حدثني صديقي اليمني الجنسية .. أن صاحب مهنة (الحلاقــة) .. أو المزيناتي أو (الحـــلاق) ينال حظه من الزواج على مضض في فقه بعض القبائل اليمنية .. قبلت الفكرة على مضض أمض من سابقه .. ولم اتأكد من صحتها أو عدمها .. لكن كلما (يقودني راسي) .. إلى حيث قبيلة الحلاقين من اليمانية .. اتحسسه مرات (رأسي) .. واتسال: ياربي الحلاق دا بيكون متزوج (عرفي) واللا متزوج ليهو (كوفيره) تشاركه نفس المهنة ( فيميليا) ؟؟ هذا لو افترضنا في ذلك زمالة المهنة .. والعادات والتقاليد المتبعة قبلياً كما يحدث في الكثير من القبايل في الكثير من بلاد العالم.. واللا كمان (مناسب) ليهو (مقص) ..؟ .. ما أكتبه عن (الجزمجية) أرجو إلا يتقاطع مع (حـــلاقي) .. (المعارضة) .. فلكل هوايته.. في أنواع وموديلات الجزم والبلد المصنع.. وخامة الجلد المستخدم ..
01-26-2010, 12:59 PM
طلال جبير جابر طلال جبير جابر
تاريخ التسجيل: 01-14-2009
مجموع المشاركات: 685
Quote: ما أكتبه عن (الجزمجية) أرجو إلا يتقاطع مع (حـــلاقي) .. (المعارضة) .. فلكل هوايته.. في أنواع وموديلات الجزم والبلد المصنع.. وخامة الجلد المستخدم ..
يتقاطع شنو ياعمك والله جماعتك هسي بجوك متلبين والله (نقلتي ) واحد ما يخلوه ....
...............................................
تمبس ازيك يا اخ مشتاقون والله
01-26-2010, 01:19 PM
محمد أبوجودة محمد أبوجودة
تاريخ التسجيل: 08-10-2004
مجموع المشاركات: 5265
أبوجــودة .. العزيز سلامات ياخ .. ليك وحشة والله .. كنت مهتم شديد اني اقابلك .. وكل لحظة كنت متوقع اشوفك في مكان ما في الخرطوم الفسيحـة .. سالت عنك عند بعض الحقانيين .. لكن ماف زول عرف ليك درب .. ياخ انا قعدت قريب شهرين .. وإنت لا حس .. لا خبــر .. يعني نخليها الجية الجايــة ..؟ الله يبارك فيك ياخ .. لو كنت معاي يومه كان شكلها بيكون مختلف ..
Quote: خُد المايك يا مان .. وادخل على لخبطة المعارضات التي برعتَ فيها ..
هي ملخبطة من يومه يا محمد .. احتمال اللخبطة الفوق للعادة تقوم ترتب الملخبط .. دا بس .. لو كان الملخبط عايز يبطل لخبطـة .. ويترتب
01-26-2010, 01:21 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: يتقاطع شنو ياعمك والله جماعتك هسي بجوك متلبين والله (نقلتي ) واحد ما يخلوه ....
.. العزيز طلال جبير .. كيف أخبارك ؟؟ أرجو منهم مراعاة .. المقاسات المناسبة .. ونشجع الصناعة الوطنية من المتلبين .. هذا مع الافضلية للحلاقين .. لانو الحلاق عندنا عادي جدا .. ممكن صالونو يكون خمسة نجوم .. ويعرس من طرف
01-26-2010, 01:36 PM
محمد فرح محمد فرح
تاريخ التسجيل: 09-14-2006
مجموع المشاركات: 9222
يعني قدر الألفوهو ، وقدر اليوتيوب والفوتوشوب وصور اوكامبو يعني دي جاتهم في صمة خشمهم
تاني مش لو عصام دهب حلف ليهم تاني لو قال ليهم عادل محجوب دا أنا زاتي ، والبشير صاحبي وداير اهظر معاهو وانتو مالكم ومالنا..
تاني ما بفكوها!
وحاة الله مرزقين عدييل
(ياخي انت مش قاسم معانا ميزانيتنا المرصودة؟ وبقو يجيبوك في قناتنا قناة الشروق والهنا ، عشان كدا وغيرها من الاسباب صلح بوستاتك دي شوية ياخ ، شنو شابكنا الجزمجية والحلاقين)!
