|
Re: الف مبروك .......عزة بتى وعلى طاهر الخطوبة (Re: HOPEFUL)
|
HOPEFUL اسمك جميل دايما مليان امل يا جمال عبد الرحمن طبعا عاينت للبروفايل بتاعك لقيت اسمك جمال عبد الرحمن اسفة للتلصص دفعتى جمال عبد الرحمن برضو الفنان الممثل نفس الاسم وزول دمه زى العسل وبقى عنده شعبية بعد الحاج متذكر اللهم اجعلك دائما اسم على مسمى اعنى
HOPEFUL
لك الود يا صديقى
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: إسماعيل التاج)
|
اسماعين التاج الحبيب
الآن تدخلين مرحلة الأمومة الكبرى
وما اجمل ان تكون الواحدة منا ام وحبوبة فنحن يا صديقى موعودات بهذا الطوق الجميل منذ االنعومة تعلمنا كيف ندير حركة الحياة ونحن طفلات بعد الان اترقب تلك اللحظة واسعى لاكتمالها قمرا ينير حياتى ولو بايدى اكون الان ام لكل بنات الدنيا لحبى لهؤلاء البنات لك الحب والاخاء
| |
|
|
|
|
|
|
Re: طوالى جاية الطيش (Re: حجة امنة)
|
بتى وحات الله بتى مش صحبة عزة ؟وحبيبة عزة ؟ ما بتجى الطيش يا اجمل البنات ودايما الاولى شاعرة جميلة وفنانة تزين جيد الكلمات والكلمات تتزين بحجة امنه ياخ احبك ياخ
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: الفاتح الجنيد)
|
بالله عزوزة الكانت بتمسك فى طرف توبك .. اقصد بنطلونك الجينز ياسلمى وهى صغمبتوتة وحليوووونة فى القاهرة ديك خلاص كبرت وبقت عروس ؟
وااااااااااااااحلاتى ياعزة الف الف مبرووووووووووووك ياسلمى لعزوزة بتك وان شاء الله بيت مال وعيال لى بت قلبك ياحبيبة والله فرحت ليها من كل قلبى وفرحت ليك حد الزغرتة
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: نادية عثمان)
|
نادية السمحة وندى ازيك وكيف احوالك ؟ ووينك هسى فى الخرطوم ولا لسه فى مصر تعرفى مشتاقة لمصر حد الشوق ما يقيف وللناس الجميلين فى مصر والحياة الحلوة وبسيطة ايام الجرى والتعب والشغل المتعب اللذيذ وعم السر قدور وناس جريدة الخرطوم وناس الاتحادى ونفس الحاجة مشتاقة للسودان وكل حاجة فيهو ربنا يجمعنا فى ساعة خير يا حبيبة ونتلاقى فى السمح يا الحنينة وتانى مشتاقة ليك ونجيك فى السمح يا غالية
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: سلمى الشيخ سلامة)
|
سلمى اقول ليك حاجة ؟
ياخ ماقادرة اتخيلك نسيبة.. وحبوبة بعد شوية تسعة شهور كده !! قدر ماحاولت اتخيلك لابسة التوب ومحفضة الحبوبات مدلية من فوقو الاقى نفسى بضحك وتطلع لى سلمى المودرن ام بنطلون جينز ووجه بت العشرين التى لا تكبر ابدا .. وعينى باااااااااااااااااردة عليك ياحبيبة !!
انا فى القاهرة وزهجااااااااااااااانة وقافلة معاى ماتجى حبة ياخ !!
