
|
|
|
|
|
|
|
Re: شيوعى (Re: Elbagir Osman)
|
Quote: (بس البيارق كانت أحمر وأخضر
والفوانيس أحمر و أخضر
ما فيها أصفر)
|
فعلا هذا خطا لربما تاثير اشارات المرور وختفاء ذلك المشهد..
| |
|
|
|
|
|
|
|
|
|
Re: شيوعى (Re: عمار محمد ادم)
|
يا ابنة الروح غدونا فى دنا الوجد سكارى
وغمرنانور بدر فى دجانا ما توارى
وسلكنا فى طريق المجد دربا ليس يسلكه الحيارى
وغدا السودان وطنا كم تجمله الحضارة
انه السودان فيك قد تجلى ياربيكا
جملى روحى ودارى
رددى لحن الكنار
واشرقى فينا مليا
ارفعى صوت القضية
فى المدائن والضهارى
فى الشوارع والحوارى
فى ربى توريت غنى
بددى الاحزان عنى
وانزعى الاهات منى
فى الديوم وفى البرارى
فى السهول وفى القفار
فى دجى بور تبدى حال صوفى
ابعثى الايمانصدقا فى حروفى
فى دنا المجد تماهى
بددى بالله خوفى
كونى روحا فى رحاب الحق طوفى
ارفعى بالعز انفا
اسمعى نمولى وحلفا
ابسطى للسلم كفا
ابنة الجيش ترقى
رصعى بالنجم كتفا
واستقيمى واستعدى
انت للامجاد سقفا
قد يحين النصر صيفا
من هجير الصيف ظلى
اهتفى للنصر دوما لاتملى
فى المساء كونى بدرا
فى سماء العز هلى
سر ليل انه طال التخفى لو تطلى
1فى دنا المجد تماهى
بددى بالله خوفى
كونى روحا فى رحاب الحق طوفى
ارفعى بالعز انفا
اسمعى نمولى وحلفا
ابسطى للسلم كفا
ابنة الجيش ترقى
رصعى بالنجم كتفا
واستقيمى واستعدى
انت للامجاد سقفا
قد يحين النصر صيفا
من هجير الصيف ظلى
اهتفى للنصر دوما لاتملى
فى المساء كونى بدرا
فى سماء العز هلى
سر ليل انه طال التخفى لو تطلى
قصيدة ماما ربيكا عمار محمد ادم
| |
|
|
|
|
|
|
| |
عمار محمد ادم
خالد العبيد
Elbagir Osman
talha alsayed
فيس بوك
تويتر
انستقرام
يوتيوب
بنتيريست