مؤنة عام من الود وتعيش الجزمجة
01-26-2010, 01:41 PM
saif massad ali saif massad ali
تاريخ التسجيل: 08-10-2004
مجموع المشاركات: 19127
يدِّيك العافية يا تمبس .. فيك الخير والله .. ووالله لم أعرف بوجودك إلا من خلال بروزك full suit ضيف مالوي هدومو altogether وكذلك فكرتو عن " منتديات الحوار السودانية" وبالأخص سودانيزأون لاين ، في ضيافة قناة الشروق مع الأستاذة سمية سيد .. شــاهدت ذاك اللقاء وأنا والله بعيد عن الخراتيم بمالايقل عن مئة ميل ..! إذن فالدرب الخرتومي اصلو كان رايح رايح حتى على حقــّانيييني وكدا !! لذلك، وقبلما أملخ ايدك من حلاقات التعارض التي تهابشت لها بعض الرؤوس! فلتسمح لي بتقديمك هذه الهدية ، مع رجائي ألاّ تخدش مثل هذا الهدية " سياق " البوست ! حتى لا أقول حياؤه.. وإن حدث ، مابيغلبك حذفها، أوسأجعل حذفها بواسطتي رهن اشارتك ..
01-26-2010, 02:26 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: في ضيافة قناة الشروق مع الأستاذة سمية سيد .. شــاهدت ذاك اللقاء وأنا والله بعيد عن الخراتيم بمالايقل عن مئة ميل ..! إذن فالدرب الخرتومي اصلو كان رايح رايح حتى على حقــّانيييني وكدا !! لذلك، وقبلما أملخ ايدك من حلاقات التعارض التي تهابشت لها بعض الرؤوس! فلتسمح لي بتقديمك هذه الهدية ، مع رجائي ألاّ تخدش مثل هذا الهدية " سياق " البوست !
.. كامل الذوق والأدب يا ابوجودة كما عهدتك .. حلقة الشروق كانت تجربة مخيفة على الهواء مباشرة .. مثلت فيها عضوية الموقع .. وما انا أكثرهم دراية ومعرفة .. لكن الظرف خلق نفسو .. والحمد لله ربنا سترنا مع سلمى سيد ومع القنـاة .. تشكر على الملف الموسيقي لي فهيمة .. وبي كدا يا ابوجودة .. تكون زي الحضرت معانا الحفلة واحد شكرا يا محمد يا صديقي يا حقاني ..
01-26-2010, 01:58 PM
tmbis tmbis
تاريخ التسجيل: 10-19-2002
مجموع المشاركات: 24862
جريدة الدار: التي تعتمد في توزيعها على عنصر الحكاوى والخرافات العجيبة .. كادت أن تفسد على ايام الإجازة بعد فترة غياب امتدت لسبعة سنوات .. احزنني أطفال أخواني وأخواتي .. وهم يتجارون في البيت نهاراً جهاراً متنقلين من غرفة إلى سرير وعيونهم ممطوطـة حد الرعــب حتى أنهم اصبحوا يقضون حوائجهم في اسرتهم عندما يحل ظلام المغربية .. خوفامن تلك الكائنات التي ربما تغير من زمن زيارتها إلى الفترات النهارية .. مخترقة الصفحات الأولى من صحيفة الدار مكشرة عن انيابهـا تسيل من لعابهـا الدماء .. (مرافي) .. بنت أختى التي لم تتجاوز الصف الثالث من مرحلة الاساس .. حاولت أن احملها بلطف من سريري الذي اعتدت طيلة فترة الاجازة على النوم فيه هربـاً من الباعووضة .. وقربا من انفاس والدتي التي تعطر المكان ليلا .. (مرافي) في محاولة حملها للنزوح الافتراضي .. اشهرت لي في (فراسة) (عصا نحيله) لا تصلح لهش باعووضة .. ناهيك عن قتل حيوان اليف من حيوانات (الدار).. كالعادة .. (كيكي) إبن أخي الصغير جدا .. ضارب بكل القواعد المنزلية عرض الحائط .. لا تهمه (الدار) ولا سيدة تشهر (ذيلها) لصاحب الركشـة .. كل ما يهمه .. أن يتوفر له قوت الصباح من حلويات .. ورحلة البحث عن الفيشار صباحا مع صديقه الودود .. العم عمر منصور .. ورمي ما تبقى من مخلفات في (الكاربيش) تلك الكلمة الانقليزية الوحيدة التي التقطهـا من مفردات العم في رحلة تعويده على (الفعل الصاح) منذ الصغر .. على العموم .. أتوقع من (الدار) خلال هذا الأسبوع .. أن تنشر ما مفاده أن الحذاء المستعمل في حادثة الرئيس .. صنع من جلد احدى حيواناتها الخرافية التي روعوا بها عقول الصغار .. ومازالوا يراهنون على انتشار الخرافة على اكبر مساحة ممكنة .. أرجو في حال توفر بعض هذه الموديلات .. حجز مقاس تلاتة وأربعين .. وأن يكون (كشـف) .