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: نادية عثمان)
|
نادية يا ندى بينى بينك حكاية حبوبة دى بتشابى ليها جنس مشاباة ودايراها هسى قبال بكرة لكن الله يتم على الخير ونان ما داك يوم سعدى
عارفة فى مصر كانوا اصحابى المصريين بغالطونى انها بتى دحين يعنى الكتوف اتلاحقن بعد دا نبقى صاحبات مع عزوز بتى وعقبال وليداتك تحضريهن وتميهن بت امى وعديلة ليك وللوليدات شاحدة ربى
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: الفاتح الجنيد)
|
الحبيب الفاتح الجنيد ليه يعنى البكرى بالوليد ؟ البنات ديل مالهن ؟ غايتو مقبولة منك بس لانها منك لكن عليك الله فى احلى من البنات ؟ مش صلاح جاهين قال البنات البنات هم احلى الكائنات ؟ هسى عزوز دى ما لا ؟ ولا انت ماسك كلام حبوباتنا تبكر بالوليد والفايدة تملا الايد ؟ عقبالك ود امى
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: سلمى الشيخ سلامة)
|
مبروك كتير يا سلمي والله انا فرحت شديد واجمل ما في الفرح ان تفرح حين تسمع عن اصدقاءآخرين اكتمل فرحهم وكأني كنت في ذاك العرس نتمني ان نسمع كل جميل ورائع عن اصدقائنا والله انا شخصيا فرحت شديد وسعيد جدا عندما يفرح الاصدقاء جربت من الالم الكثير فلذلك كل فرح لأصدقائي هو فرحي ودمت يا عزيزتي
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: mustafa bashar)
|
mustafa bashar يا زول يا كتاب وكتاب جدا ماشفت رسمك لكن ما بكون اقل من الكتابة باى حال كتابة لمن تشيل نفسك وما تقدر ترجعو مدن تراها بعينك وترينا لها بعين ما رايناها من قبل شكرا ليك على هذه الكتابة الجميلة رغم انى كتبت ليك فى البوست لكن مليانه بالكتابة وساحرانى وحفظتها عندى لاسباب ذاتية جدا كتر خيرك ونجيك فى يوم طلوع الكتاب ونحتفل بيهو اضخم احتفال لانه يستحق مودتى
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: رأفت ميلاد)
|
رافت يا ميلاد يا اجمل زول كل سنه وانت طيب كل عام وانت بكل الخير والمجد لله فى الاعالى وعلى الارض السلام وبالناس المسرة عوفيت يا صديقى واتمنى ان تعود الايام وانت نفس الالق والمحبة للناس وكتر خيرك ونجيك فى سمح وليداتك وتسلم من كل شر واقعد عافية يا زول يا سمح
لكن دى ما صعبة شوية ؟ وتتكعكعى؟دى ابيت وتانى ابيييييييت قاعدة كدى كان ترضى كان تابى ياخ احبك ياخ
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: إيمان صالح)
|
ايمان العزيزة تعرفى ذكرتينى زولة عزيزة على بكلمة اختى دى زينب الحويرص ياخ دى زولة براها كنا ساكنين سوا فى القاهرة اها من الصباح تقوم تقول لى سلمى يختى داك وداك وداك ومرات نقوم بمشروع حجات اها ياالحجة اختى زمن جميل يا ايمان اختى والله يهنيك بوليدك ولا بنيتك وتزيدهن يا يمة ويشيلو كبرك شاحدة ربى
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: سلمى الشيخ سلامة)
|
الأختُ / الأُستاذةُ والصَّديقةُ
الرَّاقيةُ جدَّا ..
.. سلمى الشيخ سلامة ..
حُقَّ لنا أنْ نَفْرَحَ اليْومَ
بعَزَّةَ وذاكَ الطَّاهرِ
والعليِّ المَقام ..
أسعَدَهُما ربِّي وأكملَ
نِصْفَيْهِما على سَعَةِ
جمالٍ وخيرْ .
ولكِ منِّي احترامٌ وتحيَّة ..
وشُكراً لِعَزَّةَ " ظَبْيَةً " قادمةٍ إليْنا
كأُمِّها مِنْ عُمْقِ طُهْرِ السَّريرةِ
والنَّـقاءِ ..
.. وعُذْراً لِحُضُورِيَ المتأخِّــرِ ..
