Quote: يا كيكي اجمل حاجة انك تلعب دور محيميد في موسم الهجرة الى ام نخيل دي و تكون راوي بس و العجب ان بقيت قيقا راوي الناس دي ما تعبت معانا ؟. . . بجي احكي ليكم تجربة التنظيمات العاطفية ( الشهيد ( يسار راديكالي ) ، الدمعة ( اصوليين متطرفين ) ، و النقض الاجتماعي ( حزب الوسط ) ) سمعت " بكيس خدمات " ؟ او " واحد في الكف و واحد في الرف و واحد للسف " ؟ و " صديق علاقة " و " موسم فك التسجيلات " . . . و عيييييييييييك
جعفر حبابك ياخ اقيق اي يورا اقصد عشان كدا عاوز اغير اسمي في الشضهادة لـ ( قيقا راوي )و ح اضبح لي ديك - الظروف صعبة كمان و عندنا بنات عاوزين نربيهن .
Quote: ربنا يوسع الذاكرة
آمين . . . و الما بتذكروا بنتموا موية ما تخاف في جنس التنظير دا المجال واسع وساع ذمة الراوي
Quote: بجيك للمتابعة بكرة أو بعد بكرة إن شاء الله
ربنا يسهلا عليك و في رجاك يا فردة
--------------- امير الشيخ ياخ ما تكرهينا البلي ! . . . ما تمسحي ياخ ؟! انت بالذات اكتبي شو ما بدك و الشغلة بتتحمل اي حاجة ، بس ما تمسحي . . . سمح ؟ الكورال جاهز " كورال بزنس " ذكريني انزل ليك الصور اها مسحتي شنو ؟ كبرت في راسي . . . بس عاوز ارد ليك عليهو هنا في قيم البلي دا خرخرة ما معانا و جوز لا يخسر . . . اصلوا موضوعنا هنا ما مارق من الازدواج و الزواج و الجوز و اللوز . . . و كل الناس اتنين اتنين اكتبي ساي و كان ما عجبك الكتبتيهو ما تمسحيهو اكتبي مداخلة تانية انفي بيها الاولى . . . اتفقنا ؟
06-07-2009, 02:19 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
الشهيد : تنظيم يمثل المشوكشين و يعبر عن موقفهم الغريب من المجتمع و في الغالب هم يشكلوا خطر على الاستقرار و سلامة النسيج الاجتماعي و توازنه النوعي بتطرفهم . و فكرهم ( العاطفي ) رد فعل ما اكتر . و كوادره في عز مرحلة التطمينات – مجرد نفخة خشم على آثار جروح الشواكيش ، شغل حبوبات على رأس طفل غرير بس - و على قول الخواجات الـ Denial على ودنه، ياخ ديل بنكروا ضوء الشمس الواحدة دي !! ناكرين وجود حاجة اسمها حب ذاتو من الاساس . إلحاد عديل بالحب و كفر بالجنس الآخر . الشواكيش اربكت باكتم و دمرت حصانتهم ضد الحقد على المجتمع و حسد المحبين ، و اصابهم بفيروس نقص المناعة ضد رد الفعل العنيف و اثرت على سلامة تفكيرهم و حسن تدبيرهم و تدبرهم لشأنهم . و فكرهم بتجسد في مقولات عدمية كلها في " سيرة البحر " من جنس كلام رمزهم التاريخي و حبرهم القوس الاعظم ( عبدو ) " الكهربجي العمل تقيل لما شربوهو موية الغسيل " شفى الله ثلم شاكوشه المقدس و الهمه حلول على اليابسة : شئ كلام عن الدنيا ام قدود جاب علاقة بين يوم السبت و عين الحسود ؟! ومقارنات بين الجمال و الجهل !! وسوء الإختيار قال شينة قال ...! قولنا كلام صحيح وخطيبها ذاتو ولد قبيح ! *
شهداء الغرام ديل يمثلوا خطر على نفسهم و مفسدة للمجتمع و مهدد لاستقراره و سلامة نسيجه . و يستحقوا الشفقة و الرعاية " الخاصة " كمرضى زيهم و زي أي مجنون حايم يفلق في الناس في المحطة الوسطى و بقية التجمعات الجماهيرية . ابرز رموزهم في تسعينات القرن المنصرم او عقده الاخير سيد شهداء دفعتنا – ياخ دا اخد شاكوش قبل ما تبدا العلاقة زي الناس ذاتو - صديقي " عبد الجليل هجو " قنب الاسد . و برضو فيها بحر . . . سنى يا البانطون ؟! خالد الرضي " الروصيرص " و الاخير دا زي ما بقولوا الخواجات كان Pushover و علي العليهو كان انزنق بتمتم كمان ** ! و قيل بتجيب ليها قطعة راسا عديل ، عشان كدا كان الاول كادرهم الخطابي .
ياخ الريدة ما بالغصب ! الريدة جوة القلب دي كمان دايرة ليها درس عصُر ؟!
او كما غنتا هناية الغناية
----------- *
Quote: القصيدة لزميلنا الاستاذ عبدالدافع الخطيب وكان معروفا فى هيئة حلمنتيش العليا بإسمه الحلمنيشى الحبيب إبن الولهان ويبدو انه الآن وكيل وزارة الثقافة والاعلام فقد طال العهد بنا..
و العهدة على منان عضو البورد هنا Re: حلمنتيشيات ** اجمل ما في الاركان العاطفية الهتر مفتوح خالص : خلقة الله : عنصرية اي شي ماشي . . . الكلام بقروش ؟ و الناس كلهم صحاب ما بعرفوا زعل .
06-07-2009, 09:21 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
ديل على عكس الشهيد - التنظيم الجامع لشهداء الغرام - ديل اسرى الغرام . . . و ببرروا كل الوجود و بثبتوه بوجود المحبوب و مستعدين يحلفوا بصحة العلاقة بين الكون و المحبوب و محورية دور الاخير . و هم بيمثلوا مجموعة الباكيين ما " البكائيين" لا ياخ ! ديلاك جماعة عبدو " الظلاميين "
Quote: يا شــاكياً جـرح الغـرام لخـال قلب لا يشــعر الجـرح إلا صاحب الالم خـلِ الجــراح لأوراق تبــوح لهـــا يفضـي إليهـا بمـا فـي قلبــك القلــم
او بالدارجي كدا : المحكمة يوم السبت . . . تجوا بدري و قيل قديماً : الشكية لي ابييدن قوية . . . و زي ما اتحفظ في ذاكرة الغناء الشعبي المسمى " اغاني البنات " ووب عليَّ و البكاء ما بجيبو ليَّ . . .
نرجع للبكايين و البكا . . . بكا زي البكاء . . . لما بي غادي ذاتو . . . بكاء على الطريقة الصاح. . . و " الطريقة الصاح " هنا تقرأ في حيزها الدلالي بلغة " الشماشة " ، و ما عندها أي علاقة بمعيار الصاح و الخطأ و لا أي مفهوم فلسفي . لو صدق عكس زعمنا اعلاه لما وُجِدتْ حوجة لتنظيم عقلاني الطرح ، عميق القراءة لمسألة " العلاقات العاطفية " في صورتا الموضوعية و الاستغلال الامثل لدافعية العاطفة كمحفز لاركولوجي و نبش عميق في الطين ، لتدبير مسرب لاقصى احتمالاته ( البناء ) . و النظر للعلاقات كبناء يصب في نسيج ضام اكبر ، اكثر اتساق بتجانس وحداته و صحة وسلامة علاقاته الداخلية - و دي بنرجع ليها مع " النقض الاجتماعي "
06-07-2009, 09:57 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
الدمعة متماهين في علاقاتهم و في المحبوب لدرجة " البيضنة " - و دي من البيض - الزمن داك يقولوا ليك الزول دا بيض يعني ما عندو موضوع ، اها تلقى الدمعجي منهم بيض لما غلط - هنا غلط دي تقرأ راسية و افقية و هي صحيحة تب او " تماماً " يا قول مثقافتية الزمن داك - تماهي لدرجة الذوبان او كما قال شاعرهم : روح واحدة في جسدين ، الفيهو شحتفة الروح و خمة النفس و تداخل الركب لما ما يفرز الشمال من اليمين ، لمجرد مداعبة طيف المحبوب لخيال محب و جيب سيرتو في مداعبات و خباثات الصحاب و ما اكثرها . و هي كان ملح يطعم بؤس الليالي في سطوح ترهاقا * ياخ الشمشرة دي ذاتا مرات بتكون مبدعة حد الدهشة ! ما اعتقد من السهل انك تصيغ ليك عنوان لعلاقة صاحب من اسمه و اسم محبوبتو على منوال عنواين كتب العرب زمان زي مثلاً : " سطوع الضوء في رباط ام كلعلوع و اللحو " . . . و هكذا دواليك . . . لي عند " الحاسم في بيان اللف و الدوران في علاقة فلانة و علانة و فلان " لاحظتو هنا ظهر و برز مصطلح " صديقـ / ـة علاقة للسطح كتكتيك مضاد ضد الانهزام للمافهيم الكلاسيكية الرجعية - حسب زعمهم - و زي ما قال صاحبي محمد عبد الرحمن جات كمان " صداقة متقدمة " يا كافي البلاء و حايد المحن لا هي صحبة الله و الرسول البنعرفا دي ، لا هي " كيس " راسو عديل ! محنّا في تكييفها نحن ديل . على العموم الدمعجية فكرهم مضطرب . او قول اصلاً ما قاعدين يفكروا ذاتو و مجمل نشاطهم اليومي محصور في ارضاء المحبوب و تلبية رغباته . و هنا ببدا الخم " التنظيمي " و بتبين الطبيعة الاستغلالية لكوادره و تبرز معاني مصطلحات " كيس خدمات " و الرف بتملي و يقارب في معناه فهم الـ Back-up الفرنجية عديل . و حكمة الله زول السف بكون عارف ! ما تقولوا لي عارف شنو ؟ شفتو ابو الدرداق او (ابو الدردوق ) في بعض مناطق السودان ؟ و سمعتو باستورطتو الشعبية ؟ و عارفين بحب منو و العهدة عليها ؟ بس الياهو ذاتو . . . بكون عارف انها علاقة يائسة – ما عارف لو بصح استخدام Beyond help معاها و للا لا ؟ - لكن تقول شنو ؟ انا غايتو بقول خفة عقل و رهافة قلباً ما بحمل الهبباي ساي . مجمل " نظرية " الدمعة " العاطفية " هي هدر لعنفوان الموارد الشابة و تكريسها لإرضاء زول واحد و تعطيل لطاقة اجتماعية خلاقة و مبدعة و " تبييض " لبذخ ألوان الشخصية ، و هد م للذات في ارتهانها لذات ند مكافئة في علاقة تبادلية مختلة من جهة العطاء و البذل و تمزيق لنسيج و بعثرة طين يبشر بإحتمالات ارقى في اسقاط تام لحسابات بكرة اجمل من ظروفنا على غرار : انسى و عيش اللحظة ، او انفق ما في الجيب يأتيك ما في الغيب تلكم الشعارات الطلابية غير المسئولة . إن بقت على البيضنة او حاكت ابو الدرداق ، دا محض جنون و بعثرة للطين ساي .
