|
|
|
 Re: مخصوم منك وطن يا خطاب حسن احمد ـ صور (Re: PLAYER)
|
العزيزات والاعزاء الذين يمرون من هنا
لابد من خلع القبعة وكل انواع الطواقى
ثم الانحناء للسيده بثينه مرغنى ..امنا
على حنوها وفيض كرمها الذى شملناجميعا
ودفق على جمعنا .. على جمعناالذى توخى الشعر
ذاك المساء ( الهيوستينى العجيب )
ولهويده .. عماد وحسين .. اطنان امتنان
.
.
.
يا للبيت السودانى الرحيب
وقدرته على الانتقال من مدنى
بكامل وده واناقته من ودمدنى
south west
هيوستن
!
!
| |
 
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: mohmed khalail)
|
محمد خليل
يا خليل ياخليل خليلك وين ؟
متذكر الغنوة دى
كان ماحضرتها ليك حق تعمم خطاب اخوى
دى على وزن الكاشف اخوى وكدا
كلنا اولاد جيل واحد معاى طبعا خطاب
عارف يامحمد خليل
انحنا متبارين لينا تلاتين سنه
يعنى كنا شفع ومازلنا وصلنا الى الكهولة وماتزال بيننا
تلك النضارة منذ ان تعارفنا قبل ثلاثين عاما
كان رفقتنا العميرى عليه كل الرحمة
ثم مررنا على منعطف العمل معا فى الاذاعة
فكان ان انضم الى هذا العقد
حسن محمد دوكة دكتور حسن فيما بعد
ولانه كان اكبر طموحا منا فلقد افترقنا
سافر الى حيث ازدادت خبراته وارتقى علمه
لكنا مانزال كل الود احدنا للاخر
عشرن عاما او تزيد منذ ان تعرفت الى هذا الولد النابه حسن
وبين هذه الضفاف كان يلوح ابوعركى البخيت تميمة لعقد اتمنى ان لاينفرط قط
ثم كانت مريم محمد الطيب وماتزال "فردة" تعجز كل كلماتى عن ايفاء حقها
وشقيقيها محمود وعبد الله اب سفه مجموعة التقت على الحب والمودة
وافترقت لكنها متصلة كالسرمد
اينما حللنا نحمل احدنا الاخر فى جوانياتنا
مالى بقيت بكاية كده ؟
امكن الغربة
لكنها لن تفصلنى عن اخوة لم تلدهم امى قط
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: mohmed khalail)
|
Quote:
استاذة سلمى بت الشيخ
عم خطاب (شفت كيف بنعجزك)
كم يزهو بكما
وطنا لكما
وتلاقت يا مرحى قمما
|
محمد خليل .. ياخى تصدق بكون متكيف كيف !
بى كلمة .. عم خطاب .. معناها بالنسبه لي
يعادل بالعمله المعنويه , حاجات حميمه ..
طول الواحد ما سمعها ومشتاق ليها كتير!!
و بعدين يا حماده انت كده ما بتعجزنى ..
بالعكس تماما ً
بتحرضنى اسمعها من الزول القاعد فى البروفايل
حتى لو كانت جدو.. زي الشاب مريود
لذيذه الكلمه وبتحسس الزول بالامتنان
للخالق والكون
,,
يا فاطر الكون
ارواح
واشيا
ومن لون
..
تحايا عامره ياصديق
.
.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Sudany Agouz)
|
| Quote: مش الحبوبة " بالمعنى الآخر.. ما تودوناش فى داهية .. |
يا حبيبنا
يا سودانى شاب
مش عجوز لانه روحك تمتلك كل الشباب
عارف حكاية حبوبة دى منتظراها بفارغ الصبر
اجمل لحظة يتخيل حتكون فى حياتى لما اسمع ولد عزة ولا بتها بتصرخ
فى اول لحظة حياتها
ومستعجلة عليها جدا
لانها من اجمل لحظات الام
واتمنى ان تتحقق هذه الامنية هذا العام
فليس فى العمر متسع يا صديقى
دايرة اشيل الاحفاد والعب معاهم
فى اجمل اللحظات
اتمنى انك فهمتنى
طابت ايامك كلها
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Mohamed Abdelgaleel)
|
Quote: سلمى وخطاب .. هسع لو أتوكلتو على
الله وجيتو تميتو باقي كلامكن ده في
أمدرمان ما أخير، وانتو عارفين
مستمعينكن هناك لهفانين لجنس الكلام
ده ومقاعدكم شاغرة وأصبحت
الآن أكثر شغورا فلا تتأخروا
|
محمد الجليل
كلما مدينا ايدنا نلقى زهرة ريدنا بعدت
يا صديقى
بات الوطن ابعد من زحل
امنية ما
فى زمان ما كانت
مشينا نتبنو لامن سال عرقنا
على صعيد خاص
صدونى المراكبية
وانا البعت الفرح للنيل
حزينة يا صديقى
حزن يغطى النيل دموع
واكتشفت انك عشان تقعد هناك
يا تدوس على كل الناس وتمشى خطاك
او تبعد وتاوق
والاتنين حارات
كيف الشورة يا ابو التومات؟
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Mohamed Abdelgaleel)
|
Quote:
سلمى وخطاب .. هسع لو أتوكلتو على
الله وجيتو تميتو باقي كلامكن ده في
أمدرمان ما أخير، وانتو عارفين
مستمعينكن هناك لهفانين لجنس الكلام
ده ومقاعدكم شاغرة وأصبحت
الآن أكثر شغورا فلا تتأخروا
..
|
.
محمد عبد الجليل
حينما اصافح حروفك فى اي مداخله , التقيك عُدة مرات
فى الكرة الواحده ..
حتى من قبل ان تحج ,
من قبلى تراب السودان
.
تلك التربه
.
التى عادلت بين دماء بنيها ,
مدافعين عن حُريتِها ..
ودماء من مهروها
الدماء..
وهم
!!
؟
.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: عبد المنعم سيد احمد)
|
عبمنعم
سيد احمد
الشوق مطر وبحر وقرررررب يبقى جبال
شدة ما تقيل
ازيك ود امى
من زمن مستنى عودة قلبى راحل
كنت بكتب ليهو بدمى الرسايل
وللشعر حول وصول فى الروح
وله موجبات الصمت كلها
حين تستمع الى من ينشدونه
وانت يا صديقى شاعر جميل
اخفته ثلوج كندا وبراريها
انفض عنك زخات الثلج واكتب لنا
اكتب ما يجيش بنا
فانت تعرفه
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: طارق جبريل)
|
الحبيب طارق جبريل
او جبرين
كما تقول حبوبة امنة بت الجزولى عليها الرحمة
الدنيا عيد
وعارف خصام العيد حرام
مش؟
لا رسالة تجينى منك ؟
لا خبر طمنى عنك ؟
وانت سايق فينى ظنك
برضو منك
لا الزمن بقدر يحول قلبى عنك
لا المسافة ولا الخيال
هذه الايام امتلئ حد الفيضان بمصطفى سيد احمد
اتمنى لك طول العمر
وكل يوم وانت واسرتك بكل الخير
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: حنين للبلد)
|
| Quote: السنة الفردية دي انشاء الله تكون فال خير عليك وبنيتك والكل |
يا حنين السمحة وحورية ولفتاتا غزال
ازيك
طولنا منك يا حبيبة
اول حاجة انتى ما بتعرفى كوتشينة؟
تسعة دا رقم ابن كلب
عارفة
ايام كنا فى المعهد العالى للموسيقى والمسرح
كانت الدنيا بى خيرا
كان فى بصات وتذاكر بصات
احلى لحظة لمن نلعب فى الباص بالتذاكر
دائما بكون معاى الصادق شيخ الدين واسامة سالم واسيا التلب وامنة امين
نمشى السينما فى القاعة
اول حاجة لمن الكمسارى يدينا التذاكر كنا
"بنشكها " التذاكر ونوزعا
دايما كان نصيبى "التسعة "
وما كنا نركب تكسى الا يكون عامل تسعة
واحب جدا رقم تسعة
فعشان كده متفاءلة جدا
انه كتابى الرابع حيشوف النور فى هذا العام ومعاهو مجموعتين قصصيات
شفتى كيف ؟
تسعة وطويلة كمان
كل سنه وانتى واسرتك بكل الخير
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: حنين للبلد)
|
Quote:
توقيع حضور ومتابعة للبوست
والحاجت الحلوة دي ادونا بيها علم من بدري تاني..
|
حنين للبلد .. سلا م
كان الوالد هو النبهنى ليك ذات .. شوبينق فى فرجيينيا..
متزكرو لحدى هسى ..
سلمى برضو زيما عارفه .. بت حُفره
المرات الجايات اكتر
اشوفك
.
