فكر قبل أن تعمل ...

Quote: حركات جنادب http://www.alfatihgabra.com الفاتح يوسف جبرا الرؤيا : جاء من العمل منهكاً إستقبلته زوجته واطفاله فرحين بقدومة .. وضعت له زوجته طعام الغداء الذى شاركه فيه أولاده الصغار .. تحت الحيط المبتل بالماء وجد علبة سجائر فارغه هز قرنا إستشعارة فى كسل وتمطى ونام . لم يلبث ان بعد ان نام هنيهه أن قام مضطرباً وهو يقول : - اللهم أجعلو خير .. اللهم أجعلو خير - يا راجل مالك قمت تتنفض - اللهم أجعلو خير .. اللهم أجعلو خير - حلمت ليا حلم عجيب –مواصلا- تعرفى يا (جندبه) أنا جدى ده (جندب) مبروك بالحيل أى حاجه يقولا ليا فى الحلم تطلع صاح - وهسه حلمك بى شنو؟ - قال ليا لازم تمشو أرض (الميعاد) !! - وارض الميعاد دى كمان وين؟ - قال إسمها (أرض الجزيرة) .. قال ليا هناك فى مشروع كبيييير يضمن ليكم الغذاء لى جنا جناكم - وحتنفذ القالو ليك ده؟ - طبعا إنتى ما عارفا جدنا (أبو الجنادب) ده مبروك وكلامو ما بقع واطا لم يكد (جندب) يتلقى ذلك الهاتف من جده الأكبر حتى شرع فى تنفيذ وصيته وذلك بالإتصال بأبناء جلدته إتصالات : بدأ (جندب) فى عمل الإتصالات اللازمة لحشد قبيلة الجنادب والتوجه بها إلى أرض الميعاد .. أرض الجزيرة التى أخبره بها جده (أبوالجنادب) والذى ذكر له أن هم سوف يجدو فيها معاشاً ورزقا طيبا ، وكان على جندب أن يقوم اولا بالإتصال بجارة فى (الشق) الذى يسكنه والذى بعد أن إستمع إلى الحكاية قال مخاطبا (جندب) - يابوى جدك ده الظاهر عاوز يودينا فى داهية ياخى والله ولاية الجزيرة دى قالو حالتا صعبه خلااس - كيف يعنى؟ - يعنى الناس ذاتا ما قادرة تعيش نحنا ح نعيش كيف؟ - يعنى عاوز تقول ليا جدنا أبو الجنادب ده كلامو ما صاح؟ - هو إحتمال يكون كلامو صاح لكن أنا الشئ العارفو إنو الناس هناك تعبانه والبلد وسخانه وحالتا صعبه - يعنى هى هنا الحالة الكويسة؟ ما الناس ذاتا عينا طالعه خلينا كدى نسمع كلام جدنا ده إحتمال يكون لى خير !! - خلااس أنا بحاول أساعدك فى حتة التجنيد والإتصالات دى وبدأ الزحف : بعد عمليات إتصالات وتجنيد قام بها عدد مقدر من الجنادب على رأسهم (جندب) وجاره إستغرقت عدة أيام أمن أجل تبليغ الرؤيا المنامية التىأمره فيها جده بالتوجه نحو (الجزيرة) حانت ساعه (الصفر) ولحظة التحرك التى حدد لها فى إحدى الليالى حيث تحركت أفواج الجنادب من كل حدب وصوب من جميع المدن والقرى والحلالات متجهه إلى (أرض الميعاد) ملايين الأرجل الصغيرة وقرون الأستشعار والأجنحة السيلوفانية ذات اللون البنى الفاتح التى تصدر صريرا خافتاً … وبعد رحلة شاقه منهكه إستغرقت أيام وليال تغطت أخيرا كل الطرق المؤدية إلى (مدينة واد مدنى) بطبقه بنية متحركة من (الجنادب) وعلى مشارف المدينة توقفت الجموع حيث إعتلى (جندب) مكانا عاليا ووقف خطيباً : - الأخوة والأخوات الجنادب .. الآن تم تحقيق الرؤيا وها نحن ننفذ ما أشار لنا به جدنا الأكبر (أبو الجنادب) ونهاجر إلى هذه البلاد حيث (المشروع الأخضر) الذى يكفيكم مؤنة الطعام - (همهمات) : هو المشروع القالو جدنا ده وينو؟ والله لا لقينا لينا مشروع ولا حاجه !! - يا جماعه طولو بالكم عليا شوية - نطول بالنا دى شنو إنت هسع جايبنا من حتاتنا الكنا فيها الكان مغترب مغترب والكان ساكن ليهو فى مطبخ فى المنشية وإلا كان لابد ليهو فى ضهر تلاجه فى قاردن سيتى تجى تقول لينا مشروع جزيرة !! أها المشروع ده وينو ؟ - يا جماعة الخير أول حاجه إتكلمو براحه والله (المواطنين) ديل أخلاقهم فى راس نخرتهم من الغلاء والمعايش تقومو هسع تصحوهم ينزلو فيكم ضرب وكتل لمن تآمنو - (أصوات الإحتجاج تخبو قليلا) ثم يواصل (جندب) : شوفو أنا عاوز ليا واحد يكون كان ساكن هنا يعنى من (الجنادب المحلية) يورينا سكة المشروع القالو جدنا دة بى وين؟ - (يقف جندب هذيل يميل لونة إلى السواد تبدو عليه آثار المرض يصمت الجميع ) : يا جماعه والله إنتو جيتو الحته دى غلط .. آآى كان زمانك فى مشروع إسمو مشروع الجزيرة وكان خيرو مكفينا ومكفى أسيادو ذاتم وكمان بيصدرو منو لكن إنتهى ليهو مده و (يصاب بنوبه من السعال الحاد) لكن .. لكن… - لكن شنو؟ - لكن (النفايات) الفى فى المدينه جوه بتكفيكم لى جنا جناكم - (جندب فرحاً) : أها ما قلت ليكم كلام جدنا ده ما بقع واطا .. هيا بنا أيها الجمع فإن أمامنا معارك ضارية هيا بنا إلى الغزو الأكبر .. هيا بنا إلى أرض الميعاد . قامت الجنادب بأعدادها الكبيرة تلك بإقتحام وإستباحة منازل المواطنين مثيرة فى نفوسهم الخوف والهلع .. قام البعض بالدخول إلى الحجرات وقفلها عليهم جيدا بعد التأكد من وصد كل المنافذ .. لم يعرف النوم سبيلا إلى أعين المواطنين كانت تلك الليلة كابوس مزعج ود المواطنون لو أن ينجلى سريعا وقد كان إذ فوجئ المواطنون فى صباح اليوم التالى بإختفاء جموع (الجنادب) تماما مخلفه ورائها عددا من جثث الجنادب التى وقعت ضحاية للتزاحم كما خلفت ورائها الاجنحة السيلوفانية بنية اللون وبعض الروائح التى تثير الغثيان والتى أثرت على الذين يعانون من امراض الربو وتسببت لهم بأعراض مرضية كثيرة أقلها الحساسية فإمتلأت المستشفيات باعداد من المواطنين الذين إنتابتهم حالات الإصابة بمرض الربو الشعبي والحساسية والإختناق . تانى يوم : أكتظ مستشفى المدينة الرئيسى بجموع المواطنين الذين تدافعو وهم يحملون المصابين بحالات الحساسية والربو إمتلات بهم العنابر والصالات غير المجهزة للتعامل مع هذا العدد المهول إرتفعت أصوات السعال والأنين بينما إفترش البعض الأرض مستسلمين : - والله بس ما فضل لينا كمان إلا الجنادب والحشرات - هو عليك الله الأكل مكفينا نحنا لمن تجى الجنادب تشاركنا فيهو - شابكننا أمريكا قد دنى عذابها … أمريكا قد دنى عذابها وأبو الجندب ما قادرين عليهو - ياخى تتصور أنا الليلة الصباح فتحت (الحقة) قلت آخد ليا سفة لقيت جواها (جندبة) (جندب) يقود الحرب : فى هذه الاثناء كان (جندب) وأركان حربه يعقدون إجتماعا (سريا) فى غرفة العمليات بإحدى المواسير حيث وقف يعطى قادة الفصائل الميدانين تعليماته الواضحة : - طبعا نحنا ذى ما عارفين عكس البنى آدمين ما بنعرف نشتغل إلا فى (الضؤ) - عشان كده سعادتك كل قبيلة الجنادب دلوقتى فى المخابئ بتاعتا وح نواصل الهجوم إن شاء الله المساء لمن الناس تفتح (الأنوار) - الناس ديل يا سعادتك مش ممكن يستعملو معانا اسلحه كيمياوية ويرشونا بى مبيدات - خليكم مطمئنين أنا الأخبار العندى إنو المبيدات العندهم دى (فاسده) وما بتكتل ليها نملة - يعنى يا سعادتك خطة الهجوم الليلى سارية و ح ننفذا - طبعا … يعنى أنحنا وكت لقينا (مشروع الجزيرة ومافى) وأرض الميعاد القالا لينا جدنا فى الحلم عدمانه نفاخ النار ما لازم نشوف لينا بدائل - والبدائل دى شنو يا ريس - البدائل دى إنو نحتل المدينة ونفرض سيطرتنا عليها ونحتلاها عديل ودى خطتنا للهجوم الكاسح الليلة !! الجانب الحكومى : عقدت (حكومة الولاية) مؤتمرا