وكل جملة كتبتها يشهد الله فيها متعة رغم انو القصص دى تحسسك .. مفترض طوالى تتعاطف مع اصحابها...لكن لو اى واحد مننا ركز شوية وكان صادق ... بلقى روحو لعب/ت دور البطولة صم وير...
انت قايل علم النفس قايم وما قاعد ليه?
06-08-2009, 00:22 AM
قيقراوي قيقراوي
تاريخ التسجيل: 02-22-2008
مجموع المشاركات: 10380
وكل جملة كتبتها يشهد الله فيها متعة رغم انو القصص دى تحسسك .. مفترض طوالى تتعاطف مع اصحابها...لكن لو اى واحد مننا ركز شوية وكان صادق ... بلقى روحو لعب/ت دور البطولة صم وير...
انت قايل علم النفس قايم وما قاعد ليه?
ليه ؟
ازيك يا اميرة و مشتاقين ياخ
ياخ ما تتحسسي و لا شيتين مشيناها خطاً كتبت علينا و من كتبت عليه خطاً مشاها
التجربة - تجربة التنظيمات العاطفية - دي حقيقية بكامل زخمها : اركان و كوادر خطابية و مهاترات و اهتمام جماهيري و متابعة وكل الزي منو ؤ كدا . اوجدتا ظروف موضوعية و فرقتا ظروف موضوعية . . . و اكيد هازم اللذات و مفرق الجماعات " السياسة " او قولي " النشاط السياسي " هو شتت اللمّة .
ح احاول القي بعض الضوء على التجربة من بعض ذكرى اطياف رحيمة ما زالت تمارس فعلها بالذاكرة . و اكيد ما فايت على فطنتكم جك الموية التميتو من عندي .
فرحان بيك و سعيد جداً بي طلتك و خليك قريبة . . . الاستقطاب امكن يبدأ قريب
Quote: التجربة - تجربة التنظيمات العاطفية - دي حقيقية بكامل زخمها
ياخ مع احترامى لكل التنظيمات السياسية... لكن اعتقد انو التنظيمات العاطفية هى الاقوى والاكثر تاثيرا على حياتنا لانو نحن الفاعل وفى احايين كتيرة مفعولا به..اما سياسيا فنحن دائما مفعول به... عشان...كدا ياقيقا حقو نعيد تنظيمنا عاطفيا ونشتغل كخبراء رغم انو ما مؤمنة بمسألة الخبارة شديد.... يعنى العاطفى ممكن ياثر على السياسي والعكس غير صحيح... انا من انصارالدفاع عن الحقوق العاطفية بكافة اشكالها ومستوياتها...
Quote: ياخ دا شتت لمة البيوت ....ابتداءبالبيت الكبير... عشان كدا انا السياسى دا ختيت ليهوالقدرو... واقعة شغل عام واجتماعى واسي البوست دا لازم نـطلع منو بتنظيم عاطفى وانشاءالله مانعمل مؤتمر زاتو مامشكلة..لكن الكورال مهم شديد..
على قول الخلايجة : أجل . . . وصلت تب (: عليك بالنقض الاجتماعي تربت يداك
ببساطة كدا ، القصة كلها انو " النقض الاجتماعي " موقف ناقد من الواقع البائس البمثلوه الاتجاهين المتطرفين ديل ( ما بين " شهيد " او " اسير " غرام ) - التقول الشي حرب هي ؟ ! - و دعوة للإتزان و إلجام لجموح وعنفوان العواطف المتأججة سمبلا ساي دي . و محاولة ترشيد طاقة شبابية و عقلنة الـ ( العاطفة ) . و هي توجه اجتماعي علمي و عملي : - الميشن بتاعتنا هي عملية تصحيح نظر . . . يعني صرف عدد واحد نضارة طبية إجتماعية لاي واحد عندو خلل في النظر عشان نبطّل مكنة " العتب الكاسرين بيها ضهرو" دي : العندهم قصر نظر : (الدمعجية نوذجاً ) ديل نخليهم يركزوا على الاجنحة ، و بالتأكيد بكونوا محتاجين فتح اللعب بالاطراف - زي ما بقولوا ناس الكورة - اها نقوم نصرف ليهم ( نظرة مقعرة ) يتجاوزوا بيها " التكتيكي " لفضاء بكرة بكل ألوانه بما فيها الاسود ، بدل النضارة الوردي اللابسنها لينا دي ! قبل ما حاضرهم الموشوشم فيهو العبير دا يقوم يسودن ليهم " الوردي " و يبقى ليهم " بمبي " جد جد . . . رحم الله أديبنا الجميل " ابو آمنة حامد " القال : وشوشنى العبير فانتشيت وساقنى الهوى فما أبيت و كحال الشعراء الرافضين الارتهان للواقع ، بعد كم سنة كدا في لقاء تلفزيوني بعد قرا البيت اعلاه التفت لهلاوي و قال بمرحو المعهود : يا ريتني لو ابيت ! و اردف لو اعدت كتباتها الآن كان قلت : وشوشني " العوير " . اما البيعانوا من آفة طول النظر الشهيد و قوى الظلام : و ما قادرين يشوفوا كرعينم غاتسة وين ديل ! يصرف ليهم ( نظرة محدبة ) قبل ما تحدودب ظهورهم و يحاكوا الترتار و يبقى محل غاتسة كرعينهم دي هو ابعد ما يمكن رؤيته . و ما يلقوا ليهم شافعاً من ضهرم و لا حتى مفراك - دي من ريحة المرأ - يحكوا ليهم حدبة ضهرهم دي !! اصلوا الزول من يجري للتفكير الاستراتيجي دا اعرفو بيمر بأزمة في الحاضر . او كما قال شيخ النقض الاجتماعي الاكبر ، العالم العلامة الحبر الفهامة سيدي " علاء الدين شنكل " " ود الحِبيّب " افادنا الله بعلمه و مدنا بمدٍ منه متصل . . . آمين . او كما قيل قديماً : المستقبل فضاء مسكون بكائنات اكثر منا ذكاء و تحت تحت كدا قيل اكثر جمالاً - و اثبت الواقع صحة النبوءة دي - حتى نحن ذاتنا بنكون اكتر ذكاء و خبرة إن بقن لينا فيهو أيام . يبقى حلكم يا " شهيد " : نظارات محدبة على قدر الجماعة . علها ( تبيض ) ليكم نضاراتكم الـ " دوكوا "* دي . قبل ما سوادها يجيب أجلكم . . . و كان بريحكم : سنطلق أسمائكم على الشوارع التي لم تمشوا فيها طويلا . . . غصباً عن عمنا الجميل " خلي " . . . اها فير كدا ؟ بس ما تقطّعوا هدومكم ، او تجيبوا سيرة البحر . . . سمح ؟ و باللاي فكونا من سيرة البحر دي كلو كلو ، و ساعدونا بتقصير النظر و تطويل مشاويركم في الحياة دي
ح ارجع يا اميرة اديك الخطوط العامة لفكرة النقض . . . اكيد عندنا فكر انت قايلانا عايشين سلفقة ساي على نقد فكر الناس بس !!
---------------- الدوكو - و العهدة على صاحبي سائق الحافلة - هو ادكن انواع التظليل لزجاج العربات
Quote: و دعوة للإتزان و إلجام لجموح وعنفوان العواطف المتأججة سمبلا ساي دي . و محاولة ترشيد طاقة شبابية و عقلنة الـ ( العاطفة ) .
هنا انا ببدا اخرخر...لازم تتشكها وتتوزع من جديد يا مادايرين... قال عقلنة قال??
مش انا قبيل قلت ليك علم النفس قايم وما قاعد ليه?? ياخ القصة ما H2O يعنى ذرتين هايدروجين +ذرة اوكسجين=ماء..
لانو ذرات العاطفة*دى صعب تجميعها و قسمتها ولايمكن تطرحها وتطلع منهافائض القيمة... والخسائر حصرها غير وارد فى ارض المعارك العاطفية... عشان كدا عقلنة نو نهى..
______________________________ ممكن تكون زرزرة برضو
(عدل بواسطة Amira Elsheikh on 06-09-2009, 02:51 AM)
Quote: سنطلق أسمائكم على الشوارع التي لم تمشوا فيها طويلا . . .
دى وجعتنى شديييد... بالمقابل فى ناس مشت لاااامن كرعينها حفت من المشى والنافع الله والله انا ماسكة روحى لانى خايفة اشتت ليك البوست دا فى شرامة تانيين وجودهم فى البوست دا مهم..
Quote: انا كنت قايلاك شاهدعلى العصر وبث....طلعت مصاب...? الله كربم..
من لم يمت من خبطة الشاكوش مات اذاّ فطيس
دا جمال التنظيمات العاطفية: انسيابية الحركة و التنقل من تيم لتيم في لمحة بصر . مرات مزاج ساي يرقوك و تاخد دبورتك و انت لسه ما كملت بكاك و لا انتهنيت بالدمعة . ان شاء الله يوم ترقيتك ما تجي . . . قولي آمين ، انا يومي الاترقيت ملازم ثاني - اول دبورة - ما كنت جايب خبر ، الا بعد وصلت الداخلية و اشتغلت الآلة التحليلية الشمشرجية ! . . . و انهالت التبريكات هي ما قالت لي ما عاوزاك ! و لا ما بحبك ( لا سمح الله ) هي قالت لي : انا بعزك ! اسي دا شاكوش ؟ ياخ انا جدادة بس . بنوم بدرررررررررري . . . غايتو ما عارف ليه كانوا بغنوا لي ؟! : جيت تقول البينا خوة ؟! خوة ايه البتبكي سيدا ؟! خوة بتسهر ليالي ؟!
