|
|
|
 Re: اليوتيوب حجبوهو من السودان؟ (Re: فايزودالقاضي)
|
ود القاضي سلامات,
| Quote: كلو من ادروب الخجاج .. |
كلو من أدروب والله,
يعني في داعي يلبس مفوضيه مفوضيه,
ويجيب صناديق بتشبه حقت ناس المفوضيه,
ويملاها ورق زيييييييي حق ناس المفوضيه؟
ده وقت يمثل فيهو انتخابات انتخابات؟ 
| |
  
|
|
|
|
|
|
|
 Re: اليوتيوب حجبوهو من السودان؟ (Re: Ahmed Elmardi)
|
أحمد المرضي سلامات,,
قلت لي قلبك كان حاسس وعملت الكاريكاتير مسبقا؟
الفيديوهات دي الاذاعات والتلفزيونات كلللللها بتتكلم عنها,
أحسن ينكروها بدل يقفلو اليوتيوب,
كده يادوب ما التهمه ثبتت,
يعني هم يزورو ونحن نشرح ليهم المراقات؟
ده كلام؟
تحياتي ,,
| |
|
|
|
|
|
|
|
|
 Re: اليوتيوب حجبوهو من السودان؟ (Re: Amany Elamin)
|
يااااااجنابو سلامات,
يعني السودانيين ديل يشيلو ويملو في اليوتيوب غنا سمح,
وأغاني وأغاني كللللها في اليوتيوب,
ونجلاء سيد أحمد لمن ناس قناة الحره اتكلموا عنّها,
وبرامج وثائقيه ,
وناس أدروب عملو تمثيليه اسمها انتخابات انتخابات في اليوتيوب (حسب رواية غازي صلاح الدين) !!
تجي الحكومه (الجديده) تبداها لينا قبل اعلان النتيجه (المعروفه مسبقا)
بكبت وحجب ومنع ؟
هسي ال 90% من الشعب السوداني الانتخبو الحكومه دي طائعين مختارين,
بعد اقبال علي الانتخابات غير مسبوق,
يغيرو رايهم بعد حجب اليوتيوب ده وللا شنو؟
بعدين أدروب ده ما قالوا بمثل ساكت,
اليوتيوب ذنبه شنو؟
| |
|
|
|
|
|
|
|
|
|
Re: اليوتيوب حجبوهو من السودان؟ (Re: الرفاعي عبدالعاطي حجر)
|
حافظ ياصاحب ازيك؟
| Quote: لا يا أماني سيدو مشي الغداء و بجي استني |
يازول؟
علي فكره عندي احساس سيد الكهرباء بكره حيمشي يتغدا برضو ويشيل معاهو العده,
وسيد المويه زاتو,
والله يستر علي سيد سودانيز أون لاين ما يلحق سيد الراكوبه في الغداء
يللا مش المولد ده انفضه؟
بعد ده "استلقو وعدكم" يامواطنين وأرجو الراجيكم
| |
|
|
|
|
|
|
|
|
 Re: اليوتيوب حجبوهو من السودان؟ (Re: Amany Elamin)
|
اماني ازيك :
تعرفي الجماعة ديل فرحتم كاذبة زي زول شفتو اليوم في التلفزيون بغنو ليه بأسد القبيلة النتر
محمول علي الاكتاف وهو لابس عمة طاقة كاملة وشايل سيف وشنبات تمام، ولكن والله بياكل في لبانة
اي والله ياكل في لبانة
انتخابات هم انفسهم تاكدو ان الشعب عرف الفيها من زمان ولكن امر الفيديوهات كشفهم وعراهم
لكن مصرين يتفقو علي الرضاء بما جاءتهم به الملائكة (المفوضية)
| |
|
|
|
|
|
|
|
|
 Re: اليوتيوب حجبوهو من السودان؟ (Re: ibrahim alnimma)
|
ميمــه ازيك ..
اليوتيوب فاتح يا ستـي ..
بتجيني الصفحه الرئيسيه , عملتا (سيرش) لي اغنيه (على بابك) (مصطفى سيداحمد)
جاتني لكن الفيديو ابى يشتغـل .. قال لي اعملي ابديت للبراوزر ..
حا اعملو وارجع ليكي ..
| |
|
|
|
|
|
|
|
|
|
Re: اليوتيوب حجبوهو من السودان؟ (Re: داليا الكباشى)
|
داليا الكباشي,
سلامات وكيفنك,
شايفاك فايته جنابو عمر النفّاي اليومين ديل !!!!
الناس تقول البلد فاضيه وحركتها ما طبيعيه,
داليا تقول البلد عاديه وما فيها أي حاجه,
الناس تقول الاقبال علي الانتخابات ضعيف,
داليا تقول سيد الدكان الجنبهم صوّت من بدريييي !!
لو في شبكه ما حجبت اليوتيوب لسه أفيدينا !
--
ده غير انه أدروب ده ما كان بيمثل
| |
|
|
|
|
|
|
|
|
 Re: اليوتيوب حجبوهو من السودان؟ (Re: Amany Elamin)
|
Quote: الناس تقول البلد فاضيه وحركتها ما طبيعيه,
داليا تقول البلد عاديه وما فيها أي حاجه,
الناس تقول الاقبال علي الانتخابات ضعيف,
داليا تقول سيد الدكان الجنبهم صوّت من بدريييي !! |
زمـان يا امـاني الامين
اول ما جيت البورد دا , كنت مبسوطه
منك جدا لانك ما شغاله بي فكره (الناس قالوا وانا اقول معاهم) ..