01-27-2010, 07:52 AM
tmbis tmbis
تاريخ التسجيل: 10-19-2002
مجموع المشاركات: 24862
مساكين .. علماء الفيزياء .. والرياضيات .. والمنظراتية الكبار والفلاسفة: ناس .. اسحق نيوتون .. وجون دالتون .. وفيثاغورس .. (واسكوب وعوض ود النقادية والشيخ وروار) جميعهم بلا استنثاء .. اجتهدوا فيما يخص علم (الراس) .. كان مبلغ همهم .. تعديل كيمياء الراس .. يعني بي اختصار ما خلو لينا حاجة كدا حايمه في الراس ساااي .. كل حاجة عندهم بي نظام .. بتاعين الرياضيات والفيزياء والكيمياء ديل .. ختو حاجاتم وسجلوها بي اساميهم .. تلقى ليك مسالة حسابية قدر الضربة .. محتاجة لي (شوال) (روسين) وجردل بتاع قهوة وصفيحة شاي سادة .. عشان تكتبه ناهيك من انك تحلها .. فجأة تستعين بي معادلة اي واحد فيهم المسجلة ومعروفة ومتبعة .. تدخله في النص تطلع ليك شوالاتك دي كلها (بيش) .. وتحل المشكلة . هكذا بي كل بساطة .. خلقوا علاقة حميمة جدا مع الانسانية .. اصبحوا حلالين مشكلات وأهل فزعـة .. وأهل ثقة وجب احترامهم وتقديرهم .. مجمل هؤلاء العلماء راسم واحد زي راسنا دا .. ناس زينا كدا .. ربما لو عاشوا في زماننا الحالي والواحد كان عندوا باص وورد هنا دا معانا .. كان عادي جدا ممكن جون دالتون يجيب ليهو معادلة .. يجيهو ناطي مصطفى محمود يشبكو ليك ميزانيات مرصودة لي ناس الأمن .. ثم يخت ليهو صورة البقرة بتاعت الانتخابات.. أو ينط استيف دا شنو يا جلابي أو دينق يشبكو ليك يا مستلب يا يجيهو معتصم محمد صالح يقول ليهو وين الصور .. ويشبكو ليك محمد فرح مؤنة عام من الود وجون دالتون المسكين في تهذيبو وخدمتو للبشرية يشبكم ليك .. (شكرا لمروركم الجميل ) ما كمان زول محترم ومهذب ومالي هدوموا وبتاع نظريات .. بعد اسبوعين جون دالتون الفي راسو تطير يمشي يفتح ليهو بقالة. لكن المدهش في الأمر .. رغم كل النظريات وتبسيط الأمور ما ذال اصحاب الحافلات في ميدان جاكسون الواحد يجي داخل قدامك تووش .. ويطلع ليك يدو بي طريقة عجيبة .. ما معروف شكرا واللا اكل نارك واللا حاجة تانية في نفس يعقوب .. الناس الماشين بي رجلينم في ميدان جاكسون برضو .. تلقى الواحد (ماسك اضانو) وبضحك مرات يقعد في الواطة من الضحك وتووشك برضو يقطع قدامك بي شكل عجيب جدا .. يجيك واحد طالع ليك من الصينية لحدت ما إنت ذاتك تنط من جوه العربية .. الانوار مولعة لونه أحمر والعربات ماشة .. والناس ماشين .. والبوليص ماشي .. بالليل الناس كلها جاره انوار طويلة .. ومعارضين البورد ما جايبين للدنيا خبر .. همهم الأولاني إنو الجماعة القاطعين الصينية ديل يعملوا مظاهرات ويقلبو ليهم الحكومة .. بالميت كدا ، عشمانين في ( فردة جزمـة) مريض شفاه الله .. تقلب ليهم الحكومة .. بعدما (ملصو البنطلون).. غريبة جدا .. بنطلون قبل فترة عاملين بيهو ضجـة .. (ست النطلون) عملت منو كتاب واستلمت البنكنوت وكسرت في اضانة قشة.. فردة جزمـة ما معروفة شمال واللا يمين .. علماء البورد فاتحين ليها مية وخمسين بوست .. وعايزين يثبتو بي نظرية فيثاغورس ودالتون .. وافلاطون وارسطو وعوض ود النقادية .. إنو الزول دا والله بطل يتمتع بكامل قواه العقلية والجسدية ولو كره الكيزان .. ماشين كويس .. بداية بي بنطلون .. ثم جزمة .. بكرة احتمال كبير تطلع كارينات وتونيكات .. وبناطلين جينز وطواقي ..