واحد صاحبنا قال ليها : بحبك . قالت ليهو : شكراً الغريبة الغبيان لسه بسأل دا شاكوش ؟ قرايتنا لتطور التاريخ العاطفي بتبدا بمرحلة البيضنة ( الدمعجية ) ناس الدمعة الحميمة القاعدين يغنوا ليها: لو صحيح غنينا بالدمعه الحميمه ولو دموع الفرحه ما لاقت غنانا بكره نرجع تاني للكلمه الرحيمه شان هنانا شان منانا عشان عيون اطفالنا . . .
هوي ها ! . . . وقف يا عمك . اطفالكم ديل ح يجوا من وين ؟ و هناكم و مناكم ديل يلايقوهم كيف مع " الكلمة الرحيمة " دي ؟ العلى وزن " الرصاصة الرحيمة " . سمعنا - و العهدة على الراوي - انها هي من جنس : بعزك ، و شكراً ، و انت زي اخوي ، اها قاموس الشواكيش دا اصلو ما بتلم مع " اطفالنا " و هنانا و منانا دي . . .
و يبتطور تاريخنا العاطفي لـ " شهيد" بسوء الممارسة او للقراية الغلط او النظرة الما مؤسسة على قراية واقعية موضوعية و هنا ببرز السؤال " النظري " العلى اساسه بتم تصنيف الزول : هل الحب التزام غير عاطفي ؟ بصورة اوضح الاندماج في علاقة عاطفية او الـ " كيس Case " بس لانو الزول دا " كسر فيك ضلعة " ؟ بإجابة اي زول على السؤال دا بكون خت نفسه في اطار احد التنظيمين الباقيين " شهيد - نقض اجتماعي " اعتقد كدا بقى واضح الاساس التنظيمي النظري البشكل قاعدة التنظيمات العاطفية الشغلة ما فيها اورنيك ( نموذج ) و صورتين و دمغة ! و لا هي ديك كيف ؟ الليلة هنا. . . بكرة بي هناك !! الا الراكزين من الدموع و الراسخين في العلم
-------------
Quote: انا كنت قايلاك شاهدعلى العصر وبث....طلعت مصاب...? الله كربم..
يا اميرة نحنا الفينا اتعرفت تعالوا انتو اورثوا التجربة دي و طوروها . نحن مشينا ستب فيرزر و عاوزين نتفرغ لنقد مؤسسات اكبر . شكراً لوجودك هنا ياخ
Quote: التنظيمات دى حسب سردك ليها يا قيقا اكيد انفضت وابطال اركان النقاش ما عادو زى زمان والقصة بتطعن فى الحلق ولا تنكأ الجرح القديم ياخى
دي مكنتك ؟
عبد الدائم يا عمك اقرأ رد اميرة
اميرة حمد لله على سلامتك طلتك شفا لينا نحن ديل
و مليون مراحب يا فِرَد
شادية اها و بعدين ؟
مازن هاشم شايفك في الفيس بوك عامل خطوبة سهير كدا
مازن يا جمال رايك شنو تجيب لي قصيدتك العاطفية بتاعة الغنماية ديك بى جاي ؟ مغروض فيها لاني ح انزل كتابة لعماد عبد الله فيها اشانة سمعة للغنم في كل انحاء العالم كمان ياخ الديمغراطية حلوة ياخ " الرأي و الرأي الآخر " . . . اها منتظرك
مرحبتين د. بيان اتماهي ساي الدنيا زايلة ام بناياً قش
انا ذاتي جايكم اتماهى و اتمها موية كمان
حشرت مداخلتي دي هنا داير الناس تقرأ مداخلاتك تشكرات افندم
يلا يا شبا عاوزين اندياح حر انا غايتو فاتيهو فاتيهو
01-12-2010, 00:46 AM
مها عبد الله مها عبد الله
تاريخ التسجيل: 07-13-2008
مجموع المشاركات: 2271
سلامات يا قيقا والله عجبني بوستك دا عجب لماقربت اتماهى فيهو..وادق خيمتي
نحنا في معهد الموسيقى كان عندنا المدرسة الجمالية لصاحبها ومؤسسها السر السيد الكوز الوحيد في المعهد في هذه المدرسة قسم اشكال العلاقات واشكال المحبوبات وسمتهم.. وبعد ذلك عمل منهج متكامل عن الايقاع بهن في شراك الحب.. اجتهد السر السيد في هذه المدرسة وتصنيفاتها وكان خلاقا فيها جدا اكثر مما اجتهد في اي امر في حياته كلها..
حينما كان المعهد في العمارات منعزلا تماما من اي حتة كان اولادنا الله يديهم العافية مسميننا تحت تحت ساحرات ماكبث لعدم الظرافة والسمحاحة فينا على ما يبدو.. كان هناك اوف دي لكل دفعة في الاسبوع يسارعون بالذهاب الى الفرع معقل الحسان والجمال وقد اطلق السر على هذه الغزوات الحمامات الجمالية.. حيث يذهب الولد منهم من صباحية ربنا على كلية الاداب حيث السماحة الجد وقد اطلق على سبب الحمام الجمالي وهو اثراء الذاكرة الجمالية حيث ان مع ساحرات ماكبث ستضمر ذاكرتهم الجمالية التي تنعش وتتسع بعدد كمية البنات السمحات البتشوفهم. وقد قسم السر السيد اشكال البنات الى المرأة الغلامية ولديه قصيدة مطلعها احبك ايتها المرأة الغلام نسيت بقية التقسيمات وقد قسم شيخنا السر السيد العلاقات على حسب الاغاني
يا انت يا اغرق يبدو ان هذه تساوي عندكم الدمعة ودي علاقة بيكون الدنيا فاضية الا بس المحبوبة وهي كما وصفت علاقة بيض.. بعدين العلاقة المستحيلة الممكنة د بتكون عادة بين اتنين مابتشابهو ذي كوز وشيوعية وللسر تنظيرة خبرة في هذا الامر حيث ذكر لي يوما في نقاش خاص جدا(0سوري يا السر على الفتة دي)
انه معناها ان تصوره الاسلامي لعالم قاصر حيث يجب ان تجذبه البنت المحجبة وهو اسلامي ولكن ان يحب امرأة ماشة موضة بتلبس جينز دا معناها في خلل
في تصوروه الاسلامي للعالم..الحاجة دي كانت هاجس ليه...
بعدين عاطفة وحنان يا ناس
اها دي البنت البقولو عليها الامريكان دراما كوين طوالي شاكية وباكية فلان عاين لي فلان قالي اها والطرف الاخر واقع في غضب الله لازم كل يوم يدق ليه زول عشان يثبت حبو..
في مدارس كثيرة نسيتها.. اها كيفية الايقاع بالبنات في حبائلهم..
اكشتفت بعد فترة من الذهاب الى الفرع مع بعض منهم ان بالجد النساء Usually ALL women fall for jerks لانه ما ممكن اي بت عاقلة تحب واحد من اولادنا ديل
شكل المستحم جماليا لازم يكون فيه غرابة ولازم عدة الشغل والتي هي عادة خرتاية او سعن* وشعر مكندك بالتراب.. ربما بعضهم سرق ليه بدلة عندها ذيل من الازياء بالشكل العجيب دا بيمشو الفرع.ز يلا بعداك بشكف الكافتريا من تقع عينه على البت البوتنشيال بكل جراءة السنين يقتحمها ليك يقرأ ليها جزء من قصيدة لمحمود درويش
لدهشتي طوالي تقبل المدخل دا
ويقعد يقرا ليها ريتاوشنو ما عارف وكلام خارم بارم البت تتكيف شديد ومن ديك وعيك تقشر بوسخو دا القصة دي خلتني افهم مسرحية عطيل بصورة ممتازة حيث بهر عطيل ديدمونة بقصصه العجيبة.. وكذلك اولاد معهدنا الله يطراهم بالخير
_______________
_ السعن هو جلد الخروف يدبغ ويخيط ويستخدم للماء وعادة اولادنا بيشيلو واحد حق عتود(هاهاهاها) يختو كتبهم فيه
Quote: … أخبرته بمفاهيمى فى الحب و الجنس و أبدى إعجابه بها و أيمانه بها.. و بعد عامين تزوجنا
السؤال المحوري
هل فعلن في مفاهيم و افكار في الحب ؟ و قانون الحب الداخلي اصلن شنو هو ذاتو ؟ و الكيمياء بتاعتو بتشتغل كيف ؟ بعدين كل دا موقعو وين من " الثابت و المتحول " . . . و ما مدى التطابق بين الفكر و التطبيق ؟ و مسألة " الحب لافلاطوني " دي ممكنة و لا عمك ابو الإف دا قطعا لينا من سفنجاتو ساي ؟ غايتو ضيع بت الناس ساي كان يومن اسود اللمت فيهو في الكتاب داك
تعرفي يا دكتورة درسونا دكتور و دكتورة ( زوج ) قصتم شيقة و مدهشة . . فيها كتير من الجمال و الحب و قليل من الاسى . . . كانوا جكس و هم طلبة في الجامعة ، وكما في أثر " الحب و الظروف " الاثير في حالات " كيس الجامعة " افترقوا ، تزوجت هي و انكفأ هو نحو عشيرتو و غطى قدحوا . . . اها كل واحد واصل مسيرتو الاكاديمية و حياتو العادية ، عاااااااادي انجبت بنت و إتطلقت هي ، و هو واصل مع بت عمو . رجعوا الجامعة استاذة و اشتغلت الكيمياء من جديد و المرة دي الظروف فصلت معاهم ، كف نف استغلوا الفرصة و اتزوجوا
في احد ايام بزنس المفتوحة - و لبزنس كما للعرب ايامها - كان في زي لعبة كدا يقوموا يسألوك اسئلة باااااااايخة كدا زي بتاعة الجمعيات الادبية في المتوسطة زمان ، اها دكتورنا دا كان سؤاله رتب " تحضير ، زواج ، تخريج " كانت اجابتو : تتخرّج تتزوج . . . تحضّر تتزوج
تشكرات و محبة يا دكترة
06-28-2009, 09:55 AM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: شنو يا دكترة ما تشوفوا لينا فرصة معاكم في ماليزيا دي نكمل تعليمنا ياخ ؟
جدا يا قيقا رغم اني وقفت من الدراسات العليا بعد كم حاجة كدا من سودانين ينقو شعيرك تلفون ورا تلفونو ايملات وتوصية لاهلهم الهنا بس تقول العفش جنب الباب بعد جري 3 شهور كاملة وتطلع القبول الواحد يرسل ليك يقوليك يلا شوفي لي المنحة التقول انا مهاتير دا لو ما قاليك والله قالو لينا الماجستير بي 150 دولار والدكتوراه بي 200 واسع الكلام الجانا دا كثير جدا ومليزيا دي قالو رخيصة جدا(يعني انا غشاشةوعايزة اربح منهم) والكلام الجاهم دا بيكون رسالة القبول الرسميةمن الجامعة بختمها ورسمها ...لا دخل لبيان المسكينة فيها وبكدا بيكون مجهود شهور اهدر في احلام السودانين الطايرة
دا لو ما جا سجل وعمل نايم من رسوم الشركة..