كان خطك حقك براكي .. يعني الناس تطلع الشجره تقع الواطه
انا اقـع معاهم ..؟؟ الله سبحانه وتعالى اداني عقل افكـر بيهو
لمن اشوف الحاجه حاصله بقول حاصله ,, ولمن اشوف الغلط بقول غلط
ولمن اشوف الصاح بقول يا سـلا م..
دا فهمـي الانا ماشيه بيهو هنـا وفي اي حته تانيه ..
------------
للضمـان كـده انا اليوتيوب (كـان) شغال عندي مسافه طويله
مشيت عملت مرور على المرضى وجيت اسي .. حاليـامــا شغال عندي .. Can not be displayed
| |
|
|
|
|
|
|
|
|
|
Re: اليوتيوب حجبوهو من السودان؟ (Re: داليا الكباشى)
|
Quote: زمـان يا امـاني الامين
اول ما جيت البورد دا , كنت مبسوطه
منك جدا لانك ما شغاله بي فكره (الناس قالوا وانا اقول معاهم) ..
كان خطك حقك براكي .. يعني الناس تطلع الشجره تقع الواطه
انا اقـع معاهم ..؟؟ الله سبحانه وتعالى اداني عقل افكـر بيهو
لمن اشوف الحاجه حاصله بقول حاصله ,, ولمن اشوف الغلط بقول غلط
ولمن اشوف الصاح بقول يا سـلا م..
دا فهمـي الانا ماشيه بيهو هنـا وفي اي حته تانيه ..
------------
للضمـان كـده انا اليوتيوب (كـان) شغال عندي مسافه طويله
مشيت عملت مرور على المرضى وجيت اسي .. حاليـامــا شغال عندي .. Can not be displayed |
جميل يا جميل,
يعني الموضوع ما مشاتره وخلاص,
زي ما قلتي بالعقل يا حبيبه,
هسي أنا زاتي الما " إمعه" وعايشه في الخرطوم دي بقول:
1-الخرطوم كانت فاضيه بصوره ما طبيعيه أثناء الانتخابات,
2-الاقبال علي الانتخابات كان ضعيف جدا
3-اليوتيوب حجبوهو من السودان
4- أدروب ما بمثل
كده كيف؟
---
بقيتي مستعجله اليومين ديل,
لكن ما مشكله, خفتك تكوني بقيتي مؤتمر وطني
| |
|
|
|
|
|
|
|
|
|
Re: اليوتيوب حجبوهو من السودان؟ (Re: Amany Elamin)
|
انتي يا امـاني بتكتبي كلام لانك مقتنعه بيهو
ولا عشان تقولي كـده كيـف؟؟
ما تشتغلي بي زول يا امـاني
اكتبي المقتنعه بيهو انت .. انتي وبـس..
| Quote: الخرطوم كانت فاضيه بصوره ما طبيعيه أثناء الانتخابات |
الخـرطوم كانت فاضيه بي صوره(طبيعيه) اول يوم في الانتخابات
لانو السودانيين من يقولوا ليهم اجازه , كلو زول جري على
اهـلو اللي في البلد .. والمينا البري اللي كان زحمه اكبر دليـل ..
Quote: الاقبال علي الانتخابات كان ضعيف جدا
|
وين ..؟؟ ياتو حته ..؟؟ ياتو مركـز ..؟؟؟
ياتو قريـه ..؟؟ ما اعتقد انك حمتي الحتات كلها
ولا انا برضو حمت الحتات كلها عشان نحكم على الموضوع دا
انا لمن اتكلمتا في البوست داك قلتا انو الاقبال في (منطقتي)
الانا قاعده فيها كويس ومعقول جدا بالنسبه لي اول يوم
يعني ممكن اتكلم عن اللي شفتو بي عيني بس .. (حتى صور علاء الدين يوسف بالنسبه لي ما مقنعه) ..
| Quote: -اليوتيوب حجبوهو من السودان |
اليوتيوب كان شغال معاي لحدي قبيل
واسي بفتح بيقول لي بيج كان نوت بي دسبليد
والصفحات المحجوبه في السودان (عاده) بيكتبوا ليك
(هذا الموقع محجوب من الهيئه السودانيه للاتصالات)
يبقى انا ما عارفه الحاصـل شنو لحدي الان ..
والبلد دي اتعلمتا منها اني ما اتسرع في الحكم
على اي حاجه لانو دايما في حاجات الناس (الاعتياديين)
اللي زيي وزيك ما بعرفوها.. للاسف نحن متلقيين فقط ..
مـا عندو مصلحـه يعمـل كده .. لانو سوداني
وغيور على بلدو زينا كـده ..
| Quote: لكن ما مشكله, خفتك تكوني بقيتي مؤتمر وطني |
لمـن كتبتي (لبنـى للاسف بدات تفقدين تضامني معك) كنت مؤتمـر وطنـي ..؟؟
| |
|
|
|
|
|
|
|
|
|
Re: اليوتيوب حجبوهو من السودان؟ (Re: داليا الكباشى)
|
Quote: انتي يا امـاني بتكتبي كلام لانك مقتنعه بيهو
ولا عشان تقولي كـده كيـف؟؟
ما تشتغلي بي زول يا امـاني
اكتبي المقتنعه بيهو انت .. انتي وبـس.. |
كلمة كده كيف ما عندها علاقه بقناعاتي,
لو فهمتيها غير كده تبقي غلطانه !!
