|
|
 بـعـيـداً عـن زخـم الإنـتـخـابـآت ... حـكـآيـة ديـك الـبُـطـانـة ...
|
الخبر الأكيّد قالوا البُطآنة اترشّت
وساريتاً تبقبق للصباح ما اتفشت
هاج فحل أُم صريصر والمنايح بشّت
وبت أُم ساق على حدب الفريق إتعشّت
ما أجمل البُطانة واروعها حينما يُصيبها وآبلٌ او طل... يمتدّ في عرصاتها بساط الخضرة حتى يعانق
الأُفُق في المدى البعيّد، ويُثقِل الإخضرار فروع اشجارها حتى تكاد تلآمس الأرض... تسبح الطيور في
سمائها الرحب وتغني فوق أشجارها، وتُغازل الفراشات ازهار حشائشها، ويشق صمتها في هداءة الليل
أصوات المزامير، ويرفع حُدآة إبلها عقيرتهم بجميل الدوبآي...
|
|
 
|
|
|
|
|
|
|
 Re: بـعـيـداً عـن زخـم الإنـتـخـابـآت ... حـكـآيـة ديـك الـبُـطـانـة ... (Re: معاوية المدير)
|
منتصف النهآر... الشمس في كبد السماء ترسل أشعتها للأرض التي تذفر الرطوبة من باطنها إثر
أمطآر أصابتها ليلة البآرحة. حاج التوم رآقد في الرآكوبة متوسد يده اليسرى ويده اليمنى على
صدره، مستغرق في نوم عميق لِيأتيهِ صوت ديك حآجة السُرّة مخترقاً زخم الأحلآم الجميلة التي
كان سابح في عالمها... إنتفض حاج التوم من فوق العنقريب ليستعد لِصلآة الصُبُح فإذا به يُفاجأ
بانّ الوقت منتصف النهار!!!
حاج التوم: الله يقطع حِسّك يا ديك الشوم... على باليميّن نحن ديك حآجة السُرّة ده مسّخ علينا
البطانة، وعيشتا.
ردت حآجة الشآم من داخل التُكُل على زوجها: كحوش!... كحوش يا يابا تنكشح فيهو كبريتة تعدمو
اسم الريّشة المسّخ علينا البطانة وسُكنتا.
ردت عليها حآجة السُرّة من خلف الحصير: يايمّة، شآحدا اللانآم لا أكل الطعآم... الكبريتة تنكشح في
جدادآتك المهيآت المسنوحآت ديل.
حاج التوم: علي الحرآم يا حآجة السُرّة، ديكك ده أنا يوم كان ما.....
قبل يتم حاج التوم كلامو ظهر كحوش في مطاردة عنيفة مع جدادآت حاجة الشآم. بسرعة شديدة
الجدادات دخلن تحت عنقريب حاج التوم وخرجن من الجانب الآخر، لكن كحوش المتمرس نطّ فوق
العنقريب ومرّ بسرعة للجآنب الآخر من خلآل صدر حاج التوم، ثمّ بقفذة بهلوانية تمكن من إحدى
الجدادات... عفسها... قامت وهي منتشية تنفض في ريشها بينما كحوش فحط الأرض برجله وقبل ان
يبدأ يعوعي صآح فيه حاج التوم: الله يخربك يا ديك الشوم... كر... كر... طيّر الله يطيرك يا المسنوح...
| |
|
|
|
|
|
|
|
|
|
Re: بـعـيـداً عـن زخـم الإنـتـخـابـآت ... حـكـآيـة ديـك الـبُـطـانـة ... (Re: معاوية المدير)
|
الليل هادئ، وساكن...والقمر اطلّ بخطيً متثاقلة انهكها إنقضاء الشهر العربي، وفحل أُم صريصر هائج
تسمع صوته في كل مكان وقد إمتزج بغوغاي القعوي... اصوات الحيوانات المتوحشة تشق الظلآم بين
الفينة والأخرى، وكحوش قد إعتلى حصير زريبة الغنم في دوام حراسة ليلية لجداد الفريق من الصبرة.