أخوك دائماً / محمَّد زين ...
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: سلمى الشيخ سلامة)
|
توتة و علوبة
صحباني ..
زي ما قال نجووي مبروك علينا..
رحاب.. امنة..ود الزين.. كبك.. منسي.. سوسن.. حسن..ودبانت.. ود امبدة..
والصف طوييييييييييييييل..
ألف مبروك ليكم..
سلمي.. ما تتخيلي فرحتي كيف.. بس ما كان عندي نصيب احضر..
ألف مبروك عليهم و علينا و اكبر الفرح لسلمي,, ونشيل عيالكم..
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: اينانا)
|
اينانا البنية الفنجرية تحضرى ماتغيبى يا الحبيبة وتحضرى معانا الفرح الكبير وبلاكم ما بتم ياكن الجرتق والحفلة والسيرة ياكن بخت اللبن وياكن لبن الفرح وعسل الايام وعقبالك يا السمحة ونشيلك فى العين تسلمى انتى وكل حبايب عزوز تسلمى تانى وكل مرة اقعدى عافية وعافية منك
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: محمود بكر)
|
محمود يا بكر يا زول يا جميل حبابك عارف كتبت ليك رد لذيذ لكنه اتمسح عموما فكرته قائمة على فكرة (مشروع حبوبة ) وعزوز اول حفيدة لامى عشان كده سعيدة جدا انى اشوف حفيدتى او حفيدى واكون زى امى لكن طبعا مستحيل امى زولة بالها طويل عليها كل الرحمة ونحنا الاخلاق فى راس النخرة ولمن تشوف احفادها وحفيداتها حواليها فى العنقريب وهى بتحكى ليهم تشتهى او حقيقة كنت بشتهى اكون حبوبة واتمنى ان اكون زى امى وعندى احفاد كتااااااار شفت كيف ؟ نشوفك فى السمح ود امى
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: سميح جمال)
|
طبعا انتهيت يا دوب من توزيع الشربات والكعك على الناس وماشي اغير هدومي اللي لابسها من الصباح لمعازيمك الكتار ديل ناس شندي وحلفا والابيض وام درمان وناس امريكا الجنهم يسالوا في اي شئ ، وناس معهد الموسيقي كل الدفعات ، وناس القضارف - ما كنت داير انساهم ويجينا اللوم - فضلوا ناس من جهات تانية في السكة ، يا اختي انت تعزمي اكتر من تلاتة الف زول للخطوبة ونتعب في رص الناس وتوزيع المرطبات في العرس انا بجي زول رقيص وهجيج ، اسع كدي خليني اسقبل الجايين ديل ناس ديرك الفريد وكواتو واستيفن ذاتو شايفوا داخل جاي ... وبجيك بعدين لحدي ما اخلص الفي يديني ديل ،، اتفضلوا ام العروس بتجي قاعدة تسلم على ناس جووا من القاهرة ، مبروك .. الله يبارك فيك...