ياخ دي معارضة واللا سعد قشـرة ..؟
01-27-2010, 01:43 PM
tmbis tmbis
تاريخ التسجيل: 10-19-2002
مجموع المشاركات: 24862
حليــوة: تسمية الشوارع بي اسماء الزعماء والرؤساء لها مبرراتها .. شارع الزعيم الازهري .. شارع المك نمر .. شارع بيويو كوانق شارع التجاني الماحي .. شارع المهاتما غاندي .. إلخ حتى احيانا التسمية الرمزية مفيده لتخليد شئ ما أو ذكرى حدث ما او تمجيد مكان ما .. شارع الدومة .. شارع الدكاترة .. شارع المطار .. اللافتــه المكتوبة على جانب المركز الالماني .. تحمل اسم شارع التجاني الماحي على ما اعتقد واتذكر .. وجهة نظر شخصية .. أرجو تعديلها إلى اسم (شارع حليـوة) ليس تقليلا لذكرى دكتور التجاني أو بدعه استحداث الشوارع كتلك الشوارع التي اصبحت تودي وما تجيب .. اتجاه واحد .. إنما تمجيدا للسيدة حليوة .. قبلة المثقفاتية والمستنيرين والناس الساي .. عند حليوة تحاك احاديث السياسة ومنتديات النقاش وفك الدبرسة كل هذا تحت رحمة الشاي باللبن باللقيمات والقهوة الخطيرة جدا تحت ظلال بخور التيمان .. لقاءات غير مسبقة تتم هناك اصحاب بكامل الوداعة يعرضون ما تبقى لهم من نفسيات وازمات ويتشاركونها مع بعض سياسية اجتماعية .. عادية .. حال كونك تتخلص من ادمان المكان تحتاج إلى مدة زمنية طويلة خاصة لو كنت تمارس هوايةأن تتخلى عن (حذاءك) وتمارس رياضة مشي الحفاء في ارضية المكان التي سبق رشها لتاتيك بالطراوة ، طراوة عصريات السودان .. عادي جدا أن تتجرد من حذاءك هناك دون أن يتغول عليه أحدهم ويهاجم به شخص ما .. هناك كل زول في حالو بوردابي ، صحفي ، ناشط ، ما ناشط ، زول ساي .. يا زولة ساي أو حتى عربية تخلص منها صاحبها واحتلت مكانها عند حليوة .. حليوة بروحها الطيبة خلقت توليفه جميلة من الاصدقاء يسهل التعامل معهم .. برغم اختلاف الوانهم السياسية ورغم اختلاف مهنهم .. ورغم اختلاف توجهاتهم.. الوالدة الله يديها طول العمر .. سامعه بي حليوة وطاقش اضانة الاسم .. من كثرة التداول في البيت .. الحاجة مشت الجيران في رحلة الحوامة العادية بي (توب الجارات) سرحت في الونسة .. تأخرت .. سالته اختي الصغيرة : كنتي وين يمــة ..؟ قالت ليها كنت في حليوة .. يا القاعدين بتسمو الشوارع .. بي مزاجكم .. أدونـا معاكم فرصة وسموهو شارع حليوة .. عليكم الله كتير عليها؟؟
يا سلام يا عـاصم .. اقدر اقول إنو فاتتك أيام عجيبة خلاص .. عمر منصور .. ولمة البيت .. ودويتو ترامبيت وكمنجـه ليهو عشرين سنة ما سمعناهو .. وببو والاخوان الحلوين وقعده خطيرة جدا بالليل خالص في البيت .. ومداح الشيخ فتح الرحمن وحولية كاربة واحوال عجيبة.. جبنا سيرتك مليون مرة .. واراهنك تكون عضيت لسانك ملايين المرات .. ليك وحشة ياخ .. الله يبارك فيك .. دخلناك بالبركة والنية .. نحن اولاد شيوخ نزح منك نمشي وين ؟؟ أخوي الزمان ولي حسع ولي بكرة .. كان عجبك إنت قايل علي كيفك ؟؟ البتاع تلقاهو بي هناك .. بالمناسبة: أنا طالبك حفلة .. تنزل لي اي حاجة هنا من القديم .. ترسل لي في البريد في الماسينجر في راس البيت في اي حتة المهم تتصرف .. طالبك .. طالبك
01-27-2010, 02:28 PM
abuguta abuguta
تاريخ التسجيل: 04-20-2003