أيضاً يقوم كحوش في ساعات النهار بمراقبة الحِديّة، وإرسال إنذار مُبكّر للجداد إذا ظهرت في كبد
السماء...
حاجة الشآم تحمل حزمة حطب فوق راسها متجهة نحو التُكُل لعواسة كسرة الغداء... قبل ان تصل، الجمتها
المفاجاءة عندما ات كحوش متحكّر فوق راس الخٌمارة... حاولت تبعده بالراااحة حتى لا يُحدث مالا تُحمد
عقباه... إتجهت نحوه بحذر شديد، ولكن قبل ان تصله كان قد أفرغ معدته في داخل الخٌمارة...
حاجة الشام: إنت يا يابا شاحدة المولى، يتلمن فوقك صُبار الدنيا والعالمين يعدمنك نفاخة النار... طييير
تطير ما ترِك...
حاجة السرة من خلف الحصير: يا يمة، شاحداه ما جاحداهو... الصُبار يختن جداداتك مُلآح...
| |
|
|
|
|
|
|
|
|
|
Re: بـعـيـداً عـن زخـم الإنـتـخـابـآت ... حـكـآيـة ديـك الـبُـطـانـة ... (Re: معاوية المدير)
|
حاج التوم وهو يتمطق في الكِسرة بملآح الشرموط بتلذذ شدييييد...
: يا ولية الكسرة دي، مخمراها بمرقة جداد!!!؟
حاجة الشام: يا راجل مرقة الجداد بجيبها من وين كمان؟؟؟
حاج التوم: والله كان ما أخاف الكِضب، طعما جداد، جداد!!!
حاجة الشام: هي الغبى اليغباك... قول مشتهيلك جداد سااااكت، جداد شنو كمان الفي الكسرة؟؟؟
حاج التوم: عارفة... اليومين ديل بسايس في حاج الخزين، اكن يضبح كحوش يريحنا مِنّو...
حاجة الشام: السُعلوّة دي بتخليهو يضبحو؟
حاجة السرة من خلف الحصير: يا مرة، السُعلوّة التخلي راسك ضقلوم...
حاجة الشام: هووووي يا حاجة السرة أسمعي... وحات نضري ديكك ده كان جا تاني مطفر بجاي،
اختو ليك لحم في حلة...
حاجة السرة: شِن قدّرك يا المسنوحة!!!
حاج التوم: آنسوان كفى خلآس...
حاج الخزين: علي الحرآم... باكر من الصباح الديك ده أمشي ابيعو في البندر...
فجاة ظهر كحوشفي مطاردة عنيفة وعراك دامي مع احد ديوك الحِلّة الذي تخطى خط التماس الفاصل بينه
وبين منطقة كحوش... بسرعة إنتقلت المعركة من ارضية الحوش إلى تبروقة حاج التوم ليحمى وطيسها
فوق عنقريب عِدّة حاجة الشام... تبعثرت العِدّة علي الأرض، وطفّر الديك الدخيل من فوق الحصير، وتبعه
كحوش لِتدور المعركة خارج السوّر وسط دهشة الجميع...
حاج الخزين: اكان ما اصبّحك يا كحوش في البندر، ابقى ما ود ابوي...
| |
|
|
|
|
|
|
|
|
|
Re: بـعـيـداً عـن زخـم الإنـتـخـابـآت ... حـكـآيـة ديـك الـبُـطـانـة ... (Re: معاوية المدير)
|
مع نسمات الصباح بعد ان ادى حاج الخزين صلآة الصبح، وشرب الشاي، بدأ في تجهيز حمارته للذهاب
للبندر. وضع السرج على ظهر الحمارة، وأحكم ربط السدّار، ثمّ ذهب لإحضار المُخلآية بينما كحوش ملقى
علي الأرض مكتوف الرجلين، وباقي الجداد يراقب الموقف من داخل الحظيرة بعيون لاتخلو من الخوف
والرُعب... وضع حاج الخزين الُبآدة فوق السرج، وعلّق المّخلآية بالجنب اليمين بينما علّق كحوش بالجنبة
الشمال من كرعيه في عكف السرج، وراسه مدلدل للأرض...