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: مصطفي سري)
|
مصطفى يا حبيب انقر ما بكيت لمن كنت بقرا فى كلامك دا؟ اجمل حاجة انه يكون عندك اصحاب بحبوك وحسيت بحبك ودفقة صدقيته ياخ ياخ هسى اكتب ولا ابكى واول ماقريت تعليقك بكيت وتانى هسى ببكى تعرف حيكون باذن الله فرح لمن فرح زاتو ياريت كلنا نكون تامين لامين حاضرين ونشيل شيلنا الجميل لبعض ونخت الروح محل الروح يا مصطفى ياخ احب كل زول فى الدنيا بحب اصحابه واصحابى وصحبات اصحابى لمن اعاين للناس الجات فى البوست دا بحس باجمل احساس انه عزوز وعلى محظوظين بحبوهم كل الناس وبتمنوا ليهم الخير لكل زول جانا الف حباب وحب يفيض وليك يا مصطفى كل الحب
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: سميح جمال)
|
سميح السمح كتر خيرك وبركة الشفناك طيب ويا حبيب انت جادى فى كلامك دا ؟ (ودعوة ام فالحه لى بى عروس بتشبه باكر) اصعب حاجة الزول يخطب لى زول لانه دى حاجة مرتبطة بتفاهم ولغة مشتركة وقصة طويلة غايتو لو جادى ما بقدر وحات الله افتش على عروس لولدى سميح دا موضوع داير نقاش جادى لانه دى حياة ومستقبل لومتفق معاى خلينا نعمل بوست عديل نناقش هذا الموضوع لكن بعد الارشفة اتفقنا؟ اقعد فى العافية
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: سلمى الشيخ سلامة)
|
الصديقة العزيزة شرم الشيخ الف الف مبروك للرائعة غزوزة .. وعقبال عندك يا حبوبة 0
لكن شفت كيف الايام بتجرى والغربة بتسرق الاعمار .. لا زالت اذكر اخر مرة رايت فيها عزة قبل نحو عقدين.. سافرنا سوية من الخرطوم الى مدنى بصحبة والدها الصديق جعفر نصر لذا ما قادر اتصور حكاية انها وصلت سن الخطوبة 0
الف مبروك مرة اخرى وجمع الله بينهما على المحبة 0
عادل السعيد
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: خالد عبد الله محمود)
|
الاستاذة والاخت والخالة وقريبا الحبوبة الدائما محبوبة ومعزتك عند ناس بت عزك دائما الف مبروك لي عزه وعريسها ان شاء الله علي الطاهر جاءت متاخرة شوية شفت البوست قلت كدي النخل علي ناس اسيوط وارجع ليك من قبل كم يوم اها زي ما بيقول بكري انشغال الباندوث والحاجات الكبيرة علي فهمي ديك ..افتش لي بوستك ده طششت ..ما لقيتوا ..العتب علي النظر لكن عارفك بتقدري الظروف وبتعزرينا وعشان ما تلومينا اقوم ازغرد ليك ولي عزه ...شفت كيف واقدل .. وافك اخري ويوم العرس داك الداير ينجلد معانا نحنا قاعدين الف الف الف ..مبرررررررررررررررروك وان شاء الله بيت مال وعيال
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: Mekki M Alhassan)
|
الشقيق مكى حلوة دى عجبتك مش؟ يا حبيبنا انتو ناس البيت ومافى لوم تب لكن يا ود امى البطان دا دحين ما حاجة قاسية ؟ خلينا فى البطان حق الكلام نقول كلام ليين وحبيب للناس ونزيد من الحبايب لانه البطان دا صعب ياخ وما انسانى شفتو فى بربر يا حولا وقعت من الخوف غمرانه بعدين نحنا ناس (رقيقين ) ياخ لك حبنا ونتلاقى فى خيمة فرح عزوز المنصوبة دايما للناس
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: سلمى الشيخ سلامة)
|
الف مبروك يا ام عزه..وان شاءالله تتهنى باحفادك يارب..وتحضرى فرحهم وتكونى بقيتى حبوبه كبيره كده وتقولى ليهم عاد العرس ما كان زمان ولا بلاش بالايام مش زى عرسكم البقى زى حفل الاستقبال البتعملو السفارات ..!!! سبحان الله الحضرنا زمنكم العجيب ده يا وليداتى..!!! غايتو .. سيرتكم البى الطيارات ما عندى ليها حيل و(نفسى) وكرعينى ما بسعادونى ،،، لكن العجب كان شفتو سيرتنا كانت بالعربات أكان شفتوها هسع تقولو والله يا حبوبه أظنوا ده مشروع تخرجك فى (هوليود) ..وكان قلتو لى يا حبوبه الظاهر خرفتى ..ويقوم العريس ود عزه ويقرقر فيكى ،، تقولو عندكم حروب فى الجنوب ودارفور والشرق ومجاعة سنة تمانين لامن مرقتو خليتو البلد ومرقتوها فى امريكا ..جايه هسع تحكى لينا عن عرس زمان وحلاتاكمان..غايتو يا حبوبه القصه لو حكيتيها لى زمان وكتين كنت فى الروضه بصدقها لكن هسع .. عشان ما تزعلى منى ببوسك فوق راسك...وتقوم عزه تزغرد وتزغرد وانتى تشيلك الهاشميه وتقولى دايره تزغردى وتقومى كدا تقحى وتقحى وتغلبك الزغروده ويا حليل ايام زمان.....لامن كن بنزغرد بلا شغله فى المعهد.....
