|
|
 Re: قصة حب تنتهي لأسباب غير وجيهة - مطلوب حضوركم يا أستاذ: عبدالعزيز الفاضلابي (Re: سيف الدولة كامل)
|
وصل البصان الى مدينة بحرى ثم انعطفا الى الكبرى المؤدى الى امدرمان لتنتهى رحلة العودة الى ودنوباوى حيث منزل والد العريس غير بعيد عن منزل النعمة عمة عبده . نزل الجميع وسط الزغاريد وأغانى البنات بينما اتجه عبده مباشرة الى منزل عمته النعمة يحمل الهاندباق وسلة كان قد ملأهاباجود انواع التمور ليقدمها هدية لعمته وابنها الوحيد الزبير.
طرق عبده على باب الدار ليستقبله ابن عمته ويأخذه بالأحضان ويعلو صوت الزبير بالترحيب ثم يدخله متجاوزا به الصالون الى غرفة والدته التى كانت تعانى من علة طرأت عليها حرمتها وابنها من حضور العرس. دخل عبده على عمته وارتمى فى احضانها فأخذت تحضنه وتمطره تقبيلا . ثم جلس جوارها على السرير ليبدأ حديث الذكريات والسؤال عن اهل القرية فردا فردا .
انتبهت النعمة الى عدم وجود الزبير فى الغرفة فأخذت تنادى عليه :
الولد ده مشى وين?
ياعمتى انت دايراهو ليشنو ?
دايراهو ياولدى يجيب لك شيتا تشربا , انت جاى من سفر .
ياعمتى انا براى بقوم بشرب , بس خليك مرتاحة.
يدخل الزبير وهو يحمل زجاجة بيبسي فى يده ليضعها على الترابيزة امام عبدو ثم يحضر كوبا من الماء يضعه جانبها ويخاطـب عبده :
نحن الأيام دى مرض الحاجة عوقنا شديد ,, البركة فى بت الروضة جارتنا دى كان ما هى كان تعبنا .
الله يبارك فوقها ياولدى والله ماقصرت من يومى الرقدتا ماغبت مننا ولاساعة. تغسل وتكوى وتطبخ ربنا يرزقها بودالحلال.
اها ياعمتى ,, هسع كان ماجارتكن دى كان تسوى شنو ,, الزبير ده اظنك دلعتيه. هسع انت يالزبير كان مشيت الديش ولا اتغربت بتلقى ليك جارة وين تكوى ليك وتطبخ لك.
ياخوى انا ودنوباوى ومصنع النسيج ديل مفارقهن وين?
بينما هم يتجاذبون اطراف الحديث يجئ اذان المغرب من المسجد المجاور ليردد الزبير وعبده وحاجة النعمة وراءه كل فى سره. يقوم الزبير ليعد الإبريق ثم يعود لغرفة امه يحمل طستا ويصب الماء لتتوضأ امه ثم يستأذنا الذهاب الى المسجد.
ادى الاثنان صلاة المغرب ثم عادا الى المنزل ليجدا بت الروضة بالمنزل منهمكة فى اعداد العشاء للزبير وضيفه . وقام الزبير بإخراج والدته الى الحوش واجلسها على السرير الذى اعدته لها بت الروضة ,, ثم ذهب الى حوش الصالون ليجد عبده مستلقيا على السرير واخذا يتجاذبان الحديث وكان الزبير قد ابتدر ابن خاله :
اها ان شاء الله المرة دى قاعد معانا كتير?
كتيير بلحيل ,, انا المرة مانى راجع.
كيف الكلام ده يازول ?
والله زى مابقول ليك . . البلد مليتها بركة . انا المرة دى جاى اشوف لى شغل .
يازول كيف الكلام ده ? والساقية تخليها لى منو?
يالزبير ياخوى انت ماسمعت القال:
كجنت السواقى وكجنت البسوقهن
وكجنت البعلق تورو فوقهن.
أريت الساقية بالنار الـ تحرق مروقا
ينكسر الفقر وتقع السبلوقة
وبالبحر اريت يارب يفوت فاشوقا.
عليك الله يالزبير آ خوى الخدمة الـ تخدمنى ياها تشوف لى شغلانة اتمسك بيها نامن نرسى لينا على بر.
رايك شنو تشتغل معانا فى مصنع النسيج الأيام دى بعينوا فى عمال?
انا جاهز عمال ,, ترابلة ,, اى شئ بس حاجة تمشينا.
خلاس يازول ماعندك مشكلة باكر دى اكلم ليك المراقب وان شاء الله تمسك الشغل فى بحر الأسبوع ده.
يتبع بإذن الله.
|
|
 
|
|
|
|
عبدالعزيز الفاضلابى
فيس بوك
تويتر
انستقرام
يوتيوب
بنتيريست