مجموع المشاركات: 8276
شكرن شكرن يا طمبس (علي النقلة النوعية دي ) وتداعي الاجازات الحصيف دا , ياخ من اخر اجازة لي دكين سنة الفين واربعة تاني ما قريت تداعي اجازة نضيف الا في( بوسطك ) دا , بالله ما دام انت مشيت السودان (متحفذ لقتال ومتحيز لفئة) تمدنا بكل مما شأنه ان ينقلنا الي تلك التكة البسيطة بين المعقب وعمل الخروج والعودة والمطارات وتذاكر سفرها . منتظر من ورا البوست دا الكتير , ما تخزلني كعادتك بالله , اصدق معاي مرة واحدة صدق غازي مع شباطته
01-27-2010, 09:09 PM
خالد خليل محمد بحر خالد خليل محمد بحر
تاريخ التسجيل: 07-19-2006
مجموع المشاركات: 4337
.. طلال الجيلاني ؟؟ وينك يا لذيذ ..؟ الاخبار كيف ؟؟ تداعيات الاجازة دي يا طلال ما بتخلص بي اخوي وأخوك .. لانو بي اختصار كدا .. اي خطوة بي هناك بتفتح ليك مجال تداعيات شديدة .. قبلما تدخل السستم بتكون في تداعيات وبعدما تدخل السستم برضو في تداعيات دخول السستم والخروج منو .. دي طبعا ليها علاقة بي المراحل المختلفة البتحتاجه لي إن تكون ناقش الحاجة الحوالينك .. والحاصل شنو .. ؟ كنت متوقعك تكمل معاي باقي الاجازة .. التداعيات كان بيكون شكلها تاني .. بنتلاقى .. اتوقعني..
01-30-2010, 07:28 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: تــامبا يامان شنو أنت البلد دى ماعندها سيد ولا شنو بتمشى سااااااكت كده من غير ماتقول سلاااااام جاااكم المهم يامان,,, بجيك صادى.....
.. جلخس .. سلامات يامان .. قافل لينا جوالك طوالي .. عامل فيها مهم يعني ..؟ اتصلت عليك مية مرة .. ومشيت للبكانات البتكون (متضهب) فيها .. من ناحية سيد دي .. والله يا جلخس بحركاتك .. انا كان قعدته يومين تاني كان اترشحته .. أموت وأعرف إنت قاعد تمشي وين بعيدا عن المواقع الاستراتيجية .. ومناطق صنع القرارات اتحداك تعال
01-30-2010, 07:55 AM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11838
صديقنا العزيز محمد عابدين عبد الشكور خريج الأقتصاد و الموظف بالهيئة ربنا يديهو العافية حيث يرقد مريضا منذ مدة طويلة في دنقلا, صاحب قفشات و ظرافة و لا تخلو أي جملة ينطقها من كلمة " جزمة" وكان يطلق على أي منا " جزمة" و عندما يحب تعلية شأنك يسميك "ابو الجزم" . من مؤلفاته مجاراة الأغاني المعروفة بادخال لفظ "الجزمة" احداها: جزمة انت كالسفنجة كالبرطوش كالكبك كالحذاء القديم كالكموش.... الجديد كالجزمة السوداء كا الشبط كالحزام العريض
بلطي عوضيـة .. ولا فكتوريــا أموواج .. طلمبة ليستر .. طبل خافت مكتوم الصوت .. وجنازير دبابـة .. هارموني كانت تتناقله نسائم أمدرمان الفاترة ليلا .. عندما كان يطوق مدينة الموردة ، كنت (أول أفشل) مخلوقات الليل (القنوعة) جدا بدوام حال الفعل النهاري الذي يبدأ بالحوامة وينتهي بالحوامة .. استرجاع الفعل النهاري ليلا على وسـادة خالية وكريات دم كسيحة بفعل الملاريـا، أمر لا يدعو إلى النوم قبل إنتهاء كافة مراسم الأصوات في جوقتها المختلفة .. الطبل الصغير الذي تعاقبه قطعة الجلد الميتانة بحضور الدراويش والحيران في زاوية (مرفعين الفقرا) بقلب العباسية.. ياتيك صوته خافتا مكتوماً.. يصطدم بصوت ماكينة الليستر الخارج