عمو
.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: سلمى الشيخ سلامة)
|
هذا كلامُ العنكوليبِ للعنكوليب :
" ... دائما كنت اقول ان السفر قطعة من جهنم لكنى استحلى حوامضه
ازدرد كل علقم الرحلات التى جعلت منى (طوافة ) او (بنت بطوطة )
للسفر عدة فوائد اقلها انك تتعرف الى نسق حيوات لم تجربها من قبل
فى مكان ما ، زمان ما ، وبقاع تطا ارضها لاول مرة فى هذا العالم
ازيد الى معارفى معرفة جديدة... " .
* أمو ،
و انتِ كمان مخصوم منك وطنين !
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: منوت)
|
| Quote: و انتِ كمان مخصوم منك وطنين ! |
يا اعز الناس ابو الحسن
اول وطن "صباح الخير يا وطنى ، والتانى مساء الخير ياوطنى "
يا لتلك الايام يا صديقى
كنا وكان الزمان غير الذى نراه الان
او نعيشه حتى
لكم افتقد ذلك الوطن الصباحى
بمحمد مصطفى وسعد الدين ابراهيم
وطلال عثمان واسامة جمعة وعمر عوض وعثمان عمر وهاشم الريح له كل الرحمة
ومصطفى سيد احمد ينشج وينشدنا للوطن
له كل الرحمة
يا ولد
مالك على ؟
اتمنى ان نعود الى تلك الامكنة يا صديقى
وتعود رجاء حسن حامد ما كانته
يعود اليها بصرها كاملا وتتعافى
اتمنى ان نعود الى استديوهات امدرمان ونلتقى مستمعينا الاحباء
اتمنى
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: منوت)
|
Quote: !هذا كلامُ العنكوليبِ للعنكوليب :
|
وغناء الليمون لللسعة ِ
النادره بين ماء وسُكر ببيت الخاله او العمه
ذات صباح .. ظهيره
او مساء
.
لك الحسكنيت وابو اللصاق ايها الصديق
.
جنوبنا كيف !!
.
كلم قمارينا
.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: خضر حسين خليل)
|
Quote:
سلمي وخ(كتاب)
كيفنكم وكل عام والفأل فأل الأخوان
وإتمنيت لو كنت معاكم!!
عيد مبارك علينا وعليكم
|
يا خضر ياحسين ابن الخليل
كل سنه وانت اطيب واحلامك اقرب للتحقق
على ارض الواقع ..
شكرا ً يا صاحب على الطله
وبنتلاقى فيها الفانيه .. كان شدينا الحيل
باذن الله
والله الله
أللا ..
( المدحه اياها بي عقد الجلا د وكده )
.
.
اشوفك
خط
اب
.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Hawari Nimir)
|
امى بثينة
صباحك فال
وصحتك عال العال
فاقداك يمة فقد الروح
طارياك يمة وين مااروح
كيف ايامك ؟
لسه بتاوقى للصور وتبكى ؟
ما تبكى يا السمحة المغتية بصور الجمال ارتال
كل الدنيا تضحك ليك
كل الكون يهلل بيك
يام الكل يا ست الكل
يا روح الفل
يازهرة ندية تنفحنا العطر والروح
كيف ايامك يا سمحة ؟
عساك بى خير
ومشتاقين يا ست الخير
خلى بالك من عيونك ومن زهورك ومن ولادك ومن رويحتك يام نفل
مشتاقة لحضنك دفا
مشتاقة لعيونك دوام
اقعدى عافية امنا
وبيك الزمن اتمنى تانى يلمنا
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Hawari Nimir)
|
الاخت الاستاذة سلمي الشيخ
السلام عليكم ورحمة الله
موضوع جميل جدا ادام الله فكرك وفضلك
لقد قراة لك صفحة كاملة يوم امس بصحيفة اجراس الحرية ولفد اعجبت ايما اعجاب بسلاسة التعبير وانسياب المعاني وبراعة الحكي
لك التحية اينما كنت
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Abdelgadir Galal Ahmed)
|
العزيز عبد القادر جلال
تحية واحتراما
اشكر لك صبرك على قراءة ما اكتب
احيانا احس بغصة بعد ارسال المادة
واتمنى ان اسحبها
لكن حديثك عن قراءة صفحة كاملة من جريدة اجراس الحرية
يزيد اعبائى
ويجعلنى افكر الف مرة
لان للقارئ على الكاتب حق
حق ان يجعله محب لما يقرا
حق ان لا يقتله بلغة "شترا"
احمد الله انه جعلنى اجد قبولا لدى قارئ بقامتك
لك الود والتقدير
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Hafiz Suliman)
|
حافظ العريس
ازيك ومشتاقين
دى بت براها كده
ولعابة لعب
غيتو ساهرت بى
لانها بتلعب بطريقة لاحكت ولا بقت
ليك حق تسميها ام فتفت
وعامر الجوهرى لسه فى القاهرة ؟
اللهم اشفه وعافه اعده سالما غانما
اللهم انزل عليه نعمة الشفاء عاجلا
وبلغه سلامى وتحياتى
وليك وللمعاك فى اللوضهقاعدين
الا ياخيرى الجواب اتملا بى الصفحتين
ما تطول مننا ادينا سلك يا حبة
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Hafiz Suliman)
|
Quote:
خطاب و سلمي و كل الاصدقاء
كل عام و انتم بخير
و السنه الجايه شعر ساكت
و مسرح لمن تقول ماداير
و مزيكا للطيش
سلمي اتصلته بي عامر الجوهري في القاهره
قبل يومين كده
و هو بسلم عليك و سالني منك
|
حافظوف يا سليمان .. كيفك والعروس
نسمعك بالعربى , تسمعنا بالانقليزى !
ام فتفت عندك لاكين .. يخيل لى الكمنجه دى .. الفلوت يعنى
اصلها انثى من شجن وعبير
البنيه غرقانه ياحافظ ..
مجذوبه يا صاحب ..
زيما قال اخونا هاشم صديق فى جان والكريسماس
..
( لما ترقص جان
( بتغرق
( مره زي لهبا
( الهلب
( ومره زي اهل
( الطريقه ..)
..
حافظ اعمل تلفون مازال شغال تلفونى
ضرورى جدا ً وسلملى
على عامر الجوهرى
الذى اضاعه منى قريبه العجيب
.
فى انتظارك
.
.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: mustafa bashar)
|
دا شنو دا ياسلمى!!؟
ميلتو الدنيا الجديدة..عادل وخطاب
وانت في حتة واحدة ..
الليل غرق في
نشيد طويل..
والذكريات إتمازجت
والأغنيات
الشاردة
في خيط النضم
حال النجم
يعصى الشهاق..
خطين وفاصل
من كلام
ألفين
سلام..
مرت ثواني
الساعة
والعقرب وقف
وقع الزمن
بين
السنين..
وبقت الحكاوي
النية
تنضج بالحروف
يامحسنين..
كل سنة وانتم بخير
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: عبد المنعم ابراهيم الحاج)
|
Quote: وبقت الحكاوي
النية
تنضج بالحروف
يامحسنين.. |
عبدالمنعم ابراهيم
يازول مالك تبقبق فى الحشا
بنضمك الماهل وسمح؟
وحاتك يالغالى
اتلمينا
تقول ما اتلمينا
اتلمينا شغل ما سوينا
زى ما قالت صحبتى البقارية الجميلة حواء
قعدنا وحكينا جنس حكى ؟
وبكينا شهقنا النجوم من تالا الدموع
يا سيدى
كانت ايام زى لمح البصر
ارواح اتناغمت واتناضمت وما ونت
شى بالتلفون مع عادل القصاص
مشينا المشاوبر التى لم نمشها منذ عشرات الاعوام
منبتة "من نباته الخياطة "بالفرح
تعرف نباتة الخياطة ؟
زمان كانت مدرسة الخياطة فى كلية المعلمات
تقررب تدينى كف لانى ما بنيت الخياطة
لكنى انبت الاصحاب عشبا يخضر به القلب
انبتهم وادخلهم فى مكامن لا ترى
ادعوهم فياتونى يدعونى فاتيهم
ونلتقى على ضفاف الشوق طرا
لانود الافتراق
كنا رجاء الصحو
وكان عميرى بيننا طوال هذه الايام
وحلق بنا القدال فى مجامر من الشعر لاتشوى لكنها تدفئ القلب والروح
وانشدنا خطاب نشيدا حراقا وبوحا يخرج من بين تلابيب الروح
يمسك بارواحنا
ليتك كنت معنا يا صديقى الجميل
ليت كل الكاميراتا والكوفنجية كانوا معنا
لاقمنا لنا سرادقا للمحبة فى قلب تلك الامكنة ولن نبارحها
لك ولاسرتك كل المحبة
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: سلمى الشيخ سلامة)
|
سلمى الشيخ سلامه
لقد اقتطعت عنوان .. ترويستك .. البوست ..
من مدخل قصيده
عصرتنى وبداية القرن الذى شهدنا , حين جلوسنا متجاورين
هذا المساء الذى حرضك على الكتابه .