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: Adam Mousa)
|
Adam Mousa يا حبيب فاتح طاقة خيال سمحة عجبتنى بلحيل ويا حليل زمن المعهد وزغاريد المعهد البلا شغلة كنا لمن واحد يجى يتخرج من ناس النقد لانه ماعندهم عروض تمثيل بنشيل البحث ونسوى ديك يالعديلة والليل الليل العديل والزين دى ما تدى الدرب وناس نجاة محمود ونحنا شايلين البحث نقدم سيدو ولا ستو للجنة ونقعد نرجاهم فى خشم الباب متل ناس الاستبالية لمن يمرق والسيرة دى من خشم الباب للبوفيه ونسوى حفلة مرتجلة ونفرح بسيد البحث داك يالفرح هسى قلت لى وليدات عزة سيرة بالطيارة ؟ كان معانا زميلتنا من بنات الجنينة حلفوا قالو سيرتها كانت بالطيارة نعمنو العريس كان وزير فى حكومة تشاد والسيرة من الجنينة لغاية انجمينا بوينج ابو سته لساتك شفت كيف ؟ اسمها حوا لكن هسى ما بعرف انها وين زمن جميل كان وياريت تعود ايام زمان زمن الكجرة بتعرفا ؟ والعروس يوزونها دهب دا كلو بقى اساطير لكن حكتها لينا امى الله يرحما ويغفر ليها اقعد عافية وما تستنى عزومة تعال الحفلة الكبيرة ياخال العروس
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: سلمى الشيخ سلامة)
|
كل التهانى للصديقة عزة والاخ على طاهر طبعا استاذة سلمى بنجيك نحن فى البدء والختام واعرف ان الفرحة تملاءك كما نحن الآن واعتذر عن التهنئة المتاخرة فقد كان حرّى بى على الاقل ان اكون فى مقدمة الركب. فكم تلاقينا مع العزيزة عزة عبر البالتوك والنت واقول الف مبروك ليكم وربنا يتتم على خير ضياء ميرغنى /الطاهر2
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: Amira Elsheikh)
|
سلوم الحبيبة
سلامات ومبروك لى سوميتك وانا شاء الله تجرتقيها وتلبسيها السوميتا وتخاوى روحها ببنية تملاء عليك و عليها الحياة و تبقى تالتكم .
العريس على الطاهر مبروك وربنا يسعدكم وبختك نسيبتك سلمى امك دعت ليك برضا.
الف الف مبروك والعرس فى السودان فى دار الرياضة ام درمان عشان الحبايب كتار .