لكن ليك والله طوالي انا عندي كم قيقا حتى لو يغشني ولا يقولي بعد دا فضل تسكي لي المنحة..
06-29-2009, 11:42 AM
حبيب نورة حبيب نورة
تاريخ التسجيل: 03-02-2004
مجموع المشاركات: 18581
شنو يا دكتورة رخيتي ؟ ديك كان كشكرة ساي ( محاولة تقل بس ) و نظام كهرباء و كدا نقوم نجيب سيرة البحر في نص الحر دا ؟!
Quote: ياخي انا محاولة اطرطش ليك كلام العرس عشان ما تنوم في العربية انت تجي تتكلم لي عن الفردوس المفقود..التحضير و العرس
د. حسبو ( منجيريال إكنموميكس ) دا قدوتي في الدنيا دي . . . تعرفي صاحبتك " ابو السا" كمان في سنة 2001 سجلت لي في جامعة جوبا في برنامج الدراسات العاليا " الريموت " بتاعم داك و دافعة لي نص الرسوم الدراسية . عالم الله كدح شهرين من راتبها . . . المسكينة ما جايبة خبر ساي !
Quote: قصة حب افلاطون دي بندلعها بنقوليها فردوس مفقود..
انا سالتك اكان منشورة و لّأ لا ، كان عندي نوايا اسرقا و اعدل نهايتا . . . على الاقل آخر مشهد فيها و الله القدر الروائي دا انا مرات بحيّرني كيف ؟
Quote: طبعاللاسف هنا مافي دش عشان نشوف اي حاجة ماف طريقة نلقى البرنامج في اليو تيوب
ما عندي فكرة و الله يا دكتورة . . . ما في دش ليه حرام ؟ يا زولة كعب الغش
العريس النفض الكيس ياخ عجبنا و سرّ بالنا و الله و ربنا يهنيكم ياخ عاوز اكالمك و اهني و ابارك . . . كدي اكد لي انتو في البلد؟ و لا في بلدكم الطيرا ما بحكي عربي ديك . . . ؟ بلد الناس الفنانين . . . ياخ مبدعين ناسكم ديل حد الدهشة حد زي ما قال عليها اديبنا كرم الله " بلد ناسا برسموا كتابتم "
حكينا دا طق حنك و فض مجالس ساي . . . و شغل تاجر فلس قام يقلّب في الدفاتر القديمة ياخ بمناسبة التقاطعات الكتيرة البنتلاقى فيها رايك شنو في ( إحالة ) لمحطة جميلة ؟ الديم و بنفس ذاكرة الحب و الحنين دي و بكل الطرافة و اللطافة بتاعة حبيبنا " عماد عبد الله " اعتقد انو مدخل جيد للبوح ؟ كان يفك عثرة من لسان اللذين استنكفوا. و بالمرة نشوف دلوهم و جرادلهم و نفقه قولهم
مليون مبروك . . . و امنيات بالرفاه و البنين و حياة مليئة بالسعادة و الحبور
سلام و الى حين إحالة
06-30-2009, 03:39 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
كنت بدرس في الخرطوم الجديدة الثانوية .. و هي ( حبيبتي .. مش الغنماية ) بتدرس في الخرطوم الجديدة بنات . يوم لقيتها كاتبه إسمها بقلم عريض جدا على وش الشنطة بتاعتها ( فصارت كشواهد المقابر) .. زعلت طبعا لأنه كنا بنمشي من بيوتنا لحد المدرسة كداري , و الشوارع العالم مكسرة فيها في النواصي و تحت الشدر .. يعني كل الشباب الصعاليق ح يقومو يقرو اسمها و يعرفوهو .. صاح ؟؟ المهم .. حنبكتَ و غضبت لحبي الذي بقى هامل و حبيبتي التي بقت على كل لسان .. فقلت ليها تجيني الليلة في البيت , عندي معاك موضوع حياة أو موت .. ( و كنت جادي .. زول بيحب و مجروح و ما داير أي مفاهمة ) .. المسكينة خافت و طوالي المساء جات بيتنا , و البيت كان جالوص - لكن النصيحة كان مزبل كويس شديد .. أخلص فيهو عمنا أحمد الزبال و ما قصر - .. هي بيتهم تاني دور .. بيتنا صغير 200 متر .. و بيتهم قدر حلتنا . في بيتنا مافي مكان أحب فيهو حبيبتي غير زقاق الغنم الكان بيننا و بين الجيران , زقاق ضيق و في نهايتو زريبة الغنم الفيها زي خمسة غنمايات , سخلتين و أمهاتن .. الأم الكبيرة لونها زي أحمر كده وللا طوبي طوبي ما عارف .. غنماية بايخه و دمها تقيل تقل .. و تمشي ليك بررررراحه , أسغل غنماية في العالم . المهم الغنماية التافهة دي كان أظن عندها قحة شديدة - بتكون أزمة - في اليوم المهبب داك .. جيت أنا و حبيبتي عشان أديها محاضرة في الأخلاق و كيفية مراعاة مشاعري أنا الحبيب الذي يكتب فيها الشعر و يباري القمرة من تمغرب الدنيا , و لغاية ما تختفي قمرة حبنا ورا حيطة ناس وقيع الله جيراننا . المهم .. و قفنا في الزقاق الضلمة داك قريب لبيت الغنم .. - و قد شهد ذاك الزقاق تشابك أيدينا و رميشنا و كتيل عيوننا في الضلمة ديك , و كيف كل مرة أقول ليها : آآآآآآآه .. و كل مرة برضو هي تقول لي : و الله أنا زاتي , و نفضل كده نتوهوه معاينين لي بعض - و طبعا وسط الريحة و البرطعة و الحاجات العجيبة .. إإإإإإيه .. أيام ياخ .. و حب أصلي . المهم .. مع الحنفشة الحبية ديك و جرح قلبي الغائر و كرامتي التي في الواطـة .. ابتديت أسمع البنيه الدرس الحفظتو .. ( نحنا الفقارى ديل بس أدينا الحنك البيش ) : ليه تجرحي مشاعري كده ؟؟ راعي لخاطري .. أنا بغير .. أنا و الله بي حركاتك دي بقوم يوم أدقك .. و ... ( كُحك .. كُحُك ) إتهجمتَ .. أديتا صنّة .. وعملت فريد الأطرش .. تاني : كُحُك , كُحُك .. إنا لله .. الغنماية المتخلفة ابتدت السيمفونية الكُحية بتاعتها , طبعا اتحرجت جدا جدا ( و أنا في الحب بتحرج بسرعة .. طبعي كده ) المهم الكحة استمرت و أنا برفع في صوتي عشان أغطي بيهو على صوت الغنماية المتخلفة ديك .. و بلغ حسي عنان السماء كواريكاً .. ناس وقيع الله كوركو بالحيطة : ده منو ده ؟ .. آآآآآ ؟؟ و الغنماية الحاقدة العيانة تزيد عليها العشراقة .. و تديها كحاااااك .. كحيييك .. كحك ..كحك .. و أزيد أنا الكواريك و النبيحة . تقوم بعد شوية الغنماية الكائن الفضيحة الغبي , تقوم تدخل في السيمفونية صوت تاني .. أي و الله .. صوت شين و مطرطر و بايخ بياخة و محرج ياخ , وبعد ده عندو ريحة .. حبيبتي الحقارة ابتدت تتنخق ضحك و هي مدنقره راسها عشان ما أشوفها بتضحك (في الحقيقة كانت دايماً بتراعي مشاعري , راعاية كانت الله يطراها بالخير ) .. قمت ياخي زعلت زعل , و طوالي حسيت ليك ( بكبريائي الجريحة ) و انتفضت لشرف حبي المراق سليقة ساكت .. : تضحكي لأنه نحنا بروليتاريا كادحة و عندنا غنم ؟؟ أيوه عندنا غنم .. و أيوة غنمنا بيقحو و يظـ....ـطو .. أيوه نحنا فقرا .. شغال أنا محاضرة في القيم الإنسانية النبيلة .. ( و الغنماية المنعولة شغالة فوق تحت .. كُح .. طاط .. كُح .. طاط .. كُح .. طاط ) الله يكرم السامعين . .. أنا اتعقدت عقدة عمري في تلك الهنيهة , قلت للبنيه : خلاص .. أنسيني .. أنسي قلبي الحباك .. وداعا أيها الحب ( وهي الهبلة الحقارة .. السمحة , ميته من الضحك ) . البنية مرقت بي جاي .. كرضمت ليك يدي وأديت ليك الغنماية دي أم دلدوم بكل قوتي لمن نفسها اتقطع .. و قعدت جنبها أندب حظي .. الغريبة بعد أم دلدوم ديك الكحة راحت منها .. !!!!! و مضت حبيبتي شايلةً معاها حبي الأول و حطام قلبي و الحاجات .. الله لا كسّب الغنم .. ياخي ديل هم السبب في ضياع الحب في العال
06-30-2009, 03:42 PM
منوت منوت
تاريخ التسجيل: 03-18-2002
مجموع المشاركات: 2641
" العريس النفض الكيس ياخ عجبنا و سرّ بالنا و الله و ربنا يهنيكم ياخ عاوز اكالمك و اهني و ابارك . . . كدي اكد لي انتو في البلد؟ و لا في بلدكم الطيرا ما بحكي عربي ديك . . . ؟ بلد الناس الفنانين . . . ياخ مبدعين ناسكم ديل حد الدهشة حد زي ما قال عليها اديبنا كرم الله " بلد ناسا برسموا كتابتم ".
* رجعتُ وحيداً ( إلاَّ منها" حتى غازلني الناسُ في الشوارع ..." ) إلى ديار اللذين يرسمون كتابتهم ، حد قولِ كرم الله. وعماد عبد الله ( عصفور الديم الغريد ) سنزوجه القيقر ( جهاراً نهاراً ) في إحالاتنا المتقاطعة القادمات .
و ... واااصل .