بعد تباعد سنوات تزيد
او تقل قليلا
عن الخمس او العشر سنوات
جلسنا لنتاّنس شعرا
لتغنى بوطن
ارهق مواطنيه ساسته
او المتسلطين على امره ,
واهداهم المنافى .
معسكرات النزوح
الملاجئ
وحاصرتهم فى كل الزوايا
الانعطاف
.
فبأي الالسنه !!
اغنيك رهطا ً حميم
!!
لك الشموس .. دون رطوبه ..
وانت تعودين الى ثلاجة ..ايوا سيتى
التى اشعتم الدفئ فيها غناءا ً سودانيا ً اصيل ,
وصُحبة ماهر تاج السر
.
.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: khatab)
|
سلمى الشيخ سلامة ايتها النخلة الباسقة
والشامل الكامل خطًاب...
أنتم هناك في هيوستن تبدعون وتتألقون، ونحن في الدوحة
ثملون بهذا الألق!
أنتم تعيدون لنا سيرة الأدب الذي يسافر قاطعا الوهاد والفيافي،
عكس ما يقال عن ان العلم يؤتى ولا يأتي، أتيتم تحملون زادا غاليا
وأشبعتم كل الحاضرين والغائبين من أمثالي...
يا ليتني كنت معكم، يا ليتني...!
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: عبدالأله زمراوي)
|
| Quote: يا ليتني كنت معكم، يا ليتني...! |
يا مولانا
وكنت حاضرا
كنت الحضور الياتلف
واليمتد الى كل لوحة شعرية
كنت معنا يا صديقى
فى الكلمة التى تخدش صمت البحر
فترتج لها خلجان الكون زهوا
يوم شكرك ما يجى
عارفنى بقصد شنو
وما بقدر اوفيك يا زول يا اصيل
مابقدر تب
تسلم ويسلم عمرك
وما نعدمك
اقعد فى العافية غتا وضرا
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: عبدالأله زمراوي)
|
Quote:
أنتم هناك في هيوستن تبدعون وتتألقون، ونحن في الدوحة
ثملون بهذا الألق!
أنتم تعيدون لنا سيرة الأدب الذي يسافر قاطعا الوهاد والفيافي،
عكس ما يقال عن ان العلم يؤتى ولا يأتي، أتيتم تحملون زادا غاليا
وأشبعتم كل الحاضرين والغائبين من أمثالي...
يا ليتني كنت معكم، يا ليتني...!
|
او نكون معك .. العزيز عبدالاله زمراوى
مولانا , الشاعر
المقاوم الصنديد !! بماذا اسميك يا رجل
فلقد عرفتك من خلال ابهى الاصدقاء ..
القدامى الجُدد
باكفتنى مهمة الاجتهاد
صديقنا السينمائى .. الكاتب الساخر
فى زمن الكوميديا السوداء
شيخنا عبدالقادر داوود
.
ليس لنا مطيه يا عزيزى وان طال القصيد
فتتساوى كل الامكنه .. خليج المكسيك
بحر الغزال
وشط العرب
.
خالص التحايا لك
حتى نلتقى
فنكون
.
.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: khatab)
|
Quote: لك الشموس .. دون رطوبه ..
وانت تعودين الى ثلاجة ..ايوا سيتى
التى اشعتم الدفئ فيها غناءا ً سودانيا ً اصيل ,
وصُحبة ماهر تاج السر |
يا خطاب
يا رفيق الروح
كانت ليلة لاتنسى
كانها من ليالى شهرزاد
او تزيد
محضورة طب
كان يومها حاضرا صديقنا المشترك عبدالواحد محمد خير الفنان التشكيلى
ذلكم الذى كان يوثق اغنيات مصطفى سيد احمد بالورود
فى بداية ظهور مصطفى
كان يصنع من الاغنيات لوحات مرسومة بالورد
يا له
وكنا فى قمة من دفئ اصابنا به ماهر تاج السر
غنينا وفرحنا وامسينا وصبحنا
ونحنا كما انحنا
نروى بغير لحنا
كان ماهر هو اللحن العذب ليلتها
والمغنى المطرب الذى اشجانافامتلانا بغنائه
وعزفه الذى تعرف
وملانا القاعة التى كانت لكنيسة ابت الا ان تستضيفنا لنحتفل
بماهر وغنائه العذب
اتمنيت لو كنت معانا
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: محمد كابيلا)
|
الاخ العزيز محمد كابيلا
تحية واحتراما
شاكرة لك على لطيف كلماتك
واهديك مقطعا من يومياتى
لغات تعيش ولغتنا تموت
فى الباص ، حيث العالم كله بين يديك ، شعوب الارض جميعا تجدها فى داخل الباص ، وحين تركب باصا للطلاب ، حيث للطلاب فى الجامعة بصات خاصة ومجانية تنقلهم من والى المدرسة ، تحس انك فى هيئة الامم المتحدة ، شعوبا وقبائل شتى ، تسمع الاطفال يتحدثون الى امهاتهم او ابائهم ، بلغتهم الام
سواء من باكستان او الهند او الصين اواليابان او افغانستان ، او اثيوبيا او الصومال ، او ارتيريا ، كلهم ينطقون بلسان امتهم ، الا اطفالنا ، الوحيدين بين الشعوب الذين لا يتحدثون لغة اهلهم ، كانها لعنةاو سبة
ووجدت نفس الامر فى انجلترا ، والامهات يبدين فرحة وغبطة كانهن اتين امرا خارقا حين يتحدث اطفالهن باللغة الانجليزية ، حتى اهل البلد انفسهم باتوا فى حمى لتعلم اللغات الاخرى وفتحوا لهذا الغرض فصولا اضافية لتعلم اللغات العربية والفارسية والاردو وغيرها من اللغات ، كل هذا لم يحفز ابناء جلدتى لتعليم الابناء لغتهم الحية فباتوا عجما
وهو امر محزن بل يدعو للاسف
كانت لدينا طفلة فى الفصل جدتها من البيرو وجدها من فرنسا ، وامها امريكية ، لذلك كانت الجدة تحضر كل ما ساقتها خطاها للمدرسة وتجلس الى تلك الحفيدة ، ولا تكلمها سوى بلغتها الاسبانية قط
سالتها عن السر فى تلك المحادثة فاجابت لان اختها البالغة الان اربعة اعوام تتحدث الفرنسية والاسبانية والانجليزية بطلاقة ، لابد للانسان ان تجرى فى عروقه لغة اهله الاصلية، ولانهم يسافرون الى فرنسا والبيرو لابد ان يكونوا ملمين بلغتهم الاصل من كل ناحية
قلت لنفسى ليت اهلنا من السودانيين الشماليين الذين يعيشون فى المنافى يدركون حكمتك حتى لا يعودوا عجما
عفوا عزيزى القارئ لابد من الاشادة بالسودانيين من الدينكا والنوير والشلك الحريصين كل الحرص على تعليم ابنائهم لغاتهم قراءة وكتابة وحوارا
بل ان النوير اوجدوا للغتهم حيزابين اللغات فى امريكا تحديدا فى مدينة ديمويند عاصمة ولاية ايوا
كنت هناك ذات مرة ولان لونى اسودا سالنى احد مواطنى المدينة من الامريكان
ـ من اين اصلا؟ حيث السؤال دائما من اى الولايات ؟
فاجبته اننى من السودان
بادرنى لحظتها بالسؤال
ـ اذن انتى من النوير
فسالته عن مكمن السر
فاجابنى ان السودانيين هنا يتحدثون بلغتهم الاصلية لغة النوير ويشكلون قطاعا كبيرا من السكان ، لذلك تعلمت منهم اللغة وبت اتحدثها
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: سلمى الشيخ سلامة)
|
الأستاذه/سلمى
تانى سلامات
حقيقه حالنا يحنن وهى ليست لعنه أو غيره
بقدرماهى استعدادنا للتصالح مع انفسنا فى الأول
وقبول الآخر المختلف فيما يتعلق بمحددات اللغه
من آداب وفنون وغيره حيث نجد فى السودان ان كل
المناهج التعليميه من الروضه للجامعه كلها تكرس
لمحو اللغات المحليه باعتبارها رطانه وليست
لغه كامله وهو يقود لا شعورياَللتنازل عن اللغات الأصليه
على مستوى الأفراد ويكون انعكاسه النفسى هو الخجل من
التحدث بها فى المجتمع فى حين ان كل علماء التربيه أكدوا
ان البدايه يجب ان يكون بلغة الطفل الأصليه ولكن عندنا
فى السودان الحال معكوس وهى مرارات لا أريد ان أقحم به
هذا البوست الرائع ...