كده كيف عندي معناها: كده وقع ليك وللا لسه؟
Quote: الخـرطوم كانت فاضيه بي صوره(طبيعيه) اول يوم في الانتخابات
لانو السودانيين من يقولوا ليهم اجازه , كلو زول جري على
اهـلو اللي في البلد .. والمينا البري اللي كان زحمه اكبر دليـل .. |
لكن ما قالوا ليهم اجازه !!
و ما كان في اجازه الا يوم الخميس,
وهو اخر يوم في الانتخابات بعد ما مدوها,
كده كيف؟ اختفاء الناس طبيعي برضو؟
Quote: وين ..؟؟ ياتو حته ..؟؟ ياتو مركـز ..؟؟؟
ياتو قريـه ..؟؟ ما اعتقد انك حمتي الحتات كلها
ولا انا برضو حمت الحتات كلها عشان نحكم على الموضوع دا
انا لمن اتكلمتا في البوست داك قلتا انو الاقبال في (منطقتي)
الانا قاعده فيها كويس ومعقول جدا بالنسبه لي اول يوم
يعني ممكن اتكلم عن اللي شفتو بي عيني بس .. (حتى صور علاء الدين يوسف بالنسبه لي ما مقنعه) . |
أنا بتكلم عن مشاهداتي,
لما بطلع الشارع بلاحظ ليدين الناس فيها حبر المفوضيه وللا لأ,
في الجامعه والشغل والشارع وكلللللل الحتات المريت عليها في أيام الانتخابات,
بسأل وبلاحظ, الحاصل انه الشارع السوداني ما شغال بالانتخابات,,
والغالبيه ما سجلت أصلا,
وقع ليك؟
Quote: ليوتيوب كان شغال معاي لحدي قبيل
واسي بفتح بيقول لي بيج كان نوت بي دسبليد
والصفحات المحجوبه في السودان (عاده) بيكتبوا ليك
(هذا الموقع محجوب من الهيئه السودانيه للاتصالات)
يبقى انا ما عارفه الحاصـل شنو لحدي الان ..
والبلد دي اتعلمتا منها اني ما اتسرع في الحكم
على اي حاجه لانو دايما في حاجات الناس (الاعتياديين)
اللي زيي وزيك ما بعرفوها.. للاسف نحن متلقيين فقط .. |
أوبسسسس
خيبتي ظني :(
أنا كنت قايلاكي قبيل اتسرعتي,
شكلك قاصده تغالطي فعلا,
يعني في الأول قلتي اليوتيوب شغال,
لما اليوتيوب بقي ما شغال قلت ما حجبوهو !! ومامعروف مالو؟
يكون ياداليا زي ما قال الشفيع في كيبل "حق اليوتيوب" عطلان في الشرق الأوسط؟
ياستي الناس "الاعتياديين" بفكروا, وبيطّلعوا,
أهم في ال BBC قالوا ليك محجوب, كده كيف؟
و
| Quote: لمـن كتبتي (لبنـى للاسف بدات تفقدين تضامني معك) كنت مؤتمـر وطنـي ..؟؟ |
لوووووووووول
لخبطة كيمان ألف,
علي فكره كلامي عن لبني لف وطلع هو الصاح :)
و الزول ما يبقي أعمي ومسكّوهو عكّاز
| |
|
|
|
|
|
|
|
|
 Re: اليوتيوب حجبوهو من السودان؟ (Re: Amany Elamin)
|
| Quote: علي فكره كلامي عن لبني لف وطلع هو الصاح :) |
مليونين الميه صـاح ..
عشان كدا قلتا ليكي لمن كتبتي راي
انتي مقتنعه بيهو .. ما بالضروره
تكوني (مؤتمر وطني) عشان تقولي الحاجه الانتي مقتنعه بيها ..
| Quote: الزول ما يبقي أعمي ومسكّوهو عكّاز |
ما فهمتا انتي قاصده شنـو .. لكن عموما ما حا ارد
حفاظا على العلاقـه الطيبه اللي بيناتنا ..
Quote: شكلك قاصده تغالطي فعلا,
يعني في الأول قلتي اليوتيوب شغال,
لما اليوتيوب بقي ما شغال قلت ما حجبوهو !! ومامعروف مالو؟
|
الواضـح انك انتي الدايره تطلعيني غلط باي طريقه 
انا قلتا Quote: ليوتيوب كان شغال معاي لحدي قبيل
واسي بفتح بيقول لي بيج كان نوت بي دسبليد
والصفحات المحجوبه في السودان (عاده) بيكتبوا ليك
(هذا الموقع محجوب من الهيئه السودانيه للاتصالات)
يبقى انا ما عارفه الحاصـل شنو لحدي الان ..
والبلد دي اتعلمتا منها اني ما اتسرع في الحكم
على اي حاجه لانو دايما في حاجات الناس (الاعتياديين)
اللي زيي وزيك ما بعرفوها.. للاسف نحن متلقيين فقط .. |
كلامي دا واضــح ..
الموقع ما شغال.. ليه ..؟؟ انا ما عارفـه
ليه ما عارفه .. لانو موضوع البي بي سي دا سمعتوا اسي ومنك انت .. وشكرا لانك نبهتيني ..
ليه كنت حذره اني اقول محجوب ولا لا ...؟؟ لانو للاسف نحن قاعدين في بلد , نحن دوما فيها اخر من يعلم
والمواطن اخـر زول بيوروهو المعلـومه الصحيحه ..