07-02-2009, 04:25 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: يازول نحن نقعد نخجل ونتاضرى لمتين وهو فى شنو بخجلو منو
والله اى خطوة مشيتها فى حياتى دى ماخفت فيها واى تجربة رصيد معرفى بقى
مكون فى شخصيتى...اها المافى شنو???
كدى واحد/ة يجى/ت تقول/ي...ماسمعو بالتنظيمات دى ولا طقشت طرف قلوبهم..
ياخ تاريخنا السياسي خجلانيين منو...الرياضى برضو...والباقى مغتغت..
______________________________________________
قيقا تعال واصل انا جيت
ما قال بجي مالو ما جا ؟!
تعرفي يا اميرة الزول ممكن يتعمد عليك عديل في البوست دا في تفكيك " العاطفية التاريخية " يا ستي ليك العضم و لينا اللحم . . . اها تعالي ادينا فكة ؟!
مع المفاهيم المركبة و الملتبسة دي ، اعملي زي اخوك اشتغلي شرح و دغمسة او كما قال ع ع ابراهيم
اليومين ديل بسمع في ثنائي العاصمة - نسخة ناعمة كدا - في الحقيقة هن ثنائي لكن ما متاكد انهن من العاصمة متل رفاقتن ! و لا من تندلتي ( محافظة كوستي ) ؟ . اماني و ايمان اظنهن ؟
و عيييييييييك . . . و ديك يا " العدميات " و الكلامات من النوع دا !
الوكت دا كلو اخوك بصنف في بطل الرواية ( عاطفياً ) و اجهز في الاستيكرات و لما خلاس الاستيكر بقى ملحوس و جاهز للزق . جوز اللوز ديل قامن ضربن تأمين الزول دا و فتنوا دغررررررررري !!! قول لي كيف عرفتا ؟ قولهما الظاهر على آخر التسجيل ادناه : اغني و اقول لكل الناااااااس : " انا المكتول و حيّ بيهههههههههههههههو "
Quote: بعزك ) دي " الكلمة الرحيمة " الاتسببت في شاكوش و عاهة عاطفية مستديمة لاخوك
اخوان واخوات كتااار اجارك الله.... طبعا قصة والله بعزك...البينا ماحاجة بسيطة...انا ما مهيأ.... ياخ دا حنك عااااااضى وبياخد نص عمر الناس.... التمثيلية دى اى زول خشاها...الفكرة نفسها بس السيناريو والشخوص مختلفين والله مرات نفس الامكنة لكن من الصعب يكون نفس الزمان
07-07-2009, 03:48 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: اخوان واخوات كتااار اجارك الله.... طبعا قصة والله بعزك...البينا ماحاجة بسيطة...انا ما مهيأ.... ياخ دا حنك عااااااضى وبياخد نص عمر الناس.... التمثيلية دى اى زول خشاها...الفكرة نفسها بس السيناريو والشخوص مختلفين والله مرات نفس الامكنة لكن من الصعب يكون نفس الزمان
سلامات يا اميرة و مشتاقين كتير
تعرفي جماعة عبدو ديل ( مسيرين ) للشفقة . . .
لكن الـ ( مسيرين ) للحنق و الغيظ الناس اللابسة نضارات وردي ، و سارحة في خيالات لا تنتمي لواقعهم و لا واقعنا و لا واقع الجيران ذاتو !!
اكتر ما يثير حفيظتي - بختي ! طلع لي حفيظة فجأتن كدا، زي الغجرية واااحد ! ! يكون دا من شنو يا ربي ؟ باقي لي مفيش حد احسن من حد ! - اها اكتر حاجة كان بتعمل لي بهق ، لما اجي ماري لي بي اتنين ، نظام ( جكس ) ؤ كدا . و تلقيهم متشاكلين و بقوا خطين متوازيين و قربوا يكسروا قزازة سمن حبهم . كل دا عاااااااادي و ما ( بسير ) حفيظتي و لا شيتين - هو قليك حفيظتي ساهلة كدي ؟ دي حفيظة خلاء ، جلدا تخين، بقري بس - نرجع للموضوع البتور علي قرحة الاثنى عشر بتاعتي و بشقها عديل و يخليها كل ستة في حتة ! و الليهو : القضية/القضايا ، او قضايا الصراع - سبب الشكلة - تلقيها من نوع قضايا المرحلة التالية او اكتر تقدماً من المرحلة العايشاها قصة حبهم دي ! او من نوع القضايا المؤجلة - حسب ما جا في الكتلوج ( المنفستو ) - من جنس الخلاف على " اسماء الاولاد " او " لون غرفة النوم "
عالم بيض بشااااااااااكل ؟!!!
------------- بورديكم دا بقى مؤلم ياخ طمنينا عليك يا اميرة غرز
Quote: اخوان واخوات كتااار اجارك الله.... طبعا قصة والله بعزك...البينا ماحاجة بسيطة...انا ما مهيأ.... ياخ دا حنك عااااااضى وبياخد نص عمر الناس.... التمثيلية دى اى زول خشاها...الفكرة نفسها بس السيناريو والشخوص مختلفين والله مرات نفس الامكنة لكن من الصعب يكون نفس الزمان
اتمناك كويس وبالك رايق وباكاتك راكزة...انا شايفة غير كدا لانك كبرت اللفة من البوست دا وبقيت تجى عابر بالمفردات وفى اخرى بتكون داقى طناش...ولا ماذن وباقى الجوقة هددو امنك وقالو ليك البعد ولا البلاد ام سعد...? بعرف غتاتة الاصحاب فى هكذا امور...واحسن من يجيدون التكتكة والجغمسة من خلف الكواليس بتاعة العلاقة...والله عالم وشاهد مرات بياخدو دور البطولة المطلقة فى تسيير العلاقات العاطفية وبرضانا..بيرسمو..بيخـططو..بضيفو...بحذفو...وممكن يبدو العلاقة نيابة عنك ويوزعو الحلاوة... فى نفس الوقت ممكن يدقو صيوان العزاء ويكونو هم الكاتل والمكتول... دا كل بتم فى اغلب المرات بمحبة شدييدة ليك انت البطل/ة...طرفى العلاقة..
انا كنت دايرة اقول شنو>>
يازول ماتبعد كتير من البوست دا..غيب حبة وتعال
07-20-2009, 11:24 AM
قيقراوي قيقراوي
تاريخ التسجيل: 02-22-2008
مجموع المشاركات: 10380
اتمناك كويس وبالك رايق وباكاتك راكزة...انا شايفة غير كدا لانك كبرت اللفة من البوست دا وبقيت تجى عابر بالمفردات وفى اخرى بتكون داقى طناش...ولا ماذن وباقى الجوقة هددو امنك وقالو ليك البعد ولا البلاد ام سعد...?
ان صح الزعم فدا كلام يقولوهو لزول ما عندو ركشة
اما دا ! فكلام مليان و منصة جيدة للاطلاق في عضم البوست دا ، او قولي بصيب قلب خيط القلوب دا في صميم حنانو
Quote: البعد ولا البلاد ام سعد...? بعرف غتاتة الاصحاب فى هكذا امور...واحسن من يجيدون التكتكة والجغمسة من خلف الكواليس بتاعة العلاقة...والله عالم وشاهد مرات بياخدو دور البطولة المطلقة فى تسيير العلاقات العاطفية وبرضانا..بيرسمو..بيخـططو..بضيفو...بحذفو...وممكن يبدو العلاقة نيابة عنك ويوزعو الحلاوة... فى نفس الوقت ممكن يدقو صيوان العزاء ويكونو هم الكاتل والمكتول... دا كل بتم فى اغلب المرات بمحبة شدييدة ليك انت البطل/ة...طرفى العلاقة..
بنجيهو و نجيه النضمي زين . . . بس التروق الامور
Quote: انا كنت دايرة اقول شنو>>
يازول ماتبعد كتير من البوست دا..غيب حبة وتعال
اخوك يتيم و محمول و في كرب شديد يا اميرة ما تسووا لينا كشف ياخ ؟
سلامات و اشتياقات يا أميرة غُرز وكتير تشكرات رغم ما تواتر من تحفظات على رفع البوستات بالـ " نقطة " في محاولة مكشوفة لإحتلال المنبر العام او كما قال سيدنا حمور زيادة . لكن و بما انك صديقة ؟، ففي تصنيف القوات الصديقة : نستعيذ بالله و تسعين به و نفتي بأنه يجوز مع المحبة - كفاية عواطف سلبية ! الكراهة ما بتقسم معانا هنا في السياق دا ذاتو !! - نقول بجواز عتالة البوست بنقطة في بعض احوال كرب الاصدقاء . و الله اعلم و كمان كان اديتها شبال كدا و نقطتينا بكم من حبايبنا ابان صلع من بلاد العم سام الموسومين بـالـ " دولار " ، تكوني ما قصرتي . . . اربحاء و عقاب شهر يا فردة ! . . . غايتو الفكّر في الشهر ابو 31 يوم دا بالغ معانا ! . . . غايتو الا يكون ما موظف ؟! و كمان حكاية شهرين وراء بعض من ابو 31 دي قصة كوم براها ! غايتو المصبرنا عليها انو يوليو دا شهر فادي ، و اغسطس دا شهري شخصياً . . . و في دي رواية عن عيد الميلاد و الحبيبة بنجيك ليها بس انمهلي . . .
خليك طيبة لين تفرج . . . او احتمال تاتينا معجزة ، ايهما اقرب لإنصلاح حالنا مع ناس الـ STC و رضاهم علينا
كوني بكل الخير و مشتاقين كتير
09-16-2009, 11:26 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: غايتو المصبرنا عليها انو يوليو دا شهر فادي ، و اغسطس دا شهري شخصياً . . . و في دي رواية عن عيد الميلاد و الحبيبة بنجيك ليها بس انمهلي . . .
سبب القصة ديل جابت رحاب في تعقيب على كلام للمرحوم اديبنا الكبير الطيب صالح في رسالة الى ايلين . . البطل و ايلين قنبوا يخشنوا رامات بعض بكتير من التفاصيل الحميمة و من ضمنها انهم كانوا بستخدموا نفس فرشة الاسنان . . . شفتي الحب دا كيف ؟ اها ادرعوني ليك رحاب خليفة و خدر حسين - قبل العرس طبعاً . . ما عارف موقفو السياسي اسي شنو من استخدام فرشة اسنان واحدة ؟! اها خلّوا " النص " و شبكوني ليك قطعتها من سفنجاتك K و شنو كدا ما عارف ؟ الشينة منكورة قمت نكرتا . . . و بعد مراجعة كدا قمت اتذكرت تاني . . .