صحافيا قامت بتغطيته كافة وكالات الانباء المحلية والعالمية وكذلك عددا من الفضائيات شرحت فيه أبعاد الغزو الجائر الذى قامت به (مليشيات الجنادب) فى ليل البارحة ووصفته (بالغزو الجبان) وقد أوضح الناطق الرسمى بإسم الحكومة بانهم قادرون على صد اى عدوان ودحر كل من تسول له نفسة النيل من تراب وإنسان المنطقة ولم ينس الناطق الرسمى أن يشير باصابع الإتهام لجهات أجنبية لم يسميها بالضلوع فى هذا الغزو الذى أسفر فى يومه الأول عن مصرع تسعه أشخاص وإصابه 1700 هذا وقد أوضح الناطق الرسمى قرار الحكومة تشكيل لجنة عليا لمناقشة آحر التطورات الناتجة عن هذا الغزو المباغت والتى إنبثقت عنها عدة لجان فرعية كلجنة متابعه الموقف البيئى ولجنة متابعه الموقف الصحى اللتان إنبثقت عنهما لجان فرعية أخرى كلجنة تجنيد قوات (الدفاع الكيماوى) التى تقوم بمجابهه جيوش (الغزو الجندبى) ولم ينس الناطق الرسمى أن يذكر المواطنين بوجود غرفة عمليات تعمل على مدار 24 ساعه لمتابعه الموقف بدقة والتصدى لأى مواجهات محتملة وفى ختام تصريحه إبتسم الناطق الرسمى وهو يطمئن المواطنين : - عدو شنو وجنادب شنو والله (نقرمشم) قرمشة - كيف سعادتك يعنى؟ - أيواا أنا أخلى المسئول عن صحة الولاية شرح ليكم نقرمشم كيف ؟ تنحنح المسئول عن صحة الولاية ثم بسمل ثم بدأ حديثه قائلاً : - يا جماعة العدو بتاعكم ده اللى هو الجنادب والصراصيردى بتنتمى لرتبة من الحشرات البسموها ( مستقيمة الأجنحة) وهى نفس الرتبة بتاعت الجراد والإتنين بيشتركوا فى إنهم من أصلح وأجود أنواع الطعامً لللإنسان وهى وجبة مفضلة لدى شعوب كتيرة ذى شعوب أمريكا اللاتينية، خاصة الشعوب البتعيش زينا فى المناطق الحارة ذى ناس جاميكا ، يا جماعه الجنادب دى ما (تخوفكم) .. ده عدو (بروتين) ساااكت يعنى ممكن (تحمروها) وتاكلوها عادى بدل ما تشترو كيلو اللحمة بى سطاشر ألف الهجوم الكاسح : ما أن أرخى الليل سدوله وبدأت أنوار الإضاءة تتلألا فى الأسواق والمحال التجارية والشوارع حتى قامت (مليشيات الجنادب) بالتحرك السريع لتحاصر كل الاماكن بمئات الجنود الجائعين الذين بدأوا فى إلتهام كل ما تقع عليه اعينهم مما أثار الذعر وسط المواطنين خاصة عندما إستعملت تلك القوات سلاح (الرائحه النفاذ) والذى بدأ على إثرة المواطنون فى التساقط وهم يعانون من نوبات سعال حاده . وعلى الرغم من إستخدام الحكومة لكل أنواع المبيدات إلا ان تلك المبيدات لم تؤثر مطلقا فى الكفاءة القتالية لجيش الجنادب مما يدل دلالة قاطعه بأن تلك المبيدات فاسدة ومنتهية الصلاحية . لم يجد المواطنون بدا من إطفاء كل اللمبات وجميع مصادر الضؤ حفاظا على حياتهم من ذلك الغزو فأصبحت المدينة فى لحظات قلائل مدينة يلفها الظلام الدامس تعيش تحت رحمة الجنادب !! لا يجرؤ مواطن واحد فيها أن يضئ لمبة واحده !! فى غرفة عمليات الجنادب : بعد أن عادت جميع الجنادب إلى (ثكناتها) المؤقته قام القائد العام لقوات الجنادب بعقد إجتماع فى غرفة العمليات مع أركان حربه لمناقشة آثار الهجوم الكاسح الذى شنته قواته على معاقل المواطنين : - (يلتفت إلى القائد الميدانى) : كم بلغت حالات الموت والإصابة فى جنودنا - والله سعادتك نسبة لأنو (السلاح الكيماوى) الرشونا بيهو طلع (فشنك) فمافيش خسائر تذكر - هل قبضتم على أى أسرى؟ - (بصوت هامس) أسرى شنو؟ كمان ما تبالغ يا سعادتك؟ (ثم يرد على قائده) : - والله يا سعادتك أسرى مافى لكن تحصلنا على كثير من المؤن الغذائية وقرضنا أى حاجه ما فضلنا ليهم التكتح !! - عندهم إصابات ؟ - بالكوم … قواتنا إستخدمت السلاح الكيماوى بشكل فعال …شئ حالات ربو وأزمة .. وشئ حالات إختناق … وشئ حالات درن !! - (فى حزم) طيب هسع ركزو معاى عشان أشرح ليكم خطة الهجوم بتاع بكرة واخذ القائدالعام لقوات الجنادب يشرح لاركان حربه وللقادة الميدانين خطة الهجوم التالى وبعد أن قام بالشرح فوجئ بأحد القادة الميدانين يسألة سؤالاً مباغتاً : - هسع الناس الناس ديل لو إستسلمو ؟ - أنا الشئ العارفو إنو الناس ديل ما بستسلمو بى سرعه إلا فى حالتين - اللى هم شنو؟ - الحالة الأولى إنوالضربات تكتر عليهم - والتانية؟ - إنو القضية بتاعتنا دى يتم تدويلا !! الغزو فى الصحف القومية : أفردت الصحف القومية مساحات واسعه للغزو الذى شنته قوات الجنادب وقد جاء فى أحدى الصحف ما يلى تحت العنوان التالى : الجنادب تقتحم البيوت وتتسبب في وفاة وإصابة أكثر من 1700 سوداني… ( ارتفع عدد الوفايات جراء الإصابة بوباء الربو الشعبى /الأزمة/ بين السودانيين بولاية الجزيرة إلى تسعة أشخاص مع إصابة نحو 1700 بالداء الذى تسببه حشرة الجندب التى غزت مدينة مدنى حاضرة الولاية وأوضح مدير عام وزارة الصحة بولاية الجزيرة جنوب الخرطوم أن الوفاة حدثت بين المصابين الذين جاءوا متأخرين للمستشفى فى حين تم إسعاف المصابين الذين قدموا مبكرا للمستشفى وأشار المسئول أيضاً إلى أنه يجرى حاليا مكافحة حشرة الجندب عن طريق الرش بالطائرات والمضخات اليدوية والمحمولة على العربات يذكر أن الجنادب اقتحمت منازل المواطنين فى مدنى خلال هذا الاسبوع مما دفع الأهالى لإطفاء الأنوار طوال الليل لمنع تسربها إليهم ……….. مفاوضات : أرتفع أوار الحرب .. أخذت قوات الجنادب تقوم بغارات ليلية خاطفة على المدنيين المدارس المستشفيات أماكن العمل .. أعلنت الحكومة حظر التجوال .. إرتفعت حالات الربو والإختناق والدرن تعددت حالات الإصابة والوفيات .. إكتظت المستشفيات بالمرضى والمرافقين .. على الرغم من إستعانة حكومة الولاية بقوات من حكومة المركز إلا ان الفشل كان حليفا أساسيا لهم .. بدأت أخبار الحرب الضروس الدائرة تتسلل إلى الأخبار عبر وكالات الانباء وبدات بعض الأطراف الدولية تقوم بعقد لقاءآت ثنائية بين الطرفين أسفرت أخيرا عن إجتماع للطرفين لوضع الخطوط العريضة لوقف الحرب والتى لخصها (قائد قوات الجنادب) من وجهه نظره فى إجاباته على الاسئلة التالية التى تقدمت بها إحدى الفضائيات : - ما هو الشئ الذى يميز تنظيمكم - اول حاجه نحنا تنظيمنا ده تنظيم موحد يعنى مافى ولا (جندب) واحد عامل ليهو تنظيم تانى براهو !! الحاجه التانية نحنا بنؤمن بأنو جميع الكائنات لازم تتعايش مع بعضها فى امن وامان وعدل وحرية ومساواة الحاجه التالته مطلبنا هو واحد وهو إنو الحكومة ترجع لينا مشروع الجزيرة تانى عشان نحنا ناكل وإنتو تاكلو وكمان تصدرو البفضل - وما عاوزين تتقاسمو السلطة والثروة ؟ - لا دى خليناها للحكومة و(للحركات) التانية نحنا ذى المواطنين بتاعنكم ديل بس عاوزين ناكل ونشرب وبس !! لا عندنا شغلة بعائدات بترول ولا بقروش دهب ولا عندنا (جندب) عاوز يدخل القصر - أها وإنتو جيشكم ده ومواطنينكم الكتار ديل ح تقعدو وين؟ - كيف ح نقعد وين .. ح نقعد الحتة (الحلمنا) بيها جدنا المليانه نفايات دى - يتو حته (الحلمكم) بيها دى ؟ - (أرض الميعاد) - (فى دهشة) إسرائيل !؟ - إسرائيل شنو؟ … فى (مدنى السنى) دى !!