Quote: كده كيف عندي معناها: كده وقع ليك وللا لسه؟
|
تــاني يا امأني ما حارد على الحته دي ..
وبرضو احترامـا للعلاقه اللي بيني وبينك ..
شكرا جزيلا .. ولا عوده لي مستقبلا الى هذا البوست ..
| |
|
|
|
|
|
|
|
|
|
Re: اليوتيوب حجبوهو من السودان؟ (Re: ibrahim alnimma)
|
الأخ ابراهيم النعمه,,
Quote: انتخابات هم انفسهم تاكدو ان الشعب عرف الفيها من زمان ولكن امر الفيديوهات كشفهم وعراهم
لكن مصرين يتفقو علي الرضاء بما جاءتهم به الملائكة (المفوضية) |
هم شكلهم خايفين لأنو الفيديوهات دليل مادّي,
يعني ممكن زول يستعملو للطعن في النتيجه,
عموما المواطن ممكن موضوع حجب اليوتيوب ده يزعلو أكتر من موضوع تزوير الانتخابات,
تزوير الانتخابات متوقع مسبقا,
لكن حجب اليوتيوب حار وما متوقع,
في النهايه المواطن المسكين بقوا عليهو اتنين,
حجب يوتيوب وتزوير انتخابات, وما خفي أعظم :)
| |
|
|
|
|
|
|
|
|
|
Re: اليوتيوب حجبوهو من السودان؟ (Re: الرفاعي عبدالعاطي حجر)
|
أخ الرفاعي سلامات,,
Quote: ما بيقدروا يحجبوا الحقيقة
وهي تزوير الانتخابات يا اماني
يابت الامين ... سلام |
هم بس بيبالغوا شويه,
يعني ما يعملوها ظاهره,
الفيديو انتشر ووكالات الأعلام كلها بتتكلم عنه,
وموضوع الانتخابات ده نحن عارفين وهم عارفين والله عارف
أوباما زاتو عارف,
فما يعملوها ظاهره ويحجبو اليوتيوب بضحكوا الناس فيهم,
كان يكتفوا بكلام غازي صلاح الدين بتاع "ميد أب" ده وخلاص,
الناس ديل قراراتهم بقت مضطربه ومتسرعه بشكل ما بشبه زول فائز أصلو !
| |
|
|
|
|
|
|
|
|
|
Re: اليوتيوب حجبوهو من السودان؟ (Re: amir jabir)
|
الأخ أمير جابر سلامات,,
| Quote: السودان دة جاتوا حكومة جديدة متين لمن حجبوا الموقع |
حكومه جديده لنج,
وعلي فكره هي حكومه منتخبه,
يعني غير حكومة الليله مثلا,
بكره الخميس حيعلنوا عن حكومه جديده لعهد جديد,
وأول انجازاتها حجب اليوتيوب عن السودان
| |
|
|
|
|
|
|
|
|
 Re: اليوتيوب حجبوهو من السودان؟ (Re: Amira Elsheikh)
|
أميره الشيخ مشتاقين,
| Quote: سودانيز اون اولاين اخو اليوتوب من امو ود على ذمة حبوبة صلاح غريبة |
بمناسبة صلاح غريبه وبعيدا عن موضوع اليوتيوب,
أنا صلاح غريبه ده لابعرفه لابعرفني,
لا صاحبي في الفيس بوك,
أمبارح جاني ايميل مكتوب فيهو الكلام ده:
Quote: أنت تستلم هذه الرسالة البريدية لأنك عضو في قائمة صلاح غريبة البريدية ... والتي نتطلع فيها إلى الأحسن ... ومزيد من التطوير والتحديث . والمطلوب رأيك فيها وترشيح آخرين للانضمام إليها .
سائلين الله أن يديم عليكم نعمه ، وأن يحفظكم ويرعاكم ،، ،، ،، ،، .
صلاح حسن موسى غريبة
Salah Hassan musa ghariba
Riyadh / Saudi Arabia |
الموضوع ده قبل ما أسترسل فيهو وأفتح بيهو بوست أفتيني في أمري سريع هنا ده,
مجموعة صلاح غريبه البتتطلع للأحسن (في شنو ما عارفه)
جابوا ايميلي من وين؟
ده يا هكر, يا في عميل متجسس ليهم عندي !!
تفتكري شنو؟
| |
|
|
|
|
|
|
|
|
|
Re: اليوتيوب حجبوهو من السودان؟ (Re: Amany Elamin)
|
Quote: أنا صلاح غريبه ده لابعرفه لابعرفني,
لا صاحبي في الفيس بوك, |
انا ذااااااااااتى ما صاحبى فى الفيس بوك شان اطمنك
Quote: الموضوع ده قبل ما أسترسل فيهو وأفتح بيهو بوست أفتيني في أمري سريع هنا ده,
مجموعة صلاح غريبه البتتطلع للأحسن (في شنو ما عارفه)
جابوا ايميلي من وين؟
ده يا هكر, يا في عميل متجسس ليهم عندي |
والله يا امانى انتى اختى وصاحبتى هنا وفى الفيس بوك وما عليك مدسة
ناس صلاح غريبة ديل معاهم الملايكة ... وملك التزوير شان كدا
ماتستبعدى لو لقيتى صلاح غريبة بشحمو ولحمو اسى دى قدام بيتكم
مابقدر افتكر وصلاح غريبة دا تخصص قمربوبا وخضر حسين
المايك معاك ياقمر بوبا ....
| |
|
|
|
|
|
|
|
|
|
Re: اليوتيوب حجبوهو من السودان؟ (Re: فيصل أحمد سحنون)
|
أخ فيصل سلامات,,
Quote: الله يستر على النت ذاتو
كيبل وكده |
تبقي كارثه,
عندنا بحوث وسيرش وحاجات جاده ما بتستحمل والله,
عارف برضو همنا في الكهرباء الاحتمال تاني مانشوفها بعد ما هوجة الانتخابات تنتهي,
الله يمرقنا سالمين من الظالمين علي قول ماما ,,
| |
|
|
|
|
|
|
|
|
|
Re: اليوتيوب حجبوهو من السودان؟ (Re: WAD ELGAALI#4)
|
ود الجعلي !