Quote: اتذكرت يا رحاب . . . عندي قصة مع فرشة الاسنان و الحبيبة دي . . . لكن تفاصيلها مختلفة شوية . . . طبعاً انت عارفه انو اخوك زول خلا ساي اصولو من العالياب و كريعات و مسقط راسو القيقر في اعالي النيل و لما طار راح و لاحت فرصة التمدن سكن كوستي ، و دي فرصة نعترف : و ساهم في استرياف المدن الحاصل اسي دا !! اها لما جينا الجامعة بهرتنا ( حضارة ) البنادر ( الخرتوم ) و ناسها الراقين و اخوك وقع ليهو في تلابيب واحدة قشطة كدا . المهم اجتهدت مع اخوك كدا في محاولة تنضيف و زجنا في تفاصيل ما بعيدة من عيد العشاق بتاعكم دا ، لاول مرة في الدنيا دي زول يحتفي بميلادي و اعرف انو برضو الميلاد من الاعياد الرسمية ! غايتو يا ناس البنادر ما بسألكم عاد ! المهم الزولة دي جابت لي هدية كدا و طبعاً اخوك لطقاشته ما بعرف الاتيكيت و اللزي منو ؤ كدا ! انو مفروض افتحها و اشكرها باسماً قبل ما اشوفها ذاتو ، و ابدي غبطة و امتنان " تايواني " . . . ايوة تايواني ! . . . هو انا شفت حاجة ؟ يا ريت و يا ريت و يا اااااااااااااريت لو كنت فتحت الهدية . . . كان على الاقل ما دخلت في اضافريني . . . انا الوترة كاتلاني لانو الزول الجنبي اكبر شمشار في الجامعة ، و اول ما ادوني الهدية و اريتا لو ما جابتا ذاتو ياخ ! و اريتني ذاتو لو ما ولدوني من جنس الاحراج الدخلتني فيهو الهدية دي . . . !! مصدر الشمشرة انو الهدية و هي مغلفة بالسلوفان الفاخر و ديك و قلب اخوك ينتح لكن السبب مختلف و الطيب عبد الله الجمجار يولع في النيران . . قال ايه : الزولة دي جابت ليك فرشة اسنان لانها شايفة سنونك الصفراء دي ! و فعلاً التخمين الموست لايكلي للهدية دي من شكلها الخارجي و كل القرائن الظرفية فيما يتعلق بمخلفات السجائر و القهوة – قهوة شنو يا كضاب هو انت لاقي تاكل ؟! خجلان من الصعوط ؟ المهم الشغلة كلها كدا بتقول انو الهدية ام قلوب دي الياها فرشة الاسنان محمداني تب . في حاجة واحدة فاتت علينا كلنا . . . انو الزولة دي زولة رقيقة كالنسمة و بتحبني ياخ – و الله المحير " علي حمودي " و محيرني انا شخصياً انو : في شنو ؟ و عشان شنو ؟ و على ايه يا روميو ؟ دول يبقوا عميوا !! - غايتو غالباً يكون " الاخلاق " هي السبب و تكون داخلة على طمع ! قمرية يا طماعة انت ياخ ! قالوا : الحب في ذاتو مبرر كافي . . . اها انا مقتنع اني ما حبَّ و لا هي بكتبوها حبة ؟ و الله جاطت لي الشغلة يا زولا الفاضي للفلسفة دي منو اسي ؟ غير ناس عبدو ، و الناس الما عندها ركشة دي ؟ و القمرية ذاتا مقتنعة ! البقنع الديك منو انو ابداً القماري ما بتفكر في افكار الطيب المفروض يلبس ليها بامبرز دي . . . و اخيراً الليلة دي عدت كاجمل ما يكون و انفرجت اساريري و انا في سريري في داخلية ترهاقا أتامل في :
" القلم " و برضو مليان ديك و المرة دي توحد سبب النتحي و زاد عليهو فرحة تضييع فرصة شمشرة في داخلية ترهاقا ما معروف مداها . . . عادة كان لحدي ما يحصل حدث كوني خطير ، او اقل حاجة شمشرة بمستوى عالي تساويها في الحجم و تعاكسها في الاتجاه . . . ياخ البسطة الكنت فيها ما اظن يوم ولدوني ذاتو كنت حاسي بيها . . . لو حضرتو . . . ! بالمناسبة دي ، دي واحدة من الـ " ان فولفيل وشز " بتاعتي البتستدعي الإف 3 و لا إف كم ما عارف ديك ذاتا . . .
11-13-2009, 01:34 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: اخوان واخوات كتااار اجارك الله.... طبعا قصة والله بعزك...البينا ماحاجة بسيطة...انا ما مهيأ.... ياخ دا حنك عااااااضى وبياخد نص عمر الناس.... التمثيلية دى اى زول خشاها...الفكرة نفسها بس السيناريو والشخوص مختلفين والله مرات نفس الامكنة لكن من الصعب يكون نفس الزمان
اميرة الاميرة وينك ياخ ؟!
كدي شوفي آخر التطورات الحديثة المشهد ( العاطفي ) ، شيزوفرانيا العواطف (٢).. الشاكوش الهايدروليك كون انو يعني مشهدنا ( العاطفي ) يعاني حالة إلتواث في كاحل القلب الليفت ؤ كدا ، كمان الشواكيش بقى يجي منها " هايدروليك " !!
اها كيف المشهاد عاد ؟
----------------
مشتاقين يا اميرة ما لك منقطعة النظير و التنظير ياخ ؟ اخبارك ؟ و طمنينا عليك . . سمح ؟
11-13-2009, 03:59 PM
الطيب رحمه قريمان الطيب رحمه قريمان
تاريخ التسجيل: 03-21-2008
مجموع المشاركات: 12377
بالنسبة للبوست ما فاتك حاجة ، اهو على قول اميرة ح نقعد نجرجرو من ربع لي ربع و من سنة لي سنة سنتين لي قدام هو نحنا ورانا حاجة ؟ . . ان شاء الله محدش حوش ذاتو !! نحن حزب البهجة ، و ضاربين الهم بالفرح تعالي انداحي ساي لو عاوزة . . او زي ما قالت د. بيان اتماهي ، اهو كلنا بنتماهى و في الاخير بنتمها موية ساي
نوّرت يا صديقة و امنياتي ليك بسنة سعيدة
12-28-2009, 00:13 AM
قيقراوي قيقراوي
تاريخ التسجيل: 02-22-2008
مجموع المشاركات: 10380
البركة في الأرشفة الخلتنا نشوف البوست دا تاني شوف بالله الذاكرة دي ضعيفة كيف والله أظنها من نوع أبو 128 داك كيف حالك يا قيقا وضيوفك الكرام تصور أمضيت زهاء الساعتين اقرأ في البوست من أوله لآخره قلت إمكن الاقي أسم صاحبي يوسف عثمان الهيل زول جميل قرأ هندسة ... ما كان عندو أي شغلة بالبنات ولا بيعرف يشك القميص في البنطلون ذاتو يوم لقيتو ليك رابط نص لمن غلط الحاصل شنو يا ود الهيل ؟ قال لي والله حبيت ... دخلت لي في حبكانة طيب يا ولدنا حبكانة مع السفة دي كيف ؟ رد علي بنصف ابتسامة : عارف أنا لحدي اليوم وصلتها ليك إني كنت بسف لحدي سنة تانية . طبعا الحكاية لم تستمر لأنو صاحبي لا يملك من الجواذب شيئا غير وسامة مبشتنة . كنت عايز أعرف يوسف دا كان في ياتو حزب من أحزابك الفوق دي .
12-28-2009, 11:09 AM
الجندرية الجندرية
تاريخ التسجيل: 10-02-2002
مجموع المشاركات: 9450
حاولت اجد نفس في التصنيفات القلتها دي ما عرفت اخت نفسي وين بالضبط ؟؟.
الشى المتاكد منو انني احببت جميع هذه المخلوقات اللطيفة ولحدي هسي متحير في قلبي ده شالهم كيف ورماهم كيف والله هسي بعد عثمان روان ديل الواحد بقي ماقادر يتذكر اسمو.
لكن الحب كان مختلف في زمنا
فهمنا للحب كان سليم كان فيهو مفاهيم مقنع الكاشفات والولد البتل ضرعاتو والبت الدغرية وود ضكران ...
كان في شي ماطبيعي بيخلينا (ننهر) الحبيبة ونحس بالغيرة والخوف عليها .
(اتمني الا اكون قد دخلت في عش الجندر بكلمة انهر دي)
كنا بنحمل قيم انتهت الآن قيم تنبيه الغافلات البريئات الصديقات الشقيقات ..
وكان ذلك كله بدافع احساس (الأخ الرجل ) .
ملحوظة
الصورة تثبت ان النحافة سبب اساسي في غذاء الروح وان السعادة هي فائض المتعة علي الالم.
بابكر
01-01-2010, 06:52 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
حاولت اجد نفس في التصنيفات القلتها دي ما عرفت اخت نفسي وين بالضبط ؟؟.
لوووووول ما تخاف ( بتجد ) نفسك متورط تب . . بس انمهل لي يا ابو الزيك الا الشغلة ما بيدك ! . . بل بيد عمر و في رواية قدرية جليلة بيد " عمرية "
با عزيزي الديمقراطية العاطفية بتختلف ، اصلاً " الاختيار " اساس كل الجدل في الصراع العاطفي . فزي ما عبرت انت بـ " أجد " ودي الكلمة المناسبة بالمناسبة . بتلقى نفسك مصنف و متنظم زي الترتيب من غير انو يكون لك حق " الاختيار " لا في الاول ( الحالة ) ولا في الاخر ( الموقف التنظيمي ) !! . . شفت كيف ؟ لا خيار هنا و لا هناك . . ياخ في زول ( بملك ) القلب اقصد القلم بكتب روحو شقي ؟! ثم ثانياً - وكان في نقطتو الخامسة - الفكرة الاساسية و المنصة القامت عليها ( التنظيمات العاطفية ) هي ادلجة ( الشمار ) ، فانتفت الذاتية هنا .
Quote: الشى المتاكد منو انني احببت جميع هذه المخلوقات اللطيفة ولحدي هسي متحير في قلبي ده شالهم كيف ورماهم كيف والله هسي بعد عثمان روان ديل الواحد بقي ماقادر يتذكر اسمو.