ربنا يتم على خير
كسرة ناسف للتأخير
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: Mohamed Abdelgaleel)
|
محمد الجليل اول حاجة خال العروس ما بسالوه عارف ليه ؟ مش ما بوريك الا تعرف براك هو يعنى الخال دا الا يضبحو ليهو عشان يبقى خال ؟ وما محسوبة فى الاوائل وبس تبريكاتك دى من اليوم الاول للخطوبة زاتا اها تانى شنو ليك يا محمد اخوى الناس ظروف مش اماهتنا بقولو كده ؟ وخليك جاهز من هسى باذن الله عقبال بنياتك ووليداتك تشوف نجاحهم وتتم ناقصهن
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: tayseer alnworani)
|
الحبيبة تيسير وين انتى ؟اصبرى قايلة ما بتسداها ؟ لا ياخ ما بيناتنا عارفة قالو والعهدة على الراوى واحدة ما تت وماشين يدفنوها فجاة قامت قعدت فى قلب العنقريب رجعوها البيت اول حاجة سالت بناتا ـ اسمعن الجات البكا حار منو .؟ الجات بعد الجنازةشالوها منو ؟ الجات وما بكت حار منو ؟ اها يا ستى الحاجة دى قالو بقت تتسد فى النسوان كل حسب الجية وانتى يا تيسير الحبيبة ما بنتسدى فيك نعمنك حبيبة واخت وصديقة وكلو
نرجع لموضوعنا قلتى لى العرس فى دار رياضة امدرمان ؟ لا عشان صالح الامين يهيج فينا ؟ نعملو فى مسرح البقعة لانه كبير ومن هسى اعملى اللازم مع منعم الطويل شكرا ليك يا حبيبة
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: Amira Elsheikh)
|
اميرة الشيخ وين يا بت ابوى اراضيك ؟ رجعتى السودان ولا لسه تتطمشى فى بلاد العرب ؟ يا بنية شيلى اهلك ما بتقدرى تقعدى بعيد منهن نحنا بقينا من ذوات الدم البارد ما تحصلينا ارجينافى اى مكان بنعبى الفرحة نجيك ارجينا فى اى زمان مالفرحة بتكون بيك يا بت يا غابة فرح والفرحة منك وليك يا اميرة ياخ مشتاقين ونجيك فى كل يوم مليانين بيك [email protected] ورينى وينك انتى ؟ اقعدى عافية
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: Osama Mirghani)
|
الاخ العزيز اسامة ميرغنى شكرا ليك كتير لانك عرفتنى (مبروك يا سلمى قبال العرسان ) لانى وحات الله منتظره اللحظة دى اكتر من يوم التخريج ما بكضب عليك لسبب انى حاكون مرتاحة نفسيا حتى لو الواحد (اتكل على الله ) يكون عنده سند خلاهو لبنيته وربنا يورينا جديدهم ونفرح بيهم وانت معانا يا اسامه وكان بقيت قاعد فى البحرين فتش على زولا سمح اسمو عبد الرحمن الزين واغريهو السلام تسلم ود امى
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: سلمى الشيخ سلامة)
|
مبروك لعزة وامها وابوها
والله الخجل خلاني ازوغ من بوستات سوميتا لاني وعدتها بارسال رواية ولا زالتالرواية بارفف مكتبتي
مبروك لها من صداح وقالها سمؤال من مدني واقولها عقبال تكتمل الافراح ونكون معاك هنا او هناك
الاستاذة سلمي والله ادينا تلفونك علي الايميل اس الشريف ات ياهوو دوت كم
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: عبدالله الشقليني)
|
العزيز عبد الله الشقلينى اتذكرت اثناء قرايتى لمداخلتك يوم زواج ام عزة دى زاتا