من يدين التربال في (طقطقات متقطعة) بالقيفه الشرقية قصاد سوق السمك بالضبط عند الواحدة صباحا موعد سقاية حيضان البرسيم الخارجة من توتي عند حديقة الموردة .. وكان قبلها (الصوت) عبر شارع الظلط مواجها شواية (ترنتي) واصطدم على بعد خطوات بحيطة الحجـر قصاد حديقة الجندول .. (طقطقات) الليستر المتبقية (تحتحت) صفق شجرة النيم الفاصلة بين شارع غازي ( بتاع الأحذية) ومحل عوضية بتاع السمك .. يسبق صوت تــوتي صوت العباسية المشتت في شارع الفيل وفريق تامـا وخور أبوعنجة وسوق الموردة .. صوت توتي يختلط مع صوت جنازير الدبابة المدرعة (تي 55 ) التي تجعر في تمام الواحدة وبضع دقايق صباحاعند مدخل كبري أمدرمان هذا قبل احتلال طائرات الأمم المتحدة وشاحنات اليونميد منفستو الليل .. يتحد صوت الليستر مع صوت الطبل بجنازير المدرعة ويفرغوا كامل الحمولة الصوتية داخل اذني الوسطى ويبحثوا مجتمعين عن حركة الريح ليعودوا من جديد باسباب أكثر موضوعية ومبررات كافية للحوامة ليلا .. الحدود المنطقية وقتها كانت لا تتجاوز عندنا .. شوايات الموردة .. وجلسات الشيشة المتعمدة .. وكان أمتداد الشوايات من شواية محاسن شمالا .. وحتى شواية إدريس ترنتي جنوبا في كامل التخصصية للافعال المتعلقة بالسمك .. (الصير) والبلطي .. والقراقير .. كنا نميز نوعية السمك ومدة تخزينه وبلد المنشأ من خلال رائحته على الصاج وهو يغلي في الزيت .. وكعرف متداول بشكل جاد .. لا نتناول إلا ما نصطاده خلال اليوم في رحلات صيدنا التي نكسر بها رتابة الوقت تحت مسجد النيلين أو نزولا بعلب كبري النيل الأبيض .. أو السباحة لتوتي .. هذا كله لاختيار نوعية الاسماك المناسبة للعشاء مساءاً .. بالرغم من الكم الهائل من الكافتيريات والمطاعم المنظمة بشكل فندقي اقرب إلى الاحترافية من حيث النظافة ومستوى الخدمة المقدمة واختيار المكان المناسب والديكورات واللبس الموحد للعمال الذين تم استجلاب معظمهم كعمالة اجنبية .. والاكياس المطبوعة .. والفواتير المروسة .. وادوات السفرة المساعدة على برستيج المكان.. بالرغم من أطباق المقبلات الشهية والسلطات الملونـة .. والخبز الفاخـر، وشكل شرائح السمك البلطي في تسريحته العجيبة التي تشبه تسريحة الملكة فكتوريـا وتوضيبه ليتناسب مع الخيارات المتاحة في التعامل معه بالشوكـة والسكين مع لبس الفوطـة البيضاء .. والحديث بصوت خافت .. ورسم ابتسامة تتماشى والصالة الزجاجية التي تطل على منفذ الخرطوم الدولي بالرغم من كل ذلك .. لم أمنع نفسي من ممارسة هوايتي المفضلة جدا في اكل السمك بالطريقة التشريحية المعتمدة حسب الكاتلوج المتبع في اكل البلطي وارد النيل الأبيض .. المقلي على الطريقة الموردابية المتعارف عليها .. ببهاراته الثلاثية .. ( الملح والشمار والكسبرة) مع قليل من الدقيق الذي يضيف لون ونكهة عجيبة .. لا تقدر تقاومها خاصة لو كنت من الكائنات التي تجيد اكل السمك من مفصل الزعنف الضنبي .. إلى الخياشيم. عوضية للاسماك .. محل استطاع أن يجذب عددية كبيرة جدا من الزوار بالرغم من التقليدية في المكان والبساطة في الخدمة .. عوضية شابة ذكيـة جدا استطاعت ان تستغل قرب المكان ومجاورته لسوق السمك مقابلة حديقة الجندول بالقرب