ببساطة شفت كلامك دا مقروء في تاريخانيته بصنفك دمعة طوالي في وقتها داك الله يغفر ليهن ياخ . . منهن من قضت . . و من تنتظر ، و كلهن بدلن تبديلاً شديد . . بورك لهن و عليهن و طبن حيثما كن
Quote: لكن الحب كان مختلف في زمنا
دي ارقيومينت بنجيها ليتر . . نحنا دفعة . في اللول نشوف كتاب الناس التانين مويتو شنو ؟
Quote: ملحوظة
الصورة تثبت ان النحافة سبب اساسي في غذاء الروح وان السعادة هي فائض المتعة علي الالم.
بابكر
و بي كلامك السمح دا وريتني سبب الجاذبية البتتمتع بيها من زمنك ، و قربتنا من فهم فلسفة " الدمعة "
ربنا يخلي عثمان و روان ياخ
---------------
و الله يخلي الولاد ياخ
12-30-2009, 11:06 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
شكراً على الاطراء بدخولك البوست يا اماني نيابة عن اسرة ( البوست ) ارحب بيك و بالجد سعيدين بجيتك
ياخ مداخلتك و " معّرفك " خدشن ذاكرة بعيدة - اصلاً فكرة البوست حت لذاكرة حب - تعرفي مفرد " قواعد " دي " قاعد " ، حتى في التأنيث ، تلغى " تاء " التأنيث . . . شفتي كيف ؟ اها دا النص المليان من الكوب .
ورد في الاثر عن ملك اعلن عن عطايا ، فجاء متصلبط خمسيني كدا ، قال للعامل ادينا ؟ - يديك الكود ! يازول بصحك ؟ نديك شنو ؟ اسي تحت ياتو بند نصرف ليك " قواعد ، ارامل ، ايتام . . . الخ " بس صاحبنا شبك ليك في " قواعد " دي ! يا زول يهديك يرضيك . . و شرحوا ليهو منتسبي و افراد تيم القواعد. بس صاحبنا مصر يسجلوه قاعد . قصروا الشر و سجلوه قاعد . اها جحا لما ضمن العطية ، كمان دخل حمارو اقصد ولدو . اها دا نسجلو ليك شنو ؟ قال يتيم ! قالوا ليهو فعلاً الانت ابوه هو يتيم اها كان ما خايفين نيتم اولادنا ساي كان سجلنا قواعد كلنا لوووووول انقري شنو ؟ . . كترة الحكي دي ما ياها خدمة المصاطب و المعتزلة ذاااااااتا ! . . . و دا نص الكوب التاني ، برضو مليان ، الا مليان إلام" مليان كلام ساي "
زمان زمن الزمن زمين كنت " قاعد " مع حبيبة الزمن داك - قاعدين نتبيضن - اها ماسكين لينا موضوعن بيض كدا ، صادف القضايا المؤجلة ديك - مراحل ما بعد الزواج ؤ كدا - اها قوم انت يا قيقا يا بيض بدون ادنى حساسية دخل موضوع انو بعد العرس انو ح تسكن مع امك لانها براها و الحنك العاضي دا . يا زولة الزولة دي ولعت ليك فيني . ليه انت داير ليك خدامة لامك ؟! و انتو الرجال . . . و اوك اررو رووك العرب جوك - الحمد لله الوكت داك اللترتشا ما كثيفة . لا سيداو ، ولا بكين ، لا مؤتمر سكان - زولتي بس تقول إلهة الجندر عند الاغريق . . . كل الوكت انا بس ماسك في القوي ، بقيت شغال دعاء ربنا يخارجني من الورطة دي . اها شوية و ربك رب الخير استجاب لدعائي ، و هدأت العاصفة اخيراً . و بحنية غير متسقة مع هياج المعركة الغير مراعية للاعراف و المواثيق الدولية ، الاستخدمت فيها كل ذخيرة الدمار الشامل : انت مش عندك اخوان ؟ قلت ليها عندي لكن دخلهم شنو اسي ؟ بكل بيضنة : طيب ما واحد غيرك يسكن معاها !!!! ها يا بيض يعني النبحي دا كلو كان خوفاً على ضنبك انت دي بس !!
تحياتي و تشكراتي استاذة اماني
12-29-2009, 07:37 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: قلت إمكن الاقي أسم صاحبي يوسف عثمان الهيل زول جميل قرأ هندسة ... ما كان عندو أي شغلة بالبنات ولا بيعرف يشك القميص في البنطلون ذاتو يوم لقيتو ليك رابط نص لمن غلط الحاصل شنو يا ود الهيل ؟ قال لي والله حبيت ... دخلت لي في حبكانة طيب يا ولدنا حبكانة مع السفة دي كيف ؟ رد علي بنصف ابتسامة : عارف أنا لحدي اليوم وصلتها ليك إني كنت بسف لحدي سنة تانية . طبعا الحكاية لم تستمر لأنو صاحبي لا يملك من الجواذب شيئا غير وسامة مبشتنة . كنت عايز أعرف يوسف دا كان في ياتو حزب من أحزابك الفوق دي .
غايتو ما بعرفو لكن قطع شك ما نقض اجتماعي ، ناسنا ديل معتمدين " المدرسة التجريدية " و بسموا الحاجات بإسمها . صاحبن لينا من ناس الضهاري سموهو " علي حمودي " لما حبيبتو ناقشتو في موضوع السفة دا ، افحما بانو ما تقارن نفسها بالصعوط . طبعاً كلام زي قسم الدهب لحدي اسي ، لكن الوغد ليته سكت ، و لم يفعل بالطبع ! . . كمل و طبظا عديل : " لو ختيتيني في حتة خيار ح اختار السفة " . . عليك الله دا زول دا ؟ عشان كدا قلنا ناس الخلا ديل يعملوا ليهم جامعات براهم . لكن ابشرك من مواصفات صاحبنا يوسف دي :
Quote: طبعا الحكاية لم تستمر لأنو صاحبي لا يملك من الجواذب شيئا غير وسامة مبشتنة
اهو طلع بإحدى الحسنيين . . و عقبال الشهادة الكبيرة بشتنة لي بشتة – ان شاء الله يكون مخنفس بس - بركة البقت برا ( جواذب ) كان الارضية منهن بتعطف مع البشتنة رقاد واطة !
-------------------
لو يوسف دفعة 91 – 92 بنكون سكنا سوا في " ترهاقا " ، وديل بالضبط الزمان و المكان . لكن على العموم التجربة – و هي حقيقية بالمناسبة – بس بعد تصفيتها من جك الموية التميناهو . التجربة كل ابطالها بزانسة ، لسبب بسيط جداً و العاصرونا في ام نخيل يعلموه جيداً ا، انو اسماعيل الخليفة – دا الدين بتاعنا وقتها - كان حالف بالتغتس حجرنا يرجع مارس شهر الكوارث ! هو الوحيد الالتزم بخطة اعادة ( الكليندر ) ، و كان هو قرار مجلس السنت بعد اختلاله في احداث استشهاد طارق زهري باشا و المقاطعة و محنها .
سعيد بشوفتك كالمعتاد و كل سنة و انت كل الخير خلينا نتشاوف بالدرب يا حبيب
12-29-2009, 02:32 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
أميره الشيخ: انتو الزول ما يكشكر ليكم تقبضوهو طوالي؟
Quote: ,,اسي مافاتت حاجة النبى فيك تجى,, وبطلى الجبنة
جبنه ساكت
أميره ياحبيبه, موضوع البوست ده فهمي فيهو نفس فهمي في المحاسبه حقت ناس قيقا ورحاب خليفه :) وشاهد علي جهلي قيقراوي شخصيا و"أبو الساء" زاتها كمان,
الأحزاب دي قريتها حرف حرف لكن يا قيقا نسيت أهم حزب: مذكرات ضب سابق ... :) لأنه ده حزبي طيلة خمسه سنوات في الجامعه وحتي الان .. هسي بجهز في نفسي ومستنيه صاحب البوست يخلّص سرده عشان أمشي أنداح بهناك,
يعني ياقيقا لو درّسونا الأحزاب العاطفيه دي في الجامعه مش علي الأقل كنت حصّلت انضميت لي في حزب منهم, وما بقيت محتاجه لدروس خصوصيه, وملاحق, وشرح ودرس عصر وحاجات زي المغلبّاكم بيها دي؟
موضوع البوست جميل جد لكن صدقوني أنا اخر من يفتي في هذا الشأن, والسبب الضبضبه وسك القرايه الما عايز يفارقني :)
الموضوع عموما ما محزن لأنه الفيرست كلاس الاتخرجت بيها من أم نخيل مفرّحاني برضو :)
(عدل بواسطة Amany Elamin on 12-29-2009, 08:12 PM) (عدل بواسطة Amany Elamin on 12-29-2009, 08:15 PM)
01-03-2010, 09:41 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: الأحزاب دي قريتها حرف حرف لكن يا قيقا نسيت أهم حزب: مذكرات ضب سابق ... :) لأنه ده حزبي طيلة خمسه سنوات في الجامعه وحتي الان .. هسي بجهز في نفسي ومستنيه صاحب البوست يخلّص سرده عشان أمشي أنداح بهناك,
يعني ياقيقا لو درّسونا الأحزاب العاطفيه دي في الجامعه مش علي الأقل كنت حصّلت انضميت لي في حزب منهم
برضو ضبضبة ؟! لووووووووول واحد بلدياتكم - من جزيرة بن ضبون ؤ كدا - قالوا شدة ما اتعود على الكتب بقى لما يجي يفتح دولابو في الداخلية بلحس السبابة و الابهام اول كأنو داير يفتح ليهو كتاب ! التنظيمات العاطفية علم تجريبي ما متوفر في الكتب . و دكتوراة الفلسفة فيهو بتديها " جامعة الحياة العامة " بعد تجارب عملية في الفيلد بكل زخمها و شواكيشها و دبابيرا البلمعن في الكتوف ،و قل بعد شراب قدر جيد من موية الغسيل ، و كأي مجال الثورة التقنية جابت معاها تطوير في الشواكيش و بقى يجي منها صنف هايدروليك - و العهدة على الملك تاجو - و امكن لي قدام يجي نوع ( فل اتوماتيك ) . . مين عارف ؟
هنا نظريات مرنة تصاغ في واقع التطبيق ،حيث لا قانون عام يفيد في استنباط احكام موثوقة . و في الغالب لا تساوي الواحد الصحيح بل تقبل القسمة على اكتر من هم . . من همبيرغر الى هم المبيت . اييييييييييه دنيا !
