بين عبد الباقى الظافر و كامل اٍدريس غابت الاسئلة المشروعة و توهّط الغزل (فيديو يوجد)

Quote: الزول دا زور في تاريخ ميلادو - بدل المرة - مرتين. المرة الأولى لمن عاوز يدخـل الوايبو كبر نفسو عشرة سنة عشان شروط الخبرة المطلوبة، لأنو عمرو الوكت داك كان 28 سنة والوظيفة المقدم ليها مطلوب خبرة 10 سنوات بعد التخرج من الجامعة، فقام أخونا في الله زاد عمرو عشرة سنة، وتاريخ ميـلادو من 54 هوب هوب هوب عملو 45. أها دا التزوير الأول. التزوير التاني لمن بقى متخارج من المنظمة ووصل السن القانوني للمعاش سنة 2005 - باعتبارو مولود 45 - قام أخونا في الله اتذكرإنو تاريخ ميـلادو الأصلي 54 ما 45 زي ما كان واهم الأمة، فقرر - كأي إنسان من العالم التالت - إنو يزور للمرة التانية والأخيرة في حياتو وهوب هوب جرّا الساعة عشرة سنة لي قدام وقال ليهم ياخوانا انتو غلطانين تاريخ ميـلادي شكلكم كتبتبوه بالغلط، أنا مولود 54 ما 45 . صاحبك قايل الجماعة عندهم قنابير، فتشو فتشو لمن لقو السي في القدم بيها سنة 82 للوظيفة، وراجعوها لقو ليك صاحبك كاتب تاريخ ميـلادو في الشهادة 45. المشكلة وين؟ المشكلة ما واحدة ديل مشكلتين. الأولى كان بقى مولود 54 فدا معناها إنو ما كان بيستحق الوظيفة الأولى لأنها عاوزة خبرة عشرة سنة زي ما اتفضلتا وذكرتا ليك، إلا إذا أخونا اتخرج من الجامعة واشتغل وعمرو 18 سنة، ودا ما حاصل لأنو اتخرج من الجامعة سنة 77! ولا الوظيفة البعدها الأترقى ليها بعد كم سنة في نفس المنظمة لأنها محتاجة خبرة 15 سنة، ولا البعدا، ولا البعدا، ولا حتى وظيفتو الأخـيرة كرئيس للمنظمة لسع محتاج ليهو تاني 5 سنة عشان يحصلا. أها طيب ولو قلنا مولود 45؟ كدا يبقى الراجل عاوز يبلف الجماعة وقام غير تاريخ ميلادو عشان يتحكر في وظيفتو ام ورقاً أخدر دي لي يوم القيامة 2015.