بدأ منظر البطانة يختفي تدريجياً من ناظر كحوش وهو يرآه بالمقلوب... اغرى الطريق المنبسط حمارة
حاج الخزين، وبدأت تسرع الخُطى لِتخُج كحوش خج السيح والريح حتى كادت مصارينه تصل حلقه
وأصبح صوته متقطعاً... كاااك...كااااا...كاااااك...كككك... آآآ آه...
وصلت الحُمارة البندر... أفزع صوت العربات وضجيج البندر كحوش، فطفق يصفق بجناحيه في الهواء
محاولاً الصياح بصوته المبحوح...كاااااااااااااك...ككك...آآآه...آآآآ...آه... وبسرعة إبتلع الجو المشحون
بأزيز ماكينات السيارات، ومُلغم بدخاخين عوادم الركشات صوت كحوش، وبدأ كحوش كالمسطول من
جراء رآئحة البنزين والغبار، والضجيج، وحركة البشر، والمواتر، والكوارو... فهو لم يعتاد علي مثل
هذا الجو المشحون بالضجيج والمدهون بالتلوّث... أصبح كحوش لايرى أمامه غير خيوط من الخيال
ونجوم تسبح في الفضاء من حوله في عِزّ النهار...
وضع حاج الخزين كحوش على الأرض... كحوش مُنهك لدرجة انه يبدو كأنه مريض من زمن بعيد
السبب الذي جعل الناس يكونو فيه من الزاهدين، لدرجة انه علّق أحدهم لحاج الخزين قائلاً: يا حاج
فطيستك دي، ما في زول بيشتريها مِنّك...
مضى الوقت، وبدأ السوق ينفضَّ، وكحوش مازال مُصاب بالدوآر ويبدو في حآلة قريبة للإغماء... شدّ
حاج الخزين الحمارة وعلّق كحوش من رجليه في نفس الوضع مدلدل، كرعيه للأعلى وراسه للأسفل،
وبدأ رحلته قافلاً للبطانة...
| |
|
|
|
|
|
|
|
|
|
Re: بـعـيـداً عـن زخـم الإنـتـخـابـآت ... حـكـآيـة ديـك الـبُـطـانـة ... (Re: معاوية المدير)
|
كحوش في وضعه المدلدل وراسه الدايش، أصبح يرى البندر رِهآب...رِهآب، وحمارة حاج الخزين
منطلقة زي حجر النِبلة في الشارع بعد أن أخدت راحتها في البندر وضربت كلّ العلوق الذي زودها به
حاج الخزين... كلما إقتربت الحمارة من البطانةزودت السرعة، وكلما زودت السرعة أحدثت رجّة في
راس كحوش وأصابت جسمه بالرضوخ.
وصل كحوش البطانة في حآلة بين الحياة والموت... فكَّ حاج الخزين وثاق كحوش وأطلق سرآحه...
لكن كحوش ظلّ طريح الأرض في المكان الذي أنزله فيه حاج الخزين من ارضية الحظيرة وهو في
حآلة قريبة للإغماء...
تناقل جداد البطانة خبر وصول كحوش من البندر... تركت جدادة بت الخير بيضها الذي كانت رآكضة
فوقه وإتجهت نحو حظيرة جداد حاجة السرة لتعرف خبر البندر من كحوش... ديك سلمان سايق معاهو
جداداتو التلاتة ومتجه نحو كحوش... جدادة بت الصعيد وسواسيوها رفضن ينتظرن جداد حاجة خديجة
حتى يتم الإفراج عنه من الحظيرة... كلّ جداد البطانة يمم صوب حظيرة حاجة السرة ليسمع من كحوش
حديث البندر المثير، وعجائب ما راى هناكـ...