ذاك يوم غريب يا صديقى كنت اول واحدة من شقيقاتى تقترن وكنت اكبر واحدة فكان على ان اقوم بفعل كل ماهو جدير بالبت الكبيرة فى اليوم الثالث للزواج كنت اجلس الى امى نغسل العدة ونرتب ما اصابته الفوضى ايام الزواج كنت اخشى ان اسافر وامى وحدها لان اخواتى صغيرات لذلك قمت معها نرتب كل شئ حتى لا تتعب عقب رحيلى كانت حينها رحمها الله تبكى وتدارى دمعاتها باسم الفرح لكنها كانت حزينة لمفارقتى ظلت تقول لى ـ يا حليلك يا بتى واختى كلما تذكرت تلك المقولة اجلس اليها اخرج تلك الجملة من ذاكرتى واعبث بها ضاحكة وباكية يا لامى يا عبد الله كل ما كانت تتمناه ان تكون حاضرة هذا الفرح لعزوز لكنها فى القلب دائما شكرا لك لانك قلبت على اشجان احببتها
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: سلمى الشيخ سلامة)
|
Quote: يوسف الجميل عساك طيب وما جايينا فى العيد؟ طبعا ما اتلاقيت مع محمود العريس لغاية الان امشى البيت يكون مشى اجى على اساس نتلاقى يقوم يضرب تلفون يقول شغال لكن بنتلاقى حاقصة فى بيتكم الوكت كله ومن هسى دى دعوة للنادى زى ماقالت صديقتنا ماجدة خوجلى لكن بالجد يا يوسف مش فكرة لذيذة انك تكون جد؟واكون حبوبة ؟
يلا خلينا نشوفك فى العيد نسوى خروف تمام الكمونية على اقعد عافية |
هديل خرمجت لي البرنامج وجاياني هنا لكن ان شاء الله بعد العيد بي شويه بجي عليكم
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: طارق جبريل)
|
اريته خبر السرور با ام عازه
ان شاء الله يا بتى ربنا يسعدم وتشوفى وليداتم يارب
وتبقى حبوبه كدى تغنى وتسكتى لامن ينومو .
1000 مبروك يا بت الشيخ سلامه .
------- رجعته قبل اسبوع من السودان... الابيض بتسلم عليك .
------- بالمناسبه دا رد تانى لانى كتبته واحد ما عارفه نزل وين الله يستر .
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: حمد اسماعيل)
|
حمد عشايا اجمل الاخوان عندى ازيك يا حبيب وكيف صحتك ؟ وبعدين يوم كنت قاعد مع احمد عبد الرحمن فى لندن وكنت عارفة عرفت كيف ؟ ما بوريك المهم انه صحتك تمام والابيض تمام وكلو تمام حاجة تمام يا حمودى يا سلام ياخ مشتاقين تلفونى تلقاهو معلق فى البوست دا وفى الصفحة دى زاتا خسمتك كان ما كلمتنى ونتلاقى فى فرح عزوز كلنا انشا الله
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: سلمى الشيخ سلامة)
|
يا سلمى .. يظهر على انا جيت متاخرة شديد.. بعد نهاية الحفلة وجمع الكراسي وفك الصيوان.. العتب على المشغوليات والنظر.. الف مبروك وبيت مال وعيال .. وانشاء الله تحضري جديدهم وتشوفي عيدهم(دعوة جماعية للعروسين).. تشيلي جناها وجنا جناها..وتقعدي حداها..(دي خاصة بالبنية سوميته، وامها، اللائي قفزن فجأة من عالم الامومة الممتدة لتمتد، والطفولة وتبادلن الادوار).. غايتو انا في الصفقة والغنا والرقيص حظي (نِلْ)، لكن مؤقتاَ اقبلوامنى الزغرودة دي..
| |
|
|
|
|
|
|
Re: الف مبروك .......عزة بتى وعلى طاهر الخطوبة (Re: حليمة محمد عبد الرحمن)
|
يا حلوم الخاتية اللوم حبابك بت امى متين ما هلت سماحتك وحبابك يالغالية مافى لوم اللوم دا بين الناس المابتحب بعض ونحنا ناس بنحب بعضنا وبنشيل بعضنا حتى لو ما اتلاقينا لكن متل البنعرف بعض بيناتنا الود والاحترام فما تقولى لى لوم وما ادراك مالوم نجيك فى السمح ياالسمحة ودايما فى هنا وامن وسعادة دايما حليمة واصيلة يا حبيبة والغنا والصفقة عفيناك منهن لكن ما بنعفيك من الجية قبل اسبوع من بداية الفرح الكبير قلتى كيف؟ لك كل الحب
| |
|
|
|
|
|
|
|