من بيت الحجر .. ودكان غازي للاحذية .. قرب منطقة الانتاج من منطقة الاستهلاك ساهم في المحافظة على جــودة الاسماك التي يقدمها المحل بشكل شهي .. مع مراعـاة مهنية الطهـاة وخبرتهم الجيدة في البقاء على الطعم والنكهة الاصلية بدون استخدام اي خــدع فندقية بديلة للنكهة والشكل العام .. تلبية لعزومـة العزيز ( معتصم نيستـا) .. ساهمنـا في ضياع مخزون الثروة السمكية يومها في عوضية للاسماك .. شوربة القراقير .. كانت بمثابة المقبلات .. (والفرشة) التي تستخدم قبل تناول البلطي الملتهب من الصاج .. بالرغم من هندسة (خليل) إلا إنه فشل في التهام .. (طلبين) سمك بس .. مكونات من أربعة قطع شهية من البلطي .. ( العوض المسلمي ) اتضح أنه يجيد فقط التعامل مع الشية .. ( وهبــة ) .. ربما في الاجازة القادمة يرتقي لمستوى المنافسة الشريفة بعد تعلم بعض فنيات اكل البلطي .. مع المساندة بالقليل من الشوربة .. كعوامل مساعدة .. داليـا كباشي ومنـال .. ( محاولاتكم فاشلة في التعامل مع الكائنات البحرية.. ما هكذا تؤكل الاسماك )
وهبة يستدرج خليل .. المسلمي يراغــب خليل المستدرج
01-30-2010, 02:18 PM
عبدالوهاب علي الحاج عبدالوهاب علي الحاج
تاريخ التسجيل: 07-03-2008
مجموع المشاركات: 10548
Quote: يازول خالك بعد الكورة ديك لا ايرلو اكل لا شراب وهبة زول فايدة
عايز النجيضة يا عموو ؟؟ ارخيني من (الكويرية) الصغيرة بتاعت عوضية دي .. عوضية اضرب عندها باربكيو بس كزول خبرة في البحريات دي الشوربة بتاعتم دي انساك منها إنتو طلعتو بتاعين اعلام ساااي يا كمان تروسكم دي بتشتقل هايدروليك تضرب عند عوضية البلطي لكن السوائل تقوم تمشي بيتزا ايطالي الفي المهندسين .. بتفتح في سلاح المزيكا من الجهة الغربية (طبعا ما تمشي تعضي هناك .. إنت زول فايده العجين دا ما بينفع معاك عايز ليك حاجة (بتتمصه) بي ضهر بيتزا ايطالي دي .. في محل بتاع كوارع .. الميزة الفوقو بيشتغل بالعصرية .. كان مشيت المغربية حقك راح .. يللا اتحداك كان قدرت تكمل الكورة بتاعتم .. اضرب الشوربة دي يا وهبة اريته تعمل ليك سنكيت
02-17-2010, 07:41 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: تمدنا بكل مما شأنه ان ينقلنا الي تلك التكة البسيطة بين المعقب وعمل الخروج والعودة والمطارات وتذاكر سفرها .
.. أمدكم ..؟ إنت ما ناوي ترجع واللا شنـو؟؟
Quote: ما تخزلني كعادتك بالله , اصدق معاي مرة واحدة صدق غازي مع شباطته
.. لو كان قدمت أي طلبات وأنا بي هناك .. صدقني كان جيت شوية علي نفسي .. واتعاملت معاك زي كأنو بيناتنا معرفة قديمة .. وكان على الاقل جبت ليك شبط من غازي .. يا جبنة مضفرة .. يا شاي الزرافتين .. الايامات دي في نوعية كويسة من محصول اللالوب مالية السوق .. لو عندك زول جاي .. خليهو يجيب ليك لالوب .. قالو البرالمة بقو يقولو ليك الاسد العجوز .. صحى ..؟ أنا لو عارف كدا كان قعدته بي هناك قبلي .. اخير لي اقعد بي هناك مما يطقش اضاني اللقب دا ..
01-30-2010, 07:55 PM
ismeil abbas ismeil abbas
تاريخ التسجيل: 02-17-2007
مجموع المشاركات: 10789
جابنى للبوست ده رائحة ألأورنيش..عوضآ عن السمك الذى تحدثت عنه..وعن عوضية سمك..