كل الود
محمد كابيلا
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: محمد كابيلا)
|
Quote: حيث نجد فى السودان ان كل
المناهج التعليميه من الروضه للجامعه كلها تكرس
لمحو اللغات المحليه باعتبارها رطانه وليست
لغه كامله وهو يقود لا شعورياَللتنازل عن اللغات الأصليه
على مستوى الأفراد ويكون انعكاسه النفسى هو الخجل من
التحدث بها فى المجتمع فى حين ان كل علماء التربيه أكدوا
ان البدايه يجب ان يكون بلغة الطفل الأصليه ولكن عندنا
فى السودان الحال معكوس |
العزيز محمد كابيلا
فى مرة كنت اشتغل مع بعض الاصدقاء فى ترجمة حوار اجريناه مع العلامة
تعبان ليو ليونق
وكان يتحدث عن ضرورة تعلم اللغات المحلية جنبا الى جنب واللغة العربية
او اللغات الاخرى من انجليزية الى غيرها
وهو بالمناسبة ما زال يتحدث لغة اهله رغم انه عاش وكثيرا بعيدا عن موطنه
ما يهمنى هنا
ان اللغة الام هى التى يجب ان لاتضيع
وهى التى على الناطقين بها مهما كانوا فى اى موقع فى السودان عليهم
ان يعلموها لاطفالهم غض النظر عن المنهج
لانهم بذلك يحافظون على لغاتهم الام
واتصور اننا يجب ان ننتبه لامر كهذا
حتى لاتضيع اللغات الام بين متاريس المناهج
شكرا انك اثرت هذه النقطة لانه "حارقانى بصراحة "
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Adil Osman)
|
وما اقسى رحيله يا عادل
اينما كانت وجهة الرحيل
لكنها الاقسى حتى تاريخ هذه اللحظة
ما زلت على صعيد خاص ادارى دموعى اشفاقا على
بكيت كخنساء وواريته اضلعى ففقد مثله لا يدانى
لكنه خالد فينا
وهو كما قال حبة قمح تخضر ثانية
الهمنا الصبر يارب
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Adil Osman)
|
Quote:
هيوستن. مات فيها. فى احدى مستشفياتها شاعر. شاعر إنعطب قلبه الحار باسئلة الشعر والشعب والحرية والناس.
|
قمر ٌ على بعلبك
ودم ٌ
على بيروت
.
صديقى عادل عثمان .. نعم لقد مر صديقنا محموددرويش
من هنا !!
جئئتها هذى المدينه
وقلبى مفتوح ..
كما ارجو الخروج منها
بذات الحُب
لك خالص الود
حتى نلتقى ..
.
.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: سلمى الشيخ سلامة)
|
...
..
.
(يا بوكس الغراااام)..
بوكس (الصفيح)..من زمن السبيعنيات..
و لازال مناضلا..
وجد ضالته(اي البوكس)..عندالطبيب د\منعم..(الميكانيكي)..
وصاحب ورشة الاناتيك و العربات (الهكر)..
..
بقيادة كبير الشماسة و الفرد..الشماسي (خطاب).
و الكمساري (سلمي)...
اصر البورداب(الشماسة)..علي ركوب البوكس..وبداية الرحلة الي قالفستون..
...
..
.
(أمبدة نفر......امبدة ,,امبدة)
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: سلمى الشيخ سلامة)
|
بوابة اللون .. تفكيك البناء
......
تاجوح :- مولاي ..!
..مليكي .. محل ..لل ا ق ..!
محلق :- نعم .!
: نعم يا تاجى .!
تاجوج:- محلق انت ..!
وللا ..! هنا ..!؟
محلق :- أنا يا تاجى .. بين بين
تاجوج:-تبقى محلق .. أستأذن أنا ...
محلق : لا لا ما تمشى ..
:عايزك أنا ..
تاجوج:- ما لك يا مليكى .!!
محلق :- عايز أتكلم يا تاجى ..
تاجوج:- قول يا مليكى أحكى ..كيف بين بين .!!
محلق :- بين القاعد يا تاجى و الماش .. الخارج يا حبيبه والخاش
تاجوج:-محلللق .!؟
محلق :-موتد ..
: وتيد تاكا أحيان , مرات دافر
: نافض
: نفضان قاش ..
تاجوج:-أحكى ,فضفض يا محلق قول ..!
محلق :- اتسمح بيك يا حبيبتى القول ..
:- تشرق بيك الأصباح ..
:اقشر بيك , يا حبيبتى اللون
تاجوج:-مجنون يا مليكى .. مجنون
محلق :-مفتون بيك .. يا تاجى و مسكون
تاجوج:-ماهن دى أنا ..
: ما معاك
محلق :- .. معاى وبس
شعاع الشمس لو إِفصِحْ
كان قال ,
طُرق
التبيان ,
درجات الهَمْس
عصب الأحيان ,
أحوال النفسْ ..
آه لو تعرِفى كيف .!
قمرات الأيام تترصّ عِقِد
تتجمّل بيك ..
أنهار الكون طِرقات لافحاهن ... ولافحاك
وانا بي نجواك دمّى بدندن ,
لو تعرفى كيف كم عصفور برخوا اضانهم
وانتى بتحكى .!!
كم ثمرة تدق الدلجة .!
لمّن
خلخالك
فى الشجرة يرن
وكم أبنوسة ..
لى نخلة تحن !!
يجرّوا ظلالهم ضحوية
نخلة للبن
تقلى
أبنوسة ..
تدقّو ..
وهاك يا ونسة
مع الفنجان و دورانُه ..
هاك يا حكيان ،
العجب يا تاج لامن تضحكى .. داك ما مولد ..
ومن .. نُص الخجلة ..
قمتى ضحكتى، ضحكة صغيرة، صغيرة كده
تاجوج:- ..
: بس يا محلق .. ما دايرة معاك ..
هسى خجلت ..
محلق :- لأ .. ما شنو ..!؟
تبلدى عديل الجاي كاسح،
وكدّارى كمان
سواكن ..
سنكات ..
الجبل البى جاي ..
بى هناك الوادى ..
لي أيّ مكان لازم قال ..
: لازم إوصل
: واشيل و يطلِّع فى القرب المليانه ,
: متشعبط فوق جنباته ندى
.. عليهو الخريف
.. عليهو الحفاير , اشيل ويطلِّع فى القرب المليانه ,
اما الشفع ..
فهاك يا مصصان .. ما القونقو* لذيذ
واماتهم يصدحوا بى صوت طربان واحاحو , مسالمين .!
: بس يا حلوين ..
: خلوهو نخلطو ليكم ..
: خلوهو نسويهو .. شربات
تاجوج :تتجازى ..
.. اجازى محنك .. يا محلق !!
محلق : مغالطانى ..!
..أضحكى هسي ..
.....
ما تجربى مالك .!!
..يللا ..
تاجوج : ...
محلق : .....طيب واحده .!
تاجوج: ...
محلق : سغيره كده .!
.. شايفه .!؟
..أهو النحل اتلملم و بى يون .. طبعا جنو وجن الحركه دي .! تبدى
الضحكه وما تتم ,
فحيقوم السعنا الاتنين
لو ما غردتى .!
( .. تنفجر تاجوج ضاحكه ..)
.. الله الله
.. نهر النيل بجلالة قدرو ..!! ؟
.. النيل شخصيا معقول .!!
أكبر يا ابو الأنهار .. ياخ انت مليون سنه يجى عمرك .!
كدي شاور المسيسيبى .!!
تاجوج : مليون مليون .. لسه سغير و جاهل
.. مش اصغر نهر شرف للكون .!
حرقت روحى يا محلق
ما لو النيل ؟
محلق : قال أللا اغير مجراو .!!
أهاا .!!
لا القصه ..كبرت خالص .!
تاجوج: فى شنو كمان تانى .!؟
محلق : حوض بارا .. بيهناك قام اتحجز .!
قال..
: كمية المويه الفيهو .!!
: تسقى دوّل .. أعذب مويه فى العالم .!
كيف أولادو اشربو مالح .؟؟
: و من عندو أكانت المويه تسافربالفنطاز
حدها لندن
تتحول فى ردهات القصر الملكى
لى كوب بارد وتتوسل
: شربا شربا ..
: يا مولاتى ,
: شربا شربا ..
: شر ر . . . . .
: شربا . . .
: ش
: ...
: .
تاجوج: أطلع منها يا بوى
..حبيبى أنا قدامك , عاين أصحى ..
.. محلق ......
.. محلـ ..ا..ا...ق
محلق : عفوا يا تاجى
الظاهر انى سرحت شويه
تاجوج: ما شويه
.. ما شويه , ده الشط الخايفه عليك منو .!
محلق : أنا بي خير يا تاج ما تخافى علي ,
أنا غواص .. غواص جدا
.. وبعرف من القاع أقَلِِع
جالب ليك من عمقه معاى
.. ياقوت ولالئ ..
تاجوج: خايفاك تفوت
بى وشك تمشى
محلق : أنا فعلا ماش
بس مش منك .. ليك
يا تاج
انتى مسارى ,
مدارى الدايم أبعادك ..