أصبح كحوش محاط بالجداد من كل جانب وهو منبرش على الأرض، والجميع في إنتظار ان يفيق ليمتعهم
بجميل الحديث عن عجائب البندر...
فتح كحوش عينيه ثمّ أغمضهن بهدوء، ليفتحهن مرّةً أُخرى ويلقي نظرة على اسرآب الجداد المحيط به
إحآطة السِوار بالمعصم... مازال ضجيج البندر يحدث رجّة في راس كحوش... اسرعت جدادة حاجة
السرة خارج الحظيرة، ثمّ عادت بكوب ماء وثلاث حبات عيش... ساعد ديك سلمان كحوش على النهوض
وقامت جدادة حاجة السرة على مساعدته لبلع حبات العيش...
| |
|
|
|
|
|
|
|
|
|
Re: بـعـيـداً عـن زخـم الإنـتـخـابـآت ... حـكـآيـة ديـك الـبُـطـانـة ... (Re: معاوية المدير)
|
بعد ان بلع كحوش حبات العيش، بدأ يفيق تدريجياً، وما ان عاد إلى كامل وعيه حتي وجد نفسه مُحاط
بجداد البطانة من كل جانب!!!
سألهم كحوش بإندهاش: مالكم! في شنو!؟؟؟... نعال ما في عوجة!؟؟؟...
ردو عليو: عرفنا إنك رجعت من البندر، وجينا عشان تحكي لينا عن البندر والحاجات الشفتها في البندر!!!
كحوش: اوّل قلولكم انا في البندر شُفتَ حاجة!!!... وحات خوتكم انا مشيت مدلدل، وجيت مدلدل!!!...
| |
|
|
|
|
|
|
|
|
|
Re: بـعـيـداً عـن زخـم الإنـتـخـابـآت ... حـكـآيـة ديـك الـبُـطـانـة ... (Re: Ali bas)
|
ود المدير .. كيف حالك ..
Quote:
مع زحمة الإنتخاب دي، بقينا زي
ديك البطانة، الواحد يدخل البورد
مدلدل ويمرق مدلدل... |
والله صدقته ..
والغريبة انه المنبر ده حيلتنا الوحيده ..
تدخل من الصباح تشوف العجب العجاب ..
ياربي تفضي لينا سيرة بايخه ..
نحن كل يوم نقعد في حكاية دقو وقلعوا قروشوا ..
وفي الحالتين انا الضائع ..
خلينا مع ديك البطانة ولو في ديك عده زاتووووو جيبو معاهو .. هههههههه
| |
|
|
|
|
|
|
|
|
 Re: بـعـيـداً عـن زخـم الإنـتـخـابـآت ... حـكـآيـة ديـك الـبُـطـانـة ... (Re: عفاف الصادق بابكر)
|
معاوية يامدير سلاااااام,,,
فى حفل الاستقبال حق الجامعة خاطبنا استاذنا يوسف بدرى(الله يرحمه) ,
امس فى الحتة دى ودعت اخواتكن وهن مشاركات وممثلات للجامعة فى مؤتمر يخص قضايا المرأة خارج السودان,
قلت ليهن جملة واحدة اوعكن يابناتى تبقن زى ديك البطانة يمشى مدلدل ويجى مدلدل,,,
وبقولها ليكن طالما جيتن الجامعة دى ماتبقن زى ديك البطانة انتن كمان...,,
قلت يعنى شنو يابروف? وديك البطانة مالو??
قال امشى اعرفى وتعالى ورينى..
معارضة...احزاب...ولا اقول السودان كلوووووو... بقينا ديك بطانة يامعاوية يااخوي,,
(عدل بواسطة Amira Elsheikh on 04-16-2010, 10:40 AM)
| |
|
|
|
|
|
|
|
|
|
Re: بـعـيـداً عـن زخـم الإنـتـخـابـآت ... حـكـآيـة ديـك الـبُـطـانـة ... (Re: معاوية المدير)
|
Quote: والله صدقته ..