---------------
يا شباب بمناسبة سيرة البحر مسئولين من الخير ؟ انتواغنية " سيرة الحب " دي حقت منو ؟ او بالعربي كدا يعني هي حقت ام كلثوم ؟ عندي فيها راي راقدبو في البوست دا ذاتو . . . اها ادونا النجيضة ؟
البتغنيها اسي دي : شيماء الشايب ( بت فاطمة عيد الفنانة المصرية المعروفة )
Quote: بمناسبة سيرة البحر مسئولين من الخير ؟ انتواغنية " سيرة الحب " دي حقت منو ؟ او بالعربي كدا يعني هي حقت ام كلثوم ؟ عندي فيها راي راقدبو في البوست دا ذاتو . . .
"سيرة الحب" جبتها ليك بصوت أحسن من تغنّي لأم كلثوم, الفنانه امال ماهر .. الاختيار ده علي مسئوليتي, وأنا زوله سميعه لأم كلثوم جدا, حاول تسمعها ب Head Set لو ممكن ..
واصل وبجيك راجعه ..
--- أميره الشيح يابتاعت ال Black and white والبيج مختفيه وين من البوست ده؟
01-12-2010, 00:28 AM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: الدمعة متماهين في علاقاتهم و في المحبوب لدرجة " البيضنة " - و دي من البيض - الزمن داك يقولوا ليك الزول دا بيض يعني ما عندو موضوع ، اها تلقى الدمعجي منهم بيض لما غلط - هنا غلط دي تقرأ راسية و افقية و هي صحيحة تب او " تماماً " يا قول مثقافتية الزمن داك - تماهي لدرجة الذوبان
كدي شوفوا " توم " في " Springtime for Thomas امكن يقرب صورة " الدمعة " و " جيري " بمثل " النقض " تماماً بمحافظتو على قانون اللعبة الوجودية . . بتثبيت التناقض الحيوي
----------------
شكرن يا اماني على امال ماهر و بنرجع للست و " عشرة على عشرة " ! عندنا معاها جكة . . نشوف تقفيل النمرة دا كيف ؟
Quote: سبب القصة ديل جابت رحاب في تعقيب على كلام للمرحوم اديبنا الكبير الطيب صالح في رسالة الى ايلين . . البطل و ايلين قنبوا يخشنوا رامات بعض بكتير من التفاصيل الحميمة و من ضمنها انهم كانوا بستخدموا نفس فرشة الاسنان . . . شفتي الحب دا كيف ؟ اها ادرعوني ليك رحاب خليفة و خدر حسين - قبل العرس طبعاً . . ما عارف موقفو السياسي اسي شنو من استخدام فرشة اسنان واحدة ؟! اها خلّوا " النص " و شبكوني ليك قطعتها من سفنجاتك K و شنو كدا ما عارف ؟ Gega
يا قيقا، الكلام ما مقطوع من سفنجاتك، لكن من سفنجات الخواجات ديل اظنه بتمر عليهم ظروف، بتضطرهم في نظرهم طبعا، انهم يعملو كده، و يحضرني في راسي مسلسلات و افلام كتيرة يكون البطل او البطلة قرروا فجاة يبيتو في بيت زول صاحبهم او زول لقوهو فجاه في بار، و يقومو يلقو روحهم بدون فرش اسنان و اظنه بينحرجو يقولو خلاص ما نتسوك الليله بس، و تقوم المشاركة تحصل و يعملو منها خلاص رومانسيين، و في الغالب الكلام ده بيحصل بعد الدكاكين تكون قفلت، ده اذا هم ما كانو موجودين في راس جبل ولا خلا ما جنبه شي و لا عندهم زول يرسلوهو الدكان فرشة الاسنان و بشكير الحمام هينين, الزولة دي وصلت موية الحمام: look for a song by No Doubt, called Bathwater لكن احنا في السودان سبب وااااحد يخلينا نعمل كده مافي، بيتان فجاة ماااافي، و الدكاكين داااايما فاتحه، ده اذا ناس البيت ما كان عندهم ستوك بتاع فرش اسنان زي ناس بيتنا كده، تحسبا للزوار الغير منظمين
شفت الفلسفة المقطوعه من السفنجات دي كيف؟
غايتو زمان لمن زول يشحدني انه ياكل من دومة اكون شايلاها انا، بحردها ليه، و العجب لمن يقول ليك اديني قرمة من الدندرمة دي اهلنا الالمان ديل احسن ناس في فرز العيشة دي بجيك صادة، بس الضحك ممنوع
----------------------- تفتكر خضر حا يغير راية؟ اتبرا ليك منه صحوبيتح زي الما حصل حاجه
01-12-2010, 02:48 PM
Shayma Shayma
تاريخ التسجيل: 09-09-2007
مجموع المشاركات: 501
ياجماعة فى ناس مصرة تتهرب من الموضوع دا وفى ناس تاوقت وفكت البيرق
تنظيمات قيقراوى دى كان ماعجبتكم ولا ما لقيتو روحكم فيها او ماعبرت عنكم جيبو تنظيماتكم وتعالو والعاطفة دى بحرها وااااااسع وكضاب البقول قطعو كلو اهو مرة بنتبلبل ومرة نشرق واغلب المرات بندق فى القيفة ونرجع,,
ورد في الاثر العاطفي دا ( شيزوفرانيا الغرام ) عن الملك تاجو عن تبارك المهم :
Quote: عثمان بشرى سألوهو: رايك شنو فى الحب؟
قال ليهم: الحب مُحرِج
رواه قيقاراوي و قال حديث صحيح و موصول السند
على سيرةالملك و سيرة الفصام العاطفي ركبان البوست الموسوم بـ ( 2 ) سارت ببشرى سارة لعمك الكهربجي " عبدو " و جماعتو من "طوائف الحناكين المفلسين" . . يعلن الملك و سيدي البدوي عن توفر : شيزوفرانيا العواطف (٢).. الشاكوش الهايدروليك
Quote: سلام يا ملِك،
يعني أخيراً صدرت النسخة النسائية من دليل الشاوشانك ريديمشن! مبروك؛ واسهاماً منّا في البحث والتطوير، شوف الكرتون(ة) التِحِت دي ففيها أفكار مبتكرة لشواكيش أُنزل بها سلطان وسلطان لاسيّما في صناقير "طوائف الحناكين المفلسين" بغض النظر عن عدد ما شربوه من كاسات الغرام. في قعر الكرتون(ة) حا تلقى حفنة تأقلم بركاوي قد تعين زبائنك على مسغبة شيزوفرينيا الغرام...إنجوي بَسْ بشرط: ما تغشّش غريماتنا من حشود طوائف الماقنيفيكو.
قديماً قيل" الدنيا تعلمك و الزمان يوريك و قل المال يفرقك من بنات واديك " . . تيبيكال . . نشوف Love & Money و عمايلا مع " توم " برضو ! . . الياهو ذاتو ( ربى دقنو ، و بقى ( يقربع ) في العرقي ) . . و جيري كما العهد " نقض " كأجمل ما يكون الوفاء .
01-15-2010, 01:41 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: "سيرة الحب" جبتها ليك بصوت أحسن من تغنّي لأم كلثوم, الفنانه امال ماهر .. الاختيار ده علي مسئوليتي, وأنا زوله سميعه لأم كلثوم جدا, حاول تسمعها ب Head Set لو ممكن ..
جيتيني في الوتر الاليم انا اصلاً كنت بفتش لزول بحب ام كلثوم و يكون مجنون بيها برضو . . .
سيرة الحب لام كلثوم ، او ام كلثوم في رقبتا دي مقروءة مع البوست دا بزنس جامعة الخرطوم (بوست بنكهة الليمون) و بتخشن ذاكرة ( حب ) و تجيب ( سيرة ) مدهشة حفرت عميقاً في ذاكرة تخصها تماماً . . في سيرة الايام ديك ، كان معانا من اولاد بركات الراقين اخونا احمد السر ، و دا مجنون ام كلثوم . غايتو ديمقراطية ساي نقول نطلق عليهو صفة " راقي " دي ! . . كان في استقطاب تقيل جداً بسبب " الست " . . و المواقف متباينة جداً ، في ناس زي " اب راس " ، و هو على علاته شجاع و بصرح بآرائه المشاترة . لكن الغالبية شغالين بفقه التقيه الاجتماعية خوف الاستعراب ؤ كدا ، و بقطّعوا في حنانم بس . . . في اللُباد يا معلم . . . صديقي الكهربائي – الله يرحمو - تعب لحدي ما يفهمني معنى " اللُباد " و شرح دور الكتاوت في امتصاص الكهرباء الزائدة . . ما علينا المهم ليبرالية مننا ساي محترمين ليهو عشقه المجنون لام كلثوم و العجب لما يظبت ليك الغرفة 8 الطابق التاني بداخلية ترهاقا - احمد السر ( اقتصاد ) و حبيب ذاك الدارفوري الجميل ( اقتصاد ) و حبوكل ( قانون ) اصلاً منحّلين معانا ساي نحن اولاد ( بزنس ) اذ قضى امر صندوق دعم الطلاب المتنزل عن ثورة التعليم العالي بدايات التسعينات ان تتوزعنا المضاجع ، وفق سياسة فرق جمعهم و فارق بينهم في المضاجع ذاتو ! تاسيساً على سياسة عامة لتحطيم الصنم الجاثم على صدر " الثورة " كما ينعق بوم الانقلاب المفتري على الثورة . . . لكن وين ؟! . . بنادق وين بتحمينا العديل و الزين ؟! . . إصرارنا على تقاسم الاسى و حلمنا ببكرة اجمل من ظروفنا كان كابرنا . . . المهم عاوز ارصد ثلاث مواقف / ردود فعل من/على عشق ام كلثوم و نموذج الحب ( الراقي ) عند احمد السر . . و بعدين نشوف قصة " حبوكل "
--------------
شكراً يا اماني على الهدية لكن يا ريتني لو سمعت كلامك !! شغلت ( امال ماهر ) بالسماعات الخارجية فادي جاء سألني : بابا دي موسيقى بتاعة ( مرضان ) قاصد رمضان حمدت الله انو امو ما كانت في . . . اسكت يا ود ما ( تفضحنا ) ياخ . . دي ( الست ) يا جاهل !!
السيح الديح امبو . . الواد طالع لابوه الشئ دا يكون وراثي ؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
قيقراوي
جعفر محي الدين
عبد الدائم سيد أحمد
مها عبد الله
مازن الجمّال
حبيب نورة
منوت
سيف بخيت موسي
الطيب رحمه قريمان
بابكر عثمان مكي
الجندرية
Rihab Khalifa
Shayma
فيس بوك
تويتر
انستقرام
يوتيوب
بنتيريست