عينيك ,
عنوانى الثابت
تاجوج: محلق أنا
.. أنا خايفه !!!
محلق : انتى الطمأنه للناس ,
مفتاحه المتاح للكل ,
انتى الضل .. الهاش الباش
للغشا و الطاش ,
الضل العازم
: عليهو النسيم
: عليهو الطراوه ,
تنجموا حدانا شويتين من تعب الرحله
تاجوج: ... تبقى فعلا يا محلق فايت , لو ما كنت أساسا فُت
... آه لو كنت .. بس لو أعرف كيف تم ..
ما يجرى الان
كيف كان .!!
محلق : انا احكيلك يا تاجى ..
تاجى النصبنى ملك .. علي عالم
مأهول بالأنغام
مشحون بالمعنى ,
سابحه فى غلافه الأحلام .. بدت المعرفه بيك
تاجوج: .. بي انا .!
محلق : نعم يا تاجى ,
وانأ بكتشف فيك على ارض الواقع
بديت اتحسس الأشياء من حولى البلد ..
العالم
و بدت الغنيه
مقطع يودى لي مقطع
نمه تفضى لى نمه ,
و بدت الرحله للمعنى الكامن
فى عمقك .. بدت الرحله
تاجوج: محلق .!
محلق : نعم يا تاجهم , بلد بي حالهُ وأحواله ُ بدى اتفتح ,
أرضه ُ .. سماه ُ
بحرهُ نهر وانسان
حجرو و طير ,
تاريخه ُ الناصع والكالح ..
ولما اتكشف كل المستور , كنت مرقت
منك ليهو .. أو كلفتينى بالأحرى بي ..
: زي ما حبيتك احبه ُ..
: زيما غنيتك أغني ..
: أعلن فى الناس جهراً ,
: حُُبه ُ
: الحق فيهو
: لازم يسود ,
: انسانهُ الطيب لازم يرجع أروع
: ارجع للكون أروع ما يكون ..
: الحق ابين ما اندفن
: كل الشوارع درب واحد
: العمر يوم
: لكنه ُ ممتد
:واللحظه نٍِِِصل .. تجهد تسنُه
: العمر كُلُه ..
: افتح مسامك وادخلك
تاجوج: تبقى مشيت يا محلق
فُتَ
قاصد وين .. يابوي هسه .!
محلق :...
محل دارونى الناس اِلقوني
أهلى الكُل أحبابى
أنا كل بيوت الفُقرا
بيوتى
كل الحلال منى تجيب
ليّ تودي
يوم هاشم يوم محجوب
يوم حميد يوم قاسم
يوم يحيى يوم قدال
يوم الصادق يوم عاطف
أزهرى يوم
عبد القاد ر .. يوم بشرى
و يوم عثمان
ولو ما لقيتينى و غفاري
ابوذر
حتما
تلقينى مع الجيران
بيوتى كتيره
وفى كل يوم بتطل ورده
قصيده تقيف وسط الصحرى , للماره سبيل
قصيده تنظم للحركه , حين الفوضى
قصيده مناره
قصيده دليل ..
قصايد تجرد للحاصل و تعبي الحاضر لي بكره
تاجوج: مشيت يا بوي
مشيت يا مليكى .. مشيت ياحبيب .!
دربك أخضر ..
محلق :عارفاو دورك يا تاجى وتاج بلدك ! عارفاو !!
تاجوج:عارفاو يا محلق عارفاو...
محلق : كل جبال الأرض جبالك
: مره .. النوبه .. رجاف , الفاو
: كل الوديان
: كل الصحرى
تاجوج: الانسان يا محلق .. عافارفاهو كلامك وحافظاو
: الانسان فى كل مكان
محلق : ارتاح البال
.. قلبى يا حبيبه اتطمن .. السعد ه مسارك
.. موطاك الريحان , الفُل حارسِك
يغشاك صباحا ,, الأطفال والنحل سوى
, بارين البوص .. للخصله تنقِط , واللوح مفرود
اِكتبو نقره .. تمليهم
العسل الأول لليوم
العسل التانى , شعاع بُكره
أِكتبو نبره , جسما وفكره ..
اِكتبو نبره
جسما
و فكره
تاجوج:محلق يا ملي .. كى .. مح ل ق
محلق : جسما ً
: و فك ره .. ..
.........
خطاب حسن احمد
(عدل بواسطة Hawari Nimir on 01-07-2009, 07:56 AM)
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: سلمى الشيخ سلامة)
|
...
..
.يا بوكس الغرااااااام و الصحبة و اللمة و الناس الحلوة..
خطاب: والله يا عادل ما تدفع..(حرم) ما تدفع
هواري:يا اخوانا ..يلا ادونا حقنا..اطلعو لينا بالفكة..خلو اللولوة و الحركات دي..
عادل بلير:اسمع يا حبة انا(طالب)..نص القيمة بس!!
سلمي:هووووووي انا حاجزة المقعد القدام
..
.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Hawari Nimir)
|
هسى عليك الله يا هوارى البوكس دا فيهو طريقة ؟
ياخ دا فرامات ما يشتغل
اولن شى لونو ما تعرفو احمر ولا بنى
تانى شى كان جيت جمبو ساكت
دى معناها تسمم جاهز
عبد المنعم زاتو ما يقدر يديك علاج
وحكمة الله ماشى ومدور زى الورد
ولله فى خلقه شؤون
ولمنعم فى بوكسيه مفاهيم
غايتو يا نعوم بقيت دكتور حديد
هسى كان ليلى مراد جاتك وقالت دايرة تغنى ليك تقول شنو ياربى ؟
مؤكد حتقول
دكتور حديد وافهم فى الحديد
انا سبت البشر
حلوة عجبتنى
يعجبك الزين يا العديل
الفنادك كيف؟جبتها من سوق الملجة بتاعكم ؟
شى عجيب فى تكساس
يا فريع ياسمين
انشا الله نتلاقى تانى الف مرة كل مرة
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: الطيب شيقوق)
|
الصديق الطيب
يا ود شيقوق
اهديك والقراء بعض ما كتبته فى هذه الرحلة
دمار شامل
الرياح كانت تحملنا على اكتافها فنحاول الى التشبث بالارض لان الريح كانت فى اعلى معدلاتها ، صباح من صباحات تكساس الباردة ، خليج المكسيك يتبدى لنا هادرا على غير عادته فى مثل هذه الاوقات من العام
سواح واجانب يحملون الكاميرات حتى لا تفوتهم اسراب الطيور المتجولة على سطح الماء خاصة طيور من التى نطلق عليها "ابو مركوب "
كان المكان "خليج جليفستون"على الخليج المكسيكى وكان النهار غائما وباردا ، خرجنا نبتغى مشاهد جديدة
فى العام الماضى كان اعصارا ضخما قد ضرب هذه المدينة الهادئة ، فكنا نقف على اطلال من اطلالها التى صارعت الموج
فنادق على البحر تشهدها فتقول ما اجملها ، لكنها خالية وخاوية اثر الاعصار ، فيما كانت بعض المبانى تقف متكاملة دون ان يصيبها ما اصاب غيرها
اماكن بيع السمك كلها كانت تحت التجديد موضوع عليها عبارة
"نعم ، فعلناها ، الم نقل ان ذلك ممكنا " نفس عبارات كانت تستخدم فى الانتخابات الاخيرة على لسان المرشح الديمقراطى الفائز باراك اوباما ، رغم انه لم يصوت له اهل تكساس لمبادئهم الجمهورية ، لكن العبارات سرت مسرى اليومى
باتجاه البحر وعميقا انت ترى المراكب كمن عبث بها عابث ، تبدو شظايا وبالعشرات ، وكذا البيوت ، مع ذلك تمضى الحياة
مطاعم تستقبل الناس وفنادق تعيد تاهيل نفسها وشوارع تضج بالحياة
فى مطعم مكسيكى يقوم فى قلب سوق اشبه بسوق "ليبيا" كل الباعة فيه من المكسيك ، رواكيب مظللة بالاجولة ومعروضات يقل ثمنها كلما اوغلت داخلا ، فى ذلك المطعم تناولنا وجبة العشا او الغداء لايهم ، المهم اننا اكلنا ، وكان الاكل مبهرا بالبهارات التى نستخدمها عادة ، له نكهة محلات "سوق الناقة "
بعد ذلك توجهنا لمحلات اشبه ما تكون سودانية لما فيها من تشابه فى المعروضات "فنادك كبيرة كالتى نستخدمها ، بهارات طازجة ، وـ ليف الحمام ـ والعرديب ، الذى يطلقون عليه اسم ـ تمر هندى ـ
خرجنا من ذلك السوق باتجاه اخر ، لكنه سوق حين تقف الى داخله تظن انك فى سوق من اسواق نيالا ، او سوق ليبيا حتى ان احد المرافقين حين التقط لنا صورا ضحك قائلا
ـ ما اظن فى زول حيصدق انه دا سوق فى امريكا
وبالفعل كنا نقف الى جوار راكوبة مظللة بالاجولة وخلفيتنا كانت لسيارة تشبه ما يمتلكه العم ابراهيم الحلبى فى ورشته تلك
وعلى ذكر العربات القديمة ، صاحب الدعوة كان من الاطباء السودانيين النابهين لكنه هنا غيّر تخصصه تماما الى "مكيانيكى" يقوم بتصليح العربات خاصة الاثرية منها ويعيش من عائدها ، فكان كلما مررنا بعربات حملها التيار الى عمق البحر صاح
ـ هسى دى بتجيب ليها مبلغ محترم
ترك الطب كما قلت وبات احد باعة القطع الاثرية لعربات انتهت مدة صلاحيتها او انتهى عصرها حتى ، لكنه يجيب طلب الزبائن من مختلف انحاء العالم عبر النت ، وياله من طبيب تحول من علاج البشر الى علاج "الحديد" لانه كما قال
ـ اكثر ربحا من الطب !