Quote: الحمد لله الحجبو وريحوك من السهر قالو الليل كلو فاتحه خشمك ومقيهيا فى اليوتيوب ومخليه قرايتك
بعدين تعالى هنا عملتى لى شنو فى موضوعى |
لاحولااا
انت كنت مختفي وين؟
كان في اشاعه انك جايي السودان؟
جيت ورجعت وللا شنو؟
بعدين موضوعك ياتو؟ انت عندك معاي مواضيع وانا ما عارفه
| |
|
|
|
|
|
|
|
|
|
Re: اليوتيوب حجبوهو من السودان؟ (Re: حبيب نورة)
|
اماني ازيك ياخ
ذكرتيني قصة الزول الوقف الحافلة في نص الطريق . .
الركاب ناقشين و عاملين رايحين . . زولنا لحظّو الكعب الدنيا صحراء ساااااي
المهم خلّص في اقرب محل لقاهو ( المثل السري بقول البتلفّت كتير ما بعملا قريب ) . . و الركاب عارفين و عاملين ما عارفين
صاحبنا جا راكب و الركاب يع عاملين ما عارفين . .
ما عارف ليه( الراوي ) ، صاحبنا حس انو مطالب بتبرير ! قام كدا فاجع ليكم الركاب بـ : و الله استفرغت لي جنس استفراغ !!!!!!!!!
زننننننننننننن . . .
قال ميد اب قال !!!
---------
مع النتبيه لانو بطلنا في القصة دي مارس فعالية انسانية طبيعية ما بتحتاج اي ذر رماد في العيون كان ما غبا منو ساي 
| |
|
|
|
|
|
|
|
|
|
Re: اليوتيوب حجبوهو من السودان؟ (Re: الرفاعي عبدالعاطي حجر)
|
أماني ازيك
Quote: يللا مش المولد ده انفضه؟
بعد ده "استلقو وعدكم" يامواطنين وأرجو الراجيكم |
نعم يا أماني
حقيقة البعملوا فيه المواطنين ده اسمه شغب
والشعب ما متعاون لذا الحكومة المفروض تتصرف
شنو ادروب يملا الصناديق كدة،وهو وكت ملاها بخجها ليه يخج راسه وذاتو زول يصور ليه...زول قاعد يزور ما ظريفة ياخي تصوروه ..ديل شنوالمواطنين الما بعرفوا السترة ديل
وامس بالليل في بنية عملت ليها مؤتمر صحفي في كسلا تقريبا طلعت المركز الكانت قاعده فيه عبارة عن كنتين
واليوتيوب ده ياخي انا متضرر عدي بسبب المواطنين المشاغبين لانو بحضر فيه الزير سالم والليلة كان تحديدا الحلقة الحتجن فيها اليمامة وتردد الشعر فوق رمشي كان يمشي..الهويني كان يمشي
معقولة ياخي عشان بس زوروا الانتخابات المواطنين يقفوا لينا اليوتيوب ده؟
اقترح انو المواطنيين المتفلتين ديل يقفلوا ليهم و يكسروا ليهم اي راكوبة ونادي مشاهدة زي اليوتيوب وذاتو يوقفوا استيراد الموبايلات الفيها الكامرا وبالمرة يسحبوا الكيبل الارضي بتاع الانترنت البضرب في البحر الاحمر داك عشان نعيش حياة طبيعية وما نتأثر بالدعايات ساي كيف نعيش بلا كابريس وتصور حالك بدون سيراميك...رجعوا الناس سنة 89 عشان يقيفوا صفوف البنزين والخبز
شعب جاحد ساي...مش كفاية عليكم عايشين ...طوالي عايزين عايزين
خموا صروا غايتو وارجو الراجيكم
تحياتي
| |
|
|
|
|
|
|
|
|
|
Re: اليوتيوب حجبوهو من السودان؟ (Re: حاتم علي)
|
حاتم علي ياصديق,,
ازيك ,
Quote: كنتا داير انزل ليك اغنية : حجبوهو من عيني
لكن اتذكرتا اليوتيوب ما محجوب عندك |
احذر الشماته,
بكره ناس السعوديه يقولو النت حرام وتاني الا في الشاشه الغشاشه ,,
تاني نشوف الأغاني وين؟ 
انت عارفني أنا الفيس بوك كله عاملاهو أغاني من اليوتيوب :(
أدروب بالغ والله 
| |
|
|
|
|
|
|
|
|
|
Re: اليوتيوب حجبوهو من السودان؟ (Re: معاذ حسن)
|
الاخ معاذ حسن,,
| Quote: مافي حد نفّاي كدا من الجماعة اياهم يجي ينفي الخبر دا!! |
كييييف مافي؟
الشفيع حالا رفع بوست قال العطل عام وفي الشرق الأوسط كلو لووووووووول
شوف اللينك:
تعطل الانترنت في الشرق الاوسط
لاجايب مصدر خبر, لاتاريخ !!!!!