عوضية سمك..وشعيب..
محمد أحمد عبدالوهاب عباس..ود عمى..زول شهم زيك..بحب اللمة والفنجهة..كل يوم سبت عندهم برنامج هز وزملائه سمك بس...لاقانى فاطر وعادة ام احمد ما بتخلينى امرق من البيت غى واكون ماكل لى حاجة..قلت ليها عوقتينى الليلة..مسك وحلف على إلا أمشى افطر معاهم سمك..
والله الناس ديل لما خطو السمك فى الصينية..انا خفت على الثروة السمكية فى بلادى..وخفت عليهم من الطخمة..
وحات خوتك ياتمبس...الناس ديل بعد شوية..خلة ليك السمك ده زى صورة ألأشعة ما شاء الله....وضربوك الببسى.زى الما حصل حاجة..وانا نفس مافى.
Quote: مرفعين الفقرا) بقلب العباسية.. ياتيك صوته خافتا مكتوماً.. يصطدم بصوت ماكينة الليستر الخارج من يدين التربال في (طقطقات متقطعة) بالقيفه الشرقية قصاد سوق السمك بالضبط عند الواحدة صباحا موعد سقاية حيضان البرسيم الخارجة من توتي عند حديقة الموردة .. وكان قبلها (الصوت) عبر شارع الظلط مواجها شواية (ترنتي) واصطدم على بعد خطوات بحيطة الحجـر قصاد حديقة الجندول .. (طقطقات) الليستر المتبقية (تحتحت) صفق شجرة النيم الفاصلة بين شارع غازي ( بتاع الأحذية) ومحل عوضية بتاع السمك .. يسبق صوت تــوتي صوت العباسية المشتت في شارع الفيل وفريق تامـا وخور أبوعنجة وسوق الموردة
سلامات ياخي ألف مبروك الزواج والهيصة، ولمة الأهل والصحاب .. دعواتنا بالتوفيق والأمان. بمناسبة اللمة والله نفسي في فطور عريس كاااارب ولا تنسونا من الفطير .. الله الله
أنت الزول الجالس في الصورة رقم تلاته ده منو؟ أوعا يطلع السيد العريس شخشيا؟
يازول دربك أخضر إن شاء الله
سيف اليزل
.
02-18-2010, 09:51 AM
عمر صديق عمر صديق
تاريخ التسجيل: 06-06-2008
مجموع المشاركات: 14776
عكس ما تتوقع الكثيرين ومنهم عمو وهبة ان تامبا بعد هذه الاجازة السعيدة قد انتهي نهاية بطل وتوقعنا ان البسوي والمايسوي ممكن عادي يرش تمبس واصبحنا رابطة من المتضامنين معك مشفقين علي مآلاتك الجديدة بسبب ضعف متوقع لمقالاتك القديمة الحارقة والتي كنا نخشي عليك من تطويرها الي منظومة كلام الدمار الشامل ولكن بعد هذا البوست الابداعي وما ظهر فيه من سبك للكلام يفوق في لذته حليب المراعي والبطانة ولحوم قندهار واسماك عوضية ودجاج امواج ولقيمات حليوة وكوارع مين كدا يا ود الصايم
تذكرنا ان لتامبا رب يحميه وانه قد امده بمدد جديد من المعاني والتصوير الفني في القصة والاغاني ولن يهزم في هذه المعارك الاسفيرية ابدا وان هنالك كميات من الشحنات الابداعية طرأت عليه ونخشي له من النبوغ المبكر في مجالات الفتون والاداب وهذه النقلة النوعيةفي الكتابات تجعلنا نسعي في تكوين رابطة معجبي الاديب الاريب والفنان العالمي علاء الدين منصور او تمبس سابقا فترقبوها
02-18-2010, 10:11 AM
معتز القريش معتز القريش
تاريخ التسجيل: 07-07-2006
مجموع المشاركات: 11343
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
tmbis
طلال جبير جابر
محمد أبوجودة
محمد فرح
saif massad ali
abuguta
محمد عمر جبريل
اساسي
خالد خليل محمد بحر
طلال الطيب الجيلاني
MOHAMMED ELSHEIKH
عبدالوهاب علي الحاج
ismeil abbas
ناذر محمد الخليفة
Yousif A Abusinina
عمر صديق
HAIDER ALZAIN
فيس بوك
تويتر
انستقرام
يوتيوب
بنتيريست