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: حنين للبلد)
|
بت الشيخ ازيك وكل سة وانتي طيبة
وان شاء الله بتك بتوصل ليك سلامي؟
طبعا البوست دا مما نزل مستمتع وبجي اتلصص وامرق
وكـ حبوبة كدا بجي بستمتع بي الحكي بتاعك وذاكرتك الخرافية دي
ربنا يخليك ويديك العافية بس
كنت متابع معاك رحلة لندن بس ماكملتي الحكي
الزول الاسمو خطاب دا غايتو الله يديهو العافية بس
والله مشتهنكم الاتنين تجونا هنا وتمتعونا
تحياتي ليكم وكل سنة وانتو طيبين
ود ومحبة ليكم
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: عبدالله وداعه الامين)
|
الأستاذ خطّاب ..
أنت المُخاطب ..
أرجو أن ...
أرسل إليك هذا الخِطاب ..
مع كل الأحباب ..
مع ناس سلمى .. ويا حليل اللمّة ..
مع ناس هويدا .. والوالدة بثينة ..
وناس عادل وعماد .. و .. أصحاب الكرم والزاد ..
مع ناس عادل بلير .. ديمة نذكرو بالخير ..
مع ناس هوارى ..أكان قاعد ولا جارى ..
مع ناس جمال .. وكمان جمال ...كلهم جمال فى جمال ..
مع ناس حسام ... أها ذكرنى بسيف الضرغام ..
مع ناس دكتور عبد المنعم عجبانى ..
لا تقول لىّ كانى ولا مانى ..
وناس محمد مبارك .. الكاتب المبارك ..
بالخير ديمة مشارك ..
وياربى تانى منو ..
أى .. ناس كاليفرنيا .. الأستاذ عبد الرازق .. و ..
معليش .. بعض مرات الاسم بطير من الراس ..
لو كان أصلو فى راس ..
ما خلاص الفاس وقع فى الراس ..
أها .. بس خلااااااااااااااااااااااااااااص ..
والى لقاء جديد ..
مع فراغ جديد ..
عمكم العجوز ..
أرنست
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: عبدالله وداعه الامين)
|
Quote: وكـ حبوبة كدا بجي بستمتع بي الحكي بتاعك وذاكرتك الخرافية دي
ربنا يخليك ويديك العافية بس
كنت متابع معاك رحلة لندن بس ماكملتي الحكي |
اولا شى يا عبد الله ود امى يوم واحد ما كلمتنى بتى
ولا بالغلط انك بتسال على
يسال منك الخير يا العديل
وتانى حاجة حكاية لندن دى دايرا ليها بوست براها
لكن عشان خاطرك
بنديك حبة منها
الحركة شمال
منذ السبعينات فى السودان لم اشهد حركة شمال قط ، الا فى الافلام المصورة فى كينبا او فى تنزانيا ، او استراليا
المهم اننى كنت اتمشى ذاك العصر فى صحبة لطيفة وشقيقة اسيا
بين الشوارع على امل ان اتعرف على المدينة ، مدينة ساكنة ،
بل الاكثر سكونا فى تلك البقعة التى كانت تسكن فيها اسيا ،
ربما لان طبيعة السكان كانت هى العنصر الاصيل ، لكن ،
حين تدخل الى وسط المدينة فالامر مختلف تماما ،
تتمنى ان لاتعود الى تلك الاماكن الصامتة
خرجت ولم اكن اكاد اتذكر ان الحركة شمال ، حين بدات فى المشى ، جوبهت ان العربات تاتى من اتجاه معاكس للاتجاه المفروض بالنسبة لى عادة ، بت التصق بمن معى خشية ان اصطدم بعربة ماكرة تحل من ناحية غير متوقعة
مضت الرحلة بسلام
وكان فى نيتى ان اركب الباص(ابو دورين ) للدنيا والزمان
ضيفتى كانت الصديقة ماجدةعوض خوجلى هذه المرة
استضافتنى فى (كنتين ) والكنتين كلمة تعنى المحل الصغير فى انجلترا ، ولقريب كنا فى السودان نستخدم هذه الكلمة فى تعريف الدكان ، حيث جاءت مع الانجليز اولا واليمانية فيما بعد
دخلنا الى الكنتين وجلسنا فى طاولة صغيرة ، المحل نفسه يتسم بالصغر
والاريحية حيث الاسر تتراص واطفالها ، المحل مكتظ بالاجانب ، معظم الجلوس من الصوماليين ، رجالا فقط ، لم يكن بينهم سيدة او حتى طفل ، يبدو ان الحديث كان تجاريا او سياسيا لان الاوراق كانت تجثو الى سطح الطاولة فى انين واضح من ثقل الارقام عليها او الاحرف ، لا اعرف
طوال الجلسة كان ثمة من يراقب حضورى ، وبه لهفة ان يكلمنى ، وانتهز فرصة قيام صديقتى لامر ما ليسالنى بانجليزية رصينة
ـ هل انتى صومالية ؟
فاجبته بالنفى
فلم يتردد من ابداء رغبته ان نتعارف
فاجبته اننى
ـ ضيفة ها هنا ، ولم اكمل الحوار حيث عادت صديقتى وخرج هو كالحا ومبتئسا
قلت لصديقتى ما كان من امرالصومالى ضحكت وقالت
ـ انتى فعلا بتشبهى الصوماليات
قلت لها عليكى ان تقولى (فلعا ) لان الاخوة الصوماليين ينطقونها هكذا
فلقد كان المسؤول الاجتماعى الذى رصدته لنا المنظمة فى هيوستن فى تكساس ، يقول ان سالناها (فلعا ) كذا وكذا ، و يقول (اليوم انا تبعان ) اى تعبان ، او كناية عن العطش كان يقول (عشطان ) لكنه كان من الناس القلائل الذين رايتهم يتفانون فى عملهم ، وازعم انهم لو كان لديهم بعض الهمة تجاه بلادهم لما حدث فيها ماحدث ، مثلهم مثلنا ، نعمل بجد فى المهاجر وننسى اوطاننا حين نحل فيها وكانها امر لا يعنينا
خرجنا من ذلك الكنتين باتجاه محل مصرى لنتعشى فيه فلافلا وفولا وسلطة بابا غنوج ، وكان لابد ان نمتطى صهوة الباص اب دورين ، ولكم كان مدهشا بالنسبة لى ، حيث مقاعده مريحة وسائقه يدير الباص من اليمين فبدا لى كأن امرا عجيبا يحدث ، حيث فى الولايات المتحدة العربة الوحيدة ذات عجلة القيادة من اليمين هى (عربية) البريد ، وحين تجد سيارة (دركسونها ) يمين فتاكد انها سيارة (انتيكه) من الخمسينات او تزيد
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: حنين للبلد)
|
يا حنين اخيتى الحبيبة
يعجبك الخير بت امى
لكن وحاتك يالغالية دا بوكسى
الله يعلم ماشى كيف؟
وحكمة الله بمشى بدون دفرة
شفتى كيف؟
وكان شفتى سيد البوكس متوعجب بيهو لياتو درجة تقولى
"همر "
والنحدسك ناس هيوستن مفلهمين فلهمة
بالله الهمر دى ماشه فى الشارع زى الرقشات فى شوارع الخرطوم
مقدرة والله
اقعدى فى العافية
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: سلمى الشيخ سلامة)
|
ونقول فوووق ....
..
.
ولسه الصور في الطريق
سوق الناقة فرع هيوستن....
حيث الاكل الطاعم... السعر الرخيص.....
سوق الهبابات..والفنادك..والنبق..العرديب..وليف الحمام
والتبش بالشطة(ده سوقنا في هيوستن)...(سوق المكاسيك)..
والخبير د\منعم....
....
......
..
الاسبوع الجاي يا سلمي ماشين نجيب (مفرمة اللحمة)اليدوية
وكم مفراكة كدة..