حكمة ربنا النت عندنا شغال ميه الميه بس اليوتيوب ما شغال,
بعد ده يقول ليك عطل عام في النت والنت بطئ !!!!!!!!!!
يا اخوان زوروا زي ما عايزين بس احترموا عقولنا الله يرضي عليكم
| |
|
|
|
|
|
|
|
|
|
Re: اليوتيوب حجبوهو من السودان؟ (Re: GamarBoBa)
|
ياااا قمر ,,
Quote: حقيقة البعملوا فيه المواطنين ده اسمه شغب
والشعب ما متعاون لذا الحكومة المفروض تتصرف |
الشعب ما جادّي اطلاقا,
لأنو دي ما أيام أدروب يمثل فيها انتخابات انتخابات,
ماعارفين الاذاعات العالميه ما عندها شغله ومابتصدق تلقي ليها موضوع تبرمج بيهو؟
هسي عليك الله ده شعب يخلوهو يتمتع بنعمة اليوتيوب؟
ده شعب الأكسجين كتير عليهو
لكن بعد ده يرجي الراجيهو ساي,
عالم جاحده بنعمة ربنا !!
| |
|
|
|
|
|
|
|
|
|
Re: اليوتيوب حجبوهو من السودان؟ (Re: محمد عثمان عبدالله)
|
وها هي (قناة ال BBC العربية) تعرض علي شاشتها (الفيديو الفضيحة)... لتلحق بقناة العربية
شاهدت ذلك قبل قليل ....... والغريب تم ذلك بعد أن قرأت حظر السلطات السودانية لموقع (اليوتيوب) مباشرة
.......... فماذا ستفعل سلطاتنا مع هذه القنوات الفضائية ؟
والغريب أيضا أن المذيع كان في حالة من (الضحك) وهو يذيع الخبر ... ولكن للأمانة لم يكن ضحكه (قرقرابا).
| |
|
|
|
|
|
|
|
|
|
Re: اليوتيوب حجبوهو من السودان؟ (Re: عاطف مكاوى)
|
غايته عشان ما يعلقوا الشماعة في الانترنت.... اليوتيوب ده عندنا هنا في السعودية دي، شغااااااااااااااال... مافي اي اعطال....وآخر مره شفت الخريطة احنا الشرق الاوسط اكتر منكم زاتو يا ناس السودان!
أماني ازيك، يعني تاني الاغاني اللزيزة ديك ما حتختيها لينا في الfacebook؟
| |
|
|
|
|
|
|
|
|
|
Re: اليوتيوب حجبوهو من السودان؟ (Re: مريم بنت الحسين)
|
| Quote: غايته عشان ما يعلقوا الشماعة في الانترنت.... اليوتيوب ده عندنا هنا في السعودية دي، شغااااااااااااااال... مافي اي اعطال....وآخر مره شفت الخريطة احنا الشرق الاوسط اكتر منكم زاتو يا ناس السودان! |
نطالب الشفيع بتعديل كلمة الشرق الأوسط بالسودان,
يكون السبب تعطل كيبل اليوتيوب في السودان
يامريومه,,
| Quote: يعني تاني الاغاني اللزيزة ديك ما حتختيها لينا في الfacebook؟ |
وكل الأغاني الحتختيها في الفيس بوك تاني ما حأقدر أشوفها
| |
|
|
|
|
|
|
|
|
|
Re: اليوتيوب حجبوهو من السودان؟ (Re: مجدى عمر بابكر)
|
أخ مجدي مرحب بيك,,
| Quote: احلى بوست موفق قرأته حتى الان |
والله من غلبنا,
الناس ديل بيقولو ديمقراطيه وانتخابات علي ياتو أساس؟
وهم حجب موقع زي اليوتيوب ما بشاوروا فيهو؟
وسياستهم معانا حكم القوي علي الضعيف؟
يعني بعد ده مفروض نصدق ادعّاء الديمقراطيه الكاذب؟
تسلم وشكرا ليك :)
| |
|
|
|
|
|
|
|
|
|
Re: اليوتيوب حجبوهو من السودان؟ (Re: عاطف مكاوى)
|
عاطف مكاوي,,
Quote: وها هي (قناة ال BBC العربية) تعرض علي شاشتها (الفيديو الفضيحة)... لتلحق بقناة العربية
شاهدت ذلك قبل قليل ....... والغريب تم ذلك بعد أن قرأت حظر السلطات السودانية لموقع (اليوتيوب) مباشرة
.......... فماذا ستفعل سلطاتنا مع هذه القنوات الفضائية ؟
والغريب أيضا أن المذيع كان في حالة من (الضحك) وهو يذيع الخبر ... ولكن للأمانة لم يكن ضحكه (قرقرابا). |
ماحريفين يا أخ عاطف,
دايما بشاورو الزول الغلط,