والغريبة انه المنبر ده حيلتنا الوحيده ..
تدخل من الصباح تشوف العجب العجاب ..
ياربي تفضي لينا سيرة بايخه ..
نحن كل يوم نقعد في حكاية دقو وقلعوا قروشوا ..
وفي الحالتين انا الضائع ..
خلينا مع ديك البطانة ولو في ديك عده زاتووووو جيبو معاهو .. هههههههه |
عفاف بت الصادق،
اريت حالك زين...
يا شيخة والله راسنا زاتو بقى لآفي صينية...
ناس قالوا الحبر حبر مكي... ناس قالوا لا ما حبر مكي
حبر دواية بتاعت خلوة... واحدين جو قالوا ليهن كللللكم
كلامكم غلط، الحاجة دي حِنّة... بعد ده كلو جو ناس قالوا
هي زاتها ما مزورة، ونحن يومي ندخل مدلدلين ونمرق
مدلدلين...
غايتو جنس بِدع!!! والله يا قولك فضل ديك العِدة...
| |
|
|
|
|
|
|
|
|
 Re: بـعـيـداً عـن زخـم الإنـتـخـابـآت ... حـكـآيـة ديـك الـبُـطـانـة ... (Re: معاوية المدير)
|
Quote:
معاوية يامدير سلاااااام,,,
فى حفل الاستقبال حق الجامعة خاطبنا استاذنا يوسف بدرى(الله يرحمه) ,
امس فى الحتة دى ودعت اخواتكن وهن مشاركات وممثلات للجامعة فى مؤتمر يخص قضايا المرأة خارج السودان,
قلت ليهن جملة واحدة اوعكن يابناتى تبقن زى ديك البطانة يمشى مدلدل ويجى مدلدل,,,
وبقولها ليكن طالما جيتن الجامعة دى ماتبقن زى ديك البطانة انتن كمان...,,
قلت يعنى شنو يابروف? وديك البطانة مالو??
قال امشى اعرفى وتعالى ورينى..
معارضة...احزاب...ولا اقول السودان كلوووووو... بقينا ديك بطانة يامعاوية يااخوي,, |
أميرة بت الشيخ، نعلّك طيّبة؟
والله صدقت... فعلاً السودان بقى كلوووووو... ديك بُطانة!!!
يا زولة وحات الله، الواحد فينا يمشى السودان يقعد تلآتة واربعة
شهور، لايعرف اوّل لايعرف آخر... ترانا بقينا زي ديك البطانة
ندخل السودان مدلدلين ونمرق مدلدلين...
المخير الله... يا قول حبوبتي...
| |
|
|
|
|
|
|
|
|
|
Re: بـعـيـداً عـن زخـم الإنـتـخـابـآت ... حـكـآيـة ديـك الـبُـطـانـة ... (Re: سيف اليزل برعي البدوي)
|
Quote:
والله يا معاوية مقدرة علي الحكي رهيبة ما شاء الله. لكن أخير ديك البطانة لقى ليه كباية موية و تلاتة حبات عيش فوقنه و فهم حاجة... أنا خايف نبقى زيه ندخل مدلدلين و نمرق مدلدلين و بعد ينتهي السوق دا ما نفهم حاجة. |
العوض أخوي، كيف حالك؟
شايف حكاية المُسكّن دي عجبتك.
يا زول والله اكان لقيت لك شيتاً يسكّن الألم
ما خليت شي... إياها دلدلة ديك البطانة،
وظنيتها ما فايتانا تب...
غايتو الله يكون في العون...
| |
|
|
|
|
|
|
| |
معاوية المدير
عفاف الصادق بابكر
Elawad
سيف اليزل برعي البدوي
فيس بوك
تويتر
انستقرام
يوتيوب
بنتيريست