لو في اي طلبات ,,,قولي الووووو
.
.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: عبد المنعم ابراهيم الحاج)
|
( أعطاكم الإله نورسا ووهبكم البحر )
واهداك اللاّلئ
يواقيتها ..
يا غواص
.
جاييك بي مهله
العباديه , الفلاتيه , منى الخير
وفاطنه الحاج
.
جاييك بي شغبه وبت مسيمس
.
عجبنى التعليق .. عشان كده ..
خربت الصف !!
يا شاعر
كنا نحتاجك هنا
كما نحتاجك هُناك
.
سلامى للعروسات
وام العون
بت قسِم
.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Osman Musa)
|
مدني الجمال
ماما بثينة
اخوي عادل عبد الرحمن
اختي هويدة
اول معرض ورد وزهور
كان في مدني
اول معرض كتاب عندكم فكرة جمالية
واصبوحتكم الشعرية
ذادنا في مملكة الجمال
اخوي حطاب ( تووشي )
اشتاق اليك عمرك مديد
وعامك سعيد
وكيف الحال ياشاعرنا
فكر هذا العام تزورنا
وينك لم تزورنا في بيتك سودانوي
كبرنا ليك الخط وغيرنا ليك الصفخات
زورنا وادعوا كل الجميلين
سلمى الجمال كلو راجعي فيروز
ونتقابل كلنا ياحلوين في مدني الجمال
هواري المعزة والود
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: محمد سنى دفع الله)
|
ده ياهو ال GULF OF MEXICO
ياهو ؟
ها ناس ها
ده بحر الزول يقيف جمبو ؟
لاحدى ما يجيكم هوروكين طاير .
مرة مرة الارصاد بجلى .
يعنى لو بقيت كارل لويس ما عندك حل .
يازول ابعد بعيد .
يا عادل انت قايل نفسك قدام بيت جدك بخيت ؟
يازول داك النيل .. حليل النيل .
هناك اكعب شىء يطلع ليك تمساح عجوز جعان كحيان
زهجان من النيل ومن الحكومة والوضع يهرشك ويقع الموج راجع .
لكن هنا عليك امان الله مافى كلو كلو نفس .
الهوروكين ده ما منو مفر .
تحياتى
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: محمد سنى دفع الله)
|
Quote: الصور دي كان في داعي ليها وقت بردانيين قدر ده
تمشوا تتصوروا قدام البحر
نحن هنا بردنا |
سنى يا جميل
ازيك وكل سنه وانت طيب
راجعت الايميل وماقدرت ادخل زى ما قال ليك منعمشوف
تاكلين بابكم بى عود "ماكن "
ماكن بالفلورايد كمان
نجى لحكاية البرد والله ما طالبنى حليفة
البرد عندنا ما فى تكساس
اكان شفت ياالسنى
هنا كان نخرتك الله يكرم القارئين سالت
ما بتلحق تعمل اى حاجة لانها بتكون ن ش ف ت
والدنيا دى صانة صنة قبل الزلزال
تعرفا مش ؟
اقول ياالسنى ؟
حاقول
يلا كان سنة 1993 فى القاهرة قام جا زلزال
والسنى وناس عمارة النصر كلهم فرتقوا
خلونى براى فى العمارة
الخلق دى كلها نايمة فى الشارع
الا كان انتى يا بت الشيخ
انتهى الزلزال وتوابعه
اول ما تمينا لينا كم يوم
السنى قال ماشى السودان
ـ فى شنو ؟
ـ الوالدة عيانة شوية
نكتة مش ؟
ونكتة دى بقولا يوسف الصغيرونى فى برنامج الاطفال
فى الاذاعة
المهم السنى قام سافر تاه
اطر ف ما حدث فى الزلزال من اقوال
انه الاستاذ محمد الامين كان ايامها فى القاهرة
لمن نزل السلالم من بيته الكان خمسة طوابق
سال الناس
ـ فى شنو ؟
قالو ليهو فى زلزال
ضحك وقال
ـ والله كتر خير الزلزال الواحد عرف سرعته كم فى الدقيقة
يا السنى كانت ايام جميلة شديد
وطبعا بعد الزلزال بقى فى ناس كتار اسمهم ريختر
لانهم كانوا طوالى زى ما بقول صديقنا جمال حسن سعيد محمرين للسقف
طابت ايامك يا السنى الحبيب اخى الذى لم تلده امى
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Hawari Nimir)
|
Quote: الاسبوع الجاي يا سلمي ماشين نجيب (مفرمة اللحمة)اليدوية
وكم مفراكة كدة..
لو في اي طلبات ,,,قولي الووووو
. |
اتمنيت لو كنت معاكم
سلامات للجميع
تحياتى لدكتور عبد المنعم
والمصور الفنان حسام
والمصوراتى عادل بلير
وود الخليفة
وخطاب حسن احمد
وكل الناس السمحة
حداكم
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: هاشم الحسن)
|
هاشم الحسن
انى امنت بالله
كانت اخر لحظة شهدتك فيها يوم افترقنا على امل اللقاء
كان حفلا ما
وكان رقصا وشجى ما
شجنى الحزن الى ضفاف متعددة
وامتلات اوردتى بالحزن اليفيض
وملات احشاء الورق بكلام عنك
لكن الورق ما زال فى جيب البالطو الاسود
الذى ما لبسته منذ ذاك الحين
كم سنوات مرت ؟
كم كتبت اليك ان تكتب
وتكلمت معك فى التلفون من الدوحة
لكنك قررت ان تمشى عن دنيتى
فسكت عن كلام مباح وغير مباح
واترجيتك ان تاتى فى موجة عابرة لراديو ما
لكنك لم تات يا صديقى
وحين كان الوطن مخصوما منا جميعا
جئت حاملا اياه
مخصوم منك ومنى
مخصوم مننا كم وطن ياصديقى ؟
لك الامتنان ان نزلت الينا من علياء اخذتك عنا
وحطت بك الى حيث الوطن المخصوم من كل منا
لك التقدير وما تطول غيابك
عنوانى فى مكان ما من هذا البوست
اتمنى ان نلتقى
محبتى
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: سلمى الشيخ سلامة)
|
الأستاذة العزيزية سلمى الشيخ سلامة،
تحياتي وكل عام وأنتم بخير،
كم كنت أتمنى أن أتشرف بلقائك مع باقي الأخوة في تلك
الليلة الشعرية المميزة مع الأخ الشاعر خطاب..
ولكن نظرا لإرتباطي المسبق بمناسبة أخرى في نفس اليوم
والوقت لم أتمكن من تلبية الدعوة والحضور لمنزل أخونا
المضياف الشاعر عادل عبدالرحمن.
نأمل أن تعودي مرة أخرى الى هيوستن في المستقبل القريب
وتتكرر مثل هذه اللقاءات لنلتقي ونسعد بصحبتكم وتواصلكم
ونستمع لكلماتكم وأشعاركم وروعة معانيها.
ومخير الله خلوك تركبي بوكسي لا لون ولا شكل له.
إحتراماتي وتقديري.
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: عزيز عيسى)
|
ياعزيز العزيز
تعرف
كلمنى هشام هبانى بزعلتك انك ما لاقيتنا
وماكنت عارف ياريت كنت عارف
ما كنت عارفة انك فى تكساس
الا لمن كلمنى هشام قبل كم يوم
وتانى لمن قريت مداخلتك
ولا يهمك نتلاقى تانى كان الله هون
لكن بينى بينك تكساس بالنسبة لى
صعبة جد
لانها فيها رطوبة تضرس العضام
رجعت لمدة يومين كنت اعانى من عدم المقدرة على الحركة
شفت كيف؟
لانه الجسم كان متورم كله
ودا كان سبب رئيسى خلانى امشى منها
لكن بنتلاقى ود امى كان الله هون
تحياتى حتى نلتقى
| |
|
|
|
|
|
|
|
|
 Re: مخصوم منك وطن يا خطاب حسن احمد ـ صور (Re: سلمى الشيخ سلامة)
|
سيدتي في رُبى إبداع القص والمسرح :
الأستاذة سلمى الشيخ سلامة
تحيات زاكيات
وأعياد طيبات
حريٌ بنا تهنُئتك بتقديم إبداع الذين قدّموا لوطنهم أعمالاً إبداعية ، وشاهدنا جميعاً في زمن من الأزمان كيف كانوا ولمن كانوا ينتمون .