لو سألوني كان قلت ليهم اكتفو ب : "ميد أب" مراقه معقوله,
حجب اليوتيوب حركه ما موفقه لمن ضحكت مذيع البي بي سي ضحكا خفيفا لووووول
| |
|
|
|
|
|
|
|
|
|
Re: اليوتيوب حجبوهو من السودان؟ (Re: Nagi Ahmed)
|
امانى كويس وكت نكرتى موضوعى
كنت مختفى مع معاينات سرية جدا بس اخوك حظو تافه عشان كده دقت فى القايم
جاى السودان لكن اول غاشى دبى زى خمسطاشر يوم كدا ما عندك لى زول اقعد عندو اصلو اهلك المحس ديل منتشرين ماشاالله
وانا اصحابى كلهم برا دبى
الحاجه الاخيره والاهم داير لى عربيه شده وعارفك زوله جدعه
الحاجه البعد اللخيره طالبك عزومه فى غندهار ول دى برضو نسيتيها
اخر حاجه والله مقلقانى جدا حبوبه دومه مختفيه ومالامى فوقا عليك الله طمنينى عليها
| |
|
|
|
|
|
|
|
|
|
Re: اليوتيوب حجبوهو من السودان؟ (Re: WAD ELGAALI#4)
|
ود الجعلي,
انت يا أخوي شتارتك ما بتخليها أصلو؟
Quote: جاى السودان لكن اول غاشى دبى زى خمسطاشر يوم كدا ما عندك لى زول اقعد عندو اصلو اهلك المحس ديل منتشرين ماشاالله
وانا اصحابى كلهم برا دبى
الحاجه الاخيره والاهم داير لى عربيه شده وعارفك زوله جدعه
الحاجه البعد اللخيره طالبك عزومه فى غندهار ول دى برضو نسيتيها
اخر حاجه والله مقلقانى جدا حبوبه دومه مختفيه ومالامى فوقا عليك الله طمنينى عليها |
أولا ما عندي أهل في دبي,
ثانيا ماعندي عربيه
ثالثا ماقاعده أمشي غندهار,,
ماما دوما مختفيه فعلا, انشاء الله بحاول أطمئن عليها,
بعدين أنا ماشه ليها قريب انشاء الله,
انشاء الله لما انت تجي السودان أكون أنا معاها,
عشان تحل حل مشاكلك بعيد بعيد لووووووول
| |
|
|
|
|
|
|
|
|
|
Re: اليوتيوب حجبوهو من السودان؟ (Re: Nagi Ahmed)
|
هلا يا أخ ناجي,
Quote: انتو يا ناس السودان الفلهمة ليكم شنو
اليوتيوب مالكم و مالو مش كفاية بقى عندكم ديقراطية و انتخابات حرة و نزيهة ما تبقو طماعين حكومتكم لو بقت عسل ما تلحسو كله |
نحن بس عايزين اليوتيوب,
الانتخابات خليناها, وأي شئ خليناهو,
غنا ما نسمع؟
والله حالتنا تحنن
| |
|
|
|
|
|
|
|
|
 Re: اليوتيوب حجبوهو من السودان؟ (Re: Amany Elamin)
|
Quote: Amany Elamin
اليوتيوب حجبوهو من السودان؟ |
حجبوك من عيني ليه ياضوء القمر.. أو كما قال "المحجوب"
يا سيدتى ادخلى من أي باب ٍ شئتِ من تلك الأبواب الأخرى أوالوسائط "الهمشروشية" و التي تسمى -مجازاً- بروكسي
| |
|
|
|
|
|
|
|
|
|
Re: اليوتيوب حجبوهو من السودان؟ (Re: Emam Hassan)
|
Quote: والصفحات المحجوبه في السودان (عاده) بيكتبوا ليك
(هذا الموقع محجوب من الهيئه السودانيه للاتصالات) |
لا لا ما بالضرورة
عندك مثلاً secondlife.com بيعمل نفس الحركة دي ولو تلبتي عليه بي بروكسي بيفتح عااااااااادي
| Quote: أقعوا البروكسي يا ناس السودان |
ألحقنا معاك بي واحد إن شاء الله في الخاص .. العندنا كلهن لجنوهن
| |
|
|
|
|
|
|
|
|
|
Re: اليوتيوب حجبوهو من السودان؟ (Re: أحمد محمد عمر)
|
Quote: لا لا ما بالضرورة
عندك مثلاً secondlife.com بيعمل نفس الحركة دي ولو تلبتي عليه بي بروكسي بيفتح عااااااااادي |
يا ابو حميد .. انا قلتا عــــاده ..!!
وعموما شكرا لانك وريتنا انو في كم موقع تاني
محجوب غير اليوتيوب ..
ربما يكون موضوع العطل العام اللي في الشرق الاوسط
بسبب موضوع الكيبل صحيـح ..
شكرا للتنبيه ..
| |
|
|
|
|
|
|
|
|
|
Re: اليوتيوب حجبوهو من السودان؟ (Re: داليا الكباشى)
|
فيصل
| Quote: حبة بس من الدواء ده |
ماااااااااااااا نفع
اليوتيوب في نفس وضعه
بيفتح القوقل فيديو لكن لو اتصفحت من القوقل ملف فيديو مستضاف في اليوتيوب بيشتغل ليك ثواني بس وبعد داك بيقيف
في دواء تاني ؟
| |
|
|
|
|
|
|
|
|
|
Re: اليوتيوب حجبوهو من السودان؟ (Re: سامي صلاح محمد)
|
اماني يا لذيذة تحياتي
عارفة حجب اليوتيوب دا ياهو ذاتو يكاد المريب يقول خذوني
لكن ما في قلق السودانيين كلهم بقو شاطرين و فالحين وسريعين في تجاوز الهيئة السودانية للاتصالات والفيديو اسي حايم في الموبايلات وبلوتوث بس
و الدليل
الشطارة و الفلاحة والسرعة في التزوير مع التصوير
كمان توزيع فئات دوري كبار ودوري للصغار(الشافع الحايم كمان يملا في الصندوق البعيد من الكاميرا عاجبني كيف(
بقدر حزني على بلدي اليومين دي شبعانة ضحك في الله يخلي لينا مفوضية الانتخابات ملكة الكوميديا بدون منازع
طبعا سمعت بالفيديو جريت اعمل داون لود لقيت اليوتيوب الراكوبة محظورين شغلت البروكسي وكلو تمام
| |
|
|
|
|
|
|
|
|
|
Re: اليوتيوب حجبوهو من السودان؟ (Re: الشفيع وراق عبد الرحمن)
|
الشفيع وراق:
| Quote: لم يحجب اصلا يا اماني |
أكيد سمعت نكتة أدروب *
لكن بحكيها ليك تاني للضمان:
أدروب دخل الكورة لاول مره وماداير زول يعرف المعلومه دي،
المباراة مسخنة والجمهور مركز واحد من اللعيبه ضرب واحد من الفريق الخصم قام الحكم اداه كرت احمر .. الجمهور هاج :
ده شنوا يا حكم .. دى كورة يدو فيها كرت احمر؟!
ادروب لقاها فرصة ودخل فيهم شمال : .والله ما أداهو
الجمهورهاج في أدروب*: ما أداهو كيف؟ ما هدا قداااامنا كلنا أداهو كرت أحمر,
ادروب* : والله ما أداهو
الجمهور هايج: دى هسع كورة يدو فيها كرت أحمر ،
ادروب* : والله ما أداهو ,
الجمهور : طيب ما اداه كيف ؟
ادروب : انا شفتو وراه ليهو ورجعوا بس ما اداه
---
* أدروب المذكور أعلاه ما عنده علاقه بأدروب بتاع التمثيليه الشهيره "انتخابات .. انتخابات" :)
| |
|
|
|
|
|
|
|
|
|
Re: اليوتيوب حجبوهو من السودان؟ (Re: فيصل أحمد سحنون)
|
أخ فيصل,,
Quote: أماني والأخوة
فيما يبدو أن الموقع رجع لوضعة الطبيعي
لدّي على الأقل |
ما رجع عندنا لكن !!
أول ما أفتح الموقع بيحولني للنك ده:
http://www.upload.sd/
وبيقول لي سيرفر نوت فاوند !!!!!
ومعاهو الكلام ده:
* If your computer or network is protected by a firewall or proxy, make sure
that Firefox is permitted to access the Web.
شكلهم لاعبنها كويس,
ومحيرين الناس عشان ما نجمع علي الحجب,
مع انه الحجب حاصل بمنتهي الوضوح !!
--
شكرا علي المعلومات المفيده ,,
| |
|
|
|
|
|
|
|
|
|
Re: اليوتيوب حجبوهو من السودان؟ (Re: Tragie Mustafa)
|
هلا يا تراجي’’
Quote:
اليوتيوب بتجننهم جن مش عشان الفيدوهات الآخيره
وقبلها كل تغطيات نجلاء سيد احمد...كله فاقع مرارتهم! |
بس هم يخلوا عندهم شجاعه,
ويقولوا اااااااااي نحن حجبنا اليوتيوب,
وبنزور الانتخابات,
والزارعنا غير الله اليجي يقلعنا,
النغمه دي شبهنا وبعد عشرين سنه بقينا بنعرفها كويس والأقرب الي نفوسنا السقيمه
| |
|
|
|
|
|
|
|
|
|
Re: اليوتيوب حجبوهو من السودان؟ (Re: Nazik Eltayeb)
|
نازك الطيب سلامات,,
| Quote: عارفة حجب اليوتيوب دا ياهو ذاتو يكاد المريب يقول خذوني |
عملوها ظااااهره يانازك,
علي فكره الناس في الشارع ما عندها سيره غير أدروب وخجته الشهيره,
وحجب اليوتيوب لفت النظر أكتر وماحل اشكاليه :)
---
ياناس الحظر رجعوا اليوتيوب خلونا نشوف شغلنا ماعندنا شغله في انتخاباتكم
| |
|
|
|
|
|
|
|
|
|
Re: اليوتيوب حجبوهو من السودان؟ (Re: Amany Elamin)
|
سلوى
Quote: سلامات يا امانى
كلموهم بالمرة كمان يحجبو ال BBC |
أنا ما عارف أماني كلمتهم ولا لسة لكن مكان الفيديو بتاعك مربع أبياااااااااااض
قال بي بي سي قال
علي الجزيمة لو ختيتيهو في لابتوبك يحجبوه
| |
|
|
|
|
|
|
| |
فايزودالقاضي
omer osman
حافظ حسن ابراهيم
Ahmed Elmardi
الرفاعي عبدالعاطي حجر
ibrahim alnimma
داليا الكباشى
amir jabir
حبيب نورة
فيصل أحمد سحنون
WAD ELGAALI#4
قيقراوي
GamarBoBa
معاذ حسن
معتصم دفع الله
حاتم علي
محمد عثمان عبدالله
عاطف مكاوى
مريم بنت الحسين
مجدى عمر بابكر
ذواليد سليمان مصطفى
Emam Hassan
Nazik Eltayeb
Tragie Mustafa
الشفيع وراق عبد الرحمن
فيس بوك
تويتر
انستقرام
يوتيوب
بنتيريست