إن الكثيرين من مُبدعي معهد الموسيقى والمسرح قد أفادوا كثيراً من لُحمة الموسيقى بالمسرح . الكل يوقد سراجه من زيت الآخر ، فنمت أجيالٌ قدمت الكثير وببطء وروية ، وانتزعوا علاقتهم بالمُتلقين عُنوة حتى جاء الزمن الذي بدأنا نسمع أن الغناء حرام والتمثيل أشد حُرمة ، وعلى المرأة أن تلبس وترتدي وفق أهواء أناس لم يقرءوا التاريخ ، بل ولم يعرفوا الفرق بين النقل والتفكير ، بين النقل والإتباع .. فصرنا نتجادل على الصغائر ، وتفاصيل التفاصيل ونسأل عن حُرمتها من عدمه . لم أزل أذكر سهرة في تلفزيون السودان منذ زمنٍ غابر في التسعينات استضافوا الشيخ القرضاوي ويسأله مقدم الحلقة ليُفتي :
( هل يصح للممثل أن يُمثل " أبو جهل " مرة ، ثم يمثل "دور صحابي" في مسلسل لا حِق ؟! )
!!!!!!!!!!!!!!
من هذه الدُنيا كان يتعين على المتسلطين أن يطرُدوا المبدعين ... ومنهم :
الشاعر : خطاب حسن أحمد وغيره وهم كُثر .
شاعر هو ومسرحي من طراز مُميز بأعماله التي شاهدنا ، وبشعره الذي تمكنا من قراءته ومن شعره الغنائي وقد " فاح طيب رياه على ميتَ الهَوى أحياه .."
فكيف لا تستمتعون بتلك الملكة وهي تبحث في الشباب الغض ...عن مكان . عند التجربة يعرف هؤلاء الذين يُنفذون الأعمال أن المسرح عالم متين البناء ، وليس عالم ساحرٌ فحسب .
التحية له ولكل من تنفس روح الوطن من خلال إبداعه ...
قريب منا ..الدكتور عز الدين هلالي ، و الأستاذة منى الطاهر ينامون في العسل ...
شغلتهم دُنيانا ، لكن الدكتور يقود بيسر سكرتارية " منتدى السودان الفكري " في المدينة التي نعيش فيها ، وأساعده مع بعض الأصدقاء لإقامة محاضرة كل أسبوع : أقل من محاضرة أكاديمية و أعلى من " ونسة " لتكون المسافة بين القامات بتنوعها يسيرة .
لك التحية .. أستاذة سلمي ، والتحية للأستاذ / خطاب حسن أحمد وللشباب الذين نفذوا الأعمال .
عبد الله الشقليني
09/01/09
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: عبدالله الشقليني)
|
| Quote: إن الكثيرين من مُبدعي معهد الموسيقى والمسرح قد أفادوا كثيراً من لُحمة الموسيقى بالمسرح . الكل يوقد سراجه من زيت الآخر ، فنمت أجيالٌ قدمت الكثير وببطء وروية ، وانتزعوا علاقتهم بالمُتلقين عُنوة |
العزيز الغالى عبد الله الشقلينى
تحية واحتراما
كل ماذكرته كامل الصحة
فلقد اضاف الينا المعهد وكثيرا
وما زلنا ننهل من روافد سقانا اياها
بل انه اسهم الى حد كبير وخلال عمره القصير قياسا
بمؤسسات مشابهة له
فى رفد حياتنا بالفنانين من كل جانب
يكفى ان تجد اسماء تلمع ما تزال
رغم انها غابت عن الساحة لزمان يمتد لعقدين
وهنا لابد ان اذكر بعض الاستاذات والاساتذة السنى دفع الله ، خطاب حسن احمد ، تماضر شيخ الدين
يوسف الموصلى، مريم محمد الطيب ، عفاف الصادق حمد النيل ، السر السيد ، فيصل سعد
والكثيرين من اعضاء وعضوات هذا المنبر تحديدا
وللمعهد فضل لاينسى فى كثير مجالات
خاصة المسرح والشعر والغناء والقصة والرواية وكل الوان الطيف الادبى والفنى
احيانا احس بالعجز ، والعن الزمان
لكنها دورة الحياة يا صديقى
مع كل ذلك يظل المعهد احد روافدنا التى لن تنضب قط
فهى كما اخرجت خطاب حسن احمد وغيره الكثير قادرة على اخراج العشرات
قادة للراى والفكر والمعرفة فى السودان وخارجه
يكفينى فخرا اننى احد خريجاته
لك التجلة ياصديقى وعاطر تحاياى للصديقة منى والصديق عزالدين هلالى
ولاخى وصديقى عبد الجبار عبدالله
وكل خريج من المعهد طرفكم
وهى دعوة منا هنا
تعالوا نحتفل بالعيد الاربعين للمعهد
من كل فج تعالوا
نتنادى لنتبصر فى كيفية رد جميل المعهد لكل واحد منا
اتمنى ان تجد دعوتنا الاهتمام من الخريجين فى كل انحاء العالم
موسيقيين ودراميين
كل عام والمعهد بخير
رغم ان اسمه تحول الى كلية لكنا ما نزال نره المعهد العالى للموسيقى والمسرح
ولا ينطلق لسان اى واحد منا سوى بهذا الاسم
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: عبدالله الشقليني)
|
سلمى انتي وين ياخ!!!!! سلام ليك ولي خطاب
ولكل جميل في الغربة
كنت في السودان خمسين يوم جيت امس
ما قريت ولا جريدة ولا فتحت منبر
قريت عيون الناس واتكلمت معاهن
ومع حميد مرتين تلاتة ومع محجوب
شريف مرة واحدة لكين طويلة وكان
معاي شلة من الشباب الحالمين
بالحرية والحب وياما جالست عم
عبدالرحيم لكن سكته بالحمار
لا يصادفها قضيب قطر .. لاقيت منى
خوجلى وبقال وبكري أبوبكر
والمسلمى ومنال خوجلي وانعام
حيموره وبورداب كتار و (ضحكنا
وبكينا) على عناقريب سوق الناقة
والشية الما لعب ولا مبردة وانتم
تغنون عم عبدالرحيم على الطرف
الآخر من العالم و(الدنيا كلها
سكك) المهم الناس يكونوا كويسين
ويصبحون على وطن كما يقول صديقنا
عصام عيسى
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: Mohamed Abdelgaleel)
|
Quote: قريت عيون الناس واتكلمت معاهن
ومع حميد مرتين تلاتة ومع محجوب
شريف مرة واحدة لكين طويلة وكان
معاي شلة من الشباب الحالمين
بالحرية والحب وياما جالست عم
عبدالرحيم لكن سكته بالحمار
لا يصادفها قضيب قطر .. |
وفى اجمل من انك تلاقى عيون الناس؟
يا محمد الجليل
كيف ايامك كانت ؟
عليك الله ما سمح الزول البلاقى الناس الزى محجوب وحميد
يسمحن ايامك
ويعلى مقامك
وتصبحون على وطن
او هكذا قال محمود درويش
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: عبدالرحمن الخليفة)
|
Quote: رغم انها كانت ستة ايام من ايام الله السبعة ....
فى خواتيم عام مضى ...
ولكن ومضة اللقاء القصير ايقظ اعوام خلت...تضج بالذكريات ...امتدت لمن غاب عن المكان ... |
عبدالرحمن
ايها الولد القامة الشامخة
لولاك ما التقينا
بفياض كرمك
وعلو كعبك فى جمع الشتات
يا لك من انسان
تتقزم امامه كل القامات
يا لك من فاضل
اوسعت لنا فى دارك الصغير مراقدا
واوسعتنا حبا لن نفيه
ولن نستطيع الى ايفائك بعضا من حقك علينا
فلك التجلة ولك المحبة تنبنى طوابقا تناطح السحب
| |
|
|
|
|
|
|
|
|
|
Re: مخصوم منك وطن يا خطاب حسن احمد ـ صور (Re: خالد العبيد)
|
خالد الحبيب
بدل شوق دى اخت بدل سفرية ؟
كنت شغالة فى الابيض فى مكتب التعليم
فى المناشط التربية فى فترة ما من الثمانينات
يوم جاتنى ورقة انى صرفت بدل سفرية ومفروض امضى عليها
وكنت من محلى ما سافرت
مشيت الحسابات سالت فى شنو ؟
قالوا لى فى زول صرف بدل سفرية باسمك
كان اسمه افتكر لو ما الذاكرة خانتنى اسماعيل
لكن اسماعيل منو ما تسالنى
المهم اتضح انه الزول مضى اسمى ولهف القرشين
ولا يهمك يا حكومة
هسى بدل الشوق دا بصرفوه من وين؟
فكر معانا عشان نحنا مخصوم مننا وطن
| |
|
|
|
|
|
|
| |
PLAYER
khatab
mohmed khalail
سلمى الشيخ سلامة
Mohamed Abdelgaleel
منوت
خضر حسين خليل
Hawari Nimir
Abdelgadir Galal Ahmed
Hafiz Suliman
mustafa bashar
محمد كابيلا
Adil Osman
الطيب شيقوق
Sudany Agouz
Osman Musa
محمد سنى دفع الله
هاشم الحسن
عزيز عيسى
عبدالله الشقليني
(شفت كيف بنعجزك)
خالد العبيد
سارة علي
فيس بوك
تويتر
انستقرام
يوتيوب
بنتيريست